পৈংগল

..  পৈঙ্গলোপনিষত্  ..

শুক্লযজুর্বেদীয সামান্য উপনিষত্ ..
পৈঙ্গলোপনিষদ্বেদ্যং পরমানন্দবিগ্রহম্ .
পরিতঃ কলযে রামং পরমাক্ষরবৈভবম্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
অথ হ পৈঙ্৚লো যাজ্ঞবল্ক্যমুপসমেত্য
দ্বাদশবর্শশুশ্রূষাপূর্বকং
পরমরহস্যকৈবল্যমনুব্রূহীতি পপ্রচ্ছ . স হোবাচ
যাজ্ঞ্নবল্ক্যঃ সদেব সোম্যেদমগ্র আসীত্ .
তন্নিত্যমুক্তমবিক্রিযং সত্যজ্ঞানানন্দং পরিপূর্ণং
সনাতনমেকমেবাদ্বিতীযং ব্রহ্ম .
তস্মিন্মরুশুক্তিকাস্থাণুস্ফটিকাদৌ
জলরৌপ্যপুরুষরেখাদিবল্লোহিতশুক্লকৃষ্ণগুণমযী
গুণসাম্যানির্বাচ্যা মূলপ্রকৃতিরাসীত্ . তত্প্রতিবিম্বিতং
যত্তত্সাক্ষিচৈতন্যমাসীত্ . সা পুনর্বিকৃতিং প্রাপ্য
সত্ত্বোদ্রিক্তাঽব্যক্তাখ্যাবরণশক্তিরাসীত্ . তত্প্রতিবিম্বিতং
যত্তদীশ্বরচৈতন্যমাসীত্ . স স্বাধীনমাযঃ সর্বজ্ঞঃ
সৃষ্টিস্থিতিলযানামাদিকর্তা জগদঙ্কুররূপো ভবতি .
স্বস্মিন্বিলীনং সকলং জগদাবির্ভাবযতি .
প্রাণিকর্মবশাদেষ পটো যদ্বত্প্রসারিতঃ
প্রাণিকর্মক্ষযাত্পুনস্তিরোভাবযতি . তস্মিন্নেবাখিলং বিশ্বং
সঙ্কোচিতপটবদ্বর্ততে . ঈশাধিষ্ঠিতাবরণশক্তিতো
রজোদ্রিক্তা মহদাখ্যা বিক্ষেপশক্তিরাসীত্ . তত্প্রতিবিম্বিতং
যত্তদ্ধিরণ্যগর্ভচৈতন্যমাসীত্ . স মহত্তত্ত্বাভিমানী
স্পষ্টাস্পষ্টবপুর্ভবতি .
হিরণ্যগর্ভাধিষ্ঠিতবিক্ষেপশক্তিতস্তমোদ্রিক্তাহঙ্কারাভিধা
স্থূলশক্তিরাসীত্ . তত্প্রতিবিম্বিতং
যত্তদ্বিরাটচৈতন্যমাসীত্ . স তদভিমানী স্পষ্টবপুঃ
সর্বস্থূলপালকো বিষ্ণুঃ প্রধানপুরুষো ভবতি .
তস্মাদাত্মন আকাশঃ সম্ভূতঃ . আকাশাদ্বাযুঃ . বাযোরগ্নিঃ
. অগ্নেরাপঃ . অদ্ভ্যঃ পৃথিবী . তানি পঞ্চ তন্মাত্রাণি
ত্রিগুণানি ভবন্তি . স্রষ্টুকামো জগদ্যোনিস্তমোগুণমধিষ্ঠায
সূক্ষ্মতন্মাত্রাণি ভূতানি স্থূলীকর্তুং সোঽকামযত .
সৃষ্টেঃ পরিমিতানি ভূতান্যেকমেকং দ্বিধা বিধায
পুনশ্চতুর্ধা কৃত্বা স্বস্বেতরদ্বিতীযাংশৈঃ পঞ্চধা
সংযোজ্য পঞ্চীকৃতভূতৈরনন্তকোটিব্রহ্মাণ্ডানি
তত্তদণ্ডোচিতগোলকস্থূলশরীরাণ্যসৃজত্ . স
পঞ্চভূতানাং রজোংশাংশ্চতুর্ধা কৃত্বা
ভাগত্রযাত্পঞ্চবৃত্ত্যাত্মকং প্রাণমসৃজত্ . স তেষাং
তুর্যভাগেন কর্মেন্দ্রিযাণ্যসৃজত্ . স তেষাং সত্ত্বাংশং
চতুর্ধা কৃত্বা ভাগত্রযসমষ্টিতঃ
পঞ্চক্রিযাবৃত্ত্যাত্মকমন্তঃকরণমসৃজত্ . স তেষাং
সত্ত্বতুরীযভাগেন জ্ঞানেন্দ্রিযাণ্যসৃজত্ . সত্ত্বসমষ্টিত
ইন্দ্রিযপালকানসৃজত্ . তানি সৃষ্টান্যণ্ডে প্রাচিক্ষিপত্
. তদাজ্ঞযা সমষ্ট্যণ্ডং ব্যাপ্য তান্যতিষ্ঠন্ .
তদাজ্ঞযাহঙ্কারসমন্বিতো বিরাট্ স্থূলান্যরক্ষত্ .
হিরণ্যগর্ভস্তদাজ্ঞযা সূক্ষ্মাণ্যপালযত্ . অণ্ডস্থানি তানি
তেন বিনা স্পন্দিতুং চেষ্টিতুং বা ন শেকুঃ . তানি
চেতনীকর্তুং সোঽকামযত ব্রহ্মাণ্ডব্রহ্মরন্ধ্রাণি
সমস্তব্যষ্টিমস্তকান্বিদার্য তদেবানুপ্রাবিশত্ . তদা
জডান্যপি তানি চেতনবত্স্বকর্মাণি চক্রিরে . সর্বজ্ঞেশো
মাযালেশসমন্বিতো ব্যষ্টিদেহং প্রবিশ্য তযা মোহিতো
জীবত্বমগমত্ .
শরীরত্রযতাদাত্ম্যাত্কর্তৃত্বভোক্তৃত্বতামগমত্ .
জাগ্রত্স্বপ্নসুষুপ্তিমূর্চ্ছামরণধর্মযুক্তো
ঘটীযন্ত্রবদুদ্বিগ্নো জাতো মৃত ইব কুলালচক্রন্যাযেন
পরিভ্রমতীতি .. ইতি প্রথমোঽধ্যাযঃ .. ১..

অথ পৈঙ্গলো যাজ্ঞবল্ক্যমুবাচ সর্বলোকানাং
সৃষ্টিস্থিত্যন্তকৃদ্বিভূরীশঃ কথং জীবত্বমগমদিতি . স
হোবাচ যাজ্ঞবল্ক্যঃ স্থূলসূক্ষ্মকারণদেহোদ্ভবপূর্বকং
জীবেশ্বরস্বরূপং বিবিচ্য কথযামীতি
সাবধানেনৈকাগ্রতযা শ্রূযতাম্ . ঈশঃ
পঞ্চীকৃতমহাভূতলেশানাদায
ব্যষ্টিসমষ্ট্যাত্মকস্থূলশরীরাণি যথাক্রমমকরোত্ .
কপালচর্মান্ত্রাস্থিমাংসনখানি পৃথিব্যংশাঃ .
রক্তমূত্রলালাস্বেদাদিকমবংশাঃ .
ক্ষুত্তৃষ্ণোষ্ণমোহমৈথুনাদ্যা অগ্ন্যংশাঃ .
প্রচারণোত্তারণশ্বাসাদিকা বায্বংশাঃ . কামক্রোধাদযো
ব্যোমাংশাঃ . এতত্সঙ্ঘাতং কর্মণি সঞ্চিতং ত্বগাদিযুক্তং
বাল্যাদ্যবস্থাভিমানাস্পদং বহুদোপাশ্রযং স্থূলশরীরং
ভবতি ..
অথাপঞ্চীকৃতমহাভূতরজোংশভাগত্রযসমষ্টিতঃ
প্রাণমসৃজত্ . প্রাণাপানব্যানোদানসমানাঃ প্রাণবৃত্তযঃ
. নাগকূর্মকৃকরদেবদত্তধনঞ্জযা উপপ্রাণাঃ .
হৃদাসননাভিকণ্ঠসর্বাঙ্গানি স্থানানি .
আকাশাদিরজোগুণতুরীযভাগেন কর্মেন্দ্রিযমসৃজত্ .
বাক্পাণিপাদপাযূপাস্থাস্তদ্বৃত্তযঃ .
বচনাদানগমনবিসর্গানন্দাস্তদ্বিষযাঃ ..
এবং ভূতসত্ত্বাংশভাগত্রযসমষ্টিতোঽন্তঃকরণমসৃজত্
. অন্তঃকরণমনোবুদ্ধিচিত্তাহঙ্কারাস্তদ্বৃত্তযঃ .
সঙ্কল্পনিশ্চযস্মরণাভিমানানুসন্ধানাস্তদ্বিষযাঃ .
গলবদননাভিহৃদযভ্রূমধ্যং স্থানম্ .
ভূতসত্বতুরীযভাগেন জ্ঞানেন্দ্রিযমসৃজত্ .
শ্রোত্রত্বক্চক্ষুর্জিব্হাঘ্রাণাস্তদ্বৃত্তযঃ .
শব্দস্পর্শরূপরসগন্ধাস্তদ্বিষযাঃ .
দিগ্বাতার্কপ্রচেতোঽশ্বিবহ্নীন্দ্রোপেন্দ্রমৃত্যুকাঃ . চন্দ্রো
বিষ্ণুশ্চতুর্বক্ত্রঃ শম্ভুশ্চ কারণাধিপাঃ ..
অথান্নমযপ্রাণমযমনোমযবিজ্ঞামযানন্দমযাঃ পঞ্চ
কোশাঃ . অন্নরসেনৈব ভূত্বান্নরসেনাভিবৃদ্ধিং
প্রাপ্যান্নরসমযপৃথিব্যাং যদ্বিলীযতে সোঽন্নমযকোশঃ .
তদেব স্থূলশরীরম্ . কর্মেন্দ্রিযৈঃ সহ প্রাণাদিপঞ্চকং
প্রাণমযকোশঃ . জ্ঞানেন্দ্রিযৈঃ সহ বুদ্ধির্বিজ্ঞানমযকোশঃ .
এতত্কোশত্রযং লিঙ্গশরীরম্ .
স্বরূপাজ্ঞানমানন্দমযকোশঃ . তত্কারণশরীরম্ ..
অথ জ্ঞানেন্দ্রিযপঞ্চকং কর্মেন্দ্রিযপঞ্চকং
প্রাণাদিপঞ্চকং বিযদাদিপঞ্চকমন্তঃকরণচতুষ্টযং
কামকর্মতমাংস্যষ্টপুরম্ ..
ইশাজ্ঞযা বিরাজো ব্যষ্টিদেহং প্রবিশ্য বুদ্ধিমধিষ্ঠায
বিশ্বত্বমগমত্ . বিজ্ঞানাত্মা চিদাভাসো বিশ্বো ব্যাবহারিকো
জাগ্রত্স্থূলদেহাভিমানী কর্মভূরিতি চ বিশ্বস্য নাম
ভবতি . ঈশাজ্ঞযা সূত্রাত্মা ব্যষ্টিসূক্ষ্মশরীরং
প্রবিশ্য মন অধিষ্ঠায তৈজসত্বমগমত্ . তৈজসঃ
প্রাতিভাসিকঃ স্বপ্নকল্পিত ইতি তৈজসস্য নাম ভবতি .
ঈশাজ্ঞযা মাযোপাধিরব্যক্তসমন্বিতো ব্যষ্টিকারণশরীরং
প্রবিশ্য প্রাজ্ঞত্বমগমত্ . প্রাজ্ঞোবিচ্ছিন্নঃ পারমার্থিকঃ
সুষুপ্ত্যভিমানীতি প্রাজ্ঞস্য নাম ভবতি .
অব্যক্তলেশাজ্ঞানাচ্ছাদিতপারমার্থিকজীবস্য
তত্ত্বমস্যাদিবাক্যানি ব্রহ্মণৈকতাং জগুঃ
নেতরযোর্ব্যাবহারিকপ্রাতিভাসিকযোঃ .
অন্তঃকরণপ্রতিবিম্বিতচৈতন্যং যত্তদেবাবস্থাত্রযভাগ্ভবতি
. স জাগ্রত্স্বপ্নসুষুপ্ত্যবস্থাঃ প্রাপ্য ঘটীযন্ত্রবদুদ্বিগ্নো
জাতো মৃত ইব স্থিতো ভবতি . অথ
জাগ্রত্স্বপ্নসুষুপ্তিমূর্চ্ছামরণাদ্যবস্থাঃ পঞ্চ ভবন্তি
..
তত্তদ্দেবতাগ্রহান্বিতৈঃ শ্রোত্রাদিজ্ঞানেন্দ্রিযৈঃ
শব্দ্যাদ্যর্থবিষযগ্রহণজ্ঞানং জাগ্রদবস্থা ভবতি .
তত্র ভ্রূমধ্যং গতো জীব আপাদমস্তকং ব্যাপ্য
কৃষিশ্রবণাদ্যখিলক্রিযাকর্তা ভবতি . তত্তত্ফলভুক্ চ
ভবতি . লোকান্তরগতঃ কর্মার্জিতফলং স এব ভুঙ্ক্তে . স
সার্বভৌমবদ্ব্যবহারাচ্ছ্রান্ত অন্তর্ভবনং প্রবেষ্টুং
মার্গমাশ্রিত্য তিষ্ঠতি . করণোপরমে
জাগ্রত্সংস্কারোত্থপ্রবোধবদ্গ্রাহ্যগ্রাহকরূপস্ফুরণং
স্বপ্নাবস্থা ভবতি . তত্র বিশ্ব এব
জাগ্রদ্ব্যবহারলোপান্নাডীমধ্যং চরংস্তৈজসত্বমবাপ্য
বাসনারূপকং জগদ্বৈচিত্র্যং স্বভাসা ভাসযন্যথেপ্সিতং
স্বযং ভুঙ্ক্তে ..
চিত্তৈককরণা সুষুপ্ত্যবস্থা ভবতি .
ভ্রমবিশ্রান্তশকুনিঃ পক্ষৌ সংহৃত্য নীডাভিমুখং যথা
গচ্ছতি তথা জীবোঽপি জাগ্রত্স্বপ্নপ্রপঞ্চে ব্যবহৃত্য
শ্রান্তোঽজ্ঞানং প্রবিশ্য স্বানন্দং ভুঙ্ক্তে ..
অকস্মান্মুদ্গরদণ্ডাদ্যৈস্তাডিতবদ্ভযাজ্ঞানাভ্যামিন্দ্রিযসঙ্ঘ্
আতৈঃ কম্পন্নিব মৃততুল্যা মূর্চ্ছা ভবতি .
জাগ্রত্স্বপ্নসুষুপ্তিমূর্চ্ছাবস্থানামন্যা
ব্রহ্মাদিস্তম্বপর্যন্তং সর্বজীবভযপ্রদা স্থূলদেহবিসর্জনী
মরণাবস্থা ভবতি . কর্মেন্দ্রিযাণি জ্ঞানেন্দ্রিযাণি
তত্তদ্বিষযান্প্রাণান্সংহৃত্য কামকর্মান্বিত
অবিদ্যাভূতবেষ্টিতো জীবো দেহান্তরং প্রাপ্য লোকান্তরং
গচ্ছতি . প্রাক্কর্মফলপাকেনাবর্তান্তরকীটবদ্বিশ্রান্তিং
নৈব গচ্ছতি . সত্কর্মপরিপাকতো বহূনাং জন্মনামন্তে
নৃণাং মোক্ষেচ্ছা জাযতে . তদা সদ্গুরুমাশ্রিত্য
চিরকালসেবযা বন্ধং মোক্ষং কশ্চিত্প্রযাতি . অবিচারকৃতো
বন্ধো বিচারান্মোক্ষো ভবতি . তস্মাত্সদা বিচারযেত্ .
অধ্যারোপাপবাদতঃ স্বরূপং নিশ্চযীকর্তুং শক্যতে .
তস্মাত্সদা বিচারযেজ্জগজ্জীবপরমাত্মনো
জীবভাবজগদ্ভাববাধে প্রত্যগভিন্নং ব্রহ্মৈবাবশিষ্যত
ইতি .. ইতি দ্বিতীযোঽধ্যাযঃ .. ২..

অথ হৈনং পৈঙ্গলঃ প্রপচ্ছ যাজ্ঞবল্ক্যং
মহাবাক্যবিবরণমনুব্রূহীতি . স হোবাচ
যাজ্ঞবল্ক্যস্তত্ত্বমসি ত্বং তদসি ত্বং ব্রহ্মাস্যহং
ব্রহ্মাস্মীত্যনুসন্ধানং কুর্যাত্ . তত্র পারোক্ষ্যশবলঃ
সর্বজ্ঞত্বাদিলক্ষণো মাযোপাধিঃ সচ্চিদানন্দলক্ষণো
জগদ্যোনিস্তত্পদবাচ্যো ভবতি . স
এবান্তঃকরণসম্ভিন্নবোধোঽস্মত্প্রত্যযাবলম্বনস্ত্বম্পদবাচ্যো
ভবতি . পরজীবোপাধিমাযাবিদ্যে বিহায তত্ত্বংপদলক্ষ্যং
প্রত্যগভিন্নং ব্রহ্ম . তত্ত্বমসীত্যহং ব্রহ্মাস্মীতি
বাক্যার্থবিচারঃ শ্রবণং ভবতি . একান্তেন
শ্রবণার্থানুসন্ধানং মননং ভবতি .
শ্রবণমনননির্বিচিকিত্সেঽর্থে বস্তুন্যেকতানবত্তযা
চেতঃস্থাপনং নিদিধ্যাসনং ভবতি . ধ্যাতৃধ্যানে বিহায
নিবাতস্থিতদীপবদ্ধ্যেযৈকগোচরং চিত্তং সমাধির্ভবতি .
তদানীমাত্মগোচরা বৃত্তযঃ সমুত্থিতা অজ্ঞাতা ভবন্তি .
তাঃ স্মরণাদনুমীযন্তে . ইহানাদিসংসারে সঞ্চিতাঃ
কর্মকোটযোঽনেনৈব বিলযং যান্তি .
ততোভ্যাসপাটবাত্সহস্রশঃ সদামৃতধারা বর্ষতি . ততো
যোগবিত্তমাঃ সমাধিং ধর্মমেঘং প্রাহুঃ . বাসনাজালে
নিঃশেষমমুনা প্রবিলাপিতে কর্মসঞ্চযে পুণ্যপাপে
সমূলোন্মূলিতে প্রাক্পরোক্ষমপি
করতলামলকবদ্বাক্যমপ্রতিবদ্ধাপরোক্ষসাক্ষাত্কারং
প্রসূযতে . তদা জীবন্মুক্তো ভবতি ..
ঈশঃ পঞ্চীকৃতভূতানামপঞ্চীকরণং কর্তুং
সোঽকামযত . ব্রহ্মাণ্ডতদ্গতলোকান্কার্যরূপাংশ্চ
কারণত্বং প্রাপযিত্বা ততঃ সূক্ষ্মাঙ্গং কর্মেন্দ্রিযাণি
প্রাণাংশ্চ জ্ঞানেন্দ্রিযাণ্যন্তঃকরণচতুষ্টযং
চৈকীকৃত্য সর্বাণি ভৌতিকানি কারণে ভূতপঞ্চকে সংযোজ্য
ভূমিং জলে জলং বহ্নৌ বহ্নিং বাযৌ বাযুমাকাশে
চাকাশমহঙ্কারে চাহঙ্কারং মহতি মহদব্যক্তেঽব্যক্তং
পুরুষে ক্রমেণ বিলীযতে . বিরাদ্ড্ঢিরণ্যগর্ভেশ্বরা
উপাধিবিলযাত্পরমাত্মনি লীযন্তে .
পঞ্চীকৃতমহাভূতসম্ভবকর্মসঞ্চিতস্থূলদেহঃ
কর্মক্ষযাত্সত্কর্মপরিপাকতোঽপঞ্চীকরণং প্রাপ্য
সূক্ষ্মেণৈকীভূত্বা কারণরূপত্বমাসাদ্য তত্কারণং
কূটস্থে প্রত্যগাত্মনি বিলীযতে . বিশ্বতৈজসপ্রাজ্ঞাঃ
স্বস্বোপাধিলযাত্প্রত্যগাত্মনি লীযন্তে . অণ্ডং জ্ঞানাগ্নিনা
দগ্ধং কারণৈঃ সহ পরমাত্মনি লীনং ভবতি . ততো ব্রাহ্মণঃ
সমাহিতো ভূত্বা তত্ত্বংপদৈক্যমেব সদা কুর্যাত্ . ততো
মেঘাপাযেংঽশুমানিবাত্মাবির্ভবতি . ধ্যাত্বা
মধ্যস্থমাত্মানং কলশান্তরদীপবত্ .
অঙ্গুষ্ঠমাত্রমাত্মানমধূমজ্যোতিরূপকম্ .. ১..
প্রকাশযন্তমন্তঃস্থং ধ্যাযেত্কূটস্থমব্যযম্ .
ধ্যাযন্নাস্তে মুনিশ্চৈব চাসুপ্তেরামৃতেস্তু যঃ .. ২..
জীবন্মুক্তঃ স বিজ্ঞেযঃ স ধন্যঃ কৃতকৃত্যবান্ .
জীবন্মুক্তপদং ত্যক্ত্বা স্বদেহে কালসাত্কৃতে .
বিশত্যদেহমুক্তত্বং পবনোঽস্পন্দতামিব .. ৩..
অশব্দমস্পর্শমরূপমব্যযং
      তথা রসং নিত্যমগন্ধবচ্চ যত্ .
অনাদ্যনন্তং মহতঃ পরং ধ্রুবং
      তদেব শিষ্যত্যমলং নিরামযম্ .. ৪.. ইতি .. ইতি
তৃতীযোঽধ্যাযঃ .. ৩..

অথ হৈনং পৈঙ্গলঃ প্রপচ্ছ যাজ্ঞবল্ক্যং জ্ঞানিনঃ কিং
কর্ম কা চ স্থিতিরিতি . স হোবাচ যাজ্ঞবল্ক্যঃ .
অমানিত্বাদিসম্পন্নো মুমুক্ষুরেকবিংশতিকুলং তারযতি .
ব্রহ্মবিন্মাত্রেণ কুলমেকোত্তরশতং তারযতি .
আত্মানং রথিনং বিদ্ধি শরীরং রথমেব চ . বুদ্ধিং তু
সারথিং বিদ্ধি মনঃ প্রগ্রহমেব চ .. ১..
ইন্দ্রিযাণি হযানাহুর্বিষযাংস্তেষু গোচরান্ . জঙ্গমানি
বিমানানি হৃদযানি মনীষিণঃ .. ২..
আত্মেন্দ্রিযমনোযুক্তং ভোক্তেত্যাহুর্মহর্ষযঃ . ততো নারাযণঃ
সাক্ষাদ্ধৃদযে সুপ্রতিষ্ঠিতঃ .. ৩..
প্রারব্ধকর্মপর্যন্তমহিনির্মোকবদ্ব্যবহরতি .
চন্দ্রবচ্চরতে দেহী স মুক্তশ্চানিকেতনঃ .. ৪..
তীর্থে শ্বপচগৃহে বা তনুং বিহায যাতি কৈবল্যম্ .
প্রাণানবকীর্য যাতি কৈবল্যম্ ..
তং পশ্চাদ্দিগ্বলিং কুর্যাদথবা খননং চরেত্ . পুংসঃ
প্রব্রজনং প্রোক্তং নেতরায কদাচন .. ৫..
নাশৌচং নাগ্নিকার্যং চ ন পিণ্ডং নোদকক্রিযা . ন
কুর্যাত্পার্বণাদীনি ব্রহ্মভূতায ভিক্ষবে .. ৬..
দগ্ধস্য দহনং নাস্তি পক্বস্য পচনং যথা .
জ্ঞানাগ্নিদগ্ধদেহস্য ন চ শ্রাদ্ধং ন চ ক্রিযা .. ৭..
যাবচ্চোপাধিপর্যন্তং তাবচ্ছুশ্রূষযেদ্গুরুম্ .
গুরুবদ্গুরুভার্যাযাং তত্পুত্রেষু চ বর্তনম্ .. ৮..
শুদ্ধমানসঃ শুদ্ধচিদ্রূপঃ সহিষ্ণুঃ সোঽহমস্মি সহিষ্ণুঃ
সোঽহমস্মীতি প্রাপ্তে জ্ঞানেন বিজ্ঞানে জ্ঞেযে পরমাত্মনি হৃদি
সংস্থিতে দেহে লব্ধশান্তিপদং গতে তদা
প্রভামনোবুদ্ধিশূন্যং ভবতি . অমৃতেন তৃপ্তস্য পযসা কিং
প্রযোজনম্ . এবং স্বাত্মানং জ্ঞাত্বা বেদৈঃ প্রযোজনং কিং
ভবতি . জ্ঞানামৃততৃপ্তযোগিনো ন কিঞ্চিত্কর্তব্যমস্তি
তদস্তি চেন্ন স তত্ত্ববিদ্ভবতি . দূরস্থোঽপি ন দূরস্থঃ
পিণ্ডবর্জিতঃ পিণ্ডস্থোঽপি প্রত্যগাত্মা সর্বব্যাপী ভবতি .
হৃদযং নির্মলং কৃত্বা চিন্তযিত্বাপ্যনামযম্ . অহমেব
পরং সর্বমিতি পশ্যেত্পরং সুখম্ .. ৯..
যথা জলে জলং ক্ষিপ্তং ক্ষীরে ক্ষীরং ঘৃতে ঘৃতম্ .
অবিশেষো ভবেত্ত্দ্বজ্জিবাত্মপরমাত্মনোঃ .. ১০..
দেহে জ্ঞানেন দীপিতে বুদ্ধিরখণ্ডাকাররূপা যদা ভবতি
তদা বিদ্বান্ব্রহ্মজ্ঞানাগ্নিনা কর্মবন্ধং নির্দহেত্ . ততঃ
পবিত্রং পরমেশ্বরাখ্যমদ্বৈতরূপং বিমলাম্বরাভম্ .
যথোদকে তোযমনুপ্রবিষ্টং তথাত্মরূপো নিরুপাধিসংস্থিতঃ
.. ১১..
আকাশবত্সূক্ষ্মশরীর আত্মা ন দৃশ্যতে বাযুবদন্তরাত্মা .
স বাহ্যমভ্যন্তরনিশ্চলাত্মা জ্ঞানোল্কযাপশ্যতি
চান্তরাত্মা .. ১২..
যত্রযত্র মৃতো জ্ঞানী যেন বা কেন মৃত্যুনা . যথা
সর্বগতং ব্যোম তত্রতত্র লযং গতঃ .. ১৩..
ঘটাকাশমিবাত্মানং বিলযং বেত্তি তত্ত্বতঃ . স গচ্ছতি
নিরালম্বং জ্ঞানালোকং সমন্ততঃ .. ১৪..
তপেদ্বর্ষসহস্রাণি একপাদস্থিতো নরঃ . এতস্য ধ্যানযোগস্য
কলাং নার্হতি ষোডশীম্ .. ১৫..
ইদং জ্ঞানমিদং জ্ঞেযং তত্সর্বং জ্ঞাতুমিচ্ছতি .  . অপি
বর্ষসহস্রাযুঃ শাস্ত্রান্তং নাধিগচ্ছতি .. ১৬..
বিজ্ঞেযোঽক্ষরতন্মাত্রো জীবিতং বাপি চঞ্চলম্ . বিহায
শাস্ত্রজালানি যত্সত্যং তদুপাসতাম্ .. ১৭..
অনন্তকর্মশৌচং চ জপো যজ্ঞস্তথৈব চ .
তীর্থযাত্রাভিগমনং যাবত্তত্ত্বং ন বিন্দতি .. ১৮..
অহং ব্রহ্মেতি নিযতং মোক্ষহেতুর্মহাত্মনাম্ . দ্বে পদে
বন্ধমোক্ষায ন মমেতি মমেতি চ .. ১৯..
মমেতি বধ্যতে জন্তুর্নির্মমেতি বিমুচ্যতে . মনসো হ্যুন্মনী ভাবে
দ্বৈতং নৈবোপলভ্যতে .. ২০..
যদা যাত্যুন্মনীভাবস্তদা তত্পরমং পদম্ . যত্রযত্র মনো
যাতি তত্রতত্র পরং পদম্ .. ২১..
তত্রতত্র পরং ব্রহ্ম সর্বত্র সমবস্থিতম্ .
হন্যান্মুষ্টিভিরাকাশং ক্ষুধার্তঃ খণ্ডযেত্তুষম্ .. ২২..
নাহং ব্রহ্মেতি জানাতি তস্য মুক্তির্ন জাযতে . য
এতদুপনিষদং নিত্যমধীতে সোঽগ্নিপূতো ভবতি . স বাযুপূতো
ভবতি . স আদিত্যপূতো ভবতি . স ব্রহ্মপূতো ভবতি . স
বিষ্ণুপূতো ভবতি . স রুদ্রপূতো ভবতি . স সর্বেষু
তীর্থেষু স্নাতো ভবতি . স সর্বেষু বেদেষ্বধীতো ভবতি .
স সর্ববেদব্রতচর্যাসু চরিতো ভবতি . তেনেতিহাসপুরাণানাং
রুদ্রাণাং শতসহস্রাণি জপ্তানি ফলানি ভবন্তি .
প্রণবানামযুতং জপ্তং ভবতি . দশ
পূর্বান্দশোত্তরান্পুনাতি . স পঙ্ক্তিপাবনো ভবতি . স
মহান্ভবতি .
ব্রহ্মহত্যাসুরাপানস্বর্ণস্তেযগুরুতল্পগমনতত্সংযোগিপাতকেভ্য
ঃ পূতো ভবতি . তদ্বিষ্ণোঃ পরমং পদং সদা পশ্যন্তি সূরযঃ
. দিবীব চক্ষুরাততম্ .. তদ্বিপ্রাসো বিপন্যবো জাগৃবাংসঃ
সমিন্ধতে . বিষ্ণোর্যত্পরমং পদম্ .. ॐ সত্যমিত্যুপনিষত্
..
ॐ পূর্ণামদ ইতি শান্তিঃ ..

ইতি পৈঙ্গলোপনিষ্ত্সমাপ্তা ..