কৃষ্ণাষ্টকম্ ৪

.. কৃষ্ণাষ্টকম্ ৪ ..

শ্রিযাশ্লিষ্টো বিষ্ণুঃ স্থিরচরগুরুর্বেদবিষযো
     ধিযাং সাক্ষী শুদ্ধো হরিরসুরহন্তাব্জনযনঃ .
গদী শঙ্খী চক্রী বিমলবনমালী স্থিররুচিঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ১..
যতঃ সর্বং জাতং বিযদনিলমুখ্যং জগদিদম্
     স্থিতৌ নিঃশেষং যোঽবতি নিজসুখাংশেন মধুহা .
লযে সর্বং স্বস্মিন্হরতি কলযা যস্তু স বিভুঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ২..
অসূনাযম্যাদৌ যমনিযমমুখ্যৈঃ সুকরণৈ/-
     র্র্নিরুদ্ধ্যেদং চিত্তং হৃদি বিলযমানীয সকলম্ .
যমীড্যং পশ্যন্তি প্রবরমতযো মাযিনমসৌ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৩..
পৃথিব্যাং তিষ্ঠন্যো যমযতি মহীং বেদ ন ধরা
     যমিত্যাদৌ বেদো বদতি জগতামীশমমলম্ .
নিযন্তারং ধ্যেযং মুনিসুরনৃণাং মোক্ষদমসৌ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৪..
মহেন্দ্রাদির্দেবো জযতি দিতিজান্যস্য বলতো
     ন কস্য স্বাতন্ত্র্যং ক্বচিদপি কৃতৌ যত্কৃতিমুতে .
বলারাতের্গর্বং পরিহরতি যোঽসৌ বিজযিনঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৫..
বিনা যস্য ধ্যানং ব্রজতি পশুতাং সূকরমুখাম্
     বিনা যস্য জ্ঞানং জনিমৃতিভযং যাতি জনতা .
বিনা যস্য স্মৃত্যা কৃমিশতজনিং যাতি স বিভুঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৬..
নরাতঙ্কোট্টঙ্কঃ শরণশরণো ভ্রান্তিহরণো
     ঘনশ্যামো বামো ব্রজশিশুবযস্যোঽর্জুনসখঃ .
স্বযংভূর্ভূতানাং জনক উচিতাচারসুখদঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৭..
যদা ধর্মগ্লানির্ভবতি জগতাং ক্ষোভকরণী
     তদা লোকস্বামী প্রকটিতবপুঃ সেতুধৃদজঃ .
সতাং ধাতা স্বচ্ছো নিগমগণগীতো ব্রজপতিঃ
     শরণ্যো লোকেশো মম ভবতু কৃষ্ণোঽক্ষিবিষযঃ .. ৮..
ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছঙ্করভগবতঃ কৃতৌ
কৃষ্ণাষ্টকং সংপূর্ণম্ ..