লঘুষোডশার্ণকলাবিলাসঃ

.. লঘুষোডশার্ণকলাবিলাসঃ ..

কল্যাণং জগতামহং কথমুমে ধ্যাযামি সচ্চিদ্বপু-
স্ত্রয্যন্তৈর্মনসাপি তে সহ চিরং মৃগ্যাপি যত্নেন চ .
জ্ঞাতুম্ নো বদিতুং শক্যমভবদ্ যস্মাত্ তথা ভক্তিতঃ
শ্রীচক্রাগ্রগশৈবমঞ্চপরশৈবাঙ্কস্থিতাং ভাবযে .. ১..

এলাসৌরভিকুন্তলে পরমুমে ত্বাং ব্যাপ্য সর্বং স্থিতাং
কাষ্ঠাদিষ্বিব তৈলবহ্নিনবনীতাম্বুপ্রবাহাদিকম্ .
শ্রীমূর্তিষ্বতিসুন্দরাসু নববন্ধূকপ্রভাস্বম্বিকে
শক্যং কিং নু তথাপি তে পরশিবে চাস্থানমাবাহযে .. ২..

ঈশাবাস্যমিদং ত্বযা সকলমপ্যম্বাসনে মঞ্জুলে
ত্বামারোহযিতুং সমস্তভুবনাধারং কথং শক্নুযাম্ .
মত্স্বান্তাব্জমপি ত্বদাসনবরং ভূযাদ্যতঃ সর্বদা
সর্বেষাং হৃদযারবিন্দভবনে নিত্যং বসস্যম্বিকে .. ৩..

লক্ষ্যালক্ষ্যবিলক্ষণং তব বপুঃ পাদাদিহীনং পরং
পাদ্যৈস্তত্ পরিতোষযামি কথমপ্যত্যন্তমচ্ছাত্মকম্ .
মত্স্বান্তদ্রুতহেমরত্নকলশানীতাতিভক্ত্যম্বুনা
বিজ্ঞানামরসিন্ধুজেন রচযে প্রক্ষালনং ত্বত্পদে .. ৪..

হ্রীংকারদ্রুমমঞ্জরীশবিনুতেঽনর্ঘ্যায হস্তায তে
সর্বাভীষ্টফলপ্রদাননিরতাযার্ঘ্যং কথং কল্পযে .
গৃহ্ণীষ্বাম্ব মযা প্রদত্তমনঘে বিজ্ঞানপাত্রে স্থিতং
ত্বদ্রূপানুভবাম্বুকল্পিতমথাপ্যর্ঘ্যং মহাসুন্দরি .. ৫..

হন্ত ত্বন্মুখনির্গতেন সকলং পূতং জগত্ সর্বদা
বেদেনাচমনীযমদ্য সহসা দাতুং কথং শক্নুযাম্ .
তুভ্যং শ্রীপরদেবতে মযি তথাপ্যম্বানুকম্পাবশাদ্
গৃহ্ণীষ্বাচমনং প্রকল্পিতমুমে গন্ধাদিভির্মিশ্রিতম্ .. ৬..

সর্বং সর্বত এব পূর্ণবিভবে পূর্ণেন পূর্ণং কথং
ব্যাপ্য ত্বত্তনুমাস্থিতামতিতরাং শুদ্ধাং জগত্পাবনীম্ .
গাঙ্গৈর্নির্মলবারিভিঃ প্রভবতি প্রাণী জগত্যাং তথা-
প্যানন্দামৃতবারিণাহমভিষিঞ্চাভ্যাদরাদম্বিকে .. ৭..

কল্পয কল্পকবৃক্ষসংভবমহত্কৌসুম্ভবস্ত্রদ্বযং
নানারত্নবিচিত্রমম্ব পরমপ্রীত্যা কথং তে মযা .
ব্যাপিন্যৈ জগতাং তথাপি বিমলেনাচ্ছাদযে ত্বাং পরং
বিজ্ঞানাত্মকবাসসা পরশিবে গৃহ্ণীষ্ব তত্ প্রীতিতঃ .. ৮..

হংসস্ফাটিককুন্দসুন্দরতরশ্রীমূর্তিমার্যে শিবে
কর্পূরাগরুকুঙ্কুমাদিমিলিতৈর্গন্ধৈঃ কথং লেপযে .
শ্রুত্যুক্তাং তব সর্বগন্ধতনুগাং নির্লেপনাং নিষ্কলাং
ব্রহ্মাত্মৈক্যভবানুভূতিবিমলজ্ঞানাখ্যগন্ধৈঃ পরম্ .. ৯..

লগ্নেন্দূজ্জ্বলরেখমম্ব মকুটং মাণিক্যদীপ্ত্যুজ্জ্বলং
কালোন্মীলিতচম্পকাম্বুজমহদ্বিল্বীদলানাং স্রজা .
সংবেষ্ট্যাহমখণ্ডনির্মলপরানন্দাম্বুধৌ বা কদা
মজ্জে মন্মথবৈরিভামিনি বদ স্বানন্দবারাংনিধে .. ১০..

হ্রীংকারীং নিগমাগমান্তবিদিতাং ভক্ত্যা কথং তর্পযে
ধূপৈর্গুগ্গুলুসংভবৈর্জগদিদং সংব্যাপ্য নিত্যং স্থিতম্ .
শ্রীমূর্ত্যুদ্ভববাসনাভিরধুনা দিব্যাভিরারাধযে
সংবিদ্বহ্নিসমর্পিতাখিলজগত্কালাগরোর্ধূপকৈঃ .. ১১..

সর্বজ্ঞে সকলেষ্টদাননিরতে সামাদিভিঃ সংস্তুতে
তুভ্যং কল্পযিতুং প্রদীপমরুণে সাজ্যং কথং শক্নুযাম্ .
বালার্কাযুতকোটিসুন্দরতনো ভক্ত্যা তথাপ্যঞ্চিতে
বিজ্ঞানাত্মকদীপদীপ্তিভিরহং সংতর্পযাম্যম্বিকে .. ১২..

কল্যাণ্যম্ব কথং নিবেদিতুমহং নৈবেদ্যমার্যে শুভে
তপ্তাষ্টাপদভাজনোজ্জ্বলমুমে ভক্ষ্যাদিভিঃ সংযুতম্ .
শক্ষ্যে সংভৃতসর্বলোকজঠরাযৈ তুভ্যমত্যুজ্জ্বলং
বিশ্বাসেন সমর্পযামি জগদাত্মৈক্যান্নমানন্দদম্ .. ১৩..

লক্ষ্মীবন্দিতপাদপদ্মযুগলে লক্ষ্মীধবাদ্যর্চিতে
কর্পূরাজ্যলসত্সুবর্ণকলশপ্রোদ্ভাসি নীরাজনম্ .
নানাশোভনগীতনৃত্তসহিতং দিব্যাঙ্গনাভির্ধৃতং
বীক্ষ্যাদ্যাম্ব মুদং প্রযাহি কৃপযা শ্রীকামরাজেশ্বরি .. ১৪..

হ্রীংহ্রীমিত্যনুভাব্যতাং হৃততমঃপুঞ্জে সমস্তার্থদে
ত্বত্পাদাব্জযুগে ভবত্বনুদিনং বিল্বাম্বুজার্চাবিধিঃ .
হ্রীংকারার্ণমনুপ্রযুক্তমরুণে মত্স্বান্তজৈঃ স্বানুভূ-
ত্যব্জৈঃ সাকমখণ্ডসৌখ্যনিলযে শ্রীচক্ররাজেশ্বরি .. ১৫..

হ্রীংকারোন্নতরত্নমঞ্জুলমহত্সিংহাসনে ভাসুরা-
মূঢে ব্রহ্মহরীশ্বরাদিবিরলং শ্রীকামরাজাঙ্ককম্ .
সর্বজ্ঞাদিসমস্তশক্তিনিবহৈঃ সংসেবিতামম্বিকাং
সৈবাস্মীতি বিভাবনানতিশতৈঃ সংতোষযাম্যন্বহম্ .. ১৬..

যে যে সংততমন্ধকারিগৃহিণীস্তোত্রং সমস্তার্থদং
জ্ঞাত্বার্থং হৃদি মন্ত্ররাজবিমলশ্রীবীজবর্ণক্রমাত্ .
প্রোক্তং মন্ত্রবিদঃ পঠন্তি সহসা কালত্রযেঽপ্যম্বিকা-
সাংনিধ্যে তদনন্যভাবনাধিযস্তত্রৈক্যতাং প্রাপ্নুযুঃ .. ১৭..

  .. ইতি শ্রীলঘুষোডশার্ণকলাবিলাসস্তোত্রং সংপূর্ণম্..