মহা

. মহোপনিষত্ ..

যন্মহোপনিষদ্বেদ্যং চিদাকাশতযা স্থিতম্ .
পরমাদ্বৈতসাম্রাজ্যং তদ্রামব্রহ্ম মে গতিঃ ..
ॐ আপ্যাযন্তু মামাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরকরণম-
স্ত্বনিরাকারণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু..
ॐ শান্তিঃ শান্তিঃ শান্তিঃ ..
অথাতো মহোপনিষদং ব্যাখ্যাস্যমস্তদাহুরেকো হ বৈ নারাযণ
আসীন্ন ব্রহ্মা নেশানো নাপো নাগ্নীষোমৌ নেমে দ্যাবাপৃথিবী ন
নক্ষত্রাণি ন সূর্যো ন চন্দ্রমাঃ . স একাকী ন রমতে . তস্য
ধ্যানান্তঃস্থস্য যজ্ঞস্তোমমুচ্যতে . তস্মিন্পুরুষাশ্চতুর্দশ
জাযন্তে . একা কন্যা . দশেন্দ্রিযাণি মন একাদশং তেজঃ .
দ্বাদশোঽহঙ্কারঃ . ত্রযোদশকঃ প্রাণঃ . চতুর্দশ আত্মা .
পঞ্চদশী বুদ্ধিঃ . ভূতানি পঞ্চ তন্মাত্রাণি . পঞ্চ মহাভূতানি .
স একঃ পঞ্চবিংশতিঃ পুরুষঃ . তত্পুরুষং পুরুষো নিবেশ্য নাস্য
প্রধানসংবত্সরা জাযন্তে . সংবত্সরাদধিজাযন্তে . অথ পুনরেব
নারাযণঃ সোঽন্যত্কামো মনসাধ্যাযত . তস্য ধ্যানান্তঃস্থস্য
ললাটাত্ত্র্যক্ষঃ শূলপাণিঃ পুরুষো জাযতে . বিভ্রচ্ছ্রিযং যশঃ
সত্যং ব্রহ্মচর্যং তপো বৈরাগ্যং মন ঐশ্বর্যং সপ্রণবা ব্যাহৃতয
ঋগ্যজুঃসামাথর্বাঙ্গিরসঃ সর্বাণি ছন্দাংসি তান্যঙ্গে
সমাশ্রিতানি . তস্মাদীশানো মহাদেবো মহাদেবঃ . অথ পুনরেব
নারাযণঃ সোঽন্যত্কামো মনসাধ্যাযত . তস্য ধ্যানান্তঃস্থস্য
ললাটাত্স্বেদোঽপপত্ . তা ইমাঃ প্রততা আপঃ . ততস্তেজো হিরণ্মযমন্ডলম্ .
তত্র ব্রহ্মা চতুর্মুখোঽজাযত . সোঽধ্যায্ত্ . পূর্বাভিমুখো ভূত্বা
ভূরিতি ব্যাহৃতির্গাযত্রং ছন্দ ঋগ্বেদোঽগ্নির্দেবতা . পশ্চিমাভিমুখো
ভূত্বা ভুবরিতি ব্যাহৃতিস্ত্রৈষ্টুভং ছন্দো যজুর্বেদো বাযুর্দেবতা .
উত্তরাভিমুখো ভূত্বা স্বরিতি ব্যাহৃতির্জাগ্রতং ছন্দঃ সামবেদঃ সূর্যো
দেবতা . দক্ষিণাভিমুখো ভূত্বা মহরিতিব্যাহৃতিরানুষ্টভ
ছন্দোঽথর্ববেদাঃ সোমো দেবতা .
সহস্রশীর্ষং দেবং সহস্রাক্ষং বিশ্বসম্ভুবম্ .
বিশ্বতঃ পরমং নিত্যং বিশ্বং নারাযণং হরিম্ .
বিশ্বমেবেদং পুরুষস্তদ্বিশ্বমুপজীবতি .
পতিং বিশ্বেশ্বরং দেবং সমুদ্রে বিশ্বরূপিণম্ .
পদ্মকোশপ্রতীকাশং লম্বত্যাকোশসংনিভম্ .
হৃদযং চাপ্যধোমুখং সন্তত্যৈ সীত্করাভীশ্চ .
তস্য মধ্যে মহানর্চির্বিশ্বর্চির্বিশ্বতোমুখম্ .
তস্য মধ্যে বহ্নিশিখা অণীযোর্ধ্বা ব্যবস্থিতা .
তস্যাঃ শিখাযা মধ্যে পরমাত্মা ব্যবস্থিতা .
স ব্রহ্মা স ঈশানঃ সেন্দ্রঃ সোঽক্ষরঃ পরমঃ স্বরাডিতি মহোপনিষত্ ..
ইতি প্রথমোধ্যাযঃ .. ১..
শুকো নাম মহাতেজাঃ স্বরূপানন্দতত্পরঃ .
জাতমাত্রেণ মুনিরাড্ যত্সত্যং তদবাপ্তবান্ .. ১..
তেনাসৌ স্ববিবেকেন স্বযমেব মহামনাঃ .
প্রবিচার্য চিরং সাধু স্বাত্মনিশ্চযমাপ্তবান্ .. ২..
অনাখ্যত্বাদগম্যত্বান্মনঃষষ্ঠেন্দ্রিযস্থিতেঃ .
চিন্মাত্রমেবমাত্মাণুরাকাশাদপি সূক্ষ্মকঃ .. ৩..
চিদণোঃ পরমস্যান্তঃ কোটিব্রহ্মাণ্ডরেণবঃ .
উত্পত্তিস্থিতিমভ্যেত্য লীযন্তে শক্তিপর্যযাত্ .. ৪..
আকাশং বাহ্যশূন্যত্বাদনাকাশং তু চিত্ত্বতঃ .
ন কিংচিদ্যদনির্দেশ্যং বস্তু সত্তেতি কিংচন .. ৫..
চেতনোঽসৌ প্রকাশত্বাদ্বেদ্যাভাবাচ্ছিলোপমঃ .
স্বাত্মনি ব্যোমনি স্বস্থে জগদুন্মেষচিত্রকৃত্ .. ৬..
তদ্ভামাত্রমিদং বিশ্বমিতি ন স্যাত্ততঃ পৃথক্ .
জগদ্ভেদোঽপি তদ্ভানমিতি ভেদোঽপি তন্মযঃ .. ৭..
সর্বগঃ সর্বসম্বন্ধো গত্যভাবান্ন গচ্ছতি .
নাস্ত্যসাবশ্রযাভাবাত্সদ্রূপত্বাদথাস্তি চ .. ৮..
বিজ্ঞানমানন্দং ব্রহ্ম রাতের্দাতুঃ পরাযণম্ .
সর্বসংকল্পসংন্যাসশ্চেতসা যত্পরিগ্রহঃ .. ৯..
জাগ্রতঃ প্রত্যযাভাবং যস্যাহুঃ প্রত্যযং বুধাঃ .
যত্সংকোচবিকাসাভ্যাং জগত্প্রলযসৃষ্টযঃ .. ১০..
নিষ্ঠা বেদান্তবাক্যানামথ বাচামগোচরঃ .
অহং সচ্চিত্পরানন্দব্রহ্মৈবাস্মি ন চেতরঃ .. ১১..
স্বযৈব সূক্ষ্মযা বুদ্ধ্যা সর্বং বিজ্ঞাতবাঞ্ছুকঃ .
স্বযং প্রাপ্তে পরে বস্তুন্যবিশ্রান্তমনাঃ স্থিতঃ .. ১২..
ইদং বস্ত্বিতি বিশ্বাসং নাসাবাত্মন্যুপাযযৌ .
কেবলং বিররামাস্য চেতো বিষযচাপলম্ .
ভোগেভ্যো ভূরিভঙ্গেভ্যো ধারাভ্য ইব চাতকঃ .. ১৩..
একদা সোঽমলপ্রজ্ঞো মেরাবেকান্তসংস্থিতঃ .
পপ্রচ্ছ পিতরং ভক্ত্যা কৃষ্ণদ্বৈপাযনং মুনিম্ .. ১৪..
সংসারাডম্বরমিদং কথমভ্যুত্থিতং মুনে .
কথং চ প্রশমং যাতি কিং যত্কস্য কদা বদ .. ১৫..
এবং পৃষ্টেন মুনিনা ব্যাসেনাখিলমাত্মজে .
যথাবদখিলং প্রোক্তং বক্তব্যং বিদিতাত্মনা .. ১৬..
অজ্ঞাসিষং পূর্বমেবমহমিত্যথ তত্পিতুঃ .
স শুকঃ স্বকযা বুদ্ধ্যা ন বাক্যং বহু মন্যতে .. ১৭..
ব্যাসোঽপি ভগবান্বুদ্ধ্বা পুত্রাভিপ্রাযমীদৃশম্ .
প্রত্যুবাচ পুনঃ পুত্রং নাহং জানামি তত্ত্বতঃ .. ১৮..
জনকো নাম ভূপালো বিদ্যতে মিথিলাপুরে .
যথাবদ্বেত্ত্যসৌ বেদ্যং তস্মাত্সর্বমবাপ্স্যসি .. ১৯..
পিত্রেত্যুক্তঃ শুকঃ প্রাযাত্সুমেরোর্বসুধাতলম্ .
বিদেহনগরীং প্রাপ জনকেনাভিপালিতাম্ .. ২০..
আবেদিতোঽসৌ যাষ্টীকৈর্জনকায মহাত্মনে .
দ্বারি ব্যাসসুতো রাজঞ্ছুকোঽত্র স্থিতবানিতি .. ২১..
জিজ্ঞাসার্থং শুকস্যাসাবাস্তামেবেত্যবজ্ঞযা .
উক্ত্বা বভূব জনকস্তূষ্ণীং সপ্ত দিনান্যথ .. ২২..
ততঃ প্রবেশযামাস জনকঃ শুকমঙ্গণে .
তত্রাহানি স সপ্তৈব তথৈবাবসদুন্মনাঃ .. ২৩..
ততঃ প্রবেশযামাস জনকোঽন্তঃপুরাজিরে .
রাজা ন দৃশ্যতে তাবদিতি সপ্তদিনানি তম্ .. ২৪..
তত্রোন্মদাভিঃ কান্তাভির্ভোজনৈর্ভোগসংচযৈঃ .
জনকো লালযামাস শুকং শশিনিভাননম্ .. ২৫..
তে ভোগাস্তানি ভোজ্যানি ব্যাসপুত্রস্য তন্মনঃ .
নাজহ্বুর্মন্দপবনো বদ্ধপীঠমিবাচলম্ .. ২৬..
কেবলং সুসমঃ স্বচ্ছো মৌনী মুদিতমানসঃ .
সংপূর্ণ ইব শীতাংশুরতিষ্ঠদমলঃ শুকঃ .. ২৭..
পরিজ্ঞাতস্বভাবং তং শুকং স জনকো নৃপঃ .
আনীয মুদিতাত্মানমবলোক্য ননাম হ .. ২৮..
নিঃশেষিতজগত্কার্যঃ প্রাপ্তাখিলমনোরথঃ .
কিমীপ্সিতং তবেত্যাহ কৃতস্বাগত আহ তম্ .. ২৯..
সংসারাডম্বরমিদং কথমভ্যুত্থিতং গুরো .
কথং প্রশমমাযাতি যথাবত্কথযাশু মে ..৩০..
যথাবদখিলং প্রোক্তং জনকেন মহাত্মনা .
তদেব তত্পুরা প্রোক্তং তস্য পিত্রা মহাধিযা .. ৩১..
স্বযমেব মযা পূর্বমভিজ্ঞাতং বিশেষতঃ .
এতদেব হি পৃষ্টেন পিত্রা মে সমুদাহৃতম্ .. ৩২..
ভবতাপ্যেষ এবার্থঃ কথিতো বাগ্বিদাং বর .
এষ এব হি বাক্যার্থঃ শাস্ত্রেষু পরিদৃশ্যতে .. ৩৩..
মনোবিকল্পসংজাতং তদ্বিকল্পপরিক্ষযাত্ .
ক্ষীযতে দগ্ধসংসারো নিঃসার ইতি নিশ্চিতঃ .. ৩৪..
তত্কিমেতন্মহাভাগ সত্যং ব্রূহি মমাচলম্ .
ত্বত্তো বিশ্রমমাপ্নোমি চেতসা ভ্রমতা জগত্ .. ৩৫..
শ্রুণু তাবদিদানীং ত্বং কথ্যমানমিদং মযা .
শ্রীশুকং জ্ঞানবিস্তারং বুদ্ধিসারান্তরান্তরম্ .. ৩৬..
যদ্বিজ্ঞানাত্পুমান্সদ্যো জীবন্মুক্তত্বমাপ্নুযাত্ .. ৩৭..
দৃশ্যং নাস্তীতি বোধেন মনসো দৃশ্যমার্জনম্ .
সংপন্নং চেত্তদুত্পন্না পরা নির্বাণনির্বৃতিঃ .. ৩৮..
অশেষেণ পরিত্যাগো বাসনাযাং য উত্তমঃ .
মোক্ষ ইত্যুচ্যতে সদ্ভিঃ স এব বিমলক্রমঃ .. ৩৯..
যে শুদ্ধবাসনা ভূযো ন জন্মানর্থভাগিনঃ .
জ্ঞাতজ্ঞেযাস্ত উচ্যন্তে জীবন্মুক্তা মহাধিযঃ .. ৪০..
পদার্থভাবনাদার্ঢ্যং বন্ধ ইত্যভিধীযতে .
বাসনাতানবং ব্রহ্মন্মোক্ষ ইত্যভিধীযতে .. ৪১..
তপঃ প্রভৃতিনা যস্মৈ হেতুনৈব বিনা পুনঃ .
ভোগা ইহ ন রোচন্তে স জীবন্মুক্ত উচ্যতে .. ৪২..
আপতত্সু যথাকালং সুখদুঃখেষ্বনারতঃ .
ন হৃষ্যতি গ্লাযতি যঃ স জীবন্মুক্ত উচ্যতে .. ৪৩..
হর্ষামর্ষভযক্রোধকামকার্পণ্যদৃষ্টিভিঃ .
ন পরামৃশ্যতে যোঽন্তঃ স জীবন্মুক্ত উচ্যতে .. ৪৪..
অহংকারমযীং ত্যক্ত্বা বাসনাং লীলযৈব যঃ .
তিষ্ঠতি ধ্যেযসংত্যাগী স জীবন্মুক্ত উচ্যতে .. ৪৫..
ঈপ্সিতানীপ্সিতে ন স্তো যস্যান্তর্বর্তিদৃষ্টিষু .
সুষুপ্তিবদ্যশ্চরতি স জীবন্মুক্ত উচ্যতে .. ৪৬..
অধ্যাত্মরতিরাসীনঃ পূর্ণঃ পাবনমানসঃ .
প্রাপ্তানুত্তমবিশ্রান্তির্ন কিংচিদিহ বাঞ্ছতি .
যো জীবতি গতস্নেহঃ স জীবন্মুক্ত উচ্যতে .. ৪৭..
সংবেদ্যেন হৃদাকাশে মনাগপি ন লিপ্যতে .
যস্যাসাবজডা সংবিত্স জীবন্মুক্ত উচ্যতে .. ৪৮..
রাগদ্বেষৌ সুখং দুঃখং ধর্মাধর্মৌ ফলাফলে .
যঃ করোত্যনপেক্ষ্যৈব স জীবন্মুক্ত উচ্যতে .. ৪৯..
মৌনবান্নিরহংভাবো নির্মানো মুক্তমত্সরঃ .
যঃ করোতি গতোদ্বেগঃ স জীবন্মুক্ত উচ্যতে .. ৫০..
সর্বত্র বিগতস্নেহো যঃ সাক্ষিবদবস্থিতঃ .
নিরিচ্ছো বর্ততে কার্যে স জীবন্মুক্ত উচ্যতে .. ৫১..
যেন ধর্মমধর্মং চ মনোমননমীহিতম্ .
সর্বমন্তঃ পরিত্যক্তং স জীবন্মুক্ত উচ্যতে .. ৫২..
যাবতী দৃশ্যকলনা সকলেযং বিলোক্যতে .
সা যেন সুষ্ঠু সংত্যক্তা স জীবন্মুক্ত উচ্যতে .. ৫৩..
কট্বম্ললবণং তিক্তমমৃষ্টং মৃষ্টমেব চ .
সমমেব চ যো ভুঙ্ক্তে স জীবন্মুক্ত উচ্যতে .. ৫৪..
জরামরণমাপচ্চ রাজ্যং দারিদ্র্যমেব চ .
রম্যমিত্যেব যো ভুঙ্ক্তে স জীবন্মুক্ত উচ্যতে .. ৫৫..
ধর্মাধর্মৌ সুখং দুঃখং তথা মরণজন্মনী .
ধিযা যেন সুসংত্যক্তং স জীবন্মুক্ত উচ্যতে .. ৫৬..
উদ্বেগানন্দরহিতঃ সমযা স্বচ্ছযা ধিযা .
ন শোচতে ন চোদেতি স জীবন্মুক্ত উচ্যতে .. ৫৭..
সর্বেচ্ছাঃ সকলাঃ শঙ্কাঃ সর্বেহাঃ সর্বনিশ্চযাঃ .
ধিযা যেন পরিত্যক্তাঃ স জীবন্মুক্ত উচ্যতে .. ৫৮..
জন্মস্থিতিবিনাশেষু সোদযাস্তমযেষু চ .
সমমেব মনো যস্য স জীবন্মুক্ত উচ্যতে .. ৫৯..
ন কিংচন দ্বেষ্টি তথা ন কিংচিদপি কাঙ্ক্ষতি .
ভুঙ্ক্তে যঃ প্রকৃতান্ভোগান্স জীবন্মুক্ত উচ্যতে .. ৬০..
শান্তসংসারকলনঃ কলাবানপি নিষ্কলঃ .
যঃ সচিত্তোঽপি নিশ্চিত্তঃ স জীবন্মুক্ত উচ্যতে .. ৬১..
যঃ সমস্তার্থজালেষু ব্যবহার্যপি নিঃস্পৃহঃ .
পরার্থেষ্বিব পূর্ণাত্মা স জীবন্মুক্ত উচ্যতে .. ৬২..
জীবন্মুক্তপদং ত্যক্ত্বা স্বদেহে কালসাত্কৃতে .
বিশত্যদেহমুক্তত্বং পবনোঽস্পন্দতামিব .. ৬৩..
বিদেহমুক্তো নোদেতি নাস্তমেতি ন শাম্যতি .
ন সন্নাসন্ন দূরস্থো ন চাহং ন চ নেতরঃ .. ৬৪..
ততঃ স্তিমিতগংভীরং ন তেজো ন তমস্ততম্ .
অনাখ্যমনভিব্যক্তং সত্কিংচিদবশিষ্যতে .. ৬৫..
ন শূন্যং নাপি চাকারো ন দৃশ্যং নাপি দর্শনম্ .
ন চ ভূতপদার্থৌঘসদনন্ততযা স্থিতম্ .. ৬৬..
কিমপ্যব্যপদেশাত্মা পূর্ণাত্পূর্ণতরাকৃতিঃ .
ন সন্নাসন্ন সদসন্ন ভাবো ভাবনং ন চ .. ৬৭..
চিন্মাত্রং চৈত্যরহিতমনন্তমজরং শিবম্ .
অনাদিমধ্যপর্যন্তং যদনাদি নিরামযম্ .. ৬৮..
দ্রষ্টৃদর্শনদৃশ্যানাং মধ্যে যদ্দর্শনং স্মৃতম্ .
নাতঃ পরতরং কিংচিন্নিশ্চযোঽস্ত্যপরো মুনে .. ৬৯..
স্বযমেব ত্বযা জ্ঞাতং গুরুতশ্চ পুনঃ শ্রুতম্ .
স্বসংকল্পবশাদ্বদ্ধো নিঃসংকল্পাদ্বিমুচ্যতে .. ৭০..
তেন স্বযং ত্বযা জ্ঞাতং জ্ঞেযং যস্য মহাত্মনঃ .
ভোগেভ্যো হ্যরতির্জাতা দৃশ্যাদ্বা সকলাদিহ .. ৭১..
প্রাপ্তং প্রাপ্তব্যমখিলং ভবতা পূর্ণচেতসা .
স্বরূপে তপসি ব্রহ্মন্মুক্তস্ত্বং ভ্রান্তিমুত্সৃজ .. ৭২..
অতিবাহ্যং তথা বাহ্যমন্তরাভ্যন্তরং ধিযঃ .
শুক পশ্যন্ন পশ্যেস্ত্বং সাক্ষী সংপূর্ণকেবলঃ .. ৭৩..
বিশশ্রাম শুকস্তূষ্ণীং স্বস্থে পরমবস্তুনি .
বীতশোকভযাযাসো নিরীহশ্ছিন্নসংশযঃ .. ৭৪..
জগাম শিখরং মেরোঃ সমাধ্যর্থমখণ্ডিতম্ .. ৭৫..
তত্র বর্ষসহস্রাণি নির্বিকল্পসমাধিনা .
দেশে স্থিত্বা শশামাসাবাত্মন্যস্নেহদীপবত্ .. ৭৬..
ব্যপগতকলনাকলঙ্কশুদ্ধঃ
     স্বযমমলাত্মনি পাবনে পদেঽসৌ .
সলিলকণ ইবাংবুধৌ মহাত্মা
     বিগলিতবাসনমেকতাং জগাম .. ৭৭..
ইতি মহোপনিষত্ . ইতি দ্বিতীযোঽধ্যাযঃ .. ২..
নিদাঘো নাম মুনিরাট্ প্রাপ্তবিদ্যশ্চ বালকঃ .
বিহৃতস্তীর্থযাত্রার্থং পিত্রানুজ্ঞাতবান্স্বযম্ .. ১..
সার্ধত্রিকোটিতীর্থেষু স্নাত্বা গৃহমুপাগতঃ .
স্বোদন্তং কথযামাস ঋভুং নত্বা মহাযশাঃ .. ২..
সার্ধত্রিকোটিতীর্থেষু স্নানপুণ্যপ্রভাবতঃ .
প্রাদুর্ভূতোমনসি মে বিচারঃ সোঽযমীদৃশঃ .. ৩..
জাযতে ম্রিযতে লোকো ম্রিযতে জননায চ .
অস্থিরঃ সর্ব এবেমে সচরাচরচেষ্টিতাঃ .
সর্বাপদাং পদং পাপা ভাবা বিভবভূমযঃ .. ৪..
অযঃশলাকাসদৃশাঃ পরস্পরমসঙ্গিনঃ .
শুষ্যন্তে কেবলা ভাবা মনঃকল্পনযানযা .. ৫..
ভাবেষ্বরতিরাযাতা পথিকস্য মরুষ্বিব .
শাম্যতীদং কথং দুঃখমিতি তপ্তোঽস্মি চেতসা .. ৬..
চিন্তানিচযচক্রাণি নানন্দায ধনানি মে .
সংপ্রসূতকলত্রাণি গৃহাণ্যুগ্রাপদামিব .. ৭..
ইযমস্মি স্থিতোদারা সংসারে পরিপেলবা .
শ্রীর্মুনে পরিমোহায সাপি নূনং ন শর্মদা .. ৮..
আযুঃ পল্লবকোণাগ্রলম্বাম্বুকণভঙ্গুরম্ .
উন্মত্ত ইব সংত্যজ্য যাম্যকাণ্ডে শরীরকম্ .. ৯..
বিষযাশী বিষাসঙ্গপরিজর্জরচেতসাম্ .
অপ্রৌঢাত্মবিবেকানামাযুরাযাসকারণম্ .. ১০..
যুজ্যতে বেষ্টনং বাযোরাকাশস্য চ খণ্ডনম্ .
গ্রন্থনং চ তরঙ্গাণামাস্থা নাযুষি যুজ্যতে .. ১১..
প্রাপ্যং সংপ্রাপ্যতে যেন ভূযো যেন ন শোচ্যতে .
পরাযা নির্বৃতেঃ স্থানং যত্তজ্জীবিতমুচ্যতে .. ১২..
তরবোঽপি হি জীবন্তি জীবন্তি মৃগপক্ষিণঃ .
স জীবতি মনো যস্য মননেনোপজীবতি .. ১৩..
জাতাস্ত এব জগতি জন্তবঃ সাধুজীবিতাঃ .
যে পুনর্নেহ জাযন্তে শেষা জরঠগর্দভাঃ .. ১৪..
ভারো বিবেকিনঃ শাস্ত্রং ভারো জ্ঞানং চ রাগিণঃ .
অশান্তস্য মনো ভারো ভারোঽনাত্মবিদো বপুঃ .. ১৫..
অহংকারবশাদাপদহংকারাদ্দুরাধযঃ .
অহংকারবশাদীহা নাহংকারাত্পরো রিপুঃ .. ১৬..
অহংকারবশাদ্যদ্যন্মযা ভুক্তং চরাচরম্ .
তত্তত্সর্বমবস্ত্বেব বস্ত্বহংকাররিক্ততা .. ১৭..
ইতশ্চেতশ্চ সুব্যগ্রং ব্যর্থমেবাভিধাবতি .
মনো দূরতরং যাতি গ্রামে কৌলেযকো যথা .. ১৮..
ক্রূরেণ জডতাং যাতা তৃষ্ণাভার্যানুগামিনা .
বশঃ কৌলেযকেনেব ব্রহ্মন্মুক্তোঽস্মি চেতসা .. ১৯..
অপ্যব্ধিপানান্মহতঃ সুমেরূন্মূলনাদপি .
অপি বহ্ন্যশনাদ্ব্রহ্মন্বিষমশ্চিত্তনিগ্রহঃ .. ২০..
চিত্তং কারণমর্থানাং তস্মিন্সতি জগত্ত্রযম্ .
তস্মিন্ক্ষীণে জগত্ক্ষীণং তচ্চিকিত্স্যং প্রযত্নতঃ .. ২১..
যাং যামহং মুনিশ্রেষ্ঠ সংশ্রযামি গুণশ্রিযম্ .
তাং তাং কৃন্ততি মে তৃষ্ণা তন্ত্রীমিব কুমূষিকা .. ২২..
পদং করোত্যলঙ্ঘ্যেঽপি তৃপ্তা বিফলমীহতে .
চিরং তিষ্ঠতি নৈকত্র তৃষ্ণা চপলমর্কটী .. ২৩..
ক্ষণমাযাতি পাতালং ক্ষণং যাতি নভস্থলম্ .
ক্ষণং ভ্রমতি দিক্কুঞ্জে তৃষ্ণা হৃত্পদ্মষট্পদী .. ২৪..
সর্বসংসারদুঃখানাং তৃষ্ণৈকা দীর্ঘদুঃখদা .
অন্তঃপুরস্থমপি যা যোজযত্যতিসংকটে .. ২৫..
তৃষ্ণাবিষূচিকামন্ত্রশ্চিন্তাত্যাগো হি স দ্বিজ .
স্তোকেনানন্দমাযাতি স্তোকেনাযাতি খেদতাম্ .. ২৬..
নাস্তি দেহসমঃ শোচ্যো নীচো গুণবিবর্জিতঃ .. ২৭..
কলেবরমহংকারগৃহস্থস্য মহাগৃহম্ .
লুঠত্বভ্যেতু বা স্থৈর্যং কিমনেন গুরো মম .. ২৮..
পঙ্ক্তিবদ্ধেন্দ্রিযপশুং বল্গত্তৃষ্ণাগৃহাঙ্গণম্ .
চিত্তভৃত্যজনাকীর্ণং নেষ্টং দেহগৃহং মম .. ২৯..
জিহ্বামর্কটিকাক্রান্তবদনদ্বারভীষণম্ .
দৃষ্টদন্তাস্থিশকলং নেষ্টং দেহগৃহং মম .. ৩০..
রক্তমাংসমযস্যাস্য সবাহ্যাভ্যন্তরে মুনে .
নাশৈকধর্মিণো ব্রূহি কৈব কাযস্য রম্যতা .. ৩১..
তডিত্সু শরদভ্রেষু গন্ধর্বনগরেষু চ .
স্থৈর্যং যেন বিনির্ণীতং স বিশ্বসিতু বিগ্রহে .. ৩২..
শৈশবে গুরুতো ভীতির্মাতৃতঃ পিতৃতস্তথা .
জনতো জ্যেষ্ঠবালাচ্চ শৈশবং ভযমন্দিরম্ .. ৩৩..
স্বচিত্তবিলসংস্থেন নানাবিভ্রমকারিণা .
বলাত্কামপিশাচেন বিবশঃ পরিভূযতে .. ৩৪..
দাসাঃ পুত্রাঃ স্ত্রিযশ্চৈব বান্ধবাঃ সুহৃদস্তথা .
হসন্ত্যুন্মত্তকমিব নরং বার্ধককম্পিতম্ .. ৩৫..
দৈন্যদোষমযী দীর্ঘা বর্ধতে বার্ধকে স্পৃহা .
সর্বাপদামেকসখী হৃদি দাহপ্রদাযিনী .. ৩৬..
ক্বচিদ্বা বিদ্যতে যৈষা সংসারে সুখভাবনা .
আযুঃ স্তম্বমিবাসাদ্য কালস্তামপি কৃন্ততি .. ৩৭..
তৃণং পাংসুং মহেন্দ্রং চ সুবর্ণং মেরুসর্ষপম্ .
আত্মংভরিতযা সর্বমাত্মসাত্কর্তুমুদ্যতঃ .
কালোঽযং সর্বসংহারী তেনাক্রান্তং জগত্ত্রযম্ .. ৩৮..
মাংসপাঞ্চালিকাযাস্তু যন্ত্রলোলেঅঙ্গপঞ্জরে .
স্নায্বস্থিগ্রন্থিশালিন্যাঃ স্ত্রিযঃ কিমিব শোভনম্ .. ৩৯..
ত্বঙ্মাংসরক্তবাষ্পাম্বু পৃথক্কৃত্বা বিলোচনে .
সমালোকয রম্যং চেত্কিং মুধা পরিমুহ্যসি .. ৪০..
মেরুশৃঙ্গতটোল্লাসিগঙ্গাচলরযোপমা .
দৃষ্টা যস্মিন্মুনে মুক্তাহারস্যোল্লাসশালিতা .. ৪১..
শ্মশানেষু দিগন্তেষু স এব ললনাস্তনঃ .
শ্বভিরাস্বাদ্যতে কালে লঘুপিণ্ড ইবান্ধসঃ .. ৪২..
কেশকজ্জলধারিণ্যো দুঃস্পর্শা লোচনপ্রিযাঃ .
দুষ্কৃতাগ্নিশিখা নার্যো দহন্তি তৃণবন্নরম্ .. ৪৩..
জ্বলতামতিদূরেঽপি সরসা অপি নীরসাঃ .
স্ত্রিযো হি নরকাগ্নীনামিন্ধনং চারু দারুণম্ .. ৪৪..
কামনাম্না কিরাতেন বিকীর্ণা মুগ্ধচেতসঃ .
নার্যো নরবিহঙ্গানামঙ্গবন্ধনবাগুরাঃ .. ৪৫..
জন্মপল্বলমত্স্যানাং চিত্তকর্দমচারিণাম্ .
পুংসাং দুর্বাসনারজ্জুর্নারী বডিশপিণ্ডিকা .. ৪৬..
সর্বেষাং দোষরত্নানাং সুসমুদ্গিকযানযা .
দুঃখশৃঙ্খলযা নিত্যমলমস্তু মম স্ত্রিযা .. ৪৭..
যস্য স্ত্রী তস্য ভোগেচ্ছা নিঃস্ত্রীকস্য ক্ব ভোগভূঃ .
স্ত্রিযং ত্যক্ত্বা জগত্ত্যক্তং জগত্ত্যক্ত্বা সুখী ভবেত্ .. ৪৮..
দিশোঽপি ন হি দৃশ্যন্তে দেশোঽপ্যন্যোপদেশকৃত্ .
শৈলা অপি বিশীর্যন্তে শীর্যন্তে তারকা অপি .. ৪৯..
শুষ্যন্ত্যপি সমুদ্রাশ্চ ধ্রুবোঽপ্যধ্রুবজীবনঃ .
সিদ্ধা অপি বিনশ্যন্তি জীর্যন্তে দানবাদযঃ .. ৫০..
পরমেষ্ঠ্যপি নিষ্ঠাবান্হীযতে হরিরপ্যজঃ .
ভাবোঽপ্যভাবমাযাতি জীর্যন্তে বৈ দিগীশ্বরাঃ .. ৫১..
ব্রহ্মা বিষ্ণুশ্চ রুদ্রশ্চ সর্বা বা ভূতজাতযঃ .
নাশমেবানুধাবন্তি সলিলানীব বাডবম্ .. ৫২..
আপদঃ ক্ষণমাযান্তি ক্ষণমাযান্তি সংপদঃ .
ক্ষণং জন্মাথ মরণং সর্বং নশ্বরমেব তত্ .. ৫৩..
অশূরেণ হতাঃ শূরা একেনাপি শতং হতম্ .
বিষং বিষযবৈষম্যং ন বিষং বিষমুচ্যতে .. ৫৪..
জন্মান্তরঘ্না বিষযা একজন্মহরং বিষম্ .
ইতি মে দোষদাবাগ্নিদগ্ধে সংপ্রতি চেতসি .. ৫৫..
স্ফুরন্তি হি ন ভোগাশা মৃগতৃষ্ণাসরঃস্বপি .
অতো মাং বোধযাশু ত্বং তত্ত্বজ্ঞানেন বৈ গুরো .. ৫৬..
নো চেন্মৌনং সমাস্থায নির্মানো গতমত্সরঃ .
ভাবযন্মনসা বিষ্ণুং লিপিকর্মার্পিতোপমঃ .. ৫৭..
ইতি মহোপনিষত্ . ইতি তৃতীযোঽধ্যাযঃ .. ৩..
নিদাঘ তব নাস্তন্যজ্জ্ঞেযং জ্ঞানবতাং বর .
প্রজ্ঞযা ত্বং বিজানাসি ঈশ্বরানুগৃহীতযা .
চিত্তমালিন্যসংজাতং মার্জযামি ভ্রমং মুনে .. ১..
মোক্ষদ্বারে দ্বারপালশ্চত্বারঃ পরিকীর্তিতাঃ .
শমো বিচারঃ সন্তোষশ্চতুর্থঃ সাধুসঙ্গমঃ .. ২..
একং বা সর্বযত্নেন সর্বমুত্সৃজ্য সংশ্রযেত্ .
একস্মিন্বশগে যান্তি চত্বারোঽপি বশং গতাঃ .. ৩..
শাস্ত্রৈঃ সজ্জনসংপর্কপূর্বকৈশ্চ তপোদমৈঃ .
আদৌ সংসারমুক্ত্যর্থং প্রজ্ঞামেবাভিবর্ধযেত্ .. ৪..
স্বানুভূতেশ্চ শাস্ত্রস্য গুরোশ্চেবৈকবাক্যতা .
যস্যাভ্যাসেন তেনাত্ম সততং চাবলোক্যতে .. ৫..
সংকল্পাশানুসন্ধানবর্জনং চেত্প্রতিক্ষণম্ .
করোষি তদচিত্তত্বং প্রাপ্ত এবাসি পাবনম্ .. ৬..
চেতসো যদকর্তৃত্বং তত্সমাধানমীরিতম্ .
তদেব কেবলীভাবং সাশুভা নির্বৃতিঃ পরা .. ৭..
চেতসা সংপরিত্যজ্য সর্বভাবাত্মভাবনাম্ .
যথা তিষ্ঠসি তিষ্ঠ ত্বং মূকান্ধবধিরোপমঃ .. ৮..
সর্বং প্রশান্তমজমেকমনাদিমধ্য-
    মাভাস্বরং স্বদনমাত্রমচৈত্যচিহ্নম্ .
সর্বং প্রশান্তমিতি শব্দমযী চ দৃষ্টি-
    র্বাধার্থমেব হি মুধৈব তদোমিতীদম্ .. ১০..
নিত্যপ্রবুদ্ধচিত্তস্ত্বং কুর্বন্বাপি জগত্ক্রিযাম্ .
আত্মৈকত্বং বিদিত্বা ত্বং তিষ্ঠাক্ষুব্ধমহাব্ধিবত্ .. ১১..
তত্ত্বাববোধ এবাসৌ বাসনাতৃণপাবকঃ .
প্রোক্তঃ সমাধিশব্দেন নতু তূষ্ণীমবস্থিতিঃ .. ১২..
নিরিচ্ছে সংস্থিতে রত্নে যথা লোকঃ প্রবর্ততে .
সত্তামাত্রে পরে তত্ত্বে তথৈবাযং জগদ্গণঃ .. ১৩..
অতশ্চাত্মনি কর্তৃত্বমকর্তৃত্বং চ বৈ মুনে .
নিরিচ্ছত্বাদকর্তাসৌ কর্তা সংনিধিমাত্রতঃ .. ১৪..
তে দ্বে ব্রহ্মণি বিন্দেতি কর্তৃতাকর্তৃতে মুনে .
যত্রৈবৈষ চমত্কারস্তমাশ্রিত্য স্থিরো ভব .. ১৫..
তস্মান্নিত্যমকর্তাহমিতি ভাবনযেদ্ধযা .
পরমামৃতনাম্নী সা সমতৈবাবশিষ্যতে .. ১৬..
নিদাঘ শৃণু সত্ত্বস্থা জাতা ভুবি মহাগুণাঃ .
তে নিত্যমেবাভ্যুদিতা মুদিতাঃ স্ব ইবেন্দবঃ .. ১৭..
নাপদি গ্লানিমাযান্তি নিশি হেমাম্বুজং যথা .
নেহন্তে প্রকৃতাদন্যদ্রমন্তে শিষ্টবর্ত্মনি .. ১৮..
আকৃত্যৈব বিরাজন্তে মৈত্র্যাদিগুণবৃত্তিভিঃ .
সমাঃ সমরসাঃ সৌম্য সততং সাধুবৃত্তযঃ .. ১৯..
অব্ধিবদ্ধতমর্যাদ ভবতি বিশদাশযাঃ .
নিযতিং ন বিমুঞ্চন্তি মহান্তো ভাস্করা ইব .. ২০..
কোঽহং কথমিদং চেতি সংসারমলমাততম্ .
প্রবিচার্যং প্রযত্নেন প্রাজ্ঞেন সহসাধুনা .. ২১..
নাকর্মসু নিযোক্তব্যং নানার্যেণ সহাবসেত্ .
দ্রষ্টব্যঃ সর্বসংহর্তা ন মৃত্যুরবহেলযা .. ২২..
শরীরমস্থিমাংসং চ ত্যক্ত্বা রক্তাদ্যশোভনম্ .
ভূতমুক্তাবলীতন্তুং চিন্মাত্রমবলোকযেত্ .. ২৩..
উপাদেযানুপতনং হেযৈকান্তবিসর্জনম্ .
যদেতন্মনসো রূপং তদ্বাহ্যং বিদ্ধি নেতরত্ .. ২৪..
গুরুশাস্ত্রোক্তমার্গেণ স্বানুভূত্যা চ চিদ্ঘনে .
ব্রহ্মৈবাহমিতি জ্ঞাত্বা বীতশোকো ভবেন্মুনিঃ .. ২৫..
যত্র নিশিতাসিশতপাতনমুত্পলতাডনবত্সোঢব্যমগ্নিনা
দাহো হিমসেচনমিবাঙ্গারবর্তনং চন্দনচর্চেব
নিরবধিনারাচবিকিরপাতো নিদাঘবিনোদনধারা-
গৃহশীকরবর্ষণমিব স্বশিরচ্ছেদঃ সুখনিদ্রেব
মূকীকরণমাননমুদ্রেব বাধির্যং মহানুপচয ইবেদং
নাবহেলনযা ভবিতব্যমেবং দৃঢবৈরাগ্যাদ্বোধো ভবতি ..
গুরুবাক্যসমুদ্ভূতস্বানুভূত্যাদিশুদ্ধযা .
যস্যাভ্যাসেন তেনাত্মা সততং চাবলোক্যতে .. ২৬..
বিনষ্টদিগ্ভ্রমস্যাপি যথাপূর্বং বিভাতি দিক্ .
তথা বিজ্ঞানবিধ্বস্তং জগন্নাস্তীতি ভাবয .. ২৭..
ন ধনান্য্পকুর্বন্তি ন মিত্রাণি ন বান্ধবাঃ .
ন কাযক্লেশবৈধুর্যং ন তীর্থাযতনাশ্রযঃ .
কেবলং তন্মনোমাত্রমযেনাসাদ্যতে পদম্ .. ২৮..
যানি দুঃখানি যা তৃষ্ণা দুঃসহা যে দুরাধযঃ .
শান্তচেতঃসু তত্সর্বং তমোঽর্কেষ্বিব নশ্যতি .. ২৯..
মাতরীব পরং যান্তি বিষমাণি মৃদূনি চ .
বিশ্বাসমিহ ভূতানি সর্বাণি শমশালিনি .. ৩০..
ন রসাযনপানেন ন লক্ষ্ম্যালিঙ্গিতেন চ .
ন তথা সুখমাপ্নোতি শমেনান্তর্যথা জনঃ .. ৩১..
শ্রুত্বা স্পৃষ্ট্বা চ ভুক্ত্বা চ দৃষ্ট্বা জ্ঞাত্বা শুভাশুভম্ .
ন হৃষ্যতি গ্লাযতি যঃ স শান্ত ইতি কথ্যতে .. ৩২..
তুষারকরবিংবাচ্ছং মনো যস্য নিরাকুলম্ .
মরণোত্সবযুদ্ধেষু স শান্ত ইতি কথ্যতে .. ৩৩..
তপস্বিষু বহুজ্ঞেষু যাজকেষু নৃপেষু চ .
বলবত্সু গুণাঢ্যেষু শমবানেব রাজতে .. ৩৪..
সন্তোষামৃতপানেন যে শান্তাস্তৃপ্তিমাগতাঃ .
আত্মারামা মহাত্মানস্তে মহাপদমাগতাঃ .. ৩৫..
অপ্রাপ্তং হি পরিত্যজ্য সংপ্রাপ্তে সমতাং গতঃ .
অদৃষ্টখেদাখেদো যঃ সন্তুষ্ট ইতি কথ্যতে .. ৩৬..
নাভিনন্দত্যসংপ্রাপ্তং প্রাপ্তং ভুঙ্ক্তে যথেপ্সিতম্ .
যঃ স সৌম্যসমাচারঃ সন্তুষ্ট ইতি কথ্যতে .. ৩৭..
রমতে ধীর্যতাপ্রাপ্তে সাধ্বীবাঽন্তঃপুরাজিরে .
সা জীবন্মুক্ততোদেতি স্বরূপানন্দদাযিনী .. ৩৮..
যথাক্ষণং যথাশাস্ত্রং যথাদেশং যথাসুখম্ .
যথাসংভবসত্সঙ্গমিমং মোক্ষপথক্রমম্ .
তাবদ্বিচারযেত্প্রাজ্ঞো যাবদ্বিশ্রান্তিমাত্মনি .. ৩৯..
তুর্যবিশ্রান্তিযুক্তস্য নিবৃত্তস্য ভবার্ণবাত্ .
জীবতোঽজীবতশ্চৈব গৃহস্থস্যাথবা যতেঃ .. ৪০..
নাকৃতেন কৃতেনার্থো ন শ্রুতিস্মৃতিবিভ্রমৈঃ .
নির্মন্দর ইবাম্বোধিঃ স তিষ্ঠতি যথাস্থিতঃ .. ৪১..
সর্বাত্মবেদনং শুদ্ধং যদোদেতি তবাত্মকম্ .
ভাতি প্রসৃতিদিক্কালবাহ্যং চিদ্রূপদেহকম্ .. ৪২..
এবমাত্মা যথা যত্র সমুল্লাসমুপাগতঃ .
তিষ্ঠত্যাশু তথা তত্র তদ্রূপশ্চ বিরাজতে .. ৪৩..
যদিদং দৃশ্যতে সর্বং জগত্স্থাবরজঙ্গমম্ .
তত্সুষুপ্তাবিব স্বপ্নঃ কল্পান্তে প্রবিনশ্যতি .. ৪৪..
ঋতমাত্মা পরংব্রহ্ম সত্যমিত্যাদিকা বুধৈঃ .
কল্পিতা ব্যবহারার্থং যস্য সংজ্ঞা মহাত্মনঃ .. ৪৫..
যথা কটকশব্দার্থঃ পৃথগ্ভাবো ন কাঞ্চনাত্ .
ন হেমকটকাত্তদ্বজ্জগচ্ছব্দার্থতা পরা .. ৪৬..
তেনেযমিন্দ্রজালশ্রীর্জগতি প্রবিতন্যতে .
দ্রষ্টুদৃশ্যস্য সত্তান্তর্বন্ধ ইত্যভিধীযতে .. ৪৭..
দ্রষ্টা দৃশ্যবশাদ্বদ্ধো দৃশ্যাভাবে বিমুচ্যতে .
জগত্ত্বমহমিত্যাদিসর্গাত্মা দৃশ্যমুচ্যতে .. ৪৮..
মনসৈবেন্দ্রজালশ্রীর্জগতি প্রবিতন্যতে .
যাবদেতত্সংভবতি তাবন্মোক্ষো ন বিদ্যতে .. ৪৯..
ব্রহ্মণা তন্যতে বিশ্বং মনসৈব স্বযংভুবা .
মনোমযমতো বিশ্বং যন্নাম পরিদৃশ্যতে .. ৫০..
ন বাহ্যে নাপি হৃদযে সদ্রূপং বিদ্যতে মনঃ .
যদর্থং প্রতিভানং তন্মন ইত্যভিধীযতে .. ৫১..
সংকল্পনং মনো বিদ্ধি সংকল্পস্তন্ন বিদ্যতে .
যত্র সংকল্পনং তত্র মনোঽস্তীত্যবগম্যতাম্ .. ৫২..
সংকল্পমনসী ভিন্নে ন কদাচন কেনচিত্ .
সংকল্পজাতে গলিতে স্বরূপমবশিষ্যতে .. ৫৩..
অহং ত্বং জগতিত্যাদৌ প্রশান্তে দৃশ্যসংভ্রমে .
স্যাত্তাদৃশী কেবলতা দৃশ্যে সত্তামুপাগতে .. ৫৪..
মহাপ্রলযসংপত্তৌ হ্যসত্তাং সমুপাগতে .
অশেষদৃশ্যে সর্গাদৌ শান্তমেবাবশিষ্যতে .. ৫৫..
অস্ত্যনস্তমিতো ভাস্বানজো দেবো নিরামযঃ .
সর্বদা সর্বকৃত্সর্বঃ পরমাত্মেত্যুদাহৃতঃ .. ৫৬..
যতো বাচো নিবর্তন্তে যো মুক্তৈরবগম্যতে .
যস্য চাত্মাদিকাঃ সংজ্ঞাঃ কল্পিতা ন স্বভাবতঃ .. ৫৭..
চিত্তাকাশং চিদাকাশমাকাশং চ তৃতীযকম্ .
দ্বাভ্যাং শূন্যতরং বিদ্ধি চিদাকাশং মহামুনে .. ৫৮..
দেশাদ্দেশান্তরপ্রাপ্তৌ সংবিদো মধ্যমেব যত্ .
নিমেষেণ চিদাকাশং তদ্বিদ্ধি মুনিপুঙ্গব .. ৫৯..
তস্মিন্নিরস্তনিঃশেষসংকল্পস্থিতিমেষি চেত্ .
সর্বাত্মকং পদং শান্তং তদা প্রাপ্নোষ্যসংশযঃ .. ৬০..
উদিতৌদার্যসৌন্দর্যবৈরাগ্যরসগর্ভিণী .
আনন্দস্যন্দিনী যৈষা সমাধিরভিধীযতে .. ৬১..
দৃশ্যাসংভববোধেন রাগদ্বেষাদিতানবে .
রতির্বলোদিতা যাসৌ সমাধিরভিধীযতে .. ৬২..
দৃশ্যাসংভববোধো হি জ্ঞানং জ্ঞেযং চিদাত্মকম্ .
তদেব কেবলীভাবং ততোঽন্যত্সকলং মৃষা .. ৬৩..
মত্ত ঐরাবতো বদ্ধঃ সর্ষপীকোণকোটরে .
মশকেন কৃতং যুদ্ধং সিংহৌঘৈরেণুকোটরে .. ৬৪..
পদ্মাক্ষে স্থাপিতো মেরুর্নিগীর্ণো ভৃঙ্গসূনুনা .
নিদাঘ বিদ্ধি তাদৃক্ত্বং জগতেতদ্ভ্রমাত্মকম্ .. ৬৫..
চিত্তমেব হি সংসারো রোগাদিক্লেশদূষিতম্ .
তদেব তৈর্বিনির্মুক্তং ভবান্ত ইতি কথ্যতে .. ৬৬..
মনসা ভাব্যমানো হি দেহতাং যাতি দেহকঃ .
দেহবাসনযা মুক্তো দেহধর্মৈর্ন লিপ্যতে .. ৬৭..
কল্পং ক্ষণীকরোত্যন্তঃ ক্ষণং নযতি কল্পতাম্ .
মনোবিলাসসংসার ইতি মে নিশ্চিতা মতিঃ .. ৬৮..
নাবিরতো দুশ্চরিতান্নাশান্তো নাসমাহিতঃ .
নাশান্তমনসো বাপি প্রজ্ঞানেনৈনমাপ্নুযাত্ .. ৬৯..
তদ্ব্রহ্মানন্দমদ্বন্দ্বং নির্গুণং সত্যচিদ্ঘনম্ .
বিদিত্বা স্বাত্মনো রূপং ন বিভেতি কদাচন .. ৭০..
পরাত্পরং যন্মহতো মহান্তং
     স্বরূপতেজোমযশাশ্বতং শিবম্ .
কবিং পুরাণং পুরুষং সনাতনং
     সর্বেশ্বরং সর্বদেবৈরুপাস্যম্ .. ৭১..
অহং ব্রহ্মেতি নিযতং মোক্ষহেতুর্মহাত্মনাম্ .
দ্বে পদে বন্ধমোক্ষায নির্মমেতি মমেতি চ .
মমেতি বধ্যতে জন্তুর্নির্মমেতি বিমুচ্যতে .. ৭২..
জীবেশ্বরাদিরূপেণ চেতনাচেতনাত্মকম্ .
ঈক্ষণাদিপ্রবেশান্তা সৃষ্টিরীশেন কল্পিতা .
জাগ্রদাদিবিমোক্ষান্তঃ সংসারো জীবকল্পিতঃ .. ৭৩..
ত্রিণাচিকাদিযোগান্তা ঈশ্বরভ্রান্তিমাশ্রিতাঃ .
লোকাযতাদিসাংখ্যান্তা জীববিভ্রান্তিমাশ্রিতাঃ .. ৭৪..
তস্মান্মুমুক্ষিভির্নৈব মতির্জীবেশবাদযোঃ .
কার্যা কিংতু ব্রহ্মতত্ত্বং নিশ্চলেন বিচার্যতাম্ .. ৭৫..
অবিশেষেণ সর্বং তু যঃ পশ্যতি চিদন্বযাত্ .
স এব সাক্ষাদ্বিজ্ঞানী স শিবঃ স হরির্বিধিঃ .. ৭৬..
দুর্লভো বিষযত্যাগো দুর্লভং তত্ত্বদর্শনম্ .
দুর্লভা সহজাবস্থা সদ্গুরোঃ করুণাং বিনা .. ৭৭..
উত্পন্নশক্তির্বোধস্য ত্যক্তনিঃশেষকর্মণঃ .
যোগিনঃ সহজাবস্থা স্বযমেবোপজাযতে .. ৭৮..
যদা হ্যেবৈষ এতস্মিন্নল্পমপ্যন্তরং নরঃ .
বিজানাতি তদা তস্য ভযং স্যান্নত্র সংশযঃ .. ৭৯..
সর্বগং সচ্চিদানন্দং জ্ঞানচক্ষুর্নিরীক্ষতে .
অজ্ঞানচক্ষুর্নেক্ষেত ভাস্বন্তং ভানুমন্দহ্বত্ .. ৮০..
প্রজ্ঞানমেব তদ্ব্রহ্ম সত্যপ্রজ্ঞানলক্ষণম্ .
এবং ব্রহ্মপরিজ্ঞানাদেব মর্ত্যাঽমৃতো ভবেত্ .. ৮১..
ভিদ্যতে হৃদযগ্রন্থিশ্ছিদ্যন্তে সর্বসংশযাঃ .
ক্ষীযন্তে চাস্য কর্মাণি তস্মিন্দৃষ্টে পরাবরে .. ৮২..
অনাত্মতাং পরিত্যজ্য নির্বিকারৌ জগত্স্থিতৌ .
একনিষ্ঠতযান্তস্থঃ সংবিন্মাত্রপরো ভব .. ৮৩..
মরুভূমৌ জলং সর্বং মরুভূমাত্রমেব তত্ .
জগত্ত্রযমিদং সর্বং চিন্মাত্রং স্ববিচারতঃ .. ৮৪..
লক্ষ্যালক্ষ্যমতিং ত্যক্ত্বা যস্তিষ্ঠেত্কেবলাত্মনা .
শিব এব স্বযং সাক্ষাদযং ব্রহ্মবিদুত্তমঃ .. ৮৫..
অধিষ্ঠানমনৌপম্যমবাঙ্মনসগোচরম্ .
নিত্যং বিভুং সর্বগতং সুসূক্ষ্মং চ তদব্যযম্ .. ৮৬..
সর্বশক্তের্মহেশস্য বিলাসো হি মনো জগত্ .
সংযমাসংযমাভ্যাং চ সংসারং শান্তিমন্বগাত্ .. ৮৭..
মনোব্যাধেশ্চিকিত্সার্থমুপাযং কথযামি তে .
যদ্যত্স্বাভিমতং বস্তু তত্ত্যজন্মোক্ষমশ্নুতে .. ৮৮..
স্বাযত্তমেকান্তহিতং স্বেপ্সিতত্যাগবেদনম্ .
যস্য দুষ্করতাং যাতং ধিক্তং পুরুষকীটকম্ .. ৮৯..
স্বপৌরুষেকসাধ্যেন স্বেপ্সিতত্যাগরূপিণা .
মনঃপ্রশমমাত্রেণ বিনা নাস্তি শুভা গতিঃ .. ৯০..
অসংকল্পনশস্ত্রেণ ছিন্নং চিত্তমিদং যদা .
সর্বং সর্বগতং শান্তং ব্রহ্ম সংপদ্যতে তদা .. ৯১..
ভব ভাবনযা মুক্তো মুক্তঃ পরমযা ধিযা .
ধারযাত্মানমব্যগ্রো গ্রস্তচিত্তং চিতঃ পদম্ .. ৯২..
পরং পৌরুষমাশ্রিত্য নীত্বা চিত্তমচিত্ততাম্ .
ধ্যানতো হৃদযাকাশে চিতি চিচ্চক্রধারযা .. ৯৩..
মনো মারয নিঃশঙ্কং ত্বাং প্রবধ্নন্তি নারযঃ .. ৯৪..
অযং সোঽহমিদং তন্ম এতাবন্মাত্রকং মনঃ .
তদভাবনমাত্রেণ দাত্রেণেব বিলীযতে .. ৯৫..
ছিন্নাভ্রমণ্ডলং ব্যোম্নি যথা শরদি ধূযতে .
বাতেন কল্পকেনৈব তথান্তর্ধূযতে মনঃ .. ৯৬..
কল্পান্তপবনা বান্তু যান্তু চৈকত্বমর্ণবাঃ .
তপন্তু দ্বাদশাদিত্যা নাস্তি নির্মনসঃ ক্ষতিঃ .. ৯৭..
অসংকল্পনমাত্রৈকসাধ্যে সকলসিদ্ধিদে .
অসংকল্পাতিসাম্রাজ্যে তিষ্ঠবষ্টব্ধতত্পদঃ .. ৯৮..
ন হি চঞ্চলতাহীনং মনঃ ক্বচন দৃশ্যতে .
চঞ্চলত্বং মনোধর্মো বহ্নের্ধর্মো যথোষ্ণতা .. ৯৯..
এষা হি চঞ্চলাস্পন্দশক্তিশ্চিত্তত্বসংস্থিতা .
তাং বিদ্ধি মানসীং শক্তিং জগদাডংবরাত্মিকাম্ .. ১০০..
যত্তু চঞ্চলতাহীনং তন্মনোঽমৃতমুচ্যতে .
তদেব চ তপঃ শাস্ত্রসিদ্ধান্তে মোক্ষ উচ্যতে .. ১০১..
তস্য চঞ্চলতা যৈষা ত্ববিদ্যা বাসনাত্মিকা .
বাসনাপরনাম্নীং তাং বিচারেণ বিনাশয .. ১০২..
পৌরুষেণ প্রযত্নেন যস্মিন্নৈব পদে মনঃ .
যোজ্যতে তত্পদং প্রাপ্য নির্বিকল্পো ভবানঘ .. ১০৩..
অতঃ পৌরুষমাশ্রিত্য চিত্তমাক্রম্য চেতসা .
বিশোকং পদমালম্ব্য নিরাতঙ্কঃ স্থিরো ভব .. ১০৪..
মন এব সমর্থং হি মনসো দৃঢনিগ্রহে .
অরাজকঃ সমর্থঃ স্যাদ্রাজ্ঞো নিগ্রহকর্মণি .. ১০৫..
তৃষ্ণাগ্রাহগৃহীতানাং সংসারার্ণবপাতিনাম্ .
আবর্তৈরূহ্যমানানাং দূরং স্বমন এব নৌঃ .. ১০৬..
মনসৈব মনশ্ছিত্ত্বা পাশং পরমবন্ধনম্ .
ভবাদুত্তারযাত্মানং নাসাবন্যেন তার্যতে .. ১০৭..
যা যোদেতি মনোনাম্নী বাসনা বাসিতান্তরা .
তাং তাং পরিহরেত্প্রাজ্ঞস্ততোঽবিদ্যাক্ষযো ভবেত্ .. ১০৮..
ভোগৈকবাসনাং ত্যক্ত্বা ত্যজ ত্বং ভেদবাসনাম্ .
ভাবাভাবৌ ততস্ত্যক্ত্যা নির্বিকল্পঃ সুখী ভব .. ১০৯..
এষ এব মনোনাশস্ত্ববিদ্যানাশ এব চ .
যত্তত্সংবেদ্যতে কিংচিত্তত্রাস্থাপরিবর্জনম্ .. ১১০..
অনাস্থৈব হি নির্বাণং দুঃখমাস্থাপরিগ্রহঃ .. ১১১..
অবিদ্যা বিদ্যমানৈব নষ্টপ্রজ্ঞেষু দৃশ্যতে .
নাম্নৈবাঙ্গীকৃতাকারা সম্যক্প্রজ্ঞস্য সা কুতঃ .. ১১২..
তাবত্সংসারভৃগুষু স্বাত্মনা সহ দেহিনম্ .
আন্দোলযতি নীরন্ধ্রং দুঃখকণ্টকশালিষু .. ১১৩..
অবিদ্যা যাবদস্যাস্তু নোত্পন্না ক্ষযকারিণী .
স্বযমাত্মাবলোকেচ্ছাঅ মোহসংক্ষযকারিণী .. ১১৪..
অস্যাঃ পরং প্রপশ্যন্তাঃ স্বাত্মনাশঃ প্রজাযতে .
দৃষ্টে সর্বগতে বোধে স্বযং হ্যেষা বিলীযতে .. ১১৫..
ইচ্ছামাত্রমবিদ্যেযং তন্নাশো মোক্ষ উচ্যতে .
স চাসংকল্পমাত্রেণ সিদ্ধো ভবতি বৈ মুনে .. ১১৬..
মনাগপি মনোব্যোম্নি বাসনারজনী ক্ষযে .
কালিকা তনুতামেতি চিদাদিত্যাপ্রকাশনাত্ .. ১১৭..
চৈতান্যুপাতরহিতং সামান্যেন চ সর্বগম্ .
যচ্চিত্তত্ত্বমনাখ্যেযং স আত্মা পরমেশ্বরঃ .. ১১৮..
সর্বং চ খল্বিদং ব্রহ্ম নিত্যচিদ্ঘনমক্ষতম্ .
কল্পনান্যা মনোনাম্নী বিদ্যতে ন হি কাচন .. ১১৯..
ন জাযতে ন ম্রিযত্তে কিংচিদত্র জগত্ত্রযে .
ন চ ভাববিকারাণাং সত্তা ক্বচন বিদ্যতে .. ১২০..
কেবলং কেবলাভাসং সর্বসামান্যমক্ষতম্ .
চৈত্যানুপাতরহিতং চিন্মাত্রমিহ বিদ্যতে .. ১২১..
তস্মিন্নিত্যে ততে শুদ্ধে চিন্মাত্রে নিরুপদ্রবে .
শান্তে শমসমাভোগে নির্বিকারে চিদাত্মনি .. ১২২..
যৈষা স্বভাবাভিমতং স্বযং সংকল্প্য ধাবতি .
চিচ্চৈত্যং স্বযমম্লানং মাননান্মন উচ্যতে .
অতঃ সংকল্পসিদ্ধেযং সংকল্পেনৈব নশ্যতি .. ১২৩..
নাহং ব্রহ্মেতি সংকল্পাত্সুদৃঢাদ্বধ্যতে মনঃ .
সর্বং ব্রহ্মেতি সংকল্পাত্সুদৃঢান্মুচ্যতে মনঃ .. ১২৪..
কৃশোঽহং দুঃখবদ্ধোঽহং হস্তপাদাদিমানহম্ .
ইতি ভাবানুরূপেণ ব্যবহারেণ বধ্যতে .. ১২৫..
নাহং দুঃখী ন মে দেহো বন্ধঃ কোঽস্যাত্মনি স্থিতঃ .
ইতি ভাবানুরূপেণ ব্যবহারেণ মুচ্যতে .. ১২৬..
নাহং মাংসং ন চাস্থীনি দেহাদন্যঃ পরোঽস্ম্যহম্ .
ইতি নিশ্চিতবানন্তঃ ক্ষীণাবিদ্যো বিমুচ্যতে .. ১২৭..
কল্পিতেযমবিদ্যেযমনাত্মন্যাত্মভাবনাত্ .
পরং পৌরুষমাশ্রিত্য যত্নাত্পরমযা ধিযা .
ভোগেচ্ছাং দূরতস্ত্যক্ত্বা নির্বিকল্পঃ সুখী ভব .. ১২৮..
মম পুত্রো মম ধনমহং সোঽযমিদং মম .
ইতীযমিন্দ্রজালেন বাসনৈব বিবল্গতি .. ১২৯..
মা ভবাজ্ঞো ভব জ্ঞস্ত্বং জহি সংসারভাবনাম্ .
অনাত্মন্যাত্মভাবেন কিমজ্ঞ ইব রোদিষি .. ১৩০..
কস্তবাযং জডো মূকো দেহো মাংসমযোঽশুচিঃ .
যদর্থং সুখদুঃখাভ্যামবশঃ পরিভূযসে .. ১৩১..
অহো নু চিত্রং যত্সত্যং ব্রহ্ম তদ্বিস্মৃতং নৃণাম্ .
তিষ্ঠতস্তব কার্যেষু মাস্তু রাগানুরঞ্জনা .. ১৩২..
অহো নু চিত্রং পদ্মোত্থৈর্বদ্ধাস্তন্তুভিরদ্রযঃ .
অবিদ্যমান যা বিদ্যা তযা বিশ্বং খিলীকৃতম্ .. ১৩৩..
ইদং তদ্বজ্রতাং যাতং তৃণমাত্রং জগত্ত্রযম্ ..
ইত্যুপনিষত্ .. ইতি চতুর্থোঽধ্যাযঃ .. ৪..
ঋভুঃ .. অথাপরং প্রবক্ষ্যামি শৃণু তাত যথাযথম্ .
অজ্ঞানভূঃ সপ্তপদা জ্ঞভূঃ সপ্তপদৈব হি .. ১..
পদান্তরাণ্যসংখ্যানি প্রভবন্ত্যন্যথৈতযোঃ .
স্বরূপাবস্থিতির্মুক্তিস্তদ্ভ্রংশোঽহংত্ববেদনম্ .. ২..
শুদ্ধসন্মাত্রসংবিত্তেঃ স্বরূপান্ন চলন্তি যে .
রাগদ্বেষাদযো ভাবাস্তেষাং নাজ্ঞত্বসংভবঃ .. ৩..
যঃ স্বরূপপরিভ্রংশশ্চেত্বার্থে চিতি মজ্জনম্ .
এতস্মাদপরো মোহো ন ভূতো ন ভবিষ্যতি .. ৪..
অর্থাদর্থান্তরং চিত্তে যাতি মধ্যে তু যা স্থিতিঃ .
সা ধ্বস্তমননাকারা স্বরূপস্থিতিরুচ্যতে .. ৫..
সংশান্তসর্বসংকল্পা যা শিলাবদবস্থিতিঃ .
জাগ্রন্নিদ্রাবিনির্মুক্তা সা স্বরূপস্থিতিঃ পরা .. ৬..
অহন্তাংশে ক্ষতে শান্তে ভেদনিষ্পন্দচিত্ততা .
অজডা যা প্রচলতি তত্স্বরূপমিতীরিতম্ .. ৭..
বীজং জাগ্রত্তথা জাগ্রন্মহাজাগ্রত্তথৈব চ .
জাগ্রত্স্বপ্নস্তথা স্বপ্নঃ স্বপ্নজাগ্রত্সুষুপ্তিকম্ .. ৮..
ইতি সপ্তবিধো মোহঃ পুনরেষ পরস্পরম্ .
শ্লিষ্টো ভবত্যনেকাগ্র্যং শ্রুণু লক্ষণমস্য তু .. ৯..
প্রথমং চেতনং যত্স্যাদনাখ্যং নির্মলং চিতঃ .
ভবিষ্যচ্চিত্তজীবাদিনামশব্দার্থভাজনম্ .. ১০..
বীজরূপস্থিতং জাগ্রদ্বীজজাগ্রত্তদুচ্যতে .
এষা জ্ঞপ্তের্নবাবস্থা ত্বজাগ্রত্সংস্থিতিং শ্রুণু .. ১১..
নবপ্রসূতস্য পরাদযং চাহমিদং মম .
ইতি যঃ প্রত্যযঃ স্বস্থস্তজ্জাগ্রত্প্রাগভাবনাত্ .. ১২..
অযং সোঽহমিদং তন্ম ইতি জন্মান্তরোদিতঃ .
পীবরঃ প্রত্যযঃ প্রোক্তো মহাজাগ্রদিতি স্ফুটম্ .. ১৩..
অরূঢমথবা রূঢং সর্বথা তন্মযাত্মকম্ .
যজ্জাগ্রতো মনোরাজ্যং যজ্জাগ্রত্স্বপ্ন উচ্যতে .. ১৪..
দ্বিচন্দ্রশুক্তিকারূপ্যমৃগতৃষ্ণাদিভেদতঃ .
অভ্যাসং প্রাপ্য জাগ্রত্তত্স্বপ্নো নানাবিধো ভবেত্ .. ১৫..
অল্পকালং মযা দৃষ্টমেতন্নোদেতি যত্র হি .
পরামর্ষঃ প্রবুদ্ধস্য স স্বপ্ন ইতি কথ্যতে .. ১৬..
চিরং সংদর্শনাভাবাদপ্রফুল্লং বৃহদ্বচঃ .
চিরকালানুবৃত্তিস্তু স্বপ্নো জাগ্রদিবোদিতঃ .. ১৭..
স্বপ্নজাগ্রদিতি প্রোক্তং জাগ্রত্যপি পরিস্ফুরত্ .
ষডবস্থা পরিত্যাগো জডা জীবস্য যা স্থিতিঃ .. ১৮..
ভবিষ্যদ্দুঃখবোধাঢ্যা সৌষুপ্তিঃ সোচ্যতে গতিঃ .
জগত্তস্যামবস্থাযামন্তস্তমসি লীযতে .. ১৯..
সপ্তাবস্থা ইমাঃ প্রোক্তা মযা জ্ঞানস্য বৈ দ্বিজ .
একৈকা শতসংখ্যাত্র নানাবিভবরূপিণী .. ২০..
ইমাং সপ্তপদাং জ্ঞানভূমিমাকর্ণযানঘ .
নানযা জ্ঞাতযা ভূযো মোহপঙ্কে নিমজ্জতি .. ২১..
বদন্তি বহুভেদেন বাদিনো যোগভূমিকাঃ .
মম ত্বভিমতা নূনমিমা এব শুভপ্রদাঃ .. ২২..
অববোধং বিদুর্জ্ঞানং তদিদং সাপ্তভূমিকম্ .
মুক্তিস্তু জ্ঞেযমিত্যুক্তা ভূমিকাসপ্তকাত্পরম্ .. ২৩..
জ্ঞানভূমিঃ শুভেচ্ছাখ্যা প্রথমা সমুদাহৃতা .
বিচারণা দ্বিতীযা তু তৃতীযা তনুমানসী .. ২৪..
সত্ত্বাপত্তিশ্চতুর্থী স্যাত্ততোঽসংসক্তিনামিকা .
পদার্থভাবনা ষষ্ঠী সপ্তমী তুর্যগা স্মৃতা .. ২৫..
আসামন্তস্থিতা মুক্তির্যস্যাং ভূযো ন শোচতি .
এতাসাং ভূমিকানাং ত্বমিদং নির্বচনং শ্রুণু .. ২৬..
স্থিতঃ কিং মূঢ এবাস্মি প্রেক্ষেঽহং শাস্ত্রসজ্জনৈঃ .
বৈরাগ্যপূর্বমিচ্ছেতি শুভেচ্ছেত্যুচ্যতে বুধৈঃ .. ২৭..
শাস্ত্রসজ্জনসংপর্কবৈরাগ্যাভ্যাসপূর্বকম্ .
সদাচারপ্রবৃত্তির্যা প্রোচ্যতে সা বিচারণা .. ২৮..
বিচারণাশুভেচ্ছাভ্যামিন্দ্রিযার্থেষু রক্ততা .
যত্র সা তনুতামেতি প্রোচ্যতে তনুমানসী .. ২৯..
ভূমিকাত্রিতযাভ্যাসাচ্চিত্তে তু বিরতের্বশাত্ .
সত্ত্বাত্মনি স্থিতে শুদ্ধে সত্ত্বাপত্তিরুদাহৃতা .. ৩০..
দশাচতুষ্টযাভ্যাসাদসংসর্গকলা তু যা .
রূঢসত্ত্বচমত্কারা প্রোক্তা সংসক্তিনামিকা .. ৩১..
ভূমিকাপঞ্চকাভ্যাসাত্স্বাত্মারামতযা দৃঢম্ .
আভ্যন্তরাণাং বাহ্যানাং পদার্থানামভাবনাত্ .. ৩২..
পরপ্রযুক্তেন চিরং প্রযত্নেনাববোধনম্ .
পদার্থভাবনা নাম ষষ্ঠী ভবতি ভূমিকা .. ৩৩..
ভূমিষট্কচিরাভ্যাসাদ্ভেদস্যানুপলম্বনাত্ .
যত্স্বভাবৈকনিষ্ঠত্বং সা জ্ঞেযা তুর্যগা গতিঃ .. ৩৪..
এষা হি জীবন্মুক্তেষু তুর্যাবস্থেতি বিদ্যতে .
বিদেহমুক্তিবিষযং তুর্যাতীতমতঃ পরম্ .. ৩৫..
যে নিদাঘ মহাভাগাঃ সাপ্তমীং ভূমিমাশ্রিতাঃ .
আত্মারামা মহাত্মানস্তে মহত্পদমাগতাঃ .. ৩৬..
জীবন্মুক্তা ন মজ্জন্তি সুখদুঃখরসস্থিতে .
প্রকৃতেনাথ কার্যেণ কিংচিত্কুর্বন্তি বা ন বা .. ৩৭..
পার্শ্বস্থবোধিতাঃ সন্তঃ পূর্বাচরক্রমাগতম্ .
আচারমাচরত্যেব সুপ্তবুদ্ধবদুত্থিতাঃ .. ৩৮..
ভূমিকাসপ্তকং চৈতদ্ধীমতামেব গোচরম্ .
প্রাপ্য জ্ঞানদশামেতাং পশুম্লেচ্ছাদযোঽপি যে .. ৩৯..
সদেহা বাপ্যদেহা বা তে মুক্তা নাত্র সংশযঃ .
জ্ঞপ্তির্হি গ্রন্থিবিচ্ছেদস্তস্মিন্সতি বিমুক্ততা .. ৪০..
মৃগতৃষ্ণাম্বুবুদ্ধ্য্যাদিশান্তিমাত্রাত্মকস্ত্বসৌ .
যে তু মোহার্ণবাত্তীর্ণাস্তৈঃ প্রাপ্তং পরমং পদম্ .. ৪১..
তে স্থিতা ভূমিকাস্বাসু স্বাত্মলাভপরাযণাঃ .
মনঃপ্রশমনোপাযো যোগ ইত্যভিধীযতে .. ৪২..
সপ্তভূমিঃ স বিজ্ঞেযঃ কথিতাস্তাশ্চ ভূমিকাঃ .
এতাসাং ভূমিকানাং তু গমং ব্রহ্মাভিধং পদম্ .. ৪৩..
ত্বত্তাহন্তাত্মতা যত্র পরতা নাস্তি কাচন .
ন ক্বচিদ্ভাবকলনা ন ভাবাভাব গোচরা .. ৪৪..
সর্বং শান্তং নিরালম্বং ব্যোমস্থং শাশ্বতং শিবম্ .
অনামযমনাভাসমনামকমকারণম্ .. ৪৫..
ন সন্নসন্ন মধ্যান্তং ন সর্বং সর্বমেব চ .
মনোবচোভিরগ্রাহ্যং পূর্ণাত্পূর্ণং সুখাত্সুখম্ .. ৪৬..
অসংবেদনমাশান্তমাত্মবেদনমাততম্ .
সত্তা সর্বপদার্থানাং নান্যা সংবেদনাদৃতে .. ৪৭..
সংবন্ধে দ্রষ্টৃদৃশ্যানাং মধ্যে দৃষ্টির্হি যদ্বপুঃ .
দ্রষ্টৃদর্শনদৃশ্যাদিবর্জিতং তদিদং পদম্ .. ৪৮..
দেশাদ্দেশং গতে চিত্তে মধ্যে যচ্চেতসো বওউঃ .
অজাড্যসংবিন্মননং তন্মযো ভব সর্বদা .. ৪৯..
অজাগ্রত্স্বপ্ননিদ্রস্য যত্তে রূপং সনাতনম্ .
অচেতনং চাজডং চ তন্মযো ভব সর্বদা .. ৫০..
জডতাং বর্জযিত্বৈকাং শিলাযা হৃদযং হি তত্ .
অমনস্কস্বরূপং যত্তন্মযো ভব সর্বদা .
চিত্তং দূরে পরিত্যজ্য যোঽসি সোঽসি স্থিরো ভব .. ৫১..
পূর্বং মনঃ সমুদিতং পরমাত্মতত্ত্বা-
     ত্তেনাততং জগদিদং সবিকল্পজালম্ .
শূন্যেন শূন্যমপি বিপ্র যথাম্বরেণ
     নীলত্বমুল্লসতি চারুতরাভিধানম্ .. ৫২..
সংকল্পসংক্ষযদ্গলিতে তু চিত্তে
     সংসারমোহমিহিকা গলিতা ভবন্তি .
স্বচ্ছং বিভাতি শরদীব খমাগতাযাং
     চিন্মাত্রমেকমজমাদ্যমনন্তমন্তঃ .. ৫৩..
অকর্তৃকমরঙ্গং চ গগনে চিত্রমুত্থিতম্ .
অদ্রষ্টৃকং স্বানুভবমনিদ্রস্বপ্নদর্শনম্ .. ৫৪..
সাক্ষিভূতে সমে স্বচ্ছে নির্বিকল্পে চিদাত্মনি .
নিরিচ্ছং প্রতিবিম্বন্তি জগন্তি মুকুরে যথা .. ৫৫..
একং ব্রহ্ম চিদাকাশং সর্বাত্মকমখণ্ডিতম্ .
ইতি ভাবয যত্নেন চেতশ্চাঞ্চল্যশান্তযে .. ৫৬..
রেখোপরেখাবলিতা যথৈকা পীবরী শিলা .
তথা ত্রৈলোক্যবলিতং ব্রহ্মৈকমিহ দৃশ্যতাম্ .. ৫৭..
দ্বিতীযকারণাভাবাদনুত্পন্নমিদং জগত্ .
জ্ঞাতং জ্ঞাতব্যমধুনা দৃষ্টং দ্রষ্টব্যমদ্ভুতম্ .. ৫৮..
বিশ্রান্তোঽস্মি চিরং শ্রান্তশ্চিন্মাত্রান্নাস্তি কিংচন .
পশ্য বিশ্রান্তসন্দেহং বিগতাশেষকৌতুকম্ .. ৫৯..
নিরস্তকল্পনাজালমচিত্তত্বং পরং পদম্ .
ত এব ভূমতাং প্রাপ্তাঃ সংশান্তাশেষকিল্বিষাঃ .. ৬০..
মহাধিযঃ শান্তধিযো যে যাতা বিমনস্কতাম্ .
জন্তোঃ কৃতবিচারস্য বিগলদ্বৃত্তিচেতসঃ .. ৬১..
মননং ত্যজতো নিত্যং কিংচিত্পরিণতং মনঃ .
দৃশ্যং সন্ত্যজতো হেযমুপাদেযমুপেযুষঃ .. ৬২..
দ্রষ্টারং পশ্যতো নিত্যমদ্রষ্টারমপশ্যতঃ .
বিজ্ঞাতব্যে পরে তত্ত্বে জাগরূকস্য জীবতঃ .. ৬৩..
সুপ্তস্য ধনসংমোহমযে সংসারবর্ত্মনি .
অত্যন্তপক্ববৈরাগ্যাদরসেষু রসেষ্বপি .. ৬৪..
সংসারবাসনাজালে খগজাল ইবাধুনা .
ত্রোটিতে হৃদযগ্রন্থৌ শ্লথে বৈরাগ্যরংহসা .. ৬৫..
কাতকং ফলমাসাদ্য যথা বারি প্রসীদতি .
তথা বিজ্ঞানবশতঃ স্বভাবঃ সংপ্রসীদতি .. ৬৬..
নীরাগং নিরুপাসঙ্গং নির্দ্বন্দ্বং নিরুপাশ্রযম্ .
বিনির্যাতি মনো মোহাদ্বিহঙ্গঃ পঞ্জরাদিব .. ৬৭..
শান্তসন্দেহদৌরাত্ম্যং গতকৌতুকবিভ্রমম্ .
পরিপূর্ণান্তরং চেতঃ পূর্ণেন্দুরিব রাজতে .. ৬৮..
নাহং ন চান্যদস্তীহ ব্রহ্মৈবাস্মি নিরামযম্ .
ইত্থং সদস্তোর্মধ্যাদ্যঃ পশ্যতি স পশ্যতি .. ৬৯..
অযত্নোপতেষ্বক্ষিদৃগ্দৃশ্যেষু যথা মনঃ .
নীরাগমেব পততি তদ্বত্কার্যেষু ধীরধীঃ .. ৭০..
পরিজ্ঞাযোপভুক্তো হি ভোগো ভবতি তুষ্টযে .
বিজ্ঞায সেবিতশ্চোরো মৈত্রীমেতি ন চোরতাম্ .. ৭১..
অশঙ্কিতাপি সংপ্রাপ্তা গ্রামযাত্রা যথাধ্বগৈঃ .
প্রেক্ষ্যতে তদ্বদেব জ্ঞৈর্ভোগশ্রীরবলোক্যতে .. ৭২..
মনসো নিগৃহীতস্য লীলাভোগোঽল্পকোঽপি যঃ .
তমেবালব্ধবিস্তারং ক্লিষ্টত্বাদ্বহু মন্যতে .. ৭৩..
বদ্ধমুক্তো মহীপালো গ্রাসমাত্রেণ তুষ্যতি .
পরৈরবদ্ধো নাক্রান্তো ন রাষ্ট্রং বহু মন্যতে .. ৭৪..
হস্তং হতেন সংপীড্য দন্তৈর্দন্তান্বিচূর্ণ্য চ .
অঙ্গান্যঙ্গৈরিবাক্রম্য জযেদাদৌ স্বকং মনঃ .. ৭৫..
মনসো বিজযান্নান্যা গতিরস্তি ভবার্ণবে .
মহানরকসাম্রাজ্যে মত্তদুষ্কৃতবারণাঃ .. ৭৬..
আশাশরশলাকাঢ্যা দুর্জযা হীন্দ্রিযারযঃ .
প্রক্ষীণচিত্তদর্পস্য নিগৃহীতেন্দ্রিযদ্বিষঃ .. ৭৭..
পদ্মিন্য ইব হেমন্তে ক্ষীযন্তে ভোগবাসনাঃ .
তাবন্নিশীব বেতালা বসন্তি হৃদি বাসনাঃ .
একতত্ত্বদৃঢাভ্যাসাদ্যাবন্ন বিজিতং মনঃ .. ৭৮..
ভৃত্যোঽভিমতকর্তৃত্বান্মন্ত্রী সর্বার্থকারণাত্ .
সামন্তশ্চেন্দ্রিযাক্রান্তের্মনো মন্যে বিবেকিনঃ .. ৭৯..
লালনাত্স্নিগ্ধললনা পালানাত্পালকঃ পিতা .
সুহৃদুত্তমবিন্যাসান্মনো মন্যে মনীষিণঃ .. ৮০..
স্বালোকতঃ শাস্ত্রদৃশা স্ববুদ্ধ্যা স্বানুভাবতঃ .
প্রযচ্ছতি পরাং সিদ্ধিং ত্যক্ত্বাত্মানং মনঃপিতা .. ৮১..
সুহৃষ্টঃ সুদৃঢঃ স্বচ্ছঃ সুক্রান্তঃ সুপ্রবোধিতঃ .
স্বগুণেনোর্জিতো ভাতি হৃদি হৃদ্যো মনোমণিঃ .. ৮২..
এনং মনোমণিং ব্রহ্মন্বহুপঙ্ককলঙ্কিতম্ .
বিবেকবারিণা সিদ্ধ্যৈ প্রক্ষাল্যালোকবান্ভব .. ৮৩..
বিবেকং পরমাশ্রিত্য বুদ্ধ্যা সত্যমবেক্ষ্য চ .
ইন্দ্রিযারীনলং ছিত্ত্বা তীর্ণো ভব ভবার্ণবাত্ .. ৮৪..
আস্থামাত্রমনন্তানাং দুঃখানামাকরং বিদুঃ .
অনাস্থামাত্রমভিতঃ সুখানামালযং বিদুঃ .. ৮৫..
বাসনাতন্তুবদ্ধোঽযং লোকো বিপরিবর্ততে .
সা প্রসিদ্ধাতিদুঃখায সুখাযোচ্ছেদমাগতা .. ৮৬..
ধীরোঽপ্যতিবহুজ্ঞোঽপি কুলজোঽপি মহানপি .
তৃষ্ণযা বধ্যতে জন্তুঃ সিংহঃ শৃঙ্খলযা যথা .. ৮৭..
পরমং পৌরুষং যত্নমাস্থাদায সৃদ্যমম্ .
যথাশাস্ত্রমনুদ্বেগমাচরন্কো ন সিদ্ধিভাক্ .. ৮৮..
অহং সর্বমিদং বিশ্বং পরমাত্মাহমচ্যুতঃ .
নান্যদস্তীতি সংবিত্ত্যা পরমা সা হ্যহঙ্কৃতিঃ .. ৮৯..
সর্বস্মাদ্ব্যতিরিক্তোঽহং বালাগ্রাদপ্যহং তনুঃ .
ইতি যা সংবিদো ব্রহ্মন্দ্বিতীযাহঙ্কৃতিঃ শুভা .. ৯০..
মোক্ষাযৈষা ন বন্ধায জীবন্মুক্তস্য বিদ্যতে .. ৯১..
পাণিপাদাদিমাত্রোঽযমহমিত্যেষ নিশ্চযঃ .
অহংকারস্তৃতীযোঽসৌ লৈকিকস্তুচ্ছ এব সঃ .. ৯২..
জীব এব দুরাত্মাসৌ কন্দঃ সংসারদুস্তরোঃ .
অনেনাভিহতো জন্তুরধোঽধঃ পরিধাবতি .. ৯৩..
অনযা দুরহংকৃত্যা ভাবাত্সংত্যক্তযা চিরম্ .
শিষ্টাহংকারবাঞ্জন্তুঃ শমবান্যাতি মুক্ততাম্ .. ৯৪..
প্রথমৌ দ্বাবহংকারাবঙ্গীকৃত্য ত্বলৌকিকৌ .
তৃতীযাহংকৃতিস্ত্যাজ্যা লৌকিকী দুঃখদাযিনী .. ৯৫..
অথ তে অপি সংত্যজ্য সর্বাহংকৃতিবর্জিতঃ .
স তিষ্ঠতি তথাত্যুচ্চৈঃ পরমেবাধিরোহতি .. ৯৬..
ভোগেচ্ছামাত্রকো বন্ধস্তত্ত্যাগো মোক্ষ উচ্যতে .
মনসোঽভ্যুদযো নাশো মনোনাশো মহোদযঃ .. ৯৭..
জ্ঞমনো নাশমভ্যেতি মনোঽজ্ঞস্য হি শৃঙ্খলা .
নানন্দং ন নিরানন্দং ন চলং নাচলং স্থিরম্ .
ন সন্নাসন্ন চৈতেষাং মধ্যং জ্ঞানিমনো বিদুঃ .. ৯৮..
যথা সৌক্ষ্ম্যাচ্চিদাভাস্য আকাশো নোপলক্ষ্যতে .
তথা নিরংশশ্চিদ্ভাবঃ সর্বগোঽপি ন লক্ষ্যতে .. ৯৯..
সর্বসংকল্পরহিতা সর্বসংজ্ঞাবিবর্জিতা .
সৈষা চিদবিনাশাত্মা স্বাত্মেত্যাদিকৃতাভিধা .. ১০০..
আকাশশতভাগাণ্ছা জ্ঞেষু নিষ্কলরূপিণী .
সকলামলসংসারস্বরূপৈকাত্মদর্শিনী .. ১০১..
নাস্তমেতি ন চোদেতি নোত্তিষ্ঠতি ন তিষ্ঠতি .
ন চ যাতি ন চাযাতি ন চ নেহ ন চেহ চিত্ .. ১০২..
সৈষা চিযমলাকারা নির্বিকল্পা নিরাস্পদা .. ১০৩..
আদৌ শমদমপ্রাযৈর্গুণৈঃ শিষ্যং বিশোধযেত্ .
পশ্চাত্সর্বমিদং ব্রহ্ম শুদ্ধস্ত্বমিতি বোধযেত্ .. ১০৪..
অজ্ঞস্যার্ধপ্রবুদ্ধস্য সর্বং ব্রহ্মেতি যো বদেত্ .
মহানরকজালেষু স তেন বিনিযোজিতঃ .. ১০৫..
প্রবুদ্ধবুদ্ধেঃ প্রক্ষীণভোগেচ্ছস্য নিরাশিষঃ .
নাস্ত্যবিদ্যামলমিতি প্রাজ্ঞস্তূপদিশেদ্গুরুঃ .. ১০৬..
সতি দীপ ইবালোকঃ সত্যর্ক ইব বাসরঃ .
সতি পুষ্প ইবামোদশ্চিতি সত্যং জগত্তথা .. ১০৭..
প্রতিভাসত এবেদং ন জগত্পরমার্থতঃ .
জ্ঞানদৃষ্টৌ প্রসন্নাযাং প্রবোধবিততোদযে .. ১০৮..
যথাবজ্জ্ঞাস্যসি স্বস্থো মদ্বাগ্বৃষ্টিবলাবলম্ .
অবিদ্যযৈবোত্তমযা স্বার্থনাশোদ্যমার্থযা .. ১০৯..
বিদ্যা সংপ্রাপ্যতে ব্রহ্মন্সর্বদোষাপহারিণী .
শাম্যতি হ্যস্ত্রমস্ত্রেণ মলেন ক্ষাল্যতে মলম্ .. ১১০..
শমং বিষং বিষেণৈতি রিপুণা হন্যতে রিপুঃ .
ঈদৃশী ভূতমাযেযং যা স্বনাশেন হর্ষদা .. ১১১..
ন লক্ষ্যতে স্বভাবোঽস্যা বীক্ষ্যমাণৈব নশ্যতি .
নাস্ত্যেষা পরমার্থেনেত্যেবং ভাবনযেদ্ধযা .. ১১২..
সর্বং ব্রহ্মেতি যস্যান্তর্ভাবনা সা হি মুক্তিদা .
ভেদদৃষ্টিরবিদ্যেযং সর্বথা তাং বিসর্জযেত্ .. ১১৩..
মুনে নাসাদ্যতে তদ্ধি পদমক্ষযমুচ্যতে .
কুতো জাতেযমিতি তে দ্বিজ মাস্তু বিচারণা .. ১১৪..
ইমাং কথমহং হন্মীত্যেষা তেঽস্তু বিচারণা .
অস্তং গতাযাং ক্ষীণাযামস্যাং জ্ঞাস্যসি তত্পদম্ .. ১১৫..
যত এষা যথা চৈষা যথা নষ্টেত্যখণ্ডিতম্ .
তদস্যা রোগশালাযা যত্নং কুরু চিকিত্সনে .. ১১৬..
যথৈষা জন্মদুঃখেষু ন ভূযস্ত্বাং নিযোক্ষ্যতি .
স্বাত্মনি স্বপরিস্পন্দৈঃ স্ফুরত্যচ্ছৈশ্চিদর্ণবঃ .. ১১৭..
একাত্মকমখণ্ডং তদিত্যন্তর্ভাব্যতাং দৃঢম্ .
কিংচিত্ক্ষুভিতরূপা সা চিচ্ছক্তিশ্চিন্মযার্ণবে.. ১১৮..
তন্মযৈব স্ফুরত্যচ্ছা তত্রৈবোর্মিরিবার্ণবে .
আত্মন্যেবাত্মনা ব্যোম্নি যথা সরসি মারুতঃ .. ১১৯..
তথৈবাত্মাত্মশক্ত্যৈব স্বাত্মন্যেবৈতি লোলতাম্ .
ক্ষণং স্ফুরতি সা দেবী সর্বশক্তিতযা তথা .. ১২০..
দেশকালক্রিযাশক্তির্ন যস্যাঃ সংপ্রকর্ষণে .
স্বস্বভাবং বিদিত্বোচ্চৈরপ্যনন্তপদে স্থিতা .. ১২১..
রূপং পরিমিতেনাসৌ ভাবযত্যবিভাবিতা .
যদৈবং ভাবিতং রূপং তযা পরমকান্তযা .. ১২২..
তদৈবৈনামনুগতা নামসংখ্যাদিকা দৃশঃ .
বিকল্পকলিতাকারং দেশকালক্রিযাস্পদম্ .. ১২৩..
চিতো রূপমিদং ব্রহ্মন্ক্ষেত্রজ্ঞ ইতি কথ্যতে .
বাসনাঃ কল্পযন্সোঽপি যাত্যহংকারতাং পুনঃ .. ১২৪..
অহঙ্কারো বিনির্ণেতা কলঙ্কী বুদ্ধিরুচ্যতে .
বুদ্ধিঃ সংকল্পিতাকারা প্রযাতি মননাস্পদম্ .. ১২৫..
মনো ঘনবিকল্পং তু গচ্ছতীন্দ্রিযতাং শনৈঃ .
পাণিপাদমযং দেহমিন্দ্রিযাণি বিদুর্বুধাঃ .. ১২৬..
এবং জীবো হি সংকল্পবাসনারজ্জুবেষ্টিতঃ .
দুঃখজালপরীতাত্মা ক্রমাদাযাতি নীচতাম্ .. ১২৭..
ইতি শক্তিমযং চেতো ঘনাহংকারতাং গতম্ .
কোশকারক্রিমিরিব স্বেচ্ছযা যাতি বন্ধনম্ .. ১২৮..
স্বযং কল্পিত তন্মাত্রাজালভ্যন্তরবর্তি চ .
পরাং বিবশতামেতি শৃঙ্খলাবদ্ধসিংহবত্ .. ১২৯..
ক্বচিন্মনঃ ক্বচিদ্বুদ্ধিঃ ক্বচিজ্জ্ঞানং ক্বচিত্ক্রিযা .
ক্বচিদেতদহংকারঃ ক্বচিচ্চিত্তমিতি স্মৃতম্ .. ১৩০..
ক্বচিত্প্রকৃতিরিত্যুক্তং ক্বচিন্মাযেতি কল্পিতম্ .
ক্বচিন্মলমিতি প্রোক্তং ক্বচিত্কর্মেতি সংস্মৃতম্ .. ১৩১..
ক্বচিদ্বন্ধ ইতি খ্যাতং ক্বচিত্পুর্যষ্টকং স্মৃতম্ .
প্রোক্তং ক্বচিদবিদ্যেতি ক্বচিদিচ্ছেতি সংমতম্ .. ১৩২..
ইঅমং সংসারমখিলমাশাপাশবিধাযকম্ .
দধদন্তঃফলৈর্হীনং বটধানা বটং যথা .. ১৩৩..
চিন্তানলশিখাদগ্ধং কোপাজগরচর্বিতম্ .
কামাব্ধিকল্লোলরতং বিস্মৃতাত্মপিতামহম্ .. ১৩৪..
সমুদ্ধর মনো ব্রহ্মন্মাতঙ্গমিব কর্দমাত্ .
এবং জীবাশ্রিতা ভাবা ভবভাবনযাহিতাঃ .. ১৩৫..
ব্রহ্মণা কল্পিতাকারা লক্ষশোঽপ্যথ কোটিশঃ .
সংখ্যাতীতাঃ পুরা জাতা জাযন্তেঽদ্যাপি চাভিতঃ .. ১৩৬..
উত্পত্স্যন্তেঽপি চৈবান্যে কণৌঘা ইব নির্ঝরাত্ .
কেচিত্প্রথমজন্মানঃ কেচিজ্জন্মশতাধিকাঃ .. ১৩৭..
কেচিচ্চাসংখ্যজন্মানঃ কেচিদ্দ্বিত্রিভবান্তরাঃ .
কেচিত্কিন্নরগন্ধর্ববিদ্যাধরমহোরগাঃ .. ১৩৮..
কেচিদর্কেন্দুবরুণাস্ত্র্যক্ষাধোক্ষজপদ্মজাঃ .
কেচিদ্ব্রহ্মণভূপালবৈশ্যশূদ্রগণাঃ স্থিতাঃ .. ১৩৯..
কেচিত্তৃণৌষধীবৃক্ষফলমূলপতঙ্গকাঃ .
কেচিত্কদম্বজম্বীরসালতালতমালকাঃ .. ১৪০..
কেচিন্মহেন্দ্রমলযসহ্যমন্দরমেরবঃ .
কেচিত্ক্ষারোদধিক্ষীরঘৃতেক্ষুজলরাশযঃ .. ১৪১..
কেচিদ্বিশালাঃ কুকুভঃ কেচিন্নদ্যো মহারযাঃ .
বিহাযস্যুচ্চকৈঃ কেচিন্নিপতন্ত্যুত্পতন্তি চ .. ১৪২..
কন্তুকা ইব হস্তেন মৃত্যুনাঽবিরতং হতাঃ .
ভুক্ত্বা জন্মসহস্রাণি ভূযঃ সংসারসংকটে .. ১৪৩..
পতন্তি কেচিদবুধাঃ সংপ্রাপ্যাপি বিবেকতাম্ .
দিক্কালাদ্যনবচ্ছিন্নমাত্মতত্ত্বং স্বশক্তিতঃ .. ১৪৪..
লীলযৈব যদাদত্তে দিক্কালকলিতং বপুঃ .
তদেব জীবপর্যাযবাসনাবেশতঃ পরম্ .. ১৪৫..
মনঃ সংপদ্যতে লোলং কলনাকলনোন্মুখম্ .
কলযন্তী মনঃশক্তিরাদৌ ভাবযতি ক্ষণাত্ .. ১৪৬..
আকাশভাবনামচ্ছাং শব্দবীজরসোন্মুখীম্ .
ততস্তদ্ঘনতাং যাতং ঘনস্পন্দক্রমান্মনঃ .. ১৪৭..
ভাবযত্যনিলস্পন্দং স্পর্শবীজরসোন্মুখম্ .
তাভ্যামাকাশবাতাভ্যাং দৃঢাভ্যাসবশাত্ততঃ .. ১৪৮..
শব্দস্পর্শস্বরূপাভ্যাং সংঘর্ষাজ্জন্যতেঽনলঃ .
রূপতন্মাত্রসহিতং ত্রিভিস্তৈঃ সহ সংমিতম্ .. ১৪৯..
মনস্তাদ্দৃগ্গুণগতং রসতন্মাত্রবেদনম্ .
ক্ষণাচ্চেতত্যপাং শৈত্যং জলসংবিত্ততো ভবেত্ .. ১৫০..
ততস্তাদৃগ্গুণগতং মনো ভাবযতি ক্ষণাত্ .
গন্ধতন্মাত্রমেতস্মাদ্ভূমিসংবিত্ততো ভবেত্ .. ১৫১..
অথেত্থংভূততন্মাত্রবেষ্টিতং তনুতাং জহত্ .
বপুর্বহ্নিকণাকারং স্ফুরিতং ব্যোম্নি পশ্যতি .. ১৫২..
অহংকারকলাযুক্তং বুদ্ধিবীজসমন্বিতম্ .
তত্পুর্যষ্টকমিত্যুক্তং ভূতহৃত্পদ্মষট্পদম্ .. ১৫৩..
তস্মিংস্তু তীব্রসংবেগাদ্ভাবযদ্ভাসুরং বপুঃ .
স্থূলতামেতি পাকেন মনো বিল্বফলং যথা .. ১৫৪..
মূষাস্থদ্রুতহেমাভং স্ফুরিতং বিমলাম্বরে .
সংনিবেশমথাদত্তে তত্তেজঃ স্বস্বভাবতঃ .. ১৫৫..
ঊর্ধ্বং শিরঃপিণ্ডমযমধঃ পাদমযং তথা .
পার্শ্বযোর্হস্তসংস্থানং মধ্যে চোদরধর্মিণম্ .. ১৫৬..
কালেন স্ফুটতামেত্য ভবত্যমলবিগ্রহম্ .
বুদ্ধিসত্ত্ববলোত্সাহবিজ্ঞানৈশ্বর্যসংস্থিতঃ .. ১৫৭..
স এব ভগবান্ব্রহ্মা সর্বলোকপিতামহঃ .
অবলোক্য বপুর্ব্রহ্মা কান্তমাত্মীযমুত্তমম্ .. ১৫৮..
চিন্তামভ্যেত্য ভগবাংস্ত্রিকালামলদর্শনঃ .
এতস্মিন্পরমাকাশে চিন্মাত্রৈকাত্মরূপিণী .. ১৫৯..
অদৃষ্টপারপর্যন্তে প্রথমং কিং ভবেদিতি .
ইতি চিন্তিতবান্ব্রহ্মা সদ্যো জাতামলাত্মদৃক্ .. ১৬০..
অপশ্যত্সর্গবৃন্দানি সমতীতান্যনেকশঃ .
স্মরত্যথো স সকলান্সর্বধর্মগুণক্রমাত্ .. ১৬১..
লীলযা কল্পযামাস চিত্রাঃ সংকল্পতঃ প্রজাঃ .
নানাচারসমারম্ভা গন্ধর্বনগরং যথা .. ১৬২..
তাসাং স্বর্গাপবর্গার্থং ধর্মকামার্থসিদ্ধযে .
অনন্তানি বিচিত্রাণি শাস্ত্রাণি সমকল্পযত্ .. ১৬৩..
বিরঞ্চিরূপান্মনসঃ কল্পিতত্বাজ্জগত্স্থিতেঃ .
তাবত্স্থিতিরিযং প্রোক্তা তন্নাশে নাশমাপ্নুযাত্ .. ১৬৪..
ন জাযতে ন ম্রিযতে ক্বচিত্কিংচিত্কদাচন .
পরমার্থেন বিপ্রেন্দ্র মিথ্যা সর্বং তু দৃশ্যতে .. ১৬৫..
কোশমাশাভুজঙ্গানাং সংসারাডংবরং ত্যজ .
অসদেতদিতি জ্ঞাত্বা মাতৃভাবং নিবেশয .. ১৬৬..
গন্ধর্বনগরস্যার্থে ভূষিতেঽভূষিতে তথা .
অবিদ্যাংশে সুতাদৌ বা কঃ ক্রমঃ সুখদুঃখযোঃ .. ১৬৭..
ধনদারেষু বৃদ্ধেষু দুঃখযুক্তং ন তুষ্টতা .
বৃদ্ধাযাং মোহমাযাযাং কঃ সমাশ্বাসবানিহ .. ১৬৮..
যৈরেব জাযতে রাগো মূর্খস্যাধিকতাং গতৈঃ .
তৈরেব ভাগৈঃ প্রাজ্ঞস্য বিরাগ উপজাযতে .. ১৬৯..
অতো নিদাঘ তত্ত্বজ্ঞ ব্যবহারেষু সংসৃতেঃ .
নষ্টং নষ্টমুপেক্ষস্ব প্রাপ্তং প্রাপ্তমুপাহর .. ১৭০..
অনাগতানাং ভোগানামবাঞ্ছনমকৃত্রিমম্ .
আগতানাং চ সংভোগ ইতি পণ্ডিতলক্ষণম্ .. ১৭১..
শুদ্ধং সদসতোর্মধ্যং পদং বুদ্ধ্বাবলংব্য চ .
সবাহ্যাভ্যন্তরং দৃশ্যং মা গৃহাণ বিমুঞ্চ মা .. ১৭২..
যস্য চেচ্ছা তথানিচ্ছা জ্ঞস্য কর্মণি তিষ্ঠতঃ .
ন তস্য লিপ্যতে প্রজ্ঞা পদ্মপত্রমিবাম্বুভিঃ .. ১৭৩..
যদি তে নেন্দ্রিযার্থশ্রীঃ স্পন্দতে হৃদি বৈ দ্বিজ .
তদা বিজ্ঞাতবিজ্ঞেযা সমুত্তীর্ণো ভবার্ণবাত্ .. ১৭৪..
উচ্চৈঃপদায পরযা প্রজ্ঞযা বাসনাগণাত্ .
পুষ্পাদ্গন্ধমপোহ্যারং চেতোবৃত্তিং পৃথক্কুরু .. ১৭৫..
সংসারাম্বুনিধাবস্মিন্বাসনাম্বুপরিপ্লুতে .
যে প্রজ্ঞানাবমারূঢাস্তে তীর্ণাঃ পণ্ডিতাঃ পরে .. ১৭৬..
ন ত্যজন্তি ন বাঞ্ছন্তি ব্যবহারং জগদ্গতম্ .
সর্বমেবানুবর্তন্তে পারাবারবিদো জনাঃ .. ১৭৭..
অনন্তস্যাত্মতত্ত্বস্য সত্তাসামান্যরূপিণঃ .
চিতশ্চেত্যোন্মুখত্বং যত্তত্সংকল্পাঙ্কুরং বিদুঃ .. ১৭৮..
লেশতঃ প্রাপ্তসত্তাকঃ স এব ঘনতাং শনৈঃ .
যাতি চিত্তত্বমাপূর্য দৃঢং জাড্যায মেঘবত্ .. ১৭৯..
ভাবযন্তি চিতিশ্চৈত্যং ব্যতিরিক্তমিবাত্মনঃ .
সংকল্পতামিবাযাতি বীজমঙ্কুরতামিব .. ১৮০..
সংকল্পনং হি সংকল্পঃ স্বযমেব প্রজাযতে .
বর্ধতে স্বযমেবাশু দুঃখায ন সুখায যত্ .. ১৮১..
মা সংকল্পয সংকল্পং মা ভাবং ভাবয স্থিতৌ .
সংকল্পনাশনে যত্তো ন ভূযোঽননুগচ্ছতি .. ১৮২..
ভাবনাভাবমাত্রেণ সংকল্পঃ ক্ষীযতে স্বযম্ .
সংকল্পেনৈব সংকল্পং মনসৈব মনো মুনে .. ১৮৩..
ছিত্ত্বা স্বাত্মনি তিষ্ঠ ত্বং কিমেতাবতি দুষ্করম্ .
যথৈবেদং নভঃ শূন্যং জগচ্ছূন্যং তথৈব হি .. ১৮৪..
তণ্ডুলস্য যথা চর্ম যথা তাম্রস্য কালিমা .
নশ্যতি ক্রিযযা বিপ্র পুরুষস্য তথা মলম্ .. ১৮৫..
জীবস্য তণ্ডুলস্যেব মলং সহজমপ্যলম্ .
নশ্যত্যেব ন সন্দেহস্তস্মাদুদ্যোগবান্ভবেত্ .. ১৮৬..
ইতি মহোপনিষত্ .. ইতি পঞ্চমোঽধ্যাযঃ .. ৫..
অন্তরাস্থাং পরিত্যজ্য ভাবশ্রীং ভাবনামযীম্ .
যোঽসি সোঽসি জগত্যস্মিংল্লীলযা বিহরানঘ .. ১..
সর্বত্রাহমকর্তেতি দৃঢভাবনযানযা .
পরমামৃতনাম্নী সা সমতৈবাবশিষ্যতে .. ২..
খেদোল্লাসবিলাসেষু স্বাত্মকর্তৃতযৈকযা .
স্বসংকল্পে ক্ষযং যাতে সমতৈবাবশিষ্যতে .. ৩..
সমতা সর্বভাবেষু যাসৌ সত্যপরা স্থিতিঃ .
তস্যামবস্থিতং চিত্তং ন ভূযো জন্মভাগ্ভবেত্ .. ৪..
অথবা সর্বকর্তৃত্বমকর্তৃত্বং চ বৈ মুনে .
সর্বং ত্যক্ত্বা মনঃ পীত্বা যোঽসি সোঽসি স্থিরো ভব .. ৫..
শেষস্থিরো সমাধানো যেন ত্যজসি তত্ত্যজ .
চিন্মনঃকলনাকারং প্রকাশতিমিরাদিকম্ .. ৬..
বাসনাং বাসিতারং চ প্রাণস্পন্দনপূর্বকম্ .
সমূলমখিলং ত্যক্ত্বা ব্যোমসাম্যঃ প্রশান্তধীঃ .. ৭..
হৃদযাত্সংপরিত্যজ্য সর্ববাসনপঙ্ক্তযঃ .
যস্তিষ্ঠতি গতব্যগ্রঃ স মুক্তঃ পরমেশ্বরঃ .. ৮..
দৃষ্টং দ্রষ্টব্যমখিলং ভ্রান্তং ভ্রান্ত্যা দিশো দশ .
যুক্ত্যা বৈ চরতো জ্ঞস্য সংসারো গোষ্পদাকৃতিঃ .. ৯..
সবাহ্যাভ্যন্তরে দেহে হ্যধ ঊর্ধ্বং চ দিক্ষু চ .
ইত আত্মা ততোঽপ্যাত্মা নাস্ত্যনাত্মমযং জগত্ .. ১০..
ন তদস্তি ন যত্রাহং ন তদস্তি ন তন্মযম্ .
কিমন্যদভিবাঞ্ছামি সর্বং সচ্চিন্মযং ততম্ .. ১১..
সমস্তং খল্বিদং ব্রহ্ম সর্বমাত্মেদমাততম্ .
অহমন্য ইদং চান্যদিতি ভ্রান্তিং ত্যজানঘ .. ১২..
ততে ব্রহ্মঘনে নিত্যে সংভবন্তি ন কল্পিতাঃ .
ন শোকোঽস্তি ন মোহোঽস্তি ন জরাস্তি ন জন্ম বা .. ১৩..
যদস্তীহ তদেবাস্তি বিজ্বরো ভব সর্বদা .
যথাপ্রাপ্তানুভবতঃ সর্বত্রানভিবাঞ্ছনাত্ .. ১৪..
ত্যাগাদানপরিত্যাগী বিজ্বরো ভব সর্বদা .
যস্যেদং জন্ম পাশ্চাত্যং তমাশ্বেব মহামতে .. ১৫..
বিশন্তি বিদ্যা বিমলা মুক্তা বেণুমিবোত্তমম্ .
বিরক্তমনসাং সম্যক্স্বপ্রসঙ্গাদুদাহৃতম্ .. ১৬..
দ্রষ্টুর্দৃশ্যসমাযোগাত্প্রত্যযানন্দনিশ্চযঃ .
যস্তং স্বমাত্মতত্ত্বোত্থং নিষ্পন্দং সমুপাস্মহে .. ১৭..
দ্রষ্টৃদর্শনদৃশ্যানি ত্যক্ত্বা বাসনযা সহ .
দর্শনপ্রত্যযাভাসমাত্মানং সমুপাস্মহে .. ১৮..
দ্বযোর্মধ্যগতং নিত্যমস্তিনাস্তীতি পক্ষযোঃ .
প্রকাশনং প্রকাশানামাত্মানং সমুপাস্মহে .. ১৯..
সন্ত্যজ্য হৃদ্গুহেশানং দেবমন্যং প্রযান্তি যে .
তে রত্নমভিবাঞ্ছন্তি ত্যক্তহস্তস্থকৌস্তুভাঃ .. ২০..
উত্থিতানুত্থিতানেতানিন্দ্রিযারীন্পুনঃ পুনঃ .
হন্যাদ্বিবেকদণ্ডেন বজ্রেণেব হরির্গিরীন্ .. ২১..
সংসাররাত্রিদুঃস্বপ্নে শূন্যে দেহমযে ভ্রমে .
সর্বমেবাপবিত্রং তদ্দৃষ্টং সংসৃতিবিভ্রমম্ .. ২২..
অজ্ঞানোপহতো বাল্যে যৌবনে বনিতাহতঃ .
শেষে কলত্রচিন্তার্তঃ কিং করোতি নরাধমঃ .. ২৩..
সতোঽসত্তা স্থিতা মূর্ধ্নি রম্যাণাং মূর্ধ্ন্যরম্যতা .
সুখানাং মূর্ধ্নিদুঃখানি কিমেকং সংশ্রযাম্যহম্ .. ২৪..
যেষাং নিমেষণামেষৌ জগতঃ প্রলযোদযৌ .
তাদৃশাঃ পুরুষা যান্তি মাদৃশাং গণনৈব কা .. ২৫..
সংসার এব দুঃখানাং সীমান্ত ইতি কথ্যতে .
তন্মধ্যে পতিতে দেহে সুখমাসাদ্যতে কথম্ .. ২৬..
প্রবুদ্ধোঽস্মি প্রবুদ্ধোঽস্মি দুষ্টশ্চোরোঽযমাত্মনঃ .
মনো নাম নিহন্ম্যেনং মনসাস্মি চিরং হৃতঃ .. ২৭..
মা খেদং ভজ হেযেষু নোপাদেযপরো ভব .
হেযাদেযাদৃশৌ ত্যক্ত্বা শেষস্থঃ সুস্থিরো ভব .. ২৮..
নিরাশতা নির্ভযতা নিত্যতা সমতা জ্ঞতা .
নিরীহতা নিষ্ক্রিযতা সৌম্যতা নির্বিকল্পতা .. ২৯..
ধৃর্মৈত্রী মনস্তুষ্টির্মৃদুতা মৃদুভাষিতা .
হেযোপাদেযনির্মুক্তে জ্ঞে তিষ্ঠন্ত্যপবাসনম্ .. ৩০..
গৃহীততৃষ্ণাশবরীবাসনাজালমাততম্ .
সংসারবারিপ্রসৃতং চিন্তাতন্তুভিরাততম্ .. ৩১..
অনযা তীক্ষ্ণযা তাত ছিন্ধি বুদ্ধিশলাকযা .
বাত্যযেবাম্বুদং জালং ছিত্ত্বা তিষ্ঠ ততে পদে .. ৩২..
মনসৈব মনশ্ছিত্ত্বা কুঠারেণেব পাদপম্ .
পদং পাবনমাসাদ্য সদ্য এব স্থিরো ভব .. ৩৩..
তিষ্ঠন্গচ্ছন্ত্স্বপঞ্জাগ্রন্নিবসন্নুত্পতন্পতন্ .
অসদেবেদমিত্যন্তং নিশ্চিত্যাস্তাং পরিত্যজ .. ৩৪..
দৃশ্যমাশ্রযসীদং চেত্তত্সচ্চিতোঽসি বন্ধবান্ .
দৃশ্যং সন্ত্যজসীদং চেত্তদাঽচিত্তোঽসি মোক্ষবান্ .. ৩৫..
নাহং নেদমিতি ধ্যাযংস্তিষ্ঠ ত্বমচলাচলঃ .
আত্মনো জগতশ্চান্তর্দ্রষ্টৃদৃশ্যদশান্তরে .. ৩৬..
দর্শনাখ্যং স্বমাত্মানং সর্বদা ভাবযন্ভব .
স্বাদ্যস্বাদকসংত্যক্তং স্বাদ্যস্বাদকমধ্যগম্ .. ৩৭..
স্বদনং কেবলং ধ্যাযন্পরমাত্মমযো ভব .
অবলম্ব্য নিরালম্বং মধ্যেমধ্যে স্থিরো ভব .. ৩৮..
রজ্জুবদ্ধা বিমুচ্যন্তে তৃষ্ণাবদ্ধা ন কেনচিত্ .
তস্মান্নিদাঘ তৃষ্ণা ত্বং ত্যজ সংকল্পবর্জনাত্ .. ৩৯..
এতামহংভাবমযীপপুণ্যাং
        ছিত্ত্বানহংভাব শলাকযৈব ..
স্বভাবজাং ভব্যভবন্তভূমৌ
        ভব প্রশান্তাখিলভূতভীতিঃ .. ৪০..
অহমেষাং পদার্থানামেতে চ মম জীবিতম্ .
নাহমেভির্বিনা কিংচিন্ন মযৈতে বিনা কিল .. ৪১..
ইত্যন্তর্নিশ্চযং ত্যক্ত্বা বিচার্য মনসা সহ .
নাহং পদার্থস্য ন মে পদার্থ ইতি ভাবিতে .. ৪২..
অন্তঃশীতলযা বুদ্ধ্যা কুর্বতো লীলযা ক্রিযাম্ .
যো নূনং বাসনাত্যাগো ধ্যেযো ব্রহ্মন্প্রকীর্তিতঃ .. ৪৩..
সর্বং সমতযা বুদ্ধ্যা যঃ কৃত্বা বাসনাক্ষযম্ .
জহাতি নির্মমো দেহং নেযোঽসৌ বাসনাক্ষযঃ .. ৪৪..
অহংকারমযীং ত্যক্ত্বা বাসনাং লীলযৈব যঃ .
তিষ্ঠতি ধ্যেযসংত্যাগী স জীবন্মুক্ত উচ্যতে .. ৪৫..
নির্মূলং কলনাং ত্যক্ত্বা বাসনাং যঃ শমং গতঃ .
জ্ঞেযং ত্যাগমিমং বিদ্ধি মুক্তং তং ব্রাহ্মণোত্তমম্ .. ৪৬..
দ্বাবেতৌ ব্রহ্মতাং যাতৌ দ্বাবেতৌ বিগতজ্বরৌ .
আপতত্সু যথাকালং সুখদুঃখেষ্বনারতৌ .
সংন্যাসিযোগিনৌ দান্তৌ বিদ্ধি শান্তৌ মুনীশ্বর .. ৪৭..
ঈপ্সিতানীপ্সিতে ন স্তো যস্যান্তর্বর্তিদৃষ্টিষু .
সুষুপ্তবদ্যশ্চরতি স জীবন্মুক্ত উচ্যতে .. ৪৮..
হর্ষামর্ষভযক্রোধকামকার্পণ্যদৃষ্টিভিঃ .
ন হৃষ্যতি গ্লাযতি যঃ পরামর্শবিবর্জিতঃ .. ৪৯..
বাহ্যার্থবাসনোদ্ভূতা তৃষ্ণা বদ্ধেতি কথ্যতে .
সর্বার্থবাসনোন্মুক্তা তৃষ্ণা মুক্তেতি ভণ্যতে .. ৫০..
ইদমস্তু মমেত্যন্তমিচ্ছাং প্রার্থনযান্বিতাম্ .
তাং তীক্ষ্ণাং শৃঙ্খলাং বিদ্ধি দুঃখজন্মভযপ্রদাম্ .. ৫১..
তামেতাং সর্বভাবেষু সত্স্বসত্সু চ সর্বদা .
সংত্যজ্য পরমোদারং পদমেতি মহামনাঃ .. ৫২..
বন্ধাস্থামথ মোক্ষাস্থাং সুখদুঃখদশামপি .
ত্যক্ত্বা সদসদাস্থাং ত্বং তিষ্ঠাক্ষুব্ধমহাব্ধিবত্ .. ৫৩..
জাযতে নিশ্চযঃ সাধো পুরুষস্য চতুর্বিধঃ .. ৫৪..
আপাদমস্তকমহং মাতাপিতৃবিনির্মিতঃ .
ইত্যেকো নিশ্চযো ব্রহ্মন্বন্ধাযাসবিলোকনাত্ .. ৫৫..
অতীতঃ সর্বভাবেভ্যো বালাগ্রাদপ্যহং তনুঃ .
ইতি দ্বিতীযো মোক্ষায নিশ্চযো জাযতে সতাম্ .. ৫৬..
জগজ্জাল পদার্থাত্মা সর্ব এবাহমক্ষযঃ .
তৃতীযো নিশ্চযশ্চোক্তো মোক্ষাযৈব দ্বিজোত্তম .. ৫৭..
অহং জগদ্বা সকলং শূন্যং ব্যোম সমং সদা .
এবমেষ চতুর্থোঽপি নিশ্চযো মোক্ষসিদ্ধিদঃ .. ৫৮..
এতেষাং প্রথমঃ প্রোক্তস্তৃষ্ণযা বন্ধযোগ্যযা .
শুদ্ধতৃষ্ণাস্ত্রযঃ স্বচ্ছা জীবন্মুক্তা বিলাসিনঃ .. ৫৯..
সর্বং চাপ্যহমেবেতি নিশ্চযো যো মহামতে .
তমাদায বিষাদায ন ভূযো জাযতে মতিঃ .. ৬০..
শূন্যং তত্প্রকৃতির্মাযা ব্রহ্মবিজ্ঞানমিত্যপি .
শিবঃ পুরুষ ঈশানো নিত্যমাত্মেতি কথ্যতে .. ৬১..
দ্বৈতাদ্বৈতসমুদ্ভূতৈর্জগন্নির্মাণলীলযা .
পরমাত্মমযীশক্তিরদ্বৈতৈব বিজৃম্ভতে .. ৬২..
সর্বাতীতপদালম্বী পরিপূর্ণৈকচিন্মযঃ .
নোদ্বেগী ন চ তুষ্টাত্মা সংসারে নাবসীদতি .. ৬৩..
প্রাপ্তকর্মকরো নিত্যং শত্রুমিত্রসমানদৃক্ .
ঈহিতানীহিতৈর্মুক্তো ন শোচতি ন কাঙ্ক্ষতি .. ৬৪..
সর্বস্যাভিমতং বক্তা চোদিতঃ পেশলোক্তিমান্ .
আশযজ্ঞশ্চ ভূতানাং সংসারে নাবসীদতি .. ৬৫..
পূর্বাং দৃষ্টিমবষ্টভ্য ধ্যেযত্যাগবিলাসিনীম্ .
জীবন্মুক্ততযা স্বস্থো লোকে বিহর বিজ্বরঃ .. ৬৬..
অন্তঃসংত্যক্তসর্বাশো বীতরাগো বিবাসনঃ .
বহিঃসর্বসমাচারো লোকে বিহর বিজ্বরঃ .. ৬৭..
বহিঃকৃত্রিমসংরংভো হৃদি সংরম্ভবর্জিতঃ .
কর্তা বহিরকর্তান্তর্লোকে বিহর শুদ্ধধীঃ .. ৬৮..
ত্যক্তাহংকৃতিরাশ্বস্তমতিরাকাশশোভনঃ .
অগৃহীতকলঙ্কাঙ্কো লোকে বিহর শুদ্ধধীঃ .. ৬৯..
উদারঃ পেশলাচারঃ সর্বাচারানুবৃত্তিমান্ .
অন্তঃসঙ্গপরিত্যাগী বহিঃসংভারবানিব .
অন্তর্বৈরাগ্যমাদায বহিরাশোন্মুখেহিতঃ .. ৭০..
অযং বন্ধুরযং নেতি গণনা লঘুচেতসাম্ .
উদারচরিতানাং তু বসুধৈব কুটুম্বকম্ .. ৭১..
ভাবাভাববিনির্মুক্তং জরামরণবর্জিতম্ .
প্রশান্তকলনারভ্যং নীরাগং পদমাশ্রয .. ৭২..
এষা ব্রাহ্মী স্থিতিঃ স্বচ্ছা নিষ্কামা বিগতামযা .
আদায বিহরন্নেবং সংকটেষু ন মুহ্যতি .. ৭৩..
বৈরাগ্যেণাথ শাস্ত্রেণ মহত্ত্বাদিগুণৈরপি .
যত্সংকল্পহরার্থং তত্স্বযমেবোন্নযেন্মনঃ .. ৭৪..
বৈরাগ্যাত্পূর্ণতামেতি মনো নাশবশানুগম্ .
আশযা রক্ততামেতি শরদীব সরোঽমলম্ .. ৭৫..
তমেব ভুক্তিবিরসং ব্যাপারৌঘং পুনঃ পুনঃ .
দিবসেদিবসে কুর্বন্প্রাজ্ঞ কস্মান্ন লজ্জতে .. ৭৬..
চিচ্চৈত্যকলিতো বন্ধস্তন্মুক্তৌ মুক্তিরুচ্যতে .
চিদচৈত্যা কিলাত্মেতি সর্বসিদ্ধান্তসংগ্রহঃ .. ৭৭..
এতন্নিশ্চযমাদায বিলোকয ধিযেদ্ধযা .
স্বযমেবাত্মনাত্মানমানন্দং পদমাপ্স্যসি .. ৭৮..
চিদহং চিদিমে লোকাশ্চিদাশাশ্চিদিমাঃ প্রজাঃ .
দৃশ্যদর্শননির্মুক্তঃ কেবলামলরূপবান্ .. ৭৯..
নিত্যোদিতো নিরাভাসো দ্রষ্টা সাক্ষী চিদাত্মকঃ .. ৮০..
চৈত্যনির্মুক্তচিদ্রূপং পূর্ণজ্যোতিঃস্বরূপকম্ .
সংশান্তসর্বসংবেদ্যং সংবিন্মাত্রমহং মহত্ .. ৮১..
সংশান্তসর্বসংকল্পঃ প্রশান্তসকলেষণঃ .
নির্বিকল্পপদং গত্বা স্বস্থো ভব মুনীশ্বর .. ৮২.. ইতি .
য ইমাং মহোপনিষদং ব্রাহ্মণো নিত্যমধীতে .
অশ্রোত্রিযঃ শ্রোত্রিযো ভবতি . অনুপনীত উপনীতো ভবতি .
সোঽগ্নিপূতো ভবতি . স বাযুপূতো ভবতি . স সোমপূতো ভবতি .
স সত্যপূতো ভবতি . স সর্বপূতো ভবতি . স সর্বর্দেবৈর্জ্ঞাতো ভবতি .
স সর্বেষু তীর্থেষু স্নাতো ভবতি . স সর্বৈর্দেবৈরনুধ্যাতো ভবতি .
স সর্বক্রতুভিরিষ্টবান্ভবতি . গাযত্র্যাঃ ষষ্টিসহস্রাণি
জপ্তানি ফলানি ভবন্তি . ইতিহাসপুরাণানাং শতসহস্রাণি জপ্তানি
ফলানি ভবন্তি . প্রণবানামযুতং জপ্তং ভবতি .
আচক্ষুষঃ পঙ্ক্তিং পুনাতি . আসপ্তমান্পুরুষযুগান্পুনাতি .
ইত্যাহ ভগবান্ হিরণ্যগর্ভঃ . জপ্যেনামৃতত্ত্বং চ
গচ্ছতীত্যুপনিষত্ . .. ইতি ষষ্ঠোঽধ্যাযঃ .. ৬..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো
বলমিন্দ্রিযাণি চ .. সর্বাণি সর্বং ব্রহ্মোপনিষদং মাহং
ব্রহ্ম নিরাকুর্যাং মা মা ব্রহ্ম নিরাকরোদনিরাকরণম-
স্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু .. ॐ শান্তিঃ শান্তিঃ শান্তিঃ ..
ইতি মহোপনিষত্সমাপ্তা..