কেন

.. কেনোপনিষত্ ..
.. অথ কেনোপনিষত্ ..

ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ সর্বাণি .
সর্বং ব্রহ্মৌপনিষদং
মাঽহং ব্রহ্ম নিরাকুর্যাং মা মা ব্রহ্ম
নিরাকারোদনিরাকরণমস্ত্বনিরাকরণং মেঽস্তু .
তদাত্মনি নিরতে য
উপনিষত্সু ধর্মাস্তে মযি সন্তু তে মযি সন্তু .

ॐ শান্তিঃ শান্তিঃ শান্তিঃ ..

ॐ কেনেষিতং পততি প্রেষিতং মনঃ
কেন প্রাণঃ প্রথমঃ প্রৈতি যুক্তঃ .
কেনেষিতাং বাচমিমাং বদন্তি
চক্ষুঃ শ্রোত্রং ক উ দেবো যুনক্তি .. ১..

শ্রোত্রস্য শ্রোত্রং মনসো মনো যদ্
বাচো হ বাচং স উ প্রাণস্য প্রাণঃ .
চক্ষুষশ্চক্ষুরতিমুচ্য ধীরাঃ
প্রেত্যাস্মাল্লোকাদমৃতা ভবন্তি .. ২..

ন তত্র চক্ষুর্গচ্ছতি ন বাগ্গচ্ছতি নো মনঃ .
ন বিদ্মো ন বিজানীমো যথৈতদনুশিষ্যাত্ .. ৩..

অন্যদেব তদ্বিদিতাদথো অবিদিতাদধি .
ইতি শুশ্রুম পূর্বেষাং যে নস্তদ্ব্যাচচক্ষিরে .. ৪..

যদ্বাচাঽনভ্যুদিতং যেন বাগভ্যুদ্যতে .
তদেব ব্রহ্ম ত্বং বিদ্ধি নেদং যদিদমুপাসতে .. ৫..

যন্মনসা ন মনুতে যেনাহুর্মনো মতম্ .
তদেব ব্রহ্ম ত্বং বিদ্ধি নেদং যদিদমুপাসতে .. ৬..

যচ্চক্ষুষা ন পশ্যতি যেন চক্ষূঁষি পশ্যতি .
তদেব ব্রহ্ম ত্বং বিদ্ধি নেদং যদিদমুপাসতে .. ৭..

যচ্ছ্রোত্রেণ ন শৃণোতি যেন শ্রোত্রমিদং শ্রুতম্ .
তদেব ব্রহ্ম ত্বং বিদ্ধি নেদং যদিদমুপাসতে .. ৮..

যত্প্রাণেন ন প্রাণিতি যেন প্রাণঃ প্রণীযতে .
তদেব ব্রহ্ম ত্বং বিদ্ধি নেদং যদিদমুপাসতে .. ৯..

.. ইতি কেনোপনিষদি প্রথমঃ খণ্ডঃ ..

যদি মন্যসে সুবেদেতি দহরমেবাপি
নূনং ত্বং বেত্থ ব্রহ্মণো রূপম্ .
যদস্য ত্বং যদস্য দেবেষ্বথ নু
মীমাঁস্যেমেব তে মন্যে বিদিতম্ .. ১..

নাহং মন্যে সুবেদেতি নো ন বেদেতি বেদ চ .
যো নস্তদ্বেদ তদ্বেদ নো ন বেদেতি বেদ চ .. ২..

যস্যামতং তস্য মতং মতং যস্য ন বেদ সঃ .
অবিজ্ঞাতং বিজানতাং বিজ্ঞাতমবিজানতাম্ .. ৩..

প্রতিবোধবিদিতং মতমমৃতত্বং হি বিন্দতে .
আত্মনা বিন্দতে বীর্যং বিদ্যযা বিন্দতেঽমৃতম্ .. ৪..

ইহ চেদবেদীদথ সত্যমস্তি
ন চেদিহাবেদীন্মহতী বিনষ্টিঃ .
ভূতেষু ভূতেষু বিচিত্য ধীরাঃ
প্রেত্যাস্মাল্লোকাদমৃতা ভবন্তি .. ৫..

.. ইতি কেনোপনিষদি দ্বিতীযঃ খণ্ডঃ ..

ব্রহ্ম হ দেবেভ্যো বিজিগ্যে তস্য হ ব্রহ্মণো
বিজযে দেবা অমহীযন্ত .. ১..

ত ঐক্ষন্তাস্মাকমেবাযং বিজযোঽস্মাকমেবাযং মহিমেতি .
তদ্ধৈষাং বিজজ্ঞৌ তেভ্যো হ প্রাদুর্বভূব তন্ন ব্যজানত
কিমিদং যক্ষমিতি .. ২..

তেঽগ্নিমব্রুবঞ্জাতবেদ এতদ্বিজানীহি
কিমিদং যক্ষমিতি তথেতি .. ৩..

তদভ্যদ্রবত্তমভ্যবদত্কোঽসীত্যগ্নির্বা
অহমস্মীত্যব্রবীজ্জাতবেদা বা অহমস্মীতি .. ৪..

তস্মিঁস্ত্বযি কিং বীর্যমিত্যপীদঁ সর্বং
দহেযং যদিদং পৃথিব্যামিতি .. ৫..

তস্মৈ তৃণং নিদধাবেতদ্দহেতি .
তদুপপ্রেযায সর্বজবেন তন্ন শশাক দগ্ধুং স তত এব
নিববৃতে নৈতদশকং বিজ্ঞাতুং যদেতদ্যক্ষমিতি .. ৬..

অথ বাযুমব্রুবন্বাযবেতদ্বিজানীহি
কিমেতদ্যক্ষমিতি তথেতি .. ৭..

তদভ্যদ্রবত্তমভ্যবদত্কোঽসীতি বাযুর্বা
অহমস্মীত্যব্রবীন্মাতরিশ্বা বা অহমস্মীতি .. ৮..

তস্মিঁস্ত্বযি কিং বীর্যমিত্যপীদঁ
সর্বমাদদীয যদিদং পৃথিব্যামিতি .. ৯..

তস্মৈ তৃণং নিদধাবেতদাদত্স্বেতি
তদুপপ্রেযায সর্বজবেন তন্ন শশাকাদতুং স তত এব
নিববৃতে নৈতদশকং বিজ্ঞাতুং যদেতদ্যক্ষমিতি .. ১০..

অথেন্দ্রমব্রুবন্মঘবন্নেতদ্বিজানীহি কিমেতদ্যক্ষমিতি তথেতি
তদভ্যদ্রবত্তস্মাত্তিরোদধে .. ১১..

স তস্মিন্নেবাকাশে স্ত্রিযমাজগাম বহুশোভমানামুমাঁ
হৈমবতীং তাঁহোবাচ কিমেতদ্যক্ষমিতি .. ১২..

.. ইতি কেনোপনিষদি তৃতীযঃ খণ্ডঃ ..

সা ব্রহ্মেতি হোবাচ ব্রহ্মণো বা এতদ্বিজযে মহীযধ্বমিতি
ততো হৈব বিদাঞ্চকার ব্রহ্মেতি .. ১..

তস্মাদ্বা এতে দেবা অতিতরামিবান্যান্দেবান্যদগ্নির্বাযুরিন্দ্রস্তে
হ্যেনন্নেদিষ্ঠং পস্পর্শুস্তে হ্যেনত্প্রথমো বিদাঞ্চকার ব্রহ্মেতি .. ২..

তস্মাদ্বা ইন্দ্রোঽতিতরামিবান্যান্দেবান্স
হ্যেনন্নেদিষ্ঠং পস্পর্শ স হ্যেনত্প্রথমো বিদাঞ্চকার ব্রহ্মেতি .. ৩..

তস্যৈষ আদেশো যদেতদ্বিদ্যুতো ব্যদ্যুতদাইতীন্ ন্যমীমিষদা৩
ইত্যধিদৈবতম্ .. ৪..

অথাধ্যাত্মং যদ্দেতদ্গচ্ছতীব চ মনোঽনেন
চৈতদুপস্মরত্যভীক্ষ্ণঁ সঙ্কল্পঃ .. ৫..

তদ্ধ তদ্বনং নাম তদ্বনমিত্যুপাসিতব্যং স য এতদেবং বেদাভি
হৈনঁ সর্বাণি ভূতানি সংবাঞ্ছন্তি .. ৬..

উপনিষদং ভো ব্রূহীত্যুক্তা ত উপনিষদ্ব্রাহ্মীং বাব ত
উপনিষদমব্রূমেতি .. ৭..

তসৈ তপো দমঃ কর্মেতি প্রতিষ্ঠা বেদাঃ সর্বাঙ্গানি
সত্যমাযতনম্ .. ৮..

যো বা এতামেবং বেদাপহত্য পাপ্মানমনন্তে স্বর্গে
লোকে জ্যেযে প্রতিতিষ্ঠতি প্রতিতিষ্ঠতি .. ৯..

.. ইতি কেনোপনিষদি চতুর্থঃ খণ্ডঃ ..

          ॐ শান্তিঃ শান্তিঃ শান্তিঃ ..

          .. ইতি কেনোপনিষদ্ ..

সকল অধ্যায়