শিবমীডেস্তবরত্নম্

.. শিবমীডেস্তবরত্নম্ ..
স্বপ্রকাশশিবরূপসদ্গুরুং নিষ্প্রকাশজডচৈত্যভাসকম্ .
অপ্রমেযসুগুণামৃতালযং সংস্মরামি হৃদি নিত্যমদ্ভুতম্ .. ১..
যঃ ক্রীডার্থং বিশ্বমশেষং নিজশক্ত্যা
সৃষ্ট্বা স্বস্মিন্ ক্রীডতি দেবোঽপ্যনবদ্যঃ .
নিস্ত্রৈগুণ্যো মাযিকভূমিব্যতিরিক্তঃ
তং সর্বাঘধ্বংসকমাদ্যং শিবমীডে .. ২..
একো দেবো ভাতি তরঙ্গেষ্বিব ভানুঃ
নানাভূতেষ্বাত্মসু সর্বেষ্বপি নিত্যম্ .
শুদ্ধো বুদ্ধো নির্মলরূপো নিরবদ্যঃ
তং সর্বাঘধ্বংসকমাদ্যং শিবমীডে .. ৩..
দেবাধীশং সর্ববরেণ্যং হৃদযাব্জে
নিত্যং ধ্যাত্বা যোগিবরা যং দৃঢভক্ত্যা .
শুদ্ধা ভূত্বা যান্তি ভবাব্ধিং ন পুনস্তে
তং সর্বাঘধ্বংসকমাদ্যং শিবমীডে .. ৪..
শ্রৌতৈঃ স্মার্তৈঃ কর্মশতৈশ্চপি য ঈশো
দুর্বিজ্ঞেযঃ কল্পশতং তৈর্জডরূপৈঃ .
সংবিদ্রূপস্বৈকবিচারাদধিগম্যঃ
তং সর্বাঘধ্বংসকমাদ্যং শিবমীডে .. ৫..
কর্মাধ্যক্ষঃ কামিজনানাং ফলদাতা
কর্তৃত্বাহংকারবিমুক্তো নিরপেক্ষঃ .
দেহাতীতো দৃশ্যবিবিক্তো জগদীশঃ
তং সর্বাঘধ্বংসকমাদ্যং শিবমীডে .. ৬..
নান্তর্বাহ্যে নোভযতো বা প্রবিভক্তং
যং সর্বজ্ঞং নাপি সমর্থো নিগমাদিঃ .
তত্ত্বাতীতং তত্পদলক্ষ্যং গুরুগম্যং
তং সর্বাঘধ্বংসকমাদ্যং শিবমীডে .. ৭..
যদ্ভাসার্কো ভাতি হিমাংশুর্দহনো বা
দৃশ্যৈর্ভাস্যৈর্যো ন চ ভাতি প্রিযরূপঃ .
যস্মাদ্ ভাতি ব্যষ্টিসমষ্ট্যাত্মকমেতত্
তং সর্বাঘধ্বংসকমাদ্যং শিবমীডে .. ৮..
আশাদেশাদ্যব্যবধানো বিভুরেকঃ
সর্বাধারঃ সর্বনিযন্তা পরমাত্মা .
পূর্ণানন্দঃ সত্ত্ববতাং যো হৃদি দেবঃ
তং সর্বাঘধ্বংসকমাদ্যং শিবমীডে .. ৯..
কোঽহং দেবঃ কিং জগদেতত্ প্রবিচারাদ্
দৃশ্যং সর্বং নশ্বররূপং গুরুবাক্যাত্ .
সিদ্ধে চৈবং যঃ খলু শেষঃ প্রতিপন্নঃ
তং সর্বাঘধ্বংসকমাদ্যং শিবমীডে .. ১০..
সত্যং জ্ঞানং ব্রহ্ম সুখং যং প্রণবান্তং
সর্বস্ফূর্তিঃ শাশ্বতরূপস্ত্বিতি বেদঃ .
জল্পন্ত্যেবং স্বচ্ছধিযোঽপি প্রভুমেকং
তং সর্বাঘধ্বংসকমাদ্যং শিবমীডে .. ১১..
যস্মাদ্ ভীতো বাতি চ বাযুস্ত্রিপুরেষু
ব্রহ্মেন্দ্রাদ্যাস্তে নিজকর্মস্বনুবদ্ধাঃ .
চন্দ্রাদিত্যৌ লোকসমূহে প্রচরন্তৌ
তং সর্বাঘধ্বংসকমাদ্যং শিবমীডে .. ১২..
মাযাকার্যং জন্ম চ নাশঃ পুরজেতুঃ
নাস্তি দ্বন্দ্বং নাম চ রূপং শ্রুতিবাক্যাত্ .
নির্ণীতার্থো নিত্যবিমুক্তো নিরপাযঃ
তং সর্বাঘধ্বংসকমাদ্যং শিবমীডে .. ১৩..
নাযং দেহো নেন্দ্রিযবর্গো ন চ বাযুঃ
নেদং দৃশ্যং জাত্যভিমানো ন চ বুদ্ধিঃ .
ইত্থং শ্রুত্যা যো গুরুবাক্যাত্ প্রতিলব্ধঃ
তং সর্বাঘধ্বংসকমাদ্যং শিবমীডে .. ১৪..
স্থূলং সূক্ষ্মং ক্ষামমনেকং ন চ দীর্ঘং
হ্রস্বং শুক্লং কৃষ্ণমখণ্ডোঽব্যযরূপঃ .
প্রত্যক্সাক্ষী যঃ পরতেজাঃ প্রণবান্তঃ
তং সর্বাঘধ্বংসকমাদ্যং শিবমীডে .. ১৫..
যত্সৌখ্যাব্ধের্লেশকণাংশোঃ সুরমর্ত্যা-
স্তির্যঞ্চোঽপি স্থাবরভেদাঃ প্রভবন্তি .
তত্তত্কার্যপ্রাভববন্তঃ সুখিনস্তে
তং সর্বাঘধ্বংসকমাদ্যং শিবমীডে .. ১৬..
যস্মিঞ্জ্ঞাতে জ্ঞাতমশেষং ভুবনং স্যাদ্
যস্মিন্ দৃষ্টে ভেদসমূহো লযমেতি .
যস্মিন্মৃত্যুর্নাস্তি চ শোকো ভবপাশাঃ
তং সর্বাঘধ্বংসকমাদ্যং শিবমীডে .. ১৭..
দ্যাং মূর্ধানং যস্য বদন্তি শ্রুতযস্তাঃ
চন্দ্রাদিত্যৌ নেত্রযুগং জ্যাং পদযুগ্মম্ .
আশাং শ্রোত্রং লোমসমূহং তরুবল্লীঃ
তং সর্বাঘধ্বংসকমাদ্যং শিবমীডে .. ১৮..
প্রাণাযামৈঃ পূতধিযো যং প্রণবান্তং
সংধাযাত্মন্যব্যপদেশ্যং নিজবোধম্ .
জীবন্মুক্তাঃ সন্তি দিশাসু প্রচরন্তঃ
তং সর্বাঘধ্বংসকমাদ্যং শিবমীডে .. ১৯..
যচ্ছ্রোতব্যং শ্রৌতগিরা শ্রীগুরুবাক্যাদ্
যন্মন্তব্যং স্বাত্মসুখার্থং পুরুষাণাম্ .
যদ্ ধ্যাতব্যং সত্যমখণ্ডং নিরবদ্যং
তং সর্বাঘধ্বংসকমাদ্যং শিবমীডে .. ২০..
যং জিজ্ঞাসুঃ সদ্গুরুমূর্তিং দ্বিজবর্যং
নিত্যানন্দং তং ফলপাণিঃ সমুপৈতি .
ভক্তিশ্রদ্ধাদান্তিবিশিষ্টো ধৃতিযুক্তঃ
তং সর্বাঘধ্বংসকমাদ্যং শিবমীডে .. ২১..
পৃথব্যম্ববগ্নিস্পর্শনখানি প্রবিলাপ্য
স্বস্মিন্ মত্যা ধারনযা বা প্রণবেন .
যচ্ছিষ্টং তদ্ ব্রহ্ম ভবামীত্যনুভূতং
তং সর্বাঘধ্বংসকমাদ্যং শিবমীডে .. ২২..
লীনে চিত্তে ভাতি চ একো নিখিলেষু
প্রত্যগ্দৃষ্ট্যা স্থাবরজন্তুষ্বপি নিত্যম্ .
সত্যাসত্যে সত্যমভূচ্চ ব্যতিরেকাত্
তং সর্বাঘধ্বংসকমাদ্যং শিবমীডে .. ২৩..
চেতঃসাক্ষী প্রত্যগভিন্নো বিভুরেকঃ
প্রজ্ঞানাত্মা বিশ্বভুগাদিব্যতিরিক্তঃ .
সত্যজ্ঞানানন্দসুধাব্ধিঃ পরিপূর্ণঃ
তং সর্বাঘধ্বংসকমাদ্যং শিবমীডে .. ২৪..
সর্বে কামা যস্য বিলীনা হৃদি সংস্থাঃ
তস্যোদেতি ব্রহ্মরবির্যো হৃদি তত্র .
বিদ্যাবিদ্যা নাস্তি পরে চ শ্রুতিবাক্যাত্
তং সর্বাঘধ্বংসকমাদ্যং শিবমীডে .. ২৫..
স ত্যাগেশঃ সর্বগুহান্তঃ পরিপূর্ণো
বক্তা শ্রোতা বেদপুরাণপ্রতিপাদ্যঃ .
ইত্থং বুদ্ধৌ জ্ঞানমখণ্ডং স্ফুরদাস্তে
তং সর্বাঘধ্বংসকমাদ্যং শিবমীডে .. ২৬..
নিত্যং ভক্ত্যা যঃ পঠতীদং স্তবরত্নং
তস্যাবিদ্যা জন্ম চ নাশো লযমেতু .
কিং চাত্মনং পশ্যতু সত্যং নিজবোধং
সর্বান্ কামান্ স্বং লভতাং স প্রিযরূপম্ .. ২৭..
ইত্যানন্দনাথপাদপপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতং শিবমীডেস্তবরত্নং সংপূর্ণম্ ..