আত্ম

.. আত্মোপনিষত্ ..
যত্র নাত্মপ্রপঞ্চোঽযমপহ্নবপদং গতঃ .
প্রতিযোগিবিনির্মুক্তঃ পরমাত্মাবশিষ্যতে ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ . ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ ..
ॐ অথাঙ্গিরাস্ত্রিবিধঃ পুরুষোঽজাযতাত্মান্তরাত্মা পরমাত্মা চেতি .
ত্বক্চর্মমাংসরোমাঙ্গুষ্ঠাঙ্গুল্যঃ পৃষ্ঠবংশনখগুল্ফোদর-
নাভিমেঢ্রকটূরুকপোলশ্রোত্রভ্রূললাটবাহুপার্শ্বশিরোঽক্ষীণি ভবন্তি
জাযতে ম্রিযত ইত্যেষ আত্মা .
অথান্তরাত্মানাম পৃথিব্যাপস্তেজোবাযুরাকাশমিচ্ছাদ্বেষসুখদুঃখ-
কামমোহবিকল্পানাদিস্মৃতিলিঙ্গোদাত্তানুদাত্তহ্র্স্বদীর্ঘপ্লুতঃ
খলিতগর্জিতস্ফুটিতমুদিতনৃত্তগীতবাদিত্রপ্রলযবিজৃম্ভিতাদিভিঃ
শ্রোতা ঘ্রাতা রসযিতা নেতা কর্তা বিজ্ঞানাত্মা পুরুষঃ
পুরাণন্যাযমীমাংসাধর্মশাস্ত্রাণীতি শ্রবণঘ্রাণাকর্ষণকর্মবিশেষণং
করোত্যেষোঽন্তরাত্মা .
অথ পরমাত্মা নাম যথাক্ষর উপাসনীযঃ .
স চ প্রাণাযামপ্রত্যাহারধার্ণাধ্যানসমাধিযোগানুমানাত্মচিন্তকবটকণিকা
বা শ্যামাকতণ্ডুলো বা বালাগ্রশতসহস্রবিকল্পনাভিঃ স লভ্যতে
নোপলভ্যতে ন জাযতে ন ম্রিযতে ন শুষ্যতি ন ক্লিদ্যতে ন দহ্যতে ন কম্পতে
ন ভিদ্যতে ন চ্ছিদ্যতে নির্গুণঃ সাক্ষিভূতঃ শুদ্ধো নিরবযবাত্মা কেবলঃ
সূক্ষ্মো নির্মমো নিরঞ্জনো নির্বিকারঃ শব্দস্পর্শরূপরসগন্ধবর্জিতো নির্বিকল্পো
নিরাকাঙ্ক্ষঃ সর্বব্যাপী সোঽচিন্ত্যো নির্বর্ণ্যশ্চ পুনাত্যশুদ্ধান্যপূতানি .
নিষ্ক্রিযস্তস্য সংসারো নাস্তি .
আত্মসংজ্ঞঃ শিবঃ শুদ্ধ এক এবাদ্বযঃ সদা .
ব্রহ্মরূপতযা ব্রহ্ম কেবলং প্রতিভাসতে .. ১..
জগদ্রূপতযাপ্যেতদ্ব্রহ্মৈব প্রতিভাসতে .
বিদ্যাবিদ্যাদিভেদেন ভাবাভাবাদিভেদতঃ .. ২..
গুরুশিষ্যাদিভেদেন ব্রহ্মৈব প্রতিভাসতে .
ব্রহ্মৈব কেবলং শুদ্ধং বিদ্যতে তত্ত্বদর্শনে .. ৩..
ন চ বিদ্যা ন চাবিদ্যা ন জগচ্চ ন চাপরম্ .
সত্যত্বেন জগদ্ভানং সংসারস্য প্রবর্তকম্ .. ৪..
অসত্যত্বেন ভানং তু সংসারস্য নিবর্তকম্ .
ঘটোঽযমিতি বিজ্ঞাতুং নিযমঃ কোন্বপেক্ষতে .. ৫..
বিনা প্রমাণসুষ্ঠুত্বং যস্মিন্সতি পদার্থধীঃ .
অযমাত্মা নিত্যসিদ্ধঃ প্রমাণে সতি ভাসতে .. ৬..
ন দেশং নাপি কালং বা ন শুদ্ধিং বাপ্যপেক্ষতে .
দেবদত্তোঽহমিত্যেতদ্বিজ্ঞানং নিরপেক্ষকম্ .. ৭..
তদ্বদ্ব্রহ্মবিদোঽপ্যস্যব্রহ্মাহমিতি বেদনম্ .
ভানুনেব জগত্সর্বং ভাস্যতে যস্য তেজসা .. ৮..
অনাত্মকমসত্তুচ্ছং কিং নু তস্যাবভাসকম্ .
বেদশাস্ত্রপুরাণানি ভূতানি সকলান্যপি .. ৯..
যেনার্থবন্তি তং কিং নু বিজ্ঞাতারং প্রকাশযেত্ .
ক্ষুধাং দেহব্যথাং ত্যক্ত্বা বালঃ ক্রীডতি বস্তুনি .. ১০..
তথৈব বিদ্বান্রমতে নির্মমো নিরহং সুখী .
কামান্নিষ্কামরূপী সংচরত্যেকচরো মুনিঃ .. ১১..
স্বাত্মনৈব সদা তুষ্টঃ স্বযং সর্বাত্মনা স্থিতঃ .
নির্ধনোঽপি সদা তুষ্টোঽপ্যসহাযো মহাবলঃ .. ১২..
নিত্যতৃপ্তোঽপ্যভুঞ্জানোঽপ্যসমঃ সমদর্শনঃ .
কুর্বন্নপি ন কুর্বাণশ্চাভোক্তা ফলভোগ্যপি .. ১৩..
শরীর্যপ্যশরীর্যেষ পরিচ্ছিন্নোঽপি সর্বগঃ .
অশরীরং সদা সন্তমিদং ব্রহ্মবিদং ক্বচিত্ .. ১৪..
প্রিযাপ্রিযে ন স্পৃশতস্তথৈব চ শুভা শুভে .
তমসা গ্রস্তবদ্ভানাদগ্রস্তোঽপি রবির্জনৈঃ .. ১৫..
গ্রস্ত ইত্যুচ্যতে ভ্রান্ত্যা হ্যজ্ঞাত্বা বস্তুলক্ষণম্ .
তদ্বদ্দেহাদিবন্ধেভ্যো বিমুক্তং ব্রহ্মবিত্তমম্ .. ১৬..
পশ্যন্তি দেহিবন্মূঢাঃ শরীরাভাসদর্শনাত্ .
অহিনির্ল্বযনীবাযং মুক্তদেহস্তু তিষ্ঠতি .. ১৭..
ইতস্ততশ্চাল্যমানো যত্কিঞ্চিত্প্রাণবাযুনা .
স্রোতসা নীযতে দারু যথা নিম্নোন্নতস্থলম্ .. ১৮..
দৈবেন নীযতে দেহো যথা কালোপভুক্তিষু .
লক্ষ্যালক্ষ্যগতিং ত্যক্ত্বা যস্তিষ্ঠেত্কেবলাত্মনা .. ১৯..
শিব এব স্বযং সাক্ষাদযং ব্রহ্মবিদুত্তমঃ .
জীবন্নেব সদা মুক্তঃ কৃতার্থো ব্রহ্মবিত্তমঃ .. ২০..
উপাধিনাশাদ্ব্রহ্মৈব সদ্ব্রহ্মাপ্যেতি নির্দ্বযম্ .
শৈলূষো বেষসদ্ভাবাভাবযোশ্চ যথা পুমান্ .. ২১..
তথৈব ব্রহ্মবিচ্ছ্রেষ্ঠঃ সদা ব্রহ্মৈব নাপরঃ .
ঘটে নষ্টে যথা ব্যোম ব্যোমৈব ভবতি স্বযম্ .. ২২..
তথৈবোপাধিবিলযে ব্রহ্মৈব ব্রহ্মবিত্স্বযম্ .
ক্ষীরং ক্ষীরে যথা ক্ষিপ্তং তৈলং তৈলে জলং জলে .. ২৩..
সংযুক্তমেকতাং যাতি তথাত্মন্যাত্মবিন্মুনিঃ .
এবং বিদেহকৈবল্যং সন্মাত্রত্বমখণ্ডিতম্ .. ২৪..
ব্রহ্মভাবং প্রপদ্যৈষ যতির্নাবর্ততে পুনঃ .
সদাত্মকত্ববিজ্ঞানদগ্ধা বিদ্যাদিবর্ষ্মণঃ .. ২৫..
অমুষ্য ব্রহ্মভূতত্ত্বাদ্ব্রহ্মণঃ কুত উদ্ভবঃ .
মাযাক্লৃপ্তৌ বন্ধমোক্ষৌ ন স্তঃ স্বাত্মনি বস্তুতঃ .. ২৬..
যথা রজ্জৌ নিষ্ক্রিযাযাং সর্পাভাসবিনির্গমৌ .
অবৃতেঃ সদসত্ত্বাভ্যাং বক্তব্যে বন্ধমোক্ষণে .. ২৭..
নাবৃত্তির্ব্রহ্মণঃ ক্বাচিদন্যাভাবাদনাবৃতম্ .
অস্তীতি প্রত্যযো যশ্চ যশ্চ নাস্তীতি বস্তুনি .. ২৮..
বুদ্ধেরেব গুণাবেতৌ ন তু নিত্যস্য বস্তুনঃ .
অতস্তৌ মাযযা ক্লৃপ্তৌ বন্ধমোক্ষৌ ন চাত্মনি .. ২৯..
নিষ্কলে নিষ্ক্রিযে শান্তে নিরবদ্যে নিরংজনে .
অদ্বিতীযে পরে তত্ত্বে ব্যোমবত্কল্পনা কুতঃ .. ৩০..
ন নিরোধো ন চোত্পত্তির্ন বদ্ধো ন চ সাধকঃ .
ন মুমুক্ষুর্ন বৈ মুক্ত ইত্যেষা পরমার্থতা .. ৩১..
ইত্যুপনিষত্ ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ . ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ ..
.. হরিঃ ॐ তত্সত্ ..