দেবী উপনিষত্

.. দেবী উপনিষত্ ..
 .. অথ দেব্যুপনিষত্ ..
 অথর্ববেদীয শাক্তোপনিষত্ ..

শ্রীদেব্যুপনিষদ্বিদ্যাবেদ্যাপারসুখাকৃতি .
ত্রৈপদং ব্রহ্মচৈতন্যং রামচন্দ্রপদং ভজে ..

ॐ ভদ্রং কর্ণেভিঃ শৃণুযাম দেবাঃ
              ভদ্রং পশ্যেমাক্ষভির্যজত্রাঃ .
        স্থিরৈরঙ্গৈস্তুষ্টুবাঁসস্তনূভি-
              ব্যর্শেম দেবহিতং যদাযুঃ ..
        স্বস্তি ন ইন্দ্রো বৃদ্ধশ্রবাঃ
              স্বস্তি নঃ পূষা বিশ্ববেদাঃ .
        স্বস্তি নস্তার্ক্ষ্যো অরিষ্টনেমিঃ
               স্বস্তি নো বৃহস্পতির্দধ্হাতু ..
ॐ শান্তিঃ শান্তিঃ শান্তিঃ ..
হরিঃ ॐ .. সর্বে বৈ দেবা দেবীমুপতস্থুঃ . কাসি ত্বং মহাদেবি .
সাব্রবীদহং ব্রহ্মস্বরূপিণী . মত্তঃ প্রকৃতিপুরুষাত্মকং
জগচ্ছূন্যং চাশূন্যং চ .
অহমানন্দানানন্দাঃ বিজ্ঞানাবিজ্ঞানে অহম্ . ব্রহ্মা ব্রহ্মণি
বেদিতব্যে .
ইত্যাহাথর্বণি শ্রুতিঃ .. ১..
অহং পঞ্চভূতান্যভূতানি . অহমখিলং জগত্ .
বেদোঽহমবেদোঽহম্ . বিদ্যাহমবিদ্যাহম্ . অজাহমনজাহম্ .
অধশ্চোর্ধ্বং চ তির্যক্চাহম্ .
অহং রুদ্রেভির্বসুভিশ্চরাম্যহমাদিত্যৈরুত বিশ্বদেবৈঃ . অহং
মিত্রাবরুণাবুভৌ বিভর্ম্যহমিন্দ্রাগ্নী
অহমশ্বিনাবুভৌ . অহং সোমং ত্বষ্টারং পূষণং ভগং
দধাম্যহম্ .
বিষ্ণুমুরুক্রমং ব্রহ্মাণমুত প্রজাপতিং দধামি . অহং
দধামি দ্রবিণং হবিষ্মতে সুপ্রাব্যে ৩ যজমানায সুন্বতে .. ২..
অহং রাষ্ট্রী সঙ্গমনী বসূনামহং সুবে পিতরমস্য
মূর্ধন্মম যোনিরপ্স্বন্তঃ সমুদ্রে . য এবং বেদ স
দেবীপদমাপ্নোতি . তে দেবা অব্রুবন্ . নমো দেব্যৈ মহাদেব্যৈ
সততং নমঃ . নমঃ প্রকৃত্যৈ ভদ্রাযৈ নিযতাঃ প্রণতাঃ স্ম
তাম্ .. ৩..
তামগ্নিবর্ণাং তপসা জ্বলন্তীং বৈরোচনীং কর্মফলেষু
জুষ্টাম্ . দুর্গাং দেবীং শরণমহং প্রপদ্যে
সুতরাং নাশযতে তমঃ .. ৪..
দেবীং বাচমজনযন্ত দেবাস্তাং বিশ্বরূপাঃ পশবো বদন্তি
. সা নো মন্দ্রেশমূর্জং দুহানা ধেনুর্বাগস্মানুপসুষ্টুতৈতু
.. ৫..
কালরাত্রিং ব্রহ্মস্তুতাং বৈষ্ণবীং স্কন্দমাতরম্ .
সরস্বতীমদিতিং দক্ষদুহিতরং নমামঃ
পাবনাং শিবাম্ .. ৬..
মহালক্ষ্মীশ্চ বিদ্মহে সর্বসিদ্ধিশ্চ ধীমহি . তন্নো দেবী
প্রচোদযাত্ .. ৭..
অদিতির্হ্যজনিষ্ট দক্ষ যা দুহিতা তব . তাং দেবা
অন্বজাযন্ত ভদ্রা অমৃতবন্ধবঃ .. ৮..
কামো যোনিঃ কামকলা বজ্রপাণির্গুহা হসা .
মাতরিশ্বাভ্রমিন্দ্রঃ পুনর্গুহা সকলা মাযযা চ
পুনঃ কোশা বিশ্বমাতা দিবি দ্যোম্ .. ৯..
এষাত্মশক্তিঃ . এষা বিশ্বমোহিনী
পাশাঙ্কুশধনুর্বাণধরা . এষা শ্রীমহাবিদ্যা .
য এবং বেদ স শোকং তরতি . নমস্তে অস্তু ভগবতি ভবতি
মাতরস্মান্পাতু সর্বতঃ .
সৈষাষ্টৌ বসবঃ . সৈষৈকাদশ রুদ্রাঃ . সৈষা
দ্বাদশাদিত্যাঃ . সৈষা বিশ্বেদেবাঃ
সোমপা অসোমপাশ্চ . সৈষা যাতুধানু অসুরা রক্ষাংসি
পিশাচযক্ষাঃ সিদ্ধাঃ .
সৈষা সত্ত্বরজস্তমাংসি . সৈষা প্রজাপতীন্দ্রমনবঃ .
সৈষা গ্রহা নক্ষত্রজ্যোতীংষি
কলাকাষ্ঠাদিকালরূপিণী . তামহং প্রণৌমি নিত্যম্ .
তাপাপহারিণীং দেবীং ভুক্তিমুক্তিপ্রদাযিনীম্ .
অনন্তাং বিজযাং শুদ্ধাং শরণ্যাং শিবদাং শিবাম্ ..
১০..
বিযদাকারসংযুক্তং বীতিহোত্রসমন্বিতম্ . অর্ধেন্দুলসিতং
দেব্যা বীজং সর্বার্থসাধকম্ .. ১১..
এবমেকাক্ষরং মন্ত্রং যতযঃ শুদ্ধচেতসঃ . ধ্যাযন্তি
পরমানন্দমযা জ্ঞানাম্বুরাশযঃ .. ১২..
বাঙ্মযা ব্রহ্মভূতস্মাত্ষষ্ঠং বক্ত্রসমন্বিতম্ . সূর্যো
বামশ্রোত্রবিন্দুঃ সংযুতাষ্টকতৃতীযকঃ .. ১৩..
নারাযণেন সংযুক্তো বাযুশ্চাধরসংযুতঃ . বিচ্চে
নবার্ণকোঽর্ণঃ স্যান্মহদানন্দদাযকঃ .. ১৪..
হৃত্পুণ্ডরীকমধ্যস্থাং প্রাতঃসূর্যসমপ্রভাম্ .
পাশাঙ্কুশধরাং সৌম্যাং বরদাভযহস্তকাম্ .
ত্রিনেত্রাং রক্তবসনাং ভক্তকামদুঘাং ভজে .. ১৫..
নমামি ত্বামহং দেবীং মহাভযবিনাশিনীম্ .
মহাদুর্গপ্রশমনীং মহাকারুণ্যরূপিণীম্ .. ১৬..
যস্যাঃ স্বরূপং ব্রহ্মাদযো ন জানন্তি তস্মাদুচ্যতেঽজ্ঞেযা .
যস্যা অন্তো ন বিদ্যতে তস্মাদুচ্যতে অনন্তা .
যস্যা গ্রহণং নোপলভ্যতে তস্মাদুচ্যতেঽলক্ষ্যা . যস্যা
জননং নোপলভ্যতে তস্মাদুচ্যতেঽজা .
একৈব সর্বত্র বর্ততে তস্মাদুচ্যত একা . একৈব বিশ্বরূপিণী
তস্মাদুচ্যতে নৈকা ঽত এবোচ্যতেঽজ্ঞেযানন্তালক্ষ্যাজৈকা
নৈকেতি .
মন্ত্রাণাং মাতৃকা দেবী শব্দানাং জ্ঞানরূপিণী .
জ্ঞানানাং চিন্মযাতীতা শূন্যানাং শূন্যসাক্ষিণী .. ১৭..
যস্যাঃ পরতরং নাস্তি সৈষা দুর্গা প্রকীর্তিতা .
[দুর্গাত্সংত্রাযতে যস্মাদ্দেবী দুর্গেতি কথ্যতে .. ১৮..
প্রপদ্যে শরণং দেবীং দুংদুর্গে দুরিতং হর ..]
তাং দুর্গাং দুর্গমাং দেবীং দুরাচারবিঘাতিনীম্ .
নমামি ভবভীতোঽহং সংসারার্ণবতারিণীম্ .. ১৯..
ইদমথর্বশীর্ষং যোঽধীতে
পঞ্চাথর্বশীর্ষজপফলমবাপ্নোতি .
ইদমথর্বশীর্ষং জ্ঞাত্বা যোঽর্চাং স্থাপযতি .
শতলক্ষং প্রজপ্ত্বাপি সোঽর্চাসিদ্ধিং চ বিন্দতি .
শতমষ্টোত্তরং চাস্যাঃ পুরশ্চর্যাবিধিঃ স্মৃতঃ .. ২০..
দশবারং পঠেদ্যস্তু সদ্যঃ পাপৈঃ প্রমুচ্যতে . মহাদুর্গাণি
তরতি মহাদেব্যাঃ প্রসাদতঃ .. ২১..
প্রাতরধীযানো রাত্রিকৃতং পাপং নাশযতি .
সাযমধীযানো দিবসকৃতং পাপং নাশযতি .
তত্সাযং প্রাতঃ প্রযুঞ্জানঃ পাপোঽপাপো ভবতি . নিশীথে
তুরীযসন্ধ্যাযাং জপ্ত্বা বাক্সিদ্ধির্ভবতি .
নূতনপ্রতিমাযাং জপ্ত্বা দেবতাসাংনিধ্যং ভবতি .
প্রাণপ্রতিষ্ঠাযাং জপ্ত্বা প্রাণানাং প্রতিষ্ঠা ভবতি .
ভৌমাশ্বিন্যাং মহাদেবী সংনিধৌ জপ্ত্বা মহামৃত্যুং তরতি
. য এবং বেদেত্যুপনিষত্ .. ২২..

ॐ ভদ্রং কর্ণেভিঃ শৃণুযাম দেবা
              ভদ্রং পশ্যেমাক্ষভির্যজত্রাঃ .
        স্থিরৈরঙ্গৈস্তুষ্টুবাঁসস্তনূভি-
              র্ব্যশেম দেবহিতং যদাযুঃ ..
        স্বস্তি ন ইন্দ্রো বৃদ্ধশ্রবাঃ
              স্বস্তি নঃ পূষা বিশ্ববেদাঃ .
        স্বস্তি নস্তার্ক্ষ্যো অরিষ্টনেমিঃ
              স্বস্তি নো বৃহস্পতির্দধাতু ..
ॐ  শান্তিঃ  শান্তিঃ  শান্তিঃ ..
.. ইতি শ্রীদেব্যুপনিষত্সমাপ্তা ..