ষট্ত্রিংশন্নবমল্লিকাস্তবঃ

.. ষট্ত্রিংশন্নবমল্লিকাস্তবঃ ..

যা মাতা সদসদ্বিলক্ষণপরাসংবিত্স্বরূপা সদা
জাগ্রত্স্বপ্নসুষুপ্তিবৃত্তিবিলসত্স্ফূর্তিঃ পরা বৈখরী .
ইচ্ছাদিত্রযধর্মিণী পরগুহাহংতাপ্রকাশাত্মিকা
তাং নৌমি ত্রিপুরাং পরাপরমযীং স্বানন্দসংবিত্তযে .. ১ ..
যাং মূলাম্বুজকর্ণিকাপ্রবিলসত্কামাখ্যপীঠে পরাং
সোমার্কানলদীপ্তিমক্ষরতনুং বালাং বিমর্শাত্মিকাম্ .
ধ্যাযন্তঃ সহসা ভজন্তি কবিতাপাণ্ডিত্যমত্যদ্ভুতং
তাং নৌমি ত্রিপুরাং পরাপরমযীং স্বানন্দসংবিত্তযে .. ২ ..
যামম্ভোজমৃণালতন্তুসুতনুং বিদ্যুত্সহস্রপ্রভাং
কূজন্তীং কুলকুণ্ডখেলনপরাং প্রাণানিলোদ্যোজনীম্ .
ওড্যাণে পরিচিন্তযন্তি কৃতিনঃ পীযূষবর্ষাপ্তযে
তাং নৌমি ত্রিপুরাং পরাপরমযীং স্বানন্দসংবিত্তযে .. ৩ ..
যাং স্মৃত্বা মণিপূরকে রবিনিভে রৌদ্রে কৃশান্বালযে
পশ্যন্তীং পদবাক্যপদ্যরচনাপাণ্ডিত্যসংবর্ধিনীম্ .
বক্ত্রাম্ভোরুহসৌধনর্তননটীং পশ্যন্তি শৈবাঃ সদা
তাং নৌমি ত্রিপুরাং পরাপরমযীং স্বানন্দসংবিত্তযে .. ৪ ..
যাং ধ্যাযন্তি বিধূতপাপহৃদযা হৃত্পুণ্ডরীকাম্বরে
নির্দোষারুণরত্নদীপতুলিতাং প্রজ্ঞানসীমন্তিনীম্ .
সংলব্ধুং সকলাত্মিকাং পরমনঃকাযপ্রবেশাক্রিযাং
তাং নৌমি ত্রিপুরাং পরাপরমযীং স্বানন্দসংবিত্তযে .. ৫ ..
যাং জালংধরবন্ধনোর্ধ্বগমনাং চক্রে বিশুদ্ধৌ শর-
জ্জ্যোত্স্নাকাশনিভে স্বরাক্ষরলসদ্দ্ব্যষ্টাব্জপত্রান্বিতে .
ধ্যাযন্ত্যাত্মসুখানুভূতিমমলাং লব্ধুং চিরংজীবিতাং
তাং নৌমি ত্রিপুরাং পরাপরমযীং স্বানন্দসংবিত্তযে .. ৬ ..
যাং পশ্যন্তি পুরাণপুণ্যলসিকাঃ শ্রীদেশিকাজ্ঞাধরা
ভ্রূমধ্যদ্বিদলাম্বুজপ্রবিলসচ্চান্দ্রীকলাং শাশ্বতীম্ .
নিত্যানন্দসুধাসমুদ্রলহরীক্রীডানুভূত্যৈ সদা
তাং নৌমি ত্রিপুরাং পরাপরমযীং স্বানন্দসংবিত্তযে .. ৭ ..
যাং পার্শ্বস্থিতহংসবর্ণবিলসদ্বিন্দৌ ত্রিবর্ণাত্মিকাং
প্রদ্যুম্নীযকলামযীং নিজসুখোদ্বোধপ্রসাদোদযাম্ .
সিদ্ধান্তার্থরতা জিতেন্দ্রিযকণা ধ্যাযন্ত্যভেদায বৈ
তাং নৌমি ত্রিপুরাং পরাপরমযীং স্বানন্দসংবিত্তযে .. ৮ ..
যামর্ধেন্দুসরোরুহেঽর্ধশশভৃদ্রূপে হিমাংশুপ্রভে
পশ্যন্ত্যাত্মসুখায বিস্বনমযীং তত্তন্ত্রসংখ্যালবৈঃ .
হৃল্লেখামনুপারগা নিযমিতপ্রাণাদিসর্বেন্দ্রিযাঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ৯ ..
রোধিন্যম্বুরুহে ত্রিকোণরুচিরে জ্যোত্স্নানিভে সর্বদা
দ্বাত্রিংশল্লবমাননিস্বনবহাং পশ্যন্তি যাং খেচরীম্ .
মাযাক্রীডনপেশলানিজপদানন্দাপ্তযেঽপ্যদ্ভুতং
তাং নৌমি ত্রিপুরাং পরাপরমযীং স্বানন্দসংবিত্তযে .. ১০ ..
নাদাব্জে বরপদ্মরাগমণিযষ্ট্যা স্পর্ধমানাং পরাং
গচ্ছন্তীং শিবধাম ষোডশলবধ্যানাত্মিকাং সংবিদা .
তারানাযকভানুসঙ্গরসিকাঃ পশ্যন্তি মুদ্রান্বিতাঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ১১ ..
নাদান্তেঽষ্টলবধ্বনিপ্রকটিতাং বিদ্যুচ্ছটাভাসুরাং
যাং সব্যস্থিতবিন্দুলাঙ্গলমিবা স্বং রূপমাবিভ্রতীম্ .
যান্তীমূর্ধ্বকুলং যমাদিনিরতাঃ পশ্যন্ত্যখণ্ডাপ্তযে
তাং নৌমি ত্রিপুরাং পরাপরমযীং স্বানন্দসংবিত্তযে .. ১২ ..
তির্যগ্বিন্দুযুগস্য বামবিচরদ্রেখামযে নির্মলে
শক্ত্যব্জে তরুণার্করোচিষি চ যাং পশ্যন্তি লক্ষেক্ষণাঃ .
স্বানন্দায চতুর্লবস্বনমযীং শ্রীপাদুকাগামিনীং
তাং নৌমি ত্রিপুরাং পরাপরমযীং স্বানন্দসংবিত্তযে .. ১৩ ..
বিন্দ্বাশ্লিষ্টকৃশানুকোণতনুমত্যাং ব্যাপিকাযাং সদা
বালোষ্ণাংশুরুচৌ পরাং লবযুগধ্যানাত্মিকাং সংবিদম্ .
যাং পশ্যন্তি মনীষিণঃ কুলবধূপাদাব্জরেণূদ্বহাঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ১৪ ..
ঊর্ধ্বাধোবিলসত্সুবিন্দুযুতরেখাম্ভোরুহে নির্মলে
সূর্যাভে সমনেতিনাম্নি লবনিস্বানাত্মিকাং চেতনাম্ .
যাং পশ্যন্ত্যমনস্কযোগবিভবাযান্তর্মুখারাধকাঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ১৫ ..
উন্মন্যম্বুরুহে দ্বিষডদিনমণিজ্যোতির্মযে চিন্মযীং
বিন্দ্বাধারসমুল্লসত্সরলসদ্রেখামযে যোগিনঃ .
যাং পশ্যন্ত্যণিমাদিবিঘ্নদলনে ধীধৈর্যবিজ্ঞানিনঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ১৬ ..
যাং ধাত্রাদিবিহীনধামরসিকাং জ্ঞাত্রাদিবিশ্রান্তিকাম্
আত্মারামপরাযণশ্রুতিশিরোমৌনার্থরূপাং শিবাম্ .
নির্দ্বন্দ্বাত্মপরাযণা অনুভবন্ত্যানন্দসীমাতিগাঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ১৭ ..
যামাবালবুধাজ্ঞগোপবিদিতাহংরূপিণীং সর্বদা
সর্বোপপ্লবমুক্তধামরমণীং স্বানন্দলীলাবতীম্ .
নিস্ত্রৈগুণ্যপরাপরেতররসাঃ স্বেনৈব পশ্যন্ত্যহো
তাং নৌমি ত্রিপুরাং পরাপরমযীং স্বানন্দসংবিত্তযে .. ১৮ ..
যাং প্রজ্ঞেতি বদন্তি কেচিদিতরে সদ্রূপিণীত্যাদিমাং
শূন্যং কেচিদজেতি কেচিদপরে জাড্যাত্মিকেত্যদ্ভুতম্ .
জাড্যাজাড্যমযীতি কেচিদিতরে তদ্ব্রহ্ম সর্বাত্মকং
তাং নৌমি ত্রিপুরাং পরাপরমযীং স্বানন্দসংবিত্তযে .. ১৯ ..
যা কাষ্ঠা পরমা গতিঃ পরমভূদস্পন্দিনী স্পন্দিনী
সৃষ্ট্বাদৌ নিখিলং চরাচরমিদং স্বস্মিন্ প্রবেশ্যেচ্ছযা .
ক্রীডত্যেকরসাত্মিকাপি বহুধা ভাতীব যা সর্বগা
তাং নৌমি ত্রিপুরাং পরাপরমযীং স্বানন্দসংবিত্তযে .. ২০ ..
যাহংপ্রত্যযসাক্ষিণী জগদুপাদানং চ নিষ্কারণং
যাবস্থাত্রযবর্জিতাপি সকলাবস্থাত্মিকা সংবিদা .
যা ভোক্তৃত্ববিলক্ষণাপি সততং ভোক্ত্রী প্রমোদান্নিজাত্
তাং নৌমি ত্রিপুরাং পরাপরমযীং স্বানন্দসংবিত্তযে .. ২১ ..
সর্বানুগ্রহধর্মিণী স্বযমভূত্ সাদাখ্যধর্মেণ যা
লোকানাং পরমেশ্বরী কিল তিরোধানেন ধর্মেণ যা .
যা নাশস্থিতিসৃষ্টিধর্মবিভবৈ রুদ্রাদিমূর্ত্যাত্মিকা
তাং নৌমি ত্রিপুরাং পরাপরমযীং স্বানন্দসংবিত্তযে .. ২২ ..
যা সোমার্কমহীজলাগ্নিমরুদাকাশাত্মদেহৈঃ সদা
সর্বং বিশ্বমিদং দধত্যাপি পরং নির্দেহলেপাদ্ভুতম্ .
যা বেদাগমশাস্ত্রমূলগুরুরপ্যব্যাজমৌনাত্মিকা
তাং নৌমি ত্রিপুরাং পরাপরমযীং স্বানন্দসংবিত্তযে .. ২৩ ..
সূক্ষ্মাত্ সূক্ষ্মতমা বিভোর্বিভুতমা যা মধ্যমা সর্বদা
শ্রোত্রাদেঃ শ্রবণাদিরাত্মনি চিদাভাসো মতৌ প্রেরিকা .
বিশ্বো জাগ্রতি তৈজসঃ পরমভূত্ স্বপ্নে সুষুপ্তৌ সুখং
তাং নৌমি ত্রিপুরাং পরাপরমযীং স্বানন্দসংবিত্তযে .. ২৪ ..
নির্দোষা সকলান্তরঙ্গরমণীযাপ্যদ্ভুতং নিষ্ক্রিযা
যা সর্বেন্দ্রিযকর্মকর্ত্র্যপি সতাং পাশাষ্টকচ্ছেদিনী .
নির্লোভা নিখিলপ্রপঞ্চমমতাহংতাত্মিকাপ্যদ্বযী
তাং নৌমি ত্রিপুরাং পরাপরমযীং স্বানন্দসংবিত্তযে .. ২৫ ..
অধ্বাতীতচরিত্রবত্যপি সতাং সন্মার্গসংদর্শিনী
যা পূজাবিমুখী নৃণাং নিজপদার্চাযাং নিযন্ত্রী পরম্ .
সর্বাহংকৃতিরূপিণী নতজনাহংকারবিচ্ছেদিনী
তাং নৌমি ত্রিপুরাং পরাপরমযীং স্বানন্দসংবিত্তযে .. ২৬ ..
যা পঞ্চাননমঞ্চমধ্যবিলসত্কামেশ্বরাঙ্কস্থিতা
নিত্যা পূজিতপাদপদ্মযুগলা নিত্যোত্সবাহ্লাদিনী .
সর্বানন্দগৃহোজ্জ্বলা গুরুকৃপাপীযূষট্টগ্গোচরা
তাং নৌমি ত্রিপুরাং পরাপরমযীং স্বানন্দসংবিত্তযে .. ২৭ ..
নৈষ্কর্ম্যা স্বযমপ্যহো নিজকৃপাপাত্রস্য যত্ সংচিতং
প্রারব্ধম্ ক্ষপযত্যনন্যগতিকং তং যাকরোদ্দেবতাম্ .
নির্ধর্মিণ্যপি সর্বদা নিজনতাযানন্দদাযিন্যহো
তাং নৌমি ত্রিপুরাং পরাপরমযীং স্বানন্দসংবিত্তযে .. ২৮ ..
যা ব্রহ্মাণ্ডজগত্প্রসূরপি সদা তারুণ্যবত্যদ্ভুতং
সর্বৈশ্বর্যরতাপি গর্বমদমাত্সর্যাদিহীনা পরম্ .
ত্রৈলোক্যেশ্বররাজ্ঞ্যপি শ্রিতজনৈর্দত্তং প্রগৃহ্ণাত্যহো
তাং নৌমি ত্রিপুরাং পরাপরমযীং স্বানন্দসংবিত্তযে .. ২৯ ..
যা ভক্তোত্তমচেতসশ্চপলতাং হন্ত্রী কুরঙ্গেক্ষণা
চিত্রং কামরিপোর্মনশ্চপলতাং দাত্রী স্বরূপেণ চ .
মোহং হন্তি নতস্য মন্দহসিতৈর্মোহং বিধত্তে বিভোঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ৩০ ..
যস্যাঃ পদ্মগলাযতাক্ষিকরুণাপাত্রাণি বাণ্যাদয-
স্তত্তত্কার্যপরা ভবন্তি কৃতিনো ব্রহ্মেন্দ্ররুদ্রাদযঃ .
যস্যাঃ পাদসরোজসেবনপরা নন্দন্ত্যহো সিদ্ধযঃ
তাং নৌমি ত্রিপুরাং পরাপরমযীং স্বানন্দসংবিত্তযে .. ৩১ ..
দিব্যশ্রীচরণারবিন্দবিগলত্পীযূষসর্পিঃ প্লুতং
জ্ঞানাগ্নৌ সুমনঃস্রুচা জডমিদং দৃশ্যং তপঃসংস্কৃতম্ .
যস্যৈ ভক্তিসতীসমন্বিতবুধা জুহ্বত্যজস্রং পরং
তাং নৌমি ত্রিপুরাং পরাপরমযীং স্বানন্দসংবিত্তযে .. ৩২ ..
যা শৃঙ্গাররসোপদেশনগুরুঃ শ্রীকামজেতুঃ সদা
কারুণ্যামৃতবৃষ্টিপূর্ণজলমুক্ শ্রীনীলকণ্ঠপ্রিযা .
পঞ্চেষোর্বিজযশ্রিযো ধ্বজপটী যা শান্তিসীমানটী
তাং নৌমি ত্রিপুরাং পরাপরমযীং স্বানন্দসংবিত্তযে .. ৩৩ ..
বিদ্যোদ্যানমরালিকা পরশিবোত্সঙ্গোল্লসচ্ছারিকা
মেনাপুণ্যসুপঞ্জরাশ্রিতশুকী কাত্যাতনী যাম্বিকা .
শ্রীপাণ্ড্যেশ্বরকীর্তিকল্পলতিকা কাঞ্চীপুরীনাযিকা
তাং নৌমি ত্রিপুরাং পরাপরমযীং স্বানন্দসংবিত্তযে .. ৩৪ ..
লোকানাং পরমৌষধং ভগবদধ্বংসায বিদ্যাপ্তযে
মূকানামমৃতাব্ধিবীচিকবিতাপাণ্ডিত্যসীমাপ্তযে .
নিস্ত্রৈগুণ্যপরাত্পরস্য মদনোদ্রেকায চিত্রং চ যা
তাং নৌমি ত্রিপুরাং পরাপরমযীং স্বানন্দসংবিত্তযে .. ৩৫ ..
নিত্যৈশ্বর্যবতী মহাগুণবতী সত্পুত্রসংপদ্বতী
সত্সৌভাগ্যবতী পতিপ্রিযবতী প্রাজ্ঞেশ্বরী পার্বতী .
সত্সৌন্দর্যবতী শিবব্রতবতী সাধ্বী চ যা শাশ্বতী
তাং নৌমি ত্রিপুরাং পরাপরমযীং স্বানন্দসংবিত্তযে .. ৩৬ ..
ষট্ত্রিংশন্নবমল্লিকাস্রজমিমাং ত্যাগেশপাদার্পিতাং
প্রজ্ঞাসূত্রসুগুম্ভিতাং গুরুকৃপানন্দামৃতাপ্লাবিতাম্ .
যো ধত্তে হৃদি মূর্ধ্নি নিশ্চলধিযা শ্রোত্রেণ বাচাথবা
তস্মৈ দাস্যতি দেবতা শিবপদং সত্পুত্রসংপত্সুখম্ .. ৩৭ ..
ইত্যানন্দনাথপাদপপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতঃ ষট্ত্রিংশন্নবমল্লিকাস্তবঃ সংপূর্ণঃ