দক্ষিণামূর্তি স্তোত্রম্ ২

.. শ্রী দক্ষিণামূর্তি স্তোত্রম্ ২ ..

অপাসকানাং যদুপাসনীযমুপাত্তবাসং বটশাখিমূলে |
তদ্দাম দাক্ষিণ্যজুষা স্বমূর্ত্যা জাগর্তু চিত্তে মম বোধরূপম্ || ১||
অদ্রাক্ষমক্ষীণদযানিধানমাচার্যমাদ্যং বটমূলভাগে |
মৌনেন মন্দস্মিতভূষিতেন মহর্ষিলোকস্য তমো নুদন্তম্ || ২||
বিদ্রাবিতাশেষতমোগণেন মুদ্রাবিশেষেণ মুহুর্মুনীনাম্ |
নিরস্য মাযাং দযযা বিধত্তে দেবো মহাংস্তত্ত্বমসীতি বোধম্ || ৩||
অপারকারুণ্যসুধাতরঙ্গৈরপাঙ্গপাতৈরবলোকযন্তম্ |
কঠোরসংসারনিদাঘতপ্তান্মুনীনহং নৌমি গুরুং গুরূণাম্ || ৪||
মমাদ্যদেবো বটমূলবাসী কৃপাবিশেষাত্কৃতসন্নিধানঃ |
ওংকাররূপামুপদিশ্য বিদ্যামাবিদ্যকধ্বান্তমপাকরোতু || ৫||
কলাভিরিন্দোরিব কল্পিতাঙ্গং মুক্তাকলাপৈরিব বদ্দমূর্তিম্ |
আলোকযে দেশিকমপ্রমেযমনাদ্যবিদ্যাতিমিরপ্রভাতম্ || ৬||
স্বদক্ষজানুস্থিতবামপাদং পাদোদরালংকৃতযোগপট্টম্ |
অপস্মৃতেরাহিতপাদমঙ্গে প্রণৌমি দেবং প্রণিধানবন্তম্ || ৭||
তত্ত্বার্থমন্তেবসতামৃষীণাং যুবাঽপি যঃ সন্নুপদেষ্টুমীষ্টে |
প্রণৌমি তং প্রাক্তনপুণ্যজালৈরাচার্যমাশ্চর্যগুণাধিবাসাম্ || ৮||
একেন মুদ্রাং পরশুং করেণ করেণ চান্যেন মৃগং দধানঃ |
স্বজানুবিন্যস্তকরঃ পুরস্তাদাচার্যচূডামণিরাবিরস্তু || ৯||
আলেপবন্তং মদনাঙ্গভূত্যা শার্দূলকৃত্ত্যা পরিধানবন্তম্ |
আলোকযে কঞ্চন দেশিকেন্দ্রমজ্ঞানবারাকরবাডবাগ্নিম্ || ১০||
চারুস্মিত সোমকলাবতংসং বীণাধরং ব্যক্তজটাকলাপম্ |
উপাসতে কেচন যোগিনস্ত্বামুপাত্তনাদানুভবপ্রমোদম্ || ১১||
উপাসতে যং মুনযঃ শুকাদ্যা নিরাশিষো নির্মমতাধিবাসাঃ |
তং দক্ষিণামূর্তিতনুং মহেশমুপাস্মহে মোহমহার্তিশান্ত্যৈ || ১২||
কান্ত্যা নিন্দিতকুন্দকন্দলবপুর্ন্যগ্রোধমূলে বস –
     ন্কারুণ্যামৃতবারিভির্মুনিজনং সংভাবযন্বীক্ষিতৈঃ |
মোহধ্বান্তবিভেদনং বিরচযন্বোধেন তত্তাদৃশা
     দেবস্তত্ত্বমসীতি বোধযতু মাং মুদ্রাবতা পাণিনা || ১৩||
অগৌরগাত্রৈরললাটনেত্রৈরশান্তবেষৈরভুজঙ্গভূষৈঃ |
অবোধমুদ্রৈরনপাস্তনিদ্রৈর্পূর্ণকামৈরমরেরলং নঃ || ১৪||
দৈবতানি কতি সন্তি চাবনৌ নৈব তানি মনসো মতানি মে |
দীক্ষিতং জডধিযামনুগ্রহে দক্ষিণাভিমুখমেব দৈবতম্ || ১৫||
মুদিতায মুগ্ধশশিনাবতংসিনে ভসিতাবলেপরমণীযমূর্তযে |
জগদীন্দ্রজালরচনাপটিযসে মহসে নমোঽস্তু বটমূলবাসিনে || ১৬||
ব্যালম্বিনীভিঃ পরিতো জটাভিঃ কলাবশেষেণ কলাধরেণ |
পশ্যল্ললাটেন মুখেন্দুনা চ প্রকাশসে চেতসি নির্মলানাম্ || ১৭||
উপাসকানাং ত্বমুমাসহাযঃ পূর্ণেন্দুভাবং প্রকটীকরোষি |
উঅদদ্য তে দর্শনমাত্রতো মে দ্রবত্যহো মানসচন্দ্রকান্তঃ || ১৮||
যস্তে প্রসন্নামনুসন্দধানো মূর্তিং মুদা মুগ্ধশ্শাঙ্কমৌলেঃ |
ঐশ্বর্যমাযুর্লভতে চ বিদ্যামন্তে চ বেদান্তমহারহস্যম্ || ১৯||
|| দক্ষিণামূর্তিস্তোত্রং ২ সংপূর্ণম্||