মন্ত্ররাজপদ স্তোত্রম্

.. শ্রীমন্ত্ররাজপদ স্তোত্রম্ ..
পাঞ্চরাত্র আগমীয অহির্বুধ্ন্য সংহিতাত্
শ্রী মন্ত্র রাজ পদ স্তোত্রম্

শ্রী ঈশ্বর উবাচ –
বৃত্তোত্ফুল্লবিশালাক্ষং বিপক্ষক্ষযদীক্ষিতম্ |
    নিনাদত্রস্তবিশ্বাণ্ডং বিষ্ণুমূগ্রং নমাম্যহম্ || ১||

সর্বৈরবধ্যতাং প্রাপ্তং সবলৌঘং দিতেঃ সুতম্ |
    নখাগ্রৈঃ শকলীচক্রে যস্তং বীরং নমাম্যহম্ || ২||

পদাবষ্টব্ধপাতালং মূর্ধাবিষ্টত্রিবিষ্টপম্ |
    ভুজপ্রবিষ্টাষ্টদিশং মহাবিষ্ণুং নমাম্যহম্ || ৩||

জ্যোতীংষ্যর্কেন্দুনক্ষত্রজ্বলনাদীন্যনুক্রমাত্ |
    জ্বলন্তি তেজসা যস্য তং জ্বলন্তং নমাম্যহম্ || ৪||

সর্বেন্দ্রিযৈরপি বিনা সর্বং সর্বত্র সর্বদা |
    যো জানাতি নমাম্যাদ্যং তমহং সর্বতোমুখম্ || ৫||

নরবত্ সিংহবচ্চৈব যস্য রূপং মহাত্মনঃ |
    মহাসটং মহাদংষ্ট্রং তং নৃসিংহং নমাম্যহম্ || ৬||

যন্নামস্মরণাদ্ ভীতাঃ ভূতবেতালরাক্ষসাঃ |
    রোগাদ্যাশ্চ প্রণশ্যন্তি ভীষণং তং নমাম্যহম্ || ৭||

সর্বোঽপি যং সমাশ্রিত্য সকলং ভদ্রমশ্নুতে |
    শ্রিযা চ ভদ্রযা জুষ্টো যস্তং ভদ্রং নমাম্যহম্ || ৮||

সাক্ষাত্ স্বকালে সংপ্রাপ্তং মৃত্যুং শত্রুগণান্বিতম্ |
    ভক্তানাং নাশযেদ্ যস্তু মৃত্যুমৃত্যুং নমাম্যহম্ || ৯||

নমস্কারাত্মকং যস্মৈ বিধাযাঽঽত্মনিবেদনম্ |
    ত্যক্তদুঃখোঽকিলান্ কামান্ অশ্নন্তং তং নমাম্যহম্ || ১০||

দাসভূতাঃ স্বতঃ সর্বে হ্যাত্মানঃ পরমাত্মনঃ |
    অতোঽহমপি তে দাসঃ ইতি মত্বা নমাম্যহম্ || ১১||

                  ফলশ্রুতিঃ
শঙ্করেণাদরাত্ প্রোক্তং পদানাং তত্ত্বনির্ণযম্ |
    ত্রিসন্ধ্যং যঃ পঠেত্ তস্য শ্রীর্বিদ্যাঽঽযুশ্চ বর্ধতে ||