প্রাণাগ্নিহোত্র

.. প্রাণাগ্নিহোত্রোপনিষত্   ..

শরীরযজ্ঞসংশুদ্ধচিত্তসংজাতবোধতঃ .
মুনযো যত্পদং যান্তি তদ্রামপদমাশ্রযে ..
ॐ সহ নাববতু .. সহ নৌ ভুনক্তু .. সহ বীর্যং
করবাবহৈ .. তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ .. অথাতঃ সর্বোপনিষত্সারং সংসারজ্ঞানাতীত-
মন্ত্রসূক্তং শারীরযজ্ঞং ব্যাখ্যাস্যামঃ . যস্মিন্নেব
পুরুষঃ শরীরে বিনাপ্যগ্নিহোত্রেণ বিনাপি সাংখ্যযোগেন
সংসারবিমুক্তির্ভবতীতি . স্বেন বিধিনান্নং ভূমৌ নিক্ষিপ্য
যা ওষধীঃ সোমরাজ্ঞীরিতি তিসৃভিরন্নপত ইতি দ্বাভ্যা-
মনুমন্ত্রযতে . যা ওষধযঃ সোমরাজ্ঞীর্বহ্বীঃ শতবিচক্ষণাঃ .
বৃহস্পতিপ্রসূতাস্তা নো মুঞ্চত্বংহসঃ .. ১..
যাঃ ফলিনীর্যা অফলা অপুষ্পা যাশ্চ পুষ্পিণীঃ .
বৃহস্পতিপ্রসূতাস্তা নো মুঞ্চত্বংহসঃ .. ২..
জীবলা নঘারিষাং মাতে বধ্নামোষধিম্ .
যাতযাযু রুপাহরাদপ রক্ষাংসি চাতযাত্ .. ৩..
অন্নপতেঽন্নস্য নো বেহ্যনমীবস্য শুষ্মিণঃ .
প্রপ্রদাতারং তারিষ ঊর্জং নো ধেহি দ্বিপদে চতুষ্পদে .. ৪..
যদন্নমগ্নির্বহুধা বিরাদ্ধি
   রুদ্রৈঃ প্রজগ্ধং যদি বা পিশাচৈঃ .
সর্বং তদীশানো অভযং কৃণোতু
   শিবমীশানায স্বাহা .. ৫..
অন্তশ্চরসি ভূতেষু গুহাযাং বিশ্বতোমুখঃ .
ত্বং যজ্ঞস্ত্বং ব্রহ্মা ত্বং রুদ্রস্তবং বিষ্ণুস্ত্বং বষট্কার
আপো জ্যোতী রসোঽমৃতং ব্রহ্ম ভূর্ভুবঃ সুবরোংনমঃ .
আপঃ পুনন্তু পৃথিবীং পৃথিবী পূতা পুনাতু মাম্ .
পুনন্তু ব্রহ্মণস্পতির্ব্রহ্মপূতা পুনাতু মাম্ .
যদুচ্ছিষ্টমভোজ্যং যদ্বা দুশ্চরিতং মম .
সর্বং পুনন্তু মামাপোঽসতাং চ প্রতিগ্রহং স্বাহা .
অমৃতমস্য মৃতোপস্তরণমস্যমৃতং প্রাণে জুহোম্যমাশিষ্যান্তোঽসি .
প্রাণায স্বাহা . অপানায স্বাহা . ব্যানায স্বাহা . উদানায স্বাহা .
সমানায স্বাহা . ইতি কনিষ্ঠিকাঙ্গুল্যাঙ্গুষ্ঠেন চ প্রাণে জুহোতি .
অনামিকযাপানে . মধ্যমযা ব্যানে . সর্বাভিরুদানে . প্রদেশিন্যা সমানে .
তূষ্ণীমেকামেকঋষৌ জুহোতি . দ্বে আহবনীযে .
একাং দক্ষিণাগ্নৌ . একাং গার্হপত্যে . একাং সর্বপ্রাযশ্চিত্তীযে ..
অথাপিধানমস্যমৃতত্বাযোপস্পৃশ্য পুনরাদায পুনরুপস্পৃশেত্ .
স তে প্রাণা বাঽঽপো গৃহীত্বা হৃদযমন্বালভ্য জপেত্ .
প্রাণো অগ্নিঃ পরমাত্মা পঞ্চবাযুভিরাবৃতঃ .
অভযং সর্বভূতেভ্যো ন মে ভীতিঃ কদাচন .. ১..
ইতি প্রথমঃ খণ্ডঃ .. ১..
বিশ্বোঽসি বৈশ্বানরো বিশ্বরূপং ত্বযা ধার্যতে
জাযমানম্ . বিশ্বং ত্বাহুতথঃ সর্বা যত্র
ব্রহ্মাঽমৃতোঽসি . মহানবোঽযং পুরুষো
যোঽঙ্গুষ্ঠাগ্রে প্রতিষ্ঠিতঃ . তমদ্ভিঃ পরিষিঞ্চামি
সোঽস্যান্তে অমৃতায চ . অনাবিত্যেষ বাহ্যাত্মা
ধ্যাযেতাগ্নিহোত্রং জোহোমীতি . সর্বেষামেব সূনুর্ভবতি .
অস্য যজ্ঞপরিবৃতা আহুতীর্হোমযতি . স্বশরীরে যজ্ঞং
পরিবর্তযামীতি . চত্বারোঽগ্নযস্তে কিংভাগধেযাঃ .
তত্রসূর্যোঽগ্নির্নাম সূর্যমণ্ডলাকৃতিঃ সহস্ররশ্মি-
পরিবৃত একঋষির্ভূত্বা মূর্ধনি তিষ্ঠতি . যস্মাদুক্তো
দর্শনাগ্নির্নাম চতুরাকৃতিরাহবনীযো ভূত্বা মুখে তিষ্ঠতি .
শারীরোগ্নির্নাম জরাপ্রণুদা হবিরবস্কন্দতি . অর্ধচন্দ্রাকৃতি-
র্দক্ষিণাগ্নির্ভূত্বা হৃদযে তিষ্ঠতি তত্র কোষ্ঠাগ্নিরিতি .
কোষ্ঠাগ্নির্নামাশিতপীতলীঢখাদিতানি সম্যগ্ব্যষ্ট্যাং
শ্রপযিত্বা গার্হপত্যো ভূত্বা নাভ্যাং তিষ্ঠতি .
প্রাযশ্চিত্তযস্ত্বধস্তাত্তির্যক্ তিস্রো হিমাংশুপ্রভাভিঃ
প্রজননকর্মা ..
ইতি দ্বিতীযঃ খণ্ডঃ .. ২..
অস্য শরীরযজ্ঞস্য যূপরশনাশোভিতস্য
কো যজমানঃ . কা পত্নী . কে ঋত্বিজঃ . কে সদস্যাঃ .
কানি যজ্ঞপাত্রাণি . কানি হবীংষি . কা বেদিঃ .
কোত্তরবেদিঃ . কো দ্রোণকলশঃ . কো রথঃ . কঃ পশুঃ .
কোঽধ্বর্যুঃ . কো হোতা . কো ব্রাহ্মণাচ্ছংসী .
কঃ প্রতিপ্রস্থাতা . কঃ প্রস্তোতা . কো মৈত্রাবরুণঃ .
ক উদ্গাতা . কা ধারাপোতা . কে দর্ভাঃ . কঃ স্রুবঃ .
কাজ্যস্থালী . কাবাঘারৌ . কাবাজ্যভাগৌ . কেঽত্র
যাজাঃ . কে অনুযাজাঃ . কেডা . কঃ সূক্তবাকঃ .
কঃ শংযোর্বাকঃ . কা হিংসা . কে পত্নীসংযাজাঃ .
কো যূপঃ . কা রশনা . কা ইষ্টযঃ . কা দক্ষিণা .
কিমবভৃতমিতি ..
ইতি তৃতীযঃ খণ্ডঃ .. ৩..
অস্য শারীরযজ্ঞস্য যূপরশনাশোভিতস্যাত্মা যজমানঃ .
বুদ্ধিঃ পত্নী . বেদা মহর্ত্বিজঃ . অহঙ্কারোঽধ্বর্যুঃ . চিত্তং
হোতা . প্রাণো ব্রাহ্মণচ্ছংসী . অপানঃ প্রতিপ্রস্থাতা .
ব্যানঃ প্রস্তোতা . উদান উদ্গাতা . সমানো মৈত্রবরুণঃ .
শরীরং বেদিঃ . নাসিকোত্তরবেদিঃ . মূর্ধা দ্রোণকলশঃ .
পাদো রথঃ . দক্ষিণহস্তঃ স্রুবঃ . সব্যহস্ত আজ্যস্থালী .
শ্রোত্রে আঘারৌ . চক্ষুষী আজ্যভাগৌ . গ্রীবা ধারাপোতা .
তন্মাত্রাণি সদস্যাঃ . মহাভূতানি প্রযাজাঃ . ভূতানি
গুণা অনুযাজাঃ . জিহ্বেডা . দন্তোষ্ঠৌ সূক্তবাকঃ . তালুঃ
শংযোর্বাকঃ . স্মৃতির্দযা ক্ষান্তিরহিংসা পত্নীসংযাজাঃ .
ওঙ্কারো যূপঃ . আশা রশনা . মনো রথঃ . কামঃ পশুঃ .
কেশা দর্ভাঃ . বুদ্ধীন্দ্রিযাণি যজ্ঞপাত্রাণি . কর্মেন্দ্রিযাণি
হবীংষি . অহিংসা ইষ্টযঃ . ত্যাগো দক্ষিণা . অবভৃতং
মরণাত্ . সর্বা হ্যস্মিন্দেবতাঃ শরীরেঽধিসমাহিতাঃ .
বারাণস্যাং মৃতো বাপি ইদং বা ব্রহ্ম যঃ পঠেত্ . একেন
জন্মনা জন্তুর্মোক্ষং চ প্রাপ্নুযাদিতি মোক্ষং চ
প্রাপ্নুযাদিত্যুপনিষত্ .. ৩..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ তত্সত্ ..
ইতি প্রাণাগ্নিহোত্রোপনিষত্সমাপ্তা ..