শিবাপরাধ ক্ষমাপন স্তোত্র

 .. শিবাপরাধ ক্ষমাপন স্তোত্র ..

       শিবাপরাধক্ষমাপণ  স্তোত্রম্

আদৌ কর্মপ্রসঙ্গাত্কলযতি কলুষং মাতৃকুক্ষৌ স্থিতং মাং
বিণ্মূত্রামেধ্যমধ্যে কথযতি নিতরাং জাঠরো জাতবেদাঃ .
যদ্যদ্বৈ তত্র দুঃখং ব্যথযতি নিতরাং শক্যতে কেন বক্তুং
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ১..

বাল্যে দুঃখাতিরেকো মললুলিতবপুঃ স্তন্যপানে পিপাসা
নো শক্তশ্চেন্দ্রিযেভ্যো ভবগুণজনিতাঃ জন্তবো মাং তুদন্তি .
নানারোগাদিদুঃখাদ্রুদনপরবশঃ শঙ্করং ন স্মরামি
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ২..

প্রৌঢোঽহং যৌবনস্থো বিষযবিষধরৈঃ পঞ্চভির্মর্মসন্ধৌ
দষ্টো নষ্টোঽবিবেকঃ সুতধনযুবতিস্বাদুসৌখ্যে নিষণ্ণঃ .
শৈবীচিন্তাবিহীনং মম হৃদযমহো মানগর্বাধিরূঢং
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৩..

বার্ধক্যে চেন্দ্রিযাণাং বিগতগতিমতিশ্চাধিদৈবাদিতাপৈঃ
পাপৈ রোগৈর্বিযোগৈস্ত্বনবসিতবপুঃ প্রৌঢহীনং চ দীনম্ .
মিথ্যামোহাভিলাষৈর্ভ্রমতি মম মনো ধূর্জটের্ধ্যানশূন্যং
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৪..

নো শক্যং স্মার্তকর্ম প্রতিপদগহনপ্রত্যবাযাকুলাখ্যং
শ্রৌতে বার্তা কথং মে দ্বিজকুলবিহিতে ব্রহ্মমার্গেঽসুসারে .
জ্ঞাতো ধর্মো বিচারৈঃ শ্রবণমননযোঃ কিং নিদিধ্যাসিতব্যং
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৫..

স্নাত্বা প্রত্যূষকালে স্নপনবিধিবিধৌ নাহৃতং গাঙ্গতোযং
পূজার্থং বা কদাচিদ্বহুতরগহনাত্খণ্ডবিল্বীদলানি .
নানীতা পদ্মমালা সরসি বিকসিতা গন্ধধূপৈঃ ত্বদর্থং
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৬..

দুগ্ধৈর্মধ্বাজ্যুতৈর্দধিসিতসহিতৈঃ স্নাপিতং নৈব লিঙ্গং
নো লিপ্তং চন্দনাদ্যৈঃ কনকবিরচিতৈঃ পূজিতং ন প্রসূনৈঃ .
ধূপৈঃ কর্পূরদীপৈর্বিবিধরসযুতৈর্নৈব ভক্ষ্যোপহারৈঃ
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৭..

ধ্যাত্বা চিত্তে শিবাখ্যং প্রচুরতরধনং নৈব দত্তং দ্বিজেভ্যো
হব্যং তে লক্ষসঙ্খ্যৈর্হুতবহবদনে নার্পিতং বীজমন্ত্রৈঃ .
নো তপ্তং গাঙ্গাতীরে ব্রতজননিযমৈঃ রুদ্রজাপ্যৈর্ন বেদৈঃ
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৮..

স্থিত্বা স্থানে সরোজে প্রণবমযমরুত্কুম্ভকে (কুণ্ডলে)সূক্ষ্মমার্গে
শান্তে স্বান্তে প্রলীনে প্রকটিতবিভবে জ্যোতিরূপেঽপরাখ্যে .
লিঙ্গজ্ঞে ব্রহ্মবাক্যে সকলতনুগতং শঙ্করং ন স্মরামি
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ৯..

নগ্নো নিঃসঙ্গশুদ্ধস্ত্রিগুণবিরহিতো ধ্বস্তমোহান্ধকারো
নাসাগ্রে ন্যস্তদৃষ্টির্বিদিতভবগুণো নৈব দৃষ্টঃ কদাচিত্ .
উন্মন্যাঽবস্থযা ত্বাং বিগতকলিমলং শঙ্করং ন স্মরামি
ক্ষন্তব্যো মেঽপরাধঃ শিব শিব শিব ভো শ্রী মহাদেব শম্ভো .. ১০..

চন্দ্রোদ্ভাসিতশেখরে স্মরহরে গঙ্গাধরে শঙ্করে
সর্পৈর্ভূষিতকণ্ঠকর্ণযুগলে (বিবরে)নেত্রোত্থবৈশ্বানরে .
দন্তিত্বক্কৃতসুন্দরাম্বরধরে ত্রৈলোক্যসারে হরে
মোক্ষার্থং কুরু চিত্তবৃত্তিমচলামন্যৈস্তু কিং কর্মভিঃ .. ১১..

কিং বাঽনেন ধনেন বাজিকরিভিঃ প্রাপ্তেন রাজ্যেন কিং
কিং বা পুত্রকলত্রমিত্রপশুভির্দেহেন গেহেন কিম্ .
জ্ঞাত্বৈতত্ক্ষণভঙ্গুরং সপদি রে ত্যাজ্যং মনো দূরতঃ
স্বাত্মার্থং গুরুবাক্যতো ভজ মন শ্রীপার্বতীবল্লভম্ .. ১২..

আযুর্নশ্যতি পশ্যতাং প্রতিদিনং যাতি ক্ষযং যৌবনং
প্রত্যাযান্তি গতাঃ পুনর্ন দিবসাঃ কালো জগদ্ভক্ষকঃ .
লক্ষ্মীস্তোযতরঙ্গভঙ্গচপলা বিদ্যুচ্চলং জীবিতং
তস্মাত্ত্বাং (মাং)শরণাগতং শরণদ ত্বং রক্ষ রক্ষাধুনা .. ১৩..

বন্দে দেবমুমাপতিং সুরগুরুং বন্দে জগত্কারণং
বন্দে পন্নগভূষণং মৃগধরং বন্দে পশূনাং পতিম্ .
বন্দে সূর্যশশাঙ্কবহ্নিনযনং বন্দে মুকুন্দপ্রিযং
বন্দে ভক্তজনাশ্রযং চ বরদং বন্দে শিবং শঙ্করম্ ..১৪..

গাত্রং ভস্মসিতং চ হসিতং হস্তে কপালং সিতং
খট্বাঙ্গং চ সিতং সিতশ্চ বৃষভঃ কর্ণে সিতে কুণ্ডলে .
গঙ্গাফেনসিতা জটা পশুপতেশ্চন্দ্রঃ সিতো মূর্ধনি
সোঽযং সর্বসিতো দদাতু বিভবং পাপক্ষযং সর্বদা .. ১৫..

করচরণকৃতং বাক্কাযজং কর্মজং বা
শ্রবণনযনজং বা মানসং বাঽপরাধম্ .
বিহিতমবিহিতং বা সর্বমেতত্ক্ষ্মস্ব
শিব শিব করুণাব্ধে শ্রী মহাদেব শম্ভো .. ১৬..

.. ইতি শ্রীমদ্ শঙ্করাচার্যকৃত শিবাপরাধক্ষমাপণ স্তোত্রং সংপূর্ণম্ ..