শ্রুতিগীতা

.. শ্রুতিগীতা ..

শ্রুতযঃ ঊচুঃ .
জয জয জহ্যজামজিত দোষগৃভীতগুণাং ত্বমসি যদাত্মনা সমবরুদ্ধসমস্তভগঃ .
অগজগদোকসামখিলশক্ত্যববোধক তে ক্বচিদজযাত্মনা চ চরতোঽনুচরেন্নিগমঃ .. ১৪..
বৃহদুপলব্ধমেতদবযন্ত্যবশেষতযা যত উদযাস্তমযৌ বিকৃতের্মৃদি বাঽবিকৃতাত্ .
অত ঋষযো দধুস্ত্বযি মনোবচনাচরিতং কথমযথা ভবন্তি ভুবি দত্তপদানি নৃণাম্ .. ১৫..
ইতি তব সূরযস্ত্র্যধিপতেঽখিললোকমলক্ষণপণকথামৃতাব্ধিমবগাহ্য তপাংসি জহুঃ .
কিমুত পুনঃ স্বধামবিধুতাশযকালগুণাঃ পরম ভজন্তি যে পদমজস্রসুখানুভবম্ .. ১৬..
দৃতয ইব শ্বসন্ত্যসুভৃতো যদি তেঽনুবিধা মহদমাযোঽণ্ডমসৃজন্যদনুগ্রহতঃ .
পুরুষবিধোঽন্বযোঽত্র চরমোঽন্নমযাদিষু যঃ সদসতঃ পরং ত্বমথ যদেষ্ববশেষমৃতম্ .. ১৭..
উদরমুপাসতে য ঋষিবর্ত্মসু কূর্পদৃশঃ পরিসরপদ্ধতিং হৃদযমারুণযো দহরম্ .
তত উদগাদনন্ত তব ধাম শিরঃ পরমং পুনরিহ যত্সমেত্য ন পতন্তি কৃতান্তমুখে .. ১৮..
স্বকৃতবিচিত্রযোনিষু বিশন্নিব হেতুতযা তরতমতশ্চকাস্স্যনলবত্স্বকৃতানুকৃতিঃ .
অথ বিতথাস্বমূষ্ববিতথং তব ধাম সমং বিরজধিযোঽন্বযন্ত্যভিবিপণ্যব একরসম্ .. ১৯..
স্বকৃতপুরেষ্বমিষ্ববহিরন্তরসংবরণং তব পুরুষং বদন্ত্যখিলশক্তিধৃতোংঽশকৃতম্ .
ইতি নৃগতিং বিবিচ্য কবযো নিগমাপবনং ভবত উপাসতেঽঙ্ঘ্রিমভবং ভুবি বিশ্বসিতাঃ .. ২০..
দুরবগমাত্মতত্ত্বনিগমায তবাত্ততনোশ্চরিতমহামৃতাব্ধিপরিবর্তপরিশ্রমণাঃ .
ন পরিলষন্তি কেচিদপবর্গমপীশ্বর তে চরণসরোজহংসকুলসঙ্গবিসৃষ্টগৃহাঃ .. ২১..
ত্বদনুপথং কুলাযমিদমাত্মসুহৃত্প্রিযবচ্চরতি তথোন্মুখে ত্বযি হিতে প্রিয আত্মনি চ .
ন বত রমন্ত্যহো অসদুপাসনযাত্মহনো যদনুশযা ভ্রমন্ত্যুরুভযে কুশরীরভৃতঃ .. ২২..
নিভৃতমরুন্মনোক্ষদৃঢযোগযুজো হৃদি যন্মুনয উপাসতে তদরযোঽপি যযুঃ স্মরণাত্ .
স্ত্রিয উরগেন্দ্রভোগভুজদণ্ডবিষক্তধিযো বযমপি তে সমাং সমদৃধোঽঙ্ঘ্রিসরোজসুধাঃ .. ২৩..
ক ইহ নু বেদ বতবরজন্মলযোঽগ্রসরং যত উদগাদৃষির্যমনু দেবগণা উভযে .
তর্হি ন সন্ন চাসদুভযং ন চ কালজবঃ কিমপি ন তত্র শাস্ত্রমবকৃষ্য শযীত যদা .. ২৪..
জনিমসতঃ সতো মৃতিমুতাত্মনি যে বেদ চ ভিদাং বিপণমৃতং স্মরন্ত্যুপদিশন্তি ত আরুপতৈঃ .
ত্রিগুণমযঃ পুমানিতি ভিদা যদবোধকৃতা ত্বযি ন ততঃ পরত্র স ভবেদববোধরসে .. ২৫..
সদিব মনস্ত্রিবৃত্ত্বযি বিভাত্যসদামনুজাত্সদভিমৃশন্ত্যশেষমিদমাত্মত্যাত্মবিদঃ .
ন হি বিকৃতিং ত্যজন্তি কনকস্য তদাত্মতযা স্বকৃতমনুপ্রবিষ্টমিদমাত্মতযাঽবসিতম্ .. ২৬..
তব পরি যে চরন্ত্যখিলসত্ত্বনিকেততযা ত উত পদাক্রমন্ত্যবিগণয্য শিরো নিরৃতেঃ .
পরিবযসে পশূনিব গিরা বিবুধানপি তাংস্ত্বযি কৃতসৌহৃদাঃ খলু পুনন্তি ন যে বিমুখাঃ .. ২৭..
ত্বমকরণঃ স্বরাডখিলকারকশক্তিধরস্তব বলিমুদ্বহন্তি সমদন্ত্যজযাঽনিমিষাঃ .
বর্ষভুজোঽখিলক্ষিতিপতেরিব বিশ্বসৃজো বিদধতি যত্র যে ত্বদধিকৃতা ভবতশ্চকিতাঃ .. ২৮..
স্থিরচরজাতযঃ স্যুরজযোথনিমিত্তযুজো বিহর উদীক্ষযা যদি পরস্য বিমুক্ত ততঃ .
ন হি পরমস্য কশ্চিদপরো ন পরশ্চ ভবেদ্বিযত ইবাপদস্য তব শূন্যতুলাং দধতঃ .. ২৯..
অপরমিতা ধ্রুবাস্তনুভৃতো যদি সর্বগতাস্তর্হি ন শাস্যতেতি নিযমো ধ্রুব নেতরথা .
অজনি চ যন্মযং তদ্বিমুচ্য নিযন্তৃ ভবেত্সমমনুজানতাং যদমতং মতদৃষ্টতযা .. ৩০..
ন ঘটত উদ্ভবঃ প্রকৃতিপূরুষযোর্জযোরুভযযুজা ভবন্ত্যসুভৃতো জলবুদ্বুদবত্ .
ত্বযি ত ইমে ততো বিবিধনামগুণৈঃ পরমে সরিত ইবার্ণবে মধুনি লিল্যুরুশেষরসাঃ .. ৩১..
নৃষু তব মাযযা ভ্রমমমীষ্ববগত্য ভৃশং ত্বযি সুধিযোঽভবে দধতি ভাবমনুপ্রভবম্ .
কথমনুবর্ততাং ভবভযং তব যদ্ভ্রুকুটিঃ সৃজতি মুহুস্ত্রিণেমিরভবচ্ছরণেষু ভযম্ .. ৩২..
বিজিতহৃষীকবাযুভিরদান্তমনস্তুরগং য ইহ যতন্তি যন্তুমতিলোলমুপাযখিদঃ .
ব্যসনশতান্বিতাঃ সমবহায গুরোশ্চরণং বণিজ ইবাজ সন্ত্যকৃতকর্ণধরা জলধৌ .. ৩৩..
স্বজনসুতাত্মদারধনধামধরাসুরথৈস্ত্বযি সতি কিং নৃণাং শ্রযত আত্মনি সর্বরসে .
ইতি সদজানতাং মিথুনতো রতযে চরতাং সুখযতি কো ন্বিহ স্ববিহতে স্বনিরস্তভগে .. ৩৪..
ভুবি পুরুপুণ্যতীর্থসদনান্যৃষযো বিমদাস্ত উত ভবত্পদাম্বুজহৃদোঽঘভিদঙ্ঘ্রিজলাঃ .
দধতি সুকৃন্মনস্ত্বযি য আত্মনি নিত্যসুখে ন পুনরুপাসতে পুরুষসারহরাবসথান্ .. ৩৫..
সত ইদমুত্থিতং সদিতি চেন্ননু তর্কহতং ব্যভিচরতি ক্ব চ ক্ব চ মৃষা ন তথোভযযুক্ .
ব্যবহৃতযে বিকল্প ইষিতোঽন্ধপরম্পরযা ভ্রমযতি ভারতি ত উরুবৃত্তিভিরুক্থজডান্ .. ৩৬..
ন যদিদমগ্র আস ন ভবিষ্যদতো নিধনাদনুমিতমন্তরা ত্বযি বিভাতি মৃষৈকরসে .
অত উপমীযতে দ্রবিণজাতিবিকল্পপথৈর্বিতথমনোবিলাসমৃতমিত্যবযন্ত্যবুধাঃ .. ৩৭..
স যদজযা ত্বজামনুশযিত গুণাংশ্চ জুষন্ভজতি স্বরূপতাং তদনু মৃত্যুমপেতভগঃ .
ত্বমুত জহাসি তামহিরিব ত্বচমাত্তভগো মহসি মহীযসেঽষ্টগুণিতেঽপরিমেযভগ.ঃ .. ৩৮..
যদি ন সমুদ্ধরন্তি যতযো হৃদি কামজটা দুরধিগমোঽসতাং হৃদি গতোঽস্মৃতকণ্ঠমণিঃ .
অসুতৃপযোগিনামুভযতোঽপ্যসুখং ভগবন্ননপগতান্তকাদনধিরূঢপদাদ্ভবতঃ .. ৩৯..
ত্বদবগমী ন বেত্তি ভবদুত্থশুভযোর্গুণবিগুণান্বযাংস্তর্হি দেহভৃতাং চ গিরঃ .
অনুযুগমন্বহং সগুণ গীতপরম্পরযা শ্রবণভৃতো যতস্ত্বমপবর্গগতির্মনুজৈঃ .. ৪০..
দ্যুপতয এব তে ন যযুরন্তমনন্ততযা ত্বমপি যদন্তাঽণ্ডনিচযা ননু সাবরণাঃ .
খ ইব রজাংসি বান্তি বযসা সহ যচ্ছ্রুতযস্ত্বযি হি ফলন্ত্যতান্নিরসনেন ভবনিধনাঃ .. ৪১..