পার্বতী সহস্রনাম স্তোত্রম্

.. শ্রী পার্বতী সহস্রনাম স্তোত্রম্ ..

     হিমবানুবাচ .
কা ত্বং দেবি বিশালাক্ষি শশাঙ্কাবযবাঙ্কিতে .
ন জানে ত্বামহং বত্সে যথাবদ্ ব্রূহি পৃচ্ছতে .. ১..
গিরীন্দ্রবচনং শ্রুত্বা ততঃ সা পরমেশ্বরী .
ব্যাজহার মহাশৈলং যোগিনামভযপ্রদা .. ২..
     দেব্যুবাচ .
মাং বিদ্ধি পরমাং শক্তিং পরমেশ্বরসমাশ্রযাম্ .
অনন্যামব্যযামেকাং যাং পশ্যন্তি মুমুক্ষবঃ .. ৩..
অহং বৈ সর্বভাবানামাত্মা সর্বান্তরা শিবা .
শাশ্বতৈশ্বর্যবিজ্ঞানমূর্তিঃ সর্বপ্রবর্তিকা .. ৪..
অনন্তাঽনন্তমহিমা সংসারার্ণবতারিণী .
দিব্যং দদামি তে চক্ষুঃ পশ্য মে রূপমৈশ্বরম্ .. ৫..
এতাবদুক্ত্বা বিজ্ঞানং দত্ত্বা হিমবতে স্বযম্ .
স্বং রূপং দর্শযামাস দিব্যং তত্ পারমেশ্বরম্ .. ৬..
কোটিসূর্যপ্রতীকাশং তেজোবিম্বং নিরাকুলম্ .
জ্বালামালাসহস্রাঢ্যং কালানলশতোপমম্ .. ৭..
দংষ্ট্রাকরালং দুর্দ্ধর্ষং জটামণ্ডলমণ্ডিতম্ .
ত্রিশূলবরহস্তং চ ঘোররূপং ভযানকম্ .. ৮..
প্রশান্তং সৌম্যবদনমনন্তাশ্চর্যসংযুতম্ .
চন্দ্রাবযবলক্ষ্মাণং চন্দ্রকোটিসমপ্রভম্ .. ৯..
কিরীটিনং গদাহস্তং নূপুরৈরুপশোভিতম্ .
দিব্যমাল্যাম্বরধরং দিব্যগন্ধানুলেপনম্ .. ১০..
শঙ্খচক্রধরং কাম্যং ত্রিনেত্রং কৃত্তিবাসসম্ .
অণ্ডস্থং চাণ্ডবাহ্যস্থং বাহ্যমাভ্যন্তরং পরম্ .. ১১..
সর্বশক্তিমযং শুভ্রং সর্বাকারং সনাতনম্ .
ব্রহ্মেন্দ্রোপেন্দ্রযোগীন্দ্রৈর্বন্দ্যমানপদাম্বুজম্ .. ১২..
সর্বতঃ পাণিপাদান্তং সর্বতোঽক্ষিশিরোমুখম্ .
সর্বমাবৃত্য তিষ্ঠন্তং দদর্শ পরমেশ্বরম্ .. ১৩..
দৃষ্ট্বা তদীদৃশং রূপং দেব্যা মাহেশ্বরং পরম্ .
ভযেন চ সমাবিষ্টঃ স রাজা হৃষ্টমানসঃ .. ১৪..
আত্মন্যাধায চাত্মানমোঙ্কারং সমনুস্মরন্ .
নাম্নামষ্টসহস্রেণ তুষ্টাব পরমেশ্বরীম্ .. ১৫..
     হিমবানুবাচ .
শিবোমা পরমা শক্তিরনন্তা নিষ্কলাঽমলা .
শান্তা মাহেশ্বরী নিত্যা শাশ্বতী পরমাক্ষরা .. ১..
অচিন্ত্যা কেবলাঽনন্ত্যা শিবাত্মা পরমাত্মিকা .
অনাদিরব্যযা শুদ্ধা দেবাত্মা সর্বগাঽচলা .. ২..
একানেকবিভাগস্থা মাযাতীতা সুনির্মলা .
মহামাহেশ্বরী সত্যা মহাদেবী নিরঞ্জনা .. ৩..
কাষ্ঠা সর্বান্তরস্থা চ চিচ্ছক্তিরতিলালসা .
নন্দা সর্বাত্মিকা বিদ্যা জ্যোতীরূপাঽমৃতাক্ষরা .. ৪..
শান্তিঃ প্রতিষ্ঠা সর্বেষাং নিবৃত্তিরমৃতপ্রদা .
ব্যোমমূর্ত্তির্ব্যোমলযা ব্যোমাধারাঽচ্যুতাঽমরা .. ৫..
অনাদিনিধনাঽমোঘা কারণাত্মা কলাঽকলা .
ক্রতুঃ প্রথমজা নাভিরমৃতস্যাত্মসংশ্রযা .. ৬..
প্রাণেশ্বরপ্রিযা মাতা মহামহিষঘাতিনী .
প্রাণেশ্বরী প্রাণরূপা প্রধানপুরুষেশ্বরী .. ৭..
সর্বশক্তিকলাকারা জ্যোত্স্না দ্যৌর্মহিমাস্পদা .
সর্বকার্যনিযন্ত্রী চ সর্বভূতেশ্বরেশ্বরী .. ৮..
অনাদিরব্যক্তগুহা মহানন্দা সনাতনী .
আকাশযোনির্যোগস্থা মহাযোগেশ্বরেশ্বরী .. ৯..
মহামাযা সুদুষ্পূরা মূলপ্রকৃতিরীশ্বরী .
সংসারযোনিঃ সকলা সর্বশক্তিসমুদ্ভবা .. ১০..
সংসারপারা দুর্বারা দুর্নিরীক্ষ্যা দুরাসদা .
প্রাণশক্তিঃ প্রাণবিদ্যা যোগিনী পরমা কলা .. ১১..
মহাবিভূতির্দুর্দ্ধর্ষা মূলপ্রকৃতিসংভবা .
অনাদ্যনন্তবিভবা পরার্থা পুরুষারণিঃ .. ১২..
সর্গস্থিত্যন্তকরণী সুদুর্বাচ্যা দুরত্যযা .
শব্দযোনিঃ শব্দমযী নাদাখ্যা নাদবিগ্রহা .. ১৩..
প্রধানপুরুষাতীতা প্রধানপুরুষাত্মিকা .
পুরাণী চিন্মযী পুংসামাদিঃ পুরুষরূপিণী .. ১৪..
ভূতান্তরাত্মা কূটস্থা মহাপুরুষসংজ্ঞিতা .
জন্মমৃত্যুজরাতীতা সর্বশক্তিসমন্বিতা .. ১৫..
ব্যাপিনী চানবচ্ছিন্না প্রধানানুপ্রবেশিনী .
ক্ষেত্রজ্ঞশক্তিরব্যক্তলক্ষণা মলবর্জিতা .. ১৬..
অনাদিমাযাসংভিন্না ত্রিতত্ত্বা প্রকৃতির্গুহা .
মহামাযাসমুত্পন্না তামসী পৌরুষী ধ্রুবা .. ১৭..
ব্যক্তাব্যক্তাত্মিকা কৃষ্ণা রক্তা শুক্লা প্রসূতিকা .
অকার্যা কার্যজননী নিত্যং প্রসবধর্মিণী .. ১৮..
সর্গপ্রলযনির্মুক্তা সৃষ্টিস্থিত্যন্তধর্মিণী .
ব্রহ্মগর্ভা চতুর্বিংশা পদ্মনাভাঽচ্যুতাত্মিকা .. ১৯..
বৈদ্যুতী শাশ্বতী যোনির্জগন্মাতেশ্বরপ্রিযা .
সর্বাধারা মহারূপা সর্বৈশ্বর্যসমন্বিতা .. ২০..
বিশ্বরূপা মহাগর্ভা বিশ্বেশেচ্ছানুবর্তিনী .
মহীযসী ব্রহ্মযোনির্মহালক্ষ্মীসমুদ্ভবা .. ২১..
মহাবিমানমধ্যস্থা মহানিদ্রাত্মহেতুকা .
সর্বসাধারণী সূক্ষ্মা হ্যবিদ্যা পারমার্থিকা .. ২২..
অনন্তরূপাঽনন্তস্থা দেবী পুরুষমোহিনী .
অনেকাকারসংস্থানা কালত্রযবিবর্জিতা .. ২৩..
ব্রহ্মজন্মা হরের্মূর্তির্ব্রহ্মবিষ্ণুশিবাত্মিকা .
ব্রহ্মেশবিষ্ণুজননী ব্রহ্মাখ্যা ব্রহ্মসংশ্রযা .. ২৪..
ব্যক্তা প্রথমজা ব্রাহ্মী মহতী জ্ঞানরূপিণী .
বৈরাগ্যৈশ্বর্যধর্মাত্মা ব্রহ্মমূর্তির্হৃদিস্থিতা .
অপাংযোনিঃ স্বযংভূতির্মানসী তত্ত্বসংভবা .. ২৫..
ঈশ্বরাণী চ শর্বাণী শংকরার্দ্ধশরীরিণী .
ভবানী চৈব রুদ্রাণী মহালক্ষ্মীরথাম্বিকা .. ২৬..
মহেশ্বরসমুত্পন্না ভুক্তিমুক্তিফলপ্রদা .
সর্বেশ্বরী সর্ববন্দ্যা নিত্যং মুদিতমানসা .. ২৭..
ব্রহ্মেন্দ্রোপেন্দ্রনমিতা শংকরেচ্ছানুবর্তিনী .
ঈশ্বরার্দ্ধাসনগতা মহেশ্বরপতিব্রতা .. ২৮..
সকৃদ্বিভাবিতা সর্বা সমুদ্রপরিশোষিণী .
পার্বতী হিমবত্পুত্রী পরমানন্দদাযিনী .. ২৯..
গুণাঢ্যা যোগজা যোগ্যা জ্ঞানমূর্তির্বিকাসিনী .
সাবিত্রী কমলা লক্ষ্মীঃ শ্রীরনন্তোরসি স্থিতা .. ৩০..
সরোজনিলযা মুদ্রা যোগনিদ্রা সুরার্দিনী .
সরস্বতী সর্ববিদ্যা জগজ্জ্যেষ্ঠা সুমঙ্গলা .. ৩১..
বাগ্দেবী বরদা বাচ্যা কীর্তিঃ সর্বার্থসাধিকা .
যোগীশ্বরী ব্রহ্মবিদ্যা মহাবিদ্যা সুশোভনা .. ৩২..
গুহ্যবিদ্যাত্মবিদ্যা চ ধর্মবিদ্যাত্মভাবিতা .
স্বাহা বিশ্বংভরা সিদ্ধিঃ স্বধা মেধা ধৃতিঃ শ্রুতিঃ .. ৩৩..
নীতিঃ সুনীতিঃ সুকৃতির্মাধবী নরবাহিনী .
অজা বিভাবরী সৌম্যা ভোগিনী ভোগদাযিনী .. ৩৪..
শোভা বংশকরী লোলা মালিনী পরমেষ্ঠিনী .
ত্রৈলোক্যসুন্দরী রম্যা সুন্দরী কামচারিণী .. ৩৫..
মহানুভাবা সত্ত্বস্থা মহামহিষমর্দনী .
পদ্মমালা পাপহরা বিচিত্রা মুকুটাননা .. ৩৬..
কান্তা চিত্রাম্বরধরা দিব্যাভরণভূষিতা .
হংসাখ্যা ব্যোমনিলযা জগত্সৃষ্টিবিবর্দ্ধিনী .. ৩৭..
নির্যন্ত্রা যন্ত্রবাহস্থা নন্দিনী ভদ্রকালিকা .
আদিত্যবর্ণা কৌমারী মযূরবরবাহিনী .. ৩৮..
বৃষাসনগতা গৌরী মহাকালী সুরার্চিতা .
অদিতির্নিযতা রৌদ্রী পদ্মগর্ভা বিবাহনা .. ৩৯..
বিরূপাক্ষী লেলিহানা মহাপুরনিবাসিনী .
মহাফলাঽনবদ্যাঙ্গী কামপূরা বিভাবরী .. ৪০..
বিচিত্ররত্নমুকুটা প্রণতার্তিপ্রভঞ্জনী .
কৌশিকী কর্ষণী রাত্রিস্ত্রিদশার্ত্তিবিনাশিনী .. ৪১..
বহুরূপা সুরূপা চ বিরূপা রূপবর্জিতা .
ভক্তার্তিশমনী ভব্যা ভবভাববিনাশিনী .. ৪২..
নির্গুণা নিত্যবিভবা নিঃসারা নিরপত্রপা .
যশস্বিনী সামগীতির্ভবাঙ্গনিলযালযা .. ৪৩..
দীক্ষা বিদ্যাধরী দীপ্তা মহেন্দ্রবিনিপাতিনী .
সর্বাতিশাযিনী বিদ্যা সর্বসিদ্ধিপ্রদাযিনী .. ৪৪..
সর্বেশ্বরপ্রিযা তার্ক্ষ্যা সমুদ্রান্তরবাসিনী .
অকলঙ্কা নিরাধারা নিত্যসিদ্ধা নিরামযা .. ৪৫..
কামধেনুর্বৃহদ্গর্ভা ধীমতী মোহনাশিনী .
নিঃসঙ্কল্পা নিরাতঙ্কা বিনযা বিনযপ্রদা .. ৪৬..
জ্বালামালা সহস্রাঢ্যা দেবদেবী মনোন্মনী .
মহাভগবতী দুর্গা বাসুদেবসমুদ্ভবা .. ৪৭..
মহেন্দ্রোপেন্দ্রভগিনী ভক্তিগম্যা পরাবরা .
জ্ঞানজ্ঞেযা জরাতীতা বেদান্তবিষযা গতিঃ .. ৪৮..
দক্ষিণা দহনা দাহ্যা সর্বভূতনমস্কৃতা .
যোগমাযা বিভাবজ্ঞা মহামাযা মহীযসী .. ৪৯..
সংধ্যা সর্বসমুদ্ভূতির্ব্রহ্মবৃক্ষাশ্রযানতিঃ .
বীজাঙ্কুরসমুদ্ভূতির্মহাশক্তির্মহামতিঃ .. ৫০..
খ্যাতিঃ প্রজ্ঞা চিতিঃ সংবিত্ মহাভোগীন্দ্রশাযিনী .
বিকৃতিঃ শাংকরী শাস্ত্রী গণগন্ধর্বসেবিতা .. ৫১..
বৈশ্বানরী মহাশালা দেবসেনা গুহপ্রিযা .
মহারাত্রিঃ শিবানন্দা শচী দুঃস্বপ্ননাশিনী .. ৫২..
ইজ্যা পূজ্যা জগদ্ধাত্রী দুর্বিজ্ঞেযা সুরূপিণী .
গুহাম্বিকা গুণোত্পত্তির্মহাপীঠা মরুত্সুতা .. ৫৩..
হব্যবাহান্তরাগাদিঃ হব্যবাহসমুদ্ভবা .
জগদ্যোনির্জগন্মাতা জন্মমৃত্যুজরাতিগা .. ৫৪..
বুদ্ধিমাতা বুদ্ধিমতী পুরুষান্তরবাসিনী .
তরস্বিনী সমাধিস্থা ত্রিনেত্রা দিবি সংস্থিতা .. ৫৫..
সর্বেন্দ্রিযমনোমাতা সর্বভূতহৃদি স্থিতা .
সংসারতারিণী বিদ্যা ব্রহ্মবাদিমনোলযা .. ৫৬..
ব্রহ্মাণী বৃহতী ব্রাহ্মী ব্রহ্মভূতা ভবারণিঃ .
হিরণ্মযী মহারাত্রিঃ সংসারপরিবর্ত্তিকা .. ৫৭..
সুমালিনী সুরূপা চ ভাবিনী তারিণী প্রভা .
উন্মীলনী সর্বসহা সর্বপ্রত্যযসাক্ষিণী .. ৫৮..
সুসৌম্যা চন্দ্রবদনা তাণ্ডবাসক্তমানসা .
সত্ত্বশুদ্ধিকরী শুদ্ধির্মলত্রযবিনাশিনী .. ৫৯..
জগত্প্রিযা জগন্মূর্তিস্ত্রিমূর্তিরমৃতাশ্রযা .
নিরাশ্রযা নিরাহারা নিরঙ্কুরবনোদ্ভবা .. ৬০..
চন্দ্রহস্তা বিচিত্রাঙ্গী স্রগ্বিণী পদ্মধারিণী .
পরাবরবিধানজ্ঞা মহাপুরুষপূর্বজা .. ৬১..
বিদ্যেশ্বরপ্রিযা বিদ্যা বিদ্যুজ্জিহ্বা জিতশ্রমা .
বিদ্যামযী সহস্রাক্ষী সহস্রবদনাত্মজা .. ৬২..
সহস্ররশ্মিঃ সত্ত্বস্থা মহেশ্বরপদাশ্রযা .
ক্ষালিনী সন্মযী ব্যাপ্তা তৈজসী পদ্মবোধিকা .. ৬৩..
মহামাযাশ্রযা মান্যা মহাদেবমনোরমা .
ব্যোমলক্ষ্মীঃ সিংহরথা চেকিতানাঽমিতপ্রভা .. ৬৪..
বীরেশ্বরী বিমানস্থা বিশোকা শোকনাশিনী .
অনাহতা কুণ্ডলিনী নলিনী পদ্মবাসিনী .. ৬৫..
সদানন্দা সদাকীর্তিঃ সর্বভূতাশ্রযস্থিতা .
বাগ্দেবতা ব্রহ্মকলা কলাতীতা কলারণিঃ .. ৬৬..
ব্রহ্মশ্রীর্ব্রহ্মহৃদযা ব্রহ্মবিষ্ণুশিবপ্রিযা .
ব্যোমশক্তিঃ ক্রিযাশক্তির্জ্ঞানশক্তিঃ পরাগতিঃ .. ৬৭..
ক্ষোভিকা বন্ধিকা ভেদ্যা ভেদাভেদবিবর্জিতা .
অভিন্নাভিন্নসংস্থানা বংশিনী বংশহারিণী .. ৬৮..
গুহ্যশক্তির্গুণাতীতা সর্বদা সর্বতোমুখী .
ভগিনী ভগবত্পত্নী সকলা কালকারিণী .. ৬৯..
সর্ববিত্ সর্বতোভদ্রা গুহ্যাতীতা গুহারণিঃ .
প্রক্রিযা যোগমাতা চ গঙ্গা বিশ্বেশ্বরেশ্বরী .. ৭০..
কপিলা কাপিলা কান্তা কনকাভা কলান্তরা .
পুণ্যা পুষ্করিণী ভোক্ত্রী পুরংদরপুরস্সরা .. ৭১..
পোষণী পরমৈশ্বর্যভূতিদা ভূতিভূষণা .
পঞ্চব্রহ্মসমুত্পত্তিঃ পরমার্থার্থবিগ্রহা .. ৭২..
ধর্মোদযা ভানুমতী যোগিজ্ঞেযা মনোজবা .
মনোহরা মনোরক্ষা তাপসী বেদরূপিণী .. ৭৩..
বেদশক্তির্বেদমাতা বেদবিদ্যাপ্রকাশিনী .
যোগেশ্বরেশ্বরী মাতা মহাশক্তির্মনোমযী .. ৭৪..
বিশ্বাবস্থা বিযন্মূর্ত্তির্বিদ্যুন্মালা বিহাযসী .
কিংনরী সুরভী বন্দ্যা নন্দিনী নন্দিবল্লভা .. ৭৫..
ভারতী পরমানন্দা পরাপরবিভেদিকা .
সর্বপ্রহরণোপেতা কাম্যা কামেশ্বরেশ্বরী .. ৭৬..
অচিন্ত্যাঽচিন্ত্যবিভবা হৃল্লেখা কনকপ্রভা .
কূষ্মাণ্ডী ধনরত্নাঢ্যা সুগন্ধা গন্ধদাযিনী .. ৭৭..
ত্রিবিক্রমপদোদ্ভূতা ধনুষ্পাণিঃ শিবোদযা .
সুদুর্লভা ধনাধ্যক্ষা ধন্যা পিঙ্গললোচনা .. ৭৮..
শান্তিঃ প্রভাবতী দীপ্তিঃ পঙ্কজাযতলোচনা .
আদ্যা হৃত্কমলোদ্ভূতা গবাং মাতা রণপ্রিযা .. ৭৯..
সত্ক্রিযা গিরিজা শুদ্ধা নিত্যপুষ্টা নিরন্তরা .
দুর্গাকাত্যাযনী চণ্ডী চর্চিকা শান্তবিগ্রহা .. ৮০..
হিরণ্যবর্ণা রজনী জগদ্যন্ত্রপ্রবর্তিকা .
মন্দরাদ্রিনিবাসা চ শারদা স্বর্ণমালিনী .. ৮১..
রত্নমালা রত্নগর্ভা পৃথ্বী বিশ্বপ্রমাথিনী .
পদ্মাননা পদ্মনিভা নিত্যতুষ্টাঽমৃতোদ্ভবা .. ৮২..
ধুন্বতী দুঃপ্রকম্প্যা চ সূর্যমাতা দৃষদ্বতী .
মহেন্দ্রভগিনী মান্যা বরেণ্যা বরদর্পিতা .. ৮৩..
কল্যাণী কমলা রামা পঞ্চভূতা বরপ্রদা .
বাচ্যা বরেশ্বরী বন্দ্যা দুর্জযা দুরতিক্রমা .. ৮৪..
কালরাত্রির্মহাবেগা বীরভদ্রপ্রিযা হিতা .
ভদ্রকালী জগন্মাতা ভক্তানাং ভদ্রদাযিনী .. ৮৫..
করালা পিঙ্গলাকারা নামভেদাঽমহামদা .
যশস্বিনী যশোদা চ ষডধ্বপরিবর্ত্তিকা .. ৮৬..
শঙ্খিনী পদ্মিনী সাংখ্যা সাংখ্যযোগপ্রবর্তিকা .
চৈত্রা সংবত্সরারূঢা জগত্সংপূরণীন্দ্রজা .. ৮৭..
শুম্ভারিঃ খেচরী স্বস্থা কম্বুগ্রীবা কলিপ্রিযা .
খগধ্বজা খগারূঢা পরার্ধ্যা পরমালিনী .. ৮৮..
ঐশ্বর্যবর্ত্মনিলযা বিরক্তা গরুডাসনা .
জযন্তী হৃদ্গুহা রম্যা গহ্বরেষ্ঠা গণাগ্রণীঃ .. ৮৯..
সংকল্পসিদ্ধা সাম্যস্থা সর্ববিজ্ঞানদাযিনী .
কলিকল্মষহন্ত্রী চ গুহ্যোপনিষদুত্তমা .. ৯০..
নিষ্ঠা দৃষ্টিঃ স্মৃতির্ব্যাপ্তিঃ পুষ্টিস্তুষ্টিঃ ক্রিযাবতী .
বিশ্বামরেশ্বরেশানা ভুক্তির্মুক্তিঃ শিবাঽমৃতা .. ৯১..
লোহিতা সর্পমালা চ ভীষণী বনমালিনী .
অনন্তশযনাঽনন্যা নরনারাযণোদ্ভবা .. ৯২..
নৃসিংহী দৈত্যমথনী শঙ্খচক্রগদাধরা .
সংকর্ষণসমুত্পত্তিরম্বিকাপাদসংশ্রযা .. ৯৩..
মহাজ্বালা মহামূর্ত্তিঃ সুমূর্ত্তিঃ সর্বকামধুক্ .
সুপ্রভা সুস্তনা গৌরী ধর্মকামার্থমোক্ষদা .. ৯৪..
ভ্রূমধ্যনিলযা পূর্বা পুরাণপুরুষারণিঃ .
মহাবিভূতিদা মধ্যা সরোজনযনা সমা .. ৯৫..
অষ্টাদশভুজাঽনাদ্যা নীলোত্পলদলপ্রভা .
সর্বশক্ত্যাসনারূঢা ধর্মাধর্মার্থবর্জিতা .. ৯৬..
বৈরাগ্যজ্ঞাননিরতা নিরালোকা নিরিন্দ্রিযা .
বিচিত্রগহনাধারা শাশ্বতস্থানবাসিনী .. ৯৭..
স্থানেশ্বরী নিরানন্দা ত্রিশূলবরধারিণী .
অশেষদেবতামূর্ত্তির্দেবতা বরদেবতা .
গণাম্বিকা গিরেঃ পুত্রী নিশুম্ভবিনিপাতিনী .. ৯৮..
অবর্ণা বর্ণরহিতা নিবর্ণা বীজসংভবা .
অনন্তবর্ণাঽনন্যস্থা শংকরী শান্তমানসা .. ৯৯..
অগোত্রা গোমতী গোপ্ত্রী গুহ্যরূপা গুণোত্তরা .
গৌর্গীর্গব্যপ্রিযা গৌণী গণেশ্বরনমস্কৃতা .. ১০০..
সত্যমাত্রা সত্যসংধা ত্রিসংধ্যা সংধিবর্জিতা .
সর্ববাদাশ্রযা সংখ্যা সাংখ্যযোগসমুদ্ভবা .. ১০১..
অসংখ্যেযাঽপ্রমেযাখ্যা শূন্যা শুদ্ধকুলোদ্ভবা .
বিন্দুনাদসমুত্পত্তিঃ শংভুবামা শশিপ্রভা .. ১০২..
বিসঙ্গা ভেদরহিতা মনোজ্ঞা মধুসূদনী .
মহাশ্রীঃ শ্রীসমুত্পত্তিস্তমঃপারে প্রতিষ্ঠিতা .. ১০৩..
ত্রিতত্ত্বমাতা ত্রিবিধা সুসূক্ষ্মপদসংশ্রযা .
শান্ত্যতীতা মলাতীতা নির্বিকারা নিরাশ্রযা .. ১০৪..
শিবাখ্যা চিত্তনিলযা শিবজ্ঞানস্বরূপিণী .
দৈত্যদানবনির্মাত্রী কাশ্যপী কালকল্পিকা .. ১০৫..
শাস্ত্রযোনিঃ ক্রিযামূর্তিশ্চতুর্বর্গপ্রদর্শিকা .
নারাযণী নরোদ্ভূতিঃ কৌমুদী লিঙ্গধারিণী .. ১০৬..
কামুকী ললিতা ভাবা পরাপরবিভূতিদা .
পরান্তজাতমহিমা বডবা বামলোচনা .. ১০৭..
সুভদ্রা দেবকী সীতা বেদবেদাঙ্গপারগা .
মনস্বিনী মন্যুমাতা মহামন্যুসমুদ্ভবা .. ১০৮..
অমৃত্যুরমৃতা স্বাহা পুরুহূতা পুরুষ্টুতা .
অশোচ্যা ভিন্নবিষযা হিরণ্যরজতপ্রিযা .. ১০৯..
হিরণ্যা রাজতী হৈমী হেমাভরণভূষিতা .
বিভ্রাজমানা দুর্জ্ঞেযা জ্যোতিষ্টোমফলপ্রদা .. ১১০..
মহানিদ্রাসমুদ্ভূতিরনিদ্রা সত্যদেবতা .
দীর্ঘা ককুদ্মিনী হৃদ্যা শান্তিদা শান্তিবর্দ্ধিনী .. ১১১..
লক্ষ্ম্যাদিশক্তিজননী শক্তিচক্রপ্রবর্তিকা .
ত্রিশক্তিজননী জন্যা ষডূর্মিপরিবর্জিতা .. ১১২..
সুধামা কর্মকরণী যুগান্তদহনাত্মিকা .
সংকর্ষণী জগদ্ধাত্রী কামযোনিঃ কিরীটিনী .. ১১৩..
ঐন্দ্রী ত্রৈলোক্যনমিতা বৈষ্ণবী পরমেশ্বরী .
প্রদ্যুম্নদযিতা দান্তা যুগ্মদৃষ্টিস্ত্রিলোচনা .. ১১৪..
মদোত্কটা হংসগতিঃ প্রচণ্ডা চণ্ডবিক্রমা .
বৃষাবেশা বিযন্মাতা বিন্ধ্যপর্বতবাসিনী .. ১১৫..
হিমবন্মেরুনিলযা কৈলাসগিরিবাসিনী .
চাণূরহন্তৃতনযা নীতিজ্ঞা কামরূপিণী .. ১১৬..
বেদবিদ্যাব্রতস্নাতা ধর্মশীলাঽনিলাশনা .
বীরভদ্রপ্রিযা বীরা মহাকালসমুদ্ভবা .. ১১৭..
বিদ্যাধরপ্রিযা সিদ্ধা বিদ্যাধরনিরাকৃতিঃ .
আপ্যাযনী হরন্তী চ পাবনী পোষণী খিলা .. ১১৮..
মাতৃকা মন্মথোদ্ভূতা বারিজা বাহনপ্রিযা .
করীষিণী সুধাবাণী বীণাবাদনতত্পরা .. ১১৯..
সেবিতা সেবিকা সেব্যা সিনীবালী গুরুত্মতী .
অরুন্ধতী হিরণ্যাক্ষী মৃগাঙ্কা মানদাযিনী .. ১২০..
বসুপ্রদা বসুমতী বসোর্দ্ধারা বসুংধরা .
ধারাধরা বরারোহা বরাবরসহস্রদা .. ১২১..
শ্রীফলা শ্রীমতী শ্রীশা শ্রীনিবাসা শিবপ্রিযা .
শ্রীধরা শ্রীকরী কল্যা শ্রীধরার্দ্ধশরীরিণী .. ১২২..
অনন্তদৃষ্টিরক্ষুদ্রা ধাত্রীশা ধনদপ্রিযা .
নিহন্ত্রী দৈত্যসঙ্ঘানাং সিংহিকা সিংহবাহনা .. ১২৩..
সুষেণা চন্দ্রনিলযা সুকীর্তিশ্ছিন্নসংশযা .
রসজ্ঞা রসদা রামা লেলিহানাঽমৃতস্রবা .. ১২৪..
নিত্যোদিতা স্বযংজ্যোতিরুত্সুকা মৃতজীবনী .
বজ্রদণ্ডা বজ্রজিহ্বা বৈদেহী বজ্রবিগ্রহা .. ১২৫..
মঙ্গল্যা মঙ্গলা মালা মলিনা মলহারিণী .
গান্ধর্বী গারুডী চান্দ্রী কম্বলাশ্বতরপ্রিযা .. ১২৬..
সৌদামিনী জনানন্দা ভ্রুকুটীকুটিলাননা .
কর্ণিকারকরা কক্ষ্যা কংসপ্রাণাপহারিণী .. ১২৭..
যুগংধরা যুগাবর্ত্তা ত্রিসংধ্যা হর্ষবর্দ্ধনী .
প্রত্যক্ষদেবতা দিব্যা দিব্যগন্ধা দিবাপরা .. ১২৮..
শক্রাসনগতা শাক্রী সাধ্বী নারী শবাসনা .
ইষ্টা বিশিষ্টা শিষ্টেষ্টা শিষ্টাশিষ্টপ্রপূজিতা .. ১২৯..
শতরূপা শতাবর্ত্তা বিনতা সুরভিঃ সুরা .
সুরেন্দ্রমাতা সুদ্যুম্না সুষুম্না সূর্যসংস্থিতা .. ১৩০..
সমীক্ষ্যা সত্প্রতিষ্ঠা চ নিবৃত্তির্জ্ঞানপারগা .
ধর্মশাস্ত্রার্থকুশলা ধর্মজ্ঞা ধর্মবাহনা .. ১৩১..
ধর্মাধর্মবিনির্মাত্রী ধার্মিকাণাং শিবপ্রদা .
ধর্মশক্তির্ধর্মমযী বিধর্মা বিশ্বধর্মিণী .. ১৩২..
ধর্মান্তরা ধর্মমেঘা ধর্মপূর্বা ধনাবহা .
ধর্মোপদেষ্ট্রী ধর্মাত্মা ধর্মগম্যা ধরাধরা .. ১৩৩..
কাপালী শাকলা মূর্ত্তিঃ কলা কলিতবিগ্রহা .
সর্বশক্তিবিনির্মুক্তা সর্বশক্ত্যাশ্রযাশ্রযা .. ১৩৪..
সর্বা সর্বেশ্বরী সূক্ষ্মা সুসূক্ষ্মা জ্ঞানরূপিণী .
প্রধানপুরুষেশেশা মহাদেবৈকসাক্ষিণী .
সদাশিবা বিযন্মূর্ত্তির্বিশ্বমূর্ত্তিরমূর্ত্তিকা .. ১৩৫..

এবং নাম্নাং সহস্রেণ স্তুত্বাঽসৌ হিমবান্ গিরিঃ .
ভূযঃ প্রণম্য ভীতাত্মা প্রোবাচেদং কৃতাঞ্জলিঃ .. ১..
যদেতদৈশ্বরং রূপং ঘোরং তে পরমেশ্বরি .
ভীতোঽস্মি সাম্প্রতং দৃষ্ট্বা রূপমন্যত্ প্রদর্শয .. ২..
এবমুক্তাঽথ সা দেবী তেন শৈলেন পার্বতী .
সংহৃত্য দর্শযামাস স্বরূপমপরং পুনঃ .. ৩..
নীলোত্পলদলপ্রখ্যং নীলোত্পলসুগন্ধিকম্ .
দ্বিনেত্রং দ্বিভুজং সৌম্যং নীলালকবিভূষিতম্ .. ৪..
রক্তপাদাম্বুজতলং সুরক্তকরপল্লবম্ .
শ্রীমদ্ বিশালসংবৃত্তললাটতিলকোজ্জ্বলম্ .. ৫..
ভূষিতং চারুসর্বাঙ্গং ভূষণৈরতিকোমলম্ .
দধানমুরসা মালাং বিশালাং হেমনির্মিতাম্ .. ৬..
ঈষত্স্মিতং সুবিম্বোষ্ঠং নূপুরারাবসংযুতম্ .
প্রসন্নবদনং দিব্যমনন্তমহিমাস্পদম্ .. ৭..
তদীদৃশং সমালোক্য স্বরূপং শৈলসত্তমঃ .
ভীতিং সংত্যজ্য হৃষ্টাত্মা বভাষে পরমেশ্বরীম্ .. ৮..
.. ইতি শ্রীকূর্মপুরাণে পার্বতী সহস্রনাম স্তোত্রম্ সম্পূর্ণম্ ..