শুক-রহস্য

.. শুকরহস্যোপনিষত্ ..

প্রজ্ঞানাদিমহাবাক্যরহস্যাদিকলেবরম্ .
বিকলেবরকৈবল্যং ত্রিপাদ্রামমহং ভজে ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
অথাতো রহস্যোপনিষদং ব্যাখ্যাস্যামো দেবর্ষযো
ব্রহ্মাণং সম্পূজ্য প্রণিপত্য পপ্রচ্ছুর্ভগবন্নস্মাকং
রহস্যোপনিষদং ব্রূহীতি . সোঽব্রবীত্ .
পুরা ব্যাসো মহাতেজাঃ সর্ববেদতপোনিধিঃ .
প্রণিপত্য শিবং সাম্বং কৃতাঞ্জলিরুবাচ হ .. ১..
শ্রীবেদব্যাস উবাচ .
দেবদেব মহাপ্রাজ্ঞ পাশচ্ছেদদৃঢব্রত .
শুকস্য মম পুত্রস্য বেদসংস্কারকর্মণি .. ২..
ব্রহ্মোপদেশকালোঽযমিদানীং সমুপস্থিতঃ .
ব্রহ্মোপদেশঃ কর্তব্যো ভবতাদ্য জগদ্গুরো .. ৩..
ঈশ্বর উবাচ .
মযোপদিষ্টে কৈবল্যে সাক্ষাদ্ব্রহ্মণি শাশ্বতে .
বিহায পুত্রো নির্বেদাত্প্রকাশং যাস্যতি স্বযম্ .. ৪..
শ্রীবেদব্যাস উবাচ .
যথা তথা বা ভবতু হ্যুপনাযনকর্মণি .
উপদিষ্টে মম সুতে ব্রহ্মণি ত্বত্প্রসাদতঃ .. ৫..
সর্বজ্ঞো ভবতু ক্ষিপ্রং মম পুত্রো মহেশ্বর .
তব প্রসাদসম্পন্নো লভেন্মুক্তিং চতুর্বিধাম্ .. ৬..
তচ্ছৃত্বা ব্যাসবচনং সর্বদেবর্ষিসংসদি .
উপদেষ্টুং স্থিতঃ শম্ভুঃ সাম্বো দিব্যাসনে মুদা .. ৭..
কৃতকৃত্যঃ শুকস্তত্র সমাগত্য সুভক্তিমান্ .
তস্মাত্স প্রণবং লব্ধ্বা পুনরিত্যব্রবীচ্ছিবম্ .. ৮..
শ্রীশুক উবাচ .
দেবাদিদেব সর্বজ্ঞ সচ্চিদানন্দ লক্ষণ .
উমারমণ ভূতেশ প্রসীদ করুণানিধে .. ৯..
উপদিষ্টং পরব্রহ্ম প্রণবান্তর্গতং পরম্ .
তত্ত্বমস্যাদিবাক্যানাং প্রজ্ঞাদীনাং বিশেষতঃ .. ১০..
শ্রোতুমিচ্ছামি তত্ত্বেন ষডঙ্গানি যথাক্রমম্ .
বক্তব্যানি রহস্যানি কৃপযাদ্য সদাশিব .. ১১..
শ্রীসদাশিব উবাচ .
সাধু সাধু মহাপ্রাজ্ঞ শুক জ্ঞাননিধে মুনে .
প্রষ্টব্যং তু ত্বযা পৃষ্টং রহস্যং বেদগর্ভিতম্ .. ১২..
রহস্যোপনিষন্নাম্না সষডঙ্গমিহোচ্যতে .
যস্য বিজ্ঞানমাত্রেণ মোক্ষঃ সাক্ষান্ন সংশযঃ .. ১৩..
অঙ্গহীনানি বাক্যানি গুরুর্নোপদিশেত্পুনঃ .
সষডঙ্গান্যুপদিশেন্মহাবাক্যানি কৃত্স্নশঃ .. ১৪..
চতুর্ণামপি বেদানাং যথোপনিষদঃ শিরঃ .
ইযং রহস্যোপনিষত্তথোপনিষদাং শিরঃ .. ১৫..
রহস্যোপনিষদ্ব্রহ্ম ধ্যাতং যেন বিপশ্চিতা .
তীর্থৈর্মন্ত্রৈঃ শ্রুতৈর্জপ্যৈস্তস্য কিং পুণ্যহেতুভিঃ .. ১৬..
বাক্যার্থস্য বিচারেণ যদাপ্নোতি শরচ্ছতম্ .
একবারজপেনৈব ঋষ্যাদিধ্যানতশ্চ যত্ .. ১৭..
ॐ অস্য শ্রীমহাবাক্যমহামন্ত্রস্য হংস ঋষিঃ .
অব্যক্তগাযত্রী ছন্দঃ . পরমহংসো দেবতা .
হং বীজম্ . সঃ শক্তিঃ . সোঽহং কীলকম্ .
মম পরমহংসপ্রীত্যর্থে মহাবাক্যজপে বিনিযোগঃ .
সত্যং জ্ঞানমনন্তং ব্রহ্ম অঙ্গুষ্ঠাভ্যাং নমঃ .
নিত্যানন্দো ব্রহ্ম তর্জনীভ্যাং স্বাহা .
নিত্যানন্দমযং ব্রহ্ম মধ্যমাভ্যাং বষট্ .
যো বৈ ভূমা অনামিকাভ্যাং হুম্ .
যো বৈ ভূমাদিপতিঃ কনিষ্ঠিকাভ্যাং বৌষট্ .
একমেবাদ্বিতীযং ব্রহ্ম করতলকরপৃষ্ঠাভ্যাং ফট্ ..
সত্যং জ্ঞানমনন্তং ব্রহ্ম হৃদযায নমঃ .
নিত্যানন্দো ব্রহ্ম শিরসে স্বাহা .
নিত্যানন্দমযং ব্রহ্ম শিখাযৈ বষট্ .
যো বৈ ভূমা কবচায হুম্ .
যো বৈ ভূমাধিপতিঃ নেত্রত্রযায বৌষট্ .
একমেবাদ্বিতীযং ব্রহ্ম অস্ত্রায ফট্ .
ভূর্ভুবঃসুবরোমিতি দিগ্বন্ধঃ .
ধ্যানম্ .
নিত্যানন্দং পরমসুখদং কেবলং জ্ঞানমূর্তিং
বিশ্বাতীতং গগনসদৃশং তত্ত্বমস্যাদিলক্ষ্যম্ ..
একং নিত্যং বিমলমচলং সর্বধীসাক্ষিভূতং
ভাবাতীতং ত্রিগুণরহিতং সদ্গুরুং তং নমামি .. ১..
অথ মহাবাক্যানি চত্বারি . যথা .
ॐ প্রজ্ঞানং ব্রহ্ম .. ১..
ॐ অহং ব্রহ্মাস্মি .. ২..
ॐ তত্ত্বমসি .. ৩..
ॐ অযমাত্মা ব্রহ্ম .. ৪..
তত্ত্বমসীত্যভেদবাচকমিদং যে জপন্তি
তে শিবস্সাযুজ্যমুক্তিভাজো ভবন্তি ..
তত্পদমহাম্ন্ত্রস্য . পরমহংসঃ ঋষিঃ .
অব্যক্তগাযত্রী ছন্দঃ . পরমহংসো দেবতা .
হং বীজম্ . সঃ শক্তিঃ . সোঽহং কীলকম্ .
মম সাযুজ্যমুক্ত্যর্থে জপে বিনিযোগঃ .
তত্পুরুষায অঙ্গুষ্ঠাভ্যাং নমঃ .
ঈশানায তর্জনীভ্যাং স্বাহা .
অঘোরায মধ্যমাভ্যাং বষট্
সদ্যোজাতায অনামিকাভ্যাং হুম্ .
বামদেবায কনিষ্ঠিকাভ্যাং বৌষট্ .
তত্পুরুষেশানাঘোরসদ্যোজাতবামদেবেভ্যো
নমঃ করতলকরপৃষ্ঠাভ্যাং ফট্ .
এবং হৃদযাদিন্যাসঃ .
ভূর্ভুবঃসুবরোমিতি দিগ্বন্ধঃ ..
ধ্যানম্ .
জ্ঞানং জ্ঞেযং জ্ঞানগম্যাদিতীতং
শুদ্ধং বুদ্ধং মুক্তমপ্যব্যযং চ .
সত্যং জ্ঞানং সচ্চিদানন্দরূপং
ধ্যাযেদেবং তন্মহোভ্রাজমানম্ ..
ত্বংপদ মহামন্ত্রস্য বিষ্ণুরৃষিঃ .
গাযত্রী ছন্দঃ . পরমাত্মা দেবতা .
ঐং বীজম্ . ক্লীং শক্তিঃ . সৌঃ কীলকম্ .
মম মুক্ত্যর্থে জপে বিনিযোগঃ .
বাসুদেবায অঙ্গুষ্ঠাভ্যাং নমঃ .
সঙ্কর্ষণায তর্জনীভ্যাং স্বাহা .
প্রদ্যুম্নায মধ্যমাভ্যাং বষট্ .
অনিরুদ্ধায অনামিকাভ্যাং হুম্ .
বাসুদেবায কনিষ্ঠিকাভ্যাং বৌষট্ .
বাসুদেবসঙ্কর্ষণপ্রদ্যুম্নানিরুদ্ধেভ্যঃ
করতলকরপৃষ্ঠাভ্যাং ফট্ .
এবং হৃদযাদিন্যাসঃ .
ভূর্ভুবঃসুবরোমিতি দিগ্বন্ধঃ ..
ধ্যানম্ ..
জীবত্বং সর্বভূতানাং সর্বত্রাখণ্ডবিগ্রহম্ .
চিত্তাহঙ্কারযন্তারং জীবাখ্যং ত্বংপদং ভজে .
অসিপদমহামন্ত্রস্য মন ঋষিঃ .
গাযত্রী ছন্দঃ . অর্ধনারীশ্বরো দেবতা .
অব্যক্তাদির্বীজম্ . নৃসিংহঃ শক্তিঃ .
পরমাত্মা কীলকম্ . জীবব্রহ্মৈক্যার্থে জপে বিনিযোগঃ .
পৃথ্বীদ্ব্যণুকায অঙ্গুষ্ঠাভ্যাং নমঃ .
অব্দ্ব্যণুকায তর্জনীভ্যাং স্বাহা .
তেজোদ্ব্যণুকায মধ্যমাভ্যাং বষট্ .
বাযুদ্ব্যণুকায অনামিকাভ্যং হুম্ .
আকাশদ্ব্যণুকায কনিষ্ঠিকাভ্যাং বৌষট্ .
পৃথিব্যপ্তেজোবায্বাকাশদ্ব্যণুকেভ্যঃ
করতলকরপৃষ্ঠাভ্যাং ফট্ .
ভূর্ভুবঃসুবরোমিতি দিগ্বন্ধঃ ..
ধ্যানম্ ..
জীবো ব্রহ্মেতি বাক্যার্থং যাবদস্তি মনঃস্থিতিঃ .
ঐক্যং তত্ত্বং লযে কুর্বন্ধ্যাযেদসিপদং সদা ..
এবং মহাবাক্যষডঙ্গান্যুক্তানি ..
অথ রহস্যোপনিষদ্বিভাগশো বাক্যার্থশ্লোকাঃ প্রোচ্যন্তে ..
যেনেক্ষতে শৃণোতীদং জিঘ্রতি ব্যাকরোতি চ .
স্বাদ্বস্বাদু বিজানাতি তত্প্রজ্ঞানমুদীরিতম্ .. ১..
চতুর্মুখেন্দ্রদেবেষু মনুষ্যাশ্বগবাদিষু .
চৈতন্যমেকং ব্রহ্মাতঃ প্রজ্ঞানং ব্রহ্ম ময্যপি .. ২..
পরিপূর্ণঃ পরাত্মাস্মিন্দেহে বিদ্যাধিকারিণি .
বুদ্ধেঃ সাক্ষিতযা স্থিত্বা স্ফুরন্নহমিতীর্যতে .. ৩..
স্বতঃ পূর্ণঃ পরাত্মাত্র ব্রহ্মশব্দেন বর্ণিতঃ .
অস্মীত্যৈক্যপরামর্শস্তেন ব্রহ্ম ভবাম্যহম্ .. ৪..
একমেবাদ্বিতীযং সন্নামরূপবিবর্জিতম্ .
সৃষ্টেঃ পুরাধুনাপ্যস্য তাদৃক্ত্বং তদিতীর্যতে .. ৫..
শ্রোতুর্দেহেন্দ্রিযাতীতং বস্ত্বত্র ত্বংপদেরিতম্ .
একতা গ্রাহ্যতেঽসীতি তদৈক্যমনুভূযতাম্ .. ৬..
স্বপ্রকাশাপরোক্ষত্বমযমিত্যুক্তিতো মতম্ .
অহঙ্কারাদিদেহান্তং প্রত্যগাত্মেতি গীযতে .. ৭..
দৃশ্যমানস্য সর্বস্য জগতস্তত্ত্বমীর্যতে .
ব্রহ্মশব্দেন তদ্ব্রহ্ম স্বপ্রকাশাত্মরূপকম্ .. ৮..
অনাত্মদৃষ্টেরবিবেকনিদ্রা-
মহং মম স্বপ্নগতিং গতোঽহম্ .
স্বরূপসূর্যেঽভ্যুদিতে স্ফুটোক্তে-
র্গুরোর্মহাবাক্যপদৈঃ প্রবুদ্ধঃ .. ৯..
বাচ্যং লক্ষ্যমিতি দ্বিধার্থসরণীবাচ্যস্য হি ত্বংপদে
বাচ্যং ভৌতিকমিন্দ্রিযাদিরপি যল্লক্ষ্যং ত্বমর্থশ্চ সঃ .
বাচ্যং তত্পদমীশতাকৃতমতির্লক্ষ্যং তু সচ্চিত্সুখা-
নন্দব্রহ্মতদর্থ এষ চ তযোরৈক্যং ত্বসীদং পদম্ .. ১০..
ত্বমিতি তদিতি কার্যে কারণে সত্যুপাধৌ
দ্বিতযমিতরথৈকং সচ্চিদানন্দরূপম্ .
উভযবচনহেতু দেশকালৌ চ হিত্বা
জগতি ভবতি সোযং দেবদত্তো যথৈকঃ .. ১১..
কার্যোপাদিরযং জীবঃ কারণোপাদিরীশ্বরঃ .
কার্যকারণতাং হিত্বা পূর্ণবোধোঽবশিষ্যতে .. ১২..
শ্রবণং তু গুরোঃ পূর্বং মননং তদনন্তরম্ .
নিদিধ্যাসনমিত্যেতত্পূর্ণবোধস্য কারণম্ .. ১৩..
অন্যবিদ্যাপরিজ্ঞানমবশ্যং নশ্বরং ভবেত্ .
ব্রহ্মবিদ্যাপরিজ্ঞানং ব্রহ্মপ্রাপ্তিকরং স্থিতম্ .. ১৪..
মহাবাক্যান্যুপদিশেত্সষডঙ্গানি দেশিকঃ .
কেবলং ন হি বাক্যানি ব্রহ্মণো বচনং যথা , , ১৫..
ঈশ্বর উবাচ .
এবমুক্ত্বা মুনিশ্রেষ্ঠ রহস্যোপনিষচ্ছুক .
মযা পিত্রানুনীতেন ব্যাসেন ব্রহ্মবাদিনা .. ১৬..
ততো ব্রহ্মোপদিষ্টং বৈ সচ্চিদানন্দলক্ষণম্ .
জীবন্মুক্তঃ সদা ধ্যাযন্নিত্যস্ত্বং বিহরিষ্যসি .. ১৭..
যো বেদাদৌ স্বরঃ প্রোক্তো বেদান্তে চ প্রতিষ্ঠিতঃ .
তস্য প্রকৃতিলীনস্য যঃ পরঃ স মহেশ্বরঃ .. ১৮..
উপদিষ্টঃ শিবেনেতি জগত্তন্মযতাং গতঃ .
উত্থায প্রণিপত্যেশং ত্যক্তাশেষরিগ্রহঃ .. ১৯..
পরব্রহ্মপযোরাশৌ প্লবন্নিব যযৌ তদা .
প্রব্রজন্তং তমালোক্য কৃষ্ণদ্বৈপাযনো মুনিঃ .. ২০..
অনুব্রজন্নাজুহাব পুত্রবিশ্লেষকাতরঃ .
প্রতিনেদুস্তদা সর্বে জগত্স্থাবরজঙ্গমাঃ .. ২১..
তচ্ছৃত্বা সকলাকারং ব্যাসঃ সত্যবতীসুতঃ .
পুত্রেণ সহিতঃ প্রীত্যা পরানন্দমুপেযিবান্ .. ২২..
যো রহস্যোপনিষদমধীতে গুর্বনুগ্রহাত্ .
সর্বপাপবিনির্মুক্তঃ সাক্ষাত্কৈবল্যমশ্নুতে
সাক্ষাত্কৈবল্যমশ্নুত ইত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
.. ইতি শুকরহস্যোপনিষত্সমাপ্তা ..