মহাষোডশীবর্ণরত্নাবলিস্তোত্রম্

.. মহাষোডশীবর্ণরত্নাবলিস্তোত্রম্ ..

হ্রীংকারাঙ্কণদীপিকাং শ্রিতজনানন্দপ্রদাং শ্রীমতীং
শ্রীনাথাদ্যমরার্চিতঙ্ঘ্রিকমলাং শ্রীসুন্দরীং ভাবযে .
শ্রীমন্মঞ্জুলরত্নসানুবিলসন্মধ্যস্থকূটাগ্রগ-
শ্রীমন্নাগরমধ্যলাসিসুমহচ্ছ্রীচক্রবিন্দৌ স্থিতাম্ .. ১..
হ্রীংকারামৃতসিন্ধুকৌস্তুভমণিং হ্রীংকারমধ্যস্থিতাং
হ্রীংকারোন্নতরত্নসৌধবলভীসংলাসিপারাবতীম্ .
হ্঱ীংকারমরপাদপাগ্রবিহরত্সংহৃষ্টকেকীং ভজে
হ্রীংকারাম্বুদচঞ্চলাং হৃদি গতাং হ্রীংকারবর্ণাত্মিকাম্ .. ২..
ক্লীংকারাম্বুজপত্রভাস্করনিভাং ক্লীংকারচন্দ্রপ্রভাং
ক্লীংকারাগ্নিশিখাং ভজামি সততং ক্লীংকারপেটীমণিম্ .
ক্লীংকারোপবনান্যপুষ্টগৃহিণীং ক্লীংকারবেদ্যাত্মিকাং
ক্লীংকারাব্জহরপ্রিযাং পরতরাং ক্লীংকারবর্ণাত্মিকাম্ .. ৩..
ঐং ঐমিত্যনুচিন্তকাচ্ছহৃদযাম্ভোজাটবীহংসিকাং
ঈশিত্বাদিবিভূতিসংবৃতমহারত্নাসনে সংস্থিতা .
ঐশ্বর্যায ভবত্বখণ্ডবিভবা যাম্বা সদা মে গৃহে
চেশাদ্যর্চিতপাদপঙ্কজযুগা চৈশাঙ্কমঞ্চস্থিতা .. ৪..
সৌন্দর্যদ্রুমমঞ্জরী ভগবতী সৌবর্ণবর্ণাবতা-
ন্মাং সংসারমহাভযাদ্ দ্রুততরং সৌবর্নকুম্ভস্তনী .
সূর্যাব্জারিকৃশানুদৃক্ শশিকলোত্তংসা সদানন্দদা
সৌভাগ্যং দিশতাদথ প্রথিতমপ্যব্যাহতং ভূরি মে .. ৫..
ওংকারার্থনিরূপণৈকমনসা চোংকারনাদাত্মনা
শ্রীদেব্যা মম চিত্তভিত্তিরধুনা চিত্রাযতে চোজ্জ্বলা .
ওজোভির্জগদেতদদ্য বিপুলং যস্যাস্তযাব্জপ্রভৈ-
রোতপ্রোতমভূত্ কুসুম্ভকুরুবিন্দাব্জপ্রভাযাঃ সদা .. ৬..
হ্রীংকারাগমমস্তকং হৃদি কদা ভাযাদ্ বপুস্তে পরং
হ্রীংকারাব্ধিসুধামযং হৃতজপাশোণং হিতপ্রাপকম্ .
হ্রীংকারাদ্রিগুহাহরীন্দ্রশিশুকং হ্রীংকারকন্দাঙ্কুরং
হ্রীংকারাম্বুজসৌরভং হৃতজগজ্জালং জগন্নাযিকে .. ৭..
হ্রীংকারাধ্বরদক্ষিণে জননি তে পাদাব্জযুগ্মে সদা
ভক্তিং মে জনযাশু দেবি কৃপযা শ্রীদেবি তারাযিতে .
শ্রীমন্মঞ্জুলরত্ননির্মিতমহামঞ্জীরভূষোজ্জ্বলে
শ্রীশৃঙ্গাররসালযে শ্রিতজগত্স্বান্তাব্জিনীহংসিকে .. ৮..
কল্যাণ বিতনোতু কামমনিশং কামারিবামাঙ্কগা
কস্তূরীঘনসাররূষিতকুচাগ্রালম্বিমুক্তালতা .
কামাকর্ষণদিব্যপাশসুভগা কান্ত্যার্ককোটিপ্রভা
কল্যাণী কমলেক্ষণা কলিমলপ্রধ্বংসিনী কামদা .. ৯..
এতাবন্মম দেবি তে পদযুগে ভক্তির্দৃঢা ভূযসী
স্যান্নেত্রে চ জপাপ্রসূনরুচিরাযাস্ত্বত্তনোর্বীক্ষণে .
আনন্দাশ্রুপরিপ্লুতে বচনমপ্যম্ব স্তবে গদ্গদং
চেতস্ত্বন্মযমম্ব পশ্যতু জগত্ ত্বন্মূর্তিভাসারুণম্ .. ১০..
ঈশানাদিপদাঞ্চিতে শিবমযে মঞ্চে পরেশাঙ্কগা-
মীশিত্বাদ্যখিলাষ্টভূতিমনিশং দাত্রীং স্বভক্তায মে .
চাপং চৈক্ষবমাশুগং সুমমযং ক্রোধাত্মকং চাঙ্কুশং
পাশং রাগতনুং প্রণৌমি দধতীং শ্রীমন্মহাসুন্দরীম্ .. ১১..
লক্ষ্মীং চক্রনিবাসিনীং ললিতসংগীতপ্রিযাং লাকিনীং
লব্ধৈশ্চর্যসমুন্নতিং লযকরীং লাস্যপ্রিযামাশ্রযে .
লঙ্কানাযকবৈরিপূজিতপদাং লাবণ্যবারাংনিধিং
লক্ষ্মীপূজিতপাদপদ্মযুগলাং মোক্ষাখ্যলক্ষ্ম্যৈ সদা .. ১২..
হ্রীংকারার্ণসুধাং চ হৃদ্যমমরৈরীড্যং মহত্ তে বপুঃ
প্রালেযাংশুকলাবিলাসিমকুটং হ্রীংকারনাদাত্মকম্ .
যে ধ্যাযন্তি হৃদম্বুজে প্রতিদিনং তেষামনঙ্গজ্বর-
ক্লান্তাঃ স্যুর্বশমাগতাস্ত্বনুকলং বধ্বঃ সুরাণাং প্রিযাঃ .. ১৩..
হন্তাস্থাং মিতবৈভবেষু হরিমুখ্যেষ্বেব মূঢা জনা
ভক্তিং পামরদৈবতেষু বিবশাঃ কুর্বন্তি মোহাদিহ .
ত্যক্ত্বা ত্বাং পরদেবতাং হরিহরব্রহ্মাদিভিঃ সেবিতাং
সর্বৈশ্বর্যমহোদযাং খরমিমে সংত্যজ্য ধেনুং শ্রিতাঃ .. ১৪..
সর্বজ্ঞত্বমবাপ্য সংসদি সতাং শাস্ত্রেষু পাণ্ডিত্যম-
প্যম্বাযাঃ পদপদ্মসংস্মৃতিবশান্মূকোঽপি বাগ্মী ভবেত্ .
যস্যাস্তচ্চরণাম্বুজং হরিহরব্রহ্মাদিভির্বন্দিতং
মূঢাশ্চিন্তযতাশু বোঽপি তরসা দদ্যাত্ কবিত্বং শ্রিযঃ .. ১৫..
কল্যাণ্যম্ব কদম্বকাননগৃহে কল্পদ্রুমৈঃ কাঙ্ক্ষিতা-
দর্থাদর্থসমর্পণেঽধিকতরে কারুণ্যকল্লোলিভিঃ .
কর্ণান্তাযতলোচনাঞ্চলগতৈর্বীক্ষ্যাদ্য মামাতুরং
রক্ষাসু ত্রিপুরে পরাত্পরতরে শ্রীকামসংজীবিনি .. ১৬..
হস্ত্যুত্তুঙ্গপৃথূরুকুম্ভকুচযোর্বিন্যস্তহারেণ তা-
মারক্তাংশুকমাল্যভূষণবরৈরুদ্দীপ্যমানামুমাম্ .
হাহাহূহুমুখস্তুতামনুদিনং হৈযগবীনান্তরা-
মম্বামাদিমবাক্স্তুতামহমলং ধ্যাযাম্যভীষ্টাপ্তযে .. ১৭..
লব্ধজ্ঞানসুধাকরেণ মনসা লক্ষ্যীকৃতং তে বপুঃ
সদ্ভিঃ সংততমম্বুজাক্ষি ললিতে লগ্নং ভবত্বান্তরে .
লাবণ্যোজ্জ্বলদিব্যগাত্রি বিমলে লাক্ষারসালংকৃতং
শ্রীমত্পাদপযোজযুগ্মমধুনা মন্মূর্ধ্নি নিক্ষিপ্যতাম্ .. ১৮..
হ্রীংকারাব্ধিসুধে হ্রিযা বিরহিতে হ্রীংকারমন্ত্রার্থদে
হ্রীংকারপ্রিযশারিকে মযি কৃপাং হ্রীংকারনাদোদযে .
হ্রীংকারমলদর্পণপ্রতিকৃতে হ্রীংকারবেদ্যে শিবে
দীনে ময্যধুনা কুরুষ্ব দযযা হ্রীংকারদীপপ্রভে .. ১৯..
সংপত্কর্মণি দীক্ষিতানি সকলাপদ্ভঞ্জনান্যম্ব তে
মামেবাকলযন্তু পঙ্কজদলাক্ষেমংকরাণ্যাদরাত্ .
ব্রহ্মাদীন্ পদপদ্মলগ্নমকুটান্ হিত্বা কথংচিচ্ছিবে
নেত্রাণ্যদ্য কৃপাসুধারসঝরীসিক্তানি হে সুন্দরি .. ২০..
কল্পান্তে হৃত্সর্বলোকজঠরস্যানন্দনাট্যং মুদা
কর্তুর্যন্মণিকুণ্ডলীযুগলিকা দীপাযতে সংততম্ .
ব্রহ্মোপেন্দ্রমুখামরে বিরমতি ব্রহ্মাণ্ডভাণ্ডে পরং
সা পাশাঙ্কুশপুষ্পসাযকধনুর্বিদ্যোততান্মে হৃদি .. ২১..
লক্ষ্যং কিংচ ভবেন্মহাত্রিপুরসুন্দর্যাগমান্তৈর্নুতে
মাং লক্ষ্যীকুরু বীক্ষণাশুগততেস্ত্বামেব সর্বাত্মনা .
ধ্যাত্বা চেতসি সংস্থিতং জগদিদং ত্বদ্রূপমার্যে সদা
জ্ঞাত্বানন্যহৃদা বিহায ভজনং নশ্যত্সু দেবেষ্বিহ .. ২২..
হ্রীংকারস্মরণেন দেবি তরসা হ্রীমান্ সুধীমান্ ভবেত্
তে মূকোঽপি জডোঽপি পদ্মজনুষা সাপত্নিকোঽভূদ্ ভৃশম্ .
আশ্লিষ্যাম্বুধিকন্যকাং বিলসতি শ্রীমন্ত্ররাজাক্ষরং
তন্ময্যাদিশ দেবদেবি কৃপযা ধন্যোঽস্ম্যহং তেন চ .. ২৩..
সৌবর্ণোজ্জ্বলমণ্ডপে মরতকপ্রাকারভিত্তৌ বৃহ-
ন্নানারত্নমযাসনে শিবমযে শ্রীকামরাজাঙ্ককে .
তিষ্ঠন্তীং কুরুবিন্দবৃন্দরুচিরাং মাণিক্যভূষোজ্জ্বলাং
ধন্যাস্তে ভুবি চিন্তযন্তি মনসা যে শ্রীমহাসুন্দরীম্ .. ২৪..
ঐংকারাম্বুজকর্ণিকোজ্জ্বলমহদ্রত্নাসনে সংস্থিতাং
সিঞ্চন্তীমমৃতদ্রবৈঃ শশিশিলাস্পষ্টাভিরামপ্রভাম্ .
তেজোভির্জগদম্ব যে ভুবি ভজন্ত্যাপীনতুঙ্গস্তনীং
তেষামাননপঙ্কজে নিবসতে বাণী সুধাস্যন্দিনী .. ২৫..
ক্লীমিত্যক্ষরমেকমেব মনসা ধ্যাযন্তি যে মানবাঃ
কংদর্পাযুততুল্যসুন্দরতরশ্রীমূর্তযঃ শৈথিলম্ .
কুর্বন্তি স্ম রতেশ্চ নৈজবপুষা তে পাতিব্রত্যং সহ
স্পর্ধন্তে হৃতবাগ্রমাঃ কমলনাভাব্জাসনাভ্যাং সদা .. ২৬..
হ্রীংকারীং হৃদযাম্বুজেঽহমধুনা হ্রীংকারসৌধে শুভে
হ্রীংকারোন্নতরত্নমঞ্চফলকে হ্রীংকারশোণাম্বুজে .
হ্রীংকারাক্ষরমুচ্চরদ্ভগবতীমারোপ্য শোণপ্রভাং
হ্রীংকারাম্বুজবারিগন্ধফলতাম্বূলাদিভিস্তোষযে .. ২৭..
হ্রীংকারামৃতপাদমঞ্জুলমণীবেদ্যন্তরে ভাসুরাং
শ্রীদেবীং শ্রিতসর্বলোকসকলাভীষ্টপ্রদানোত্সুকাম্ .
শ্রীশ্রীমত্তনুমুদ্যদর্ককিরণাং শ্রীশাংভবীং শ্রীকরী-
মাত্মন্যৈক্যমুপাস্মহে পরতরাং নির্বাণসংসিদ্ধযে .. ২৮..
ইতি শ্রীমহাষোডশীবর্ণরত্নাবলিস্তোত্রং সংপূর্ণম্