মাণ্ডুক্য

.. মাণ্ডুক্যোপনিষত্ ..
.. অথ মাণ্ডুক্যোপনিষত্ ..

ॐ ইত্যেতদক্ষরমিদঁ সর্বং তস্যোপব্যাখ্যানং
ভূতং ভবদ্ ভবিষ্যদিতি সর্বমোঙ্কার এব
যচ্চান্যত্ ত্রিকালাতীতং তদপ্যোঙ্কার এব .. ১..

সর্বং হ্যেতদ্ ব্রহ্মাযমাত্মা ব্রহ্ম সোঽযমাত্মা চতুষ্পাত্
.. ২..

জাগরিতস্থানো বহিষ্প্রজ্ঞঃ সপ্তাঙ্গ একোনবিংশতিমুখঃ স্থূল
ভুগ্বৈশ্বানরঃ প্রথমঃ পাদঃ .. ৩..

স্বপ্নস্থানোঽন্তঃ প্রজ্ঞাঃ সপ্তাঙ্গ একোনবিংশতিমুখঃ
প্রবিবিক্তভুক্তৈজসো দ্বিতীযঃ পাদঃ .. ৪..

যত্র সুপ্তো ন কঞ্চন কামং কামযতে ন কঞ্চন স্বপ্নং
পশ্যতি তত্
সুষুপ্তম্ . সুষুপ্তস্থান একীভূতঃ প্রজ্ঞানঘন
এবানন্দমযো
হ্যানন্দভুক্ চেতো মুখঃ প্রাজ্ঞস্তৃতীযঃ পাদঃ .. ৫..

এষ সর্বেশ্বরঃ এষ সর্বজ্ঞ এষোঽন্তর্যাম্যেষ যোনিঃ সর্বস্য
প্রভবাপ্যযৌ হি ভূতানাম্ .. ৬..

নান্তঃপ্রজ্ঞং ন বহিষ্প্রজ্ঞং নোভযতঃপ্রজ্ঞং ন প্রজ্ঞানঘনং
ন প্রজ্ঞং নাপ্রজ্ঞম্ | অদৃষ্টমব্যবহার্যমগ্রাহ্যমলক্ষণং
অচিন্ত্যমব্যপদেশ্যমেকাত্মপ্রত্যযসারং প্রপঞ্চোপশমং
শান্তং শিবমদ্বৈতং চতুর্থং মন্যন্তে স আত্মা স বিজ্ঞেযঃ ..
৭..

সোঽযমাত্মাধ্যক্ষরমোঙ্করোঽধিমাত্রং পাদা মাত্রা মাত্রাশ্চ পাদা
অকার উকারো মকার ইতি .. ৮..

জাগরিতস্থানো বৈশ্বানরোঽকারঃ প্রথমা
মাত্রাঽঽপ্তেরাদিমত্ত্বাদ্
বাঽঽপ্নোতি হ বৈ সর্বান্ কামানাদিশ্চ ভবতি য এবং বেদ
.. ৯..

স্বপ্নস্থানস্তৈজস উকারো দ্বিতীযা মাত্রোত্কর্ষাত্
উভযত্বাদ্বোত্কর্ষতি হ বৈ জ্ঞানসন্ততিং সমানশ্চ ভবতি
নাস্যাব্রহ্মবিত্কুলে ভবতি য এবং বেদ .. ১০..

সুষুপ্তস্থানঃ প্রাজ্ঞো মকারস্তৃতীযা মাত্রা মিতেরপীতের্বা
মিনোতি হ বা ইদং সর্বমপীতিশ্চ ভবতি য এবং বেদ .. ১১..

অমাত্রশ্চতুর্থোঽব্যবহার্যঃ প্রপঞ্চোপশমঃ শিবোঽদ্বৈত
এবমোঙ্কার আত্মৈব সংবিশত্যাত্মনাঽঽত্মানং য এবং বেদ .. ১২..

.. ইতি মাণ্ডুক্যোপনিষত্ সমাপ্তা ..

সকল অধ্যায়