মুদ্গল

.. মুদ্গলোপনিষত্ ..

শ্রীমত্পুরুষসূক্তার্থং পূর্ণানন্দকলেবরম্ .
পুরুষোত্তমবিখ্যাতং পূর্ণং ব্রহ্ম ভবাম্যহম্ ..
ॐ বাঙ্ মে মনসি প্রতিষ্ঠিতা
মনো মে বাচি প্রতিষ্ঠিতমাবিরাবীর্ম এধি ..
বেদস্য ম আণীস্থঃ . শ্রুতং মে মা প্রহাসীরনেনাধীতে-
নাহোরাত্রান্সন্দধাম্যৃতং বদিষ্যামি সত্যং বদিষ্যামি ..
তন্মামবতু তদ্বক্তারমবতু অবতু মামবতু বক্তারমবতু বক্তারম্ ..
ॐ পুরুষসূক্তার্থনির্ণযং ব্যাখ্যাস্যামঃ
পুরুষসংহিতাযাং পুরুষসূক্তার্থঃ সংগ্রহেণ প্রোচ্যতে .
সহস্রশীর্ষেত্যত্র সশব্দোঽনন্তবাচকঃ .
অনন্তযোজনং প্রাহ দশাঙ্গুলবচস্তথা .. ১..
তস্য প্রথমযা বিষ্ণোর্দেশতো ব্যাপ্তিরীরিতা .
দ্বিতীযযা চাস্য বিষ্ণোঃ কালতো ব্যাপ্তিরুচ্যতে .. ২..
বিষ্ণোর্মোক্ষপ্রদত্বং চ কথিতং তু তৃতীযযা .
এতাবানিতি মন্ত্রেণ বৈভবং কথিতং হরেঃ .. ৩..
এতেনৈব চ মন্ত্রেণ চতুর্ব্যূহো বিভাষিতঃ .
ত্রিপাদিত্যনযা প্রোক্তমনিরুদ্ধস্য বৈভবম্ .. ৪..
তস্মাদ্বিরাডিত্যনযা পাদনারাযণাদ্ধরেঃ .
প্রকৃতেঃ পুরুষস্যাপি সমুত্পত্তিঃ প্রদর্শিতা .. ৫..
যত্পুরুষেণেত্যনযা সৃষ্টিযজ্ঞঃ সমীরিতঃ .
সপ্তাস্যাসন্পরিধযঃ সমিধশ্চ সমীরিতাঃ .. ৬..
তং যজ্ঞমিতি মন্ত্রেণ সৃষ্টিযজ্ঞঃ সমীরিতঃ .
অনেনৈব চ মন্ত্রেণ মোক্ষশ্চ সমুদীরিতঃ .. ৭..
তস্মাদিতি চ মন্ত্রেণ জগত্সৃষ্টিঃ সমীরিতা .
বেদাহমিতি মন্ত্রাভ্যাং বৈভবং কথিতং হরেঃ .. ৮..
যজ্ঞেনেত্যুপসংহারঃ সৃষ্টের্মোক্ষস্য চেরিতঃ .
য এবমেতজ্জানাতি স হি মুক্তো ভবেদিতি .. ৯.. ১..
অথ তথা মুদ্গলোপনিষদি পুরুষসূক্তস্য বৈভবং
বিস্তরেণ প্রতিপাদিতম্ . বাসুদেব ইন্দ্রায ভগবজ্জ্ঞানমুপদিশ্য
পুনরপি সূক্ষ্মশ্রবণায প্রণতাযেন্দ্রায পরমরহস্যভূতং
পুরুষসূক্তাভ্যাং খণ্ডদ্বযাভ্যামুপাদিশত্ .
দ্বৌ খণ্ডাবুচ্যেতে . যোঽয মুক্তঃ স পুরুষো
নামরূপজ্ঞানাগোচরং সংসারিণামতিদুর্জ্ঞেযং
বিষযং বিহায ক্লেশাদিভিঃ সংক্লিষ্টদেবাদিজিহীর্ষযা
সহস্রকলাবযবকল্যাণং দৃষ্টমাত্রেণ মোক্ষদং
বেষমাদদে . তেন বেষেণ ভূম্যাদিলোকং ব্যাপ্যানন্ত-
যোজনমত্যতিষ্ঠত্ . পুরুষো নারাযণো ভূতং ভব্যং
ভবিষ্যচ্চাসীত্ . স চ সর্বস্মান্মহিম্নো জ্যাযান্ .
তস্মান্ন কোঽপি জ্যাযান্ . মহাপুরুষ আত্মানং
চতুর্ধা কৃত্বা ত্রিপাদেন পরমে ব্যোম্নি চাসীত্ . ইতরেণ
চতুর্থেনানিরুদ্ধনারাযণেন বিশ্বান্যাসন্ . স চ
পাদনারাযণো জগত্স্রষ্টুং প্রকৃতিমজনযত্ . স
সমৃদ্ধকাযঃ সন্সৃষ্টিকর্ম ন জজ্ঞিবান্ .
সোঽনিরুদ্ধনারাযণস্তস্মৈ সৃষ্টিমুপাদিশত্ .
ব্রহ্মংস্তবেন্দ্রিযাণি যাজকানি ধ্যাত্বা কোশভূতং
দৃঢং গ্রন্থিকলেবরং হবির্ধ্যাত্বা মাং হবির্ভুজং
ধ্যাত্বা বসন্তকালমাজ্যং ধ্যাত্বা গ্রীষ্মমিধ্মং
ধ্যাত্বা শরদৃতুং রসং ধ্যাত্বৈবমগ্নৌ হুত্বাঙ্গ-
স্পর্শাত্কলেবরো বজ্রং হীষ্যতে . ততঃ স্বকার্যান্সর্ব-
প্রাণিজীবান্সৃষ্ট্বা পশ্বাদ্যাঃ প্রাদুর্ভবিষ্যন্তি .
ততঃ স্থাবরজঙ্গমাত্মকং জগদ্ভবিষ্যতি . এতেন
জীবাত্মনোর্যোগেন মোক্ষপ্রকারশ্চ কথিত ইত্যনুসন্ধেযম্ .
য ইমং সৃষ্টিযজ্ঞং জানাতি মোক্ষপ্রকারং চ
সর্বমাযুরেতি .. ২..
একো দেবো বহুধা নিবিষ্ট অজাযমানো বহুধা বিজাযতে .
তমেতমগ্নিরিত্যধ্বর্যব উপাসতে . যজুরিত্যেষ হীদং
সর্বং যুনক্তি . সামেতি ছন্দোগাঃ . এতস্মিন্হীদং সর্বং
প্রতিষ্ঠিতম্ . বিষমিতি সর্পাঃ . সর্প ইতি সর্পবিদঃ .
ঊর্গিতি দেবাঃ . রযিরিতি মনুষ্যাঃ . মাযেত্যসুরাঃ .
স্বধেতি পিতরঃ . দেবজন ইতি দেবজনবিদঃ . রূপমিতি গন্ধর্বাঃ .
গন্ধর্ব ইতি অপ্সরসঃ . তং যথাযথোপাসতে তথৈব ভবতি .
তস্মাদ্ব্রাহ্মণঃ পুরুষরূপং পরংব্রহ্মৈবাহমিতি
ভাবযেত্ . তদ্রূপো ভবতি . য এবং বেদ .. ৩..
তদ্ব্রহ্ম তাপত্রযাতীতং ষট্কোশবিনির্মুক্তং ষডূর্মিবর্জিতং
পঞ্চকোশাতীতং ষড্ভাববিকারশূন্যমেবমাদি-
সর্ববিলক্ষণং ভবতি . তাপত্রযং ত্বাধ্যাত্মিকাধিভৌতি-
কাধিদৈবিকং কর্তৃকর্মকার্যজ্ঞাতৃজ্ঞানজ্ঞেয-
ভোক্তৃভোগভোগ্যমিতি ত্রিবিধম্ . ত্বঙ্মাংসশোণিতাস্থি-
স্নাযুমজ্জাঃ ষট্কোশাঃ . কামক্রোধলোভমোহমদ-
মাত্সর্যমিত্যরিষড্বর্গঃ . অন্নমযপ্রাণমযমনোময-
বিজ্ঞানমযানন্দমযা ইতি পঞ্চকোশাঃ .
প্রিযাত্মজননবর্ধনপরিণামক্ষযনাশাঃ ষড্ভাবাঃ .
অশনাযাপিপাসাশোকমোহজরামরণানীতি ষডূর্মযঃ .
কুলগোত্রজাতিবর্ণাশ্রমরূপাণি ষড্ ভ্রমাঃ .
এতদ্যোগেন পরমপুরুষো জীবো ভবতি নান্যঃ .
য এতদুপনিষদং নিত্যমধীতে সোঽগ্নিপূতো ভবতি . স বাযুপূতো
ভবতি . স আদিত্যপূতো ভবতি . অরোগী ভবতি . শ্রীমাংশ্চ ভবতি .
পুত্রপৌত্রাদিভিঃ সমৃদ্ধো ভবতি . বিদ্বাংশ্চ ভবতি .
মহাপাতকাত্পূতো ভবতি . সুরাপানাত্পূতো ভবতি .
অগম্যাগমনাত্পূতো ভবতি . মাতৃগমনাত্পূতো ভবতি .
দুহিতৃস্নুষাভিগমনাত্পূতো ভবতি . স্বর্ণস্তেযাত্পূতো ভবতি .
বেদিজন্মহানাত্পূতো ভবতি . গুরোরশুশ্রূষণাত্পূতো ভবতি .
অযাজ্যযাজনাত্পূতো ভবতি . অভক্ষ্যভক্ষণাত্পূতো ভবতি .
উগ্রপ্রতিগ্রহাত্পূতো ভবতি . পরদারগমনাত্পূতো ভবতি .
কামক্রোধলোভমোহের্ষ্যাদিভিরবাধিতো ভবতি . সর্বেভ্যঃ
পাপেভ্যো মুক্তো ভবতি . ইহ জন্মনি পুরুষো ভবতি তস্মাদেত-
ত্পুরুষসূক্তার্থমতিরহস্যং রাজগুহ্যং দেবগুহ্যং গুহ্যাদপি
গুহ্যতরং নাদীক্ষিতাযোপদিশেত্ .
নানূচানায . নাযজ্ঞশীলায . নাবৈষ্ণবায .
নাযোগিনে . ন বহুভাষিণে . নাপ্রিযবাদিনে .
নাসংবত্সরবেদিনে . নাতুষ্টায . নানধীতবেদাযোপদিশেত্ .
গুরুরপ্যেবংবিচ্ছুচৌ দেশে পুণ্যনক্ষত্রে
প্রাণানাযম্য পুরুষং ধ্যাযন্নুপসন্নায
শিষ্যায দক্ষিণকর্ণে পুরুষসূক্তার্থমুপদিশেদ্বিদ্বান্ .
ন বহুশো বদেত্ . যাতযামো ভবতি . অসকৃত্কর্ণমুপদিশেত্ .
এতত্কুর্বাণোঽধ্যেতাধ্যাপকশ্চ ইহ জন্মনি পুরুষো
ভবতীত্যুপনিষত্ ..
ॐ বাঙ্মে মনসি প্রতিষ্ঠিতা মনো মে বাচি প্রতিষ্ঠিত-
মাবিরাবীর্ম এধি .. বেদস্য ম আণীস্থঃ শ্রুতং মে মা
প্রহাসীরনেনাধীতেনাহোরাত্রান্সন্দধাম্যৃতং বদিষ্যামি
সত্যং বদিষ্যামি .. তন্মামবতু তদ্বক্তারমবতু অবতু
মামবতু বক্তারমবতু বক্তারম্ ..
ॐ শান্তিঃ শান্তিঃ শান্তিঃ ..
ইতি মুদ্গলোপনিষত্সমাপ্তা ..