মৃত্যুঞ্জযমানসিকপূজাস্তোত্রম্

 .. শ্রীমৃত্যুঞ্জযমানসিকপূজাস্তোত্রম্ ..

কৈলাসে কমনীযরত্নখচিতে কল্পদ্রুমূলে স্থিতং
কর্পূরস্ফটিকেন্দুসুন্দরতনুং কাত্যাযনীসেবিতম্ .
গঙ্গাতুঙ্গতরঙ্গরঞ্জিতজটাভারং কৃপাসাগরং
কণ্ঠালংকৃতশেষভূষণমমুং মৃত্যুঞ্জযং ভাবযে .. ১..

আগত্য মৃত্যুঞ্জয চন্দ্রমৌলে
ব্যাঘ্রাজিনালংকৃত শূলপাণে .
স্বভক্তসংরক্ষণকামধেনো
প্রসীদ বিশ্বেশ্বর পার্বতীশ .. ২..

ভাস্বন্মৌক্তিকতোরণে মরকতস্তম্ভাযুধালংকৃতে
সৌধে ধূপসুবাসিনে মণিমযে মাণিক্যদীপাঞ্চিতে .
ব্রহ্মেন্দ্রামরযোগিপুঙ্গবগণৈর্যুক্তে চ কল্পদ্রুমৈঃ
শ্রীমৃত্যুঞ্জয সুস্থিরো ভব বিভো মাণিক্যসিংহাসনে .. ৩..

মন্দারমল্লীকরবীরমাধবী-
পুন্নাগনীলোত্পলচম্পকান্বিতৈঃ .
কর্পূরপাটীরসুবাসিতৈর্জলৈ-
রাধত্স্ব মৃত্যুঞ্জয পাদ্যমুত্তমম্ .. ৪..

সুগন্ধপুষ্পপ্রকরৈঃ সুবাসিতৈ-
র্বিযন্নদীশীতলবারিভিঃ শুভৈঃ .
ত্রিলোকনাথার্তিহরার্ঘ্যমাদরা-
দ্গৃহাণ মৃত্যুঞ্জয সর্ববন্দিত .. ৫..

হিমাম্বুবাসিতৈস্তোযৈঃ শীতলৈরতিপাবনৈঃ .
মৃত্যুঞ্জয মহাদেব শুদ্ধাচমনমাচর .. ৬..

গুডদধিসহিতং মধুপ্রকীর্ণং
সুঘৃতসমন্বিতধেনুদুগ্ধযুক্তম্ .
শুভকরমধুপর্কমাহর ত্বং
ত্রিনযন মৃত্যুহর ত্রিলোকবন্দ্য .. ৭..

পঞ্চাস্র শান্ত পঞ্চাস্য পঞ্চপাতকসংহর .
পঞ্চামৃতস্নানমিদং কুরু মৃত্যুঞ্জয প্রভো .. ৮..

জগত্রযীখ্যাত সমস্ততীর্থ-
সমাহৃতৈঃ কল্মষহারিভিশ্চ .
স্নানং সুতোযৈঃ সমুদাচর ত্বং
মৃত্যুঞ্জযানন্দগুণাঅভিরাম .. ৯..

আনীতেনাতিশুভ্রেণ কৌশেযেনামরদ্রুমাত্ .
মার্জযামি জটাভারং শিব মৃত্যুঞ্জয প্রভো .. ১০..

নানাহেমবিচিত্রাণি চীরচীনাম্বরাণি চ .
বিবিধানি চ দিব্যানি মৃত্যুঞ্জয সুধারয .. ১১..

বিশিদ্ধমুক্তাফলজালরম্যং
মনোহরং কাঞ্চনহেমসূত্রম্ .
যজ্ঞ্নোপবীতং পরমং পবিত্র-
মাধত্স্ব মৃত্যুঞ্জয ভক্তিগম্য .. ১২..

শ্রীগন্ধং ঘনসারকুঙ্কুমযুতং কস্তূরিকাপূরিতং
কালেযেন হিমাম্বুনা বিরচিত্তং মন্দারসংবাসিতম্ .
দিব্যং দেবমনোহরং মণিমযে পাত্রে সমারোপিতং
সর্বাঙ্গেষু বিলেপযামি সততং মৃত্যুঞ্জয শ্রীবিভো .. ১৩..

অক্ষতৈর্ধবলৈর্দিব্যৈঃ সম্যক্তিলসমন্বিতৈঃ .
মৃত্যুঞ্জয মহাদেব পূজযামি বৃষধ্বজ .. ১৪..

চম্পকপঙ্কজকুন্দৈঃ
করবীরমল্লিকাকুসুমৈঃ .
বিস্তারয নিজমকুটং
মৃত্যুঞ্জয পুণ্ডরীকনযনাপ্ত .. ১৫..

মাণিক্যপাদুকাদ্বন্দ্বে মৌনিহৃত্পদ্মমন্দিরে .
পাদৌ সদ্পদ্মসদৃশৌ মৃত্যুঞ্জয নিবেশয .. ১৬..

মাণিক্যকেযূরকিরীটহারৈঃ
কাঞ্চীমণিস্থাপিতকুদ্মলৈশ্চ .
মঞ্জীরমুখ্যাভরণৈর্মনোজ্ঞৈ-
রঙ্গানি মৃত্যুঞ্জয ভূষযামি .. ১৭..

গজবদনস্কন্দধৃতে-
নাতিস্বচ্ছেন চামরযুগেন .
গলদলকাননপদ্মং
মৃত্যুঞ্জয ভাবযামি হৃত্পদ্মে .. ১৮..

মুক্তাতপত্রং শশিকোটিশুভ্রং
শুভপ্রদং কাঞ্জনদণ্ডযুক্তম্ .
মাণিক্যসংস্থাপিতহেমকুম্ভং
সুরেশ মৃত্যুঞ্জয তেঽর্পযামি .. ১৯..

মণিমুকুরে নিষ্পটলে
ত্রিজগদ্গাঢান্ধকারসপ্তাশ্বে .
কন্দর্পকোটীসদৃশং
মৃত্যুঞ্জয পশ্য বদনমাত্মীযম্ .. ২০..

কর্পূরচূর্ণং কপিলাজ্যপূতং
দাস্যামি কালেযসমান্বিতৈশ্চ .
সমুদ্ভবং পাবনগন্ধধূপিতং
মৃত্যুঞ্জযাঙ্গং পরিকল্পযামি .. ২১..

বর্তিত্রযোপেতমখণ্ডদীপ্ত্যা
তমোহরং ব্রাহ্মমথান্তরং চ .
সাজ্যং সমস্তামরবর্গহৃদ্যং
সুরেশা  মৃত্যুঞ্জয বংশদীপম্ .. ২২..

রাজান্নং মধুরান্বিতং চ মৃদুলং মাণিক্যপাত্রে স্থিতং
হিঙ্গূজীরকসন্মরীচমিলিতৈঃ শাকৈরনেকৈঃ শুভৈঃ .
শাকং সম্যগপূপসূপসহিতং সদ্যোঘৃতেনাপ্লুতং
শ্রীমৃত্যুঞ্জয পার্বতীপ্রিয বিভো সাপোশনং ভুজ্যতাম্ .. ২৩..

কূষ্মাণ্ডবার্তাকপটোলিকানাং
ফলানি রম্যাণি চ কারবল্ল্যা .
সুপাকযুক্তানি সসৌরভাণি
শ্রীকণ্ঠ মৃত্যুঞ্জয ভক্ষযেশ .. ২৪..

শীতলং মধুরং স্বচ্ছং পাবনং বাসিতং লঘু .
মধ্যে স্বীকুরু পানীযং শিব মৃত্যুঞ্জয প্রভো .. ২৫..

শর্করামিলিতং স্নিগ্ধং দুগ্ধান্নং গোধৃতান্বিতম্ .
কদলীফলসংমিশ্রং ভুজ্যতাং মৃত্যুসংহর .. ২৬..

কেবলমতিমাধুর্যং
দুগ্ধৈঃ স্নিগ্ধৈশ্চ শর্করামিলিতৈঃ .
এলামরীচমিলিতং
মৃত্যুঞ্জয দেব ভুঙ্ক্ষ্ব পরমান্নম্ .. ২৭..

রম্ভাচূতকপিত্থকণ্ঠকফলৈর্দ্রাক্ষারসাস্বাদুম-
ত্খর্জূরৈর্মধুরেক্ষুখণ্ডশকলৈঃ সন্নারিকেলাম্বুভিঃ .
কর্পূরেণ সুবাসিতৈর্গুডজলৈর্মাধুর্যযুক্তৈর্বিভো
শ্রীমৃত্যুঞ্জয পূরয ত্রিভুবনাধারং বিশালোদরম্ .. ২৮..

মনোজ্ঞরম্ভাবনখণ্ডখণ্ডিতা-
ন্রুচিপ্রদান্সর্ষপজীরকাংশ্চ .
সসৌরভান্সৈন্ধবসেবিতাংশ্চ
গৃহাণ মৃত্যুঞ্জয লোকবন্দ্য .. ২৯..

হিঙ্গূজীরকসহিতং
বিমলামলকং কপিত্থমতিমধুরম্ .
বিসখণ্ডাল্লাবণ্যযুতা-
ন্মৃত্যুঞ্জয তেঽর্পযামি জগদীশ .. ৩০..

এলাশুণ্ঠীসহিতং
দধ্যন্নং চারুহেমপাত্রস্থম্ .
অমৃতপ্রতিনিধিমাঢ্যং
মৃত্যুঞ্জয ভুজ্যতাং ত্রিলোকেশ .. ৩১..

জম্বীরনীরাঞ্চিতশৃঙ্গবেরং
মনোহরানম্লশলাটুখণ্ডান্ .
মৃদূপদংশান্সহিতোপভুঙ্ক্ষ্ব
মৃত্যুঞয শ্রীকরুণাসমুদ্র .. ৩২..

নাগররামঠযুক্তং
সুললিতজম্বীরনীরসংপূর্ণম্ .
মথিতং সৈন্দবসহিতং
পিব হর মৃত্যুঞ্জয ক্রতুধ্বংসিন্ .. ৩৩..

মন্দারহেমাম্বুজগন্ধযুক্তৈ-
র্মন্দাকিনীনির্মলপুণ্যতোযৈঃ .
গৃহাণ মৃত্যুঞ্জয পূর্ণকাম
শ্রীমত্পরাপোশনমভ্রকেশ .. ৩৪..

গগনধুনীবিমলজলৈ-
র্মৃত্যুঞ্জয পদ্মরাগপাত্রগতৈঃ .
মৃগমদচন্দনপূর্ণং
প্রক্ষালয চারু হস্তপাদযুগ্মম্ .. ৩৫..

পুন্নাগমল্লিকাকুন্দবাসিতৈর্জাহ্নবীজলৈঃ .
মৃত্যুঞ্জয মহাদেব পুনরাচমনং কুরু .. ৩৬..

মৌক্তিকচূর্ণসমেতৈ-
র্মৃগমদঘনসারবাসিতৈঃ পূগৈঃ .
পর্ণৈঃ স্বর্ণসমানৈ-
র্মৃত্যুঞ্জয তেঽর্পযামি তাম্বূলম্ .. ৩৭..

নীরাজনং নির্মলদীপ্ত্মাদ্ভি-
র্দীপাঙ্কুরৈরুজ্জ্বলমুচ্ছ্রিতৈশ্চ .
ঘণ্টানিনাদেন সমর্পযামি
মৃত্যুঞ্জযায ত্রিপুরান্তকায .. ৩৮..

বিরিঞ্চিমুখ্যামরবৃন্দবন্দিতে
সরোজমত্স্যাঙ্কিতচক্রচিহ্নিতে .
দদামি মৃত্যুঞ্জয পাদপঙ্কজে
ফণীন্দ্রভূষে পুনরর্ঘ্যমীশ্বর .. ৩৯..

পুন্নাগনীলোত্পলকুন্দজাতী-
মন্দারমল্লীকরবীরপঙ্কজৈঃ .
পুষ্পাঞ্জলিং বিল্বদলৈস্তুলস্যা
মৃত্যুঞ্জযাঙ্ঘ্রৌ বিনিবেশযামি .. ৪০..

পদে পদে সর্বমনোনিকৃন্দনং
পদে পদে সর্বশুভপ্রদাযকম্ .
প্রদক্ষিণং ভক্তিযুতেন চেতসা
করোমি মৃত্যুঞ্জয রক্ষ রক্ষ মাম্ .. ৪১..

নমো গৌরীশায স্ফটিকধবলাঙ্গায চ নমো
নমো লোকেশায স্তুতিবিবুধলোকায চ নমঃ .
নমঃ শ্রীকণ্ঠায ক্ষপিতপুরদৈত্যায চ নমো
নমঃ ফালাক্ষায স্মরমদবিনাশায চ নমঃ .. ৪২..

সংসারে জনিতাপরোগসহিতে তপত্রযাক্রন্দিতে
নিত্যং পুত্রকলত্রবিত্তবিলসত্পাশৈর্নিবদ্ধং দৃঢম্ .
গর্বান্ধং বহুপাপবর্গসহিতং কারুণ্যদৃষ্ট্যা বিভো
শ্রীমৃত্যুঞ্জয পার্বতীপ্রিয সদা মাং পাহি সর্বেশ্বর .. ৪৩..

সৌধে রত্নমযে নবোত্পলদলাকীর্ণে চ তল্পান্তরে
কৌশেযেন মনোহরেণ ধবলেনাচ্ছাদিতে সর্বশঃ .
কর্পূরাঞ্চিতদীপদীপ্তিমিলিতে রম্যোপধানদ্বযে
পার্র্বত্যাঃ করপদ্মলালিতপদং মৃত্যুঞ্জযং ভাবযে .. ৪৪..

চতুশ্চত্বারিংশদ্বিলসদুপচারৈরভিমতৈ-
র্মনঃ পদ্মে ভক্ত্যা বহিরপি চ পূজাং শুভকরীম্ .
করোতি প্রত্যূষে নিশি দিবসমধ্যেঽপি চ পুমা-
ন্প্রযাতি শ্রীমৃত্যুঞ্জযপদমনেকাদ্ভুতপদম্ .. ৪৫..

প্রাতর্লিঙ্গমুমাপতেরহরহঃ সংদর্শনাত্স্বর্গতং
মধ্যাহ্নে হযমেধতুল্যফলদং সাযংতনে মোক্ষদম্ .
ভানোরস্তমনে প্রদোষসমযে পঞ্চাক্ষরারাধনং
তত্কালত্রযতুল্যমিষ্টফলদং সদ্যোঽনবদ্যং দৃঢম্ .. ৪৬..

.. ইতি শ্রীমচ্ছাঙ্করভগবতঃ কৃতৌ মৃত্যুঞ্জযমানসিকপূজাস্তোত্রং সংপূর্ণম্ ..