রাজরাজেশ্বরীস্তবঃ

.. রাজরাজেশ্বরীস্তবঃ ..

           ত্যাগরাজবিরচিতঃ
যা ত্রৈলোক্যকুটুম্বিকা বরসুধাধারাভিসংতর্পিণী
ভূম্যাদীন্দ্রিযচিত্তচেতনপরা সংবিন্মযী শাশ্বতী .
ব্রহ্মেন্দ্রাচ্যুতবন্দিতেশমহিষী বিজ্ঞানদাত্রী সতাং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১..
যাং বিদ্যেতি বদন্তি শুদ্ধমতযো বাচাং পরাং দেবতাং
ষট্চক্রান্তনিবাসিনীং কুলপথপ্রোত্সাহসংবর্ধিনীম্ .
শ্রীচক্রাঙ্কিতরূপিণীং সুরমণের্বামাঙ্কসংশোভিনীং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ২..
যা সর্বেশ্বরনাযিকেতি ললিতেত্যানন্দসীমেশ্বরী-
ত্যম্বেতি ত্রিপুরেশ্বরীতি বচসাং বাগ্বাদিনীত্যন্নদা .
ইত্যেবং প্রবদন্তি সাধুমতযঃ স্বানন্দবোধোজ্জ্বলাঃ
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৩..
যা প্রাতঃ শিখিমণ্ডলে মুনিজনৈর্গৌরী সমারাধ্যতে
যা মধ্যে দিবসস্য ভানুরুচিরা চণ্ডাংশুমধ্যে পরম্ .
যা সাযং শশিরূপিণী হিমরুচের্মধ্যে ত্রিসংধ্যাত্মিকা
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৪..
যা মূলোত্থিতনাদসংততিলবৈঃ সংস্তূযতে যোগিভিঃ
যা পূর্ণেন্দুকলামৃতৈঃ কুলপথে সংসিচ্যতে সংততম্ .
যা বন্ধত্রযকুম্ভিতোন্মনিপথে সিদ্ধ্যষ্টকেনেড্যতে
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৫..
যা মূকস্য কবিত্ববর্ষণসুধাকাদম্বিনী শ্রীকরী
যা লক্ষ্মীতনযস্য জীবনকরী সংজীবিনীবিদ্যযা .
যা দ্রোণীপুরনাযিকা দ্বিজশিশোঃ স্তন্যপ্রদাত্রী মুদা
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৬..
যা বিশ্বপ্রভবাদিকার্যজননী ব্রহ্মাদিমূর্ত্যাত্মনা
যা চন্দ্রার্কশিখিপ্রভাসনকরী স্বাত্মপ্রভাসত্তযা .
যা সত্ত্বাদিগুণত্রযেষু সমতাসংবিত্প্রদাত্রী সতাং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৭..
যা ক্ষিত্যন্তশিবাদিতত্ত্ববিলসত্স্ফূর্তিস্বরূপা পরং
যা ব্রহ্মাণ্দকটাহভারনিবহন্মণ্ডূকবিশ্বংভরী .
যা বিশ্বং নিখিলং চরাচরমযং ব্যাপ্য স্থিতা সংততং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৮..
যা বর্গাষ্টকবর্ণপঞ্জরশুকী বিদ্যাক্ষরালাপিনী
নিত্যানন্দপযোঽনুমোদনকরী শ্যামা মনোহারিণী .
সত্যানন্দচিদীশ্বরপ্রণযিনী স্বর্গাপবর্গপ্রদা
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ৯..
যা শ্রুত্যন্তসুশুক্তিসংপুটমহামুক্তাফলং সাত্ত্বিকং
সচ্চিত্সৌখ্যপযোদবৃষ্টিফলিতং সর্বাত্মনা সুন্দরম্ .
নির্মূল্যং নিখিলার্থদং নিরুপমাকারং ভবাহ্লাদদং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১০..
যা নিত্যাব্রতমণ্ডলস্তুতপদা নিত্যার্চনাতত্পরা
নিত্যানিত্যবিমর্শিনী কুলগুরোর্বাবযপ্রকাশাত্মিকা .
কৃত্যাকৃত্যমতিপ্রভেদশমনী কাত্স্নর্যাত্মলাভপ্রদা
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১১..
যামুদ্দিশ্য যজন্তি শুদ্ধমতযো নিত্যং পরাগ্নৌ স্রুচা
মত্যা প্রাণঘৃতপ্লুতেন্দ্রিযচরুদ্রব্যৈঃ সমন্ত্রাক্ষরৈঃ .
যত্পাদাম্বুজভক্তিদার্ঢ্যসুরসপ্রাপ্ত্যৈ বুধাঃ সংততং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১২..
যা সংবিন্মকরন্দপুষ্পলতিকাস্বানন্দদেশোত্থিতা
সত্সংতানসুবেষ্টনাতিরুচিরা শ্রেযঃফলং তন্বতী .
নির্ধূতাখিলবৃত্তিভক্তধিষণাভৃঙ্গাঙ্গনাসেবিতা
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১৩..
যামারাধ্য মুনির্ভবাব্ধিমতরত্ ক্লেশোর্মিজালাবৃতং
যাং ধ্যাত্বা ন নিবর্ততে শিবপদানন্দাব্ধিমগ্নঃ পরম্ .
যাং স্মৃত্বা স্বপদৈকবোধমযতে স্থূলেঽপি দেহে জনঃ
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১৪..
যাপাষাঙ্কুশচাপসাযককরা চন্দ্রার্ধচূডালসত্
কাঞ্চীদামবিভূষিতা স্মিতমুখী মন্দারমালাধরা .
নীলেন্দীবরলোচনা শুভকরী ত্যাগাধিরাজেশ্বরী
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১৫..
যা ভক্তেষু দদাতি সংততসুখং বাণীং চ লক্ষ্মীং তথা
সৌন্দর্যং নিগমাগমার্থকবিতাং সত্পুত্রসংপত্সুখম্ .
সত্সঙ্গং সুকলত্রতাং সুবিনযং সযুজ্যমুক্তিং পরাং
তাং বন্দে হৃদযত্রিকোণনিলযাং শ্রীরাজরাজেশ্বরীম্ .. ১৬..
ইত্যানন্দনাথপাদপপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতঃ শ্রীরাজরাজেশ্বরীস্তবঃ সংপূর্ণঃ ..