শান্তিস্তবঃ

.. শান্তিস্তবঃ ..

.. ত্যাগরাজবিরচিতঃ..
স্বানন্দমন্দহসিতাং শিববামভাগাং
ভৃঙ্গাবলীকচভরাকলিতেন্দুমৌলিম্ .
শ্যামাং বিশালনযনামতিকোমলাঙ্গীং
বন্দে স্মরারিমহিলাং বরদাং শিবাখ্যাম্ .. ১..
কালদেশকলনাবিবর্জিতা স্বেচ্ছযৈব ভুবনান্যজীজনত্ .
ক্রীডতি স্বযমনেকভূমিকা সা শিবাহমিতি শান্তিমাশ্রযে .. ২..
স্বপ্রকাশশিবশক্তিরূপিণী সর্বভূতহৃদযাব্জহংসিকা .
নিষ্প্রকারসুখচন্দ্রচন্দ্রিকা সা শিবাহমিতি শান্তিমাশ্রযে .. ৩..
সর্বভূতহৃদযপ্রচোদিকা শর্ববিষ্ণুনিখিলাত্মরূপিণী .
নির্বিকাররসরূপলক্ষিতা সা শিবাহমিতি শান্তিমাশ্রযে .. ৪..
যা পরাদিবচসামগোচরা রূপনামরহিতা পরা বরা .
যা ত্রযীপ্রমুখমার্গদর্শিনী সা শিবাহমিতি শান্তিমাশ্রযে .. ৫..
নির্মমা নিখিললোকরক্ষণী কর্মকাণ্ডফলদানকামধুক্ .
আপ্তকামধিষণাত্মরূপিণী সা শিবাহমিতি শান্তিমাশ্রযে .. ৬..
পঞ্চকোশঘনমুক্তচন্দ্রিকা পঞ্চভূতজডবিশ্বদীপিকা .
পঞ্চমূর্তিরববিন্দুনাযিকা সা শিবাহমিতি শান্তিমাশ্রযে .. ৭..
চিদ্বিলাসজগদেকরূপিণী হ্যস্তিভাতিসুখরূপসত্তযা .
ষড্বিকাররহিতা নিরাশ্রযা সা শিবাহমিতি শান্তিমাশ্রযে .. ৮..
যাগযোগজপহোমকর্মভির্নৈব জাতু পরমা হি লভ্যতে .
প্রজ্ঞযা সহজযৈব যাপ্যতে সা শিবাহমিতি শান্তিমাশ্রযে .. ৯..
জাগ্রদাদিসমযেষু বৃত্তিষু ভ্রাজতে তনুষু সর্বসাক্ষিণী .
স্বর্ণবত্ সকলভূষণেষু যা সা শিবাহমিতি শান্তিমাশ্রযে .. ১০..
নেতি নেতি নিগমোক্তিবোধিতা জ্ঞানিনাং তু হৃদযে সদোজ্জ্বলা .
ভেদভাবগলনাত্ সদাত্মিকা সা শিবাহমিতি শান্তিমাশ্রযে .. ১১..
ভেদতো ভবতি ভীরিতি শ্রুতের্যান্তি তেন রহিতা যদেকতাম্ .
আপগাস্তু সরিতামিবেশ্বরে সা শিবাহমিতি শান্তিমাশ্রযে .. ১২..
নামরূপকুলধর্মবর্জিতা জন্মনাশরহিতা সদব্যযা .
কল্পনান্তসমযেঽপি যা স্থিরা সা শিবাহমিতি শান্তিমাশ্রযে .. ১৩..
কোটিকোটিজনিপুণ্যসংস্কৃতঃ সর্বকামরহিতো জিতেন্দ্রিযঃ
যাং বিভাব্য পরিমুচ্যতে ভবাত্ সা শিবাহমিতি শান্তিমাশ্রযে .. ১৪..
শাস্ত্রপাঠমননৈর্ন লভ্যতে ধৈর্যবীর্যনযতঃ পরাক্রমৈঃ .
কেবলং গুরুদৃশা প্রকাশতে সা শিবাহমিতি শান্তিমাশ্রযে .. ১৫..
প্রাণবুদ্ধিহৃদযাত্মসাক্ষিণী সর্বযজ্ঞপরিতৃপ্তিকামিনী .
জ্ঞানপুষ্পরসপূজিতাভযা সা শিবাহমিতি শান্তিমাশ্রযে .. ১৬..
যত্র নাস্তি নিখিলং চরাচরং হ্যেকরূপরসবস্ত্বভেদতঃ .
নেহ নেতি বিধিবাক্যচোদিতা সা শিবাহমিতি শান্তিমাশ্রযে .. ১৭..
যা গুরূক্তিসুধযা মনোমলে ক্ষালিতে সপদি সত্যচিন্মণিঃ .
দ্যোততে সকলধীপ্রভাসুরা সা শিবাহমিতি শান্তিমাশ্রযে .. ১৮..
দহ্যতে ন শিখিনা সদাব্যযা সত্তযা দহতি পাবকস্তৃণম্ .
শুষ্যতে ন মরুতাখিলেশ্বরী সা শিবাহমিতি শান্তিমাশ্রযে .. ১৯..
সিদ্ধ্যসাধ্যপরমন্ত্রবর্জিতা হ্যষ্টসিদ্ধিপরসিদ্ধিভূমিকা .
শুদ্ধচিত্তপরমামৃতাত্মিকা সা শিবাহমিতি শান্তিমাশ্রযে .. ২০..
দেহমানদলিতস্য যোগিনঃ সর্বতোঽপি পরিপূর্ণকামতা .
ভাতি যা পরমগুপ্তরূপিণী সা শিবাহমিতি শান্তিমাশ্রযে .. ২১..
ইন্দ্রজালমিদমল্পকালিকং বিশ্বমেবমিতি নিশ্চযাত্মনঃ .
বোধরূপত ইহৈব ভাতি যা সা শিবাহমিতি শান্তিমাশ্রযে .. ২২..
বিশ্বযোনিরমৃতাভযাক্ষরা নিত্যতৃপ্তিরজরা পরাত্পরা .
ইত্থমাগমবচোভিরীড্যতে সা শিবাহমিতি শান্তিমাশ্রযে .. ২৩..
সর্বদা সমরসাত্মরূপিণী সর্বলোকজননী হ্যরূপিণী .
শর্বনৃত্যসুখসাক্ষিণী চ যা সা শিবাহমিতি শান্তিমাশ্রযে .. ২৪..
ইন্দ্রিযার্থসুখবোধবোধিনী চন্দ্রভানুশিখিদীপ্তিকারিণী .
বন্ধবর্গভযমোহমোচিনী সা শিবাহমিতি শান্তিমাশ্রযে .. ২৫..
দেহজীবজগদীশবাধনে শিষ্যতে স্বযমনন্তরূপিণী .
ব্যাপিনী জগতি সংততং চ যা সা শিবাহমিতি শান্তিমাশ্রযে .. ২৬..
প্রাণবন্ধপরিশুদ্ধচেতসাং নির্বিকল্পসুখরূপিণী সদা .
চিন্মযী সদসদাত্মিকা চ যা সা শিবাহমিতি শান্তিমাশ্রযে .. ২৭..
যত্সুখাব্ধিলবলেশনিবৃতা ব্রহ্মবিষ্ণুসুরমানবাদযঃ .
সংভবন্তি যুগকল্পভেদতঃ সা শিবাহমিতি শান্তিমাশ্রযে .. ২৮..
ব্রহ্মলোকতৃণমানিনে সদা তৃপ্তিরূপপরশান্তিদাযিনী .
যোগিনে সমরসং দদাতি যা সা শিবাহমিতি শান্তিমাশ্রযে .. ২৯..
সর্বমেকরসমিত্যুদেতি যা নির্মলা নিরবধিশ্চ চেতসি .
দেশিকেন্দ্রপদভক্তিযোগিনঃ সা শিবাহমিতি শান্তিমাশ্রযে .. ৩০..
মাযিকস্য জগতঃ স্থিতির্যযা স্বপ্নকালনগরীব যোগিনঃ .
ভাসতে নিজসুখৈকভোগিনঃ সা শিবাহমিতি শান্তিমাশ্রযে .. ৩১..
নিস্তরঙ্গসুখসিন্ধুরূপিণীং যামনুস্মরতি বন্ধমুক্তযে .
শান্তিদান্তিধৃতিযুক্তযোগিরাট্ সা শিবাহমিতি শান্তিমাশ্রযে .. ৩২..
ভূতভাবিমতিবৃত্ত্যভাবিকাং বর্তমানসুখবৃত্তিভাসিকাম্ .
যেঽনুসংদধতি নিত্যমাদরাত্ সা শিবাহমিতি শান্তিমাশ্রযে .. ৩৩..
বুদ্ধিমোহপটলে ব্যপোহিতে শাণচক্রনিগমোক্তিতঃ স্বযম্ .
প্রস্ফুরত্যবিরতং চ চিন্মণিঃ সা শিবাহমিতি শান্তিমাশ্রযে .. ৩৪..
নাহমিত্যনৃতজাড্যভূমযঃ সচ্চিদেব সকলাত্মভাসকঃ .
ইত্থমেকরসরূপশেমুষী সা শিবাহমিতি শান্তিমাশ্রযে .. ৩৫..
বৃত্তিসংধিবিলসত্স্বরূপিণী প্রজ্ঞযা হৃদি বিভাব্যতে সদা .
নিত্যমুক্তিসুখকাঙ্ক্ষিণা দৃঢং সা শিবাহমিতি শান্তিমাশ্রযে .. ৩৬..
ত্যাগরাজসুখরূপিণী পরং যোগিরাজহৃদযোজ্জ্বলা সদা .
আগমাদ্যখিলমানবোধিতা সা শিবাহমিতি শান্তিমাশ্রযে .. ৩৭..
শান্তিস্তবং পঠতি নিত্যমনন্যভক্ত্যা
যো মানবো ভবতি শংকর এব সাক্ষাত্ .
সংসারদুঃখভযমোচনদক্ষকল্পং
স্বাত্মাপরোক্ষকরণে গুরুপাদকল্পম্ .. ৩৮..
ইত্যানন্দনাথপাদপপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতঃ শান্তিস্তবঃ সংপূর্ণঃ