অক্ষমালিক

.. অক্ষমালিকোপনিষত্ ..
অকারাদিক্ষকারান্তবর্ণজাতকলেবরম্ .
বিকলেবরকৈবল্যং রামচন্দ্রপদং ভজে ..
ॐ বাঙ্মে মনসি প্রতিষ্ঠিতা মনো মে বাচি
প্রতিষ্ঠিতমাবিরাবীর্ম এধি .. বেদস্য ম আণীস্থঃ
শ্রুতং মে মা প্রহাসীরনেনাধীতেনারাত্রা-
ন্সন্দধাম্যৃতং বদিষ্যামি সত্যং বদিষ্যামি ..
তন্মামবতু তদ্বক্তারমবতু অবতু মামবতু
বক্তারমবতু বক্তারম্ ..
ॐ শান্তিঃ শান্তিঃ শান্তিঃ ..
হরিঃ ॐ . অথ প্রজাপতির্গুহং পপ্রচ্ছ ভো
ব্রহ্মন্নক্ষমালাভেদবিধিং ব্রূহীতি . সা কিং
লক্ষণা কতি ভেদা অস্যাঃ কতি সূত্রাণি কথং
ঘটনাপ্রকারঃ কে বর্ণাঃ কা প্রতিষ্ঠা
কৈষাধিদেবতা কিং ফলং চেতি . তং গুহঃ
প্রত্যুবাচ প্রবালমৌক্তিকস্ফটিকশঙ্খ-
রজতাষ্টাপদচন্দনপুত্রজীবিকাব্জে রুদ্রাক্ষা
ইতি . আদিক্ষান্তমূর্তিঃ সাবধানভাবা .
সৌবর্ণং রাজতং তাম্রং তন্মুখে মুখং
তত্পুচ্ছে পুচ্ছং তদন্তরাবর্তনক্রমেণ
যোজযেত্ . যদস্যান্তরং সূত্রং তদ্ব্রহ্ম .
যদ্দক্ষপার্শ্বে তচ্ছৈবম্ . যদ্বামে
তদ্বৈষ্ণবম্ . যন্মুখং সা সরস্বতী .
যত্পুচ্ছং সা গাযত্রী . যত্সুষিরং সা
বিদ্যা . যা গ্রন্থিঃ সা প্রকৃতিঃ . যে স্বরাস্তে
ধবলাঃ . যে স্পর্শাস্তে পীতাঃ . যে পরাস্তে
রক্তাঃ . অথ তাং পঞ্চভির্গন্ধৈরমৃতৈঃ
পঞ্চভির্গব্যৈস্তনুভিঃ শোধযিত্বা
পঞ্চভির্গব্যৈর্গন্ধোদকেন সংস্রাপ্য
তস্মাত্সোঙ্কারেণ পত্রকূর্চেন স্নপযিত্বা-
ষ্টভির্গন্ধৈরালিপ্য সুমনঃস্থলে
নিবেশ্যাক্ষতপুষ্পৈরারাধ্য প্রত্যক্ষ-
মাদিক্ষান্তৈর্বর্ণৈর্ভাবযেত্ . ওমঙ্কার
মৃত্যুঞ্জয সর্বব্যাপক প্রথমেঽক্ষে প্রতিতিষ্ঠ .
ওমাঙ্কারাকর্ষণাত্মকসর্বগত দ্বিতীযেঽক্ষে প্রতিতিষ্ঠ .
ওমিঙ্কারপুষ্টিদাক্ষোভকর তৃতীযেঽক্ষে প্রতিতিষ্ঠ .
ওমীঙ্কার বাক্প্রসাদকর নির্মল চতুর্থেঽক্ষে প্রতিতিষ্ঠ .
ওমুঙ্কার সর্ববলপ্রদ সারতর পঞ্চমেঽক্ষে প্রতিতিষ্ঠ .
ওমূঙ্কারোচ্চাটন দুঃসহ ষষ্ঠেঽক্ষে প্রতিতিষ্ঠ .
ওমৃঙ্কাকার সংক্ষোভকর চঞ্চল সপ্তমেঽক্ষে প্রতিতিষ্ঠ .
ওমৄঙ্কার সংমোহনকরোজবলাষ্টমেঽক্ষে প্রতিতিষ্ঠ .
ওম্লৃঙ্কারবিদ্বেষণকর মোহক নবমেঽক্ষে প্রতিতিষ্ঠ .
ওম্লৄঙ্কার মোহকর দশমেঽক্ষে প্রতিতিষ্ঠ .
ওমেঙ্কার সর্ববশ্যকর শুদ্ধসত্ত্বৈকাদশেঽক্ষে প্রতিতিষ্ঠ .
ওমৈঙ্কার শুদ্ধসাত্ত্বিক পুরুষবশ্যকর দ্বাদশেঽক্ষে প্রতিতিষ্ঠ .
ওমোঙ্কারাখিলবাঙ্ময নিত্যশুদ্ধ ত্রযোদশেঽক্ষে প্রতিতিষ্ঠ .
ওমৌঙ্কার সর্ববাঙ্ময বশ্যকর চতুর্দশেঽক্ষে প্রতিতিষ্ঠ .
ওমঙ্কার গজাদিবশ্যকর মোহন পঞ্চদশেঽক্ষে প্রতিতিষ্ঠ .
ওমঃকার মৃত্যুনাশনকর রৌদ্র ষোডশেঽক্ষে প্রতিতিষ্ঠ .
ॐ কঙ্কার সর্ববিষহর কল্যাণদ সপ্তদশেঽক্ষে প্রতিতিষ্ঠ .
ॐ খঙ্কার সর্বক্ষোভকর ব্যাপকাষ্টাদশেঽক্ষে প্রতিতিষ্ঠ .
ॐ গঙ্কার সর্ববিঘ্নশমন মহত্তরৈকোনবিংশেঽক্ষে প্রতিতিষ্ঠ .
ॐ ঘঙ্কার সৌভাগ্যদ স্তম্ভনকর বিংশেঽক্ষে প্রতিতিষ্ঠ .
ॐ ঙকার সর্ববিষনাশকরোগ্রৈকবিংশেঽক্ষে প্রতিতিষ্ঠ .
ॐ চঙ্কারাভিচারঘ্ন ক্রূর দ্বাবিংশেঽক্ষে প্রতিতিষ্ঠ .
ॐ ছঙ্কার ভূতনাশকর ভীষণ ত্রযোবিংশেঽক্ষে প্রতিতিষ্ঠ .
ॐ জঙ্কার কৃত্যাদিনাশকর দুর্ধর্ষ চতুর্বিংশেঽক্ষে প্রতিতিষ্ঠ .
ॐ ঝঙ্কার ভূতনাশকর পঞ্চবিংশেঽক্ষে প্রতিতিষ্ঠ .
ॐ ঞকার মৃত্যুপ্রমথন ষড্বিংশেঽক্ষে প্রতিতিষ্ঠ .
ॐ টঙ্কার সর্বব্যাধিহর সুভগ সপ্তবিংশেঽক্ষে প্রতিতিষ্ঠ .
ॐ ঠঙ্কার চন্দ্ররূপাষ্টাবিংশেঽক্ষে প্রতিতিষ্ঠ .
ॐ ডঙ্কার গরুডাত্মক বিষঘ্ন শোভনৈকোনত্রিংশেঽক্ষে প্রতিতিষ্ঠ .
ॐ ঢঙ্কার সর্বসংপত্প্রদ সুভগ ত্রিংশেঽক্ষে প্রতিতিষ্ঠ .
ॐ ণঙ্কার সর্বসিদ্ধিপ্রদ মোহকরৈকত্রিংশেঽক্ষে প্রতিতিষ্ঠ .
ॐ তঙ্কার ধনধান্যাদিসংপত্প্রদ প্রসন্ন দ্বাত্রিংশেঽক্ষে প্রতিতিষ্ঠ .
ॐ থঙ্কার ধর্মপ্রাপ্তিকর নির্মল ত্রযস্ত্রিংশেঽক্ষে প্রতিতিষ্ঠ .
ॐ দঙ্কার পুষ্টিবৃদ্ধিকর প্রিযদর্শন চতুস্ত্রিংশেঽক্ষে প্রতিতিষ্ঠ .
ॐ ধঙ্কার বিষজ্বরনিঘ্ন বিপুল পঞ্চত্রিংশেঽক্ষে প্রতিতিষ্ঠ .
ॐ নঙ্কার ভুক্তিমুক্তিপ্রদ শান্ত ষট্ত্রিংশেঽক্ষে প্রতিতিষ্ঠ .
ॐ পঙ্কার বিষবিঘ্ননাশন ভব্য সপ্তত্রিংশেঽক্ষে প্রতিতিষ্ঠ .
ॐ ফঙ্কারাণিমাদিসিদ্ধিপ্রদ জ্যোতীরূপাষ্টত্রিংশেঽক্ষে প্রতিতিষ্ঠ .
ॐ বঙ্কার সর্বদোষহর শোভনৈকোনচত্বারিংশেঽক্ষে প্রতিতিষ্ঠ .
ॐ ভঙ্কার ভূতপ্রশান্তিকর ভযানক চত্বারিংশেঽক্ষে প্রতিতিষ্ঠ .
ॐ মঙ্কার বিদ্বেষিমোহনকরৈকচত্বারিংশেঽক্ষে প্রতিতিষ্ঠ .
ॐ যঙ্কার সর্বব্যাপক পাবন দ্বিচত্বারিংশেঽক্ষে প্রতিতিষ্ঠ .
ॐ রঙ্কার দাহকর বিকৃত ত্রিচত্বারিংশেঽক্ষে প্রতিতিষ্ঠ .
ॐ লঙ্কার বিশ্বংভর ভাসুর চতুশ্চত্বারিংশেঽক্ষে প্রতিতিষ্ঠ .
ॐ বঙ্কার সর্বাপ্যাযনকর নির্মল পঞ্চচত্বারিংশেঽক্ষে প্রতিতিষ্ঠ .
ॐ শঙ্কার সর্বফলপ্রদ পবিত্র ষট্চত্বারিংশেঽক্ষে প্রতিতিষ্ঠ .
ॐ ষঙ্কার ধর্মার্থকামদ ধবল সপ্তচত্বারিংশেঽক্ষে প্রতিতিষ্ঠ .
ॐ সঙ্কার সর্বকারণ সার্ববর্ণিকাষ্টচত্বারিংশেঽক্ষে প্রতিতিষ্ঠ .
ॐ হঙ্কার সর্ববাঙ্ময নির্মলৈকোনপঞ্চাশদক্ষে প্রতিতিষ্ঠ .
ॐ ঳ঙ্কার সর্বশক্তিপ্রদ প্রধান পঞ্চাশদক্ষে প্রতিতিষ্ঠ .
ॐ ক্ষঙ্কার পরাপরতত্ত্বজ্ঞাপক পরংজ্যোতীরূপ শিখামণৌ প্রতিতিষ্ঠ .
অথোবাচ যে দেবাঃ পৃথিবীপদস্তেভ্যো নমো
ভগবন্তোঽনুমদন্তু শোভাযৈ পিতরোঽনুমদন্তু
শোভাযৈ জ্ঞানমযীমক্ষমালিকাম্ .
অথোবাচ যে দেবা অন্তরিক্ষসদস্তেভ্যঃ  ॐ নমো
ভগবন্তোঽনুমদন্তু শোভাযৈ পিতরোঽনুমদন্তু
শোভাযৈজ্ঞানমযীমক্ষমালিকাম্ .
অথোবাচ যে দেবা দিবিষদস্তেভ্যো নমো
ভগবন্তোঽনুমদন্তু শোভাযৈ পিতরোঽনুমদন্তু
শোভাযৈ জ্ঞানমযীমক্ষমালিকাম্ .
অথোবাচ যে মন্ত্রা যা বিদ্যাস্তেভ্যো
নমস্তাভ্যশ্চোন্নমস্তচ্ছক্তিরস্যাঃ
প্রতিষ্ঠাপযতি .
অথোবাচ যে ব্রহ্মবিষ্ণুরুদ্রাস্তেভ্যঃ
সগুণেভ্য ॐ নমস্তদ্বীর্যমস্যাঃ
প্রতিষ্ঠাপযতি .
অথোবাচ যে সাঙ্খ্যাদিতত্ত্বভেদাস্তেভ্যো
নমো বর্তধ্বং বিরোধেঽনুবর্তধ্বম্ .
অথোবাচ যে শৈবা বৈষ্ণবাঃ শাক্তাঃ
শতসহস্রশস্তেভ্যো নমোনমো ভগবন্তোঽ-
নুমদন্ত্বনুগৃহ্ণন্তু .
অথোবাচ যাশ্চ মৃত্যোঃ প্রাণবত্যস্তাভ্যো
নমোনমস্তেনৈতং মৃডযত মৃডযত .
পুনরেতস্যাং সর্বাত্মকত্বং ভাবযিত্বা ভাবেন
পূর্বমালিকামুত্পাদ্যারভ্য তন্মযীং
মহোপহারৈরুপহৃত্য আদিক্ষান্তৈরক্ষরৈরক্ষ-
মালামষ্টোত্তরশতং স্পৃশেত্ .
অথ পুনরুত্থাপ্য প্রদক্ষিণীকৃত্যোং নমস্তে
ভগবতি মন্ত্রমাতৃকেঽক্ষমালে
সর্ববশঙ্কর্যোংনমস্তে ভগবতি মন্ত্রমাতৃকেঽ-
ক্ষমালিকে শেষস্তম্ভিন্যোংনমস্তে ভগবতি
মন্ত্রমাতৃকেঽক্ষমালে উচ্চাটন্যোংনমস্তে
ভগবতি মন্ত্রমাতৃকেঽক্ষমালে বিশ্বামৃত্যো
মৃত্যুঞ্জযস্বরূপিণি সকললোকোদ্দীপিনি সকললোক-
রক্ষাধিকে সকললোকোজ্জীবিকে সকললোকোত্পাদিকে
দিবাপ্রবর্তিকে রাত্রিপ্রবর্তিকে নদ্যন্তরং যাসি
দেশান্তরং যাসি দ্বীপান্তরং যাসি লোকান্তরং
যাসি সর্বদা স্ফুরসি সর্বহৃদি বাসসি .
নমস্তে পরারূপে নমস্তে পশ্যন্তীরূপে নমস্তে
মধ্যমারূপে নমস্তে বৈখরীরূপে সর্বতত্ত্বাত্মিকে
সর্ববিদ্যাত্মিকে সর্বশক্ত্যাত্মিকে সর্বদেবাত্মিকে
বসিষ্ঠেন মুনিনারাধিতে বিশ্বামিত্রেণ
মুনিনোপজীব্যমানে নমস্তে নমস্তে .
প্রাতরধীযানো রাত্রিকৃতং পাপং নাশযতি .
সাযমধীযানো দিবসকৃতং পাপং নাশযতি .
তত্সাযংপ্রাতঃ প্রযুঞ্জানঃ পাপোঽপাপোভবতি .
এবমক্ষমালিকযা জপ্তো মন্ত্রঃ সদ্যঃ সিদ্ধিকরো
ভবতীত্যাহ ভগবান্গুহঃ প্রজাপতিমিত্যুপনিঅষত্ ..
ॐ বাঙ্ মে মনসি প্রতিষ্ঠিতা মনো মে বাচি
প্রতিষ্ঠিতমাবিরাবীর্ম এধি .. বেদস্য ম আণীস্থঃ
শ্রুতং মে মা প্রহাসীরনেনাধীতেনাহোরাত্রা-
ন্সন্দধাম্যৃতং বদিষ্যামি সত্যং বদিষ্যামি .
তন্মামবতু তদ্বক্তারমবতু অবতু মামবতু
বক্তারমবতু বক্তারম্ ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইত্যক্ষমালিকোপনিষত্সমাপ্তা ..