রেণুকাস্তোত্রম্

.. রেণুকাস্তোত্রম্ ..

পাকামৃতাংশুমকুটাভরণা ভবানী
শোকাপহা নতজনস্য শুভাখিলাঙ্গী .
কোকাকৃতিস্তনভরা কুশলানি নিত্যং
মূকাম্বিকা মম তনোতু মুনীন্দ্রবন্দ্যা ..
শ্লোকস্যাদ্যন্তযোর্বাগ্ভবমুচ্চার্য পঠেদিতি সংপ্রদাযঃ .. ৐..
কালাগ্ন্যাদি শিবাবসানমখিলং তে গুল্ফদঘ্নং শিবে
মূর্তিং কীর্তযিতুং ন কস্য রসনা লজ্জাম্বুধৌ মজ্জতি .
তস্মাত্ ত্বচ্চরণৈকদেশনখরজ্যোতিঃস্ফুলিঙ্গা ইব
স্ফূর্জন্তি প্রভবিষ্ণবশ্চ সততং তে পদ্মনাভাদযঃ .. ১..
কল্পঃ কোঽপি স শাংভবো বিজযতে মাতস্ত্বযা কল্পিতো
যত্রানল্পবিকল্পজালবিমুখঃ কশ্চিদ্বিপশ্চিত্ পরঃ .
সা ত্বং সত্ত্ববতামপীহ সুলভা নৈবাসি কিং স্তূযসে
স্বচ্ছন্দং শিশবো যথা তব পুনঃ ক্রীডন্তি বেদা ইমে .. ২..
লীলাচামরধারিণীসহচরীগত্যা মহাসিদ্ধযো
নূনং বঞ্চযিতুং স্ফুরন্তি ভবতীকারুণ্যশূন্যং জনম্ .
অম্ব ত্বন্নযনাঞ্চলং করুণযা যস্মিন্ পরিক্রীডতে
তস্য দ্বারি নিবারিতোঽপি কুরুতে সেবাং সুরাণাং গণঃ .. ৩..
আ পাতালতলাত্ ফণীশ্বরশিরোরত্নাংশুনীরাজিতা-
দা সর্বজ্ঞনিকেতনাদপি শিখাযৌতাংশুধৌতাঙ্কণাত্ .
একচ্ছত্রমবাপ্য বৈভবমহো দীব্যন্তি তে সংততং
যে সংধ্যাচলনিশ্চলং তব পদং ধ্যাযন্তি গাযন্তি চ .. ৪..
যে ত্বামম্ব পলাশবিল্বকুসুমৈরুল্লাসিভির্মল্লিকা-
পুষ্পৈর্বা বনমল্লিকাবিরচিতৈরুদ্দামভির্দামভিঃ .
মুগ্ধোন্মীলিতমালতীভিরভিতঃ সংপূজযন্ত্যাদরাত্
তেষামুদ্ধৃতসৌরভা প্রতিদিনং ব্যাজৃম্ভতে ভারতী .. ৫..
ত্বাং সহ্যাচলমৌলিসুস্থিতপদাং শ্রী- একবীরাম্বিকে
যে লিম্পন্তি সচন্দ্রচন্দনরসৈস্তেষাং সুধাস্রাবিণী .
বাণীবিস্মযবর্ণ্যমানগিরিশব্যালোলগঙ্গাজল-
স্বচ্ছন্দোর্মিতপরংপরাবিজযিনী বাণী নরীনৃত্যতি .. ৬..
যে ত্বাং ব্রাহ্মমুহূর্তনির্মলধিযস্ত্বাধারতশ্চিন্তয-
ন্ত্যূর্ধ্বং মূর্ধ্নি সরোরুহেঽতিধবলে পীযূষধারাবৃতে .
তে মৃত্যুং সহসা বিজিত্য রচযন্ত্যুচ্চৈর্গতিং নিত্যশঃ
প্রত্যাদিষ্টপুরঃসুধাকরসুধাহংভাবসংভাবিতাঃ .. ৭..
যস্ত্বাং পশ্যতি তস্য নশ্যতি মহাপাপান্ধকারঃ ক্ষণাত্
কিং চার্ধাদপরে পুরাণপুরুষপ্রাণপ্রিযে পার্বতি .
মূর্ধ্নস্তস্য ততো ভবেত্ কৃতধিযঃ শ্রী- একবীরাম্বিকে
দৃশ্যন্তে ন মনাগপীহ যদিযং প্রত্যক্ষমুদ্যোতসে .. ৮..
কিং যোগেন কিমর্চনেন কিমথ জ্ঞানেন কিং কর্মণা
কিং ধ্যানেন কিমিজ্যযা কিমথবা দানেন কিং দীক্ষযা .
দৃশ্যন্তে যদি সহ্যশৈলশিখরশ্রীগর্বিতাঃ সর্বদা
মাতঃ পার্বতি রেণুকে তব পদাম্ভোজপ্রভাবিভ্রমাঃ .. ৯..
হে সহ্যাচলনিত্যকেলিরসিকে কর্পূরকস্তূরিকা-
বিন্যস্তাগরুকুঙ্কুমৈর্মলযজৈস্ত্বং চর্চিতাভ্যর্চিতা .
তে দীব্যন্তি সুরেন্দ্রমুখ্যবিবুধশ্রেণীকিরীটস্ফুর-
ন্মাণিক্যপ্রতিবিম্বিতারুণপদস্থাঃ সংপ্রদাঃ সংপদাম্ .. ১০..
হে সহ্যাদ্রিবিনিদ্রলিঙ্গবপুষি শ্রী- একবীরাম্বিকে
ত্বাং কৃষ্ণাগরুগুগ্গুলুপ্রভৃতিভির্যে ধূপযন্ত্যাদরাত্ .
তে কৈলাসনিবাসিনীভিরভিতঃ সংচারিতৈশ্চারুভি-
র্লীলাচামরমারুতৈশ্চিরতরং নন্দন্তি রুদ্রা ইব .. ১১..
মাতঃ শাংভবি জৃম্ভিতামৃতশিলালিঙ্গাত্মিকে রেণুকে
ত্বাং সহ্যাদ্রিশিরোবিহারসুলভাং নীরাজযন্ত্যাদরাত্ .
তে বৃন্দারকবৃন্দবন্দিতপদাশ্চন্দ্রার্কচূডামণি-
জ্যোতির্মেদুরমন্দিরাঙ্কণভুবো ভূতিং লভন্তেঽদ্ভুতাম্ .. ১২..
দূরাদঙ্গণরঙ্গসংগতরজোরাজীবিরাজদ্বপু-
স্তুভ্যং যঃ প্রণিপত্তিমম্ব কুরুতে কশ্চিত্ কদাচিত্ ক্বচিত্.
সংপ্রাপ্য শ্রিযমিন্দুসুন্দরযশঃসংদোহনিষ্যন্দিনী-
মন্তে নির্বিষযং স্বযং প্রবিশতি শ্রীশাংভবং বৈভবম্ .. ১৩..
ত্বামুদ্দিশ্য কদাপি কোঽপি কিমপি ক্বাপি প্রপদ্যন্ নরো
ভক্ত্যাবেশবশীকৃতো জপতি বা যো যজ্জুহোত্যাদরাত্ .
তত্ তস্যাক্ষযমেব দেবি ভবতি স্বর্গাপবর্গপ্রদং
ত্বন্নামস্মরণং গতো বিজযতে সর্বোঽপি শর্বো জনঃ .. ১৪..
মাতস্ত্বচ্চরণেন যাস্যতি চিরং রুদ্রোঽপি ভদ্রাশয-
শ্চূডাচন্দ্রকলামরীচিনিচযৈরাচান্তরত্নাসনৈঃ .
তত্ত্বানামুপরি স্থিতো বিজযতে বামাদিভির্নামভিঃ
শ্রীকামেশ্বরি দক্ষপুত্রি গিরিজে ত্বং রেণুকে রক্ষ মাম্ .. ১৫..
মাতর্ভৈরবি ভর্গপত্নি গিরিজে গাযত্রি গোত্রাত্মিকে
দুর্গে গৌরি সরস্বতি ত্রিণযনে শ্রীসিদ্ধলক্ষ্মী ধৃতে .
নিত্যে মৃত্যুবিকারহারিণি শিবে শ্রী- একবীরাম্বিকে
সোঽহং তে শরণাগতঃ করুণযা ত্বং রেণুকে রক্ষ মাম্ .. ১৬..
ইতি শ্রীরেণুকাস্তোত্রং সমাপ্তঃ..
পাকামৃতাংশুমকুটাভরণা ভবানী
শোকাপহা নতজনস্য শুভাখিলাঙ্গী .
কোকাকৃতিস্তনভরা কুশলানি নিত্যং
মূকাম্বিকা মম তনোতু মুনীন্দ্রবন্দ্যা ..
শ্লোকস্যাদ্যন্তযোর্বাগ্ভবমুচ্চার্য পঠেদিতি সংপ্রদাযঃ .. ৐..