তত্ত্বার্যাস্তবঃ

.. তত্ত্বার্যাস্তবঃ ..

শিবকামসুন্দরীশং শিবগঙ্গাতীরকল্পিতনিবেশম্ .
শিবমাশ্রযে দ্যুকেশং শিবমিচ্ছন্মা বপুষ্যভিনিবেশম্ .. ১..
গীর্বাণচক্রবর্তী গীশ্চেতোমার্গদূরতোবর্তী .
ভক্তাশযানুবর্তী ভবতু নটেশোঽখিলামযনিবর্তী .. ২..
বৈযাঘ্রপাদভাগ্যং বৈযাঘ্রং চর্ম কংচন বসানম্ .
বৈযাকরণফণীড্যং বৈযাসিক্যা গিরা স্তুতং প্রণুমঃ .. ৩..
হাটকসভানিবাসঃ শাটকতাপন্নসকলহরিদন্তঃ .
ঘোটকনিগমো মাযানাটকসাক্ষী জগত্পতির্জযতি .. ৪..
শৈলূষরাজমাদ্যং মালূরপ্রসবমালিকাভরণম্ .
পীলূপমোঽন্ধুজীর্যচ্ছালূরাভঃ কথং বিজানীযাম্ .. ৫..
কনকসভৈকনিকেতং কঠিনপুরাণোক্তিসারসংকেতম্ .
নারাধযন্তি কে তং নারাযণ্যা যুতং স্বতোকেতম্ .. ৬..
তিল্লবনে ক্ষুল্লবনে পল্লবসংভিন্নফুল্লপুষ্পঘনে .
চিল্লহরীমুল্ললযন্ বল্লভযা ভিল্লতল্লজো নটতি .. ৭..
বৈরাজহৃত্সরোজে বৈরাজাদ্যৈঃ স সামভিঃ স্তব্যঃ .
বৈরাগ্যাদিগুণাঢ্যৈঃ বৈরাদ্যুত্সৃজ্য দৃশ্যতে নৃত্যন্ .. ৮..
ঢক্কানিনদৈঃ সূত্রাণ্যঙ্গদনাদৈরহো মহদ্ভাষ্যম্ .
ব্যাকরণস্য বিবৃণ্বন্ নৃত্যতি ভৃত্যান্ কৃতার্থযন্ মর্ত্যান্ .. ৯..
নটনাযক নটনায ক ইহ সুকৃতী নো তব স্পৃহযেত্ .
মন্~জুলতামঞ্জুলতামহিতে বস্তুং চ তিল্লবনে .. ১০..
অতিদুরিতোত্তারকৃতে চিরধৃতহর্ষঃ সভাপতিঃ সদ্যঃ .
অগণেযাঘঘনং মামাসাদ্যানন্দমেদুরো নটতি .. ১১..
মত্পাদলগ্নজনতামুদ্ধর্তাস্মীতি চিত্সভানাথঃ .
তাণ্ডবমিষোদ্ধৃতৈকসবাঙ্ঘ্রিঃ সর্বান্ বিবোধযতি .. ১২..
আপন্নলোকপালিনি কপালিনি স্ত্রীকৃতাঙ্গপালিনি মে .
শমিতবিধিশ্রীশরণে শরণা ধীরস্তু চিত্সভাশরণে .. ১৩..
ভিক্ষুর্মহেশ্বরোঽপি শ্রুত্যা প্রোক্তঃ শিবোঽপ্যুগ্রঃ .
অপি ভবহারী চ ভবো নটোঽপি চিত্রং সভানাথঃ .. ১৪..
নৃত্যন্নটেশমৌলিত্বঙ্গদ্গঙ্গাতরঙ্গশীকরিণঃ .
ভূষাহিপীতশিষ্টাঃ পুনন্তু মাং তিল্লবনবাতাঃ .. ১৫..
কনকসভাসম্রাজো নটনারম্ভে ঝলংঝলংঝলিতি .
মঞ্জীরমঞ্জুনিনদা ধ্বনিযুঃ শ্রোত্রে কদা নু মম .. ১৬..
পর্বতরাজতনূজাকুচতটসংক্রান্তকুঙ্কুমোন্মিশ্রাঃ .
নটনার্ভটীবিধূতা ভূতিকণাস্তে স্পৃশেযুরপি মেঽঙ্গম্ .. ১৭..
নটনোচ্চলত্কপালামর্দিতচন্দ্রক্ষরত্সুধামিলিতাঃ .
আদিনটমৌলিতটিনীপৃষতো গোত্রেঽত্র মে স্খলেযুঃ কিম্ .. ১৮..
পশ্যানি সভাধীশং কদা নু তং মূর্ধনি সভাধীশম্ .
যঃ ক্ষযরসিকং কালং জিতবান্ ধত্তে চ শিরসি কঙ্কালম্ .. ১৯..
তনুজাযাতনুজাযাসক্তানাং দুর্লভং সভানাথম্ .
নগতনযা নগতনযা বশযতি দত্ত্বা শরীরার্ধম্ .. ২০..
আনন্দতাণ্ডবং যস্তবেশ পশ্যেন্ন চাপি নৃগণে যঃ .
স চ স চ ন চন্দ্রমৌলে বিদ্বদ্ভির্জন্মবত্সু বিগণেযঃ .. ২১..
কামপরবশং কৃত্বা কামপরবশং ত্বকৃত্বা মাম্ .
কনকসভাং গমযসি রে কনকসভাং হা ন যাপযসি .. ২২..
নটনং বিহায শংভোর্ঘটনং পীনস্তনীভিরাশাস্সে .
অটনং ভবে দুরন্তে বিট নন্দসি ন স্বভূমসুখম্ .. ২৩..
কলিতভবলঙ্ঘনানাং কিং করৈব চিত্সুখঘনানাম্ .
সুমুদাং সাপঘনানাং শিবকামেশ্যাঃ কৃপামৃতঘনানাম্ .. ২৪..
নিনিলীযে মাযাযাং ন বিলিযে বা শুচা পরং লীযে .
আনন্দসীমনি লসত্তিল্লবনীধামনি স্বভূমনি তু .. ২৫..
অধিহেমসভং প্রসভং বিসভঙ্গবদান্যধন্যরুচম্ .
শ্রুতগলগরলং সরলং নিরতং ভক্তাবনে ভজে দেবম্ .. ২৬..
সভযা চিত্সভযাসীন্মাযা মাযাপ্রবোধশীতরুচেঃ .
সুহিতা ধীঃ সুহিতা মে সোমা সোমার্ধধারিণী মূর্তিঃ .. ২৭..
পত্যা হেমসভাযাঃ সত্যানন্দৈকচিদ্বপুষা .
কত্যার্তা ন ত্রাতা নৃত্যাযত্তেন মাদৃশা মর্ত্যাঃ .. ২৮..
ভজতাং মুমুক্ষযা ত্বাং নটেশ লভযাস্ত্রযঃ পুমর্থাশ্চ .
ফললিপ্সযাম্রভাজাং ছাযাসৌরভ্যমাধব্য ইব .. ২৯..
কঞ্চুকপঞ্চকনদ্ধং নটযসি মাং কিং নটেশ নাটযসি .
নটসি নিরাবৃতিসুখিতো জহি মাযাং ত্বাদৃশোঽহমপি তত্ স্যাম্ .. ৩০..
আস্তাং নটেশ তদ্যন্নটতি ভবানম্বরে নিরালম্বে .
ত্বন্নটনেঽপি হি নটনং বেদপুরানাগমাঃ সমাদধতি .. ৩১..
বেধসি সর্বাধীশেঽমেধসি বা মাদৃশে সরূপকৃতা .
রোধসি শিবগঙ্গাযা বোধসিরা কাচিদুল্লসতি .. ৩২..
হট্টাযিতং বিমুক্তেঃ কুট্টাকং তং ভজামি মাযাযাঃ .
ভট্টারকং সভাযাঃ কিট্টাত্মন্যঙ্গকে ত্যজন্মমতাম্ .. ৩৩..
শ্রীমচ্চিদম্বরেশাদন্যত্রানন্দতাণ্ডবাসক্তাত্ .
ব্রাহ্মং লক্ষণমাস্তে কুত্রচিদানন্দরূপতা দেবে .. ৩৪..
ক্ষুল্লককামকৃতেঽপি ত্বত্সেবা স্যাদ্বিমুক্তিমপি দাত্রী .
পীতামৃতোঽপ্যুদন্যাশান্ত্যৈ স্যাচ্চিত্সভাধিপামর্ত্যঃ .. ৩৫..
সত্যং সত্যং গত্যন্তরমুত্সৃজ্য তে পদাপাত্যম্ .
অত্যন্তার্তং ভৃত্যং ন ত্যজ নিত্যং নটেশ মাং পাহি .. ৩৬..
ষট্ত্রিংশতা তত্ত্বমযীভিরাভিঃ সোপানভূতাভিরুমাসহাযম্ .
আর্যাভিরাদ্যং পরতত্ত্বভূতং চিদম্বরানন্দনটং ভজধ্বম্ .. ৩৭..
        .. ইতি শ্রীতত্ত্বার্যাস্তবঃ সংপূর্ণঃ..