শংপাকগীতা

.. শংপাকগীতা ..

অধ্যাযঃ ১৭৬
যুধিষ্ঠির উবাচ .
ধনিনশ্চাধনা যে চ বর্তযন্তে স্বতন্ত্রিণঃ .
সুখদুঃখাগমস্তেষাং কঃ কথং বা পিতামহ .. ১..
ভীষ্ম উবাচ .
অত্রাপ্যুদাহরন্তীমমিতিহাসং পুরাতনম্ .
শংপাকেনেহ মুক্তেন গীতং শান্তিগতেন চ .. ২..
অব্রবীন্মাং পুরা কশ্চিদ্ব্রাহ্মণস্ত্যাগমাশ্রিতঃ .
ক্লিশ্যমানঃ কুদারেণ কুচৈলেন বুভুক্ষযা .. ৩..
উত্পন্নমিহ লোকে বৈ জন্মপ্রভৃতি মানবম্ .
বিবিধান্যুপবর্তন্তে দুঃখানি চ সুখানি চ .. ৪..
তযোরেকতরে মার্গে যদেনমভিসন্নযেত্ .
ন সুখং প্রাপ্য সংহৃষ্যেন্নাসুঃখং প্রাপ্য সঞ্জ্বরেত্ .. ৫..
ন বৈ চরসি যচ্ছ্রেয আত্মনো বা যদীশিষে .
অকামাত্মাপি হি সদা ধুরমুদ্যম্য চৈব হ .. ৬..
অকিঞ্চনঃ পরিপতন্সুখমাস্বাদযিষ্যসি .
অকিঞ্চনঃ সুখং শেতে সমুত্তিষ্ঠতি চৈব হ .. ৭..
আকিঞ্চন্যং সুখং লোকে পথ্যং শিবমনামযম্ .
অনমিত্রপথো হ্যেষ দুর্লভঃ সুলভো মতঃ .. ৮..
অকিঞ্চনস্য শুদ্ধস্য উপপন্নস্য সর্বতঃ .
অবেক্ষমাণস্ত্রীঁল্লোকান্ন তুল্যমিহ লক্ষযে .. ৯..
আকিঞ্চন্যং চ রাজ্যং চ তুলযা সমতোলযম্ .
অত্যরিচ্যত দারিদ্র্যং রাজ্যাদপি গুণাধিকম্ .. ১০..
আকিঞ্চন্যে চ রাজ্যে চ বিশেষঃ সুমহানযম্ .
নিত্যোদ্বিগ্নো হি ধনবান্মৃত্যোরাস্য গতো যথা .. ১১..
নৈবাস্যাগ্নির্ন চারিষ্টো ন মৃত্যুর্ন চ দস্যবঃ .
প্রভবন্তি ধনত্যাগাদ্বিমুক্তস্য নিরাশিষঃ .. ১২..
তং বৈ সদা কামচরমনুপস্তীর্ণশাযিনম্ .
বাহূপধানং শাম্যন্তং প্রশংসন্তি দিবৌকসঃ .. ১৩..
ধনবান্ক্রোধলোভাভ্যামাবিষ্টো নষ্ট চেতনঃ .
তির্যগীক্ষঃ শুষ্কমুখঃ পাপকো ভ্রুকুটীমুখঃ .. ১৪..
নির্দশন্নধরোষ্ঠং চ ক্রুদ্ধো দারুণভাষিতা .
কস্তমিচ্ছেত্পরিদ্রষ্টুং দাতুমিচ্ছতি চেন্মহীম্ .. ১৫..
শ্রিযা হ্যভীক্ষ্ণং সংবাসো মোহযত্যবিচক্ষণম্ .
সা তস্য চিত্তং হরতি শারদাভ্রমিবানিলঃ .. ১৬..
অথৈনং রূপমানশ্চ ধনমানশ্চ বিন্দতি .
অভিজাতোঽস্মি সিদ্ধোঽস্মি নাস্মি কেবলমানুষঃ .. ১৭

ইত্যেভিঃ কারণৈস্তস্য ত্রিভিশ্চিত্তং প্রমাদ্যতি .
সংপ্রসক্তমনা ভোগান্বিসৃজ্য পিতৃসঞ্চিতান্ .
পরিক্ষীণঃ পরস্বানামাদানং সাধু মন্যতে .. ১৮..
তমতিক্রান্তমর্যাদমাদদানং ততস্ততঃ .
প্রতিষেধন্তি রাজানো লুব্ধা মৃগমিবেষুভিঃ .. ১৯..
এবমেতানি দুঃখানি তানি তানীহ মানবম্ .
বিবিধান্যুপপান্তে গাত্রসংস্পর্শজান্যপি .. ২০..
তেষাং পরমদুঃখানাং বুদ্ধ্যা ভৈষজ্যমাচরেত্ .
লোকধর্মমবজ্ঞায ধ্রুবাণামধ্রুবৈঃ সহ .. ২১..
নাত্যক্ত্বা সুখমাপ্নোতি নাত্যক্ত্বা বিন্দতে পরম্ .
নাত্যক্ত্বা চাভযঃ শেতে ত্যক্ত্বা সর্বং সুখী ভব .. ২২..
ইত্যেতদ্ধাস্তিনপুরে ব্রাহ্মণেনোপবর্ণিতম্ .
শংপাকেন পুরা মহ্যং তস্মাত্ত্যাগঃ পরো মতঃ .. ২৩..
ইতি শ্রীমহাভারতে শান্তিপর্বণি মোক্ষধর্মপর্বণি
শংপাকগীতাযাং ষট্সপ্ত্যত্যধিকশততমোঽধ্যাযঃ .. ১৭৬..

.. ইতি..