উমামহেশ্বরস্তোত্রম্

.. উমামহেশ্বরস্তোত্রম্ ..

শ্রী শঙ্করাচার্য কৃতম্ .

নমঃ শিবাভ্যাং নবযৌবনাভ্যাম্
পরস্পরাশ্লিষ্টবপুর্ধরাভ্যাম্ .
নাগেন্দ্রকন্যাবৃষকেতনাভ্যাম্
নমো নমঃ শঙ্করপার্বতীভ্যাম্ .. ১..
নমঃ শিবাভ্যাং সরসোত্সবাভ্যাম্
নমস্কৃতাভীষ্টবরপ্রদাভ্যাম্ .
নারাযণেনার্চিতপাদুকাভ্যাং
নমো নমঃ শঙ্করপার্বতীভ্যাম্ .. ২..
নমঃ শিবাভ্যাং বৃষবাহনাভ্যাম্
বিরিঞ্চিবিষ্ণ্বিন্দ্রসুপূজিতাভ্যাম্ .
বিভূতিপাটীরবিলেপনাভ্যাম্
নমো নমঃ শঙ্করপার্বতীভ্যাম্ .. ৩..
নমঃ শিবাভ্যাং জগদীশ্বরাভ্যাম্
জগত্পতিভ্যাং জযবিগ্রহাভ্যাম্ .
জম্ভারিমুখ্যৈরভিবন্দিতাভ্যাম্
নমো নমঃ শঙ্করপার্বতীভ্যাম্ .. ৪..
নমঃ শিবাভ্যাং পরমৌষধাভ্যাম্
পঞ্চাক্ষরী পঞ্জররঞ্জিতাভ্যাম্ .
প্রপঞ্চসৃষ্টিস্থিতি সংহৃতাভ্যাম্
নমো নমঃ শঙ্করপার্বতীভ্যাম্ .. ৫..
নমঃ শিবাভ্যামতিসুন্দরাভ্যাম্
অত্যন্তমাসক্তহৃদম্বুজাভ্যাম্ .
অশেষলোকৈকহিতঙ্করাভ্যাম্
নমো নমঃ শঙ্করপার্বতীভ্যাম্ .. ৬..
নমঃ শিবাভ্যাং কলিনাশনাভ্যাম্
কঙ্কালকল্যাণবপুর্ধরাভ্যাম্ .
কৈলাসশৈলস্থিতদেবতাভ্যাম্
নমো নমঃ শঙ্করপার্বতীভ্যাম্ .. ৭..
নমঃ শিবাভ্যামশুভাপহাভ্যাম্
অশেষলোকৈকবিশেষিতাভ্যাম্ .
অকুণ্ঠিতাভ্যাম্ স্মৃতিসংভৃতাভ্যাম্
নমো নমঃ শঙ্করপার্বতীভ্যাম্ .. ৮..
নমঃ শিবাভ্যাং রথবাহনাভ্যাম্
রবীন্দুবৈশ্বানরলোচনাভ্যাম্ .
রাকাশশাঙ্কাভমুখাম্বুজাভ্যাম্
নমো নমঃ শঙ্করপার্বতীভ্যাম্ .. ৯..
নমঃ শিবাভ্যাং জটিলন্ধরভ্যাম্
জরামৃতিভ্যাং চ বিবর্জিতাভ্যাম্ .
জনার্দনাব্জোদ্ভবপূজিতাভ্যাম্
নমো নমঃ শঙ্করপার্বতীভ্যাম্ .. ১০..
নমঃ শিবাভ্যাং বিষমেক্ষণাভ্যাম্
বিল্বচ্ছদামল্লিকদামভৃদ্ভ্যাম্ .
শোভাবতী শান্তবতীশ্বরাভ্যাম্
নমো নমঃ শঙ্করপার্বতীভ্যাম্ .. ১১..
নমঃ শিবাভ্যাং পশুপালকাভ্যাম্
জগত্রযীরক্ষণ বদ্ধহৃদ্ভ্যাম্ .
সমস্ত দেবাসুরপূজিতাভ্যাম্
নমো নমঃ শঙ্করপার্বতীভ্যাম্ .. ১২..
স্তোত্রং ত্রিসন্ধ্যং শিবপার্বতীভ্যাম্
ভক্ত্যা পঠেদ্দ্বাদশকং নরো যঃ .
স সর্বসৌভাগ্য ফলানি ভুঙ্ক্তে
শতাযুরান্তে শিবলোকমেতি .. ১৩..
ইতি উমামহেশ্বরস্তোত্রং সম্পূর্ণম্ ..