তেজোবিন্দূ

.. তেজোবিন্দূপনিষত্ ..
যত্র চিন্মাত্রকলনা যাত্যপহ্নবমঞ্জসা .
তচ্চিন্মাত্রমখণ্ডৈকরসং ব্রহ্ম ভবাম্যহম্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ॐ তেজোবিন্দুঃ পরং ধ্যানং বিশ্বাত্মহৃদিসংস্থিতম্ .
আণবং শাম্ভবং শান্তং স্থূলং সূক্ষ্মং পরং চ যত্ .. ১..
দুঃখাঢ্যং চ দুরারাধ্যং দুষ্প্রেক্ষ্যং মুক্তমব্যযম্ .
দুর্লভং তত্স্বযং ধ্যানং মুনীনাং চ মনীষিণাম্ .. ২..
যতাহারো জিতক্রোধো জিতসঙ্গো জিতেন্দ্রিযঃ .
নির্দ্বন্দ্বো নিরহঙ্কারো নিরাশীরপরিগ্রহঃ .. ৩..
অগম্যাগমকর্তা যো গম্যাঽগমযমানসঃ .
মুখে ত্রীণি চ বিন্দন্তি ত্রিধামা হংস উচ্যতে .. ৪..
পরং গুহ্যতমং বিদ্ধি হ্যস্ততন্দ্রো নিরাশ্রযঃ .
সোমরূপকলা সূক্ষ্মা বিষ্ণোস্তত্পরমং পদম্ .. ৫..
ত্রিবক্ত্রং ত্রিগুণং স্থানং ত্রিধাতুং রূপবর্জিতম্ .
নিশ্চলং নির্বিকল্পং চ নিরাকারং নিরাশ্রযম্ .. ৬..
উপাধিরহিতং স্থানং বাঙ্মনোঽতীতগোচরম্ .
স্বভাবং ভাবসংগ্রাহ্যমসঙ্ঘাতং পদাচ্চ্যুতম্ .. ৭..
অনানানন্দনাতীতং দুষ্প্রেক্ষ্যং মুক্তিমব্যযম্ .
চিন্ত্যমেবং বিনির্মুক্তং শাশ্বতং ধ্রুবমচ্যুতম্ .. ৮..
তদ্ব্রহ্মণস্তদধ্যাত্মং তদ্বিষ্ণোস্তত্পরাযণম্ .
অচিন্ত্যং চিন্মযাত্মানং যদ্ব্যোম পরমং স্থিতম্ .. ৯..
অশূন্যং শূন্যভাবং তু শূন্যাতীতং হৃদি স্থিতম্ .
ন ধ্যানং চ ন চ ধ্যাতা ন ধ্যেযো ধ্যেয এব চ .. ১০..
সর্বং চ ন পরং শূন্যং ন পরং নাপরাত্পরম্ .
অচিন্ত্যমপ্রবুদ্ধং চ ন সত্যং ন পরং বিদুঃ .. ১১..
মুনীনাং সংপ্রযুক্তং চ ন দেবা ন পরং বিদুঃ .
লোভং মোহং ভযং দর্পং কামং ক্রোধং চ কিল্বিষম্ .. ১২..
শীতোষ্ণে ক্ষুত্পিপাসে চ সঙ্কল্পকবিকল্পকম্ .
ন ব্রহ্মকুলদর্পং চ ন মুক্তিগ্রন্থিসঞ্চযম্ .. ১৩..
ন ভযং ন সুখং দুঃখং তথা মানাবমানযোঃ .
এতদ্ভাববিনির্মুক্তং তদ্গ্রাহ্যং ব্রহ্ম তত্পরম্ .. ১৪..
যমো হি নিযমস্ত্যাগো মৌনং দেশশ্চ কালতঃ .
আসনং মূলবন্ধশ্চ দেহসাম্যং চ দৃক্স্থিতিঃ .. ১৫..
প্রাণসংযমনং চৈব প্রত্যাহারশ্চ ধারণা .
আত্মধ্যানং সমাধিশ্চ প্রোক্তান্যঙ্গানি বৈ ক্রমাত্ .. ১৬..
সর্বং ব্রহ্মেতি বৈ জ্ঞানাদিন্দ্রিযগ্রামসংযমঃ .
যমোঽঽযমিতি সংপ্রোক্তোঽভ্যসনীযো মুহুর্মুহুঃ .. ১৭..
সজাতীযপ্রবাহশ্চ বিজাতীযতিরস্কৃতিঃ .
নিযমো হি পরানন্দো নিযমাত্ক্রিযতে বুধৈঃ .. ১৮..
ত্যাগো হি মহতা পূজ্যঃ সদ্যো মোক্ষপ্রদাযকঃ .. ১৯..
যস্মাদ্বাচো নিবর্তন্তে অপ্রাপ্য মনসা সহ .
যন্মৌনং যোগিভির্গম্যং তদ্ভজেত্সর্বদা বুধঃ .. ২০..
বাচো যস্মান্নিবর্তন্তে তদ্বক্তুং কেন শক্যতে .
প্রপঞ্চো যদি বক্তব্যঃ সোঽপি শব্দবিবর্জিতঃ .. ২১..
ইতি বা তদ্ভবেন্মৌনং সর্বং সহজসংজ্ঞিতম্ .
গিরাং মৌনং তু বালানামযুক্তং ব্রহ্মবাদিনাম্ .. ২২..
আদাবন্তে চ মধ্যে চ জনো যস্মিন্ন বিদ্যতে .
যেনেদং সততং ব্যাপ্তং স দেশো বিজনঃ স্মৃতঃ .. ২৩..
কল্পনা সর্বভূতানাং ব্রহ্মাদীনাং নিমেষতঃ .
কালশব্দেন নির্দিষ্টং হ্যখণ্ডানন্দমদ্বযম্ .. ২৪..
সুখেনৈব ভবেদ্যস্মিন্নজস্রং ব্রহ্মচিন্তনম্ .
আসনং তদ্বিজানীযাদন্যত্সুখবিনাশনম্ .. ২৫..
সিদ্ধযে সর্বভূতাদি বিশ্বাধিষ্ঠানমদ্বযম্ .
যস্মিন্সিদ্ধিং গতাঃ সিদ্ধাস্তত্সিদ্ধাসনমুচ্যতে .. ২৬..
যন্মূলং সর্বলোকানাং যন্মূলং চিত্তবন্ধনম্ .
মূলবন্ধঃ সদা সেব্যো যোগ্যোঽসৌ ব্রহ্মবাদিনাম্ .. ২৭..
অঙ্গানাং সমতাং বিদ্যাত্সমে ব্রহ্মণি লীযতে .
নো চেন্নৈব সমানত্বমৃজুত্বং শুষ্কবৃক্ষবত্ .. ২৮..
দৃষ্টীং জ্ঞানমযীং কৃত্বা পশ্যেদ্ব্রহ্মমযং জগত্ .
সা দৃষ্টিঃ পরমোদারা ন নাসাগ্রাবলোকিনী .. ২৯..
দ্রষ্টৃদর্শনদৃশ্যানাং বিরামো যত্র বা ভবেত্ .
দৃষ্টিস্তত্রৈব কর্তব্যা ন নাসাগ্রাবলোকিনী .. ৩০..
চিত্তাদিসর্বভাবেষু ব্রহ্মত্বেনৈব ভাবনাত্ .
নিরোধঃ সর্ববৃত্তীনাং প্রাণাযামঃ স উচ্যতে .. ৩১..
নিষেধনং প্রপঞ্চস্য রেচকাখ্যঃ সমীরিতঃ .
ব্রহ্মৈবাস্মীতি যা বৃত্তিঃ পূরকো বাযুরুচ্যতে .. ৩২..
ততস্তদ্বৃত্তিনৈশ্চল্যং কুম্ভকঃ প্রাণসংযমঃ .
অযং চাপি প্রবুদ্ধানামজ্ঞানাং ঘ্রাণপীডনম্ .. ৩৩..
বিষযেষ্বাত্মতাং দৃষ্ট্বা মনসশ্চিত্তরঞ্জকম্ .
প্রত্যাহারঃ স বিজ্ঞেযোঽভ্যসনীযো মুহুর্মুহুঃ .. ৩৪..
যত্র যত্র মনো যাতি ব্রহ্মণস্তত্র দর্শনাত্ .
মনসা ধারণং চৈব ধারণা সা পরা মতা .. ৩৫..
ব্রহ্মৈবাস্মীতি সদ্বৃত্ত্যা নিরালম্বতযা স্থিতিঃ .
ধ্যানশব্দেন বিখ্যাতঃ পরমানন্দদাযকঃ .. ৩৬..
নির্বিকারতযা বৃত্ত্যা ব্রহ্মাকারতযা পুনঃ .
বৃত্তিবিস্মরণং সম্যক্সমাধিরভিধীযতে .. ৩৭..
ইমং চাকৃত্রিমানন্দং তাবত্সাধু সমভ্যসেত্ .
লক্ষ্যো যাবত্ক্ষণাত্পুংসঃ প্রত্যক্ত্বং সম্ভবেত্স্বযম্ .. ৩৮..
ততঃ সাধননির্মুক্তঃ সিদ্ধো ভবতি যোগিরাট্ .
তত্স্বং রূপং ভবেত্তস্য বিষযো মনসো গিরাম্ .. ৩৯..
সমাধৌ ক্রিযমাণে তু বিঘ্নান্যাঅযান্তি বৈ বলাত্ .
অনুসন্ধানরাহিত্যমালস্যং ভোগলালসম্ .. ৪০..
লযস্তমশ্চ বিক্ষেপস্তেজঃ স্বেদশ্চ শূন্যতা .
এবং হি বিঘ্নবাহুল্যং ত্যাজ্যং ব্রহ্মবিশারদৈঃ .. ৪১..
ভাববৃত্ত্যা হি ভাবত্বং শূন্যবৃত্ত্যা হি শূন্যতা .
ব্রহ্মবৃত্ত্যা হি পূর্ণত্বং তযা পূর্ণত্বমভ্যসেত্ .. ৪২..
যে হি বৃত্তিং বিহাযৈনাং ব্রহ্মাখ্যাং পাবনীং পরাম্ .
বৃথৈব তে তু জীবন্তি পশুভিশ্চ সমা নরাঃ .. ৪৩..
যে তু বৃত্তিং বিজানন্তি জ্ঞাত্বা বৈ বর্ধযন্তি যে .
তে বৈ সত্পুরুষা ধন্যা বন্দ্যাস্তে ভুবনত্রযে .. ৪৪..
যেষাং বৃত্তিঃ সমা বৃদ্ধা পরিপক্বা চ সা পুনঃ .
তে বৈ সদ্ব্রহ্মতাং প্রাপ্তা নেতরে শব্দবাদিনঃ .. ৪৫..
কুশলা ব্রহ্মবার্তাযাং বৃত্তিহীনাঃ সুরাগিণঃ .
তেঽপ্যজ্ঞানতযা নূনং পুনরাযান্তি যান্তি চ .. ৪৬..
নিমিষার্ধং ন তিষ্ঠন্তি বৃত্তিং ব্রহ্মমযীং বিনা .
যথা তিষ্ঠন্তি ব্রহ্মাদ্যাঃ সনকাদ্যাঃ শুকাদযঃ .. ৪৭..
কারণং যস্য বৈ কার্যং কারণং তস্য জাযতে .
কারণং তত্ত্বতো নশ্যেত্কার্যাভাবে বিচারতঃ .. ৪৮..
অথ শুদ্ধং ভবেদ্বস্তু যদ্বৈ বাচামগোচরম্ .
উদেতি শুদ্ধচিত্তানাং বৃত্তিজ্ঞানং ততঃ পরম্ .. ৪৯..
ভাবিতং তীব্রবেগেন যদ্বস্তু নিশ্চযাত্মকম্ .
দৃশ্যং হ্যদৃশ্যতাং নীত্বা ব্রহ্মাকারেণ চিন্তযেত্ .. ৫০..
বিদ্বান্নিত্যং সুখে তিষ্ঠেদ্ধিযা চিদ্রসপূর্ণযা ..
ইতি প্রথমোঽধ্যাযঃ .. ১..
অথ হ কুমারঃ শিবং পপ্রচ্ছাঽখণ্ডৈকরস-
চিন্মাত্রস্বরূপমনুব্রূহীতি . স হোবাচ পরমঃ শিবঃ .
অখণ্ডৈকরসং দৃশ্যমখণ্ডৈকরসং জগত্ .
অখণ্ডৈকরসং ভাবমখণ্ডৈকরসং স্বযম্ .. ১..
অখণ্ডৈকরসো মন্ত্র অখণ্ডৈকরসা ক্রিযা .
অখণ্ডৈকরসং জ্ঞানমখণ্ডৈকরসং জলম্ .. ২..
অখণ্ডৈকরসা ভূমিরখণ্ডৈকরসং বিযত্ .
অখণ্ডৈকরসং শাস্ত্রমখণ্ডৈকরসা ত্রযী .. ৩..
অখণ্ডৈকরসং ব্রহ্ম চাখণ্ডৈকরসং ব্রতম্ .
অখণ্ডৈকরসো জীব অখণ্ডৈকরসো হ্যজঃ .. ৪..
অখণ্ডৈকরসো ব্রহ্মা অখণ্ডৈকরসো হরিঃ .
অখণ্ডৈকরসো রুদ্র অখণ্ডৈকরসোঽস্ম্যহম্ .. ৫..
অখণ্ডৈকরসো হ্যাত্মা হ্যখণ্ডৈকরসো গুরুঃ .
অখণ্ডৈকরসং লক্ষ্যমখণ্ডৈকরসং মহঃ .. ৬..
অখণ্ডৈকরসো দেহ অখণ্ডৈকরসং মনঃ .
অখণ্ডৈকরসং চিত্তমখণ্ডৈকরসং সুখম্ .. ৭..
অখণ্ডৈকরসা বিদ্যা অখণ্ডৈকরসোঽব্যযঃ .
অখণ্ডৈকরসং নিত্যমখণ্ডৈকরসং পরম্ .. ৮..
অখণ্ডৈকরসং কিঞ্চিদখণ্ডৈকরসং পরম্ .
অখণ্ডৈকরসাদন্যন্নাস্তি নাস্তি ষডানন .. ৯..
অখণ্ডৈকরসান্নাস্তি অখণ্ডৈকরসান্ন হি .
অখণ্ডৈকরসাত্কিঞ্চিদখণ্ডৈকরসাদহম্ .. ১০..
অখণ্ডৈকরসং স্থূলং সূক্ষ্মং চাখণ্ডরূপকম্ .
অখণ্ডৈকরসং বেদ্যমখণ্ডৈকরসো ভবান্ .. ১১..
অখণ্ডৈকরসং গুহ্যমখণ্ডৈকরসাদিকম্ .
অখণ্ডৈকরসো জ্ঞাতা হ্যখণ্ডৈকরসা স্থিতিঃ .. ১২..
অখণ্ডৈকরসা মাতা অখণ্ডৈকররসঃ পিতা .
অখণ্ডৈকরসো ভ্রাতা অখণ্ডৈকরসঃ পতিঃ .. ১৩..
অখণ্ডৈকরসং সূত্রমখণ্ডৈকরসো বিরাট্ .
অখণ্ডৈকরসং গাত্রমখণ্ডৈকরসং শিরঃ .. ১৪..
অখণ্ডৈকরসং চান্তরখণ্ডৈকরসং বহিঃ .
অখণ্ডৈকরসং পূর্ণমখণ্ডৈকরসামৃতম্ .. ১৫..
অখৈণ্ডৈকরসং গোত্রমখণ্ডৈকরসং গৃহম্ .
অখণ্ডৈকরসং গোপ্যমখণ্ডৈকরসশশশী .. ১৬..
অখণ্ডৈকরসাস্তারা অখণ্ডৈকরসো রবিঃ .
অখণ্ডৈকরসং ক্ষেত্রমখণ্ডৈকরসা ক্ষমা .. ১৭..
অখণ্ডৈকরস শান্ত অখণ্ডৈকরসোঽগুণঃ .
অখণ্ডৈকরসঃ সাক্ষী অখণ্ডৈকরসঃ সুহৃত্ .. ১৮..
অখণ্ডৈকরসো বন্ধুরখণ্ডৈকরসঃ সখা .
অখণ্ডৈকরসো রাজা অখণ্ডৈকরসং পুরম্ .. ১৯..
অখণ্ডৈকরসং রাজ্যমখণ্ডৈকরসাঃ প্রজাঃ .
অখণ্ডৈকরসং তারমখণ্ডৈকরসো জপঃ .. ২০..
অখণ্ডৈকরসং ধ্যানমখণ্ডৈকরসং পদম্ .
অখণ্ডৈকরসং গ্রাহ্যমখণ্ডৈকরসং মহত্ .. ২১..
অখণ্ডৈকরসং জ্যোতিরখণ্ডৈকরসং ধনম্ .
অখণ্ডৈকরসং ভোজ্যমখণ্ডৈকরসং হবিঃ .. ২২..
অখণ্ডৈকরসো হোম অখণ্ডৈকরসো জপঃ .
অখণ্ডৈকরসং স্বর্গমখণ্ডৈকরসঃ স্বযম্ .. ২৩..
অখণ্ডৈকরসং সর্বং চিন্মাত্রমিতি ভাবযেত্ .
চিন্মাত্রমেব চিন্মাত্রমখণ্ডৈকরসং পরম্ .. ২৪..
ভববর্জিতচিন্মাত্রং সর্বং চিন্মাত্রমেব হি .
ইদং চ সর্বং চিন্মাত্রমযং চিন্মযমেব হি .. ২৫..
আত্মভাবং চ চিন্মাত্রমখণ্ডৈকরসং বিদুঃ .
সর্বলোকং চ চিন্মাত্রং বত্তা মত্তা চ চিন্মযম্ .. ২৬..
আকাশো ভূর্জলং বাযুরগ্নির্ব্রহ্মা হরিঃ শিবঃ .
যত্কিঞ্চিদ্যন্ন কিঞ্চিচ্চ সর্বং চিন্মাত্রমেব হি .. ২৭..
অখণ্ডৈকরসং সর্বং যদ্যচ্চিন্মাত্রমেব হি .
ভূতং ভব্যং ভবিষ্যচ্চ সর্বং চিন্মাত্রমেব হি .. ২৮..
দ্রব্যং কালং চ চিন্মাত্রং জ্ঞানং জ্ঞেযং চিদেব হি .
জ্ঞাতা চিন্মাত্ররূপশ্চ সর্বং চিন্মযমেব হি .. ২৯..
সংভাষণং চ চিন্মাত্রং যদ্যচ্চিন্মাত্রমেব হি .
অসচ্চ সচ্চ চিন্মাত্রমাদ্যন্তং চিন্মযং সদা .. ৩০..
আদিরন্তশ্চ চিন্মাত্রং গুরুশিষ্যাদি চিন্মযম্ .
দৃগ্দৃশ্যং যদি চিন্মাত্রমস্তি চেচ্চিন্মযং সদা .. ৩১..
সর্বাশ্চর্যং হি চিন্মাত্রং দেহং চিন্মাত্রমেব হি .
লিঙ্গং চ কারণং চৈব চিন্মাত্রান্ন হি বিদ্যতে .. ৩২..
অহং ত্বং চৈব চিন্মাত্রং মূর্তামূর্তাদিচিন্মযম্ .
পুণ্যং পাপং চ চিন্মাত্রং জীবশ্চিন্মাত্রবিগ্রহঃ .. ৩৩..
চিন্মাত্রান্নাস্তি সঙ্কল্পশ্চিন্মাত্রান্নাস্তি বেদনম্ .
চিন্মাত্রান্নাস্তি মন্ত্রাদি চিন্মাত্রান্নাস্তি দেবতা .. ৩৪..
চিন্মাত্রান্নাস্তি দিক্পালাশ্চিন্মাত্রাদ্ব্যাবহারিকম্ .
চিন্মাত্রাত্পরমং ব্রহ্ম চিন্মাত্রান্নাস্তি কোঽপি হি .. ৩৫..
চিন্মাত্রান্নাস্তি মাযা চ চিন্মাত্রান্নাস্তি পূজনম্ .
চিন্মাত্রান্নাস্তি মন্তব্যং চিন্মাত্রান্নাস্তি সত্যকম্ .. ৩৬..
চিন্মাত্রান্নাস্তি কোশাদি চিন্মাত্রান্নাস্তি বৈ বসু .
চিন্মাত্রান্নাস্তি মৌনং চ চিন্মাত্রান্নস্ত্যমৌনকম্ .. ৩৭..
চিন্মাত্রান্নাস্তি বৈরাগ্যং সর্বং চিন্মাত্রমেব হি .
যচ্চ যাবচ্চ চিন্মাত্রং যচ্চ যাবচ্চ দৃশ্যতে .. ৩৮..
যচ্চ যাবচ্চ দূরস্থং সর্বং চিন্মাত্রমেব হি .
যচ্চ যাবচ্চ ভূতাদি যচ্চ যাবচ্চ লক্ষ্যতে .. ৩৯..
যচ্চ যাবচ্চ বেদান্তাঃ সর্বং চিন্মাত্রমেব হি .
চিন্মাত্রান্নাস্তি গমনং চিন্মাত্রান্নাস্তি মোক্ষকম্ .. ৪০..
চিন্মাত্রান্নাস্তি লক্ষ্যং চ সর্বং চিন্মাত্রমেব হি .
অখণ্ডৈকরসং ব্রহ্ম চিন্মাত্রান্ন হি বিদ্যতে .. ৪১..
শাস্ত্রে মযি ত্বযীশে চ হ্যখণ্ডৈকরসো ভবান্ .
ইত্যেকরূপতযা যো বা জানাত্যহং ত্বিতি .. ৪২..
সকৃজ্জ্ঞানেন মুক্তিঃ স্যাত্সম্যগ্জ্ঞানে স্বযং গুরুঃ .. ৪৩..
ইতি দ্বিতীযোঽধ্যাযঃ .. ২..
কুমারঃ পিতরমাত্মানুভবমনুব্রূহীতি পপ্রচ্ছ .
স হোবাচ পরঃ শিবঃ .
পরব্রহ্মস্বরূপোঽহং পরমানন্দমস্ম্যহম্ .
কেবলং জ্ঞানরূপোঽহং কেবলং পরমোঽস্ম্যহম্ .. ১..
কেবলং শান্তরূপোঽহং কেবলং চিন্মযোঽস্ম্যহম্ .
কেবলং নিত্যরূপোঽহং কেবলং শাশ্বতোঽস্ম্যহম্ .. ২..
কেবলং সত্ত্বরূপোঽহমহং ত্যক্ত্বাহমস্ম্যহম্ .
সর্বহীনস্বরূপোঽহং চিদাকাশমযোঽস্ম্যহম্ .. ৩..
কেবলং তুর্যরূপোঽস্মি তুর্যাতীতোঽস্মি কেবলঃ .
সদা চৈতন্যরূপোঽস্মি চিদানন্দমযোঽস্ম্যহম্ .. ৪..
কেবলাকাররূপোঽস্মি শুদ্ধরূপোঽস্ম্যহং সদা .
কেবলং জ্ঞানরূপোঽস্মি কেবলং প্রিযমস্ম্যহম্ .. ৫..
নির্বিকল্পস্বরূপোঽস্মি নিরীহোঽস্মি নিরামযঃ .
সদাঽসঙ্গস্বরূপোঽস্মি নির্বিকারোঽহমব্যযঃ .. ৬..
সদৈকরসরূপোঽস্মি সদা চিন্মাত্রবিগ্রহঃ .
অপরিচ্ছিন্নরূপোঽস্মি হ্যখণ্ডানন্দরূপবান্ .. ৭..
সত্পরানন্দরূপোঽস্মি চিত্পরানন্দমস্ম্যহম্ .
অন্তরান্তররূপোঽহমবাঙ্মনসগোচরঃ .. ৮..
আত্মানন্দস্বরূপোঽহং সত্যানন্দোঽস্ম্যহং সদা .
আত্মারামস্বরূপোঽস্মি হ্যযমাত্মা সদাশিবঃ .. ৯..
আত্মপ্রকাশরূপোঽস্মি হ্যাত্মজ্যোতিরসোঽস্ম্যহম্ .
আদিমধ্যান্তহীনোঽস্মি হ্যাকাশসদৃশোঽস্ম্যহম্ .. ১০..
নিত্যশুদ্ধচিদানন্দসত্তামাত্রোঽহমব্যযঃ .
নিত্যবুদ্ধবিশুদ্ধৈকসচ্চিদানন্দমস্ম্যহম্ .. ১..
নিত্যশেষস্বরূপোঽস্মি সর্বাতীতোঽস্ম্যহং সদা .
রূপাতীতস্বরূপোঽস্মি পরমাকাশবিগ্রহঃ .. ১২..
ভূমানন্দস্বরূপোঽস্মি ভাষাহীনোঽস্ম্যহং সদা .
সর্বাধিষ্ঠানরূপোঽস্মি সর্বদা চিদ্ঘনোঽস্ম্যহম্ .. ১৩..
দেহভাববিহীনোঽস্মি চিন্তাহীনোঽস্মি সর্বদা .
চিত্তবৃত্তিবিহীনোঽহং চিদাত্মৈকরসোঽস্ম্যহম্ .. ১৪..
সর্বদৃশ্যবিহীনোঽহং দৃগ্রূপোঽস্ম্যহমেব হি .
সর্বদা পূর্ণরূপোঽস্মি নিত্যতৃপ্তোঽস্ম্যহং সদা .. ১৫..
অহং ব্রহ্মৈব সর্বং স্যাদহং চৈতন্যমেব হি .
অহমেবাহমেবাস্মি ভূমাকাশস্বরূপবান্ .. ১৬..
অহমেব মহানাত্মা হ্যহমেব পরাত্পরঃ .
অহমন্যবদাভামি হ্যহমেব শরীরবত্ .. ১৭..
অহং শিষ্যবদাভামি হ্যযং লোকত্রযাশ্রযঃ .
অহং কালত্রযাতীত অহং বেদৈরুপাসিতঃ .. ১৮..
অহং শাস্ত্রেণ নির্ণীত অহং চিত্তে ব্যবস্থিতঃ .
মত্ত্যক্তং নাস্তি কিঞ্চিদ্বা মত্ত্যক্তং পৃথিবী চ বা .. ১৯..
মযাতিরিক্তং যদ্যদ্বা তত্তন্নাস্তীতি নিশ্চিনু .
অহং ব্রহ্মাস্মি সিদ্ধোঽস্মি নিত্যশুদ্ধোঽস্ম্যহং সদা .. ২০..
নির্গুণঃ কেবলাত্মাস্মি নিরাকারোঽস্ম্যহং সদা .
কেবলং ব্রহ্মমাত্রোঽস্মি হ্যজরোঽস্ম্যমরোঽস্ম্যহম্ .. ২১..
স্বযমেব স্বযং ভামি স্বযমেব সদাত্মকঃ .
স্বযমেবাত্মনি স্বস্থঃ স্বযমেব পরা গতিঃ .. ২২..
স্বযমেব স্বযং ভঞ্জে স্বযমেব স্বযং রমে .
স্বযমেব স্বযং জ্যোতিঃ স্বযমেব স্বযং মহঃ .. ২৩..
স্বস্যাত্মনি স্বযং রংস্যে স্বাত্মন্যেব বিলোকযে .
স্বাত্মন্যেব সুখাসীনঃ স্বাত্মমাত্রাবশেষকঃ .. ২৪..
স্বচৈতন্যে স্বযং স্থাস্যে স্বাত্মরাজ্যে সুখে রমে .
স্বাত্মসিংহাসনে স্থিত্বা স্বাত্মনোঽন্যন্ন চিন্তযে .. ২৫..
চিদ্রূপমাত্রং ব্রহ্মৈব সচ্চিদানন্দমদ্বযম্ .
আনন্দঘন এবাহমহং ব্রহ্মাস্মি কেবলম্ .. ২৬..
সর্বদা সর্বশূন্যোঽহং সর্বাত্মানন্দবানহম্ .
নিত্যানন্দস্বরূপোঽহমাত্মাকাশোঽস্মি নিত্যদা .. ২৭..
অহমেব হৃদাকাশশ্চিদাদিত্যস্বরূপবান্ .
আত্মনাত্মনি তৃপ্তোঽস্মি হ্যরূপোঽস্ম্যহমব্যযঃ .. ২৮..
একসংখ্যাবিহীনোঽস্মি নিত্যমুক্তস্বরূপবান্ .
আকাশাদপি সূক্ষ্মোঽহমাদ্যন্তাভাববানহম্ .. ২৯..
সর্বপ্রকাশরূপোঽহং পরাবরসুখোঽস্ম্যহম্ .
সত্তামাত্রস্বরূপোঽহং শুদ্ধমোক্ষস্বরূপবান্ .. ৩০..
সত্যানন্দস্বরূপোঽহং জ্ঞানানন্দঘনোঽস্ম্যহম্ .
বিজ্ঞানমাত্ররূপোঽহং সচ্চিদানন্দলক্ষণঃ .. ৩১..
ব্রহ্মমাত্রমিদং সর্বং ব্রহ্মণোঽন্যন্ন কিঞ্চন .
তদেবাহং সদানন্দং ব্রহ্মৈবাহং সনাতনম্ .. ৩২..
ত্বমিত্যেতত্তদিত্যেতন্মত্তোঽন্যন্নাস্তি কিঞ্চন .
চিচ্চৈতন্যস্বরূপোঽহমহমেব শিবঃ পরঃ .. ৩৩..
অতিভাবস্বরূপোঽহমহমেব সুখাত্মকঃ .
সাক্ষিবস্তুবিহীনত্বাত্সাক্ষিত্বং নাস্তি মে সদা .. ৩৪..
কেবলং ব্রহ্মমাত্রত্বাদহমাত্মা সনাতনঃ .
অহমেবাদিশেষোঽহমহং শেষোঽহমেব হি .. ৩৫..
নামরূপবিমুক্তোঽহমহমানন্দবিগ্রহঃ .
ইন্দ্রিযাভাবরূপোঽহং সর্বভাবস্বরূপকঃ .. ৩৬..
বন্ধমুক্তিবিহীনোঽহং শাশ্বতানন্দবিগ্রহঃ .
আদিচৈতন্যমাত্রোঽহমখণ্ডৈকরসোঽস্ম্যহম্ .. ৩৭..
বাঙ্মনোঽগোচরশ্চাহং সর্বত্র সুখবানহম্ .
সর্বত্র পূর্ণরূপোঽহং ভূমানন্দমযোঽস্ম্যহম্ .. ৩৮..
সর্বত্র তৃপ্তিরূপোঽহং পরামৃতরসোঽস্ম্যহম্ .
একমেবাদ্বিতীযং সদ্ব্রহ্মৈবাহং ন সংশযঃ .. ৩৯..
সর্বশূন্যস্বরূপোঽহং সকলাগমগোচরঃ .
মুক্তোঽহং মোক্ষরূপোঽহং নির্বাণসুখরূপবান্ ..৪০..
সত্যবিজ্ঞানমাত্রোঽহং সন্মাত্রানন্দবানহম্ .
তুরীযাতীতরূপোঽহং নির্বিকল্পস্বরূপবান্ .. ৪১..
সর্বদা হ্যজরূপোঽহং নীরাগোঽস্মি নিরঞ্জনঃ .
অহং শুদ্ধোঽস্মি বুদ্ধোঽস্মি নিত্যোঽস্মি প্রভুরস্ম্যহম্ .. ৪২..
ওঙ্কারার্থস্বরূপোঽস্মি নিষ্কলঙ্কমযোঽস্ম্যহম্ .
চিদাকারস্বরূপোঽস্মি নাহমস্মি ন সোঽস্ম্যহম্ .. ৪৩..
ন হি কিঞ্চিত্স্বরূপোঽস্মি নির্ব্যাপারস্বরূপবান্ .
নিরংশোঽস্মি নিরাভাসো ন মনো নেন্দ্রিযোঽস্ম্যহম্ .. ৪৪..
ন বুদ্ধির্ন বিকল্পোঽহং ন দেহাদিত্রযোঽস্ম্যহম্ .
ন জাগ্রত্স্বপ্নরূপোঽহং ন সুষুপ্তিস্বরূপবান্ .. ৪৫..
ন তাপত্রযরূপোঽহং নেষণাত্রযবানহম্ .
শ্রবণং নাস্তি মে সিদ্ধের্মননং চ চিদাত্মনি .. ৪৬..
সজাতীযং ন মে কিঞ্চিদ্বিজাতীযং ন মে ক্বচিত্ .
স্বগতং চ ন মে কিঞ্চিন্ন মে ভেদত্রযং ক্বচিত্ .. ৪৭..
অসত্যং হি মনোরূপমসত্যং বুদ্ধিরূপকম্ .
অহঙ্কারমসিদ্ধীতি নিত্যোঽহং শাশ্বতো হ্যজঃ .. ৪৮..
দেহত্রযমসদ্বিদ্ধি কালত্রযমসত্সদা .
গুণত্রযমসত্বিদ্ধি হ্যযং সত্যাত্মকঃ শুচিঃ  .. ৪৯..
শ্রুতং সর্বমসত্দ্বিদ্ধি বেদং সর্বমসত্সদা .
শাস্ত্রং সর্বমসত্দ্বিদ্ধি হ্যহং সত্যচিদাত্মকঃ .. ৫০..
মূর্তিত্রযমসদ্বিদ্ধি সর্বভূতমসত্সদা .
সর্বতত্ত্বমসদ্বিদ্ধি হ্যযং ভূমা সদাশিবঃ .. ৫১..
গুরুশিষ্যমসদ্বিদ্ধি গুরোর্মন্ত্রমসত্ততঃ .
যদ্দৃশ্যং তদসদ্বিদ্ধি ন মাং বিদ্ধি তথাবিধম্ .. ৫২..
যচ্চিন্ত্যং তদসদ্বিদ্ধি যন্ন্যাযং তদসত্সদা .
যদ্ধিতং তদসদ্বিদ্ধি ন মাং বিদ্ধি তথাবিধম্ .. ৫৩..
সর্বান্প্রাণানসদ্বিদ্ধি সর্বান্ভোগানসত্ত্বিতি .
দৃষ্টং শ্রুতমসদ্বিদ্ধি ওতং প্রোতমসন্মযম্ .. ৫৪..
কার্যাকার্যমসদ্বিদ্ধি নষ্টং প্রাপ্তমসন্মযম্ .
দুঃখাদুঃখমসদ্বিদ্ধি সর্বাসর্বমন্মযম্ .. ৫৫..
পূর্ণাপূর্ণমসদ্বিদ্ধি ধর্মাধর্মমসন্মযম্ .
লাভালাভাবসদ্বিদ্ধি জযাজযমসন্মযম্ .. ৫৬..
শব্দং সর্বমসদ্বিদ্ধি স্পর্শং সর্বমসত্সদা .
রূপং সর্বমসদ্বিদ্ধি রসং সর্বমসন্মযম্ .. ৫৭..
গন্ধং সর্বমসদ্বিদ্ধি সর্বাজ্ঞানমসন্মযম্ .
অসদেব সদা সর্বমসদেব ভবোদ্ভবম্ .. ৫৮..
অসদেব গুণং সর্বং সন্মাত্রমহমেব হি .
স্বাত্মমন্ত্রং সদা পশ্যেত্স্বাত্মমন্ত্রং সদাভ্যসেত্ .. ৫৯..
অহং ব্রহ্মাস্মি মন্ত্রোঽযং দৃশ্যপাপং বিনাশযেত্ .
অহং ব্রহ্মাস্মি মন্ত্রোঽযমন্যমন্ত্রং বিনাশযেত্ .. ৬০..
অহং ব্রহ্মাস্মি মন্ত্রোঽযং দেহদোষং বিনাশযেত্ .
অহং ব্রহ্মাস্মি মন্ত্রোঽযং জন্মপাপং বিনাশযেত্ .. ৬১..
অহং ব্রহ্মাস্মি মন্ত্রোঽযং মৃত্যুপাশং বিনাশযেত্ .
অহং ব্রহ্মাস্মি মন্ত্রোঽযং দ্বৈতদুঃখং বিনাশযেত্ .. ৬২..
অহং ব্রহ্মাস্মি মন্ত্রোঽযং ভেদবুদ্ধিং বিনাশযেত্ .
অহং ব্রহ্মাস্মি মন্ত্রোঽযং চিন্তাদুঃখং বিনাশযেত্ .. ৬৩..
অহং ব্রহ্মাস্মি মন্ত্রোঽযং বুদ্ধিব্যাধিং বিনাশযেত্ .
অহং ব্রহ্মাস্মি মন্ত্রোঽযং চিত্তবন্ধং বিনাশযেত্ .. ৬৪..
অহং ব্রহ্মাস্মি মন্ত্রোঽযং সর্বব্যাধীন্বিনাশযেত্ .
অহং ব্রহ্মাস্মি মন্ত্রোঽযং সর্বশোকং বিনাশযেত্ .. ৬৫..
অহং ব্রহ্মাস্মি মন্ত্রোঽযং কামাদীন্নাশযেত্ক্ষণাত্ .
অহং ব্রহ্মাস্মি মন্ত্রোঽযং ক্রোধশক্তিং বিনাশযেত্ .. ৬৬..
অহং ব্রহ্মাস্মি মন্ত্রোঽযং চিত্তবৃত্তিং বিনাশযেত্ .
অহং ব্রহ্মাস্মি মন্ত্রোঽযং সঙ্কল্পাদীন্বিনাশযেত্ .. ৬৭..
অহং ব্রহ্মাস্মি মন্ত্রোঽযং কোটিদোষং বিনাশযেত্ .
অহং ব্রহ্মাস্মি মন্ত্রোঽযং সর্বতন্ত্রং বিনাশযেত্ .. ৬৮..
অহং ব্রহ্মাস্মি মন্ত্রোঽযমাত্মাজ্ঞানং বিনাশযেত্ .
অহং ব্রহ্মাস্মি মন্ত্রোঽযমাত্মলোকজযপ্রদঃ .. ৬৯..
অহং ব্রহ্মাস্মি মন্ত্রোঽযমপ্রতর্ক্যসুখপ্রদঃ .
অহং ব্রহ্মাস্মি মন্ত্রোঽযমজডত্বং প্রযচ্ছতি .. ৭০..
অহং ব্রহ্মাস্মি মন্ত্রোঽযমনাত্মাসুরমর্দনঃ .
অহং ব্রহ্মাস্মি বজ্রোঽযমনাত্মাখ্যগিরীন্হরেত্ .. ৭১..
অহং ব্রহ্মাস্মি মন্ত্রোঽযমনাত্মাখ্যাসুরান্হরেত্ .
অহং ব্রহ্মাস্মি মন্ত্রোঽযং সর্বাংস্তান্মোক্ষযিষ্যতি .. ৭২..
অহং ব্রহ্মাস্মি মন্ত্রোঽযং জ্ঞানানন্দং প্রযচ্ছতি .
সপ্তকোটিমহামন্ত্রং জন্মকোটিশতপ্রদম্ .. ৭৩..
সর্বমন্ত্রান্সমুত্সৃজ্য এতং মন্ত্রং সমভ্যসেত্ .
সদ্যো মোক্ষমবাপ্নোতি নাত্র সন্দেহমণ্বপি .. ৭৪..
ইতি তৃতীযোধ্যাযঃ .. ৩..
কুমারঃ পরমেশ্বরং পপ্রচ্ছ জীবন্মুক্তবিদেহমুক্তযোঃ
স্থিতিমনুব্রূহীতি . স হোবাচ পরঃ শিবঃ .
চিদাত্মাহং পরাত্মাহং নির্গুণোঽহং পরাত্পরঃ .
আত্মমাত্রেণ যস্তিষ্ঠেত্স জীবন্মুক্ত উচ্যতে .. ১..
দেহত্রযাতিরিক্তোঽহং শুদ্ধচৈতন্যমস্ম্যহম্ .
ব্রহ্মাহমিতি যস্যান্তঃ স জীবনমুক্ত উচ্যতে .. ২..
আনন্দঘনরূপোঽস্মি পরানন্দঘনোঽস্ম্যহম্ .
যস্য দেহাদিকং নাস্তি যস্য ব্রহ্মেতি নিশ্চযঃ .
পরমানন্দপূর্ণো যঃ স জীবন্মুক্ত উচ্যতে .. ৩..
যস্য কিঞ্চিদহং নাস্তি চিন্মাত্রেণাবতিষ্ঠতে .
চৈতন্যমাত্রো যস্যান্তশ্চিন্মাত্রৈকস্বরূপবান্ .. ৪..
সর্বত্র পূর্ণরূপাত্মা সর্বত্রাত্মাবশেষকঃ .
আনন্দরতিরব্যক্তঃ পরিপূর্ণশ্চিদাত্মকঃ .. ৫..
শুদ্ধচৈতন্যরূপাত্মা সর্বসঙ্গবিবর্জিতঃ .
নিত্যানন্দঃ প্রসন্নাত্মা হ্যন্যচিন্তাবিবর্জিতঃ .. ৬
কিঞ্চিদস্তিত্বহীনো যঃ স জীবন্মুক্ত উচ্যতে .
ন মে চিত্তং ন মে বুদ্ধির্নাহঙ্কারো ন চেন্দ্রিযম্ .. ৭..
ন মে দেহঃ কদাচিদ্বা ন মে প্রাণাদযঃ ক্বচিত্ .
ন মে মাযা ন মে কামো ন মে ক্রোধঃ পরোঽস্ম্যহম্ .. ৮..
ন মে কিঞ্চিদিদং বাপি ন মে কিঞ্চিত্ক্বচিজ্জগত্ .
ন মে দোষো ন মে লিঙ্গং ন মে চক্ষুর্ন মে মনঃ .. ৯..
ন মে শ্রোত্রং ন মে নাসা ন মে জিহ্বা ন মে করঃ .
ন মে জাগ্রন্ন মে স্বপ্নং ন মে কারণমণ্বপি .. ১০..
ন মে তুরীযমিতি যঃ স জীবন্মুক্ত উচ্যতে .
ইদং সর্বং ন মে কিঞ্চিদযং সর্বং ন মে ক্বচিত্ .. ১১..
ন মে কালো ন মে দেশো ন মে বস্তু ন মে মতিঃ .
ন মে স্নানং ন মে সন্ধ্যা ন মে দৈবং ন মে স্থলম্ .. ১২..
ন মে তীর্থং ন মে সেবা ন মে জ্ঞানং ন মে পদম্ .
ন মে বন্ধো ন মে জন্ম ন মে বাক্যং ন মে রবিঃ .. ১৩..
ন মে পুণ্যং ন মে পাপং ন মে কার্যং ন মে শুভম্ .
নে মে জীব ইতি স্বাত্মা ন মে কিঞ্চিজ্জগত্রযম্ .. ১৪..
ন মে মোক্ষো ন মে দ্বৈতং ন মে বেদো ন মে বিধিঃ .
ন মেঽন্তিকং ন মে দূরং ন মে বোধো ন মে রহঃ .. ১৫..
ন মে গুরুর্ন মে শিষ্যো ন মে হীনো ন চাধিকঃ .
ন মে ব্রহ্ম ন মে বিষ্ণুর্ন মে রুদ্রো ন চন্দ্রমাঃ .. ১৬..
ন মে পৃথ্বী ন মে তোযং ন মে বাযুর্ন মে বিযত্ .
ন মে বহ্নির্ন মে গোত্রং ন মে লক্ষ্যং ন মে ভবঃ .. ১৭..
ন মে ধ্যাতা ন মে ধ্যেযং ন মে ধ্যানং ন মে মনুঃ .
ন মে শীতং ন মে চোষ্ণং ন মে তৃষ্ণা ন মে ক্ষুধা .. ১৮..
ন মে মিত্রং ন মে শত্রুর্ন মে মোহো ন মে জযঃ .
ন মে পূর্বং ন মে পশ্চান্ন মে চোর্ধ্বং ন মে দিশঃ .. ১৯..
ন মে বক্তব্যমল্পং বা ন মে শ্রোতব্যমণ্বপি .
ন মে গন্তব্যমীষদ্বা ন মে ধ্যাতব্যমণ্বপি .. ২০..
ন মে ভোক্তব্যমীষদ্বা ন মে স্মর্তব্যমণ্বপি .
ন মে ভোগো ন মে রাগো ন মে যাগো ন মে লযঃ .. ২১..
ন মে মৌর্খ্যং ন মে শান্তং ন মে বন্ধো ন মে প্রিযম্ .
ন মে মোদঃ প্রমোদো বা ন মে স্থূলং ন মে কৃশম্ .. ২২..
ন মে দীর্ঘং ন মে হ্রস্বং ন মে বৃদ্ধির্ন মে ক্ষযঃ .
অধ্যারোপোঽপবাদো বা ন মে চৈকং ন মে বহু .. ২৩..
ন মে আন্ধ্যং ন মে মান্দ্যং ন মে পট্বিদমণ্বপি .
ন মে মাংসং ন মে রক্তং ন মে মেদো ন মে হ্যসৃক্ .. ২৪..
ন মে মজ্জা ন মেঽস্থির্বা ন মে ত্বগ্ধাতু সপ্তকম্ .
ন মে শুক্লং ন মে রক্তং ন মে নীলং নমে পৃথক্ .. ২৫..
ন মে তাপো ন মে লাভো মুখ্যং গৌণং ন মে ক্বচিত্ .
ন মে ভ্রান্তির্ন মে স্থৈর্যং ন মে গুহ্যং ন মে কুলম্ .. ২৬..
ন মে ত্যাজ্যং ন মে গ্রাহ্যং ন মে হাস্যং ন মে নযঃ .
ন মে বৃত্তং ন মে গ্লানির্ন মে শোষ্যং ন মে সুখম্ .. ২৭..
ন মে জ্ঞাতা ন মে জ্ঞানং ন মে জ্ঞেযং ন মে স্বযম্ .
ন মে তুভ্যং নমে মহ্যং ন মে ত্বং চ ন মে ত্বহম্ .. ২৮..
ন মে জরা ন মে বাল্যং ন মে যৌবনমণ্বপি .
অহং ব্রহ্মাস্ম্যহং ব্রহ্মাস্ম্যহং ব্রহ্মেতি নিশ্চযঃ .. ২৯..
চিদহং চিদহং চেতি স জীবন্মুক্ত উচ্যতে .
ব্রহ্মৈবাহং চিদেবাহং পরো বাহং ন সংশযঃ .. ৩০..
স্বযমেব স্বযং হংসঃ স্বযমেব স্বযং স্থিতঃ .
স্বযমেব স্বযং পশ্যেত্স্বাত্মরাজ্যে সুখং বসেত্ .. ৩১..
স্বাত্মানন্দং স্বযং ভোক্ষ্যেত্স জীবন্মুক্ত উচ্যতে .
স্বযমেবৈকবীরোঽগ্রে স্বযমেব প্রভুঃ স্মৃতঃ .. ৩২..
ব্রহ্মভূতঃ প্রশান্তাত্মা ব্রহ্মানন্দমযঃ সুখী .
স্বচ্ছরূপো মহামৌনী বৈদেহী মুক্ত এব সঃ .. ৩৩..
সর্বাত্মা সমরূপাত্মা শুদ্ধাত্মা ত্বহমুত্থিতঃ .
একবর্জিত একাত্মা সর্বাত্মা স্বাত্মমাত্রকঃ .. ৩৪..
অজাত্মা চামৃতাত্মাহং স্বযমাত্মাহমব্যযঃ .
লক্ষ্যাত্মা ললিতাত্মাহং তূষ্ণীমাত্মস্বভাববান্ .. ৩৫..
আনন্দাত্মা প্রিযো হ্যাত্মা মোক্ষাত্মা বন্ধবর্জিতঃ .
ব্রহ্মৈবাহং চিদেবাহমেবং বাপি ন চিন্ত্যতে .. ৩৬..
চিন্মাত্রেণৈব যস্তিষ্ঠেদ্বৈদেহী মুক্ত এব সঃ ..৩৭..
নিশ্চযং চ পরিত্যজ্য অহং ব্রহ্মেতি নিশ্চযম্ .
আনন্দভরিতস্বান্তো বৈদেহী মুক্ত এব সঃ .. ৩৮..
সর্বমস্তীতি নাস্তীতি নিশ্চযং ত্যজ্য তিষ্ঠতি .
অহং ব্রহ্মাস্মি নাস্মীতি সচ্চিদানন্দমাত্রকঃ .. ৩৯..
কিঞ্চিত্ক্বচিত্কদাচিচ্চ আত্মানং ন স্পৃশত্যসৌ .
তূষ্ণীমেব স্থিতস্তূষ্ণীং তূষ্ণীং সত্যং ন কিঞ্চন .. ৪০..
পরমাত্মা গুণাতীতঃ সর্বাত্মা ভূতভাবনঃ .
কালভেদং বস্তুভেদং দেশভেদং স্বভেদকম্ .. ৪১..
কিঞ্চিদ্ভেদং ন তস্যাস্তি কিঞ্চিদ্বাপি ন বিদ্যতে .
অহং ত্বং তদিদং সোঽযং কালাত্মা কালহীনকঃ .. ৪২..
শূন্যাত্মা সূক্ষ্মরূপাত্মা বিশ্বাত্মা বিশ্বহীনকঃ .
দেবাত্মাদেবহীনাত্মা মেযাত্মা মেযবর্জিতঃ .. ৪৩..
সর্বত্র জডহীনাত্মা সর্বেষামন্তরাত্মকঃ .
সর্বসঙ্কল্পহীনাত্মা চিন্মাত্রোঽস্মীতি সর্বদা .. ৪৪..
কেবলঃ পরমাত্মাহং কেবলো জ্ঞানবিগ্রহঃ .
সত্তামাত্রস্বরূপাত্মা নান্যত্কিঞ্চিজ্জগদ্ভযম্ .. ৪৫..
জীবেশ্বরেতি বাক্ক্বেতি বেদশাস্ত্রাদ্যহং ত্বিতি .
ইদং চৈতন্যমেবেতি অহং চৈতন্যমিত্যপি .. ৪৬..
ইতি নিশ্চযশূন্যো যো বৈদেহী মুক্ত এব সঃ .
চৈতন্যমাত্রসংসিদ্ধঃ স্বাত্মারামঃ সুখাসনঃ .. ৪৭..
অপরিচ্ছিন্নরূপাত্মা অণুস্থূলাদিবর্জিতঃ .
তুর্যতুর্যা পরানন্দো বৈদেহী মুক্ত এব সঃ .. ৪৮..
নামরূপবিহীনাত্মা পরসংবিত্সুখাত্মকঃ .
তুরীযাতীতরূপাত্মা শুভাশুভবিবর্জিতঃ .. ৪৯..
যোগাত্মা যোগযুক্তাত্মা বন্ধমোক্ষবিবর্জিতঃ .
গুণাগুণবিহীনাত্মা দেশকালাদিবর্জিতঃ .. ৫০..
সাক্ষ্যসাক্ষিত্বহীনাত্মা কিঞ্চিত্কিঞ্চিন্ন কিঞ্চন .
যস্য প্রপঞ্চমানং ন ব্রহ্মাকারমপীহ ন .. ৫১..
স্বস্বরূপে স্বযংজ্যোতিঃ স্বস্বরূপে স্বযংরতিঃ .
বাচামগোচরানন্দো বাঙ্মনোগোচরঃ স্বযম্ .. ৫২..
অতীতাতীতভাবো যো বৈদেহী মুক্ত এব সঃ .
চিত্তবৃত্তেরতীতো যশ্চিত্তবৃত্ত্যবভাসকঃ .. ৫৩..
সর্ববৃত্তিবিহীনাত্মা বৈদেহী মুক্ত এব সঃ .
তস্মিন্কালে বিদেহীতি দেহস্মরণবর্জিতঃ .. ৫৪..
ঈষন্মাত্রং স্মৃতং চেদ্যস্তদা সর্বসমন্বিতঃ .
পরৈরদৃষ্টবাহ্যাত্মা পরমানন্দচিদ্ধনঃ .. ৫৫..
পরৈরদৃষ্টবাহ্যাত্মা সর্ববেদান্তগোচরঃ .
ব্রহ্মামৃতরসাস্বাদো ব্রহ্মামৃতরসাযনঃ .. ৫৬..
ব্রহ্মামৃতরসাসক্তো ব্রহ্মামৃতরসঃ স্বযম্ .
ব্রহ্মামৃতরসে মগ্নো ব্রহ্মানন্দশিবার্চনঃ .. ৫৭..
ব্রহ্মামৃতরসে তৃপ্তো ব্রহ্মানন্দানুভাবকঃ .
ব্রহ্মানন্দশিবানন্দো ব্রহ্মানন্দরসপ্রভঃ .. ৫৮..
ব্রহ্মানন্দপরং জ্যোতির্ব্রহ্মানন্দনিরন্তরঃ .
ব্রহ্মানন্দরসান্নাদো ব্রহ্মানন্দকুটুম্বকঃ .. ৫৯..
ব্রহ্মানন্দরসারূঢো ব্রহ্মানন্দৈকচিদ্ধনঃ .
ব্রহ্মানন্দরসোদ্বাহো ব্রহ্মানন্দরসম্ভরঃ .. ৬০..
ব্রহ্মানন্দজনৈর্যুক্তো ব্রহ্মানন্দাত্মনি স্থিতঃ .
আত্মরূপমিদ.ম্ সর্বমাত্মনোঽন্যন্ন কঞ্চন .. ৬১..
সর্বমাত্মাহমাত্মাস্মি পরমাত্মা পরাত্মকঃ .
নিত্যানন্দ স্বরূপাত্মা বৈদেহী মুক্ত এব সঃ .. ৬২..
পূর্ণরূপো মহানাত্মা প্রীতাত্মা শাশ্বতাত্মকঃ .
সর্বান্তর্যামিরূপাত্মা নির্মলাত্মা নিরাত্মকঃ .. ৬৩..
নির্বিকারস্বরূপাত্মা শুদ্ধাত্মা শান্তরূপকঃ .
শান্তাশান্তস্বরূপাত্মা নৈকাত্মত্ববিবর্জিতঃ .. ৬৪..
জীবাত্মপরমাত্মেতি চিন্তাসর্বস্ববর্জিতঃ .
মুক্তামুক্তস্বরূপাত্মা মুক্তামুক্তবিবর্জিতঃ .. ৬৫..
বন্ধমোক্ষস্বরূপাত্মা বন্ধমোক্ষবিবর্জিতঃ .
দ্বৈতাদ্বৈতস্বরূপাত্মা দ্বৈতাদ্বৈতবিবর্জিতঃ .. ৬৬..
সর্বাসর্বস্বরূপাত্মা সর্বাসর্ববিবর্জিতঃ .
মোদপ্রমোদরূপাত্মা মোদাদিবিনিবর্জিতঃ .. ৬৭..
সর্বসঙ্কল্পহীনাত্মা বৈদেহী মুক্ত এব সঃ .
নিষ্কলাত্মা নির্মলাত্মা বুদ্ধাত্মাপুরুষাত্মকঃ .. ৬৮..
আনন্দাদিবিহীনাত্মা অমৃতাত্মামৃতাত্মকঃ .
কালত্রযস্বরূপাত্মা কালত্রযবিবর্জিতঃ .. ৬৯..
অখিলাত্মা হ্যমেযাত্মা মানাত্মা মানবর্জিতঃ .
নিত্যপ্রত্যক্ষরূপাত্মা নিত্যপ্রত্যক্ষনির্ণযঃ .. ৭০..
অন্যহীনস্বভাবাত্মা অন্যহীনস্বযংপ্রভঃ .
বিদ্যাবিদ্যাদিমেযাত্মা বিদ্যাবিদ্যাদিবর্জিতঃ .. ৭১..
নিত্যানিত্যবিহীনাত্মা ইহামুত্রবিবর্জিতঃ .
শমাদিষট্কশূন্যাত্মা মুমুক্ষুত্বাদিবর্জিতঃ .. ৭২..
স্থূলদেহবিহীনাত্মা সূক্ষ্মদেহবিবর্জিতঃ .
কারণাদিবিহীনাত্মা তুরীযাদিবিবর্জিতঃ .. ৭৩..
অন্নকোশবিহীনাত্মা প্রাণকোশবিবর্জিতঃ .
মনঃকোশবিহীনাত্মা বিজ্ঞানাদিবিবর্জিতঃ .. ৭৪..
আনন্দকোশহীনাত্মা পঞ্চকোশবিবর্জিতঃ .
নির্বিকল্পস্বরূপাত্মা সবিকল্পবিবর্জিতঃ .. ৭৫..
দৃশ্যানুবিদ্ধহীনাত্মা শব্দবিদ্ধবিবর্জিতঃ .
সদা সমাধিশূন্যাত্মা আদিমধ্যান্তবর্জিতঃ .. ৭৬..
প্রজ্ঞানবাক্যহীনাত্মা অহংব্রহ্মাস্মিবর্জিতঃ .
তত্ত্বমস্যাদিহীনাত্মা অযমাত্মেত্যভাবকঃ .. ৭৭..
ওঙ্কারবাচ্যহীনাত্মা সর্ববাচ্যবিবর্জিতঃ .
অবস্থাত্রযহীনাত্মা অক্ষরাত্মা চিদাত্মকঃ .. ৭৮..
আত্মজ্ঞেযাদিহীনাত্মা যত্কিঞ্চিদিদমাত্মকঃ .
ভানাভানবিহীনাত্মা বৈদেহী মুক্ত এব সঃ .. ৭৯..
আত্মানমেব বীক্ষস্ব আত্মানং বোধয স্বকম্ .
স্বমাত্মানং স্বযং ভুঙ্ক্ষ্ব স্বস্থো ভব ষডানন .. ৮০..
স্বমাত্মনি স্বযং তৃপ্তঃ স্বমাত্মানং স্বযং চর .
আত্মানমেব মোদস্ব বৈদেহী মুক্তিকো ভবেত্যুপনিষত্ ..
ইতি চতুর্থোঽধ্যাযঃ .. ৪..
নিদাঘো নাম বৈ মুনিঃ পপ্রচ্ছ ঋভুং
ভগবন্তমাত্মানাত্মবিবেকমনুব্রূহীতি .
স হোবাচ ঋভুঃ .
সর্ববাচোঽবধির্ব্রহ্ম সর্বচিন্তাবধির্গুরুঃ .
সর্বকারণকার্যাত্মা কার্যকারণবর্জিতঃ .. ১..
সর্বসঙ্কল্পরহিতঃ সর্বনাদমযঃ শিবঃ .
সর্ববর্জিতচিন্মাত্রঃ সর্বানন্দমযঃ পরঃ .. ২..
সর্বতেজঃপ্রকাশাত্মা নাদানন্দমযাত্মকঃ .
সর্বানুভবনির্মুক্তঃ সর্বধ্যানবিবর্জিতঃ .. ৩..
সর্বনাদকলাতীত এষ আত্মাহমব্যযঃ .
আত্মানাত্মবিবেকাদিভেদাভেদবিবর্জিতঃ .. ৪..
শান্তাশান্তাদিহীনাত্মা নাদান্তর্জ্যোতিরূপকঃ .
মহাবাক্যার্থতো দূরো ব্রহ্মাস্মীত্যতিদূরতঃ .. ৫..
তচ্ছব্দবর্জ্যস্ত্বংশব্দহীনো বাক্যার্থবর্জিতঃ .
ক্ষরাক্ষরবিহীনো যো নাদান্তর্জ্যোতিরেব সঃ .. ৬..
অখণ্ডৈকরসো বাহমানন্দোঽস্মীতি বর্জিতঃ .
সর্বাতীতস্বভাবাত্মা নাদান্তর্জ্যোতিরেব সঃ .. ৭..
আত্মেতি শব্দহীনো য আত্মশব্দার্থবর্জিতঃ .
সচ্চিদানন্দহীনো য এষৈবাত্মা সনাতনঃ .. ৮..
স নির্দেষ্টুমশক্যো যো বেদবাক্যৈরগম্যতঃ .
যস্য কিঞ্চিদ্বহির্নাস্তি কিঞ্চিদন্তঃ কিযন্ন চ .. ৯..
যস্য লিঙ্গং প্রপঞ্চং বা ব্রহ্মৈবাত্মা ন সংশযঃ .
নাস্তি যস্য শরীরং বা জীবো বা ভূতভৌতিকঃ .. ১০..
নামরূপাদিকং নাস্তি ভোজ্যং বা ভোগভুক্চ বা .
সদ্বাঽসদ্বা স্থিতির্বাপি যস্য নাস্তি ক্ষরাক্ষরম্ .. ১১..
গুণং বা বিগুণং বাপি সম আত্মা ন সংশযঃ .
যস্য বাচ্যং বাচকং বা শ্রবণং মননং চ বা .. ১২..
গুরুশিষ্যাদিভেদং বা দেবলোকাঃ সুরাসুরাঃ .
যত্র ধর্মমধর্মং বা শুদ্ধং বাশুদ্ধমণ্বপি .. ১৩..
যত্র কালমকালং বা নিশ্চযঃ সংশযো ন হি .
যত্র মন্ত্রমমন্ত্রং বা বিদ্যাবিদ্যে ন বিদ্যতে .. ১৪..
দ্রষ্টৃদর্শনদৃশ্যং বা ঈষন্মাত্রং কলাত্মকম্ .
অনাত্মেতি প্রসঙ্গো বা হ্যনাত্মেতি মনোঽপি বা .. ১৫..
অনাত্মেতি জগদ্বাপি নাস্তি নাস্তি নিশ্চিনু .
সর্বসঙ্কল্পশূন্যত্বাত্সর্বকার্যবিবর্জনাত্ .. ১৬..
কেবলং ব্রহ্মমাত্রত্বান্নাস্ত্যনাত্মেতি নিশ্চিনু .
দেহত্রযবিহীনত্বাত্কালত্রযবিবর্জনাত্ .. ১৭..
জীবত্রযগুণাভাবাত্তাপত্রযবিবর্জনাত্ .
লোকত্রযবিহীনত্বাত্সর্বমাত্মেতি শাসনাত্ .. ১৮..
চিত্তাভাচ্চিন্তনীযং দেহাভাবাজ্জরা ন চ .
পাদাভাবাদ্গতির্নাস্তি হস্তাভাবাত্ক্রিযা ন চ .. ১৯..
মৃত্যুর্নাস্তি জনাভাবাদ্বুদ্ধ্যভাবাত্সুখাদিকম্ .
ধর্মো নাস্তি শুচির্নাস্তি সত্যং নাস্তি ভযং ন চ .. ২০..
অক্ষরোচ্চারণং নাস্তি গুরুশিষ্যাদি নাস্ত্যপি .
একাভাবে দ্বিতীযং ন ন দ্বিতীযে ন চৈকতা .. ২১..
সত্যত্বমস্তি চেত্কিঞ্চিদসত্যং ন চ সংভবেত্ .
অসত্যত্বং যদি ভবেত্সত্যত্বং ন ঘটিষ্যতি .. ২২..
শুভং যদ্যশুভং বিদ্ধি অশুভাচ্ছুভমিষ্যতে .
ভযং যদ্যভবং বিদ্ধি অভযাদ্ভযমাপতেত্ .. ২৩..
বন্ধত্বমপি চেন্মোক্ষো বন্ধাভাবে ক্ব মোক্ষতা .
মরণং যদি চেজ্জন্ম জন্মাভাবে মৃতির্ন চ .. ২৪..
ত্বমিত্যপি ভবেচ্চাহং ত্বং নো চেদহমেব ন .
ইদং যদি তদেবাস্তি তদভাদিদং ন চ .. ২৫..
অস্তীতি চেন্নাস্তি তদা নাস্তি চেদস্তি কিঞ্চন .
কার্যং চেত্কারণং কিঞ্চিত্কার্যাভাবে ন কারণম্ .. ২৬..
দ্বৈতং যদি তদাঽদ্বৈতং দ্বৈতাভাবে দ্বযং ন চ .
দৃশ্যং যদি দৃগপ্যস্তি দৃশ্যাভাবে দৃগেন ন .. ২৭..
অন্তর্যদি বহিঃ সত্যমন্তা ভাবে বহির্ন চ .
পূর্ণত্বমস্তি চেত্কিঞ্চিদপূর্ণত্বং প্রসজ্যতে .. ২৮..
তস্মাদেতত্ক্বচিন্নাস্তি ত্বং চাহং বা ইমে ইদম্ .
নাস্তি দৃষ্টান্তিকং সত্যে নাস্তি দার্ষ্টান্তিকং হ্যজে .. ২৯..
পরংব্রহ্মাহমস্মীতি স্মরণস্য মনো ন হি .
ব্রহ্মমাত্রং জগদিদং ব্রহ্মমাত্রং ত্বমপ্যহম্ .. ৩০..
চিন্মাত্রং কেবল.ম্ চাহং নাস্ত্যনাত্ম্যেতি নিশ্চিনু .
ইদং প্রপঞ্চং নাস্ত্যেব নোত্পন্নং নো স্থিতং ক্বচিত্ .. ৩১..
চিত্তং প্রপঞ্চমিত্যাহুর্নাস্তি নাস্ত্যেব সর্বদা .
ন প্রপঞ্চং ন চিত্তাদি নাহঙ্কারো ন জীবকঃ .. ৩২..
মাযাকার্যাদিকং নাস্তি মাযা নাস্তি ভযং নহি .
কর্তা নাস্তি ক্রিযা নাস্তি শ্রবণং মননং নহি .. ৩৩..
সমাধিদ্বিতযং নাস্তি মাতৃমানাদি নাস্তি হি .
অজ্ঞানং চাপি নাস্ত্যেব হ্যবিবেকং কদাচন .. ৩৪..
অনুবন্ধচতুষ্কং ন সম্বন্ধত্রযমেব ন .
ন গঙ্গা ন গযা সেতুর্ন ভূতং নান্যদস্তি হি .. ৩৫..
ন ভূমির্ন জলং নাগ্নির্ন ন বাযুর্ন চ খং ক্বচিত্ .
ন দেবা ন চ দিক্পালা ন বেদা ন গুরুঃ ক্বচিত্ .. ৩৬..
ন দূরং নাস্তিকং নালং ন মধ্যং ন ক্বচিত্স্থিতম্ .
নাদ্বৈতং দ্বৈতসত্যং বা হ্যসত্যং বা ইদং ন চ .. ৩৭..
বন্ধমোক্ষাদিকং নাস্তি সদ্বাঽসদ্বা সুখাদি বা .
জাতির্নাস্তি গতির্নাস্তি বর্ণো নাস্তি ন লৌকিকম্ .. ৩৮..
সর্বং ব্রহ্মেতি নাস্ত্যেব ব্রহ্ম ইত্যপি নাস্তি হি .
চিদিত্যেবেতি নাস্ত্যেব চিদহংভাষণং ন হি .. ৩৯..
অহং ব্রহ্মাস্মি নাস্ত্যেব নিত্যশুদ্ধোঽস্মি ন ক্বচিত্ .
বাচা যদুচ্যতে কিঞ্চিন্মনসা মনুতে ক্বচিত্ .. ৪০..
বুদ্ধ্যা নিশ্চিনুতে নাস্তি চিত্তেন জ্ঞাযতে নহি .
যোগী যোগাদিকং নাস্তি সদা সর্বং সদা ন চ .. ৪১..
অহোরাত্রাদিকং নাস্তি স্নানধ্যানাদিকং নহি .
ভ্রান্তিরভ্রান্তির্নাস্ত্যেব নাস্ত্যনাত্মেতি নিশ্চিনু .. ৪২..
বেদশাস্ত্রং পুরাণং চ কার্যং কারণমীশ্বরঃ .
লোকো ভূতং জনস্ত্বৈক্যং সর্বং মিথ্যা ন সংশযঃ .. ৪৩..
বন্ধো মোক্ষঃ সুখং দুঃখং ধ্যানং চিত্তং সুরাসুরাঃ .
গৌণং মুখ্যং পরং চান্যত্সর্বং মিথ্যা ন সংশযঃ .. ৪৪..
বাচা বদতি যত্কিঞ্চিত্সঙ্কল্পৈঃ কল্প্যতে চ যত্ .
মনসা চিন্ত্যতে যদ্যত্সর্বং মিথ্যা ন সংশযঃ .. ৪৫..
বুদ্ধ্যা নিশ্চীযতে কিঞ্চিচ্চিত্তে নিশ্চীযতে ক্বচিত্ .
শাস্ত্রৈঃ প্রপঞ্চ্যতে যদ্যন্নেত্রেণৈব নিরীক্ষ্যতে .. ৪৬..
শ্রোত্রাভ্যাং শ্রূযতে যদ্যদন্যত্সদ্ভাবমেব চ .
নেত্রং শ্রোত্রং গাত্রমেব মিথ্যেতি চ সুনিশ্চিতম্ .. ৪৭..
ইদমিত্যেব নির্দিষ্টমযমিত্যেব কল্প্যতে .
ত্বমহং তদিদং সোঽহমন্যত্সদ্ভাবমেব চ .. ৪৮..
যদ্যত্সংভাব্যতে লোকে সর্বসঙ্কল্পসংভ্রমঃ .
সর্বাধ্যাসং সর্বগোপ্যং সর্বভোগপ্রভেদকম্ .. ৪৯..
সর্বদোষপ্রভেদাচ্চ নাস্ত্যনাত্মেতি নিশ্চিনু .
মদীযং চ ত্বদীযং চ মমেতি চ তবেতি চ .. ৫০..
মহ্যং তুভ্যং মযেত্যাদি তত্সর্বং বিতথং ভবেত্ .
রক্ষকো বিষ্ণুরিত্যাদি ব্রহ্মা সৃষ্টেস্তু কারণম্ .. ৫১..
সংহারে রুদ্র ইত্যেবং সর্বং মিথ্যেতি নিশ্চিনু .
স্নানং জপস্তপো হোমঃ স্বাধ্যাযো দেবপূজনম্ .. ৫২..
মন্ত্রং তন্ত্রং চ সত্সঙ্গো গুণদোষবিজৃম্ভণম্ .
অন্তঃকরণসদ্ভাব অবিদ্যাশ্চ সংভবঃ .. ৫৩..
অনেককোটিব্রহ্মাণ্ডং সর্বং মিথ্যেতি নিশ্চিনু .
সর্বদেশিকবাক্যোক্তির্যেন কেনাপি নিশ্চিতম্ .. ৫৪..
দৃশ্যতে জগতি যদ্যদ্যদ্যজ্জগতি বীক্ষ্যতে .
বর্ততে জগতি যদ্যত্সর্বং মিথ্যেতি নিশ্চিনু .. ৫৫..
যেন কেনাক্ষরেণোক্তং যেন কেন বিনিশ্চিতম্ .
যেন কেনাপি গদিতং যেন কেনাপি মোদিতম্ .. ৫৬..
যেন কেনাপি যদ্দত্তং যেন কেনাপি যত্কৃতম্ .
যত্র যত্র শুভং কর্ম যত্র যত্র চ দুষ্কৃতম্ .. ৫৭..
যদ্যত্করোষি সত্যেন সর্বং মিথ্যেতি নিশ্চিনু .
ত্বমেব পরমাত্মাসি ত্বমেব পরমো গুরুঃ .. ৫৮..
ত্বমেবাকাশরূপোঽসি সাক্ষিহীনোঽসি সর্বদা .
ত্বমেব সর্বভাবোঽসি ত্বং ব্রহ্মাসি ন সংশযঃ .. ৫৯..
কালহীনোঽসি কালোঽসি সদা ব্রহ্মাসি চিদ্ঘনঃ .
সর্বতঃ স্বস্বরূপোঽসি চৈতন্যঘনবানসি .. ৬০..
সত্যোঽসি সিদ্ধোঽসি সনাতনোঽসি
         মুক্তোঽসি মোক্ষোঽসি মুদামৃতোঽসি .
দেবোঽসি শান্তোঽসি নিরামযোঽসি
         ব্রহ্মাসি পূর্ণোঽসি পরাত্পরোঽসি .. ৬১..
সমোঽসি সচ্চাপি সনাতনোঽসি
         সত্যাদিবাক্যৈঃ প্রতিবোধিতোঽসি .
সর্বাঙ্গহীনোঽসি সদা স্থিতোঽসি
         ব্রহ্মেন্দ্ররুদ্রাদিবিভাবিতোঽসি .. ৬২..
সর্বপ্রপঞ্চভ্রমবর্জিতোঽসি
         সর্বেষু ভূতেষু চ ভাসিতোঽসি .
সর্বত্র সঙ্কল্পবিবর্জিতোঽসি
         সর্বাগমান্তার্থবিভাবিতোঽসি .. ৬৩..
সর্বত্র সন্তোষসুখাসনোঽসি
         সর্বত্র গত্যাদিবিবর্জিতোঽসি .
সর্বত্র লক্ষ্যাদিবিবর্জিতোঽসি
         ধ্যাতোঽসি বিষ্ণ্বাদিসুরৈরজস্রম্ .. ৬৪..
চিদাকারস্বরূপোঽসি চিন্মাত্রোঽসি নিরঙ্কুশঃ .
আত্মন্যেব স্থিতোঽসি ত্বং সর্বশূন্যোঽসি নির্গুণঃ .. ৬৫..
আনন্দোঽসি পরোঽসি ত্বমেক এবাদ্বিতীযকঃ .
চিদ্ঘনানন্দরূপোঽসি পরিপূর্ণস্বরূপকঃ .. ৬৬..
সদসি ত্বমসি জ্ঞোঽসি সোঽসি জানাসি বীক্ষসি .
সচ্চিদানন্দরূপোঽসি বাসুদেবোঽসি বৈ প্রভুঃ .. ৬৭..
অমৃতোঽসি বিভুশ্চাসি চঞ্চলো হ্যচলো হ্যসি .
সর্বোঽসি সর্বহীনোঽসি শান্তাশান্তবিবর্জিতঃ .. ৬৮..
সত্তামাত্রপ্রকাশোঽসি সত্তাসামান্যকো হ্যসি .
নিত্যসিদ্ধিস্বরূপোঽসি সর্বসিদ্ধিবিবর্জিতঃ .. ৬৯..
ঈষন্মাত্রবিশূন্যোঽসি অণুমাত্রবিবর্জিতঃ .
অস্তিত্ববর্জিতোঽসি ত্বং নাস্তিত্বাদিবিবর্জিতঃ .. ৭০..
লক্ষ্যলক্ষণহীনোঽসি নির্বিকারো নিরামযঃ .
সর্বনাদান্তরোঽসি ত্বং কলাকাষ্ঠাবিবর্জিতঃ .. ৭১..
ব্রহ্মবিষ্ণ্বীশহীনোঽসি স্বস্বরূপং প্রপশ্যসি .
স্বস্বরূপাবশেষোঽসি স্বানন্দাব্ধৌ নিমজ্জসি .. ৭২..
স্বাত্মরাজ্যে স্বমেবাসি স্বযংভাববিবর্জিতঃ .
শিষ্টপূর্ণস্বরূপোঽসি স্বস্মাত্কিঞ্চিন্ন পশ্যসি .. ৭৩..
স্বস্বরূপান্ন চলসি স্বস্বরূপেণ জৃম্ভসি .
স্বস্বরূপাদনন্যোঽসি হ্যহমেবাসি নিশ্চিনু .. ৭৪..
ইদং প্রপঞ্চং যত্কিঞ্চিদ্যদ্যজ্জগতি বিদ্যতে .
দৃশ্যরূপং চ দৃগ্রূপং সর্বং শশবিষাণবত্ .. ৭৫..
ভূমিরাপোঽনলো বাযুঃ খং মনো বুদ্ধিরেব চ .
অহঙ্কারশ্চ তেজশ্চ লোকং ভুবনমণ্ডলম্ .. ৭৬..
নাশো জন্ম চ সত্যং চ পুণ্যপাপজযাদিকম্ .
রাগঃ কামঃ ক্রোধলোভৌ ধ্যানং ধ্যেযং গুণং পরম্ .. ৭৭..
গুরুশিষ্যোপদেশাদিরাদিরন্তং শমং শুভম্ .
ভূতং ভব্যং বর্তমানং লক্ষ্যং লক্ষণমদ্বযম্ .. ৭৮..
শমো বিচারঃ সন্তোষো ভোক্তৃভোজ্যাদিরূপকম্ .
যমাদ্যষ্টাঙ্গযোগং চ গমনাগমনাত্মকম্ .. ৭৯..
আদিমধ্যান্তরঙ্গং চ গ্রাহ্যং ত্যাজ্যং হরিঃ শিবঃ .
ইন্দ্রিযাণি মনশ্চৈব অবস্থাত্রিতযং তথা .. ৮০..
চতুর্বিংশতিতত্ত্বং চ সাধনানাং চতুষ্টযম্ .
সজাতীযং বিজাতীযং লোকা ভূরাদযঃ ক্রমাত্ .. ৮১..
সর্ববর্ণাশ্রমাচারং মন্ত্রতন্ত্রাদিসংগ্রহম্ .
বিদ্যাবিদ্যাদিরূপং চ সর্ববেদং জডাজডম্ .. ৮২..
বন্ধমোক্ষবিভাগং চ জ্ঞানবিজ্ঞানরূপকম্ .
বোধাবোধস্বরূপং বা দ্বৈতাদ্বৈতাদিভাষণম্ .. ৮৩..
সর্ববেদান্তসিদ্ধান্তং সর্বশাস্ত্রার্থনির্ণযম্ .
অনেকজীবসদ্ভাবমেকজীবাদিনির্ণযম্ .. ৮৪..
যদ্যদ্ধ্যাযতি চিত্তেন যদ্যত্সঙ্কল্পতে ক্বচিত্ .
বুদ্ধ্যা নিশ্চীযতে যদ্যদ্গুরুণা সংশৃণোতি যত্ .. ৮৫..
যদ্যদ্বাচা ব্যাকরোতি যদ্যদাচার্যভাষণম্ .
যদ্যত্স্বরেন্দ্রিযৈর্ভাব্যং যদ্যন্মীমাংসতে পৃথক্ .. ৮৬..
যদ্যন্ন্যাযেন নির্ণীতং মহদ্ভির্বেদপারগৈঃ .
শিবঃ ক্ষরতি লোকান্বৈ বিষ্ণুঃ পাতি জগত্ত্রযম্ .. ৮৭..
ব্রহ্মা সৃজতি লোকান্বৈ এবমাদিক্রিযাদিকম্ .
যদ্যদস্তি পুরাণেষু যদ্যদ্বেদেষু নির্ণযম্ .. ৮৮..
সর্বোপনিষদাং ভাবং সর্বং শশবিষাণবত্ .
দেহোঽহমিতি সঙ্কল্পং তদন্তঃকরণং স্মৃতম্ .. ৮৯..
দেহোঽহমিতি সঙ্কল্পো মহত্সংসার উচ্যতে .
দেহোঽহমিতি সঙ্কল্পস্তদ্বন্ধমিতি চোচ্যতে .. ৯০..
দেহোঽহমিতি সঙ্কল্পস্তদ্দুঃখমিতি চোচ্যতে .
দেহোঽহমিতি যদ্ভানং তদেব নরকং স্মৃতম্ .. ৯১..
দেহোঽহমিতি সঙ্কল্পো জগত্সর্বমিতীর্যতে .
দেহোঽহমিতি সঙ্কল্পো হৃদযগ্রন্থিরীরিতিঃ .. ৯২..
দেহোঽহমিতি যজ্জ্ঞানং তদেবাজ্ঞানমুচ্যতে .
দেহোঽহমিতি যজ্জ্ঞানং তদসদ্ভাবমেব চ .. ৯৩..
দেহোঽহমিতি যা বুদ্ধিঃ সা চাবিদ্যেতি ভণ্যতে .
দেহোঽহমিতি যজ্জ্ঞানং তদেব দ্বৈতমুচ্যতে .. ৯৪..
দেহোঽহমিতি সঙ্কল্পঃ সত্যজীবঃ স এব হি .
দেহোঽহমিতি যজ্জ্ঞানং পরিচ্ছিন্নমিতীরিতম্ .. ৯৫..
দেহোঽহমিতি সঙ্কল্পো মহাপাপমিতি স্ফুটম্ .
দেহোঽহমিতি যা বুদ্ধিস্তৃষ্ণা দোষামযঃ কিল .. ৯৬..
যত্কিঞ্চিদপি সঙ্কল্পস্তাপত্রযমিতীরিতম্ .
কামং ক্রোধং বন্ধনং সর্বদুঃখং
       বিশ্বং দোষং কালনানাস্বরূপম্ .
যত্কিঞ্চেদং সর্বসঙ্কল্পজালং
       তত্কিঞ্চেদং মানসং সোম বিদ্ধি .. ৯৭..
মন এব জগত্সর্বং মন এব মহারিপুঃ .
মন এব হি সংসারো মন এব জগত্ত্রযম্ .. ৯৮..
মন এব মহদ্দুঃখং মন এব জরাদিকম্ .
মন এব হি কালশ্চ মন এব মলং তথা .. ৯৯..
মন এব হি সঙ্কল্পো মন এব হি জীবকঃ .
মন এব হি চিত্তং চ মনোঽহঙ্কার এব চ .. ১০০..
মন এব মহদ্বন্ধং মনোঽন্তঃকরণং চ তত্ .
মন এব হি ভূমিশ্চ মন এব হি তোযকম্ .. ১০১..
মন এব হি তেজশ্চ মন এব মরুন্মহান্ .
মন এব হি চাকাশং মন এব হি শব্দকম্ .. ১০২..
স্পর্শং রূপং রসং গন্ধং কোশাঃ পঞ্চ মনোভবাঃ .
জাগ্রত্স্বপ্নসুষুপ্ত্যাদি মনোমযরিতীরিতম্ .. ১০৩..
দিক্পালা বসবো রুদ্রা আদিত্যাশ্চ মনোমযাঃ .
দৃশ্যং জডং দ্বন্দ্বজাতমজ্ঞানং মানসং স্মৃতম্ .. ১০৪..
সঙ্কল্পমেব যত্কিঞ্চিত্তত্তন্নাস্তীতি নিশ্চিনু .
নাস্তি নাস্তি জগত্সর্বং গুরুশিষ্যাদিকং নহীত্যুপনিষত্ .. ১০৫..
ইতি পঞ্চমোঽধ্যাযঃ .. ৫..
ঋভুঃ .. সর্বং সচ্চিন্মযং বিদ্ধি সর্বং সচ্চিন্মযং ততম্ .
সচ্চিদানন্দমদ্বৈতং সচ্চিদানন্দমদ্বযম্ .. ১..
সচ্চিদানন্দমাত্রং হি সচ্চিদানন্দমন্যকম্ .
সচ্চিদানন্দরূপোঽহং সচ্চিদানন্দমেব খম্ .. ২..
সচ্চিদানন্দমেব ত্বং সচ্চিদানন্দকোঽস্ম্যহম্ .
মনোবুদ্ধিরহঙ্কারচিত্তসঙ্ঘাতকা অমী .. ৩..
ন ত্বং নাহং ন চান্যদ্বা সর্বং ব্রহ্মৈব কেবলম্ .
ন বাক্যং ন পদং বেদং নাক্ষরং ন জডং ক্বচিত্ .. ৪..
ন মধ্যং নাদি নান্তং বা ন সত্যং ন নিবন্ধজম্ .
ন দুঃখং ন সুখং ভাবং ন মাযা প্রকৃতিস্তথা .. ৫..
ন দেহং ন মুখং ঘ্রাণং ন জিহ্বা ন চ তালুনী .
ন দন্তোষ্ঠৌ ললাটং চ নিশ্বাসোচ্ছ্বাস এব চ .. ৬..
ন স্বেদমস্থি মাংসং চ ন রক্তং ন চ মূত্রকম্ .
ন দূরং নান্তিকং নাঙ্গং নোদরং ন কিরীটকম্ .. ৭..
ন হস্তপাদচলনং ন শাস্ত্রং ন চ শাসনম্ .
ন বেত্তা বেদনং বেদ্যং ন জাগ্রত্স্বপ্নসুপ্তযঃ .. ৮..
তুর্যাতীতং ন মে কিঞ্চিত্সর্বং সচ্চিন্মযং ততম্ .
নাধ্যাত্মিকং নাধিভূতং নাধিদৈবং ন মাযিকম্ .. ৯..
ন বিশ্বতৈজসঃ প্রাজ্ঞো বিরাট্সূত্রাত্মকেশ্বরঃ .
ন গমাগমচেষ্টা চ ন নষ্টং ন প্রযোজনম্ .. ১০..
ত্যাজ্যং গ্রাহ্যং ন দূষ্যং বা হ্যমেধ্যামেধ্যকং তথা .
ন পীনং ন কৃশং ক্লেদং ন কালং দেশভাষণম্ .. ১১..
ন সর্বং ন ভযং দ্বৈতং ন বৃক্ষতৃণপর্বতাঃ .
ন ধ্যানং যোগসংসিদ্ধির্ন ব্রহ্মবৈশ্যক্ষত্রকম্ .. ১২..
ন পক্ষী ন মৃগো নাঙ্গী ন লোভো মোহ এব চ .
ন মদো ন চ মাত্সর্যং কামক্রোধাদযস্তথা .. ১৩..
ন স্ত্রীশূদ্রবিডালাদি ভক্ষ্যভোজ্যাদিকং চ যত্ .
ন প্রৌঢহীনো নাস্তিক্যং ন বার্তাবসরোঽতি হি .. ১৪..
ন লৌকিকো ন লোকো বা ন ব্যাপারো ন মূঢতা .
ন ভোক্তা ভোজনং ভোজ্যং ন পাত্রং পানপেযকম্ .. ১৫..
ন শত্রুমিত্রপুত্রাদির্ন মাতা ন পিতা স্বসা .
ন জন্ম ন মৃতির্বৃদ্ধির্ন দেহোঽহমিতি ভ্রমঃ .. ১৬..
ন শূন্যং নাপি চাশূন্যং নান্তঃকরণসংসৃতিঃ .
ন রাত্রির্ন দিবা নক্তং ন ব্রহ্মা ন হরিঃ শিবঃ .. ১৭..
ন বারপক্ষমাসাদি বত্সরং ন চ চঞ্চলম্ .
ন ব্রহ্মলোকো বৈকুণ্ঠো ন কৈলাসো ন চান্যকঃ .. ১৮..
ন স্বর্গো ন চ দেবেন্দ্রো নাগ্নিলোকো ন চাগ্নিকঃ .
ন যমো যমলোকো বা ন লোকা লোকপালকাঃ .. ১৯..
ন ভূর্ভুবঃস্বস্ত্রৈলোক্যং ন পাতালং ন ভূতলম্ .
নাবিদ্যা ন চ বিদ্যা চ ন মাযা প্রকৃতির্জডা .. ২০..
ন স্থিরং ক্ষণিকং নাশং ন গতির্ন চ ধাবনম্ .
ন ধ্যাতব্যং ন মে ধ্যানং ন মন্ত্রো ন জপঃ ক্বচিত্ .. ২১..
ন পদার্থা ন পূজার্হং নাভিষেকো ন চার্চনম্ .
ন পুষ্পং ন ফলং পত্রং গন্ধপুষ্পাদিধূপকম্ .. ২২..
ন স্তোত্রং ন নমস্কারো ন প্রদক্ষিণমণ্বপি .
ন প্রার্থনা পৃথগ্ভাবো ন হবির্নাগ্নিবন্দনম্ .. ২৩..
ন হোমো ন চ কর্মাণি ন দুর্বাক্যং সুভাষণম্ .
ন গাযত্রী ন বা সন্ধির্ন মনস্যং ন দুঃস্থিতিঃ .. ২৪..
ন দুরাশা ন দুষ্টাত্মা ন চাণ্ডালো ন পৌল্কসঃ .
ন দুঃসহং দুরালাপং ন কিরাতো ন কৈতবম্ .. ২৫..
ন পক্ষপাতং ন পক্ষং বা ন বিভূষণতস্করৌ .
ন চ দম্ভো দাম্ভিকো বা ন হীনো নাধিকো নরঃ .. ২৬..
নৈকং দ্বযং ত্রযং তুর্যং ন মহত্বং ন চাল্পতা .
ন পূর্ণং ন পরিচ্ছিন্নং ন কাশী ন ব্রতং তপঃ .. ২৭..
ন গোত্রং ন কুলং সূত্রং ন বিভুত্বং ন শূন্যতা .
ন স্ত্রী ন যোষিন্নো বৃদ্ধা ন কন্যা ন বিতন্তুতা .. ২৮..
ন সূতকং ন জাতং বা নান্তর্মুখসুবিভ্রমঃ .
ন মহাবাক্যমৈক্যং বা নাণিমাদিবিভূতযঃ .. ২৯..
সর্বচৈতন্যমাত্রত্বাত্সর্বদোষঃ সদা ন হি .
সর্বং সন্মাত্ররূপত্বাত্সচ্চিদানন্দমাত্রকম্ .. ৩০..
ব্রহ্মৈব সর্বং নান্যোঽস্তি তদহং তদহং তথা .
তদেবাহং তদেবাহং ব্রহ্মৈবাহং সনাতনম্ .. ৩১..
ব্রহ্মৈবাহং ন সংসারী ব্রহ্মৈবাহং ন মে মনঃ .
ব্রহ্মৈবাহং ন মে বুদ্ধির্ব্রহ্মৈবাহং ন চেন্দ্রিযঃ .. ৩২..
ব্রহ্মৈবাহং ন দেহোঽহং ব্রহ্মৈবাহং ন গোচরঃ .
ব্রহ্মৈবাহং ন জীবোঽহং ব্রহ্মৈবাহং ন ভেদভূঃ .. ৩৩..
ব্রহ্মৈবাহং জডো নাহমহং ব্রহ্ম ন মে মৃতিঃ .
ব্রহ্মৈবাহং ন চ প্রাণো ব্রহ্মৈবাহং পরাত্পরঃ .. ৩৪..
ইদং ব্রহ্ম পরং ব্রহ্ম সত্যং ব্রহ্ম প্রভুর্হি সঃ .
কালো ব্রহ্ম কলা ব্রহ্ম সুখং ব্রহ্ম স্বযংপ্রভম্ .. ৩৫..
একং ব্রহ্ম দ্বযং ব্রহ্ম মোহো ব্রহ্ম শমাদিকম্ .
দোষো ব্রহ্ম গুণো ব্রহ্ম দমঃ শান্তং বিভুঃ প্রভুঃ .. ৩৬..
লোকো ব্রহ্ম গুরুর্ব্রহ্ম শিষ্যো ব্রহ্ম সদাশিবঃ .
পূর্বং ব্রহ্ম পরং ব্রহ্ম শুদ্ধং ব্রহ্ম শুভাশুভম্ .. ৩৭..
জীব এব সদা ব্রহ্ম সচ্চিদানন্দমস্ম্যহম্ .
সর্বং ব্রহ্মমযং প্রোক্তং সর্বং ব্রহ্মমযং জগত্ .. ৩৮..
স্বযং ব্রহ্ম ন সন্দেহঃ স্বস্মাদন্যন্ন কিঞ্চন .
সর্বমাত্মৈব শুদ্ধাত্মা সর্বং চিন্মাত্রমদ্বযম্ .. ৩৯..
নিত্যনির্মলরূপাত্মা হ্যাত্মনোঽন্যন্ন কিঞ্চন .
অণুমাত্রলসদ্রূপমণুমাত্রমিদং জগত্ .. ৪০..
অণুমাঅত্রং শরীরং বা হ্যণুমাত্রমসত্যকম্ .
অণুমাত্রমচিন্ত্যং বা চিন্ত্যং বা হ্যণুমাত্রকম্ .. ৪১..
ব্রহ্মৈব সর্বং চিন্মাত্রং ব্রহ্মমাত্রং জগত্ত্রযম্ .
আনন্দং পরমানন্দমন্যত্কিঞ্চিন্ন কিঞ্চন .. ৪২..
চৈতন্যমাত্রমোঙ্কারং ব্রহ্মৈব সকলং স্বযম্ .
অহমেব জগত্সর্বমহমেব পরং পদম্ .. ৪৩..
অহমেব গুণাতীত অহমেব পরাত্পরঃ .
অহমেব পরং ব্রহ্ম অহমেব গুরোর্গুরুঃ .. ৪৪..
অহমেবাখিলাধার অহমেব সুখাত্সুখম্ .
আত্মনোঽন্যজ্জগন্নাস্তি আত্মনোঽন্যত্সুখং ন চ .. ৪৫..
আত্মনোঽন্যা গতির্নাস্তি সর্বমাত্মমযং জগত্ .
আত্মনোঽন্যন্নহি ক্বাপি আত্মনোঽন্যত্তৃণং নহি .. ৪৬..
আত্মনোঽন্যত্তুষং নাস্তি সর্বমাত্মমযং জগত্ .
ব্রহ্মমাত্রমিদং সর্বং ব্রহ্মমাত্রমসন্ন হি .. ৪৭..
ব্রহ্মমাত্রং শ্রুতং সর্বং স্বযং ব্রহ্মৈব কেবলম্ .
ব্রহ্মমাত্রং বৃতং সর্বং ব্রহ্মমাত্রং রসং সুখম্ .. ৪৮..
ব্রহ্মমাত্রং চিদাকাশং সচ্চিদানন্দমব্যযম্ .
ব্রহ্মণোঽন্যতরন্নাস্তি ব্রহ্মণোঽন্যজ্জগন্ন চ .. ৪৯..
ব্রহ্মণোঽন্যদহ নাস্তি ব্রহ্মণোঽন্যত্ফলং নহি .
ব্রহ্মণোঽন্যত্তৃণং নাস্তি ব্রহ্মণোঽন্যত্পদং নহি .. ৫০..
ব্রহ্মণোঽন্যদ্গুরুর্নাস্তি ব্রহ্মণোঽন্যমসদ্বপুঃ .
ব্রহ্মণোঽন্যন্ন চাহন্তা ত্বত্তেদন্তে নহি ক্বচিত্ .. ৫১..
স্বযং ব্রহ্মাত্মকং বিদ্ধি স্বস্মাদন্যন্ন কিঞ্চন .
যত্কিঞ্চিদ্দৃশ্যতে লোকে যত্কিঞ্চিদ্ভাষ্যতে জনৈঃ .. ৫২..
যত্কিঞ্চিদ্ভুজ্যতে ক্বাপি তত্সর্বমসদেব হি .
কর্তৃভেদং ক্রিযাভেদং গুণভেদং রসাদিকম্ ..৫৩..
লিঙ্গভেদমিদং সর্বমসদেব সদা সুখম্ .
কালভেদং দেশভেদং বস্তুভেদং জযাজযম্ .. ৫৪..
যদ্যদ্ভেদং চ তত্সর্বমসদেব হি কেবলম্ .
অসদন্তঃকরণকমসদেবেন্দ্রিযাদিকম্ .. ৫৫..
অসত্প্রাণাদিকং সর্বং সঙ্ঘাতমসদাত্মকম্ .
অসত্যং পঞ্চকোশাখ্যমসত্যং পঞ্চ দেবতাঃ .. ৫৬..
অসত্যং ষড্বিকারাদি অসত্যমরিবর্গকম্ .
অসত্যং ষডৃতুশ্চৈব অসত্যং ষড্রসস্তথা .. ৫৭..
সচ্চিদানন্দমাত্রোঽহমনুত্পন্নমিদং জগত্ .
আত্মৈবাহং পরং সত্যং নান্যাঃ সংসারদৃষ্টযঃ .. ৫৮..
সত্যমানন্দরূপোঽহং চিদ্ঘনানন্দবিগ্রহঃ .
অহমেব পরানন্দ অহমেব পরাত্পরঃ .. ৫৯..
জ্ঞানাকারমিদং সর্বং জ্ঞানানন্দোঽহমদ্বযঃ .
সর্বপ্রকাশরূপোঽহং সর্বাভাবস্বরূপকম্ .. ৬০..
অহমেব সদা ভামীত্যেবং রূপং কুতোঽপ্যসত্ .
ত্বমিত্যেবং পরং ব্রহ্ম চিন্মযানন্দরূপবান্ .. ৬১..
চিদাকারং চিদাকাশং চিদেব পরমং সুখম্ .
আত্মৈবাহমসন্নাহং কূটস্থোঽহং গুরুঃ পরঃ .. ৬২..
সচ্চিদানন্দমাত্রোঽহমনুত্পন্নমিদং জগত্ .
কালো নাস্তি জগন্নাস্তি মাযাপ্রকৃতিরেব ন .. ৬৩..
অহমেব হরিঃ সাক্ষাদহমেব সদাশিবঃ .
শুদ্ধচৈতন্যভাবোঽহং শুদ্ধসত্ত্বানুভাবনঃ .. ৬৪..
অদ্বযানন্দমাত্রোঽহং চিদ্ঘনৈকরসোঽস্ম্যহম্ .
সর্বং ব্রহ্মৈব সততং সর্বং ব্রহ্মৈব কেবলম্ .. ৬৫..
সর্বং ব্রহ্মৈব সততং সর্বং ব্রহ্মৈব চেতনম্ .
সর্বান্তর্যামিরূপোঽহং সর্বসাক্ষিত্বলক্ষণঃ .. ৬৬..
পরমাত্মা পরং জ্যোতিঃ পরং ধাম পরা গতিঃ .
সর্ববেদান্তসারোঽহং সর্বশাস্ত্রসুনিশ্চিতঃ .. ৬৭..
যোগানন্দস্বরূপোঽহং মুখ্যানন্দমহোদযঃ .
সর্বজ্ঞানপ্রকাশোঽস্মি মুখ্যবিজ্ঞানবিগ্রহঃ .. ৬৮..
তুর্যাতুর্যপ্রকাশোঽস্মি তুর্যাতুর্যাদিবর্জিতঃ .
চিদক্ষ্রোঽন্ সত্যোঽহং বাসুদবোঽজররোঽমরঃ .. ৬৯..
অহং ব্রহ্ম চিদাকাশং নিত্যং ব্রহ্ম নিরঞ্জনম্ .
শুদ্ধং বুদ্ধং সদামুক্তমনামকমরূপকম্ .. ৭০..
সচ্চিদানন্দরূপোঽহমনুন্ত্পন্নমিদং জগত্ .
সত্যাসত্যং জগন্নাস্তি সঙ্কল্পকলনাদিকম্ .. ৭১..
নিত্যানন্দমযং ব্রহ্ম কেবলং সর্বদা স্বযম্ .
অনন্তমব্যযং শান্তমেকরূপমনামযম্ .. ৭২..
মত্তোঽন্যদস্তি চেন্মিথ্যা যথা মরুমরীচিকা .
বন্ধ্যাকুমারবচনে ভীতিশ্চেদস্তি কিঞ্চন .. ৭৩..
শশশৃঙ্গেণ নাগেন্দ্রো মৃতশ্চেজ্জগদস্তি তত্ .
মৃগতৃষ্ণাজলং পীত্বা তৃপ্তশ্চেদস্ত্বিদং জগত্ .. ৭৪..
নরশৃঙ্গেণ নষ্টশ্চেত্কশ্চিদস্ত্বিদমেব হি .
গন্ধর্বনগরে সত্যে জগদ্ভবতি সর্বদা .. ৭৫..
গগনে নীলিমাসত্যে জগত্সত্যং ভবিষ্যতি .
শুক্তিকারজতং সত্যং ভূষণং চেজ্জগদ্ভবেত্ .. ৭৬..
রজ্জুসর্পেণ দষ্টশ্চেন্নরো ভবতু সংসৃতিঃ .
জাতরূপেণ বাণেন জ্বালাগ্নৌ নাশিতে জগত্ .. ৭৭..
বিন্ধ্যাটব্যাং পাযসান্নমস্তি চেজ্জগদুদ্ভবঃ .
রম্ভাস্তম্ভেন কাষ্ঠেন পাকসিদ্ধৌ জগদ্ভবেত্ .. ৭৮..
সদ্যঃ কুমারিকরূপৈঃ পাকে সিদ্ধে জগদ্ভবেত্ .
চিত্রস্থদীপৈস্তমসো নাশশ্চেদস্ত্বিদং জগত্ .. ৭৯..
মাসাত্পূর্বং মৃতো মর্ত্যো হ্যাগতশ্চেজ্জগদ্ভবেত্  .
তক্রং ক্ষীরস্বরূপং চেত্ক্বচিন্নিত্যং জগদ্ভবেত্ .. ৮০..
গোস্তনাদুদ্ভবং ক্ষীরং পুনরারোপণে জগত্ .
ভূরজোঽব্ধৌ সমুত্পন্নে জগদ্ভবতু সর্বদা .. ৮১..
কূর্মরোম্ণা গজে বদ্ধে জগদস্তু মদোত্কটে .
নালস্থতন্তুনা মেরুশ্চালিতশ্চেজ্জগদ্ভবেত্ .. ৮২..
তরঙ্গমালযা সিন্ধুর্বদ্ধশ্চেদস্ত্বিদং জগত্ .
অগ্নেরধশ্চেজ্জ্বলনং জগদ্ভবতু সর্বদা .. ৮৩..
জ্বালাবহ্নিঃ শীতলশ্চেদস্তিরূপমিদং জগত্ .
জ্বালাগ্নিমণ্ডলে পদ্মবৃদ্ধিশ্চেজ্জগদস্ত্বিদম্ .. ৮৪..
মহচ্ছৈলেন্দ্রনীলং বা সম্ভবচ্চেদিদং জগত্ .
মেরুরাগত্য পদ্মাক্ষে স্থিতশ্চেদস্ত্বিদং জগত্ .. ৮৫..
নিগিরেচ্চেদ্ভৃঙ্গসূনুর্মেরুং চলবদস্ত্বিদম্ .
মশকেন হতে সিংহে জগত্সত্যং তদাস্তু তে .. ৮৬..
অণুকোটরবিস্তীর্ণে ত্রৈলোক্যং চেজ্জগদ্ভবেত্ .
তৃণানলশ্চ নিত্যশ্চেত্ক্ষণিকং তজ্জগদ্ভবেত্ .. ৮৭..
স্বপ্নদৃষ্টং চ যদ্বস্তু জাগরে চেজ্জগদ্ভবঃ .
নদীবেগো নিশ্চলশ্চেত্কেনাপীদং ভবেজ্জগত্ .. ৮৮..
ক্ষুধিতস্যাগ্নির্ভোজ্যশ্চেন্নিমিষং কল্পিতং ভবেত্ .
জাত্যন্ধৈ রত্নবিষযঃ সুজ্ঞাতশ্চেজ্জগত্সদা .. ৮৯..
নপুংসককুমারস্য স্ত্রীসুখং চেদ্ভবজ্জগত্ .
নির্মিতঃ শশশৃঙ্গেণ রথশ্চেজ্জগদস্তি তত্ .. ৯০..
সদ্যোজাতা তু যা কন্যা ভোগযোগ্যা ভবেজ্জগত্ .
বন্ধ্যা গর্ভাপ্ততত্সৌখ্যং জ্ঞাতা চেদস্ত্বিদং জগত্ .. ৯১..
কাকো বা হংসবদ্গচ্ছেজ্জগদ্ভবতু নিশ্চলম্ .
মহাখরো বা সিংহেন যুধ্যতে চেজ্জগত্স্থিতিঃ .. ৯২..
মহাখরো গজগতিং গতশ্চেজ্জগদস্তু তত্ .
সম্পূর্ণচন্দ্রসূর্যশ্চেজ্জগদ্ভাতু স্বযং জডম্ .. ৯৩..
চন্দ্রসূর্যাদিকৌ ত্যক্ত্বা রাহুশ্চেদ্দৃশ্যতে জগত্ .
ভৃষ্টবীজসমুত্পন্নবৃদ্ধিশ্চেজ্জগদস্তু সত্ .. ৯৪..
দরিদ্রো ধনিকানাং চ সুখং ভুঙ্ক্তে তদা জগত্ .
শুনা বীর্যেণ সিংহস্তু জিতো যদি জগত্তদা .. ৯৫..
জ্ঞানিনো হৃদযং মূঢৈর্জ্ঞাতং চেত্কল্পনং তদা .
শ্বানেন সাগরে পীতে নিঃশেষেণ মনো ভবেত্ .. ৯৬..
শুদ্ধাকাশো মনুষ্যেষু পতিতশ্চেত্তদা জগত্ .
ভূমৌ বা পতিতং ব্যোম ব্যোমপুষ্পং সুগন্ধকম্ .. ৯৭..
শুদ্ধাকাশে বনে জাতে চলিতে তু তদা জগত্ .
কেবলে দর্পণে নাস্তি প্রতিবিম্বং তদা জগত্ .. ৯৮..
অজকুক্ষৌ জগন্নাস্তি হ্যাত্মকুক্ষৌ জগন্নহি .
সর্বথা ভেদকলনং দ্বৈতাদ্বৈতং ন বিদ্যতে .. ৯৯..
মাযাকার্যমিদং ভেদমস্তি চেদ্ব্রহ্মভাবনম্ .
দেহোঽহমিতি দুঃখং চেদ্ব্রহ্মাহমিতি নিশ্চযঃ .. ১০০..
হৃদযগ্রন্থিরস্তিত্বে ছিদ্যতে ব্রহ্মচক্রকম্ .
সংশযে সমনুপ্রাপ্তে ব্রহ্মনিশ্চযমাশ্রযেত্ .. ১০১..
অনাত্মরূপচোরশ্চেদাত্মরত্নস্য রক্ষণম্ .
নিত্যানন্দমযং ব্রহ্ম কেবলং সর্বদা স্বযম্ .. ১০২..
এবমাদিসুদৃষ্টান্তৈঃ সাধিতং ব্রহ্মমাত্রকম্ .
ব্রহ্মৈব সর্বভবনং ভুবনং নাম সন্ত্যজ .. ১০৩..
অহং ব্রহ্মেতি নিশ্চিত্য অহংভাবং পরিত্যজ .
সর্বমেব লযং যাতি সুপ্তহস্তস্থপুষ্পবত্ .. ১০৪..
ন দেহো ন চ কর্মাণি সর্বং ব্রহ্মৈব কেবলম্ .
ন ভূতং ন চ কার্যং চ ন চাবস্থাচতুষ্টযম্ .. ১০৫..
লক্ষণাত্রযবিজ্ঞানং সর্বং ব্রহ্মৈব কেবলম্ .
সর্বব্যাপারমুত্সৃজ্য হ্যহং ব্রহ্মেতি ভাবয .. ১০৬..
অহং ব্রহ্ম ন সন্দেহো হ্যহং ব্রহ্ম চিদাত্মকম্ .
সচ্চিদানন্দমাত্রোঽহমিতি নিশ্চিত্য তত্ত্যজ .. ১০৭..
শাঙ্করীযং মহাশাস্ত্রং ন দেযং যস্য কস্যচিত্ .
নাস্তিকায কৃতঘ্নায দুর্বৃত্তায দুরাত্মনে .. ১০৮..
গুরুভক্তিবিশুদ্ধান্তঃকরণায মহাত্মনে .
সম্যক্পরীক্ষ্য দাতব্যং মাসং ষাণ্মাসবত্সরম্ .. ১০৯..
সর্বোপনিষদভ্যাসং দূরতস্ত্যজ্য সাদরম্ .
তেজোবিন্দূপনিষদমভ্যসেত্সর্বদা মুদা .. ১১০..
সকৃদভ্যাসমাত্রেণ ব্রহ্মৈব ভবতি স্বযম্ .
ব্রহ্মৈব ভবতি স্বযমিত্যুপনিষত্ ..
ॐ সহ নাববতু .. সহ নৌ ভুনক্তু ..
সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ইতি তেজোবিন্দূপনিষত্সমাপ্তা ..