বাসুদেব

.. বাসুদেবোপনিষত্ ..

যত্সর্বহৃদযাগারং যত্র সর্বং প্রতিষ্ঠিতম্ .
বস্তুতো যন্নিরাধারং বাসুদেবপদং ভজে ..
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং ব্রহ্মোপনিষদং
মাহং ব্রহ্ম নিরাকুর্যাং মা মা ব্রহ্ম নিরাকরোদনিরাকরণম-
স্ত্বনিরাকরণং মেস্তু তদাত্মনি নিরতে য উপনিষত্সু ধর্মাস্তে
মযি সন্তু তে মযি সন্তু .. ॐ শান্তিঃ শান্তিঃ শান্তিঃ ..
ॐ নমস্কৃত্য ভগবান্নারদঃ সর্বেশ্বরং বাসুদেবং পপ্রচ্ছ
অধীহি ভগবন্নূর্ধ্বপুণ্ড্রবিধিং দ্রব্যমন্ত্রস্থানাদিসহিতং মে
ব্রূহীতি . তং হোবাচ ভগবান্বাসুদেবো বৈকুণ্ঠস্থানাদুত্পন্নং
মম প্রীতিকরং মদ্ভক্তৈর্ব্রহ্মাদিভির্ধারিতং বিষ্ণুচন্দনং
মমাঙ্গে প্রতিদিনমালিপ্তং গোপীভিঃ প্রক্ষালনাদ্গোপীচন্দন-
মাখ্যাতং মদঙ্গলেপনং পুণ্যং চক্রতীর্থান্তঃস্থিতং
চক্রসমাযুক্তং পীতবর্ণং মুক্তিসাধনং ভবতি .
অথ গোপীচন্দনং নমস্কৃত্বোদ্ধৃত্য .
গোপীচন্দন পাপঘ্ন বিষ্ণুদেহসমুদ্ভব .
চক্রাঙ্কিত নমস্তুভ্যং ধারণান্মুক্তিদো ভব .
ইমং মে গঙ্গে ইতি জলমাদায বিষ্ণোর্নুকমিতি মর্দযেত্ .
অতো দেবা অবন্তু ন ইত্যেতন্মন্ত্রৈর্বিষ্ণুগাযত্র্যা কেশবাদি-
নামভির্বা ধারযেত্ . ব্রহ্মচারী বানপ্রস্থো বা
ললাটহৃদযকণ্ঠবাহূমূলেষু বৈষ্ণবগাযত্র্যা
কৃষ্ণাদিনামভির্বা ধারযেত্ . ইতি ত্রিবারমভিমন্ত্র্য
শঙ্খচক্রগদাপাণে দ্বারকানিলযাচ্যুত . গোবিন্দ
পুণ্ডরীকাক্ষ রক্ষ মাং শরণাগতম্ . ইতি ধ্যাত্বা
গৃহস্থো ললাটাদিদ্বাদশস্থলেষ্বনামিকাঙ্গুল্যা
বৈষ্ণবগাযত্র্যা কেশবাদিনামভির্বা ধারযেত্ .
ব্রহ্মচারী গৃহস্থো বা ললাটহৃদযকণ্ঠবাহূমূলেষু
বৈষ্ণবগাযত্র্যা কৃষ্ণাদিনামভির্বা ধারযেত্ .
যতিস্তর্জন্যা শিরোললাটহৃদযেষু প্রণবেনৈব ধারযেত্ .
ব্রহ্মাদযস্ত্রযো মূর্তযস্তিস্রো ব্যাহৃতযস্ত্রীণি ছন্দাংসি
ত্রযোঽগ্নয ইতি জ্যোতিষ্মন্তস্ত্রযঃ কালাস্তিস্রোঽবস্থাস্ত্রয
আত্মানঃ পুণ্ড্রাত্রয ঊর্ধ্বা অকার উকারো মকার এতে
প্রণবমযোর্ধ্বপুণ্ড্রাস্তদাত্মা সদেতদোমিতি . তানেকধা
সমভবত্ . ঊর্ধ্বমুন্নমযত ইত্যোঙ্কারাধিকারী .
তস্মাদূর্ধ্বপুণ্ড্রং ধারযেত্ . পরমহংসো ললাটে
প্রণবেনৈকমূর্ধ্বপুণ্ড্রং বা ধারযেত্ .
তত্ত্বপ্রদীপপ্রকাশং স্বাত্মানং পশ্যন্যোগী
মত্সাযুজ্যমবাপ্নোতি . অথ বা ন্যস্তহৃদযপুণ্ড্রমধ্যে
বা হৃদযকমলমধ্যে বা .
তস্য মধ্যে বহ্নিশিখা অণীযোর্ধ্বা ব্যবস্থিতা .
নীলতোযদমধ্যস্থাদ্বিদ্যুল্লেখেব ভাস্বরা .
নীবারশূকবত্তন্বী পরমাত্মা ব্যবস্থিত ইতি .
অতঃ পুণ্ড্রস্থং হৃদযপুণ্ডরীকেষু তমভ্যসেত্ .
ক্রমাদেবং স্বাত্মানং ভাবযেন্মাং পরং হরিম্ .
একাগ্রমনসা যো মাং ধ্যাযতে হরিমব্যযম্ .
হৃত্পঙ্কজে চ স্বাত্মানং স মুক্তো নাত্র সংশযঃ .
মদ্রূপমদ্বযং ব্রহ্ম আদিমধ্যান্তবর্জিতম্ .
স্বপ্রভং সচ্চিদানন্দং ভক্ত্যা জানাতি চাব্যযম্ .
একো বিষ্ণুরনেকেএষু জঙ্গমস্থাবরেষু চ .
অনুস্যুতো বসত্যাত্মা ভূতেষ্বহমবস্থিতঃ .
তৈলং তিলেষু কাষ্ঠেষু বহ্নিঃ ক্ষীরে ঘৃতং যথা .
গন্ধঃ পুষ্পেষু ভূতেষু তথাত্মাবস্থিতো হ্যহম্ .
ব্রহ্মরন্ধ্রে ভ্রুবোর্মধ্যে হৃদযে চিদ্রবিং হরিম্ .
গোপীচন্দনমালিপ্য তত্র ধ্যাত্বাপ্নুযাত্পরম্ .
ঊর্ধ্বদণ্ডোর্ধ্বরেতাশ্চ ঊর্ধ্বপুণ্ড্রোর্ধ্বযোগবান্ .
ঊর্ধ্বং পদমবাপ্নোতি যতিরূর্ধ্বচতুষ্কবান্ .
ইত্যেতন্নিশ্চিতং জ্ঞানং মদ্ভক্ত্যা সিধ্যতি স্বযম্ .
নিত্যমেকাগ্রভক্তিঃ স্যাদ্গোপীচন্দনধারণাত্ .
ব্রাহ্মাণানাং তু সর্বেষাং বৈদিকানামনুত্তমম্ .
গোপীচন্দনবারিভ্যামূর্ধ্বপুণ্ড্রং বিধীযতে .
যো গোপীচন্দনাভাবে তুলসীমূলমৃত্তিকাম্ .
মুমুক্ষুর্ধারযেন্নিত্যমপরোক্ষাত্মসিদ্ধযে .
অতিরাত্রাগ্নিহোত্রভস্মনাগ্নের্ভসিতমিদংবিষ্ণুস্ত্রীণি
পদেতি মন্ত্রৈর্বৈষ্ণবগাযত্র্যা প্রণবেনোদ্ধূলনং কুর্যাত্ .
এবং বিধিনা গোপীচন্দনং চ ধারযেত্ .
যস্ত্বধীতে বা স সর্বপাতকেভ্যঃ পূতো ভবতি .
পাপবুদ্ধিস্তস্য ন জাযতে . স সর্বেষু তীর্থেষু স্নাতো ভবতি .
স সর্বৈর্যজ্ঞৈর্যাজিতো ভবতি . স সর্বৈর্দেবৈঃ পূজ্যো ভবতি .
শ্রীমন্নারাযণে ময্যচঞ্চলা ভক্তিশ্চ ভবতি .
স সম্যগ্জ্ঞানং চ লব্ধ্বা বিষ্ণুসাযুজ্যমবাপ্নোতি .
ন চ পুনরাবর্ততে ন চ পুনরাবর্ততে ইত্যাহ ভগবান্বাসুদেবঃ .
যস্ত্বেতদ্বাধীতে সোঽপ্যেবমেব ভবতীত্যোং সত্যমিত্যুপনিষত্ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ শ্রোত্রমথো
বলমিদ্রিযাণি চ .. সর্বাণি সর্বং ব্রহ্মোপনিষদং মাহং ব্রহ্ম
নিরাকুর্যাং মা মা ব্রহ্ম নিরাকরোদনিরাকরণমস্ত্বনিরাকণং মেস্তু
তদাত্মনি নিরতে য উপনিষত্সু ধর্মাস্তে মযি সন্তু তে মযি সন্তু ..
ॐ শান্তিঃ শান্তিঃ শান্তিঃ ..
ইতি বাসুদেবোপনিষত্সমাপ্তা ..