নাট্যশাস্ত্রম্ অধ্যায় ২৮ জাতিবিকল্প

 || নাট্যশাস্ত্রম্ অধ্যায় ২৮ জাতিবিকল্প ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ অষ্টাবিংশোঽধ্যায়ঃ |
আতোদ্যবিধিমিদানীং বক্ষ্যামঃ |
ততং চৈবাবনদ্ধং চ ঘনং সুষিরমেব চ |
চতুর্বিধং তু বিজ্ঞেয়মাতোদ্যং লক্ষণান্বিতম্ || ১||
ততং তন্ত্রীকৃতং জ্ঞেয়মবনদ্ধং তু পৌষ্করম্ |
ঘনং তালস্তু বিজ্ঞেয়ঃ সুষিরো বংশ উচ্যতে || ২||
প্রয়োগস্ত্রিবিধো হ্যেষাং বিজ্ঞেয়ো নাটকাশ্রয়ঃ |
ততং চৈবাবনদ্ধং চ তথা নাট্যকৃতোঽপরঃ || ৩||
ততঃ কুতপবিন্যাসো গায়নঃ সপরিগ্রহঃ |
বৈপঞ্চিকো বৈণিকশ্চ বংশবাদস্তথৈব চ || ৪||
মার্দঙ্গিকঃ পাণবিকস্তথা দার্দুরিকো বুধৈঃ |
অবনদ্ধবিধাবেষ কুতপঃ সমুদাহৃতঃ || ৫ || ১১/২২
উত্তমাধমমধ্যাভিস্তথা প্রকৃতিভির্যুতঃ |
কুতপো নাট্যয়োগে তু নানাদেশসমাশ্রয়ঃ || ৬||
এবং গানং চ বাদ্যং চ নাট্যং চ বিবিধাশ্রয়ম্ |
অলাতচক্রপ্রতিমং কর্তব্যং নাট্যয়োক্তৃভিঃ || ৭||
যত্তু তন্ত্রীকৃতং প্রোক্তং নানাতোদ্যসমাশ্রয়ম্ |
গান্ধর্বমিতি তজ্জ্ঞেয়ং স্বরতালপদাত্মকম্ || ৮||
অত্যর্থমিষ্টং দেবানাং তথা প্রীতিকরং পুনঃ |
গন্ধর্বাণাং চ যস্মাদ্ধি তস্মাদ্গন্ধর্বমুচ্যতে || ৯||
অস্য যোনির্ভবেদ্গানং বীণা বংশস্তথৈব চ |
এতেষাং চৈব বক্ষ্যামি বিধিং স্বরসমুত্থিতম্ || ১০||
গান্ধর্বং ত্রিবিধং বিদ্যাৎস্বরতালপদাত্মকম্ |
ত্রিবিধস্যাপি বক্ষ্যামি লক্ষণং কর্ম চৈব হি || ১১||
দ্ব্যধিষ্ঠানাঃ স্বরা বৈণাঃ শারীরাশ্চ প্রকীর্তিতাঃ |
এতেষাং সম্প্রবক্ষ্যামি বিধানং লক্ষণান্বিতম্ || ১২||
স্বরা গ্রামৌ মূর্চ্ছনাশ্চ তানাঃ স্থানানি বৃত্তয়ঃ |
শুষ্কং সাধারণে বর্ণা হ্যলঙ্কারাশ্চ ধাতবঃ || ১৩||
শ্রুতয়ো যতয়শ্চৈব নিত্যং স্বরগতাত্মকাঃ |
দারব্যাং সমবায়স্তু বীণায়াং সমুদাহৃতঃ || ১৪||
স্বরা গ্রামাবলঙ্কারা বর্ণাঃ স্থানানি জাতয়ঃ |
সাধারণে চ শরীর্যাং বীণায়ামেষ সঙ্গ্রহঃ || ১৫||
ব্যঞ্জনানি স্বরা বর্ণাঃ সন্ধয়োঽথ বিভক্তয়ঃ |
নামাখ্যাতোপসর্গাশ্চ নিপাতাস্তদ্ধিতাঃ কৃতঃ || ১৬||
ছন্দোবিধিরলঙ্কারা জ্ঞেয়ঃ পদগতো বিধিঃ |
নিবদ্ধং চানিবদ্ধং চ দ্বিবিধং তৎপদং স্মৃতম্ || ১৭||
ধ্রুবস্ত্বাবাপনিষ্কামৌ বিক্ষেপোঽথ প্রবেশনম্ |
শম্যা তালঃ সন্নিপাতঃ পরিবর্তঃ সবস্তুকঃ || ১৮||
মাত্রা প্রকরণাঙ্গানি বিবারী যতয়ো লয়াঃ |
গীতয়োঽবয়বা মার্গাঃ পাদমার্গাঃ সপাণয়ঃ || ১৯||
ইত্যেকবিংশতিবিধং জ্ঞেয়ং তালগতং বুধৈঃ |
গান্ধর্বসঙ্গ্রহো হ্যেষ বিস্তরং তু নিবোধত || ২০||
তত্র স্বরাঃ –
ষড্জশ্চ ঋষভশ্চৈব গান্ধারো মধ্যমস্তথা |
পঞ্চমো ধৈবতশ্চৈব সপ্তমোঽথ নিষাদবান্ || ২১||
চতুর্বিধৎবমেতেষাং বিজ্ঞেয়ং গানয়োক্তৃভিঃ |
বাদী চৈবাথ সংবাদী বিবাদী চানুবাদ্যপি || ২২||
সংবাদো মধ্যমগ্রামে পঞ্চমস্যর্ষভস্য চ |
ষড্জগ্রামে তু ষড্জস্য সংবাদঃ পঞ্চমস্য চ || ২৩||
তিস্রো দ্বে চ চতস্রশ্চ চতস্রস্তিস্র এব চ |
দ্বে চৈবাদ্য চতস্রশ্চ ষড্জগ্রামে ভবেদ্বিধিঃ || ২৪||
চতুঃশ্রুতির্ভবেৎ ষড্জ ঋষভস্ত্রিশ্রুতিঃ স্মৃতঃ |
দ্বিশ্রুতিশ্চৈব গান্ধারো মধ্যমশ্চ চতুঃশ্রুতিঃ || ২৫||
পঞ্চমস্তদ্বদেব স্যাৎ ত্রিশ্রুতির্ধৈবতো মতঃ |
দ্বিশ্রুতিশ্চ নিষাদঃ স্যাৎ ষড্জগ্রামে বিধির্ভবেৎ || ২৬||
অথ মূর্চ্ছনাঃ দ্বৈগ্রামিক্যশ্চতুর্দশ –
আদাবুত্তরমন্দ্রা স্যাদ্রজনী চোত্তরায়তা |
চতুর্থী শুদ্ধষড্জা তু পঞ্চমী মৎসরীকৃতা || ২৭||
অশ্বক্রান্তা তথা ষষ্ঠী সপ্তমী চাভিরুদ্গতা |
ষড্জগ্রামাশ্রিতা হ্যেতা বিজ্ঞেয়াঃ সপ্তমূর্চ্ছনাঃ || ২৮||
ষড্জে চোত্তরমন্দ্রা স্যাদৃষভে চাভিরুদ্গতা |
অশ্বক্রান্তা তু গান্ধারে মধ্যমে মৎসরীকৃতা || ২৯||
পঞ্চমে শুদ্ধষড্জা স্যাদ্ধৈবতে চোত্তরায়তা |
নিষাদে রজনী চ স্যাদিত্যেতাঃ ষড্জমূর্চ্ছনাঃ || ৩০||
অথ মধ্যমগ্রামে –
সৌবীরী হরিণাশ্বা চ স্যাৎকলোপনতা তথা |
শুদ্ধমধ্যা তথা মার্গী পৌরবী হৃষ্যকা তথা |
মধ্যমগ্রামজা হ্যেতা বিজ্ঞেয়াঃ সপ্তমূর্চ্ছনাঃ || ৩১||
অপি চ –
ক্রময়ুক্তাঃ স্বরাঃ সপ্ত মূর্চ্ছনেত্যভিসঞ্জ্ঞিতাঃ |
ষট্পঞ্চস্বরকাস্তানাঃ ষাডবৌডুবিতাশ্রয়াঃ || ৩২||
সাধারণকৃতাশ্চৈব কাকলীসমলঙ্কৃতাঃ |
অন্তরস্বরসংযুক্তা মূর্চ্ছনা গ্রাময়োর্দ্বয়োঃ || ৩৩||
যথা –
ছায়াসু ভবতি শীতং প্রস্বেদো ভবতি চাতপস্থস্য |
ন চ নাগতো বসন্তো ন চ নিঃশেষঃ শিশিরকালঃ || ৩৪||
ভবতশ্চাত্র –
অন্তরস্বরসংযোগো নিত্যমারোহিসংশ্রয়ঃ |
কার্যো হ্যল্পো বিশেষেণ নাবরোহী কদাচন || ৩৫||
ক্রিয়মাণোঽবরোহী স্যাদল্পো বা যদি বা বহুঃ |
জাতিরাগং শ্রুতিং চৈব নয়ন্তে ৎবন্তরস্বরাঃ || ৩৬ || ইতি||
জাতীরিদানীং বক্ষ্যামঃ |
স্বরসাধারণগতাস্তিস্রো জ্ঞেয়াস্তু জাতয়ঃ |
মধ্যমা পঞ্চমী চৈব ষড্জমধ্যা তথৈব চ || ৩৭||
আসামংশাস্তু বিজ্ঞেয়াঃ ষড্জমধ্যমপঞ্চমাঃ |
যথা স্বং দুর্বলতরা ব্যক্তা সা পঞ্চমী তথা || ৩৮||
জাতয়োঽষ্টাদশেত্যেবং ব্রহ্মণাভিহিতং পুরা |
তাস্ত্বহং বর্তয়িষ্যামি গ্রহাংশাদিবিভাগতঃ || ৩৯||
ষাড্জী চৈবার্ষভী চৈব ধৈবত্যথ নিষাদিনী |
ষড্জোদীচ্যবতী চৈব তথা বৈ ষড্জকৈশিকী || ৪০||
ষড্জমধ্যা তথা চৈব ষড্জগ্রামসমাশ্রয়াঃ |
অত ঊর্ধ্বং প্রবক্ষ্যামি মধ্যমগ্রামসংশ্রিতাঃ || ৪১||
গান্ধারী মধ্যমা চৈব গান্ধারোদীচ্যবা তথা |
পঞ্চমী রক্তগান্ধারী তথা গান্ধারপঞ্চমী || ৪২||
মধ্যমোদীচ্যবা চৈব নন্দয়ন্তি তথৈব চ |
কর্মারবী চ বিজ্ঞেয়া তথান্ধ্রী কৈশিকী মতা || ৪৩||
স্বরসাধারণগতাস্তিস্রো জ্ঞেয়াস্তু জাতয়ঃ |
মধ্যমা ষড্জমধ্যা চ পঞ্চমী চৈব সূরিভিঃ || ৪৪||
আসামংশাস্তু বিজ্ঞেয়াঃ ষড্জমধ্যমপঞ্চমাঃ |
যথাস্বং দুর্বলতরং ব্যত্যাসাত্ত্বত্র পঞ্চমী || ৪৫||
শুদ্ধা বিকৃতাশ্চৈব হি সমবায়াজ্জাতয়স্তু জায়ন্তে |
পুনরেবাশুদ্ধকৃতা ভবন্ত্যথৈকাদশান্যাস্তু || ৪৬||
তাসাং যন্নির্বৃত্তাঃ স্বরেষ্বথাংশেষু জাতিষু চ জাতিঃ |
তদ্বক্ষ্যামি যথাবৎসংক্ষেপেণ ক্রমেণেহ || ৪৭||
পরস্পরবিনিষ্পন্না জ্ঞেয়া হ্যেবং তু জাতয়ঃ |
পৃথগ্লক্ষণসংযুক্তা দ্বৈগ্রামিকাঃ স্বরাশ্রয়াঃ || ৪৮||
চতস্রো জাতয়ো নিত্যং জ্ঞেয়াঃ সপ্তস্বরা বুধৈঃ |
চতস্রঃ ষট্স্বরা জ্ঞেয়াঃ স্মৃতাঃ পঞ্চস্বরা দশ || ৪৯||
মধ্যমোদীচ্যবা চৈব তথা বৈ ষড্জকৈশিকী |
কার্মারবী চ সম্পূর্ণা তথা গান্ধারপঞ্চমী || ৫০||
ষাড্জ্যান্ধ্রী নন্দয়ন্তী চ গান্ধারোদীচ্যবা তথা |
চতস্রঃ ষট্স্বরা হ্যেতাঃ জ্ঞেয়াঃ পঞ্চ স্বরা দশ || ৫১||
নৈষাদী চার্ষভী চৈব ধৈবতী ষড্জমধ্যমা |
ষড্জোদীচ্যবতী চৈব পঞ্চ ষড্জাশ্রিতাঃ স্মৃতাঃ || ৫২||
গান্ধারী রক্তগান্ধারী মধ্যমা পঞ্চমী তথা |
কৈশিকী চৈব পঞ্চৈতা মধ্যমগ্রামসংশ্রয়াঃ || ৫৩||
যাস্তাঃ সপ্তস্বরা জ্ঞেয়া যাশ্চৈতাঃ ষট্স্বরাঃ স্মৃতাঃ |
কদাচিৎ ষাডবীভূতাঃ কদাচিচ্চৌডুবে মতাঃ | ৫৪||
ষড্জগ্রামে তু সম্পূর্ণা বিজ্ঞেয়া ষড্জকৈশিকী |
ষট্স্বরা চৈব বিজ্ঞেয়া ষাড্জী গান্ধারয়োগতঃ | ৫৫||
গান্ধারপঞ্চমী চৈব মধ্যমোদীচ্যবা তথা |
পুনশ্চ ষট্স্বরা জ্ঞেয়া গান্ধারোদীচ্যবা বুধৈঃ | ৫৬||
আন্ধ্রী চ নন্দয়ন্তী চ মধ্যমগ্রামসংশ্রয়াঃ |
এবমেতা বুধৈর্জ্ঞেয়া দ্বৈগ্রামিক্যোঽপি জাতয়ঃ || ৫৭||
অত ঊর্ধ্বং প্রবক্ষ্যামি তাসামংশবিকল্পনম্ |
ষট্স্বরাঃ সপ্তমে হ্যংশে নেষ্যন্তে ষড্জমধ্যমাঃ || ৫৮||
সংবাদ্যলোপাদ্গান্ধারে তদ্বদেব হি নেষ্যতে |
গান্ধারীরক্তগান্ধারীকৈশিকীনাং তু পঞ্চমঃ || ৫৯||
ষড্জায়াং চৈব গান্ধারমংশকং বিদ্ধি ষাডবম্ |
ষাডবং ধৈবতে নাস্তি ষড্জোদীচ্যামথাংশকে || ৬০||
সংবাদ্যলোপাৎসপ্তৈতাঃ ষাট্স্বর্যেণ বিবর্জিতাঃ |
গান্ধারীরক্তগান্ধার্যোঃ ষড্জমধ্যমপঞ্চমাঃ || ৬১||
সপ্তমশ্চৈব বিজ্ঞেয়ো যেষু নৌডুবিতং ভবেৎ |
দ্বৌ ষড্জমধ্যমাংশো তু গান্ধারোঽথ নিষাদবান্ || ৬২||
ঋষভশ্চৈব পঞ্চম্যাং কৈশিক্যাং চৈব ধৈবতঃ |
এবং তু দ্বাদশৈবেহ বর্জ্যাঃ পঞ্চ স্বরাঃ সদা || ৬৩||
তাস্ত্বনৌডুবিতা নিত্যং কর্তব্যা হি স্বরাশ্রয়াঃ |
সর্বস্বরাণাং নাশস্তু বিহিতস্ত্বথ জাতিষু || ৬৪||
ন মধ্যমস্য নাশস্তু কর্তব্যো হি কদাচন |
সর্বস্বরাণাং প্রবরো হ্যনাশী মধ্যমঃ স্মৃতঃ |
গান্ধর্বকল্পে বিহিতঃ সামস্বপি চ মধ্যমঃ || ৬৫||
দশকং জাতিলক্ষণম্ –
গ্রহাংশৌ তারমন্দ্রৌ চ ন্যাসোঽপন্যাস এব চ |
অল্পৎবং চ বহুৎবং চ ষাডবৌডুবিতে তথা || ৬৬||
অথ গ্রহাঃ |
গ্রহাস্তু সর্বজাতীনামংশবৎপরিকীর্তিতাঃ |
যৎপ্রবৃত্তং ভবেদ্গেয়মংশো গ্রহবিকল্পিতঃ || ৬৭||
তত্রাংশো নাম –
যস্মিন্ ভবতি রাগশ্চ যস্মাচ্চৈব প্রবর্ততে |
মন্দ্রশ্চ তারমন্দ্রশ্চ যোঽত্যর্থং চোপলভ্যতে || ৬৮||
গ্রহাপন্যাসবিন্যাসসংন্যাসন্যাসগোচরঃ |
অনুবৃত্তশ্চ যস্যেহ সোংঽশঃ স্যাদ্দশলক্ষণঃ || ৬৯||
পঞ্চস্বরপরা তারগতির্যথা
অংশাত্তারগতিং বিদ্যাদাচতুর্থস্বরাদিহ |
আ পঞ্চমাৎপঞ্চমাদ্বা নাতঃপরমিহেষ্যতে || ৭০||
ত্রিধা মন্দ্রগতিঃ | অংশপরা ন্যাসপরা অপরন্যাসপরা চেতি |
মন্দ্রস্ত্বংশপরো নাস্তি ন্যাসৌ তু দ্বৌ ব্যবস্থিতৌ |
গান্ধারন্যাসলিঙ্গে তু দৃষ্টমার্ষভসেবনম্ || ৭১||
অথ ন্যাস একবিংশতিসঙ্খ্যঃ | অঙ্গসমাপ্তৌ ন্যাসঃ |
তদ্বদপন্যাসো হ্যঙ্গমধ্যে ষট্পঞ্চাশৎসঙ্খ্যঃ |
যথা –
ন্যাসোঽঙ্গসমাপ্তৌ স চৈকবিংশতিসঙ্খ্যস্তথা |
১৬ অক্ষরাণি ষট্পঞ্চাশৎসঙ্খ্যোঽপন্যাসোঽঙ্গমধ্যে ভবেৎ || ৭২||
তত্র প্রথমং বিদারীমধ্যে ন্যাসস্বরপ্রয়ুক্তস্তু |
বিবদনশীলং মুক্ত্বা সংন্যাসঃ সোঽভিধাতব্যঃ |
কৃৎবা পদাবসানে বিন্যাসাৎক্বাপি বিন্যাসঃ || ৭৩||
তথা –
অল্পৎবেঽথ বহুৎবে বলবদবলতা বিনিশ্চয়াদেব |
জাতিস্বরৈস্তু নিত্যং জাত্যল্পৎবং দ্বিবিধমেতৎ || ৭৪||
সঞ্চারাংশে বলস্থানামল্পৎবে দুর্বলাসু চ |
ন্যাসশ্চান্তরমার্গস্তু জাতীনাং ব্যক্তিকারকঃ || ৭৫||
পঞ্চস্বরমৌডুবিতং বিজ্ঞেয়ং দশবিধং প্রয়োগজ্ঞৈঃ |
ত্রিংশৎপ্রকারবিহিতং পূর্বোক্তং লক্ষণং চাস্য || ৭৬||
ষট্স্বরস্য প্রয়োগোঽস্তি তথা পঞ্চস্বরস্য চ |
চতুঃস্বরপ্রয়োগোঽপি হ্যবকৃষ্টধ্রুবাস্বিহ || ৭৭||
দ্বৈগ্রামিকীণাং জাতীনাং সর্বাসামপি নিত্যশঃ |
অংশাস্ত্রিষষ্টির্বিজ্ঞেয়াস্তেষাং চৈবাংশবদ্ গ্রহাঃ || ৭৮||
অংশগ্রহমিদানীং বক্ষ্যামঃ | তত্র –
মধ্যমোদীচ্যবায়াস্তু নন্দয়ন্ত্যাস্তথৈব চ |
তথা গান্ধারপঞ্চম্যাঃ পঞ্চমোংঽশো গ্রহস্তথা || ৭৯||
ধৈবত্যাশ্চ তথা হ্যংশৌ বিজ্ঞেয়ৌ ধৈবতর্ষভৌ |
পঞ্চম্যাশ্চ তথা জ্ঞেয়ৌ গ্রহাংশৌ পঞ্চমর্ষভৌ || ৮০||
গান্ধারোদীচ্যবায়াস্তু গ্রহাংশৌ ষড্জমধ্যমৌ |
আর্ষভ্যাশ্চ গ্রহা অংশা ধৈবতর্ষভসপ্তমাঃ || ৮১||
গান্ধারশ্চ নিষাদশ্চ হ্যার্ষভশ্চ তথাপরঃ |
নিষাদিন্যাস্ত্রয়ো হ্যেতে গ্রহা অংশাশ্চ কীর্তিতাঃ || ৮২||
ষড্জপঞ্চমগান্ধারৈস্ত্রিভিরেব প্রকীর্তিতাঃ |
অংশৈর্গ্রহৈস্তথা চৈব বিজ্ঞেয়া ষড্জকৈশিকী || ৮৩||
ষড্জশ্চ মধ্যমশ্চৈব নিষাদো ধৈবতস্তথা |
ষড্জোদীচ্যবতীজাতের্গ্রহা অংশাশ্চ কীর্তিতাঃ || ৮৪||
পঞ্চমশ্চার্ষভশ্চৈব নিষাদো ধৈবতস্তথা |
কার্মারব্যা বুধৈরংশা গ্রহাশ্চ পরিকীর্তিতাঃ || ৮৫||
গান্ধারশ্চার্ষভশ্চৈব পঞ্চমোঽথ নিষাদবান্ |
চৎবরোংশা ভবন্ত্যান্ধ্র্যা গ্রহাশ্চৈব তথৈব হি || ৮৬||
ষড্জশ্চাথর্ষভশ্চৈব মধ্যমঃ পঞ্চমস্তথা |
মধ্যমায়া গ্রহা জ্ঞেয়া অংশাশ্চৈব সধৈবতাঃ || ৮৭||
নিষাদষড্জগান্ধারমধ্যমাঃ পঞ্চমস্তথা |
গান্ধারীরক্তগান্ধার্যোর্গ্রহা অংশাঃ প্রকীর্তিতাঃ || ৮৮||
ষড্জী ধৈবতগান্ধারষড্জমধ্যমপঞ্চমৈঃ |
গ্রহৈরংশৈশ্চ বিজ্ঞেয়া বিকৃতা স্বরয়োগতঃ || ৮৯||
কৈশিক্যাশ্চার্ষভং হিৎবা গ্রহাংশাঃ ষট্ স্বরাঃ স্মৃতাঃ |
সপ্তস্বরগ্রহাংশা তু বিজ্ঞেয়া ষড্জমধ্যমা || ৯০||
এতে ত্রিষষ্টির্বিজ্ঞেয়াঃ সর্বাস্বংশাস্তু জাতিষু |
অংশবচ্চ গ্রহাস্তাসাং সর্বাসামেব নিত্যশঃ || ৯১||
সর্বাসামেব জাতীনাং ত্রিজাতিস্তু গণঃ স্মৃতঃ |
তে চ সপ্ত গণা জ্ঞেয়া বর্ধমানস্বরা বুধৈঃ || ৯২||
একস্বরো দ্বিস্বরশ্চ ত্রিস্বরোঽথ চতুঃস্বরঃ |
পঞ্চস্বরশ্চতুর্থা স্যাদেকধা সপ্তষট্স্বরৌ || ৯৩||
এতদুক্তং ময়া ৎবাসাং গ্রহাংশপরিকল্পনম্ |
পুনশ্চৈব প্রবক্ষ্যামি ন্যাসাপন্যাসয়োগতঃ || ৯৪||
পঞ্চাংশা তু ভবেৎ ষাড্জী নিষাদর্ষভবর্জিতা |
অপন্যাসো ভবেদত্র গান্ধারঃ পঞ্চমস্তথা || ৯৫||
ন্যাসশ্চাত্র ভবেৎ ষড্জো লোপ্যঃ সপ্তম এব চ |
ষড্জগান্ধারসঞ্চারঃ ষড্জধৈবতয়োস্তথা || ৯৬||
ষাডবং সপ্তমোপেতমল্পৌ বৈ সপ্তমর্ষভৌ |
গান্ধারস্য চ বাহুল্যং ৎবত্র কার্যং প্রয়োক্তুভিঃ || ৯৭||
আর্ষভ্যামৃষভস্ত্বংশো নিষাদো ধৈবতস্তথা |
এত এব হ্যপন্যাসা ন্যাসশ্চাপ্যৃষভঃ স্মৃতঃ |
ষট্পঞ্চস্বরতা চাত্র ষড্জপঞ্চময়োর্বিনা || ৯৮||
ধৈবত্যাং ধৈবতো ন্যাসস্ত্বংশাবৃষভধৈবতো |
অপন্যাসা ভবন্ত্যত্র ধৈবতার্ষভমধ্যমাঃ || ৯৯||
ষড্জপঞ্চমহীনং তু পাঞ্চ্স্বর্যং বিধীয়তে |
পঞ্চমেন বিনা চৈব ষাডবং পরিকীর্তিতম্ || ১০০||
আরোহিণৌ চ তৌ কার্যৌ লঙ্ঘনীয়ৌ তথৈব চ |
নিষাদশ্চর্ষভশ্চৈব গান্ধারো বলবাংস্তথা || ১০১||
নিষাদিন্যাং নিষাদোংঽশো সগান্ধারর্ষভস্তথা |
এত এব হ্যপন্যাসা ন্যাসশ্চৈবাত্র সপ্তমঃ || ১০২||
ধৈবত্যা ইব কর্তব্যে ষাডবৌডুবিতে তথা |
তদ্বচ্চ লঙ্ঘনীয়ৌ তু বলবন্তৌ তথৈব চ || ১০৩||
অংশাস্তু ষড্জকৈশিক্যাঃ ষড্জগান্ধারপঞ্চমাঃ |
অপন্যাসা ভবন্ত্যত্র ষড্জপঞ্চমসপ্তমাঃ || ১০৪||
গান্ধারশ্চ ভবেন্ন্যাসো হৈনস্বর্যং ন চাত্র তু |
দৌর্বল্যং চাত্র কর্তব্যং ধৈবত(মধ্যম) স্যার্ষভস্য চ || ১০৫||
ষড্জশ্চ মধ্যমশ্চৈব নিষাদো ধৈবতস্তথা |
স্যুঃ ষড্জোদীচ্যবাংশাস্তু ন্যাসশ্চৈব তু মধ্যমঃ || ১০৬||
অপন্যাসো ভবত্যস্য ধৈবতঃ ষড্জ এব চ |
পরস্পরাংশগমনমিষ্টতশ্চ বিধীয়তে || ১০৭||
ষাট্স্বর্যমৃষভাপেতং কার্যং গান্ধর্ববেদিভিঃ |
পঞ্চমার্ষভহীনং তু পাঞ্চস্বর্যং তু তত্র বৈ || ১০৮||
ষড্জশ্চাপ্যৃষভশ্চৈব গান্ধারশ্চ বলী ভবেৎ |
গান্ধারস্য চ বাহুল্যং মন্দ্রস্থানে বিধীয়তে || ১০৯||
সর্বেংশাঃ ষড্জমধ্যায়ামপন্যাসাস্তথৈব চ |
ষড্জশ্চ মধ্যমশ্চাপি ন্যাসৌ নার্যৌ প্রয়োক্তৃভিঃ || ১১০||
গান্ধারসপ্তমাপেতং পাঞ্চস্বর্যং বিধীয়তে |
ষাডবং সপ্তমাপেতং কার্যং চাত্র প্রয়োগতঃ || ১১১||
সর্বস্বরাণাং সঞ্চার ইষ্টতস্তু বিধীয়তে |
ষড্জগ্রামাশ্রিতা হ্যেতা বিজ্ঞেয়াঃ সপ্ত জাতয়ঃ || ১১২||
অতঃ পরং প্রবক্ষ্যামি মধ্যমগ্রামসংশ্রয়াঃ |
গান্ধার্যাঃ পঞ্চ এবাংশা ধৈবতর্ষভবর্জিতাঃ || ১১৩||
ষড্জশ্চ পঞ্চমশ্চৈব হ্যপন্যাসৌ প্রকীর্তিতৌ |
গান্ধারশ্চ ভবেন্ন্যাসঃ ষাডবং চর্ষভং বিনা || ১১৪||
ধৈবতর্ষভয়োর্হীনং তথা চৌডুবিতং ভবেৎ |
লঙ্ঘনীয়ৌ চ তৌ নিত্যমার্ষভাদ্ধৈবতং ব্রজেৎ |
বিহিতস্ত্বিতি গান্ধার্যাঃ স্বরন্যাসাংশগোচরঃ || ১১৫||
লক্ষণং রক্তগান্ধার্যা গান্ধার্যা এব যৎস্মৃতম্ |
ধৈবতো বলবানত্র দৌর্বল্যং তস্য লোপতঃ || ১১৬||
গান্ধারষড্জয়োশ্চাত্র সঞ্চারশ্চার্ষভাদ্বিনা |
অপন্যাসস্তথা চৈব মধ্যমস্তু বিধীয়তে || ১১৭||
গান্ধারোদীচ্যবাংশৌ তু বিজ্ঞেয়ৌ ষড্জমধ্যমৌ |
পাঞ্চস্বর্যং ন চৈবাত্র ষাট্স্বর্যমৃষভং বিনা || ১১৮||
কার্যশ্চান্তরমার্গশ্চ ন্যাসোপন্যাস এব চ |
ষড্জোদীচ্যবতীবত্তু পাঞ্চস্বর্যেণ জাতুচিৎ || ১১৯||
মধ্যমায়া ভবন্ত্যংশা বিনা গান্ধারসপ্তমৌ |
এত এব হ্যপন্যাসা ন্যাসশ্চৈব তু মধ্যমঃ || ১২০||
গান্ধারসপ্তমাপেতং পাঞ্চস্বর্যং বিধীয়তে |
ষাডবং চাপ্যগান্ধারং কর্তব্যং তু প্রয়োগতঃ || ১২১||
ষড্জমধ্যময়োশ্চাত্র কার্যং বাহুল্যমেব হি |
গান্ধারলঙ্ঘনং চাত্র কার্যং নিত্যং প্রয়োক্তৃভিঃ || ১২২||
মধ্যমোদীচ্যবা পূর্ণা হ্যংশ একস্তু পঞ্চমঃ |
শেষো বিধিস্তু কর্তব্যো গান্ধারোদীচ্যবাং গতঃ || ১২৩||
দ্বাবংশাবথ পঞ্চম্যামৃষভঃ পঞ্চমস্তথা |
স(ঋ)নিষাদাবপন্যাসৌ ন্যাসশ্চৈব তু পঞ্চমঃ || ১২৪||
মধ্যমাবত্তু কর্তব্যে ষাডবৌডুবিতে তথা |
দৌর্বল্যং চাত্র কর্তব্যং ষড্জগান্ধারমধ্যমৈঃ || ১২৫||
কুর্যাদপ্যত্র সঞ্চারং পঞ্চমস্যার্ষভস্য চ |
গান্ধারগমনং চৈব কার্যং ৎবল্পশ্চ (ল্পং চ)
সপ্তমঃ (মাৎ)|| ১২৬||
অথ গান্ধারপঞ্চম্যাঃ পঞ্চমোংঽশঃ প্রকীর্তিতঃ |
তারগত্যা তু ষড্জোঽপি কদাচিন্নাতিবর্ততে || ১২৭||
ঋষভঃ পঞ্চমশ্চৈব হ্যপন্যাসৌ প্রকীর্তিতৌ |
ন্যাসশ্চৈব তু গান্ধারো সা চ পূর্ণস্বরা সদা |
পঞ্চম্যা যশ্চ গান্ধার্যাঃ সঞ্চারঃ স বিধীয়তে || ১২৮||
পঞ্চমশ্চার্ষভশ্চৈব গান্ধারোঽথ নিষাদবান্ |
চৎবারোংঽশা ভবন্ত্যান্ধ্র্যামপন্যাসাস্ত এব হি || ১২৯||
গান্ধারশ্চ ভবেন্ন্যাসঃ ষড্জাপেতং তু ষাডবম্ |
গান্ধারার্ষভয়োশ্চাপি সঞ্চারস্তু পরস্পরম্ || ১৩০||
সপ্তমস্য চ ষষ্ঠস্য ন্যাসো গত্যনুপূর্বশঃ |
ষড্জস্য লঙ্ঘনং চাত্র নাস্তি চৌডুবিতং সদা || ১৩১||
নন্দয়ন্ত্যাঃ ক্রমান্ ন্যাসাপন্যাসাংশাঃ প্রকীর্তিতাঃ |
গান্ধারো মধ্যমশ্চৈব পঞ্চমশ্চৈব নিত্যশঃ || ১৩২||
ষড্জো লোপ্যশ্চ লঙ্ঘ্যশ্চ নান্ধ্রীসঞ্চরণং ভবেৎ |
লঙ্ঘনং হ্যৃষভস্যাপি তচ্চ মন্দ্রগতং স্মৃতম্ || ১৩৩||
তারগত্যা তু ষড্জস্তু কদাচিন্নাতিবর্ততে |
গান্ধারো বা গ্রহঃ কার্যস্তথা ন্যাসশ্চ নিত্যশঃ || ১৩৪||
কার্মারব্যাঃ স্মৃতা হ্যংশা আর্ষভঃ পঞ্চমস্তথা |
ধৈবতশ্চ নিষাদশ্চাপ্যপন্যাসাস্ত এব তু |
পঞ্চমশ্চ ভবেন্ন্যাসো হৈনস্বর্যং ন চাত্র তু || ১৩৫||
গান্ধারস্য বিশেষেণ সর্বতো গমনং ভবেৎ || ১৩৬||
কৈশিক্যাস্তু তথা হ্যংশাঃ সর্বে চৈবার্ষভং বিনা |
এত এব হ্যপন্যাসা ন্যাসৌ গান্ধারসপ্তমৌ || ১৩৭||
ধৈবতেংশে নিষাদে চ ন্যাসঃ পঞ্চম ইষ্যতে |
অপন্যাসঃ কদাচিত্তু ঋষভোঽপি বিধীয়তে || ১৩৮||
আর্ষভে ষাডবং চাত্র ধৈবতর্ষভবর্জিতম্ |
তথা চৌডুবিতং কুর্যাদ্ বলিনৌ চান্ত্যপঞ্চমৌ || ১৩৯||
দৌর্বল্যমৃষভস্যাত্র লঙ্ঘনং চ বিশেষতঃ |
অংশবৎ কল্পিতশ্চান্যৈঃ ষাডবে তু বিধীয়তে |
ষড্জমধ্যাবদত্রাপি সঞ্চারস্তু ভবেদিহ || ১৪০||
এবমেতা বুধৈর্জ্ঞেয়া জাতয়ো দশলক্ষণাঃ |
যথা যস্মিন্ রসে যাশ্চ গদতো মে নিবোধত || ১৪১||
|| ইতি জাতিবিকল্পাধ্যায়োঽষ্টাবিংশঃ সমাপ্তঃ||