গোবিন্দরাজপ্রপত্তিঃ

.. গোবিন্দরাজপ্রপত্তিঃ ..

যশ্চৈকশৈলনিকটে কমলাপুরীশ-
গোবিন্দরাজপদযোরকরোত্ প্রপত্তিম্ .
তং বাদিভীকরগুরোশ্চরণং প্রপদ্যে
পাত্রং গুরুং বরবরং পরমং গুরূণাম্ .. ১..

শ্রীমন্ নিদান জগতাং নিখিলাণ্ডজাত-
নির্বাহশক্তিমুখদিব্যগুণৈকতান .
অত্যন্তভোগ্যনতদোষ নিরস্তদোষ
গোবিন্দরাজ চরণৌ শরণং প্রপদ্যে .. ২..

রেখারথাঙ্গসরসীরুহবজ্রশঙ্ক-
চ্ছত্রাঙ্কুশপ্রভৃতিমঙ্গলচিহ্নগর্ভৌ .
সংসারতাপহরণে নিপুণৌ নতানাং
গোবিন্দরাজ চরণৌ শরণং প্রপদ্যে .. ৩..

পশ্যত্সু সান্দ্রভযকৌতুকমর্ভকেষু
প্রৌঢেষু সত্সু কৃতকৃত্যপরাযণেষু .
বিধ্বংসিতোর্ধ্বশকটাবপি বালভাবে
গোবিন্দরাজ চরণৌ শরণং প্রপদ্যে .. ৪..

আলম্ব্য বাহুযুগলেন কুমারভাবে
গাঢং করাঙ্গুলিযুগং কিল নন্দপত্ন্যাঃ .
অভ্যস্যমানদশচঙ্ক্রমণাভিরামৌ
গোবিন্দরাজ চরণৌ শরণং প্রপদ্যে .. ৫..

ঘোষাঙ্গনাকরসরোরুহতালনাদ-
সংগীতসংপদনুরূপমনোজ্ঞনৃত্তৌ .
মাণিক্যনূপুরমরীচিকৃতাঙ্গলেপৌ
গোবিন্দরাজ চরণৌ শরণং প্রপদ্যে .. ৬..

কুট্টাকতামুপগতৌ সরসঃ প্রসহ্য
মধ্যেসরিত্সলিলমুদ্ধতকালিযস্য .
তত্সুন্দরীনযননন্দনসংনিবেশৌ
গোবিন্দরাজ চরণৌ শরণং প্রপদ্যে .. ৭..

বাসাংসি দেহি তব কৃষ্ণ বশংবদানা-
মস্মাকমাকুলধিযামিতি গোপকন্যাঃ .
উদ্দিশ্য যৌ বিদধুরঞ্জলিমা প্রসাদাদ্
গোবিন্দরাজ চরণৌ শরণং প্রপদ্যে .. ৮..

গোরক্ষণে কিল বভূব যদীযরেণু-
রক্রূরমস্তকমণেঃ সরণিং সমেতঃ .
তাবদ্ভুতাবনুপমাবতিপাবনৌ তে
গোবিন্দরাজ চরণৌ শরণং প্রপদ্যে .. ৯..

মল্লাবহে মধুরযা মধুরাঙ্গনানাং
ফুল্লারবিন্দদলতল্লজলোচনানাম্ .
বাণ্যা প্রশংসিতপরার্ধ্যগতিপ্রকারৌ
গোবিন্দরাজ চরণৌ শরণং প্রপদ্যে .. ১০..

কংসং নিপাত্য কনকাসনতঃ পৃথিব্যা-
মুদ্ধৃত্য সাগসমনাগসমুগ্রসেনম্ .
রাজ্যেঽভিষিচ্য বিনিবারিতভূমিভারৌ
গোবিন্দরাজ চরণৌ শরণং প্রপদ্যে .. ১১..

দুর্যোধনে দুরভিমানিনি দুর্ভগাণা-
মগ্রেসরে ভজতি তে শিরসঃ প্রদেশম্ .
ধন্যেন যন্নিকটতঃ স্থিতমর্জুনেন
গোবিন্দরাজ চরণৌ শরণং প্রপদ্যে .. ১২..

সারথ্যবেষসমলংকৃতপাণ্ডুসূনো-
র্যুদ্ধাঙ্গণোজ্জ্বলরথাঞ্চলসংনিবেশৌ .
সান্দ্রেন্দ্রনীলপরিভাবুকভব্যরূপৌ
গোবিন্দরাজ চরণৌ শরণং প্রপদ্যে .. ১৩..

ভক্ত্যা প্রসন্নহৃদযেন ধনংজযেন
যত্রার্চিতানি কুসুমানি শিবোত্তমাঙ্গে .
সাক্ষাত্কৃতানি সহসাদ্ভুতবৈভবৌ তৌ
গোবিন্দরাজ চরণৌ শরণং প্রপদ্যে .. ১৪..

অস্মদ্গুরুপ্রভৃতিভিঃ কমলাবসানৈ-
রাদর্শিতৌ করুণযা মম দেশিকেন্দ্রৈঃ .
সত্ত্বোত্তরৈঃ সকলজীবদযাপরৈস্তৈ-
র্গোবিন্দরাজ চরণৌ শরণং প্রপদ্যে .. ১৫..

অস্মাত্পিতামহমশেষগুণাভিরাম-
মাচার্যরত্নমযি বাদিভযংকরার্যম্ .
গোবর্ধনাদ্রিধৃতিধারিতগোপ বীক্ষ্য
গোবিন্দরাজ মম দুর্লপিতং ক্ষমস্ব .. ১৬..

. ইতি শ্রীগোবিন্দরাজপ্রপত্তিঃ সংপূর্ণা .