.. শ্রীকৃষ্ণকর্ণামৃতম্ ..
|| প্রথমাশ্বাসঃ ||
চিন্তামণির্জযতি সোমগিরির্গুরুর্মে
শিক্ষাগুরুশ্চ ভগবান্ শিখিপিঞ্ছমৌলিঃ |
যত্পাদকল্পতরুপল্লবশেখরেষু
লীলাস্বযংবররসং লভতে জযশ্রীঃ || ১. ১||
অস্তি স্বস্তরুণীকরাগ্রবিগলত্কল্পপ্রসূনাপ্লুতং
বস্তুপ্রস্তুতবেণুনাদলহরীনির্বাণনির্ব্যাকুলম্ |
স্রস্তস্রস্তনিরুদ্ধনীবিবিলসদ্গোপীসহস্রাবৃতং
হস্তন্যস্তনতাপবর্গমখিলোদারং কিশোরাকৃতি || ১. ২||
চাতুর্যৈকনিধানসীমচপলাঽপাঙ্গচ্ছটামন্দরং
লাবণ্যামৃতবীচিলালিতদৃশং লক্ষ্মীকটক্ষাদৃতম্ |
কালিন্দীপুলিনাঙ্গণপ্রণযিনং কামাবতারাঙ্কুরং
বালং নীলমমী বযং মধুরিমস্বারাজ্যভারাধ্নুমঃ || ১. ৩||
বর্হোত্তংসবিলাসিকুন্তলভরং মাধুর্যমগ্নাননং
প্রোন্মীলন্নবযৌবনং প্রবিলসদ্বেণুপ্রণাদামৃতম্ |
আপীনস্তনকুড্মলাভিরভিতো গোপীভিরারাধিতং
জ্যোতিশ্চেতসি নশ্চকাস্তি জগতামেকাভিরামাদ্ভুতম্ || ১. ৪||
মধুরতরস্মিতামৃতবিমুগ্ধমুখাম্বুরুহং
মদশিখিপিঞ্ছলাঞ্ছিতমনোজ্ঞকচপ্রচযম্ |
বিষযবিষামিষগ্রসনগৃধ্নুষি চেতসি মে
বিপুলবিলোচনং কিমপি ধাম চকাস্তি চিরম্ || ১. ৫||
মুকুলাযমাননযনাম্বুজং বিভো-
র্মুরলীনিনাদমকরন্দনির্ভরম্ |
মুকুরাযমাণমৃদুগণ্ডমণ্ডলং
মুখপঙ্কজং মনসি মে বিজৃম্ভ্তাম্ || ১. ৬||
কমনীযকিশোরমুগ্ধমূর্তেঃ
কলবেণুক্বণিতাদৃতাননেন্দোঃ |
মম বাচি বিজৃম্ভতাং মুরারে-
র্মধুরিম্ণঃ কণিকাপি কাপি কাপি || ১. ৭||
মদশিখণ্ডিশিখণ্ডবিভূষণং
মদনমন্থরমুগ্ধমুখাংবুজম্ |
ব্রজবধূনযনাঞ্চলবঞ্চিতং
বিজযতাং মম বাঙ্মযজীবিতম্ || ১. ৮||
পল্লবারুণপাণিপঙ্কজসঙ্গিবেণূরবাকুলং
ফুল্লপাতলপাটলীপরিবাদিপাদসরোরুহম্ |
উল্লসন্মধুরাধরদ্যুতিমঞ্জরীসরসাননং
বল্লবীকুচকুম্ভকুঙ্কুমপঙ্কিলং প্রভুমাশ্রযে || ১. ৯||
অপাঙ্গরেখাভিরভঙ্গুরাভি-
রনঙ্গলীলারসরঞ্চিতাভিঃ |
অনুক্ষনং বল্লবসুন্দরীভি-
রভ্যর্চমানং বিভুমাশ্রযামঃ || ১. ১০||
হৃদযে মম হৃদ্যবিভ্রমাণাং
হৃদযং হর্ষবিশাললোলনেত্রম্ |
তরুণং ব্রজবালসুন্দরীণাং
তরলং কিঞ্চন ধাম সন্নিধত্তাম্ || ১. ১১||
নিখিলভুবনলক্ষ্মীনিত্যলীলাস্পদাভ্যাং
কমলবিপিনবীথীগর্বসর্বঙ্কষাভ্যাম্ |
প্রণমদভযদানপ্রৌঢগাঢোদ্ধতাভ্যাং
কিমপি বহতু চেতঃ কৃষ্ণপাদাম্বুজাভ্যাম্ || ১. ১২||
প্রণযপরিণতাভ্যাং প্রাভবালম্বনাভ্যাং
প্রতিপদললিতাভ্যাং প্রত্যহং নূতনাভ্যাম্ |
পতিমুহুরধিকাভ্যাং প্রস্নুবল্লোচনাভ্যাং
প্রভবতু হৃদযে নঃ প্রাণনাথঃ কিশোরঃ || ১. ১৩||
মাধুর্যবারিধিমদান্ধতরঙ্গভঙ্গী-
শৃঙ্গারসংকলিতশীতকিশোরবেষম্ |
আমন্দহাসললিতাননচন্দ্রবিম্ব-
মানন্দসংপ্লবমনুপ্লবতাং মনো মে || ১. ১৪||
অব্যাজমঞ্জুলমুখাম্বুজমুগ্ধভাবৈ-
রাস্বাদ্যমাননিজবেণুবিনোদনাদম্ |
আক্রীডিতামরুণপাদসরোরুহাভ্যা-
মার্দ্রে মদীযহৃদযে ভুবনার্দ্রমোজঃ || ১. ১৫||
মণিনূপুরবাচালং বন্দে তচ্চরণং বিভোঃ |
ললিতানি যদীযনি লক্ষ্মাণি ব্রজবীথিষু || ১. ১৬||
মম চেতসি স্ফুরতু বল্লবীবিভো-
র্মণিনূপুরপ্রণযিমঞ্জুশিঞ্জিতম্ |
কমলাবনেচরকলিন্দকন্যকা-
কলহংসকণ্ঠকলকূজিতাদৃতম্ || ১. ১৭||
তরুণারুণকরুণামযবিপুলাযতনযনং
কমলাকুচকলশীভরপুলকীকৃতহৃদযম্ |
মুরলীরবতরলীকৃতমুনিমানসনলিনং
মম খেলতি মদচেতসি মধুরাধরমমৃতম্ || ১. ১৮||
আমুগ্ধমর্ধনযনাম্বুজচুম্ব্যমান-
হর্ষাকুলব্রজবধূমধুরাননেন্দোঃ |
আরব্ধবেণুরবমাদিকিশোরমূর্তে-
রাবির্ভবন্তি মম চেতসি কোঽপি ভাবাঃ || ১. ১৯||
কলক্বণিতকঙ্কণং করনিরুদ্ধপীতাম্বরং
ক্রমপ্রসৃতকুন্তলং কলিতবর্হভূষং বিভোঃ |
পুনঃ প্রসৃতিচাপলং প্রণিযিনীভুজাযন্ত্রিতং
মম স্ফুরতু মানসে মদনকেলিশয্যোত্থিতম্ || ১. ২০||
স্তোকস্তোকনিরুধ্যমানমৃদুলপ্রস্যন্দিমন্দস্মিতং
প্রেমোদ্ভেদনিরর্গলপ্রসৃমরপ্রব্যক্তরোমোদ্গমম্ |
শ্রোতৃশ্রোত্রমনোহরব্রজবধূলীলামিথো জল্পিতং
মিথ্যাস্বাপমুপাস্মহে ভগবতঃ ক্রীডানিমীলদ্দৃশঃ || ১. ২১||
বিচিত্রপত্রাঙ্কুরশালিবালা-
স্তনান্তরং মৌনিমনোন্তরং বা |
অপাস্য বৃন্দাবনপাদপাস্য-
মুপাস্যমন্যন্ন বিলোকযামঃ || ১. ২২||
সার্ধং সমৃদৈরমৃতাযমানৈ-
রাধ্যাযমানৈর্মুরলীনিনাদৈঃ |
মূর্ধাভিষিক্তং মধুরাকৃতীনাং
বালং কদা নাম বিলোকযিষ্যে || ১. ২৩||
শিশিরীকুরুতে কদা নু নঃ
শিখিপিঞ্ছাভরণশ্শিশুর্দৃশোঃ |
যুগলং বিগলন্মধুদ্রব
স্মিতমুদ্রামৃদুনা মুখেন্দুনা || ১. ২৪||
কারুণ্যকর্বুরকটাক্ষনিরীক্ষণেন
তারুণ্যসংবলিতশৈশববৈভবেন |
আপুষ্ণতা ভুবনমদ্ভুতবিভ্রমেণ
শ্রীকৃষ্ণচন্দ্র শিশিরী কুরু লোচনং মে || ১. ২৫||
কদা বা কালিন্দীকুবলযদলশ্যামলতরাঃ
কটাক্ষা লক্ষ্যন্তে কিমপি করুণাবীচিনিচিতাঃ |
কদা বা কন্দর্পপ্রতিভটজটাচন্দ্রশিশিরাঃ
কিমপ্যন্তস্তোষং দদতি মুরলীকেলিনিনদাঃ || ১. ২৬||
অধীরমালোকিতমার্দ্রজল্পিতং
গতং চ গংভীরবিলাসমন্থরম্ |
অমন্তমালিঙ্গিতমাকুলোন্মদ-
স্মিতং চ তে নাথ বদন্তি গোপিকাঃ || ১. ২৭||
অস্তোকস্মিতভরমাযতাযতাক্ষং
নিশ্শেষস্তনমৃদিতং ব্রজাঙ্গনাভিঃ |
নিস্সীমস্তবকিতনীলকান্তিধারং
দৃশ্যাসং ত্রিভুবনসুন্দরং মহস্তে || ১. ২৮||
মযি প্রসাদং মধুরৈঃ কটাক্ষৈ-
র্বশীনিনাদানুচরৈর্বিধেহি |
ত্বযি প্রসন্নে কিমিহাপরৈর্ন-
স্ত্বয্যপ্রসন্নে কিমিহাপরৈর্নঃ || ১. ২৯||
নিবদ্ধমুগ্ধাঞ্জলিরেষ যাচে
নীরন্ধ্রদৈন্যোন্নতমুক্তকণ্ঠম্ |
দযাম্বুধে দেব ভবত্কটাক্ষ-
দাক্ষিণ্যলেশেন সকৃন্নিষিঞ্চ || ১. ৩০||
পিঞ্ছাবতংসরচনোচিতকেশপাশে
পীনস্তনীনযনপঙ্কজপূজনীযে |
চন্দ্রারবিন্দবিজযোদ্যতবক্ত্রবিম্বে
চাপল্যমেতি নযনং তব শৈশবে নঃ || ১. ৩১||
ত্বচ্ছৈশবং ত্রিভুবনাদ্ভুতমিত্যবৈমি
যচ্চাপলং চ মম বাগবিবাদগম্যম্ |
তত্ কিং করোমি বিরণান্মুরলীবিলাস-
মুগ্ধং মুখাম্বুজমুদীক্ষতুমীক্ষণাভ্যাম্ || ১. ৩২||
পর্যাচিতামৃতরসানি পদার্থভঙ্গী-
ফল্গূনি বল্গিতবিশালবিলোচননানি |
বাল্যাধিকানি মদবল্লবভাবিতানি
ভাবে লুঠন্তি সুদৃশাং তব জল্পিতানি || ১. ৩৩||
পুনঃ প্রসন্নেন মুখেন্দুতেজসা
পুরোঽবতীর্ণস্য কৃপামহাম্বুধেঃ |
তদেব লীলামুরলীরবামৃতং
সমাধিবিঘ্নায কদা নু মে ভবেত্ || ১. ৩৪||
ভাবেন মুগ্ধচপলেন বিলোকনেন
মন্মানসে কিমপি চাপলমুদ্বহন্তম্ |
লোলেন লোচনরসাযনমীক্ষণেন
লীলাকিশোরমুপগূহিতুমুত্সুকোঽস্মি || ১. ৩৫||
অধীরবিম্বাধরবিভ্রমেণ
হর্ষার্দ্রবেণুস্বরসম্পদা চ |
অনেন কেনাপি মনোহরেণ
হা হন্ত হা হন্ত মনো ধুনোতি || ১. ৩৬||
যাবন্ন মে নিখিলমর্মদৃঢাভিঘাত-
নিস্সন্ধিবন্ধনমুদেত্যসবোপতাপঃ |
তাবদ্বিভো ভবতু তাবকবক্ত্রচন্দ্র-
চন্দ্রাতপদ্বিগুণিতা মম চিত্তধারা || ১. ৩৭||
যাবন্ন মে নরদশা দশমী দৃশোঽপি
রন্ধ্রাদুদেতি তিমিরীকৃতসর্বভাবা |
লাবণ্যকেলিভবনং তব তাবদেতু
লক্ষ্যাঃ সমুত্ক্বণিতবেণুমুখেন্দুবিম্বম্ || ১. ৩৮||
আলোললোচনবিলোকিতকেলিধারা-
নীরাজিতাগ্রসরণেঃ করুণাম্বুরাশেঃ |
আর্দ্রাণি বেণুনিনদৈঃ প্রতিনাদপূরৈ-
রাকর্ণযামি মণিনূপুরশিঞ্জিতানি || ১. ৩৯||
হে দেব হে দযিত হে জগদেকবন্ধো
কে কৃষ্ণ হে চপল হে করুণৈকসিন্ধো |
হে নাথ হে রমণ হে নযনাভিরাম
হা হা কদা নু ভবিতাসি পদং দৃশোর্মে || ১. ৪০||
অমূন্যধন্যানি দিনান্তরাণি
হরে ত্বদালোকনমন্তরেণ |
অনাথিবন্ধো করুণৈকসিন্ধো
হা হন্ত হা হন্ত কথং নযামি || ১. ৪১||
কিমিব শৃণুমঃ কস্য ব্রূমঃ কথং কৃথমাশযা
কথযত কথাং ধন্যামন্যামহো হৃদযেশযঃ |
মধুরমধুরস্মেরকারে মনোনযোত্সবে
কৃপণকৃপণা কৃষ্ণে তৃণাং চিরং বত লম্বতে || ১. ৪২||
আভ্যাং বিলোচনাভ্যামম্বুজদলললিতলোচনং বালম্ |
দ্বাভ্যামপি পরিরব্ধুং দূরে মম হন্ত দৈবসমাগ্রী || ১. ৪৩||
অশ্রান্তস্মিতমরুণারুণাধরোষ্ঠং
হর্ষার্দ্রদ্বিগুণমনোজ্ঞবেণুগীতম্ |
বিভ্রাম্যদ্বিপুলবিলোচনার্ধমুগ্ধং
বীক্ষিষ্যে তব বদনাম্বুজং কদা নু || ১. ৪৪||
লীলাযতাভ্যাং রসশীতলাভ্যাং
নীলারুণাভ্যাং নযনাম্বুজাভ্যাম্ |
আলোকযেদদ্ভুতবিভ্রমাভ্যাং
বালঃ কদা কারুণিকঃ কিশোরঃ || ১. ৪৫||
বহুলচিকুরভারং বদ্ধপিঞ্ছাবতংসং
চপলবপলনেত্রং চারুবিম্বাধরোষ্ঠম্ |
মধুরমৃদুলহাসং মন্থরোদারলীলং
মৃগযতি নযনং মে মুগ্ধবেষং মুরারেঃ || ১. ৪৬||
বহুলজলদচ্ছাযাচোরং বিলাসভরালসং
মদশিখিশিখালীলোত্তংসং মনোজ্ঞমুখাম্বুজম্ |
কমপি কমলাপাঙ্কোদগ্রপ্রপন্নজগজ্জিতং
মধুরিমপরীপাকোদ্রেকং বযং মৃগযামহে || ১. ৪৭||
পরামৃশ্যং দূরে পরিশদি মুনীনাং ব্রজবধূ-
দৃশাং দৃশ্যং শশব্ত্ ত্রিভুবনমনোহারিবপুষম্ |
অনামৃশ্যং বাচামনিদমুদযানমপি কদা
দরীদৃশ্যে দেব দরদলিতনীলোত্পলনিভম্ || ১. ৪৮||
লীলাননাম্বুজমধীরমুদীক্ষমাণং
নর্মাণি বেণুবিবরেষু নিবেশযন্তম্ |
ডোলাযমাননযনং নযনাভিরামং
দেবং কদা নু দযিতং ব্যতিলোকযিষ্যে || ১. ৪৯||
লগ্নং মুহুর্মনসি লম্পটসংপ্রদাযি-
লেখাবিলেখনরসজ্ঞমনোজ্ঞবেষম্ |
লজ্জন্মৃদুস্মিতমধুস্নপিতাধরাংশু-
রাকেন্দুলালিতমুখেন্দুমুকুন্দবাল্যম্ || ১. ৫০||
অহিমকরকরনিকরমৃদুমৃদিতলক্ষ্মী-
সরসতরসরসিরুহসদৃশদৃশি দেবে |
ব্রজযুবতিরতিকলহবিজযিনিজলীলা-
মদমুদিতবদনশশিমধুরিমণি লীযে || ১. ৫১||
করকমলদলদলিতললিততরবংশী
কলনিনদগলদমৃতঘনসরসি দেবে |
সহজরসভরভরিতদরহসিতবীথী-
সততবহদধরমণীমধুরিমণি লীযে || ১. ৫২||
কুসুমশরশরসমরকুপিতমদগোপী-
কুচকলশঘুসৃণরসলসদুরসি দেবে |
মদলুলিতমৃদুহসিতমুষিতশশিশোভা-
মুহুরধিকমুখকমলমধুরিমণি লীযে || ১. ৫৩||
আনম্রামসিতভ্রুবোরুপচিতামক্ষীণপক্ষ্মাঙ্কুরে-
ষ্বালোলামনুরাগিণোর্নযনযোরার্দ্রাং মৃদৌ জল্পিতে |
আতম্রামধরামৃতে মদকলামম্লানবংশীরবে-
ষ্বাশাস্তে মম লোচনং ব্রজশিশোর্মূর্তিং জগন্মোহিনীম্
|| ১. ৫৪||
তত্কৈশোরং তচ্চ বক্ত্রারবিন্দং
তত্কারুণ্যং তে চ লীলাকটাক্ষাঃ |
তত্সৌন্দর্যং সা চ মন্দস্মিতশ্রীঃ
সত্যং সত্যং দুর্লভং দৈবতেষু || ১. ৫৫||
বিশ্বোপপ্লবশমনৈকবদ্ধদীক্ষং
বিশ্বাসস্তবকিতচেতসাং জনানাম্ |
পশ্যামঃ প্রতিনবকান্তিকন্দলার্দ্রং
পশ্যামঃ পথি পথি শৈশবং মুরারেঃ || ১. ৫৬||
মৌলিশ্চন্দ্রকভূষণা মরকতস্তম্ভাভিরামং বপু-
র্বক্ত্রং চিত্রবিমুগ্ধহাসমধুরং বালে বিলোলে দৃশৌ |
বাচশ্শৈশবশীতলামদগজশ্লাঘ্যা বিলাসস্থিতি-
র্মন্দং মন্দমযে ক এষ মথুরাবীথীমিতো গাহতে || ১. ৫৭||
পাদৌ পাদবিনির্জিতাম্বুজবনৌ পদ্মালযালঙ্কৃতৌ
পাণী বেণুবিনোদনপ্রণযিনৌ পর্যন্তশিল্পশ্রিযৌ |
বাহূদোহদভাজনং মৃগদৃশাং মাধুর্যধারা গিরো
বক্ত্রং বাগ্বিভবাতিলঙ্ঘিতমাহো বালং কিমেতন্মহঃ || ১. ৫৮||
বর্হং নাম বিভূষণং বহুমতং বেষায শেষৈরলং
বক্ত্রং দ্বিত্রিবিশেষকান্তিলহরীবিন্যাসধন্যাধরম্ |
শীলৈরল্পধিযামগম্যবিভবৈঃ শৃঙ্গারভঙ্গীমযং
চিত্রং চিত্রমহো বিচিত্রতমহো চিত্রং বিচিত্রং মহঃ || ১১. ৫৯||
অগ্রে সমগ্রযতি কামপি কেলিলক্ষ্মী-
মন্যাসু দিক্ষ্স্বপি বিলোচনমেব সাক্ষী |
হা হন্ত হস্তপথদূরমহো কিমেত-
দাসীত্ কিশোরমযমম্ব জাগত্রযং মে || ১. ৬০||
চিকুরং বহুলং বিরলং ভ্রমরং
মৃদুলং বচনং বিপুলং নযনম্ |
অধরং মধুরং বদনং ললিতং
চপলং চরিতন্তু কদাঽনুভবে || ১. ৬১||
পরিপালয নঃ কৃপালযেত্-
যসকৃজ্জল্পিতমাত্মবান্ধবঃ |
মুরলী মৃদুলস্বনান্তরে
বিভুরাকর্ণযিতা কদা নু নঃ || ১. ৬২||
কদা নু কস্যাং নু বিপদ্দশাযাং
কৈশোরগন্ধিঃ করুণাম্বুধির্নঃ |
বিলোচনাভ্যাং বিপুলাযতাভ্যাং
ব্যালোকযিষ্যন্ বিষযীকরোতি || ১. ৬৩||
মধুরমধরবিম্বে মঞ্জুলং মন্দহাসে
শিশিরমমৃতবাক্যে শীতলং দৃষ্টিপাতে |
বিপুলমরুণনেত্রে বিশ্রুতং বেণুনাদে
মরকতমণিনীলং বালমালোকযে নু || ১. ৬৪||
মাধুর্যাদপি মধুরং মন্মথতাতস্য কিমপি কিশোরম্ |
চাপযাদপি চপলং চেতো মম হরতি হন্ত কিং কুর্মঃ || ১. ৬৫||
বক্ষঃস্থলে চ বিপুলং নযনোত্পলে চ
মন্দস্মিতে চ মৃদুলং মদজল্পিতে চ |
বিম্বাধরে চ মধুরং মুরলীরবে চ
বালং বিলাসনিধিমাকলযে কদা নু || ১. ৬৬||
আর্দ্রাবলোকিতদযাপরিণদ্ধনেত্র-
মাবিষ্কৃতস্মিতসুধামধুরাধরোষ্ঠম্ |
আদ্যং পুমাংসমবতংসিতবর্হিবর্হ-
মালোকযন্তি কৃতিনঃ কৃতপুণ্যপুঞ্জাঃ || ১. ৬৭||
মারঃ স্বযং নু মধুরদ্যুতিমণ্ডলং নু
মাধুর্যমেব নু মনোনযনামৃতং নু |
বাণীমৃজা নু মম জীবিতবল্লভো নু
বালোঽযমভ্যুদযতে মম লোচনায || ১. ৬৮||
বালোঽযমালোলবিলোচনেন
বক্ত্রেণ চিত্রীকৃতদিঙ্মুখেন |
বেষেণ ঘোষোচিতভূষণেন
মুগ্ধেন দুগ্ধে নযনোত্সুকং নঃ || ১. ৬৯||
আন্দোলিতাগ্রভুজমাকুলনেত্রলীল-
মার্দ্রস্মিতার্দ্রবদনাম্বুজচন্দ্রবিম্বম্ |
শিঞ্জানভূষণশতং শিখিপিঞ্ছমৌলিং
শীতং বিলোচনরসাযনমভ্যুপৈতি || ১. ৭০||
পশুপালপালপরিষদ্বিভূষণং
শিশুরেষ শীতলবিলোললোচনঃ |
মৃদুলস্মিতার্দ্রবদনেন্দুসম্পদা
মদযন্মদীযহৃদযং বিগাহতে || ১. ৭১||
তদিদমুপনতং তমালনীলং
তরলবিলোচনতারকাভিরামম্ |
মুদিতমুদিতবক্ত্রচন্দ্রবিম্বং
মুখরিতবেণুবিলাসজীবিতং মে || ১. ৭২||
চাপল্যসীম চপলানুভবৈকসীম
চাতুর্যসীম চতুরানানশিল্পসীম |
সৌরভ্যসীম সকলাদ্ভুতকেলিসীম
সৌভাগ্যসীম তদিদং ব্রজভাগ্যসীম || ১. ৭৩||
মাদুর্যেণ দ্বিগুণশিশিরং বক্ত্রচন্দ্রং বহন্তী
বশীবীথীবিগলদমৃতস্রোতসা সেচযন্তী |
মদ্বাণীনাং বিহরণপদং মত্তসৌভাগ্যভাজাং
মাত্পুণ্যানাং পরিণতিরহো নেত্রযোস্সন্নিধত্তে || ১. ৭৪||
তেজসেঽস্তু নমো ধেনুপালিনে লোকপালিনে |
রাধাপযোধরোত্সঙ্গশাযিনে শেষশাযিনে || ১. ৭৫||
ধেনুপালদযিতাস্তনস্থলী-
ধন্যকুঙ্কুমসনাথকান্তযে |
বেণুগীতগতিমূলবেধসে
তেজসে তদিদমোং নমো নমঃ || ১. ৭৬||
মৃদুক্বণন্নূপুরমন্থরেণ
বালেন পাদাম্বুজপল্লবেন |
অনুক্বণন্মঞ্জুলবেণুগীত-
মাযাতি মে জীবিতমাত্তকেলি || ১. ৭৭||
সোঽযং বিলাসমুরলীনিনদামৃতেন
সিঞ্চন্নুদঞ্চিতমিদং মম কর্ণযুগ্মম্ |
আযাতি মে নযনবন্ধুরনন্যবন্ধু-
রানন্দকন্দলিতকেলিকটাক্ষলক্ষ্যঃ || ১. ৭৮||
দূরাদ্বিলোকযতি বারণখেলগামী
ধারাকটাক্ষভরিতেন বিলোচনেন |
আরাদুপৈতি হৃদযঙ্গমবেণুনাদ-
বেণীদুঘেন দশনাবরণেন দেবঃ || ১. ৭৯||
ত্রিভুবনসরসাভ্যাং দীপ্তভূষাপদাভ্যাং
দৃশি দৃশি শিশিরাভ্যাং দিব্যলীলাকুলাভ্যাম্ |
অশরণশরণাভ্যামদ্ভুতাভ্যাং পদাভ্যা-
মযমযমনুকূজদ্বেণুরাযাতি দেবঃ || ১. ৮০||
সোঽযং মুনীন্দ্রজনমানসতাপহারী
সোঽযং মদব্রজবধূবসনাপহারী |
সোঽযং তৃতীযভুবনেশ্বারদর্পহারী
সোঽযং মদীযহৃদযাম্বুরুহাপহারী || ১. ৮১||
সর্বজ্ঞত্বে চ মৌগ্ধ্যে চ সার্বভৌমমিদং মম |
নির্বিশন্নযনং তেজো নির্বাণপদমশ্নুতে || ১. ৮২||
কৃষ্ণানমেতত্পুনরুক্তশোভ-
মুষ্ণেতরাংশোরুদযং মুখেন্দোঃ |
তৃষ্ণাম্বুরাশিং দ্বিগুণীকরোতি
কৃষ্ণাহ্বযং কিঞ্চন জীবিতং মে || ১. ৮৩||
তদেতদাতাম্রবিলোচনশ্রী-
সম্ভাবিতাশেষবিনম্রবর্গম্ |
মুহুর্মুরারের্মধুরাধরোষ্ঠং
মুখাম্বুজং চুম্বতি মানসং মে || ১. ৮৪||
করৌ শরদুদঞ্চিতাম্বুজবিলাসশিক্ষাগুরূ
পদৌ বিবুধপাদপপ্রথমপল্লবোল্লঙ্ঘিনৌ |
দৃশৌ দলিতদুর্মদত্রিভুবনোপমানশ্রিযৌ
বিলোক্য সুবিলোচনামৃতমহো সহচ্ছৈশাবম্ || ১. ৮৫||
আচিন্বানমহন্যহন্যহনি সাকারান্ বিহারক্রমা-
নারুন্ধানমরুন্ধতীহৃদযমপ্যার্দ্রস্মিতাস্যশ্রিযা |
আতন্বানমনন্যজন্মনযনশ্লাঘ্যামনর্ঘ্যাং দশা-
মামন্দং ব্রজসুন্দরীস্তনতটীসাম্রাজ্যমাজ্জৃম্ভতে || ১. ৮৬||
সমুচ্ছ্বসিতযৌবনং তরলশৈশবালঙ্কৃতং
মদচ্ছুরিতলোচনং মদনমুগ্ধহাসামৃতম্ |
প্রতিক্ষণবিলোকনং প্রণযপীতবশীমুখং
জগত্ত্রযবিমোহনং জযতি মামকং জীবিতম্ || ১. ৮৭||
চিত্রং তদেতচ্চরণারবিন্দং
চিত্রং তদেতন্নযনারবিন্দ্ং |
চিত্রং তদেতদ্বদনারবিন্দং
চিত্রং তদেতত্পুনরম্ব চিত্রম্ || ১. ৮৮||
অখিলভুবনৈকভূষমধিভূষিত-
জলধিদুহিতৃকুচকুম্ভম্ |
ব্রজযুবতীহারাবলিমরকত-
নাযকমহামণিং বন্দে || ১. ৮৯||
কান্তাকচগ্রহণবিগ্রহবদ্ধলক্ষ্মী-
খণ্ডাঙ্গরাগরসরঞ্জিতমঞ্জুলশ্রীঃ |
গণ্ডস্থলীমুকুরমণ্ডলখেলমান-
ঘর্মাঙ্কুরং কিমপি খেলতি কৃষ্ণতেজঃ || ১. ৯০||
ইমধুরং মধুরং বপুরস্য বিভো-
র্মধুরং মধুরং বদনং মধুরম্ |
মধুগন্ধি মৃদস্মিতমেতদহো
মধুরং মধুরং মধুরং মধুরম্ || ১. ৯১||
শৃঙ্গাররসসর্বস্বং শিখিপিঞ্ছবিভূষণম্ |
অঙ্গীকৃতনরাকারমাশ্রযে ভুবনাশ্রযম্ || ১. ৯২||
নাদ্যাপি পশ্যতি কদাচন দর্শনেন
চিত্তেন চোপনিষদা সুদৃশাং সহসর্ম্ |
স ত্বং চিরং নযনযোরনযোঃ পদব্যাং
স্বামিন্ কযা নু কৃপযা মম সন্নিধত্সে || ১. ৯৩||
কেযং কান্তিঃ কেশব ত্বন্মুখেন্দোঃ
কোঽযং বেষঃ কোঽপি বাচামভূমিঃ |
সেযং সোঽযং স্বাদুতা মঞ্জুলশ্রীঃ
ভূযো ভূযো ভূযশস্তাং নমামি || ১. ৯৪||
বদনেন্দু বিনির্জিতশ্শশী
দশধা দেব পদং প্রপদ্যতে |
অধিকাং শ্রিযমশ্নুতেতরাং
তব কারুণ্যবিজৃম্ভিতং কিযত্ || ১. ৯৫||
তত্বন্মুখং কথমিবাব্জসমানকক্ষ্যং
বাঙ্মাধুরীবহুলপর্বকলাসমৃদ্ধম্ |
তত্ কিং ব্রুবে কিমপরং ভুবনৈককান্তং
যস্য ত্বদাননসমা সুষমা সদা স্যাত্ || ১. ৯৬||
শুশ্রূষসে যদি বচঃ শৃণু মামকীনং
পূর্বৈরপূর্বকবিভির্ন কটাক্ষিতং যত্ |
নীরাজনক্রমধুরং ভবদাননেন্দোঃ
নির্ব্যাজমর্হতি চিরাযা শশিপ্রদীপঃ || ১. ৯৭||
অখণ্ডনির্বাণরসপ্রবাহৈ-
র্বিখণ্ডিতাশেষরসান্তরাণি |
অযন্ত্রিতোদ্ধান্তসুধার্ণবানি
জযন্তি শীতানি তব স্মিতানি || ১. ৯৮||
কামং সন্তু সহস্রশঃ কতিপযে স্বারস্যধৌরেযকাঃ
কামং বা কমনীযতাপরিণতিস্বারাজ্যবদ্ধব্রতাঃ |
তৈর্নৈবং বিবদামহে ন চ বযং দেব প্রিযং ব্রূমহে
যত্সত্যং রমণীযতাপরিণতিস্ত্বয্যেব পারংগতা || ১. ৯৯||
মন্দারমূলে মদনাভিরামং
বিম্বাধরাপূরিতবেণুনাদম্ |
গোগোপগোপীজনমধ্যসংস্থং
গোপং ভজে গোকুলপূর্ণচন্দ্রম্ || ১. ১০০||
গলদ্ব্রীডা লোলা মদনবনিতা গোপবনিতা
মধুস্ফীতং গীতং কিমপি মধুরা চাপলধুরাঃ |
সমুজ্জৃম্ভা গুম্ভা মধুরিমগিরাং মাদৃশগিরাং
ত্বযি স্থানে জাতে দধতি চপলং জন্ম চ ফলম্ || ১. ১০১||
ভুবনং ভবনং বিলাসিনী শ্রী-
স্তনযস্তামরসাসনঃ স্মরশ্চ |
পরিচারপরম্পরাঃ সুরেন্দ্রা-
স্তপদি ত্বচ্চরিতং বিভো বিচিত্রম্ || ১. ১০২||
দেবস্ত্রিলোকসৌভাগ্যকস্তূরীতিলকাঙ্কুরঃ |
জীযাদ্ ব্রজাঙ্গনানঙ্গকেলীললিতবিভ্রমঃ || ১. ১০৩||
প্রেমদং চ মে কামদং চ মে
বেদনং চ মে বৈভবং চ মে |
জীবনং চ মে জীবিতং চ মে
দৈবতং চ মে দেব নাপরম্ || ১. ১০৪||
মাধুর্যেণ বিজৃম্ভন্তাং বাচো নস্তব বৈভবে |
চাপল্যেণ বিবর্ধন্তাং চিন্তা নস্তব শৈশবে || ১. ১০৫||
যানি ত্বচ্চরিতামৃতানি রসনালেহ্যানি ধন্যাত্মনাং
যে বা চাপলশৈশবব্যতিকরা রাধাপরাধোন্মুখাঃ |
যা বা ভাবিতবেণুগীতগতযো লীলামুখাম্ভোরুহে
ধারাবাহিকযা বহন্তু হৃদযে তান্যেব তান্যেব মে || ১. ১০৬||
ভক্তিস্ত্বযি স্থিরতরা ভগবন্ যদি স্যা-
দ্দৈবেন নঃ ফলিতদিব্যকিশোরবেষে |
মুক্তিঃ স্বযং মুকুলিতাঞ্জলি সেবতেঽস্মান্
ধর্মার্থকামগতযঃ সমযপ্রদীক্ষাঃ || ১. ১০৭||
জয জয জয দেব দেব দেব
ত্রিভুবনমঙ্গলদিব্যনামধেয |
জয জয জয বালকৃষ্ণদেব
শ্রবণমনোনযনামৃতাবতার || ১. ১০৮||
তুভ্যং নির্ভরহর্ষবর্ষবিবশাবেশস্ফুটাবির্ভব-
দ্ভূযশ্চাপলভূষিতেষু সুকৃতাং ভাবেষু নির্ভাসতে |
শ্রীমদ্গোকুলমণ্ডনায মহতে বাচাং বিদূরস্ফুট-
ন্মাধুর্যৈকরসার্ণবায মহসে কস্মৈ চিদস্মৈ নমঃ || ১. ১০৯||
ঈশানদেব চরণাভরণেন নীবী-
দামোদরস্থিরযশঃ স্তবকোদ্গমেন |
লীলাশুকেন রচিতং তব দেব কৃষ্ণ-
কর্ণামৃতং বহতু কল্পশতান্তরেঽপি || ১. ১১০||
|| ইতি শ্রীকৃষ্ণকর্ণামৃতে প্রথমাশ্বাসঃ সমাপ্তঃ ||
|| দ্বিতীযাশ্বাসঃ||
অভিনবনবনীতস্নিগ্ধমাপীতদিগ্ধং
দধিকণপরিদিগ্ধং মুগ্ধমঙ্কং মুরারেঃ |
দিশতু ভুবনকৃচ্ছ্রচ্ছেদি তাপিঞ্ছগুচ্ছ-
চ্ছবি নবশিখিপিঞ্ছা লাঞ্ছিতং বাঞ্ছিতং নঃ
|| ২. ১||
যাং দৃষ্ট্বা যমুনাং পিপাসুরনিশং ব্যূহো গবাং গাহতে
বিদ্যুত্বানিতি নীলকণ্ঠনিবহো যাং দ্রষ্টুমুত্কণ্ঠতে |
উত্তংসায তমালপল্লবমিতি চ্ছিন্দন্তি যাং গোপিকাঃ
কন্তিঃ কালিযশাসনস্য বপুষঃ সা পাবনী পাতু নঃ
|| ২. ২||
দেবঃ পাযাত্পযসি বিমলে যামুনে মজ্জতীনাং
যাচন্তীনামনুনযপদৈর্বঞ্চিতান্যংশুকানি |
লজ্জালোলৈরলসবিলসৈরুন্মিষত্পঞ্চবাণৈ-
র্গোপস্ত্রীণাং নযনকুসুমৈরর্চিতঃ কেশবো নোঃ || ২. ৩||
মাতর্নাতঃ পরমনুচিতং যত্খলানাং পুরস্তা-
দস্তাশঙ্কং জঠরপিঠরীপূর্তযে নর্তিতাসি |
তত্ক্ষন্তব্যং সহজসরলে বত্সলে বাণি কুর্যাং
প্রাযশ্চিত্তং গুণগণনযা গোপবেষস্য বিষ্ণোঃ || ২. ৪||
অঙ্গুল্যগ্রৈররুণকিরণৈর্মুক্তসংরুদ্ধরন্ধ্রং
বারং বারং বদনমরুতা বেণুমাপূরযন্তম্ |
ব্যত্যস্তাঙ্ঘ্রিং বিকচকমলচ্ছাযবিস্তারনেত্রং
বন্দে বৃন্দাবনসুচরিতং নন্দগোপালসূনুম্ || ২. ৫||
মন্দং মন্দং মধুরনিনদৈর্বেণুমাপূরযন্তং
বৃন্দং বৃন্দাবনভুবি গবাং চারযন্তং চরন্তম্ |
ছন্দোভগে শতমখমুখধ্বংসিনাং দানবানাং
হন্তারং তং কথয রসনে গোপকন্যাভুজঙ্গম্ || ২. ৬||
বেণীমূলে বিরচিতঘনশ্যামপিঞ্ছাবচূডো
বিদ্যুল্লেখাবলযিত ইব স্নিগ্ধপীতাম্বরেণ |
মামালিঙ্গন্মরকতমণিস্তম্ভগংভীরবাহুঃ
স্বপ্নে দৃষ্টস্তরুণতুলসীভূষণো নীলমেঘঃ || ২. ৭||
কৃষ্ণে হৃত্বা বসননিচযং কূলকুঞ্জাধিরূঢে
মুগ্ধা কাচিন্মুহুরনুনযৈঃ কিন্বিতি ব্যাহরন্তী |
সভ্রূভঙ্গং সদরহসিতং সত্রপং সানুরাগং
ছাযাশৌরেঃ করতলগতান্যম্বরাণ্যাচকর্ষ || ২. ৮||
অপি জনুষি পরস্মিন্নাত্তপুণ্যো ভবেযং
তটভুবি যমুনাযাস্তাদৃশো বংশনালঃ |
অনুভবতি য এষঃ শ্রীমদাভীরসূনো-
রধরমণিসমীপন্যাসধন্যামবস্থাম্ || ২. ৯||
অযি পরিচিনুঃ চেতঃ প্রাতরম্ভোজনেত্রং
কবরকলিতচঞ্চত্পিঞ্ছদামাভিরামম্ |
বলভিদুপলনীলং বল্লবীভাগধেযং
নিখিলনিগমবল্লীমূলকন্দং মুকুন্দম্ || ২. ১০|
অযি মুরলি মুকুন্দস্মেরবক্ত্রারবিন্দ-
শ্বসনমধুরসজ্ঞে ত্বাং প্রণম্যাদ্য যাচে |
অধরমণিসমীপং প্রাপ্তবত্যাং ভবত্যাং
কথয রহসি কর্ণে মদ্দশাং নন্দসূনোঃ || ২. ১১|
সজলজলদনীলং বল্লবীকেলিলোলং
শ্রিতসুরতরুমূলং বিদ্যুদুল্লাসিচেলম্ |
সুররিপুকুলকালং সন্মনোবিম্বলীলং
নতসুরমুনিজালং নৌমি গোপালবালম্ || ২. ১২||
অধরবিম্ববিডম্বিতবিদ্রুমং
মধুরবেণুনিনাদবিনোদিনম্ |
কমলকোমলকম্রমুখাম্বুজং
কমপি গোপকুমারমুপাস্মহে || ২. ১৩||
অধরে বিনিবেশ্য বংশনালং
বিবরাণ্যস্য সলীলমঙ্গুলীভিঃ |
মুহুরন্তরযন্মুহুর্বিবর্ণন্
মধুরং গাযতি মাধবো বনান্তে || ২. ১৪||
বদনে নবনীতগন্ধবাহং
বচনে তস্করচাতুরীধুরীণম্ |
নযনে কুহুনাশ্রুমাশ্রযেথা-
শ্চরণে কোমলতাণ্ডবং কুমারম্ || ২. ১৫||
অমুনাখিলগোপগোপনার্থং
যমুনারোধসি নন্দনন্দনেন |
দমুনা বনসম্ভবঃ পপে নঃ
কিমু নাসৌ শরণার্থিনাং শরণ্যঃ || ২. ১৬||
জগদাদরণীযজারভাবং
জলজাপত্যবচোবিচারগম্যম্ |
তনুতাং তনুতাং শিবেতরাণাং
সুরনাথোপলসুন্দরং মহো নঃ || ২. ১৭||
যা শেখরে শ্রুতিগিরাং হৃদি যোগভাজাং
পাদাম্বুজে চ সুলভা ব্রজসুন্দরীণাম্ |
সা কাঽপি সর্বজগতামভিরামসীমা
কামায নো ভবতু গোপকিশোরমূর্তিঃ || ২. ১৮||
অত্যন্তবালমতসীকুসুমপ্রকাশং
দিগ্বাসসং কনকভূষণভূষিতাঙ্গম্ |
বিস্রস্তকেশমরুণাধরমাযতাক্ষং
কৃষ্ণং নমামি মনসা বসুদেবসূনুম্ || ২. ১৯||
হস্তাঙ্ঘ্রিনিক্বণিতকঙ্কণকিঙ্কিণীকং
মধ্যে নিতম্বমবলম্বিতহেমসূত্রম্ |
মুক্তাকলাপমুকুলীকৃতকাকপক্ষং
বন্দামহে ব্রজবরং বসুদেবভাগ্যম্ || ২. ২০||
বৃন্দাবনদ্রুমতলেষু গবাং গণেষু
বেদাবসানসমযেষু চ দৃশ্যতে যত্ |
তদ্বেণুনাদনপরং শিখিপিঞ্ছচূডং
ব্রহ্ম স্মরামি কমলেক্ষণমভ্রনীলম্ || ২. ২১||
ব্যত্যস্তপাদমবতংসিতবর্হিবর্হং
সাচীকৃতানননিবেশিতবেণুরন্ধ্রম্ |
তেজঃ পরং পরমকারুণিকং পুরস্তাত্
প্রাণপ্রযাণসমযে মম সন্নিধত্তাম্ || ২. ২২||
ঘোষপ্রঘোষশমনায মথোগুণেন
মধ্যে ববন্ধ জননী নবনীতচোরম্ |
তদ্বন্ধনং ত্রিজগতামুদরাশ্রযাণা-
মাক্রোশকারণমহো নিতরাং বভূব || ২. ২৩||
শৈবা বযং ন খলু তত্র বিচারণীযং
পঞ্চাক্ষরীজপপরা নিতরাং তথাপি |
চেতো মদীযমতসীকুসুমাবভাসং
স্মেরানন স্মরতি গোপবধূকিশোরম্ || ২. ২৪||
রাধা পুনাতু জগদচ্যুতদত্তচিত্তা
মন্থানমাকলযতী দধিরিক্তপাত্রে |
তস্যাঃ স্তনস্তবকচঞ্চললোলদৃষ্টি-
র্দেবোঽপি দোহনধিযা বৃষভং নিরুন্ধন্ || ২. ২৫||
গোধূলিধূসরিতকোমলকুন্তলাগ্রং
গোবর্ধনোদ্ধরণকেলিকৃতপ্রযাসম্ |
গোপীজনস্য কুচকুঙ্কুমমুদ্রিতাঙ্গং
গোবিন্দমিন্দুবদনং শরণং ভজামঃ || ২. ২৬||
যদ্রোমরন্ধ্রপরিপূর্তিবিধাবদক্ষা
বারাহজন্মনি বভূবুরমী সমুদ্রাঃ |
তং নাম নাথমরবিন্দদৃশং যশোদা
পাণিদ্বযান্তরজলৈঃ স্নপযাং বভূব || ২. ২৭||
বরমিমমুপদেশমাদ্রিযধ্বং
নিগমবনেষু নিতান্তচারখিন্নঃ |
বিচিনুত ভবনেষু বল্লবীনা-
মুপনিষদর্থমুলূখলে নিবদ্ধম্ || ২. ২৮||
দেবকীতনযপূজনপূতঃ
পূতনারিচরণোদকধৌতঃ |
যদ্যহং স্মৃতধনঞ্জযসূতঃ
কিং করিষ্যতি স মে যমদূতঃ || ২. ২৯||
ভাসতাং ভবভযৈকভেষজং
মানসে মম মুহুর্মুহুর্মুহুঃ |
গোপবেষমুপসেদুষস্স্বযং
যাপি কাপি রমণীযতা বিভোঃ || ২. ৩০||
কর্ণলম্বিতকদম্বমঞ্জরী
কেসরারুণকপোলমণ্ডলম্ |
নির্মলং নিগমবাগগোচরং
নীলমানমবলোকযামহে || ২. ৩১||
সাচি সঞ্চলিতলোচনোত্পলং
সামিকুড্মলিতকোমলাধরম্ |
বেগবল্গিতকরাঙ্গুলীমুখং
বেণুনাদরসিকং ভজামহে || ২. ৩২||
স্যন্দনে গরুডমণ্ডিতধ্বজে
কুণ্ডিনেশতনযাধিরোপিতা |
কেনচিন্নবতমালপল্লব-
শ্যামলেন পুরুষেণ নীযতে || ২. ৩৩||
মা যাত পান্থাঃ পথি ভীমরথ্যা
দিগংবরঃ কোঽপি তমালনীলঃ |
বিন্যস্তহস্তোঽপি নিতম্ববিম্বে
ধূর্তস্সমাকর্ষিতচিত্তবিত্তম্ || ২. ৩৪||
অঙ্গনামণ্৬গনামন্তরে মাধবো
মাধবং মাধবং চান্তরেণাঙ্গনা |
ইথমাকল্পিতে মণ্ডলে মধ্যগঃ
সঞ্জগৌ বেণুনা দেবকীনন্দনঃ || ২. ৩৫||
কেকিকেকাদৃতানেকপঙ্কেরুহা-
লীনহংসাবলীহৃদ্যতা হৃদ্যতা |
কংসবংশাটবীদাহদাবানলঃ
সঞ্জগৌ বেণুনা দেবকীনন্দনঃ | ২. ৩৬||
ক্বাপি বীণাভিরারাবিণা কম্পিতঃ
ক্বাপি বীণাভিরাকিঙ্কিণীনর্তিতঃ |
ক্বাপি বীণাভিরামন্তরং গাপিতঃ
সঞ্জগৌ বেণুনা দেবকীনন্দনঃ | ২. ৩৭||
চারুচন্দ্রাবলীলোচনৈশ্চুম্বিতো
গোপগোবৃন্দগোপালিকাবল্লভঃ |
বল্লবীবৃন্দবৃন্দারকঃ কামুকঃ
সঞ্জগৌ বেণুনা দেবকীনন্দনঃ | ২. ৩৮||
মৌলিমালামিলন্মত্তভৃঙ্গীলতা-
ভীতভীতপ্রিযাবিভ্রমালিঙ্গিতঃ |
স্রস্তগোপীকুচাভোগসম্মেলিতঃ
সঞ্জগৌ বেণুনা দেবকীনন্দনঃ | ২. ৩৯||
চারুচামীকরাভাসভামাবিভু-
র্বৈজযন্তীলতাবাসিতোরঃস্থলঃ |
নন্দবৃন্দাবনে বাসিতামধ্যগঃ
সঞ্জগৌ বেণুনা দেবকীনন্দনঃ | ২. ৪০||
বালিকাতালিকাতাললীলালযা-
সঙ্গসন্দর্শিতভ্রূলতাবিভ্রমঃ |
গোপিকাগীতদত্তাবধানস্স্বযং
সঞ্জগৌ বেণুনা দেবকীনন্দনঃ | ২. ৪১||
পারিজাতং সমুদ্ধৃত্য রাধাবরো
রোপযামাস ভামাগৃহস্যাঙ্কণে |
শীতশীতে বটে যামুনীযে তটে
সঞ্জগৌ বেণুনা দেবকীনন্দনঃ | ২. ৪২||
অগ্রে দীর্ঘতরোঽযমর্জুনতরুস্তস্যাগ্রতো বর্ত্মনী
সা ঘোষং সমুপৈতি তত্পরিসরে দেশে কলিন্দাত্মজা |
তস্যাস্তীরতমলকাননতলে চক্রং গবাং চারযন্
গোপঃ ক্রীডতি দর্শযিষ্যতি সখে পন্থানমব্যাহৃতম্ || ২. ৪৩||
গোধূলিধূসরিতকোমলগোপবেষং
গোপালবালকশতৈরনুগম্যমানম্ |
সাযন্তনে প্রতিগৃহং পশুবন্ধনার্থং
গচ্ছন্তমচ্যুতশিশুং প্রণতোঽস্মি নিত্যম্ || ২. ৪৪||
নিধিং লাবণ্যানাং নিখিলজগদাশ্চর্যনিলযং
নিজাবাসং ভাসাং নিরবধিকনিশ্শ্রেযসরসম্ |
সুধাধারাসারং সুকৃতপরিপাকং মৃগদৃশাং
প্রপদ্যে মাঙ্গল্যং প্রথমমধিদৈবং কৃতধিযাম্ || ২. ৪৫||
আতাম্রপাণিকমলপ্রণযপ্রতোদ-
মালোলহারমণিকুণ্ডলহেমসূত্রম্ |
আবিশ্রমাম্বুকণমম্বুদনীলমব্যা-
দাদ্যং ধনঞ্জযরথাভরণং মহো নঃ || ২. ৪৬||
নখনিযমিতকণ্ডূন্ পাণ্ডবস্যন্দনাশ্বা-
ননুদিনমভিষিঞ্চন্নঞ্জলিস্থৈঃ পযোভিঃ |
অবতু বিততগাত্রস্তোত্রনিষ্ঠ্যূতমৌলি-
র্দশনবিধৃতরশ্মির্দেবকীপুণ্যরাশিঃ || ২. ৪৭||
ব্রজযুবতিসহাযে যৌবনোল্লাসিকাযে
সকলশুভবিলাসে কুন্দমন্দারহাসে |
নিবসতু মম চিত্তং তত্পদাযত্তবৃত্তং
মুনিসরসিজভানৌ নন্দগোপালসূনৌ || ২. ৪৮||
অরণ্যানীমার্দ্রস্মিতমধুরবিম্বাধরসুধা
সরণ্যাসংক্রান্তৈস্সপদি মদযন্ বেণুনিনদৈঃ |
ধরণ্যা সানন্দোত্পুলকমুপগূঢাঙ্ঘ্রিকমলঃ
শরণ্যানামাদ্যস্স্ জযতু শরীরী মধুরিমা || ২. ৪৯||
বিদগ্ধগোপালবিলাসিনীনাং
সংভোগচিহ্নাঙ্কিতসর্বগাত্রম্ |
পবিত্রমাম্নাযগিরামগম্যম্
ব্রহ্ম প্রপদ্যে নবনীতচোরম্ || ২. ৫০||
অন্তর্গৃহে কৃষ্ণমবেক্ষ্য চোরম্
বদ্ধ্বা কবাটং জননীং গতৈকা |
উলূখলে দামনিবদ্ধমেনং
তত্রাপি দৃষ্ট্বা স্তিমিতা বভূব || ২. ৫১||
রত্নস্থলে জানুচরঃ কুমারঃ
সঙ্ক্রান্তমাত্মীযমুখারবিন্দম্ |
আদাতু লাভস্তদলাভখেদা-
দ্বিলোক্য ধাত্রীবদনং রুরোদ || ২. ৫২||
আনন্দেন যশোদযা সমদনং গোপাঙ্গনাভিশ্চিরং
সাশঙ্কং বলবিদ্বিষা সকুসুমৈঃ সিদ্ধৈঃ পৃথিব্যাকুলম্ |
সের্ষ্যং গোপকুমারকৈস্সকরুণং পৌরৈর্জনৈঃ সাস্মতং
যো দৃষ্টঃ স পুনাতু নো মুররিপুঃ প্রোত্ক্ষিপ্তগোবর্ধনঃ || ২. ৫৩||
উপাসতামাত্মবিদঃ পুরাণাঃ
পরং পুমাংসং নিহিতং গুহাযাম্ |
বযং যশোদাশিশুবাললীলা-
কথাসুধাসিন্ধুষু লীলযামঃ || ২. ৫৪||
বিক্রেতুকামা কিল গোপকন্যা
মুরারিপাদার্পিতচিত্তবৃত্তিঃ |
দধ্যাদিকং মোহবশাদবোচ-
দ্গোবিন্দ দামোদর মাধবেতি || ২. ৫৫||
উলূখলং বা যমিনাং মনো বা
গোপাঙ্গনানাং কুচকুট্মলং বা |
মুরারিনাম্নঃ কলভস্য নূন-
মালানমাসীত্ ত্রযমেব ভূমৌ || ২. ৫৬||
করারবিন্দেন পদারবিন্দং
মুখারবিন্দে বিনিবেশযন্তম্ |
বটস্য পত্রস্য পুটে শযানং
বালং মুকুন্দং মনসা স্মরামি || ২. ৫৭||
শম্ভো স্বাগতমাস্যতামিত ইতো বামেন পদ্মাসন
ক্রৌঞ্চারে কুশলং সুখং সুরপতে বিত্তেশ নো দৃশ্যসে |
ইত্থং স্বপ্নগতস্য কৈটভজিতশ্শ্রুত্বা যশোদা গিরঃ
কিং কিং বালক জল্পসীতি রচিতং ধূধূকৃতং পাতু নঃ || ২. ৫৮||
মাতঃ কিং যথুনাথ দেহি চষকং কিং তেন পাতুং পয-
স্তন্নাস্ত্যদ্য কদাস্তি বা নিশি নিশা কা বাঽন্ধকারোদযে |
আমীল্যাক্ষিযুগং নিশাপ্যুপগতা দেহীতি মাতুর্মুহু-
র্বক্ষোজাংশুককর্ষণোদ্যতকরঃ কৃষ্ণস্য পুষ্ণাতু নঃ || ২. ৫৯||
কালিন্দীপুলিনোদরেষু মুসলী যাবদ্গতঃ খেলিতুং
তাবত্কার্পরিকং পযঃ পিব হরে বর্ধিষ্যতে তে শিখা |
ইত্থং বালতযা প্রতারণপরাঃ শৃত্বা যশোদাগিরঃ
পাযান্নস্স্বশিখাং স্পৃশন্ প্রমুদিতঃ ক্ষীরেঽর্ধপীতে হরিঃ
|| ২. ৬০||
কৈলাসে নবনীততি ক্ষিতিরিযং পার্জগ্ধমৃল্লোষ্টতি
ক্ষীরোদোঽপি নিপীতদুগ্ধতি লসত্ স্মেরে প্রফুল্লে মুখে |
মাত্রাঽজীর্ণধিযা দৃঢং চকিতযা নষ্টাঽস্মি দৃষ্টাঃ কযা
ধূধূ বত্সক জীব জীব চিরমিত্যুক্তোঽবতান্নো হরিঃ
|| ২. ৬১||
কিঞ্চিত্কুঞ্চিতলোচনস্য পিবতঃ পর্যাযপীতস্তনং
সদ্যঃ প্রস্নুতদুগ্ধবিন্দুমপরং হস্তেন সম্মার্জতঃ |
মাত্রৈকাঙ্গুলিলালিতস্য চুবুকে স্মেরাননস্যাধরে
শৌরেঃ ক্ষীণকণান্বিতা নিপতিতা দন্তদ্যুতিঃ পাতু নঃ
|| ২. ৬২||
উত্তুঙ্গস্তনমণ্ডলোপরিলসত্প্রালম্বমুক্তামণে-
রন্তর্বিম্বিতমিন্দ্রনীলনিকরচ্ছাযানুকারিদ্যুতেঃ |
লজ্জাব্যাজমুপেত্য নম্রবদনা স্পষ্টং মুরারের্বপুঃ
পশ্যন্তী মুদিতা মুদোঽস্তু ভবতাং লক্ষ্মীর্বিবাহোত্সবে
|| ২. ৬৩||
কৃষ্ণেনাম্ব গতেন রন্তুমধুনা মৃদ্ভক্ষিতা স্বেচ্ছযা
তত্থং কৃষ্ণ ক এবমাহ মুসলী মিথ্যাম্ব পশ্যাননম্ |
ব্যাদেহীতি বিদারিতে শিশুমুখে দৃষ্ট্বা সমস্তং জগত্
মাতা যস্য জগাম বিস্মযপদং পাযাত্ স নঃ কেশবঃ
|| ২. ৬৪||
স্বাতী সপত্নী কিল তারকাণাং
মুক্তাফলানাং জননীতি রোষাত্ |
সা রোহিণী নীলমসূত রত্নং
কৃতাস্পদং গোপবধূকুচেষু || ২. ৬৫||
নৃত্যন্তমত্যন্তবিলোকনীযং
কৃষ্ণং মণিস্থম্ভগতং মৃগাক্ষী |
নিরীক্ষ্য সাক্ষাদিব কৃষ্ণমগ্রে
দ্বিধা বিতেনে নবনীতমেকম্ || ২. ৬৬||
বত্স জাগৃহি বিভাতমাগতং
জীব কৃষ্ণ শরদাং শতং শতম্ |
ইত্যুদীর্য সুচিরং যশোদযা
দৃশ্যমনবদনং ভজামহে || ২. ৬৭||
ওষ্ঠং জিঘ্রন্ শিশুরিতি ধিযা চুম্বিতো বল্লবীভিঃ
কণ্ঠং গৃহ্ণন্নরুণিতপদং গাঢমালিঙ্গিতাঙ্গঃ |
দোষ্ণা লজ্জাপদমভিমৃশন্নঙ্কমারোপিতাত্মা
ধূর্তস্বামী হরতু দুরিতং দূরতো বালকৃষ্ণঃ || ২. ৬৮||
এতে লক্ষ্মণ জানকীবিরহিতং মাং খেদযন্ত্যম্বুদা
মর্মাণীব চ ঘট্টযন্ত্যলমমী ক্রূরঃ কদম্বানিলঃ |
ইত্থং ব্যহৃতপূর্বজন্মচরিতং যো রাধযা বীক্ষিতঃ
সের্ষ্যং শঙ্কিতযা স নস্সুখযতু স্বপ্নাযমানো হরিঃ || ২. ৬৯||
ওষ্ঠং মুঞ্চ হরে বিভেমি ভবতা পানৈর্হতা পূতনা
কণ্ঠাশ্লেষমমুং জহীহি দলিতাবালিঙ্গনেনার্জুনৌ |
মা দেহি চ্ছুরিতং হিরণ্যকশিপুর্নীতো নখৈঃ পঞ্চতা-
মিত্থং বারিতরাত্রিকেলিরবতাল্লক্ষ্ম্যাপহাসাদ্ধরিঃ || ২. ৭০||
রামো নাম বভূব হুং তদবলা সীতেতি হুং তৌ পিতু-
র্বাচা পঞ্চবটীতটে বিহরতস্তামাহরদ্রাবণঃ |
নিদ্রার্থং জননী কথামিতি হরের্হুঙ্কারতঃ শৃণ্বতঃ
সৌমিত্রে ক্ব ধনুর্ধনুর্ধনুরিতি ব্যগ্রা গিরঃ পাতু নঃ || ২. ৭১||
বালোঽপি শৈলোদ্ধরণাগ্রপাণি-
র্নীলোঽপি নীরন্ধ্রতমঃ প্রদীপঃ |
ধীরোঽপি রাধানযনাববদ্ধো
জারোঽপি সংসারহরঃ কুতস্ত্বম্ || ২. ৭২||
বালায নীলবপুষে নবকিঙ্কিণীক-
জালাভিরামজঘনায দিগম্বরায |
শার্দূলদিব্যনখভূষণভূষিতায
নন্দাত্মজায নবনীতমুষে নমস্তে || ২. ৭৩||
পাণৌ পাযসভক্তমাহিতরসং বিভ্রন্মুদা দক্ষিণে
সব্যে শারদচন্দ্রমণ্ডলনিভং হব্যংগবীনং দধত্ |
কণ্ঠে কল্পিতপুণ্ডরীকনখমপ্যুদ্দামদীপ্তিং বহন্
দেবো দিব্যদিগম্বরো দিশতু নস্সৌখ্যং যশোদাশিশুঃ
|| ২. ৭৪||
কিঙ্কিণিকিণিকিণিরভসৈ-
রঙ্গণভুবি রিঙ্খণৈঃ সদাঽটন্তম্ |
কুঙ্কুণুকুণুপদযুগলং
কঙ্কণকরভূষণং হরিং বন্দে || ২. ৭৫||
সম্বাধে সুরভীণামম্বামাযাসযন্তমনুযান্তীম্ |
লম্বালকমবলম্বে তং বালং তনুবিলগ্নজম্বালম্ || ২. ৭৬||
অঞ্চিতপিঞ্ছাচূডং সঞ্চিতসৌজন্যবল্লবীবলযম্ |
অধরমণিনিহিতবেণুং বালং গোপালমনিশমবলম্বে || ২. ৭৭||
প্রহ্লাদভাগদেযং নিগমমহাদ্রের্গুহান্তরাধেযম্ |
নরহরিপদাভিধেযং বিবুধবিধেযং মমানুসংধেযম্ || ২. ৭৮||
সংসারে কিং সারং কংসারেশ্চরণকমলপরিভাজনম্ |
জ্যোতিঃ কিমন্ধকারে যদন্তকারেরনুস্মরণম্ || ২. ৭৯||
কলশনবনীতচোরে কমলাদৃক্কুমুদচন্দ্রিকাপূরে |
বিহরতু নন্দকুমারে চেতো মম গোপসুন্দরীজারে || ২. ৮০||
কস্ত্বং বাল বলানুজঃ কিমিহ তে মন্মন্দিরাশঙ্কযা
যুক্তং তন্নবনীতপাত্রবিবরে হস্তং কিমর্থং ন্যসেঃ |
মাতঃ কঞ্চন বত্সকং মৃগযিতুং মা গা বিষাদং ক্ষণা-
দিত্যেবং বরবল্লবীপ্রতিবচঃ কৃষ্ণস্য পুষ্ণাতু নঃ || ২. ৮১||
গোপালাজিরকর্দমে বিহরসে বিপ্রাধ্বরে লজ্জসে
ব্রূষে গোকুলহুঙ্কৃতৈঃ স্তুতিশতৈর্মৌনং বিধত্সে বিদাম্ |
দাস্যং গোকুলপুংশ্চলীষু কুরুষে স্বাযং ন দান্তত্মসু
জ্ঞাতং কৃষ্ণ তবাঙ্ঘ্রিপঙ্কজযুগং প্রেম্ণাচলং মঞ্জুলম্ || ২. ৮২||
নমস্তস্মৈ যশোদাযা দাযাদাযাস্তু তেজসে |
যদ্ধি রাধামুখাম্ভোজং ভোজং ভোজং ব্যবর্ধত || ২. ৮৩||
অবতারাঃ সন্ত্বন্যে সরসিজনযনস্য সর্বতোভদ্রাঃ |
কৃষ্ণাদন্যঃ কো বা প্রভবতি গোগোপগোপিকামুক্তৈঃ || ২. ৮৪||
মধ্যে গোকুলমণ্ডলং প্রতিদিশং চাম্বারবোজ্জৃম্ভিতে
প্রাতর্দোহমহোত্সবে নবঘনশ্যমং রণন্নূপুরম্ |
ফালে বালবিভূষণং কটিরণত্সত্কিঙ্কিণীমেখলং
কণ্ঠে ব্যাঘ্রনখং চ শৈশবকলাকল্যাণকার্ত্স্ন্যং ভজে || ২. ৮৫||
সজলজলধনীলং দর্শিতোদারলীলং
করতলধৃতশৈলং বেণুনাদৈরসালম্ |
ব্রজজনকুলপালং কামিনীকেলিলোলং
কলিতললিতমালং নৌমি গোপালবালম্ || ২. ৮৬||
স্মিতললিতকপোলং স্নিগ্ধসঙ্গীতলোলং
ললিতচিকুরজালং চৌর্যচাতুর্যলীলম্ |
শতমখরিপুকালং শাতকুম্ভাভচেলং
কুবলযদলনীলং নৌমি গোপালপালম্ || ২. ৮৭||
মুরলিনিনদলোলং মুগ্ধমাযূরচূডং
দলিতদনুজজালং ধন্যসৌজন্যলীলম্ |
পরহিতনবহেলং পদ্মসদ্মানুকূলং
নবজলধরনীলং নৌমি গোপালপালম্ || ২. ৮৮||
সরসগুণনিকাযং সচ্চিদানন্দকাযং
শমিতসকলমাযং সত্যলক্ষ্মীসহাযম্ |
শমদমসমুদাযং শান্তসর্বান্তরাযং
সুহৃদযজনদাযং নৌমি গোপালপালম্ || ২. ৮৯||
লক্ষ্মীকলত্রং ললিতাব্জনেত্রং
পূর্ণেন্দুবক্ত্রং পুরুহূতমিত্রম্ |
কারুণ্যপাত্রং কমনীযগাত্রং
বন্দে পবিত্রং বসুদেবপুত্রম্ || ২. ৯০||
মদমযমদমযদুরগং
যমুনামবতীর্য বীর্যশালী যঃ |
মম রতিমমরতিরস্কৃতি-
শমনপরস্স ক্রিযাত্ কৃষ্ণঃ || ২. ৯১||
মৌলৌ মাযূরবর্হং মৃগমদতিলকং চারু লালাটপট্টে
কর্ণদ্বন্দ্বে চ তালীদলমতিমৃদুলং মৌক্তিকং নাসিকাযাম্ |
হারো মন্দারমালাপরিমলভরিতে কৌস্তুভস্যোপকণ্ঠে
পাণৌ বেণুশ্চ যস্য ব্রজযুবতিযুতঃ পাতু পীতাম্বরো নঃ
|| ২. ৯২||
মুরারিণা বারিবিহারকালে
মৃগেক্ষণাং মুষিতাংশুকানাম্ |
করদ্বযং বা কচসংহতির্বা
প্রমীলনং বা পরিধানমাসীত্ || ২. ৯৩||
যাসাং গোপাঙ্গনানাং লসদসিততরালোললীলাকটাক্ষা
যন্নাসা চারু মুক্তামণিরুচিনিকরব্যোমগঙ্গাপ্রবাহে |
মীনাযন্তেঽপি তাসামতিরভসচলচ্চারুনীলালকান্তা
ভৃঙ্গাযন্তে যদঙ্ঘ্রিদ্বযসরসিরুহে পাতু পীতাম্বরো নঃ
|| ২. ৯৪||
যদ্বেণূশ্রেণিরূপস্থিতসুষিরমুখোদ্গীর্ণনাদপ্রভিন্না
এণাক্ষ্যস্তত্ক্ষণেন ত্রুটিতনিজপতিপ্রেমবন্ধা বভূবুঃ ||
অস্তব্যস্তালকান্তাঃ স্ফুরদধরকুচদ্বন্দ্বনাভিপ্রদেশাঃ
কামাবেশপ্রকর্ষপ্রকটিতপুলকাঃ পাতু পীতম্বরো নঃ || ২. ৯৫||
দেবক্যা জঠরাকরে সমুদিতঃ ক্রীতো গবাং পালিনা
নন্দেনানকদুন্দুভের্নিজসুতাপণ্যেন পুণ্যাত্মনা |
গোপালাবলিমুগ্ধহারতরলো গোপীজনালঙ্কৃতিঃ
স্থেযান্নো হৃদি সন্ততং সুমধুরঃ কোঽপীন্দ্রনীলো মণিঃ
|| ২. ৯৬||
পীঠে পীঠনিষণ্ণবালকগলে তিষ্ঠন্ স গোপালকো
যন্তান্তঃস্থিতদুগ্ধভাণ্ডমপকৃষ্যাচ্ছাদ্য ঘণ্টারবম্ |
বক্ত্রোপান্তকৃতাঞ্জলিঃ কৃতশিরঃ কম্পং পিবন্ যঃ পযঃ
পাযাদাগতগোপিকানযনযোর্গণ্ডূষফূত্কারকৃত্ || ২. ৯৭||
যজ্ঞৈরীজিমহে ধনং দদিমহে পাত্রেষু নূনং বযং
বৃদ্ধান্ ভেজিমহে তপশ্চকৃমহে জন্মান্তরে দুশ্চরম্ |
যেনাস্মাকমভূদনন্যসুলভা ভক্তির্ভবদ্বেষিণী
চাণূরদ্বিষি ভক্তকল্মষমুষি শ্রেযঃপুষি শ্রীজুষি || ২. ৯৮||
ত্বযি প্রসন্নে মম কিং গুণেন
ত্বয্যপ্রসন্নে মম কিম্ গুণেন |
রক্তে বিরক্তে চ বরে বধূনাং
নিরর্থকঃ কুঙ্কুমপত্রভঙ্গঃ || ২. ৯৯||
গাযন্তি ক্ষণদাবসানসমযে সানন্দমিন্দুপ্রভা
রুন্ধন্ত্যো নিজদন্তকান্তিনিবহৈর্গোপাঙ্গনা গোকুলে |
মথ্নন্ত্যো দধি পাণিকঙ্কণঝণত্কারানুকারং জবাদ্
ব্যাবল্গদ্বসনাঞ্জলা যমনিশং পীতাম্বরোঽব্যাত্স নঃ
|| ২. ১০০||
অংসালম্বিতবামকুণ্ডলভরং মন্দোন্নতভ্রূলতং
কিঞ্চিত্কুঞ্চিতকোমলাধরপুটং সাচি প্রসারেক্ষণম্ |
আলোলাঙ্গুলিপল্লবৈর্মুরলিকামাপূরযন্তং মুদা
মূলে কল্পতরোস্ত্রিভঙ্গিললিতং জানে জগন্মোহনম্
|| ২. ১০১||
মল্লৈশ্শৈলেন্দ্রকল্পঃ শিশুরিতজনৈঃ পুষ্পচাপোঽঙ্গনাভি-
র্গোপৈস্তু প্রাকৃতাত্মা দিবিকুলিশভৃতা বিশ্বকাযোঽপ্রমেযঃ |
ক্রুদ্ধঃ কংসেন কালো ভযচকিতদৃশা যোগিভির্ধ্যেযমূর্তিঃ
দৃষ্টো রঙ্গাবতারে হরিরমরগণানন্দকৃত্ পাতু যুষ্মান্
|| ২. ১০২||
সংবিষ্টো মণিবিষ্টরেঽঙ্কতলমধ্যাসীন লক্ষ্মী মুখে
কস্তূরীতিলকং মুদা বিরচযন্ হর্ষাত্কুচৌ সংস্পৃশন্ |
অন্যোন্যস্মিতচন্দ্রিকাকিসলযৈরারাধযন্মন্মথং
গোপীগোপপরিবৃতো যদুপতিঃ পাযাঞ্জগন্মোহনঃ || ২. ১০৩||
আকৃষ্টে বসনাঞ্চলে কুবলযশ্যামা ত্রপাধঃকৃতা
দৃষ্টিঃ সংবলিতা রুচা কুচযুগে স্বর্ণপ্রভে শ্রীমতি |
বালঃ কশ্চন চূতপল্লব ইতি প্রান্তস্মিতাস্যশ্রিযং
শ্লিষ্যংস্তামথ রুক্মিণীং নতমুখীং কৃষ্ণস্স পুষ্ণাতু নঃ
|| ২. ১০৪||
উর্ব্যাং কোঽপি মহীধরো লঘুতরো দোর্ভ্যাং ধৃতো লীলযা
তেন ত্বং দিবি ভূতলে চ সততং গোবর্ধনোদ্ধারকঃ |
ত্বাং ত্রৈলোক্যধরং বহামি কুচযোরগ্রে ন তদ্গণ্যতে
কিং বা কেশব ভাষণেন বহুনা পুণ্যৈর্যশো লভ্যতে || ২. ১০৫||
সন্ধ্যাবন্দন ভদ্রমস্তু ভবতো ভোঃ স্নান তুভ্যং নমো
ভো দেবাঃ পিতরশ্চ তর্পণবিধৌ নাহং ক্ষমঃ ক্ষম্যতাম্ |
যত্র ক্বাপি নিষীদ্য যাদবকুলোত্তংসস্য কংসদ্বিষঃ
স্মারং স্মারমঘং হরামি তদলং মন্যে কিমন্যেন মে || ২. ১০৬||
হে গোপালক হে কৃপাজলনিধে হে সিন্ধুকন্যাপতে
হে কংসান্তক হে গজেন্দ্রকরুণাপারীণ হে মাধব |
হে রামানুজ হে জগত্রযগুরো হে পুণ্ডরীকাক্ষ মাং
হে গোপীজননাথ পালয পরং জানামিন ত্বাং বিনা || ২. ১০৭||
কস্তূরীতিলকং ললাটফলকে বক্ষঃস্থলে কৌস্তুভং
নাসাগ্রে নবমৌক্তিকং করতলে বেণুং করে কঙ্কণম্ |
সর্বাঙ্গে হরিচন্দনং চ কলযন্ কণ্ঠে চ মুক্তাবলিং
গোপস্ত্রীপরিবেষ্টিতো বিজযতে গোপালচূডামণিঃ || ২. ১০৮||
লোকানুন্মদযন্ শ্রুতীর্মুখরযন্ শ্রোণীরুহান্হর্ষযন্
শৈলান্বিদ্রবযন্ মৃগান্বিবশযন্ গোবৃন্দমানন্দযন্ |
গোপান্ সংভ্রমযন্ মুনীন্মুকুলযন্ সপ্তস্বরান্ জৃম্ভযন্
ওংকারার্থমুদীরযন্ বিজযতে বংশীনিনাদশ্শিশোঃ
|| ২. ১০৯||
|| ইতি শ্রীকৃষ্ণকর্ণামৃতে দ্বিতীযাশ্বাসঃ সমাপ্তঃ ||
|| তৃতীযাশ্বাসঃ ||
অস্তি স্বস্ত্যযনং সমস্তজগতামভ্যস্তলক্ষ্মীস্তনং
বস্তু ধ্বস্তরজস্তমোভিরনিশং ন্যস্তং পুরস্তাদিব |
হস্তোদস্তগিরীন্দ্রমস্তকতরুপ্রস্তারবিস্তারিত-
স্রস্তস্বস্তরুসূনসংস্তরলসত্প্রস্তাবি রাধাস্তুতম্ || ৩. ১||
রাধারাধিতবিভ্রমাদ্ভুতরসং লাবণ্যরত্নাকরং
সাধারণ্যপদব্যতীতসহজস্মেরাননাম্ভোরুহম্ |
আলম্বে হরিনীলগর্বগুরুতাসর্বস্বনির্বাপণং
বালং বৈণবিকং বিমুগ্ধমধুরং মূর্ধাভিষিক্তং মহঃ || ৩. ২||
করিণামলভ্যগতিবৈভবং ভজে
করুণাবলম্বিতকিশোরবিগ্রহম্ |
যমিনামনারতবিহারি মানসে
যমুনাবনান্তরসিকং পরং মহঃ || ৩. ৩||
অতন্ত্রিতত্রিজগদপি ব্রজাঙ্গনা-
নিযন্ত্রিতং বিপুলবিলোচনাজ্ঞযা |
নিরন্তরং মম হৃদযে বিজ্জৃম্ভতাং
সমন্ততঃ সরসতরং পরং মহঃ || ৩. ৪||
কন্দর্পপ্রতিমল্লকান্তিবিভবং কাদম্বিনীবান্ধবং
বৃন্দারণ্যবিলাসিনীব্যসনিনং বেষেণ ভূষামযম্ |
মন্দস্মেরমুখাম্বুজং মধুরিমব্যামৃষ্টবিম্বাধরং
বন্দে কন্দলিতার্দ্রযৌবনবনং কৈশোরকং শার্ঙ্গিণঃ || ৩. ৫||
আমুক্তমানুষমমুক্তনিজানুভাব-
মারূঢযৌবনমগূঢবিদগ্ধলীলম্ |
আমৃষ্টযৌবনমনষ্টকিশোরভাব-
মদ্যং মহঃ কিমপি মাদ্যতি মানসে মে || ৩. ৬||
তে তে ভাবস্সকলজগদীলোভনীযপ্রভাবাঃ
নানাতৃষ্ণাসুহৃদি হৃদি মে কামমাবির্ভবন্তু |
বীণাবেণুক্বণিতলসিতস্মেরবক্ত্রারবিন্দা-
ন্নাহং জানে মধুরমপরং নন্দপুণ্যাম্বুরাশেঃ || ৩. ৭||
সুকৃতিভিরাদৃত্তে সরসবেণুনিনাদসুধা-
রসলহরীবিহারনিরবগ্রহকর্ণপুটে |
ব্রজবরসুন্দরীমুখসরোরুহসন্মধুপে
মহসি কদা নু মজ্জতি মদীযমিদং হৃদযম্ || ৩. ৮||
তৃষ্ণাতুরে চেতসি জৃম্ভমাণাং
মুষ্ণান্মুহুর্মোহমহান্ধকারম্ |
পুষ্ণাতু নঃ পুণ্যদযৈকসিন্ধোঃ
কৃষ্ণস্য কারুণ্যকটাক্ষকেলিঃ || ৩. ৯||
নিখিলাগমমৌলিলালিতং
পদকমলং পরমস্য তেজসঃ |
ব্রজভুবি বহুমন্মহেতরাং
সরসকরীষবিশেষরূষিতাম্ || ৩. ১০||
উদারমৃদুলস্মিতব্যতিকরাভিরামাননং
মুদা মুহুরুদীর্ণযা মুনিমনোম্বুজাম্রেডিতম্ |
মদালসবিলোচনব্রজবধূমুখাস্বাদিতং
কদা নু কমলেক্ষণং কমপি বালমালোকযে || ৩. ১১||
ব্রজজনমদযোষিল্লোচনোচ্ছিষ্টশেষী-
কৃতমতিচপলাভ্যাং লোচনাভ্যামুভাভ্যাম্ |
সকৃদপি পরিপাতুং তে বযং পারযামঃ
কুবলযদলনীলং কান্তিপূরং কদা নু || ৩. ১২||
ঘোষযোষিদনুগীতযৌবনং
কোমলস্তনিতবেণুনিস্স্বনম্ |
সারভূতমভিরামসংপদাং
ধাম তামরসলোচনং ভজে || ৩. ১৩||
লীলযা ললিতযাবলম্বিতং
মূলগেহমিব মূর্তিসংপদাম্ |
নীলনীরদবিকাসবিভ্রমং
বালমেব বযমাদ্রিযামহে || ৩. ১৪||
বন্দে মুরারেশ্চরণারবিন্দ-
দ্বন্দ্বং দযাদর্শিতশৈশবস্য |
বন্দারুবৃন্দারকবৃন্দমৌলি-
মন্দারমালাবিনিমর্দভীরু || ৩. ১৫||
যস্মিন্ নৃত্যতি যস্য শেখরভরৈঃ ক্রৌঞ্চদ্বিষশ্চন্দ্রকীং
যস্মিন্ দৃপ্যতি যস্য ঘোষসুরভিং জিঘ্রন্ বৃষো ধৃর্জটেঃ |
যস্মিন্ সজ্জতি যস্য বিভ্রমগতিং বাঞ্ছন্ হরেস্সিন্ধুর-
স্তদ্বৃন্দাবনকল্পকদ্রুমবনং তং বা কিশোরং ভজে || ৩. ১৬||
অরুণাধরামৃতবিশেষিতস্মিতং
বরুণালযানুগতবর্ণবৈভবম্ |
তরুণারবিন্দদলদীর্ঘলোচনং
করুণামযং কমপি বালমাশ্রযে || ৩. ১৭||
লাবণ্যবীচীরচিতাঙ্গভূষাং
ভূষাপদারোপিতপুণ্যবর্হাম্ |
কারুণ্যধারালকটাক্ষমালাং
বালাং ভজে বল্লববংশলক্ষ্মীম্ || ৩. ১৮|
মধুরৈকরসং বপুর্বিভো-
র্মথুরাবীথিচরং ভজামহে |
নগরীমৃগশাবলোচনা
নযনেন্দীবরবর্ষবর্ষিতম্ || ৩. ১৯||
পর্যাকুলেন নযনান্তবিজৃম্ভিতেন
বক্ত্রেণ কোমলদরস্মিতবিভ্রমেণ |
মন্ত্রেণ মঞ্জুলতরেণ চ জল্পিতেন
নন্দস্য হন্ত তনযো হৃদযং ধুনোতি || ৩. ২০||
কন্দর্পকণ্ডূলকটাক্ষবন্ধী-
রিন্দীবরাক্ষীরভিলাষমাণান্ |
মন্দস্মিতাধারমুখারবিন্দান্
বন্দামহে বল্লবধূর্তপাদান্ || ৩. ২১|
লীলাটোপকটাক্ষনির্ভরপরিষ্বঙ্গপ্রসঙ্গাধিক-
প্রীতে গীতিবিভঙ্গসঙ্গতলসদ্বেণুপ্রণাদামৃতে |
রাধালোচনলালিতস্য ললিতস্স্মেরে মুরারের্মুদা
মাধুর্যৈকরসে মুখেন্দুকমলে মগ্নং মদীযং মনঃ || ৩. ২২||
শরণাগতব্রজপঞ্জরে
শরণে শার্ঙ্গধরস্য বৈভবে |
কৃপযাধৃতগোপবিগ্রহে
কিযদন্যন্মৃগযামহে বযম্ || ৩. ২৩||
জগত্ত্রযৈকান্তমনিজ্ঞভূমি-
চেতস্যজস্রং মম সন্নিদত্তাম্ |
রমাসমাস্বাদিতসৌকুমার্যং
রাধাস্তনাভোগরসজ্ঞমোজঃ || ৩. ২৪||
বযমেতে বিশ্বসিমঃ করুণাকরমূর্তিকিংবদন্ত্যাঙ্গে |
অপি চ বিভো তব ললিতে চপলতরা মতিরিযং বাল্যে
|| ৩. ২৫|
বত্সপালচরঃ কোঽপি বত্সঃ শ্রীবত্সলাঞ্ছনঃ |
উত্সবায কদা ভাবীত্যুত্সুকে মম লোচনে || ৩. ২৬||
মধুরিমভরিতে মনোভিরামে
মৃদুলতরস্মিতমুদ্রিতাননেন্দৌ |
ত্রিভুবননযনৈকলোভনীযে
মহসি বযং ব্রজভাজি লালসাঃ স্মঃ || ৩. ২৭||
মুখারবিন্দে মকরন্দবিন্দু-
নিষ্যন্তলীলামুরলীনিনাদে |
ব্রজাঙ্গনাপাঙ্গতরঙ্গভৃঙ্গ-
সংগ্রামভূমৌ তব লালসাঃ স্মঃ || ৩. ২৮||
আতাম্রাযতলোচনাংশুলহরীলীলাসুধাপ্যাযিতৈঃ
গীতাম্রেডিতদিব্যকেলিভরিতৈঃ স্ফীতং ব্রজস্ত্রীজনৈঃ |
স্বেদাম্ভঃকণভূষিতেন কিমপি স্মেরেণ বক্ত্রেন্দুনা
পাদাম্ভোজমৃদুপ্রচারসুভগং পশ্যামি দৃশ্যং মহঃ || ৩. ২৯||
পাণৌ বেণুঃ প্রকৃতিসুকুমারাকৃতৌ বাল্যলক্ষ্মীঃ
পার্শ্বে বালাঃ প্রণযসরসালোকিতাপাঙ্গলীলাঃ |
মৌলৌ বর্হং মধুরবদনাম্ভোরুহে মৌগ্ধ্যমুদ্রে-
ত্যার্দ্রাকারং কিমপি কিতবং জ্যোতিরন্বেষযামঃ || ৩. ৩০||
আরূঢবেণুতরুণাধরবিভ্রমেণ
মাধুর্যশালিবদনাম্বুজমুদ্বহন্তী |
আলোক্যতাং কিমনযা বনদেবতা বঃ
কৈশোরকে বযসি কাপি চ কান্তিযষ্টিঃ || ৩. ৩১||
অনন্যসাধারণকান্তিকান্ত-
মাক্রান্তগোপীনযনারবিন্দম্ |
পুংসঃ পুরাণস্য নবং বিলাসং
পুণ্যেন পূর্ণেন বিলোকযিষ্যে || ৩. ৩২||
সাষ্টাঙ্গপাতমভিবন্দ্য সমস্তভাবৈঃ
সর্বান্ সুরেন্দ্রনিকরানিদমেব যাচে |
মন্দস্মিতার্দ্রমধুরাননচন্দ্রবিম্বে
নন্দস্য পুণ্যনিচযে মম ভক্তিরস্তু || ৩. ৩৩||
এষু প্রবাহেষু স এব মন্যে
ক্ষণোঽপি গণ্যঃ পুরুষাযুষেষু |
আস্বাদ্যতে যত্র কযাপি ভক্ত্যা
নীলস্য বালস্য নিজং চরিত্রম্ || ৩. ৩৪||
নিসর্গসরসাদরং নিজদযার্দ্রদিব্যেক্ষণং
মনোজ্ঞমুখপঙ্কজং মধুরসার্দ্রমন্দস্মিতম্ |
রসজ্ঞ হৃদযাস্পদং রমিতবল্লবীলোচনং
পুনঃপুনরুপাস্মহে ভুবনলোভনীযং মহঃ || ৩. ৩৫||
স কোঽপি বালস্সরসীরুহাক্ষঃ
সা চ ব্রজস্ত্রীজনপাদধূলিঃ |
মুহুস্তদেতদ্যুগলং মদীযে
মোমুহ্যমানোঽপি মনস্যুতেতু || ৩. ৩৬||
মযি প্রযাণাভিমুখে চ বল্লবী-
স্তনদ্বযীদুর্ললিতস্স বালকঃ |
শনৈশ্শনৈঃ শ্রাবিতবেণুনিস্বনো
বিলাসবেষেণ পুরঃ প্রতীযতাম্ || ৩. ৩৭||
অতিভূমিমভূমিমেব বা
বচসাং বাসিতবল্লবীস্তত্নম্ |
মনসামমরং রসাযনং
মধুরাদ্বৈতমুপাস্মহে মহঃ || ৩. ৩৮||
জননাতরেঽপি জগদেকমণ্ডনে
কমনীযধাম্নি কমলাযতেক্ষণে |
ব্রজসুন্দরীজনবিলোচনামৃতে
চপলানি সন্তু সকলেন্দ্রিযাণি মে || ৩. ৩৯||
মুনিশ্রেণীবন্দ্যং মদভরলসদ্বল্লববধূ-
স্তনশ্রোণীবিম্বস্তিমিতনযনাম্ভোজসুভগম্ |
পুনঃ শ্লাঘাভূমিং পুলকিতগিরাং নৈগমগিরাং
ঘনশ্যামং বন্দে কিমপি কমনীযাকৃতিমহঃ || ৩. ৪০||
অনুচুম্বিতামবিচলেন চেতসা
মনুজাকৃতের্মধুরিমশ্রিযং বিভোঃ |
অযি দেব কৃষ্ণ দযিতেতি জল্পতা-
মপি নো ভবেযুরপি নাম তাদৃশঃ || ৩. ৪১||
কিশোরবেষেণ কৃশোদরীদৃশাং
বিশেষদৃশ্যেন বিশাললোচনম্ |
যশোদযা লব্ধযশোনবাম্বুধে-
র্নিশামযে নীলনিশাকরং কদা || ৩. ৪২||
প্রকৃতিরবতু নো বিলাসলক্ষ্ম্যাঃ
প্রকৃতিজডং প্রণতাপরাধবীথ্যাম্ |
সুকৃতিকৃতপদং কিশোরভাবে
সুকৃতিমনঃ প্রণিধানপাত্রমোজঃ || ৩. ৪৩||
অপহসিত সুধামদাবলেপৈ-
রতিসুমনোহরমার্দ্রমন্দহাসৈঃ |
ব্রজযুবতিবিলোচনাবলেহ্যং
রমযতু ধাম রমাবরোধং নঃ || ৩. ৪৪||
অঙ্কূরিতস্মেরদশাবিশেষৈ-
রশ্রান্তহর্ষামৃতবর্ষমক্ষ্ণাম্ |
সংক্রীডতাং চেতসি গোপকন্যা-
ঘনস্তনস্বস্ত্যযনং মহো নঃ || ৩. ৪৫||
মৃগমদপঙ্কসঙ্করবিশেষিতবন্যমহা-
গিরিতটগণ্ডগৈরিকঘনদ্রববিদ্রুমিতাম্ |
অজিতভুজান্তরং ভজত হে ব্রজগোপবধূ-
স্তনকলশস্থলীঘুসৃণমর্দনকর্দমিদম্ || ৩. ৪৬||
আমূলপল্লবিতলীলমপাঙ্গজালৈ-
রাসিঞ্চতী ভুবনমাদৃতগোপবেষা |
বালাকৃতির্মৃদুলমুগ্ধমুখেন্দুবিম্বা-
মাধুর্যসিদ্ধিরবতান্মধুবিদ্বিষো নঃ || ৩. ৪৭||
বিরণন্ মণিনূপুরং ব্রজে
চরণাম্ভোজমুপাস্স্ব শার্ঙ্গিণঃ |
সরসে সরসি শ্রিযাশ্রিতং
কমলং বা কলহংসনাদিতম্ || ৩. ৪৮||
শরণমশরণানাং শারদাম্ভোজনেত্রং
নিরবধিমধুরিম্না নীলবেষেণ রম্যম্ |
স্মরশরপরতন্ত্রস্মেরনেত্রাম্বুজাভি-
র্ব্রজযুবতিভিরব্যাদ্ ব্রহ্ম সংবেষ্টিতং নঃ || ৩. ৪৯||
সুব্যক্তকান্তিভরসৌরভদিব্যগাত্র-
মব্যক্তযৌবনপরীতকিশোরভাবম্ |
গব্যানুপালনবিধাবনুশিষ্টমব্যা-
দব্যাজরম্যমখিলেশ্বরবৈভবং নঃ || ৩. ৫০||
অনুগতমমরীণামম্বরালম্বিনীনাং
নযনমধুরিমশ্রীনর্মনির্মাণসীম্নাম্ |
ব্রজযুবতিবিলাসব্যাপৃতাপাঙ্গমব্যাত্
ত্রিভুবনসুকুমারং দেবকৈশোরকং নঃ || ৩. ৫১||
আপাদমাচূডমতিপ্রসক্তৈ-
রাপীযমানা যমিনাং মনোভিঃ |
গোপীজনজ্ঞাতরসাঽবতান্নো
গোপলভূপালকুমারমূর্তিঃ || ৩. ৫২||
দিষ্ট্যা বৃন্দাবনমৃগদৃশাং বিপ্রযোগাকুলানাং
প্রত্যাসন্নং প্রণযচপলাপাঙ্গবীচীতরঙ্গৈঃ |
লক্ষ্মীলীলাকুবলযদলশ্যামলং ধাম কামান্
পুষ্ণীযান্নঃ পুলকমুকুলাভোগভূষাবিশেষম্ || ৩. ৫৩||
জযতি গুহশিখীন্দ্রপিঞ্ছমৌলিঃ
সুরগিরিগৌরিককল্পিতাঙ্গরাগঃ |
সুরযুবতিবিকীর্ণসূনবর্ষ-
স্নপিতবিভূষিতকুন্তলঃ কুমারঃ || ৩. ৫৪||
মধুরমন্দশুচিস্মিতমঞ্জুলং
বদনপঙ্কজমঙ্গজবেল্লিতম্ |
বিজযতাং ব্রজবালবধূজন-
স্তনতটীবিলুঠন্নযনং বিভোঃ || ৩. ৫৫||
অলসবিলসসন্মুগ্ধস্নিগ্ধস্মিতং ব্রজসুন্দরী-
মদনকদনস্বিন্নং ধন্যং মহদ্বদনাম্বুজম্ |
তরুণমরুণজ্যোত্স্না কার্ত্স্ন্যা স্মিতস্নপিতাধরং
জযতি বিজযশ্রেণীমেণীদৃশাং মদযন্মহঃ || ৩. ৫৬||
রাধাকেলিকটাক্ষবীক্ষিতমহাবক্ষঃস্থলীমণ্ডনা
জীযাসুঃ পুলকাঙ্কুরাস্ত্রিভুবনস্বাদীযসস্তেজসঃ |
ক্রীডান্তপ্রতিসুপ্তদুগ্ধতনযামুগ্ধাববোধক্ষণ-
ত্রাসারূঢদৃঢোপগূহনমহাসাম্রাজ্যসান্দ্রশ্রিযঃ || ৩. ৫৭||
স্মিতস্নুতসুধাধরামদশিখণ্ডিবর্হাঙ্কিতা
বিশালনযনাম্বুজা ব্রজবিলাসিনীবাসিতাঃ |
মনোজ্ঞমুখপঙ্কজা মধুরবেণূনাদদ্রবা
জযন্তি মম চেতসশ্চিরমুপাসিতা বাসনাঃ || ৩. ৫৮||
জীযাদসৌ শিখিশিখণ্ডকৃতাবতংসা
সংসিদ্ধিকী সরসকান্তিসুধাসমৃদ্ধিঃ |
যদ্বিন্দুলেশকণীকাপরিমাণভাগ্য-
সৌভাগ্যসীমপদমঞ্চতি পঞ্চবাণঃ || ৩. ৫৯||
আযামেন দৃশোর্বিশালতরযোরক্ষয্যমার্দ্রস্মিত-
চ্ছাযাধর্ষিতশারদেন্দুললিতং চাপল্যমাত্রং শিশোঃ |
আযাসানপরান্বিধূয রসিকৈরাস্বাদ্যমানং মুহু-
র্জীযাদুন্মদবল্লবীকুচভরাধারং কিশোরং মহঃ || ৩. ৬০||
স্কন্ধাবারসদো প্রজাঃ কতিপযে গোপাস্সহাযাদযঃ
স্কন্ধালম্বিনি বত্সদাম্নি ধনদা গোপাঙ্গনাঃ স্বাঙ্গনাঃ |
শৃঙ্গারা গিরিগৌরিকং শিব শিব শ্রীমন্তি বর্হাণি চ
শৃঙ্গপ্রাহিকযা তথাপি তদিদং প্রাহুস্ত্রিলোকেশ্বরম্ || ৩. ৬১||
শ্রীমদ্বর্হিশিখণ্ডমণ্ডনজুষে শ্যামাভিরামত্বিষে
লাবণ্যৈকরসাবসিক্তবপুষে লক্ষ্মীসরঃপ্রাবৃষে |
লীলাকৃষ্টরসজ্ঞধর্মমনসে লীলামৃতস্রোতসে
কে বা ন স্পৃহযন্তি হন্ত মহসে গোপীজনপ্রেযসে || ৩. ৬২||
আপাটলাধরমধীরবিলোলনেত্র-
মামোদনির্ভরিতমদ্ভুতকান্তিপূরম্ |
আবিস্মিতামৃতমনুস্মৃতিলোভনীয-
মামুদ্রিতাননং মহো মধুরং মুরারেঃ || ৩. ৬৩||
জাগৃহি জাগৃহি চেতশ্চিরায চরিতার্থায ভবতঃ |
অনুভূযতামিদমিদং পুরঃ স্থিতং পূর্ণনির্বাণম্ || ৩. ৬৪||
চরণযোররুণং করুণার্দ্রযোঃ
কচভরে বহুলং বিপুলং দৃশোঃ |
বপুষি মঞ্জুলমঞ্জনমেচকে
বযসি বালমহো মধুরং মহঃ || ৩. ৬৫||
মালাবর্হমনোজ্ঞকুন্তলভরং বন্যপ্রসূনোক্ষিতাং
শৈলেযদ্রবকৢপ্তচিত্রতিলকং শাশ্বন্মনোহারিণীম্ |
লীলাবেণুরবামৃতৈকরসিকাং লাবণ্যলক্ষ্মীমযীং
বালাং বালতমালনীলবপুষং বন্দে পরাং দেবতাম্ || ৩. ৬৬||
গুরু মৃদুপদে গূঢং গুল্ফে ঘনং জঘনস্তলে
নলিনমুদরে দীর্ঘং বাহ্বোর্বিশালমুরস্থলে |
মধুরমধরে মুগ্ধং বক্ত্রে বিলাসি বিলোচনে
বহু কচভরে বন্যং বেষে মনোজ্ঞমহো মহঃ || ৩. ৬৭||
জিহানং জিহানং সুজানেন মৌগ্ধ্যং
দুহানং দুহানং সুধাং বেণুনাদৈঃ |
লিহানং লিহানং সুধীর্ঘৈরপাঙ্গৈ-
র্মহানন্দসর্বস্বমেতন্নমস্তাম্ || ৩. ৬৮||
লসদ্বর্হাপীডং ললিতললিতস্মেরবদনং
ভ্রমত্ক্রীডাপাঙ্গং প্রণতজনতানির্বৃতিপদম্ |
নবাম্ভোদশ্যামং নিজমধুরিমাভোগভরিতং
পরং দেবং বন্দে পরিমলিতকৈশোরকরসম্ || ৩. ৬৯||
সারস্যসামগ্র্যমিবাননেন
মাধুর্যচাতুর্যমিব স্মিতেন |
কারুণ্যতারুণ্যমিবেক্ষিতেন
চাপল্যসাফল্যমিদং দৃশোর্মে || ৩২. ৭০||
যত্র বা তত্র বা দেব যদি বিশ্বসিমস্ত্বযি |
নির্বাণমপি দুর্বারমর্বাচীনানি কিং পুনঃ || ৩. ৭১||
রাগান্ধগোপীজনবন্দিতাভ্যাং
যোগীন্দ্রভৃঙ্গেন্দ্রনিষেবিতাভ্যাম্ |
আতাম্রপঙ্কেরুহবিভ্রমাভ্যাং
স্বামিন্ পদাভ্যামযমঞ্জলিস্তে || ৩. ৭২||
অর্থানুলাপান্ব্রজসুন্দরীণা-
মকৃত্রিমাণাঞ্চ সরস্বতীনাম্ |
আর্দ্রাশযেন শ্রবণাঞ্চলেন
সংভাবযন্তং তরুণং গৃণীমঃ || ৩. ৭৩||
মনসি মম সন্নিধত্তাং মধুরমুখা মন্থরাপাঙ্গা |
করকলিতললিতবংশা কাপি কিশোরা কৃপালহরী || ৩. ৭৪||
রক্ষন্তু নঃ শিক্ষিতপাশুপাল্যা
বাল্যাবৃতা বর্হিশিখাবতংসাঃ |
প্রাণপ্রিযাঃ প্রস্তুতবেণুগীতাঃ
শীতাদৃশোঃ শীতলগোপকন্যাঃ || ৩. ৭৫||
স্মিতস্তবকিতাধরং শিশিরবেণুনাদামৃতং
মুহুস্তরললোচনং মদকটাক্ষমালাকুলম্ |
উরস্থলবিলীনযা কমলযা সমালিঙ্গিতং
ভুবস্থলমুপাগতং ভুবনদৈবতং পাতু নঃ || ৩. ৭৬||
নযনাম্বুজে ভজত কামদুঘং
হৃদযাম্বুজে কিমপি কারুণিকম্ |
চরণাম্বুজে মুনিকুলৈকধনং
বদনাম্বুজে ব্রজবধূবিভবম্ || ৩. ৭৭||
নির্বাসনং হন্ত রসান্তরাণাং
নির্বাণসাম্রাজ্যমিবাবতীর্ণম্ |
অব্যাজমাধুর্যমহানিধান-
মব্যাদ্ব্রজানামধিদৈবতং নঃ || ৩. ৭৮||
গোপীনামভিমতগীতবেষহর্ষা-
দাপীনস্তনভরনির্ভরোপগূঢম্ |
কেলীনামবতু রসৈরুপাস্যমানং
কালিন্দীপুলিনচরং পরং মহো নঃ || ৩. ৭৯||
খেলতাং মনসি খেচরাঙ্ঘনা-
মাননীযমৃদুবেণিনিস্বনৈঃ |
কাননে কিমপি নঃ কৃপাস্পদং
কালমেঘকলহোদ্বহং মহঃ || ৩. ৮০||
এণীশাববিলোচনাভিরলসশ্রোণীভরপ্রৌঢিভি-
র্বেণীভূতরসক্রমাভিরভিতশ্শ্রেণীকৃতাভির্বৃতঃ |
পাণী দ্বৌ চ বিনোদযন্ রতিপতেস্তূণীশযৈস্সাযকৈ-
র্বাণীনামপদং পরং ব্রজজনক্ষোণীপতিঃ পাতু নঃ || ৩. ৮১|
কালিন্দীপুলিনে তমালনিবিডচ্ছাযে পুরঃসংচরত্
তোযে তোযজপত্রপাত্রনিহিতং দধ্যন্নমশ্নাতি যঃ |
বামে পাণিতলে নিধায মধুরং বেণুং বিষাণং কটি-
প্রান্তে গাশ্চ বিলোকযন্ প্রতিকলং তং বালমালোকযে || ৩. ৮২||
যদ্গোপীবদনেন্দুমণ্ডনমভূত্ কস্তূরিকাপত্রকং
যল্লক্ষ্মীকুচশাতকুংভকলশব্যাকোশমিন্দীবরম্ |
যন্নির্বাণনিধানসাধনবিধৌ সিদ্ধাঞ্জনং যোগিনাং
তন্নঃ শ্যামলমাবিরস্তু হৃদযে কৃষ্ণাভিধানং মহঃ || ৩. ৮৩|
ফুল্লেন্দীবরকান্তিমিন্দুবদনং বর্হাবতংসপ্রিযং
শ্রীবত্সাঙ্কমুদারকৌস্তুভধরং পীতাম্বরং সুন্দরম্ |
গোপীনাং নযনোত্পলার্চিততনুং গোগোপসঙ্ঘাবৃতং
গোবিন্দং কলবেণুনাদনিরতং দিব্যাঙ্গভূষং ভজে || ৩. ৮৪||
যন্নাভীসরসীরুহান্তরপুটে ভৃঙ্গাযমানো বিধি-
র্যদ্বক্ষঃ কমলাবিলাসসদনং যচ্চক্ষুষী চেন্দ্বিনৌ |
যত্পাদাব্জবিনঃসৃতা সুরনদী শংভোঃ শিরোভূষণং
যন্নামস্মরণং ধুনোতি দুরিতং পাযাত্ স নঃ কেশবঃ || ৩. ৮৫||
রক্ষতু ত্বামসিতজলজৈরঞ্জলিঃ পাদমূলে
মীনা নাভীসরসি হৃদযে মারবাণাঃ মুরারেঃ |
হারাঃ কণ্ঠে হরিমণিমযা বক্ত্রপদ্মে দ্বিরেফাঃ
পিঞ্ছাচূডাশ্চিকুরনিচযে ঘোষযোষিত্কটাক্ষাঃ || ৩. ৮৬||
দধিমথননিনাদৈস্ত্যক্তনিদ্রঃ প্রভাতে
নিভৃতপদমগারং বল্লবীনাং প্রবৃষ্টঃ |
মুখকমলসমীরৈরাশু নির্বাপ্য দীপান্
কবলিতনবনীতঃ পাতু গোপালবালঃ || ৩. ৮৭||
প্রাতঃ স্মরামি দধিঘোষবিনীতনিদ্রং
নিদ্রাবসানরমণীযমুখারবিন্দম্ |
হৃদ্যানবদ্যবপুষং নযনাভিরাম-
মুন্নিদ্রপদ্মনযনং নবনীতচোরম্ || ৩. ৮৮||
ফুল্লহল্লকবতংসকোল্লসদ্
গল্লমাগমগন্বীং গবেষিতম্ |
বল্লবীচিকুরবাসিতাঙ্গুলী-
পল্লবং কমপি বল্লবং ভজে || ৩. ৮৯||
স্তেযং হরের্হরতি যন্নবনীতচৌর্যং
জারত্বমস্য গুরুতল্পকৃতাপরাধম্ |
হত্যাং দশাননহতির্মধুপানদোষং
যত্পূতনাস্তনপযঃ স পুনাতু কৃষ্ণঃ || ৩. ৯০||
মার মা বস মদীযমানসে
মাধবৈকনিলযে যদৃচ্ছযা |
শ্রীরমাপতিরিহাগমেদসৌ
কঃ সহেত নিজবেশ্মলঙ্ঘনম্ || ৩. ৯১||
আকুঞ্চিতং জানু করং চ বামং
ন্যস্য ক্ষিতৌ দক্ষিণহস্তপদ্মে |
আলোকযন্তং নবনীতখণ্ডং
বালং মুকুন্দং মনসা স্মরামি || ৩. ৯২||
জানুভ্যামভিধাবন্তং পাণিভ্যামতিসুন্দরম্ |
সুকুণ্ডলালকং বালং গোপালং চিন্তযেদুষঃ || ৩. ৯৩||
বিহায কোদণ্ডশরৌ মুহূর্তং
গৃহাণ পাণৌ মণিচারুবেণুম্ |
মাযূরবর্হং চ নিজোত্তমাঙ্গে
সীতাপতে ত্বাং প্রণমামি পশ্চাত্ || ৩. ৯৪||
অযং ক্ষীরাম্ভোধিঃ পতিরিতি গবাং পালক ইতি
শ্রিতোঽস্মাভিঃ ক্ষীরোপনযনধিযা গোপতনযঃ |
অনেন প্রত্যূহো ব্যরচি সততং যেন জননী-
স্তনাদপ্যস্মাকং সকৃদপি পযো দুর্লভমভূত্ || ৩. ৯৫||
হস্তমাক্ষিপ্য যাতোঽসি বলাত্কৃষ্ণ কিমদ্ভুতম্ |
হৃদযাদ্যদি নির্যাসি পৌরুষং গণযামি তে || ৩. ৯৬||
তমসি রবিরিবোদ্যন্মঞ্চতামম্বুরাশৌ
প্লব ইব তৃষিতানাং স্বাদুবর্ষীব মেঘঃ |
নিধিরিব বিধতানাং দীর্ঘতীব্রামযানাং
ভিষগিব কুশলং নো দাতুমাযাতু শৌরিঃ || ৩. ৯৭||
কোদণ্ডং মসৃণং সুগন্ধি বিশিখং চক্রাব্জপাশাঙ্কুশং
হৈমীং বেণুলতাং করৈশ্চ দধতং সিন্দূরপুঞ্চারুণম্ |
কন্দর্পাধিকসুন্দরং স্মিতমুখং গোপাঙ্গনাবেষ্টিতং
গোপালং সততং ভজামি বরদং ত্রৈলোক্যরক্ষামণিম্ || ৩. ৯৮||
সাযঙ্কালে বনান্তে কুসুমিতসমযে সৈকতে চন্দ্রিকাযাং
ত্রৈলোক্যাকর্ষণাঙ্কং সুরনরগণিকামোহনাপাঙ্গমূর্তিম্ |
সেব্যং শৃঙ্গারভাবৈর্নবরভরিতৈর্গোপকন্যাসহস্রৈ-
র্বন্দেঽহং রসকেলীরতমতিসুভগং বশ্য গোপালকৃষ্ণম্ || ৩. ৯৯||
কদম্বমূলে ক্রীডন্তং বৃন্দাবননিবেশিতম্ |
পদ্মাসনস্থিতং বন্দে বেণুং গাযন্তমচ্যুতম্ || ৩. ১০০||
বালং নীলাম্বুদাভং নবমণিবিলসত্ কিঙ্কিণীজালবদ্ধ-
শ্রোণীজঙ্ঘান্তযুগ্মং বিপুলগুরুণখপ্রোল্লসত্কণ্ঠভূষম্ |
ফুল্লাম্ভোজাভবক্ত্রং হতশকটমরুত্ পূতনাদ্যং প্রসন্নং
গোবিন্দং বন্দিতেন্দ্রাদ্যমরবরমজং পূজযেদ্বাসরাদৌ || ৩. ১০১||
বন্দ্যং দেবৈর্মুকুন্দং বিকসিতকুরুবিন্দাভমিন্দীবরাক্ষং
গোগোপীবৃন্দবীতং জিতরিপুনিবহং কুন্দমন্দারহাসম্ |
নীলগ্রীবাগ্রপিঞ্ছাকলনসুবিলসত্কুন্তলং ভানুমন্তং
দেবং পীতাম্বরাঢ্যং জপ জপ দিনশো মধ্যমাহ্নে রমাযৈ
|| ৩. ১০২||
চক্রান্তধ্বস্তবৈরীব্রজমজিতমপাস্তাবনীভারমাদ্যৈ-
রাবীতং নারদাদ্যৈর্মুনিভিরভিনুতং তত্বনির্ণীতহেতোঃ |
সাযাহ্নে নির্মলাঙ্গং নিরুপমরুচিরং চিন্তযেন্নীলভাসং
মন্ত্রী বিশ্বোদযস্থিত্যপহরণপদং মুক্তিদং বাসুদেবম্
|| ৩. ১০৩||
কোদন্ডমৈক্ষবমখণ্ডমিষুং চ পৌষ্পং
চক্রাব্জপাশসৃণিকাঞ্চনবংশনালম্ |
বিভ্রাণমষ্টবিধবাহুভিরর্কবর্ণং
ধ্যাযেদ্ধরিং মদনগোপবিলাসবেষম্ || ৩. ১০৪||
অঙ্গুল্যাঃ কঃ কবাটং প্রহরতি কুটিলে মাধবঃ কিং বসন্তো
নো চক্রী কিং কুলালো ন হি ধরণিধরঃ কিং দ্বিজিহ্বঃ ফণীন্দ্রঃ |
নাহং ধারাহিমার্দ্রী কিমসি খগপতির্নো হরিঃ কিং কপীন্দ্র
ইত্যেবং গোপকন্যা প্রতিবচনজিতঃ পাতু বশ্চক্রপাণিঃ
|| ৩. ১০৫||
রাধামোহনমন্দিরাদুপগতশ্চন্দ্রাবলীমূচিবান্
রাধে ক্ষেমমযেঽস্তি তস্য বচনং শ্রুত্বাঽঽহ চন্দ্রাবলী |
কংস ক্ষেমমযে বিমুগ্ধহৃদযে কংসঃ ক্ব দৃষ্টস্ত্বযা
রাধা ক্বেতি বিলজ্জিতো নতমুখঃ স্মেরো হরিঃ পাতু বঃ
|| ৩. ১০৬||
যা প্রীতির্বিদুরার্পিতে মুররিপো কুন্ত্যর্পিতে যাদৃশী
যা গোবর্ধনমূর্ধ্নি যা চ পৃথুকে স্তন্যে যশোদার্পিতে |
ভারদ্বাজসমর্পিতে শবরিকাদত্তেঽধরে যোষিতাং
যা প্রীতির্মুনিপত্নিভক্তিরচিতেঽপ্যত্রাপি তাং তাং কুরু
|| ৩. ১০৭||
কৃষ্ণানুস্মরণাদেব পাদসঙ্ঘাতপঞ্চরঃ |
শতধো ভেদমাযাতি গিরির্বজ্রহতো যথা || ৩. ১০৮||
যস্যাত্মভূতস্য গুরোঃ প্রসাদা-
দহং বিমুক্তোঽস্মি শরীরবন্ধাত্ |
সর্বোপদেষ্টুঃ পুরুষোত্তমস্য
তস্যাংঘ্রিপদ্মং প্রণতোস্মি নিত্যম্ || ৩. ১০৯||
|| ইতি শ্রীকৃষ্ণকর্ণামৃতে তৃতীযাশ্বাসঃ সমাপ্তঃ ||
|| ইতি শ্রীকৃষ্ণকর্ণামৃতং সমাপ্তম্ ||
নোট নিতে এবং টেক্সট হাইলাইট করতে লগইন করুন
লগইন