মণ্ডলব্রাহ্মণ

.. মণ্ডলব্রাহ্মণোপনিষত্ ..

বাহ্যান্তস্তারকাকরং ব্যোমপঞ্চকবিগ্রহম্ .
রাজযোগৈকসংসিদ্ধং রামচন্দ্রমুপাস্মহে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ॐ যাজ্ঞবল্ক্যো হ বৈ মহামুনিরাদিত্যলোকং জগাম .
তমাদিত্যং নত্বা ভো ভগবন্নাদিত্যাত্মতত্ত্বমনুব্রূহীতি .
সহোবাচ নারাযণঃ .
জ্ঞানযুক্তযমাদ্যষ্টাঙ্গযোগ উচ্যতে .
শীতোষ্ণাহারনিদ্রাবিজযঃ সর্বদা শান্তির্নিশ্চলত্বং
বিষযেন্দ্রিযনিগ্রহশ্চৈতে যমাঃ .
গুরুভক্তিঃ সত্যমার্গানুরক্তিঃ সুখাগতবস্ত্বনুভবশ্চ
তদ্বস্ত্বনুভবেন তুষ্টির্নিঃসঙ্গতা একান্তবাসো মনোনিবৃত্তিঃ
ফলানভিলাষো বৈরাগ্যভাবশ্চ নিযমাঃ .
সুখাসনবৃত্তিশ্চীরবাসাশ্চৈবমাসননিযমো ভবতি .
পূরককুম্ভকরেচকৈঃ ষোডশচতুষ্ষষ্টি-
দ্বাত্রিঽন্শত্সঙ্খ্যযা যথাক্রমং প্রাণাযামঃ .
বিষযেভ্য ইন্দ্রিযার্থেভ্যো মনোনিরোধনং প্রত্যাহারঃ .
সর্বশরীরেষু চৈতন্যৈকতানতা ধ্যানম্ .
বিষযব্যাবর্তনপূর্বকং চৈতন্যে চেতঃস্থাপনং
ধারণং ভবতি .
ধ্যানবিস্মৃতিঃ সমাধিঃ .
এবং সূক্ষ্মাঙ্গানি . য এবং বেদ স মুক্তিভাগ্ভবতি .. ১..
দেহস্য পঞ্চদোষা ভবন্তি কামক্রোধনিঃশ্বাসভযনিদ্রাঃ .
তন্নিরাসস্তু নিঃসঙ্কল্পক্ষমালঘ্বাহারপ্রমাদতাতত্ত্বসেবনম্ .
নিদ্রাভযসরীসৃপং হিংসাদিতরঙ্গং তৃষ্ণাবর্তং
দারপঙ্কং সংসারবার্ধিং তর্তুং সূক্ষ্মমার্গমবলম্ব্য
সত্ত্বাদিগুণানতিক্রম্য তারমবলোকযেত্ .
ভ্রূমধ্যে সচ্চিদানন্দতেজঃকূটরূপং তারকং ব্রহ্ম .
তদুপাযং লক্ষ্যত্রযাবলোকনম্ .
মূলাধারাদারভ্য ব্রহ্মরন্ধ্রপর্যন্তং সুষুম্না সূর্যাভা .
মৃণালতন্তুসূক্ষ্মা কুণ্ডলিনী . ততো তমোনিবৃত্তিঃ .
তদ্দর্শনাত্সর্বপাপনিবৃত্তিঃ . তর্জন্যগ্রোন্মীলিতকর্ণরন্ধ্রদ্বযে
ফূত্কারশব্দো জাযতে . তত্র স্থিতে মনসি চক্ষুর্মধ্য নীলজ্যোতিঃ
পশ্যতি . এবং হৃদযেঽপি . বহির্লক্ষ্যং তু নাসাগ্রে চতুঃ-
ষডষ্টদশদ্বাদশাঙ্গুলীভিঃ ক্রমান্নীলদ্যুতিশ্যামত্ব-
সদৃগ্রক্তভঙ্গীস্ফুরত্পীতবর্ণদ্বযোপেতং ব্যোমত্বং পশ্যতি
স তু যোগী চলনদৃষ্ট্যা ব্যোমভাগবীক্ষিতুঃ পুরুষস্য
দৃষ্ট্যগ্রে জ্যোতির্মযূখা বর্তন্তে . তদ্দৃষ্টিঃ স্থিরা ভবতি .
শীর্ষোপরি দ্বাদশাঙ্গুলিমানজ্যোতিঃ পশ্যতি তদাঽমৃতত্বমেতি .
মধ্যলক্ষ্যং তু প্রাতশ্চিত্রাদিবর্ণসূর্যচন্দ্রবহ্নিজ্বালা-
বলীবত্তদ্বিহীনান্তরিক্ষবত্পশ্যতি .
তদাকারাকারী ভবতি . অভ্যাসান্নির্বিকারং
গুণরহিতাকাশং ভবতি . বিস্ফুরত্তারকাকারগাঢ-
তমোপমং পরাকাশং ভবতি . কালানলসমং
দ্যোতমানং মহাকাশং ভবতি . সর্বোত্কৃষ্ট-
পরমাদ্বিতীযপ্রদ্যোতমানং তত্ত্বাকাশং ভবতি .
কোটিসূর্যপ্রকাশং সূর্যাকাশং ভবতি .
এবমভ্যাসাত্তন্মযো ভবতি . য এবং বেদ .. ২..
তদ্যোগং চ দ্বিধা বিদ্ধি পূর্বোত্তরবিভাগতঃ .
পূর্বং তু তারকং বিদ্যাদমনস্কং তদুত্তরমিতি .
তারকং দ্বিবিধম্ . মূর্তিতারকমমূর্তিতারকমিতি .
যদিন্দ্রিযান্তং তন্মূর্তিতারকম্ . যদ্ভ্রূযুগাতীতং
তদমূর্তিতারকমিতি . উভযমপি মনোযুক্তমভ্যসেত্ .
মনোযুক্তান্তরদৃষ্টিস্তারকপ্রকাশায ভবতি .
ভ্রূযুগমধ্যবিলে তেজস আবির্ভাবঃ . এতত্পূর্বতারকম্ .
উত্তরং ত্বমনস্কম্ . তালুমূলোর্ধ্বভাগে মহাজ্যোতির্বিদ্যতে .
তদ্দর্শনাদণিমাদিসিদ্ধিঃ . লক্ষ্যেঽন্তর্বাহ্যাযাং
দৃষ্টৌ নিমেষোন্মেষবর্জিতাযাং চ ইযং শাম্ভবী
মুদ্রা ভবতি . সর্বতন্ত্রেষু গোপ্যমহাবিদ্যা ভবতি .
তজ্জ্ঞানেন সংসারনিবৃত্তিঃ . তত্পূজনং মোক্ষফলদম্ .
অন্তর্লক্ষ্যং জলজ্যোতিঃস্বরূপং ভবতি . মহর্ষিবেদ্যং
অন্তর্বাহ্যেন্দ্রিযৈরদৃশ্যম্ .. ৩..
সহস্রারে জলজ্যোতিরন্তর্লক্ষ্যম্ . বুদ্ধিগুহাযাং
সর্বাঙ্গসুন্দরং পুরুষরূপমন্তর্লক্ষ্যমিত্যপরে .
শীর্ষান্তর্গতমণ্ডলমধ্যগং পঞ্চবক্ত্রমুমাসহাযং
নীলকণ্ঠং প্রশান্তমন্তর্লক্ষ্যমিতি কেচিত্ .
অঙ্গুষ্ঠমাত্রঃ পুরুষোঽন্তর্লক্ষ্যমিত্যেকে .
উক্তবিকল্পং সর্বমাত্মৈব . তল্লক্ষ্যং শুদ্ধাত্মদৃষ্ট্যা
বা যঃ পশ্যতি স এব ব্রহ্মনিষ্ঠো ভবতি . জীবঃ
পঞ্চবিংশকঃ স্বকল্পিতচতুর্বিংশতিতত্ত্বং পরিত্যজ্য
ষড্বিংশঃ পরমাত্মাহমিতি নিশ্চযাজ্জীবন্মুক্তো ভবতি .
এবমন্তর্লক্ষ্যদর্শনেন জীবন্মুক্তিদশাযাং স্বযমন্তর্লক্ষ্যো
ভূত্বা পরমাকাশাখণ্ডমণ্ডলো ভবতি .. ৪..
ইতি প্রথমং ব্রাহ্মণম্ ..
অথ হ যাজ্ঞবল্ক্য আদিত্যমণ্ডলপুরুষং পপ্রচ্ছ .
ভগবন্নন্তর্লক্ষ্যাদিকং বহুধোক্তম্ . মযা তন্ন
জ্ঞাতম্ . তদ্ব্রূহি মহ্যম্ . তদুহোবাচ পঞ্চভূত-
কারণং তডিত্কূটাভং তদ্বচ্চতুঃপীঠম্ . তন্মধ্যে
তত্ত্বপ্রকাশো ভবতি . সোঽতিগূঢ অব্যক্তশ্চ .
তজ্জ্ঞানপ্লবাধিরূঢেন জ্ঞেযম্ .  তদ্বাহ্যাভ্যন্তর্লক্ষ্যম্ .
তন্মধ্যে জগল্লীনম্ . তন্নাদবিন্দুকলাতীতমখণ্ডমণ্ডলম্ .
তত্সগুণনির্গুণস্বরূপম্ . তদ্বেত্তা বিমুক্তঃ . আদাবগ্নিমণ্ডলম্ .
তদুপরি সূর্যমণ্ডলম্ . তন্মধ্যে সুধাচন্দ্রমণ্ডলম্ .
তন্মধ্যেঽখণ্ডব্রহ্মতেজোমণ্ডলম্ . তদ্বিদ্যুল্লেখাবচ্ছুক্ল-
ভাস্বরম্ . তদেব শাম্ভবীলক্ষণম্ . তদ্দর্শনে তিস্রো মূর্তয
অমা প্রতিপত্পূর্ণিমা চেতি . নিমীলিতদর্শনমমাদৃষ্টিঃ .
অর্ধোন্মীলিতং প্রতিপত্ . সর্বোন্মীলনং পূর্ণিমা ভবতি . তাসু
পূর্ণিমাভ্যাসঃ কর্তব্যঃ তল্লক্ষ্যং নাসাগ্রম্ . তদা
তালুমূলে গাঢতমো দৃশ্যতে . তদভ্যাসাদখণ্ডমণ্ডলাকার-
জ্যোতির্দৃশ্যতে . তদেব সচ্চিদানন্দং ব্রহ্ম ভবতি . এবং
সহজানন্দে যদা মনো লীযতে তদা শান্তো ভবী ভবতি . তামেব
খেচরীমাহুঃ . তদভ্যাসান্মনঃস্থৈর্যম্ . ততো বাযুস্থৈর্যম্ .
তচ্চিহ্নানি . আদৌ তারকবদ্দৃশ্যতে . ততো বজ্রদর্পণম্ . তত
উপরি পূর্ণচন্দ্রমণ্ডলম্ . ততো বহ্নিশিখামণ্ডলং ক্রমাদ্দৃশ্যতে .. ১..
তদা পশ্চিমাভিমুখপ্রকাশঃ স্ফটিকধূম্র-
বিন্দুনাদকলানক্ষত্রখদ্যোতদীপনেত্রসবর্ণনব-
রত্নাদিপ্রভা দৃশ্যন্তে . তদেব প্রণবস্বরূপম্ .
প্রাণাপানযোরৈক্যং কৃত্বা ধৃতকুম্ভকো নাসাগ্র-
দর্শনদৃঢভাবনযা দ্বিকরাঙ্গুলিভিঃ ষণ্মুখী-
করণেন প্রণবধ্বনিং নিশম্য মনস্তত্র লীনং ভবতি .
তস্য ন কর্মলেপঃ . রবেরুদযাস্তমযযোঃ কিল কর্ম
কর্তব্যম্ . এবংবিদশ্চিদাদিত্যস্যোদযাস্তমযাভাবা-
ত্সর্বকর্মাভাবঃ . শব্দকাললযেন দিবারাত্র্যতীতো ভূত্বা
সর্বপরিপূর্ণজ্ঞানেনোন্যান্যবস্থাবশেন ব্রহ্মৈক্যং
ভবতি . উন্মন্যা অমনস্কং ভবতি . তস্য নিশ্চিন্তা
ধ্যানম্ . সর্বকর্মনিরাকরণমাবাহনম্ .
নিশ্চযজ্ঞানমাসনম্ . উন্মনীভাবঃ পাদ্যম্ .
সদাঽমনস্কমর্ঘ্যম্ . সদাদীপ্তিরপারামৃতবৃত্তিঃ
স্নানম্ . সর্বত্র ভাবনা গন্ধঃ . দৃক্স্বরূপাবস্থান-
মক্ষতাঃ . চিদাপ্তিঃ পুষ্পম্ . চিদগ্নিস্বরূপং ধূপঃ .
চিদাদিত্যস্বরূপং দীপঃ . পরিপূর্ণচন্দ্রামৃতরসস্যৈকীকরণং
নৈবেদ্যম্ . নিশ্চলত্বং প্রদক্ষিণম্ . সোহংভাবো নমস্কারঃ .
মৌনং স্তুতিঃ . সর্বসন্তোষো বিসর্জনমিতি য এবং বেদ . .. ২..
এবং ত্রিপুট্যাং নিরস্তাযাং নিস্তরঙ্গসমুদ্রবন্নিবাত-
স্থিতদীপবদচলসংপূর্ণভাবাভাববিহীনকৈবল্যদ্যোতির্ভবতি .
জাগ্রন্নিন্দান্তঃপরিজ্ঞানেন ব্রহ্মবিদ্ভবতি .
সুষুপ্তিসমাধ্যোর্মনোলযাবিশেষেঽপি মহদস্ত্যুভযো-
র্ভেদস্তমসি লীনত্বান্মুক্তিহেতুত্বাভাবাচ্চ . সমাধৌ
মৃদিততমোবিকারস্য তদাকারাকারিতাখণ্ডাকার-
বৃত্ত্যাত্মকসাক্ষিচৈতন্যে প্রপঞ্চলযঃ সংপদ্যতে
প্রপঞ্চস্য মনঃকল্পিতত্বাত্ . ততো ভেদাভাবাত্কদাচি-
দ্বহির্গতেঽপি মিথ্যাত্বভানাত্ . সকৃদ্বিভাতসদানন্দা-
নুভবৈকগোচরো ব্রহ্মবিত্তদেব ভবতি . যস্য সঙ্কল্পনাশঃ
স্যাত্তস্য মুক্তিঃ করে স্থিতা . তস্মাদ্ভাবাভাবৌ পরিত্যজ্য
পরমাত্মধ্যানেন মুক্তো ভবতি . পুনঃপুনঃ সর্বাবস্থাসু
জ্ঞানজ্ঞেযৌ ধ্যানধ্যেযৌ লক্ষ্যালক্ষ্যে দৃশ্যাদৃশ্যে
চোহাপোহাদি পরিত্যজ্য জীবন্মুক্তো ভবেত্ . য এবং বেদ .. ৩..
পঞ্চাবস্থাঃ জাগ্রত্স্বপ্নসুষুপ্তিতুরীযতুরীযাতীতাঃ .
জাগ্রতি প্রবৃত্তো জীবঃ প্রবৃত্তিমার্গাসক্তঃ .
পাপফলনরকাদিমাংস্তু শুভকর্মফলস্বর্গমস্ত্বিতি
কাঙ্ক্ষতে . স এব স্বীকৃতবৈরাগ্যাত্কর্মফলজন্মাঽলং
সংসারবন্ধনমলমিতি বিমুক্ত্যভিমুখো নিবৃত্তিমার্গ-
প্রবৃত্তো ভবতি . স এব সংসারতারণায গুরুমাশ্রিত্য
কামাদি ত্যক্ত্বা বিহিতকর্মাচরন্সাধনচতুষ্টযসংপন্নো
হৃদযকমলমধ্যে ভগবত্সত্তামাত্রান্তর্লক্ষ্যরূপমাসাদ্য
সুষুপ্ত্যবস্থাযা মুক্তব্রহ্মানন্দস্মৃতিং লব্ধ্বা
এক এবাহমদ্বিতীযঃ কঞ্চিত্কালমজ্ঞানবৃত্ত্যা
বিস্মৃতজাগ্রদ্বাসনানুফলেন তৈজসোঽস্মীতি তদুভযনিবৃত্ত্যা
প্রাজ্ঞ ইদানীমস্মীত্যহমেক এব স্থানভেদাদবস্থাভেদস্য
পরংতু নহি মদন্যদিতি জাতবিবেকঃ শুদ্ধাদ্বৈতব্রহ্মাহমিতি
ভিদাগন্ধং নিরস্য স্বান্তর্বিজৃম্ভিতভানুমণ্ডলধ্যান-
তদাকারাকারিতপরংব্রহ্মাকারিতমুক্তিমার্গমারূঢঃ
পরিপক্বো ভবতি . সঙ্কল্পাদিকং মনো বন্ধহেতুঃ . তদ্বিযুক্তং
মনো মোক্ষায ভবতি . তদ্বাংশ্চক্ষুরাদিবাহ্যপ্রপঞ্চরতো
বিগতপ্রপঞ্চগন্ধঃ সর্বজগদাত্মত্বেন পশ্যংস্ত্যক্তাহঙ্কারো
ব্রহ্মাহমস্মীতি চিন্তযন্নিদং সর্বং যদযমাত্মেতি
ভাবযন্কৃতকৃত্যো ভবতি .. ৪..
সর্বপরিপূর্ণতুরীযাতীতব্রহ্মভূতো যোগী ভবতি .
তং ব্রহ্মেতি স্তুবন্তি . সর্বলোকস্তুতিপাত্রঃ সর্বদেশ-
সংচারশীলঃ পরমাত্মগগনে বিন্দুং নিক্ষিপ্য
শুদ্ধাদ্বৈতাজাড্যসহজামনস্কযোগনিদ্রাখণ্ডা-
নন্দপদানুবৃত্ত্যা জীবন্মুক্তো ভবতি . তচ্চানন্দ-
সমুদ্রমগ্না যোগিনো ভবন্তি . তদপেক্ষযা ইন্দ্রাদযঃ
স্বল্পানন্দাঃ . এবং প্রাপ্তানন্দঃ পরমযোগী ভবতীত্যুপনিষত্ .. ৫..
ইতি দ্বিতীযং ব্রাহ্মণম্ .. ২..
যাজ্ঞবল্ক্যো মহামুনির্মণ্ডলপুরুষং পপ্রচ্ছ
স্বামিন্নমনস্কলক্ষণমুক্তমপি বিস্মৃতং
পুনস্তল্লক্ষণং ব্রূহীতি . তথেতি মণ্ডলপুরুষোঽব্রবীত্ .
ইদমমনস্কমতিরহস্যম্ . যজ্জ্ঞানেন কৃতার্থো
ভবতি তন্নিত্যং শাংভবীমুদ্রান্বিতম্ . পরমাত্মদৃষ্ট্যা
তত্প্রত্যযলক্ষ্যাণি দৃষ্ট্বা তদনু সর্বেশমপ্রমেযমজং
শিবং পরমাকাশং নিরালম্বমদ্বযং ব্রহ্মবিষ্ণুরুদ্রাদীনা-
মেকলক্ষ্যং সর্বকারণং পরংব্রহ্মাত্মন্যেব পশ্যমানো
গুহাবিহরণমেব নিশ্চযেন জ্ঞাত্বা ভাবাভাবাদিদ্বন্দ্বাতীতঃ
সংবিদিতমনোন্মন্যনুভবস্তদনন্তরমখিলেন্দ্রিযক্ষযবশাদমনস্ক-
সুখব্রহ্মানন্দসমুদ্রে মনঃপ্রবাহযোগরূপনিবাতস্থিতদীপবদচলং
পরংব্রহ্ম প্রাপ্নোতি . ততঃ শুষ্কবৃক্ষবন্মূর্চ্ছানিদ্রাময-
নিঃশ্বাসোচ্ছ্বাসাভাবান্নষ্টদ্বন্দ্বঃ সদাচঞ্চলগাত্রঃ
পরমশান্তিং স্বীকৃত্য মনঃ প্রচারশূন্যং পরমাত্মনি লীনং ভবতি .
পযস্রাবানন্তরং ধেনুস্তনক্ষীরমিব সর্বেন্দ্রিযবর্গে পরিনষ্টে
মনোনাশং ভবতি তদেবামনস্কম্ . তদনু নিত্যশুদ্ধঃ
পরমাত্মাহমেবেতি তত্ত্বমসীত্যুপদেশেন ত্বমেবাহমহমেব
ত্বমিতি তারকযোগমার্গেণাখণ্ডানন্দপূর্ণঃ কৃতার্থো ভবতি .. ১..
পরিপূর্ণপরাকাশমগ্নমনাঃ প্রাপ্তোন্মন্যবস্থঃ
সংন্যস্তসর্বেন্দ্রিযবর্গঃ অনেকজন্মার্জিতপুণ্যপুঞ্জপক্ব-
কৈবল্যফলোঽখণ্ডানন্দনিরস্তসর্বক্লেশকশ্মলো ব্রহ্মাহমস্মীতি
কৃতকৃত্যো ভবতি . ত্বমেবাহং ন ভেদোঽস্তি পূর্ণত্বাত্পরমাত্মনঃ .
ইত্যুচ্চরন্ত্সমালিঙ্গ্য শিষ্যং জ্ঞপ্তিমনীনযত্ .. ২..
ইতি তৃতীযং ব্রাহ্মণম্ .. ৩..
অথ হ যাজ্ঞবল্ক্যো মণ্ডলপুরুষং পপ্রচ্ছ
ব্যোমপঞ্চকলক্ষণং বিস্তরেণানুব্রূহীতি . স
হোবাচাকাশং পরাকাশং মহাকাশং
সূর্যাকাশং পরমাকাশমিতি পঞ্চ ভবন্তি .
বাহ্যাভ্যন্তরমন্ধকারমযমাকাশম্ .
বাহ্যস্যাভ্যন্তরে কালানলসদৃশং পরাকাশম্ .
সবাহ্যাভ্যন্তরেঽপরিমিতদ্যুতিনিভং তত্ত্বং মহাকাশম্ .
সবাহ্যাভ্যন্তরে সূর্যনিভং সূর্যাকাশম্ .
অনির্বচনীযজ্যোতিঃ সর্বব্যাপকং নিরতিশযানন্দলক্ষণং
পরমাকাশম্ . এবং তত্তল্লক্ষ্যদর্শনাত্তত্তদ্রূপো ভবতি .
নবচক্রং ষডাধারং ত্রিলক্ষ্যং ব্যোমপঞ্চকম্ .
সম্যগেতন্ন জানাতি স যোগী নামতো ভবেত্ .. ১..
ইতি চতুর্থং ব্রাহ্মণম্ .. ৪..
সবিষযং মনো বন্ধায নির্বিষযং মুক্তযে ভবতি .
অতঃ সর্বং জগচ্চিত্তগোচরম্ . তদেব চিত্তং নিরাশ্রযং
মনোন্মন্যবস্থাপরিপক্বং লযযোগ্যং ভবতি . তল্লযং
পরিপূর্ণে মযি সমভ্যসেত্ . মনোলযকারণমহমেব .
অনাহতস্য শব্দস্য তস্য শব্দস্য যো ধ্বনিঃ .
ধ্বনেরন্তর্গতং জ্যোতির্জ্যোতিরন্তর্গতং মনঃ .
যন্মনস্ত্রিজগত্সৃষ্টিস্থিতিব্যসনকর্মকৃত্ .
তন্মনো বিলযং যাতি তদ্বিষ্ণোঃ পরমং পদম্ .
তল্লযাচ্ছুদ্ধাদ্বৈতসিদ্ধির্ভেদাভাবাত্ .
এতদেব পরমতত্ত্বম্ . স তজ্জ্ঞো বালোন্মত্ত-
পিশাচবজ্জডবৃত্ত্যা লোকমাচরেত্ এবমমনস্কাভ্যাসেনৈব
নিত্যতৃপ্তিরল্পমূত্রপুরীষমিতভোজনদৃঢাঙ্গা-
জাড্যনিদ্রাদৃগ্বাযুচলনাভাবব্রহ্মদর্শনাজ্জ্ঞাত-
সুখস্বরূপসিদ্ধির্ভবতি . এবং চিরসমাধিজনিত-
ব্রহ্মামৃতপানপরাযণোঽসৌ সংন্যাসী পরমহংস
অবধূতো ভবতি . তদ্দর্শনেন সকলং জগত্পবিত্রং ভবতি .
তত্সেবাপরোঽজ্ঞোঽপি মুক্তো ভবতি . তত্কুলমেকোত্তরশতং তারযতি .
তন্মাতৃপিতৃজাযাপত্যবর্গং চ মুক্তং ভবতীত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ইতি মণ্ডলব্রাহ্মণোপনিষত্সমাপ্তা ..