দেবীচতুঃষষ্ট্যুপচারপূজাস্তোত্রম্

.. দেবীচতুঃষষ্ট্যুপচারপূজাস্তোত্রম্ ..

 অথ শ্রী দেবীচতুঃষষ্ট্যুপচারপূজাস্তোত্রম্

উষসি মাগধমঙ্গলগাযনৈঃ
ঝটিতি জাগৃহি জাগৃহি জাগৃহি .
অতিকৃপার্দ্রকটাক্ষনি঱ীক্ষণৈঃ
জগদিদং  জগদম্ব সুখীকুরু .. ১ ..
কনকমযবিতর্দিশোভমানং
দিশি দিশি পূর্ণসুবর্ণকুম্ভযুক্তম্ .
মণিমযমণ্টপমধ্যমেহি মাতঃ
মযি কৃপযাশু সমর্চনং গ্রহীতুম্ .. ২ ..
কনককলশশোভমানশীর্ষং
জলধরলম্বি সমুল্লসত্পতাকম্ .
ভগবতি তব সংনিবাসহেতোঃ
মণিমযমন্দিরমেতদর্পযামি .. ৩ ..
তপনীযমযী সুতূলিকা
কমনীযা মৃদুলোত্তরচ্ছদা .
নবরত্নবিভূষিতা মযা
শিবিকেযং জগদম্ব তেঽর্পিতা .. ৪ ..
কনকমযবিতর্দিস্থাপিতে তূলিকাঢযে
বিবিধকুসুমকীর্ণে কোটিবালার্কবর্ণে .
ভগবতি রমণীযে রত্নসিংহাসনেঽস্মিন্
উপবিশ পদযুগ্মং হেমপীঠে নিধায .. ৫ ..
মণিমৌক্তিকনির্মিতং মহান্তং
কনকস্তম্ভচতুষ্টযেন যুক্তম্ .
কমনীযতমং ভবানি তুভ্যং
নবমুল্লোচমহং সমর্পযামি .. ৬ ..
দূর্বযা সরসিজান্বিতবিষ্ণু-
কান্তযা চ সহিতং কুসুমাঢ্যম্ .
পদ্মযুগ্মসদৃশে পদযুগ্মে
পাদ্যমেতদুররীকুরু মাতঃ ..৭..
গন্ধপুষ্পযবসর্ষপদূর্বা-
সংযুতং তিলকুশাক্ষতমিশ্রম্ .
হেমপাত্রনিহিতং সহ রত্নৈঃ
অধ্যর্মেতদুররীকুরু মাতঃ .. ৮ ..
জলজদ্যুতিনা করেণ জাতী-
ফলতক্কোললবঙ্গগন্ধযুক্তৈঃ .
অমৃতৈরমৃতৌরিবাতিশীতৈঃ
ভগবত্যাচমনং বিধীযতাম্ .. ৯ ..
নিহিতং কনকস্য সংপুটে
পিহিতং রত্নপিধানকেন যত্ .
তদিদং জগদম্ব তেঽর্পিতং
মধুপর্কং জননি প্রগৃহ্যতাম্ .. ১০ ..
এতচ্চম্পকতৈলমম্ব বিবিধৈঃ পুষ্পৈঃ মুহুর্বাসিতং
ন্যস্তং রত্নমযে সুবর্ণচষকে ভৃঙ্গৈঃ ভ্রমদ্ভিঃ বৃতম্ .
সানন্দং সুরসুন্দরীভিরভিতো হস্তৈঃ ধৃতং তে মযা
কেশেষু ভ্রমরভ্রমেষু সকলেষ্বঙ্গেষু চালিপ্যতে .. ১১ ..
মাতঃ কুঙ্কুমপঙ্কনির্মিতমিদং দেহে তবোদ্বর্তনং
ভক্ত্যাহং কলযামি হেমরজসা সংমিশ্রিতং কেসরৈঃ .
কেশানামলকৈঃ বিশোধ্য বিশদান্কস্তূরিকোদঞ্চিতৈঃ
স্নানং তে নবরত্নকুম্ভসহিতৈঃ সংবাসিতোষ্ণোদকৈঃ .. ১২ ..
দুধিদুগ্ধঘৃতৈঃ সমাক্ষিকৈঃ
সিতযা শর্করযা সমন্বিতৈঃ .
স্নপযামি তবাহমাদরাত্
জননি ত্বাং পুনরুষ্ণবারিভিঃ .. ১৩ ..
এলোশীরসুবাসিতৈঃ সকুসুমৈর্গঙ্গাদি তীর্থোদকৈঃ
মাণিক্যামলমৌক্তিকামৃতরসৈঃ স্বচ্ছৈঃ সুবর্ণোদকৈঃ .
মন্ত্রান্বৈদিকতান্ত্রিকান্পরিপঠন্সানন্দমত্যাদরাত্
স্নানং তে পরিকল্পযামি জননি স্নেহাত্ত্বমঙ্গীকুরু .. ১৪ ..
বালার্কদ্যুতি দাডিমীযকুসুমপ্রস্পর্ধি সর্বোত্তমং
মাতস্ত্বং পরিধেহি দিব্যবসনং ভক্ত্যা মযা কল্পিতম্ .
মুক্তাভিঃ গ্রথিতং সুকঞ্চুকমিদং স্বীকৃত্য পীতপ্রভং
তপ্তস্বর্ণসমানবর্ণমতুলং প্রাবর্ণমঙ্গীকুরু .. ১৫ ..
নবরত্নমযে মযার্পিতে
কমনীযে তপনীযপাদুকে .
সবিলাসমিদং পদদ্বযং
কৃপযা দেবি তযোর্নিধীযতাম্ .. ১৬ ..
বহুভিরগরুধূপৈঃ সাদরং ধূপযিত্বা
ভগবতি তব কেশান্কঙ্কতৈর্মার্জযিত্বা .
সুরভিভিররবিন্দৈশ্চম্পকৈশ্চার্চযিত্বা
ঝটিতি কনকসূত্রৈর্জূটযন্বেষ্টযামি .. ১৭ ..
সৌবীরাঞ্জনমিদমম্ব চক্ষুষোস্তে
বিন্যস্তং কনকশলাকযা মযা যত্ .
তন্ন্যূনং মলিনমপি ত্বদক্ষিসঙ্গাত্
ব্রহ্মেন্দ্রাদ্যভিলষণীযতামিযায .. ১৮ ..
মঞ্জীরে পদযোর্নিধায রুচিরাং বিন্যস্য কাঞ্চীং কটৌ
মুক্তাহারমুরোজযোরনুপমাং নক্ষত্রমালাং গলে .
কেযূরাণি ভুজেষু রত্নবলযশ্রেণীং করেষু ক্রমা-
ত্তাটঙ্কে তব কর্ণযোর্বিনিদধে শীর্ষে চ চূডামণিম্ .. ১৯ ..
ধম্মিল্লে তব দেবি হেমকুসুমান্যাধায ফালস্থলে
মুক্তারাজিবিরাজমানতিলকং নাসাপুটে মৌক্তিকম্ .
মাতর্মৌক্তিকজালিকাং চ কুচযোঃ সর্বাঙ্গুলীষূর্মিকাঃ
কটখাং কাঞ্চনকিঙ্কিণীর্বিনিদধে রত্নাবতংসং শ্রুতৌ .. ২০ ..
মাতঃ ফালতলে তবাতিবিমলে কাশ্মীরকস্তূরিকা-
কর্পূরাগরুভিঃ করোমি তিলকং দেহেঽঙ্গরাগং ততঃ .
বক্ষোজাদিষু যক্ষকর্দমরসং সিক্ত্বা চ পুষ্পদ্রবং
পাদৌ চন্দনলেপনাদিভিরহং সংপূজযামি ক্রমাত্ .. ২১ ..
রত্নাক্ষতৈস্ত্বাং পরিপূজযামি
মুক্তাফলৈর্বা রুচিরৈরবিদ্ধৈঃ .
অখণ্ডিতৈর্দেবি যবাদিভির্বা
কাশ্মীরপঙ্কাঙ্কিততণ্ডুলৈর্বা .. ২২ ..
জননি চম্পকতলৈমিদং পুরো
মৃগমদোপযুতং পটবাসকম্ .
সুরভিগন্ধমিদং চ চতুঃসমং
সপদি সর্বমিদং পরিগৃহ্যতাম্ .. ২৩ ..
সীমন্তে তে ভগবতি মযা সাদরং ন্যস্তমেতত্
সিন্দূরং মে হৃদযকমলে হর্ষবর্ষং তনোতি .
বালাদিত্যদ্যুতিরিব সদা লোহিতা যস্য কান্তী-
রন্তর্ধ্বান্তং হরতি সকলং চেতসা চিন্তযৈব .. ২৪ ..
মন্দারকুন্দকরবীরলবঙ্গপুষ্পৈঃ
ত্বাং দেবি সন্ততং অহং পরিপূজযামি .
জাতীজপাবকুলচম্পককেতকাদি-
নানাবিধানি কুসুমানি চ তেঽর্পযামি .. ২৫ ..
মালতীবকুলহেমপুষ্পিকা-
কাঞ্চনারকরবীরকৈতকৈঃ .
কর্ণিকারগিরিকর্ণিকাদিভিঃ
পূজযামি জগদম্ব তে বপুঃ .. ২৬ ..
পারিজাতশতপত্রপাটলৈঃ
মল্লিকাবকুলচম্পকাদিভিঃ .
অম্বুজৈঃ সুকুসুমৈশ্চ সাদরং
পূজযামি জগদম্ব তে বপুঃ .. ২৭ ..
লাক্ষাসংমিলিতৈঃ সিতাভ্রসহিতৈঃ শ্রীবাসসংমিশ্রিতৈঃ
কর্পূরাকলিতৈঃ শিরৈর্মধুযুতৈর্গোসর্পিষা লোডিতৈঃ .
শ্রীখণ্ডাগরুগুগ্গুলুপ্রভৃতিভির্নানাবিধৈর্বস্ত্তুভিঃ
ধূপং তে পরিকল্পযামি জননি স্নেহাত্ত্বমঙ্গীকুরু .. ২৮ ..
রত্নালংকৃতহেমপাত্রনিহিতৈর্গোসর্পিষা লোডিতৈঃ
দীপৈর্দীর্ঘতরান্ধকারভিদুরৈর্বালার্ককোটিপ্রভৈঃ .
আতাম্রজ্বলদুজ্জ্বলপ্রবিলসদ্রত্নপ্রদীপৈস্তথা
মাতস্ত্বামহমাদরাদনুদিনং নীরাজযাম্যুচ্চকৈঃ .. ২৯ ..
মাতস্ত্বাং দধিদুগ্ধপাযসমহাশাল্যন্নসংতানিকাঃ
সূপাপূপসিতাঘৃতৈঃ সবটকৈঃ সক্ষৌদ্ররম্ভাফলৈঃ .
এলাজীরকহিঙ্গুনাগরনিশাকুস্তুম্ভরীসংস্কৃতৈঃ
শাকৈঃ সাকমহং সুধাধিকরসৈঃ সংতর্পযাম্যর্চযন্ .. ৩০ ..
সাপূপসূপদধিদুগ্ধসিতাঘৃতানি
সুস্বাদুভক্তপরমান্নপুরঃসরাণি .
শাকোল্লসন্মরিচিজীরকবাহ্নিকানি
ভক্ষ্যাণি ভুঙ্ক্ষ্ব জগদম্ব মযার্পিতানি .. ৩১ ..
ক্ষীরমেতদিদংমুত্তমোত্তমং
প্রাজ্যমাজ্যমিদমুজ্জ্বলং মধু .
মাতরেতদমৃতোপমং পযঃ
সংভ্রমেণ পরিপীযতাং মুহুঃ .. ৩২ ..
উষ্ণোদকৈঃ পাণিযুগং মুখং চ
প্রক্ষাল্য মাতঃ কলধৌতপাত্রে .
কর্পূরমিশ্রেণ সকুঙ্কুমেন
হস্তৌ সমুদ্বর্তয চন্দনেন .. ৩৩ ..
অতিশীতমুশীরবাসিতং
তপনীযে কলশে নিবেশিতম্ .
পটপূতমিদং জিতামৃতং
শুচি গঙ্গাজলমম্ব পীযতাম্ .. ৩৪ ..
জম্ববাম্ররম্ভাফলসংযুতানি
দ্রাক্ষাফলক্ষৌদ্রসমন্বিতানি .
সনারিকেলানি সদাডিমানি
ফলানি তে দেবি সমর্পযামি .. ৩৫ ..
কূশ্মাণ্ডকোশাতকিসংযুতানি
জম্বীরনারঙ্গসমন্বিতানি .
সবীজপূরাণি সবাদরাণি
ফলানি তে দেবি সমর্পযামি .. ৩৬ ..
কর্পূরেণ যুতৈর্লবঙ্গসহিতৈস্তক্কোলচূর্ণান্বিতৈঃ
সুস্বাদুক্রমুকৈঃ সগৌরখদিরৈঃ সুস্নিগ্ধজাতীফলৈঃ .
মাতঃ কৈতকপত্রপাণ্ডুরুচিভিস্তাম্বূলবল্লীদলৈঃ
সানন্দং মুখমণ্ডনার্থমতুলং তাম্বূলমঙ্গীকুরু .. ৩৭ ..
এলালবঙ্গাদিসমন্বিতানি
তক্কোলকর্পূরবিমিশ্রিতানি .
তাম্বূলবল্লীদলসংযুতানি
পূগানি তে দেবি সমর্পযামি .. ৩৮ ..
তাম্বূলনির্জিতসুতপ্তসুবর্ণবর্ণং
স্বর্ণাক্তপূগফলমৌক্তিকচূর্ণযুক্তম্ .
সৌবর্ণপাত্রনিহিতং খদিরেন সার্ধং
তাম্বূলমম্ব বদনাম্বুরুহে গৃহাণ .. ৩৯ ..
মহতি কনকপাত্রে স্থাপযিত্বা বিশালান্
ডমরুসদৃশরূপান্বদ্ধগোধূমদীপান্ .
বহুঘৃতমথ তেষু ন্যস্য দীপান্প্রকৃষ্টা-
ন্ভুবনজননি কুর্বে নিত্যমারার্তিকং তে .. ৪০ ..
সবিনযমথ দত্বা জানুযুগ্মং ধরণ্যাং
সপদি শিরসি ধৃত্বা পাত্রমারার্তিকস্য .
মুখকমলসমীপে তেঽম্ব সার্থং ত্রিবারং
ভ্রমযতি মযি ভূযাত্তে কৃপার্দ্রঃ কটাক্ষঃ .. ৪১ ..
অথ বহুমণিমিশ্রৈর্মৌক্তিকৈস্ত্বাং বিকীর্য
ত্রিভুবনকমনীযৈঃ পূজযিত্বা চ বস্ত্রৈঃ .
মিলিতবিবিধমুক্তাং দিব্যমাণিক্যযুক্তাং
জননি কনকবৃষ্টিং দক্ষিণাং তেঽর্পযামি .. ৪২ ..
মাতঃ কাঞ্চনদণ্ডমণ্ডিতমিদং পূর্ণেন্দুবিম্বপ্রভং
নানারত্নবিশোভিহেমকলশং লোকত্রযাহ্লাদকম্ .
ভাস্বন্মৌক্তিকজালিকাপরিবৃতং প্রীত্যাত্মহস্তে ধৃতং
ছত্রং তে পরিকল্পযামি শিরসি ত্বষ্ট্রা স্বযং নির্মিতম্ .. ৪৩ ..
শরদিন্দুমরীচিগৌরবর্ণৈ-
র্মণিমুক্তাবিলসত্সুবর্ণদণ্ডৈঃ .
জগদম্ব বিচিত্রচামরৈস্ত্বা-
মহমানন্দভরেণ বীজযামি .. ৪৪ ..
মার্তাণ্ডমণ্ডলনিভো জগদম্ব যোঽযং
ভক্ত্যা মযা মণিমযো মুকুরোঽর্পিতস্তে .
পূর্ণেন্দুবিম্বরুচিরং বদনং স্বকীয-
মস্মিন্বিলোকয বিলোলবিলোচনে ত্বম্ .. ৪৫ ..
ইন্দ্রাদযো নতিনতৈর্মকুটপ্রদীপৈ-
র্নীরাজযন্তি সততং তব পাদপীঠম্ .
তস্মাদহং তব সমস্তশরীরমেত-
ন্নীরাজযামি জগদম্ব সহস্রদীপৈঃ .. ৪৬ ..
প্রিযগতিরতিতুঙ্গো রত্নপল্যাণযুক্তঃ
কনকমযবিভূষঃ স্নিগ্ধগম্ভীরঘোষঃ .
ভগবতি কলিতোঽযং বাহনার্থং মযা তে
তুরগশতসমেতো বাযুবেগস্তুরংগঃ .. ৪৭ ..
মধুকরবৃতকুম্ভন্যস্তসিন্দূররেণুঃ
কনককলিতঘণ্টাকিঙ্কণীশোভিকণ্ঠঃ .
শ্রবণযুগলচঞ্চচ্চামরো মেঘতুল্যো
জননি তব মুদে স্যান্মত্তমাতঙ্গ এষঃ .. ৪৮ ..
দ্রুততরতুরগৈর্বিরাজমানং
মণিমযচক্রচতুষ্টযেন যুক্তম্ .
কনকমযমমুং বিতানবন্তং
ভগবতি তে হি রথং সমর্পযামি .. ৪৯ ..
হযগজরথপত্তিশোভমানং
দিশি দিশি দুন্দুভিমেঘনাদযুক্তম্ .
অতিবহু চতুরঙ্গসৈন্যমেত-
দ্ভগবতি ভক্তিভরেণ তেঽর্পযামি .. ৫০ ..
পরিঘীকৃতসপ্তসাগরং
বহুসংপত্সহিতং মযাম্ব তে বিপুলম্ .
প্রবলং ধরণীতলাভিধং
দৃঢদুর্গং নিখিলং সমর্পযামি .. ৫১ ..
শতপত্রযুতৈঃ স্বভাবশীতৈঃ
অতিসৌরভ্যযুতৈঃ পরাগপীতৈঃ .
ভ্রমরীমুখরীকৃতৈরনন্তৈঃ
ব্যজনৈস্ত্বাং জগদম্ব বীজযামি .. ৫২ ..
ভ্রমরলুলিতলোলকুন্তলালী-
বিগলিতমাল্যবিকীর্ণরঙ্গভূমিঃ .
ইযমতিরুচিরা নটী নটন্তী
তব হৃদযে মুদমাতনোতু মাতঃ .. ৫৩ ..
মুখনযনবিলাসলোলবেণী-
বিলসিতনির্জিতলোলভৃঙ্গমালাঃ .
যুবজনসুখকারিচারুলীলা
ভগবতি তে পুরতো নটন্তি বালাঃ .. ৫৪ ..
ভ্রমদলিকুলতুল্যালোলধম্মিল্লভারাঃ
স্মিতমুখকমলোদ্যদ্দিব্যলাবণ্যপূরাঃ .
অনুপমিতসুবেষা বারযোষা নটন্তি
পরভৃতকলকণ্ঠ্যো দেবি দৈন্যং ধুনোতু .. ৫৫ ..
ডমরুডিণ্ডিমজর্ঝরঝল্লরী-
মৃদুরবদ্রগডদ্দ্রগডাদযঃ .
ঝটিতি ঝাঙ্কৃতঝাঙ্কৃতঝাঙ্কৃতৈঃ
বহুদযং হৃদযং সুখযন্তু তে .. ৫৬ ..
বিপঞ্চীষু সপ্তস্বরান্বাদযন্ত্য-
স্তব দ্বারি গাযন্তি গন্ধর্বকন্যাঃ .
ক্ষণং সাবধানেন চিত্তেন মাতঃ
সমাকর্ণয ত্বং মযা প্রার্থিতাসি .. ৫৭ ..
অভিনযকমনীযৈর্নর্তনৈর্নর্তকীনাং
ক্ষনমপি রমযিত্বা চেত এতত্ত্বদীযম্ .
স্বযমহমতিচিতৈর্নৃত্তবাদিত্রগীতৈঃ
ভগবতি ভবদীযং মানসং রঞ্জযামি .. ৫৮ ..
তব দেবি গুণানুবর্ণনে
চতুরা নো চতুরাননাদযঃ .
তদিহৈকমুখেষু জন্তুষু
স্তবনং কস্তব কর্তুমীশ্বরঃ .. ৫৯ ..
পদে পদে যত্পরিপূজকেভ্যঃ সদ্যোঽশ্বমেধাদিফলং দদাতি .
তত্সর্বপাপক্ষয হেতুভূতং প্রদক্ষিণং তে পরিতঃ করোমি .. ৬০ ..
রক্তোত্পলারক্তলতাপ্রভাভ্যাং ধ্বজোর্ধ্বরেখাকুলিশাঙ্কিতাভ্যাম্ .
অশেষবৃন্দারকবন্দিতাভ্যাং নমো ভবানীপদপঙ্কজাভ্যাম্ .. ৬১ ..
চরণনলিনযুগ্মং পঙ্কজৈঃ পূজযিত্বা
কনককমলমালাং কন্ঠদেশেঽর্পযিত্বা .
শিরসি বিনিহিতোঽযং রত্নপুষ্পাঞ্জলিস্তে
হৃদযকমলমধ্যে দেবি হর্ষং তনোতু .. ৬২ ..
অথ মণিমযঞ্চকাভিরামে
কনকমযবিতানরাজমানে .
প্রসরদগরুধূপধূপিতেঽস্মি-
ন্ভগবতি ভবনেঽস্তু তে নিবাসঃ .. ৬৩ ..
এতস্মিন্মণিখচিতে সুবর্ণপীঠে
ত্রৈলোক্যাভযবরদৌ নিধায হস্তৌ .
বিস্তীর্ণে মৃদুলতরোত্তরচ্ছদেঽস্মি-
ন্পর্যঙ্কে কনকমযে নিষীদ মাতঃ .. ৬৪ ..
তব দেবি সরোজচিহ্নযোঃ পদযোর্নির্জিতপদ্মরাগযোঃ .
অতিরক্ততরৈরলক্তকৈঃ পুনরুক্তাং রচযামি রক্ততাম্ .. ৬৫ ..
অথ মাতরুশীরবাসিতং নিজতাম্বূলরসেন রঞ্জিতম্ .
তপনীযমযে হি পট্টকে মুখগণ্ডূচজলং বিধীযতাম্ .. ৬৬ ..
ক্ষণমথ জগদম্ব মঞ্চকেঽস্মি-
ন্মৃদুতলতূলিকযা বিরাজমানে .
অতিরহসি মুদা শিবেন সার্ধং
সুখশযনং কুরু তত্র মাং স্মরন্তী .. ৬৭ ..
মুক্তাকুন্দেন্দুগৌরাং মণিমযকুটাং রত্নতাটঙ্কযুক্তা-
মক্ষস্রক্পুষ্পহস্তামভযবরকরাং চন্দ্রচূডাং ত্রিনেত্রাম্ .
নানালংকারযুক্তাং সুরমকুটমণিদ্যোতিতস্বর্ণপীঠাং
সানন্দাং সুপ্রসন্নাং ত্রিভুবনজননীং চেতসা চিন্তযামি .. ৬৮ ..
এষা ভক্ত্যা তব বিরচিতা যা মযা দেবি পূজা
স্বীকৃত্যৈনাং সপদি সকলান্মেঽপরাধান্ক্ষমস্ব .
ন্যূনং যত্তত্তব করুণযা পূর্ণতামেতু সদ্যঃ
সানন্দং মে হৃদযকমলে তেঽস্তু নিত্যং নিবাসঃ .. ৬৯ ..
পূজামিমাং যঃ পঠতি প্রভাতে
মধ্যাহ্নকালে যদি বা প্রদোষে .
ধ্রমার্থকামান্পুরুষোঽভ্যুপৈতি
দেহাবসানে শিবভাবমেতি .. ৭০ ..
পূজামিমাং পঠেন্নিত্যং পূজাং কর্তুমনীশ্বরঃ .
পূজাফলমবাপ্নোতি বাঞ্ছিতার্থং চ বিন্দতি .. ৭১ ..
প্রত্যহং ভক্তিসংযুক্তো যঃ পূজনমিদং পঠেত্ .
বাগ্বাদিন্যাঃ প্রসাদেন বত্সরাত্স কবির্ভবেত্ .. ৭২ ..
ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ
দেবীচতুঃষষ্ট্যুপচারপূজাস্তোত্রং সংপূর্ণম্ ..