রুদ্রাক্ষজাবাল

.. রুদ্রাক্ষজাবালোপনিষত্ ..

রুদ্রাক্ষোপনিষদ্বেদ্যং মহারুদ্রতযোজ্জ্বলম্ .
প্রতিযোগিবিনির্মুক্তশিবমাত্রপদং ভজে ..
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরাকরণম-
স্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে মযি
সন্তু তে মযি সন্তু .. ॐ শান্তিঃ শান্তিঃ শান্তিঃ ..
হরিঃ ॐ .. অথ হৈনং কালাগ্নিরুদ্রং ভুসুণ্ডঃ পপ্রচ্ছ কথং
রুদ্রাক্ষোত্পত্তিঃ . তদ্ধারণাত্কিং ফলমিতি . তং হোবাচ
ভগবান্কালাগ্নিরুদ্রঃ . ত্রিপুরবধার্থমহং নিমীলিতাক্ষোঽভবম্ .
তেভ্যো জলবিন্দবো ভূমৌ পতিতাস্তে রুদ্রাক্ষা জাতাঃ .
সর্বানুগ্রহার্থায তেষাং নামোচ্চারণমাত্রেণ
দশগোপ্রদানফলং দর্শনস্পর্শনাভ্যাং দ্বিগুণং
ফলমত ঊর্ধ্বং বক্তুং ন শক্নোমি . তত্রৈতে শ্লোকা ভবন্তি .
কস্মিংস্থিতং তু কিং নাম কথং বা ধার্যতে নরৈঃ .
কতিভেদমুখান্যত্র কৈর্মন্ত্রৈর্ধার্যতে কথম্ .. ১..
দিব্যবর্ষসহস্রাণি চক্ষুরুন্মীলিতং মযা .
ভূমাবক্ষিপুটাভ্যাং তু পতিতা জলবিন্দবঃ .. ২..
তত্রাশ্রুবিন্দবো জাতা মহারুদ্রাক্ষবৃক্ষকাঃ .
স্থাবরত্বমনুপ্রাপ্য ভক্তানুগ্রহকারণাত্ .. ৩..
ভক্তানাং ধারণাত্পাপং দিবারাত্রিকৃতং হরেত্ .
লক্ষং তু দর্শনাত্পুণ্যং কোটিস্তদ্ধারণাদ্ভবেত্ .. ৪..
তস্য কোটিশতং পুণ্যং লভতে ধারণান্নরঃ .
লক্ষকোটিসহস্রাণি লক্ষকোটিশতানি চ .. ৫..
তজ্জপাল্লভতে পুণ্যং নরো রুদ্রাক্ষধারণাত্ .
ধাত্রীফলপ্রমাণং যচ্ছ্রেষ্ঠমেতদুদাহৃতম্ .. ৬..
বদরীফলমাত্রং তু মধ্যমং প্রোচ্যতে বুধৈঃ .
অধমং চণমাত্রং স্যাত্প্রক্রিযৈষা মযোচ্যতে .. ৭..
ব্রাহ্মণাঃ ক্ষত্রিযা বৈশ্যাঃ শূদ্রাশ্চেতি শিবাজ্ঞযা .
বৃথা জাতাঃ পৃথিব্যাং তু তজ্জাতীযাঃ শুভাক্ষকাঃ .. ৮..
শ্বেতাস্তু ব্রাহ্মণা জ্ঞেযাঃ ক্ষত্রিযা রক্তবর্ণকাঃ .
পীতাস্তু বৈশ্যা বিজ্ঞেযাঃ কৃষ্ণাঃ শূদ্রা উদাহৃতাঃ .. ৯..
ব্রাহ্মণো বিভৃযাচ্ছ্বেতাত্রক্তাত্রাজা তু ধারযেত্ .
পীতান্বৈশ্যস্তু বিভৃযাত্কৃষ্ণাঞ্ছূদ্রস্তু ধারযেত্ .. ১০..
সমাঃ স্নিগ্ধা দৃঢাঃ স্থূলাঃ কণ্টকৈঃ সংযুতাঃ শুভাঃ .
কৃমিদষ্টং ভিন্নভিন্নং কণ্টকৈর্হীনমেব চ .. ১১..
ব্রণযুক্তমযুক্তং চ ষড্রুদ্রাক্ষাণি বর্জযেত্ .
স্বযমেব কৃতং দ্বারং রুদ্রাক্ষং স্যাদিহোত্তমম্ .. ১২..
যত্তু পৌরুষযত্নেন কৃতং তন্মধ্যমং ভবেত্ .
সমান্স্নিগ্ধান্দৃঢান্স্থূলান্ক্ষৌমসূত্রেণ ধারযেত্ .. ১৩..
সর্বগাত্রেণ সৌম্যেন সামান্যানি বিচক্ষণঃ .
নিকষে হেমরেখাভা যস্য রেখা প্রদৃশ্যতে .. ১৪..
তদক্ষমমুত্তমং বিদ্যাত্তদ্ধার্যং শিবপূজকৈঃ .
শিখাযামেকরুদ্রাক্ষং ত্রিশতং শিরসা বহেত্ .. ১৫..
ষট্ত্রিংশতং গলে দধ্যাত্বাহোঃ ষোডশষোডশ .
মণিবন্ধে দ্বাদশৈব স্কন্ধে পঞ্চশতং বহেত্ .. ১৬..
অষ্টোত্তরশতৈর্মালামুপবীতং প্রকল্পযেত্ .
দ্বিসরং ত্রিসরং বাপি সরাণাং পঞ্চকং তথা .. ১৭..
সরাণাং সপ্তকং বাপি বিভৃযাত্কণ্ঠদেশতঃ .
মুকুটে কুণ্ডলে চৈব কর্ণিকাহারকেঽপি বা .. ১৮..
কেযূরকটকে সূত্রং কুক্ষিবন্ধে বিশেষতঃ .
সুপ্তে পীতে সদাকালং রুদ্রাক্ষং ধারযেন্নরঃ .. ১৯..
ত্রিশতং ত্বধমং পঞ্চশতং মধ্যমমুচ্যতে .
সহস্রমুত্তমং প্রোক্তমেবং ভেদেন ধারযেত্ .. ২০..
শিরসীশানমন্ত্রেণ কণ্ঠে তত্পুরুষেণ তু .
অঘোরেণ গলে ধার্যং তেনৈব হৃদযেঽপি চ .. ২১..
অঘোরবীজমন্ত্রেণ করযোর্ধারযেত্সুধীঃ .
পঞ্চাশদক্ষগ্রথিতান্ব্যোমব্যাপ্যপি চোদরে .. ২২..
পঞ্চ ব্রহ্মভিরঙ্গৈশচ ত্রিমালা পঞ্চ সপ্ত চ .
গ্রথিত্বা মূলমন্ত্রেণ সর্বাণ্যক্ষাণি ধারযেত্ .. ২৩..
অথ হৈনং ভগবন্তং কালাগ্নিরুদ্রং ভুসুন্ডঃ পপ্রচ্ছ
রুদ্রাক্ষাণাং ভেদেন যদক্ষং যত্স্বরূপং যত্ফলমিতি .
তত্স্বরূপং মুখযুক্তমরিষ্টনিরসনং কামাভীষ্টফলং
ব্রূহীতি হোবাচ . তত্রৈতে শ্লোকা ভবন্তি ..
একবক্ত্রং তু রুদ্রাক্ষং পরতত্ত্বস্বরূপকম্ .
তদ্ধারণাত্পরে তত্ত্বে লীযতে বিজিতেন্দ্রিযঃ .. ১..
দ্বিবক্ত্রং তু মুনিশ্রেষ্ঠ চার্ধনারীশ্বরাত্মকম্ .
ধারণাদর্ধনারীশঃ প্রীযতে তস্য নিত্যশঃ .. ২..
ত্রিমুখং চৈব রুদ্রাক্ষমগ্নিত্রযস্বরূপকম্ .
তদ্ধারণাচ্চ হুতভুক্তস্য তুষ্যতি নিত্যদা .. ৩..
চতুর্মুখং তু রুদ্রাক্ষং চতুর্বক্ত্রস্বরূপকম্ .
তদ্ধারণাচ্চতুর্বক্ত্রঃ প্রীযতে তস্য নিত্যদা .. ৪..
পঞ্চবক্ত্রং তু রুদ্রাক্ষং পঞ্চব্রহ্মস্বরূপকম্ .
পঞ্চবক্ত্রঃ স্বযং ব্রহ্ম পুংহত্যাং চ ব্যপোহতি .. ৫..
ষড্বক্ত্রমপি রুদ্রাক্ষং কার্তিকেযাধিদৈবতম্ .
তদ্ধারণান্মহাশ্রীঃ স্যান্মহদারোগ্যমুত্তমম্ .. ৬..
মতিবিজ্ঞানসংপত্তিশুদ্ধযে ধারযেত্সুধীঃ .
বিনাযকাধিদৈবং চ প্রবদন্তি মনীষিণঃ .. ৭..
সপ্তবক্ত্রং তু রুদ্রাক্ষং সপ্তমাধিদৈবতম্ .
তদ্ধারণান্মহাশ্রীঃ স্যান্মহদারোগ্যমুত্তমম্ .. ৮..
মহতী জ্ঞানসংপত্তিঃ শুচির্ধারণতঃ সদা .
অষ্টবক্ত্রং তু রুদ্রাক্ষমষ্টমাত্রাধিদৈবতম্ .. ৯..
বস্বষ্টকপ্রিযং চৈব গঙ্গাপ্রীতিকরং তথা .
তদ্ধারণাদিমে প্রীতা ভবেযুঃ সত্যবাদিনঃ .. ১০..
নববক্ত্রং তু রুদ্রাক্ষং নবশক্ত্যধিদৈবতম্ .
তস্য ধারণমাত্রেণ প্রীযন্তে নবশক্তযঃ .. ১১..
দশবক্ত্রং তু রুদ্রাক্ষং যমদৈবত্যমীরিতম্ .
দর্শনাচ্ছান্তিজনকং ধারণান্নাত্র সংশযঃ .. ১২..
একাদশমুখং ত্বক্ষং রুদ্রৈকাদশদৈবতম্ .
তদিদং দৈবতং প্রাহুঃ সদা সৌভাগ্যবর্ধনম্ .. ১৩..
রুদ্রাক্ষং দ্বাদশমুখং মহাবিষ্ণুস্বরূপকম্ .
দ্বাদশাদিত্যরূপং চ বিভর্ত্যেব হি তত্পরম্ .. ১৪..
ত্রযোদশমুখং ত্বক্ষং কামদং সিদ্ধিদং শুভম্ .
তস্য ধারণমাত্রেণ কামদেবঃ প্রসীদতি .. ১৫..
চতুর্দশমুখং চাক্ষং রুদ্রনেত্রসমুদ্ভবম্ .
সর্বব্যাধিহরং চৈব সর্বদারোগ্যমাপ্নুযাত্ .. ১৬..
মদ্যং মাংসং চ লশুনং পলাণ্ডুং শিগ্রুমেব চ .
শ্লেষ্মাতকং বিড্বরাহমভক্ষ্যং বর্জযেন্নরঃ .. ১৭..
গ্রহণে বিষুবে চৈবমযনে সংক্রমেঽপি চ .
দর্শেষু পূর্ণমাসে চ পূর্ণেষু দিবসেষু চ .
রুদ্রাক্ষধারণাত্সদ্যঃ সর্বপাপৈঃ প্রমুচ্যতে .. ১৮..
রুদ্রাক্ষমূলং তদ্ব্রহ্মা তন্নালং বিষ্ণুরেব চ .
তন্মুখং রুদ্র ইত্যাহুস্তদ্বিন্দুঃ সর্বদেবতাঃ .. ১৯.. ইতি ..
অথ কালাগ্নিরুদ্রং ভগবন্তং সনত্কুমারঃ পপ্রচ্ছাধীহি
ভগবন্রুদ্রাক্ষধারণবিধিম্ . তস্মিন্সমযে নিদাঘ-
জডভরতদত্তাত্রেযকাত্যাযনভরদ্বাজকপিলবসিষ্ঠ-
পিপ্পলাদাদযশ্চ কালাগ্নিরুদ্রং পরিসমেত্যোচুঃ . অথ
কালাগ্নিরুদ্রঃ কিমর্থং ভবতামাগমনমিতি হোবাচ .
রুদ্রাক্ষধারণবিধিং বৈ সর্বে শ্রোতুমিচ্ছামহ ইতি . অথ
কালাগ্নিরুদ্রঃ প্রোবাচ . রুদ্রস্য নযনাদুত্পন্না রুদ্রাক্ষা
ইতি লোকে খ্যাযন্তে . অথ সদাশিবঃ সংহারকালে সংহারং
কৃত্বা সংহারাক্ষং মুকুলীকরোতি . তন্নযনাজ্জাতা রুদ্রাক্ষা
ইতি হোবাচ . তস্মাদ্রুদ্রাক্ষত্বমিতি কালাগ্নিরুদ্রঃ প্রোবাচ .
তদ্রুদ্রাক্ষে বাগ্বিষযে কৃতে দশগোপ্রদানেন যত্ফলমবাপ্নোতি
তত্ফলমশ্নুতে . স এষ ভস্মজ্যোতী রুদ্রাক্ষ ইতি . তদ্রুদ্রাক্ষং
করেণ স্পৃষ্ট্বা ধারণমাত্রেণ দ্বিসহস্রগোপ্রদানফলং
ভবতি . তদ্রুদ্রাক্ষে কর্ণযোর্ধার্যমাণে একাদশসহস্রগোপ্রদানফলং
ভবতি . একাদশরুদ্রত্বং চ গচ্ছতি . তদ্রুদ্রাক্ষে শিরসি
ধার্যমাণে কোটিগোপ্রদানফলং ভবতি . এতেষাং স্থানানাং
কর্ণযোঃ ফলং বক্তুং ন শক্যমিতি হোবাচ . য ইমাং রুদ্রাক্ষজাবালোপনিষদং
নিত্যমধীতে বালো বা যুবা বা বেদ স মহান্ভবতি . স গুরুঃ সর্বেষাং
মন্ত্রাণামুপদেষ্টা ভবতি এতৈরেব হোমং কুর্যাত্ . এতৈরেবার্চনম্ .
তথা রক্ষোঘ্নং মৃত্যুতারকং গুরুণা লব্ধং কণ্ঠে বাহৌ
শিখাযাং বা বধ্নীত . সপ্তদ্বীপবতী ভূমির্দক্ষিণার্থং নাবকল্পতে .
তস্মাচ্ছ্রদ্ধযা যাং কাঞ্চিদ্গাং দদ্যাত্সা দক্ষিণা ভবতি .
য ইমামুপনিষদং ব্রাহ্মণঃ সাযমধীযানো দিবসকৃতং পাপং
নাশযতি . মধ্যাহ্নেঽধীযানঃ ষড্জন্মকৃতং পাপং নাশযতি .
সাযং প্রাতঃ প্রযুঞ্জানোঽনেকজন্মকৃতং পাপং নাশযতি .
ষট্সহস্রলক্ষগাযত্রীজপফলমবাপ্নোতি . ব্রহ্মহত্যাসুরাপান-
স্বর্ণস্তেযগুরুদারগমনতত্সংযোগপাতকেভ্যঃ পূতো ভবতি .
সর্বতীর্থফলমশ্নুতে . পতিতসংভাষণাত্পূতো ভবতি .
পঙ্ক্তিশতসহস্রপাবনো ভবতি . শিবসাযুজ্যমবাপ্নোতি . ন চ
পুনরাবর্ততে ন চ পুনরাবর্তত ইত্যোংসত্যমিত্যুপনিষত্ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো
বলমিন্দ্রিযাণি চ .. সর্বাণি সর্বং ব্রহ্মোপনিষদং মাহং
ব্রহ্ম নিরাকুর্যাং মা মা ব্রহ্ম নিরাকরোদনিরাকরণম-
স্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু .. ॐ শান্তিঃ শান্তিঃ শান্তিঃ ..
ইতি রুদ্রাক্ষজাবালোপনিষত্সমাপ্তা ..