সৌভাগ্যলক্ষ্মি

.. সৌভাগ্যলক্ষ্ম্যুপনিষত্ ..সৌভাগ্যলক্ষ্মীকৈবল্যবিদ্যাবেদ্যসুখাকৃতি .

ত্রিপান্নারাযণানন্দরমচন্দ্রপদং ভজে ..
ॐ বাঙ্মে মনসি প্রতিষ্ঠিতা মনো মে বাচি
প্রতিষ্ঠিতমাবিরাবীর্ম এধি ..
বেদস্য ম আণীস্থঃ শ্রুতং মে মা
প্রহাসীরনেনাধীতেনাহোরাত্রান্সন্দধাম্যৃতং
বদিষ্যামি সত্যং বদিষ্যামি ..
তন্মামবতু তদ্বক্তারমবতু অবতু মামবতু
বক্তারমবতু বক্তারম্ .. ॐ শান্তিঃ শান্তিঃ শান্তিঃ ..
হরিঃ ॐ .. অথ ভগবন্তং দেবা ঊচুর্হে
ভগবন্নঃ কথয সৌভাগ্যলক্ষ্মীবিদ্যাম্ .
তথেত্যবোচদ্ভগবানাদিনারাযণঃ সর্বে দেবা
যূযং সাবধানমনসো ভূত্বা শৃণুত
তুরীযরূপাং তুরীযাতীতাং সর্বোত্কটাং
সর্বমন্ত্রাসনগতাং পীঠোপপীঠদেবতাপরিবৃতাং
চতুর্ভুজাং শ্রিযং হিরণ্যবর্ণামিতি
পঞ্চদশর্গ্ভির্ধ্যাযেত্ . অথ পঞ্চদশ
ঋগাত্মকস্য শ্রীসূক্তস্যানন্দকর্দমচিক্লীতেন্দিরাসুতা
ঋষযঃ . শ্রীঋষ্যাদ্যা ঋচঃ
চতুর্দশানমৃচামানন্দাদ্যৃষযঃ .
হিরণ্যবর্ণাদ্যাদ্যত্রযস্যানুষ্টুপ্ ছন্দঃ .
কাংসোস্মীত্যস্য বৃহতী ছন্দঃ .
তদন্যযোর্দ্বযোস্ত্রিষ্টুপ্ . পুনরষ্টকস্যানুষ্টুপ্ .
শেষস্য প্রস্তারপঙ্ক্তিঃ . শ্র্যগ্নির্দেবতা .
হিরণ্যবর্ণামিতি বীজম্ . কাংসোঽস্মীতি শক্তিঃ .
হিরণ্মযা চন্দ্রা রজতস্রজা হিরণ্যা হিরণ্যবর্ণেতি
প্রণবাদিনমোন্তৈশ্চতুর্থ্যন্তৈরঙ্গন্যাসঃ .
অথ বক্ত্রত্রযৈরঙ্গন্যাসঃ . মস্তকলোচনশ্রুতিঘ্রাণ-
বদনকণ্ঠবাহুদ্বযহৃদযনাভিগুহ্যপাযূরুজানুজঙ্ঘেষু
শ্রীসূক্তৈরেব ক্রমশো ন্যসেত্ . অরুণকমলসংস্থা
তদ্রজঃপুঞ্জবর্ণা করকমলধৃতেষ্টাঽভীতিযুগ্মাম্বুজা চ .
মণিকটকবিচিত্রালঙ্কৃতাকল্পজালৈঃ সকলভুবনমাতা
সন্ততং শ্রীঃ শ্রিযৈ নঃ .. ১..
তত্পীঠকর্ণিকাযাং সসাধ্যং শ্রীবীজম্ .
বস্বাদিত্যকলাপদ্মেষু শ্রীসূক্তগতার্ধার্ধর্চা
তদ্বহির্যঃ শুচিরিতি মাতৃকযা চ শ্রিযং যন্ত্রাঙ্গদশকং
চ বিলিখ্য শ্রিযমাবাহযেত্ . অঙ্গৈঃ প্রথমা বৃত্তিঃ .
পদ্মাদিভির্দ্বিতীযা . সোকেশৈস্তৃতীযা . তদাযুধৈস্তুরীযা
বৃত্তির্ভবতি . শ্রীসূক্তৈরাবাহনাদি . ষোডশসহস্রজপঃ .
সৌভাগ্যরমৈকাক্ষর্যা ভৃগুনিচৃদ্গাযত্রী . শ্রিয ঋষ্যাদযঃ .
শমিতি বীজশক্তিঃ . শ্রীমিত্যাদি ষডঙ্গম্ . ভূযাদ্ভূযো
দ্বিপদ্মাভযবরদকরা তপ্তকার্তস্বরাভা শুভ্রাভ্রাভেভযুগ্ম-
দ্বযকরধৃতকুম্ভাদ্ভিরাসিচ্যমানা . রক্তৌঘাবদ্ধমৌলি-
র্বিমলতরদুকূলার্তবালেপনাঢ্যা পদ্মাক্ষী পদ্মনাভোরসি
কৃতবসতিঃ পদ্মগা শ্রীঃ শ্রিযৈ নঃ .. ১..
তত্পীঠম্ . অষ্টপত্রং বৃত্তত্রযং দ্বাদশরাশিখণ্ডং
চতুরস্রং রমাপীঠং ভবতি . কর্ণিকাযাং সসাধ্যং শ্রীবীজম্ .
বিভূতিরুন্নতিঃ কান্তিঃ সৃষ্টিঃ কীর্তিঃ সন্নতির্ব্যুষ্টিঃ
সত্কৃষ্টিরৃদ্ধিরিতি প্রণবাদিনমো তৈশ্চতুর্থ্যন্তৈর্নবশক্তিং
যজেত্ . অঙ্গে প্রথমা বৃতিঃ .
বাসুদেবাভির্দ্বিতীযা . বালাক্যাদিভিস্তৃতীযা .
ইন্দ্রাদিভিশ্চতুর্থী ভবতি .
দ্বাদশলক্ষজপঃ . শ্রীলক্ষ্মীর্বরদা বিষ্ণুপত্নী
বসুপ্রদা হিরণ্যরূপা
স্বর্ণমালিনী রজতস্রজা স্বর্ণপ্রভা স্বর্ণপ্রাকারা
পদ্মবাসিনী পদ্মহস্তা
পদ্মপ্রিযা মুক্তালঙ্কারা চন্দ্রসূর্যা বিল্বপ্রিযা ঈশ্বরী
ভুক্তির্মুক্তির্বিভূতিরৃদ্ধিঃ সমৃদ্ধিঃ কৃষ্টিঃ
পুষ্টির্ধনদা ধনেশ্বরী
শ্রদ্ধা ভোগিনী ভোগদা সাবিত্রী ধাত্রী
বিধাত্রীত্যাদিপ্রণবাদিনমোন্তাশ্চতুর্থ্যন্তা
মন্ত্রাঃ . একাক্ষরবদঙ্গাদিপীঠম্ . লক্ষজপঃ .
দশাংশং তর্পণম্ .
দশাংশং হবনম্ . দ্বিজতৃপ্তিঃ . নিষ্কামানামেব
শ্রীবিদ্যাসিদ্ধিঃ .
ন কদাপি সকামানামিতি .. ১..
অথ হৈনং দেবা ঊচুস্তুরীযযা মাযযা নির্দিষ্টং
তত্ত্বং ব্রূহীতি . তথেতি স হোবাচ .
যোগেন যোগো জ্ঞাতব্যো যোগো যোগাত্প্রবর্ধতে .
যোঽপ্রমত্তস্তু যোগেন স যোগী রমতে চিরম্ .. ১..
সমাপয্য নিদ্রাং সিজীর্ণেঽল্পভোজী
শ্রমত্যাজ্যবাধে বিবিক্তে প্রদেশে .
সদা শীতনিস্তৃষ্ণ এষ প্রযত্নোঽথ
বা প্রাণরোধো নিজাভ্যাসমার্গাত্ .. ২..
বক্ত্রেণাপূর্য বাযুং হুতবলনিলযেঽপানমাকৃষ্য ধৃত্বা
স্বাঙ্গুষ্ঠাদ্যঙ্গুলীভির্বরকরতলযোঃ ষড্ভিরেবং নিরুধ্য .
শ্রোত্রে নেত্রে চ নাসাপুটযুগলমতোঽনেন মার্গেণ সম্যক্-
পশ্যন্তি প্রত্যযাশং প্রণববহুবিধধ্যানসংলীনচিত্তাঃ .. ৩..
শ্রবণমুখনযননাসানিরোধনেনৈব কর্তব্যম্ .
শুদ্ধসুষুম্নাসরণৌ স্ফুটমমলং শ্রূযতে নাদঃ .. ৪..
বিচিত্রঘোষসংযুক্তানাহতে শ্রূযতে ধ্বনিঃ .
দিব্যদেহশ্চ তেজস্বী দিব্যগন্ধোঽপ্যরোগবান্ .. ৫..
সংপূর্ণহৃদযঃ শূন্যে ত্বারম্ভে যোগবান্ভবেত্ .
দ্বিতীযা বিঘটীকৃত্য বাযুর্ভবতি মধ্যগঃ .. ৬..
দৃঢাসনো ভবেদ্যোগী পদ্মাদ্যাসনসংস্থিতঃ .
বিষ্ণুগ্রন্থেস্ততো ভেদাত্পরমানন্দসম্ভবঃ .. ৭..
অতিশূন্যো বিমর্দশ্চ ভেরীশব্দস্ততো ভবেত্ .
তৃতীযাং যত্নতো ভিত্ত্বা নিনাদো মর্দলধ্বনিঃ .. ৮..
মহাশূন্যং ততো যাতি সর্বসিদ্ধিসমাশ্রযম্ .
চিত্তানন্দং ততো ভিত্ত্বা সর্বপীঠগতানিলঃ .. ৯..
নিষ্পত্তৌ বৈষ্ণবঃ শব্দঃ ক্বণতীতি ক্বণো ভবেত্ .
একীভূতং তদা চিত্তং সনকাদিমুনীডিতম্ .. ১০..
অন্তেঽনন্তং সমারোপ্য খণ্ডেঽখণ্ডং সমর্পযন্ .
ভূমানং প্রকৃতিং ধ্যাত্বা কৃতকৃত্যোঽমৃতো ভবেত্ .. ১১..
যোগেন যোগং সংরোধ্য ভাবং ভাবেন চাঞ্জসা .
নির্বিকল্পং পরং তত্ত্বং সদা ভূত্বা পরং ভবেত্ .. ১২..
অহংভাবং পরিত্যজ্য জগদ্ভাবমনীদৃশম্ .
নির্বিকল্পে স্থিতো বিদ্বান্ভূযো নাপ্যনুশোচতি .. ১৩..
সলিলে সৈন্ধাবং যদ্বত্সাম্যং ভবতি যোগতঃ .
তথাত্মমনসৌরেক্যং সমাধিরভিধীযতে .. ১৪..
যদা সংক্ষীযতে প্রাণো মানসং চ প্রলীযতে .
তদা সমরসত্বং যত্সমাধিরভিধীযতে .. ১৫..
যত্সমত্বং তযোরত্র জীবাত্মপরমাত্মনোঃ .
সমস্তনষ্টসঙ্কল্পঃ সমাধিরভিধীযতে .. ১৬..
প্রভাশূন্যং মনঃশূন্যং বুদ্ধিশূন্যং নিরামযম্ .
সর্বশূন্যং নিরাভাসং সমাধিরভিধীযতে .. ১৭..
স্বযমুচ্চলিতে দেহে দেহী নিত্যসমাধিনা .
নিশ্চলং তং বিজানীযাত্সমাধিরভিধীযতে .. ১৮..
যত্রযত্র মনো যাতি তত্রতত্র পরং পদম্ .
তত্রতত্র পরং ব্রহ্ম সর্বত্র সমবস্থিতম্ .. ১৯.. ইতি.. .. ২..
অথ হৈনং দেবা ঊচুর্নবচক্রবিবেকমনুব্রূহীতি .
তথেতি স হোবাচ আধারে ব্রহ্মচক্রং ত্রিরাবৃত্তং
ভগমণ্ডলাকারম্ . তত্র মূলকন্দে শক্তিঃ পাবকাকারং
ধ্যাযেত্ . তত্রৈব কামরূপপীঠং সর্বকামপ্রদং ভবতি .
ইত্যাধারচক্রম্ . দ্বিতীযং স্বাধিষ্ঠানচক্রং
ষড্দলম্ . তন্মধ্যে পশ্চিমাভিমুখং লিঙ্গং
প্রবালাঙ্কুরসদৃশং ধ্যাযেত্ . তত্রৈবোড্যাণপীঠং
জগদাকর্ষণসিদ্ধিদং ভবতি . তৃতীযং
নাভিচক্রং পঞ্চাবর্তং সর্পকুটিলাকারম্ .
তন্মধ্যে কুণ্ডলিনীং বালার্ককোটিপ্রভাং
তনুমধ্যাং ধ্যাযেত্ . সামর্থ্যশক্তিঃ সর্বসিদ্ধিপ্রদা
ভবতি . মণিপূরচক্রং হৃদযচক্রম্ .
অষ্টদলমধোমুখম্ . তন্মধ্যে জ্যোতির্মযলিঙ্গাকারং
ধ্যাযেত্ . সৈব হংসকলা সর্বপ্রিযা সর্বলোকবশ্যকরী
ভবতি . কণ্ঠচক্রং চতুরঙ্গুলম্ . তত্র বামে ইডা
চন্দ্রনাডী দক্ষিণে পিঙ্গলা সূর্যনাডী তন্মধ্যে সুষুম্নাং
শ্বেতবর্ণাং ধ্যাযেত্ . য এবং বেদানাহতা সিদ্ধিদা ভবতি .
তালুচক্রম্ . তত্রামৃতধারাপ্রবাহঃ .
ঘণ্টিকালিঙ্গমূলচক্ররন্ধ্রে রাজদন্তাবলম্বিনীবিবরং
দশদ্বাদশারম্ . তত্র শূন্যং ধ্যাযেত্ . চিত্তলযো ভবতি .
সপ্তমং ভূচক্রমঙ্গুষ্ঠমাত্রম্ . তত্র জ্ঞাননেত্রং
দীপশিখাকারং ধ্যাযেত্ . তদেব কপালকন্দবাক্সিদ্ধিদং
ভবতি . আজ্ঞাচক্রমষ্টমম্ . ব্রহ্মরন্ধ্রং নির্বাণচক্রম্ .
তত্র সূচিকাগৃহেতরং ধূম্রশিখাকারং ধ্যাযেত্ . তত্র
জালন্ধরপীঠং মোক্ষপ্রদং ভবতীতি পরব্রহ্মচক্রম্ .
নবমমাকাশচক্রম্ . তত্র ষোডশদলপদ্মমূর্ধ্বমুখং
তন্মধ্যকর্ণিকাত্রিকূটাকারম্ . তন্মধ্যে ঊর্ধ্বশক্তিঃ .
তাং পশ্যন্ধ্যাযেত্ . তত্রৈব পূর্ণগিরিপীঠং
সর্বেচ্ছাসিদ্ধিসাধনং ভবতি . সৌভাগ্যলক্ষ্ম্যুপনিষদং
নিত্যমধীতে যোঽগ্নিপূতো ভবতি . স বাযুপূতো ভবতি . স
সকলধনধান্যসত্পুত্রকলত্রহযভূগজপশুমহিষীদাসীদাস-
যোগজ্ঞানবান্ভবতি . ন স পুনরাবর্ততে ন স পুনরাবর্তত
ইত্যুপনিষত্ .
ॐ বাঙ্মে মনসি প্রতিষ্ঠিতা মনো মে বাচি প্রতিষ্ঠিতম্
আবিরাবীর্ম এধি .. বেদস্য ম আণীস্থঃ শ্রুতং মে মা
প্রহাসীরনেনাধীতেনাহোরাত্রান্সন্দধাম্যৃতং বদিষ্যামি
সত্যং বদিষ্যামি .. তন্মামবতু তদ্বক্তারমবতু অবতু মামবতু
বক্তারমবতু বক্তারম্ .. ॐ শান্তিঃ শান্তিঃ শান্তিঃ ..
ইতি শ্রীসৌভাগ্যলক্ষ্ম্যুপনিষত্সমাপ্তা ..