নাট্যশাস্ত্রম্ অধ্যায় ১৫ ছন্দোবিচিতির্নাম

 || নাট্যশাস্ত্রম্ অধ্যায় ১৫ ছন্দোবিচিতির্নাম||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ পঞ্চদশোঽধ্যায়ঃ
ছন্দাংস্যেবং হি যানীহ ময়োক্তানি দ্বিজোত্তমাঃ |
বৃত্তানি তেষু নাট্যেঽস্মিন্ প্রয়োজ্যানি নিবোধত || ১||
আদ্যে পুনরন্ত্যে দ্বে দ্বে গুরুণী চেৎ |
সা স্যাত্তনুমধ্যা গায়ত্রসমুত্থা || ২||
যথা -সন্ত্যক্তবিভূষা ভ্রষ্টাঞ্জননেত্রা |
হস্তার্পিতগণ্ডা কিং ? ৎবং তনুমধ্যা || ৩||
লঘুগণ আদৌ ভবতি চতুষ্কঃ |
গুরুয়ুগমন্ত্যে মকরকশীর্ষা || ৪||
যথা -স্বয়মুপয়ান্তং ভজসি ন কান্তম্ |
ভয়করি কিং ? ৎবং মকরকশীর্ষা || ৫||
একমাত্রং ষট্কে স্যাদ্ দ্বিতীয়ং পাদে |
খ্যাতরূপা বৃত্তে সা মালিনী নাম্না || ৬||
ষডক্ষরকৃতে পাদে লঘু যত্র দ্বিতীয়কম্ |
শেষাণি তু গুরূণি স্যুর্মালিনী সা মতা যথা || ৭||
স্নানগন্ধাধিক্যৈর্বস্ত্রভূষায়োগৈঃ |
ব্যক্তমেবাসৌ ৎবং মালিনী প্রখ্যাতা || ৮||
দ্বিতীয়ং পঞ্চমং চৈব লঘু যত্র প্রতিষ্ঠিতম্ |
শেষাণি চ গুরূণি স্যুর্মালতী নাম সা যথা || ৯||
শোভতে বদ্ধয়া ষট্পদাবিদ্ধয়া |
মালতীমালয়া মানিনী লীলয়া || ১০||
দ্বিতীয়ং চ চতুর্থং চ পঞ্চমং চ যদা লঘু |
যস্যাঃ সপ্তাক্ষরে পাদে জ্ঞেয়া সা তূদ্ধতা যথা || ১১||
সৌ ত্রিকৌ যদি পাদে হ্যন্তিমশ্চ গকারঃ |
উষ্ণিগুত্থিতপাদা উদ্ধতা খলু নাম্না || ১২||
দন্তকৃন্তকৃতাস্ত্রং ব্যাকুলালকশোভম্ |
শংসতীব তবাস্যং নির্দয়ং রতয়ুদ্ধম্ || ১৩||
আদৌ দ্বে নিধনে চৈব গুরুণী যত্র বৈ সদা |
পাদে সপ্তাক্ষরে জ্ঞেয়া নাম্না ভ্রমরমালিকা || ১৪||
পাদে পাদে নিবিষ্টৌ সম্যগ্বিরচিতৌ ৎসৌ |
অন্ত্যে যদি গকারঃ সা তু ভ্রমরমালা || ১৫||
যথা -নানাকুসুমচিত্রে প্রাপ্তে সুরভিমাসে |
এষা ভ্রমতি মত্তা কান্তে ভ্রমরমালা || ১৬||
আদ্যং তৃতীয়মন্ত্যং চ পঞ্চমং সপ্তমং তথা |
গুরূণ্যষ্টাক্ষরে পাদে সিংহলেখেতি সা যথা || ১৭||
জাতু যস্য গৌ ন , পাদে সংস্থিতঃ সমস্বরূপে |
তামনুষ্টুবাশ্রয়স্থাং বাবদন্তি সিংহলেখাম্ || ১৮||
যত্ত্বয়া হ্যনেকভাবৈশ্চেষ্টিতং রহঃ সুগাত্রি |
তন্মনো মম প্রবিষ্টং বৃত্তমদ্য সিংহলেখম্ || ১৯||
চতুর্থং চ দ্বিতীয়ং চ ষষ্ঠমষ্টমমেব চ |
গুরূণ্যষ্টাক্ষরে পাদে যত্র তন্মত্তচেষ্টিতম্ || ২০||
যদা তু জাৎপরৌ রলৌ গকার এব চ স্থিতঃ |
অনুষ্টুবুদ্ভবং তদা বদন্তি মত্তচেষ্টিতম্ || ২১||
যথা -চরাবঘূর্ণিতেক্ষণং বিলম্বিতাকুলালকম্ |
অসংস্থিতৈঃ পদৈঃ প্রিয়া করোতি মত্তচেষ্টিতম্ || ২২||
অষ্টাক্ষরকৃতে পাদে সর্বাণ্যেব ভবন্তি হি |
গুরূণি যস্মিন্সা নাম্না বিদ্যুন্মালেতি কীর্তিতা || ২৩||
মৌ গৌ চান্ত্যৌ যস্যাঃ পাদে পাদস্যান্তে বিচ্ছেদশ্চ |
সা চানুষ্টুপ্ছন্দস্যুক্তা নিত্যং সদ্ভির্বিদ্যুন্মালা || ২৪||
সাম্ভোভারৈরানানদ্ভিঃ শ্যামাম্ভোদৈর্ব্যাপ্তে ব্যোম্নি |
আদিত্যাংশুস্পর্ধিন্যেষা দিক্ষু ভ্রান্তা বিদ্যুন্মালা || ২৫||
পঞ্চমং সপ্তমং চান্ত্যং গুরু পাদেঽষ্টকে তথা |
ছন্দোজ্ঞৈর্জ্ঞেয়মেতত্তু বৃত্তং চিত্তবিলাসিতম্ || ২৬||
স্মিতবশবিপ্রকাশৈর্দশনপদৈরমীভিঃ |
বরতনু পূর্ণচন্দ্রং তব মুখমাবৃণোতি || ২৭||
নবাক্ষরকৃতে পাদে ত্রীণি স্যুর্নৈধনানি চ |
গুরূণি যস্যাঃ সা নাম্না জ্ঞেয়া মধুকরী যথা || ২৮||
ষডিহ যদি লঘূনি স্যুর্নিধনগতমকারশ্চেৎ |
বুধজনবৃহতীসংস্থা ভবতি মধুকরী নাম্না || ২৯||
কুসুমিতমভিপশ্যন্তী বিবিধতরুগণৈশ্ছন্নম্ |
বনমতিশয়গন্ধাঢ্যং ভ্রমতি মধুকরী হৃষ্টা || ৩০||
দশাক্ষরকৃতে পাদে ত্রীণ্যাদৌ ত্রীণি নৈধনে |
যস্যা গুরূণি সা জ্ঞেয়া পঙ্ক্তিরুৎপলমালিকা || ৩১||
ত্রীণ্যাদৌ যদি হি গুরূণি স্যুশ্চৎবারো যদি লঘবো মধ্যে |
পঙ্ক্তাবন্তগতমকারঃ স্যাদ্বিজ্ঞেয়া কুবলয়মালাখ্যা || ৩২||
যথা -অস্মিংস্তে শিরসি তদা কান্তে বৈডূর্যস্ফটিকসুবর্ণাঢ্যে |
শোভাং স্বাং ন বহতি তাং বদ্ধা সুশ্লিষ্টা কুবলয়মালেয়ম্ || ৩৩||
দ্বিতীয়ং চ চতুর্থং চ ষষ্টমষ্টমমেব চ |
হ্রস্বং দশাক্ষরে পাদে যত্র সা শিখিসারিণী || ৩৪||
জৌ ত্রিকৌ হি পাদগৌ তু যস্য গৌ চ সংশ্রিতৌ তথা সমৌ স্তৌ |
পঙ্ক্তিয়োগসুপ্রতিষ্ঠিতাঙ্গী সা ময়ূরসারিণীতি নাম্না ||
৩৫||
যথা -নৈব তেঽস্তি সঙ্গমো মনুষ্যৈর্নাপি কামভোগচিহ্নমন্যৎ |
গর্ভিণীব দৃশ্যসে হ্যনার্যে কিং ময়ূরসারিণী ৎবমেবম্ ||
৩৬||
আদ্যং চতুর্থমন্ত্যং চ সপ্তমং দশমং তথা |
গুরূণি ত্রৈষ্টুভে পাদে যত্র স্যুর্দোধকং তু তৎ || ৩৭||
ভৌ তু ভগাবিতি যস্য গণাঃ স্যুঃ স্যাচ্চ যতিস্ত্রিচতুর্ভিরথাঽস্মিন্ |
ত্রৈষ্টুভমেব হি তৎখলু নাম্না দোধকবৃত্তমিতি প্রবদন্তি || ৩৮||
যথা -প্রস্খলিতাপ্রপদপ্রবিচায়ং মত্তবিঘূর্ণিতগাত্রবিলাসম্ |
পশ্য বিলাসিনি কুঞ্জরমেতং দোধকবৃত্তময়ং প্রকরোতি || ৩৯||
আদৌ দ্বৌ পঞ্চমং চৈবাপ্যষ্টমং নৈধনং তথা |
গুরুণ্যেকাদশে পাদে যত্র তন্মোটকং যথা || ৪০||
এষোঽম্বুদতুল্যনিস্বনরবঃ ক্ষীবঃ স্খলমানবিলম্বগতিঃ |
শ্রুৎবা ঘনগর্জিতমদ্রিতটে বৃক্ষান্ প্রতিমোটয়তি দ্বিরদঃ || ৪১||
নবমং সপ্তমং ষষ্ঠং তৃতীয়ং চ ভবেল্লঘু |
সর্বাস্ববস্থাসু চ কামতন্ত্রে যোগ্যাসি কিং বা বহুনেন্দ্রবজ্রা || ৪৩||
এভিরেব তু সংযুক্তা লঘুভিস্ত্রৈষ্টুভী যদা |
উপেন্দ্রবজ্রা বিজ্ঞেয়া লঘ্বাদাবিহ কেবলম্ || ৪৪||
প্রিয়ে শ্রিয়া বর্ণবিশেষণেন স্মিতেন কান্ত্যা সুকুমারভাবৈঃ |
অমী গুণা রূপগুণানুরূপা ভবন্তি তে কিং ৎবমুপেন্দ্রবজ্রা || ৪৫||
আদ্যং তৃতীয়মন্ত্যং চ সপ্তমং নবমং তথা |
গুরূণ্যেকাদশে পাদে যত্র সা তু রথোদ্ধতা || ৪৬||
কিং ৎবয়া সুভট দূরবর্জিতং নাত্মনো ন সুহৃদাং প্রিয়ং কৃতম্ |
যৎপলায়নপরায়ণস্য তে যাতি ধূলিরধুনা রথোদ্ধতা ||
৪৭||
যথা -কিং ৎবয়া কুমতিসঙ্গয়া সদা নাজ্ঞয়েব সুহৃদাং প্রিয়ং কৃতম্ |
যদ্ গৃহাদ্বচনরোষকম্পিতা যাতি তূর্ণমবলা রথোদ্ধতা || ৪৮||
আদ্যং তৃতীয়মন্ত্যং চ সপ্তমং দশমং গুরু |
যস্যাস্তু ত্রৈষ্টুভে পাদে বিজ্ঞেয়া স্বাগতা হি সা || ৪৯||
যথা -অদ্য মে সফলমায়তনেত্রে জীবিতং মদনসংশ্রয়ভাবম্ |
আগতাসি ভবনং মম যস্মাৎস্বাগতং তব বরোরু নিষীদ ||
৫০||
ষষ্ঠং চ নবমং চৈব লঘুনী ত্রৈষ্টুভে যদি |
গুরূণ্যন্যানি পাদে তু সা জ্ঞেয়া শালিনী যথা || ৫১||
দুঃশীলং বা নির্গুণং বাপরং বা
লোকে ধৈর্যাদপ্রিয়ং ন ব্রবীষি |
তস্মাচ্ছীলং সাধুহেতোঃ সুবৃত্তং
মাধুর্যাৎস্যাৎসর্বথা শালিনী ৎবম্ || ৫২||
তৃতীয়ং চৈব ষষ্ঠং চ নবমং দ্বাদশং তথা |
গুরূণি জাগতে পাদে যত্র তত্তোটকং ভবেৎ || ৫৩||
যদি সোঽত্র ভবেত্তু সমুদ্রসমস্ত্রিষু চাপি তথা নিয়মেন যতিঃ |
সততং জগতীবিহিতং হি ততং গদিতং খলু তোটকবৃত্তমিদম্ || ৫৪||
যথা -কিমিদং কপটাশ্রয়দুর্বিষহং বহুশাঠ্যমথোল্বণরূক্ষকথম্ |
স্বজনপ্রিয়সজ্জনভেদকরং ননু তোটকবৃত্তমিদং কুরুষে ||
৫৫||
আদ্যং তৃতীয়মন্ত্যং চ পঞ্চমং ষষ্ঠমেব চ |
তথোপান্ত্যং জগত্যাং চ গুরু চেৎকুমুদপ্রভা || ৫৬||
যৌ ত্রিকৌ তথা ন্যৌ যদি খলু পাদে
ষড্ভিরেব বর্ণৈর্যদি চ যতিঃ স্যাৎ |
নিত্যসংনিবিষ্টা জগতিবিধানে
নামতঃ প্রসিদ্ধা কুমুদনিভা সা || ৫৭||
যথা -মন্মথেন বিদ্ধা সললিতভাবা
নৃত্তগীতয়োগা প্রবিকসিতাক্ষী |
নিন্দ্যমদ্য কিং ৎবং বিগলিতশোভা
চন্দ্রপাদয়ুক্তা কুমুদবতী চ || ৫৮||
মতান্তরে -যদি খলু পাদে ন্যৌ ত্রিকৌ যথা যৌ
যতিরপি বর্ণৈঃ ষড্ভিরেব চেৎস্যাৎ |
জগতিবিধানে নিত্যসংনিবিষ্টা
কুমুদনিভা সা নামতঃ প্রসিদ্ধা || ৫৯||
যথা -কুমুদনিভা ৎবং কামবাণবিদ্ধা কিমসি নতভ্রূঃ শীতবাতদগ্ধা |
মৃদুনলিনীবাপাণ্ডুবক্ত্রশোভা কথমপি জাতা হ্যগ্রতঃ সখীনাম্ || ৬০||
দ্বাদশাক্ষরকে পাদে সপ্তমং দশমং লঘু |
আদৌ পঞ্চাক্ষরচ্ছেদশ্চন্দ্রলেখা তু সা যথা || ৬১||
বক্ত্রং সৌম্যং তে পদ্মপত্রায়তাক্ষম্
কামস্যাবাসং সুনাসোচ্চপ্রহাসম্ |
কামস্যাপীদং কামমাহর্তুকামং
কান্তে কান্ত্যা ৎবং চন্দ্রলেখেব ভাসি || ৬২||
তৃতীয়মন্ত্যং নবমং পঞ্চমং চ যদা গুরু |
দ্বাদশাক্ষরকে পাদে যত্র সা প্রমিতাক্ষরা || ৬৩||
যথা -স্মিতভাষিণী হ্যচপলাপরুষা নিভৃতাপবাদবিমুখী সততম্ |
অপি কস্যচিদ্যুবতিরস্তি সুখা প্রমিতাক্ষরা স হি পুমাঞ্জয়তি || ৬৪||
দ্বিতীয়মন্ত্যং দশমং চতুর্থং পঞ্চমাষ্টমে |
গুরূণি দ্বাদশে পাদে বংশস্থা জগতী তু সা || ৬৫||
যদি ত্রিকৌ জ্তৌ ভবতস্তু পাদতস্তথৈব চ জ্রাববসানসংস্থিতৌ |
তদা হি বৃত্তং জগতীপ্রতিষ্ঠিতং বদন্তি বংশস্থমিতীহ নামতঃ || ৬৬||
ন মে প্রিয়া ৎবং বহুমানবর্জিতাং প্রিয়ং প্রিয়া তে পরুষাভিভাষিণী |
তথা চ পশ্যাম্যহমদ্য বিগ্রহং ধ্রুবং হি বংশস্থগতিং করিষ্যতি || ৬৭||
চতুর্থমন্ত্যং দশমং সপ্তমং চ যদা গুরু |
ভবেদ্ধি জাগতে পাদে তদা স্যাদ্ধরিণপ্লুতা || ৬৮||
পরুষবাক্যকশাভিহিতা ৎবয়া ভয়বিলোকনপার্শ্বনিরীক্ষণা |
বরতনুঃ প্রততপ্লুতসর্পণৈরনুকরোতি গতৈর্হরিণপ্লুতম্ || ৬৯||
সপ্তমং নবমং চান্ত্যমুপান্ত্যং চ যদা গুরু |
দ্বাদশাক্ষরকে পাদে কামদত্তেতি সা যথা || ৭০||
করজপদবিভূষিতা যথা ৎবং সুদতি দশনবিক্ষতাধরা চ |
গতিরপি চরণাবলগ্নমন্দা ৎবমসি মৃগনিভাক্ষি কামদত্তা || ৭১||
আদ্যং চতুর্থং দশমং সপ্তমং চ যদা লঘু |
পাদে তু জাগতে যস্যা অপ্রমেয়া তু সা যথা || ৭২||
ন তে কাচিদন্যা সমা দৃশ্যতে স্ত্রী
নৃলোকে বিশিষ্টা গুণৈরদ্বিতীয়ৈঃ |
ত্রিলোক্যাং গুণজ্জ্ঞান্ সমাহৃত্য সর্বান্
জগত্যপ্রমেয়াসি সৃষ্টা বিধাত্রা || ৭৩||
দ্বিতীয়ং পঞ্চমং চৈব হ্যষ্টমেকাদশে যথা |
পাদে যত্র লঘূনি স্যুঃ পদ্মিনী নাম সা যথা || ৭৪||
রাস্ত্রিকাঃ সাগরাখ্যা নিবিষ্টা যদা
স্যাৎ ত্রিকে চ ত্রিকে যুক্তরূপা যতিঃ |
সন্নিবিষ্টা জগত্যাস্ততস্সা বুধৈর্
নামতশ্চাপি সঙ্কীর্ত্যতে পদ্মিনী || ৭৫||
দেহতোয়াশয়া বক্ত্রপদ্মোজ্জ্বলা নেত্রভৃঙ্গাকুলা দন্তহংসস্মিতা |
কেশপাশচ্ছদা চক্রবাকস্তনী পদ্মিনীব প্রিয়ে ভাসি মে সর্বদা || ৭৬||
ফুল্লপদ্মাননা ৎবং দ্বিরেফেক্ষণা কেশপত্রচ্ছদা চক্রবাকস্তনী |
পীততোয়াবলী বদ্ধকাঞ্চীগুণা পদ্মিনীব প্রিয়ে ভাসি নীরে স্থিতা || ৭৭||
আদৌ ষট্ দশমং চৈব পাদে যত্র লঘূন্যথ |
শেষাণি তু গুরূণি স্যুর্জাগতে পুটসঞ্জ্ঞিতা || ৭৮||
যদি চরণনিবিষ্টৌ নৌ তথা ম্যৌ যতিবিধিরপি যুক্ত্যাষ্টাভিরিষ্টঃ |
ভবতি চ জগতীস্থঃ সর্বদাসৌ য ইহ হি পুটবৃত্তং নামতস্তু || ৭৯||
উপবনসলিলানাং বালপদ্মৈর্ভ্রমরপরভৃতানাং কণ্ঠনাদৈঃ |
মদনমদবিলাসৈঃ কামিনীনাং কথয়তি পুটবৃত্তং পুষ্পমাসঃ || ৮০||
দ্বিতীয়ান্ত্যে চতুর্থং চ নবমৈকাদশে গুরু |
বিচ্ছেদোঽতিজগত্যাং তু চতুর্ভিঃ সা প্রভাবতী || ৮১||
কথং ন্বিদং কমলবিশাললোচনে গৃহং ধনৈঃ পিহিতকরে দিবাকরে |
অচিন্তয়ন্ত্যভিনববর্ষবিদ্যুতস্ত্বমাগতা সুতনু যথা প্রভাবতী || ৮২||
ত্রীণ্যাদাবষ্টমং চৈব দশমং নৈধনদ্বয়ম্ |
গুরূণ্যতিজগত্যাং তু ত্রিভিশ্ছেদৈঃ প্রহর্ষিণী || ৮৩||
ভাবস্থৈর্মধুরকথৈঃ সুভাষিতৈস্ত্বং
সাটোপস্খলিতবিলম্বিতৈর্গতৈশ্চ |
শোভাঢ্যৈর্হরসি মনাংসি কামুকানাং
সুব্যক্তং হ্যতিজগতী প্রহর্ষিণী চ || ৮৪||
ষষ্ঠং চ সপ্তমং চৈব দশমৈকাদশে লঘু |
ত্রয়োদশাক্ষরে পাদে জ্ঞেয়ং মত্তময়ূরকম্ || ৮৫||
বিদ্যুন্নদ্ধাঃ সেন্দ্রধনুরঞ্জিতদেহা
বাতোদ্ধূতাঃ শ্বেতবলাকাকৃতশোভাঃ |
এতে মেঘা গর্জিতনাদোজ্জ্বলচিহ্নাঃ
প্রাবৃট্কালং মত্তময়ূরাঃ কথয়ন্তি || ৮৬||
আদৌ দ্বে চতুর্থং চৈব চাষ্টমৈকাদশে গুরু |
অন্ত্যোপান্ত্যে চ শক্বর্যা বসন্ততিলকা যথা || ৮৭||
চিত্রৈর্বসন্তকুসুমৈঃ কৃতকেশহস্তা |
স্রগ্দামমাল্যরচনা সুবিভূষিতাঙ্গী |
নানাবসন্তকবিভূষিতকর্ণপাশা
সাক্ষাদ্বসন্ততিলকেব বিভাতি নারী || ৮৮||
পঞ্চাদৌ শক্বরী পাদে গুরূণি ত্রীণি নৈধনে |
পঞ্চাক্ষরাদৌ চ যতিরসম্বাধা তু সা যথা || ৮৯||
যথা -মানালোকজ্ঞঃ সুতবলকুলশীলাঢ্যো
যস্মিন্সম্মানং ন সদৃশমনু পশ্যেদ্ধি |
গচ্ছেত্তং ত্যক্ত্বা দ্রুতগতিরপরং দেশম্
কীর্ণা নানার্থৈরবনিরিয়মসম্বাধা || ৯০||
চৎবার্যাদৌ গুরূণি স্যুর্দশমৈকাদশে তথা |
অন্ত্যোপান্ত্যে চ শক্বর্যাঃ পাদে তু শরভা যথা || ৯১||
এষা কান্তা ব্রজতি ললিতা বেপমানা
গুল্মৈশ্চ্ছন্নং বনমভিনবৈঃ সম্প্রবিদ্ধম্ |
হা হা কষ্টং কিমিদমিতি নো বেদ্মি মূঢো
ব্যক্তং কান্তে শরভললিতান্ত্বং করোষি || ৯২||
অদৌ ষট্ দশমং চৈব লঘু চৈব ত্রয়োদশম্ |
যত্রাতিশক্বরে পাদে জ্ঞেয়া নান্দীমুখী তু সা || ৯৩||
যথা -ন খলু তব কদাচিৎক্রোধতাম্রায়তাক্ষং
ভ্রুকুটিবলিতভঙ্গং দৃষ্টপূর্বং ময়াস্যম্ |
কিমিহ বহুভিরুক্তৈর্যা মমেচ্ছা হৃদিস্থা
ৎবমসি মধুরবাক্যা দেবি নান্দীমুখীব || ৯৪||
আদ্যং চতুর্থং ষষ্ঠং চ নৈধনং চ যদা গুরু |
ষোডশাক্ষরকে পাদে যত্রেভললিতং তু তৎ || ৯৫||
ভ্রৌ যদি নাশ্চ নিত্যমিহ বিরচিতচরণঃ
গশ্চ তথা বৈ ভবতি নিধনমুপগতঃ |
স্যাদপি চাষ্টিমেব যদি সততমনুগতং
তৎখলু বৃত্তমগ্রবৃষভগজবিলসিতম্ || ৯৬||
কালতোয়ধরৈঃ সুধীরধনপটুপটহরবৈঃ
সর্জকদম্বনীপকুটজকুসুমসুরভিঃ |
কন্দলসেন্দ্রগোপকরচিতমবনিতলং
বীক্ষ্য করোত্যসৌ বৃষভগজবিলসিতম্ || ৯৭||
আদ্যাৎপরাণি বৈ পঞ্চ দ্বাদশং সত্রয়োদশঃ |
অন্ত্যোপান্ত্যে চ দীর্ঘাণি ললিতপ্রবরং হি তৎ || ৯৮||
যদা য্মৌ পাদস্থৌ ভবত ইহ চেৎস্তৌ তথা গৌ
তথা ষড্ভিশ্চান্যৈর্যতিরপি চ বর্ণৈর্যথা স্যাৎ |
তদপ্যষ্টৌ নিত্যং সমনুগতমেবোক্তমন্যৈঃ
প্রয়োগজ্ঞৈর্বৃত্তং প্রবরললিতং নামতস্তু || ৯৯||
যথা -নখালীঢং গাত্রং দশনখচিতং চোষ্ঠগণ্ডং
শিরঃ পুষ্পোন্মিশ্রং প্রবিলুলিতকেশালকান্তম্ |
গতিঃ খিন্না চেয়ং বদনমপি সম্ভ্রান্তনেত্রম্
অহো শ্লাঘ্যং বৃত্তং প্রবরললিতং কামচেষ্টম্ || ১০০||
আদ্যাৎপরাণি পঞ্চাথ দ্বাদশং সত্রয়োদশম্ |
অন্ত্যং সপ্তদশে পাদে শিখরিণ্যাং গুরূণি চ || ১০১||
চতুর্ভিস্তস্যৈব প্রবরললিতস্য ত্রিকগণৈঃ
যদা লৌ গশ্চান্তে ভবতি চরণেঽত্যষ্টিগদিতে |
যদা ষড্ভিশ্চ্ছেদো ভবতি যদি মার্গেণ বিহিতঃ
তদা বৃত্তেষ্বেষা খলু শিখরিণী নাম গদিতা || ১০২||
যথা -মহানদ্যা ভোগং পুলিনমিব ভাতি তে জঘনং
তথাস্যং নেত্রাঢ্যং ভ্রমরসহিতং পঙ্কজমিব |
গতির্মন্দা চেয়ং সুতনু তব চেষ্টা সুললিতা
স্তনাভ্যাং তাভ্যাং ৎবং শিখরিণি সুপীনাসি বনিতে || ১০৩||
যত্র পঞ্চ লঘূন্যাদৌ ত্রয়োদশচতুর্দশে |
ষোডশৈকাদশে চৈব তৎস্যাদ্বৃষভচেষ্টিতম্ || ১০৪||
যদি হি চরণে ন্সৌ স্লৌ গঃ ক্রমাদ্বিনিবেশিতাঃ
যদি খলু যতিঃ ষড্ভির্বর্ণৈর্স্তথা দশভিঃ পুনঃ |
যদি বিহিতং স্যাদত্যষ্টিঃ প্রয়োগসুখাশ্রয়ং
বৃষভললিতং বৃত্তং জ্ঞেয়ং তথা হরিণীতি বা ||
১০৫||
যথা -জলধররবং শ্রুৎবা শ্রুৎবা মদোচ্ছ্রয়দর্পিতো
বিলিখিতমহীশৃঙ্গাক্ষেপৈর্বৃষৈঃ প্রতিনর্দ্য চ |
স্বয়ুবতিবৃতো গোষ্ঠাদ্গোষ্ঠং প্রয়াতি চ নির্ভয়ো
বৃষভললিতং চিত্রং বৃত্তং করোতি চ শাদ্বলে || ১০৬||
চৎবার্যাদৌ চ দশমং গুরু যত্র ত্রয়োদশং
চতুর্দশং তথান্ত্যে দ্বে চৈকাদশমথাপি চ || ১০৭||
যদা সপ্তদশে পাদে শেষাণি চ লঘূন্যথ|
ভবন্তি যস্মিন্সা জ্ঞেয়া শ্রীধরী নামতো যথা || ১০৮||
মো ভ্নৌ চ স্যুশ্চরণরচিতাস্তৌ গুরূ চ প্রবিষ্টা
শ্ছেদঃ শিষ্টো যদি চ দশভিঃ স্যাত্তথান্যৈশ্চতুর্ভিঃ |
অত্যষ্টৌ চ প্রতিনিয়মিতা বর্ণতঃ স্পষ্টরূপা
সা বিজ্ঞেয়া দ্বিজমুনিগণৈঃ শ্রীধরী নামতস্তু || ১০৯||
স্নানৈশ্চূর্ণৈঃ সুখসুরভিভির্গন্ধবাসৈশ্চ ধূপৈঃ
পুষ্পৈশ্চান্যৈঃ শিরসি রচিতৈর্বস্ত্রয়োগৈশ্চ তৈস্তৈঃ
|
নানারত্নৈঃ কনকখচিতৈরঙ্গসম্ভোগসংস্থৈ
র্ব্যক্তং কান্তে কমলনিলয়া শ্রীধরীবাতিভাসি || ১১০||
আদ্যং চতুর্থং ষষ্ঠং চ দশমং নৈধনং গুরু |
তদ্বংশপত্রপতিতং দশভিঃ সপ্তভির্যতিঃ || ১১১||
যথা এষ গজোঽদ্রিমস্তকতটে কলভপরিবৃতঃ
ক্রীডতি বৃক্ষগুল্মগহনে কুসুমভিরনতে |
মেঘরবং নিশম্য মুদিতঃ পবনজবসমঃ
সুন্দরি বংশপত্রপতিতং পুনরপি কুরুতে || ১১২||
দ্বিতীয়মন্ত্যং ষষ্ঠং চাপ্যষ্টমং দ্বাদশং তথা |
চতুর্দশং পঞ্চদশং পাদে সপ্তদশাক্ষরে || ১১৩||
ভবন্তি যত্র দীর্ঘাণি শেষাণি চ লঘূন্যথ |
বিলম্বিতগতিঃ সা তু বিজ্ঞেয়া নামতো যথা || ১১৪||
যদা দ্বিরুদিতৌ হি পাদমভিসংশ্রিতৌ জ্সৌ ত্রিকৌ
তথৈব চ পুনস্তয়োর্নিধনমাশ্রিতৌ যৌ লগৌ |
তদষ্টিরতিপূর্বিকা যতিরপি স্বভাবাদ্যথা
বিলম্বিতগতিস্তদা নিগদিতা দ্বিজৈর্নামতঃ || ১১৫||
যথা -বিঘূর্ণিতবিলোচনা পৃথুবিকীর্ণহারা পুনঃ
প্রলম্বরশনা চলৎস্খলিতপাদমন্দক্লমা |
ন মে প্রিয়মিদং জনস্য বহুমানরাগেণ য
ন্মদেন বিবশা বিলম্বিতগতিঃ কৃতা ৎবং প্রিয়ে || ১১৬||
পঞ্চাদৌ পঞ্চদশকং দ্বাদশৈকাদশে গুরু |
চতুর্দশং তথান্ত্যে দ্বে চিত্রলেখা ধৃতৌ স্মৃতা || ১১৭||
যথা নানারত্নাঢ্যৈর্বহুভিরধিকং ভূষণৈরঙ্গসংস্থৈ
র্নানা গন্ধাঢ্যৈর্মদনজনকৈরঙ্গরাগৈর্বিচিত্রৈঃ |
কেশৈঃ স্নানাঢ্যৈঃ কুসুমভরিতৈর্বস্ত্ররাগৈশ্চ তৈস্তৈঃ
কান্তে সঙ্ক্ষেপাৎ কিমিহ বহুনা চিত্রলেখেব ভাসি ||
১১৮||
অন্ত্যং সপ্তদশং চৈব ষোডশং সচতুর্দশম্ |
ত্রয়োদশং দ্বাদশং চ ষষ্ঠমষ্টমমেব চ || ১১৯||
ত্রীণ্যাদৌ চ গুরূণি স্যুর্যস্মিংস্ত্বেকোনবিংশকে |
পাদে লঘূনি শেষাণি শার্দূলক্রীডিতং তু তৎ || ১২০||
ম্সৌ জ্সৌ তৌ গুরু চ প্রয়োগনিয়তা যস্মিন্নিবিষ্টাস্ত্রিকা
আদ্যা চান্ত্যয়তিশ্চতুস্ত্রিকয়ুতা জ্ঞেয়া পরা সপ্তভিঃ |
নিত্যং যৎপদমাশ্রিতা হ্যতিধৃতির্নিত্যং কবীনাং প্রিয়ং
তজ্জ্ঞেয়ং খলু বৃত্তজাতিনিপুণৈঃ শার্দূলবিক্রীডিতম্ || ১২১||
যথা -নানাশস্ত্রশতঘ্নিতোমরহতাঃ প্রভ্রষ্টসর্বায়ুধাঃ
নির্ভিন্নোদরপাদবাহুবদনা নির্ণাশিতাঃ শত্রবঃ |
ধৈর্যোৎসাহপরাক্রমপ্রভৃতিভিস্তৈস্তৈর্বিচিত্রৈর্গুণৈঃ
বৃত্তং তে রিপুঘাতি ভাতি সমরে শার্দূলবিক্রীডিতম্ || ১২২||
তাবত্ত্বং বিজিতেন্দ্রিয়ঃ শুভমতে সর্বাত্মনা প্রত্যহং
দানে শীলবিধৌ চ যোজয় মনঃ স্বর্গাপবর্গাপহম্ |
যাবদ্ ব্যাধিজরাপ্রচণ্ডনখরো ব্যায়ৎসটাভির্ভৃশং
মৃত্যুস্তে ন করোতি জীবিতমৃগৈঃ শার্দূলবিক্রীডিতম্ || ১২৩||
চৎবার্যাদৌ চ ষষ্ঠং চ সপ্তমং সচতুর্দশম্ |
তথা পঞ্চদশং চৈব ষিডশং নৈধনং তথা || ১২৪||
এতানি চ গুরূণি স্যুঃ শেষাণি তু লঘূন্যথ |
পাদে যত্র কৃতৌ জ্ঞেয়া নাম্না সুবদনা তু সা || ১২৫||
ম্রৌ ম্নৌ য্ভৌ ল্গৌ চ সম্যগ্যদি চ বিরচিতাঃ পাদে ক্রমবশাৎ
বিচ্ছেদঃ সপ্তভিঃ স্যাৎপুনরপি চ যতিঃ সপ্তাক্ষরকৃতা |
যদ্যেষা সংশ্রিতা স্যাৎকৃতিমপি চ পুনঃ শ্লিষ্টাক্ষরপদা
বিদ্বদ্ভির্বৃত্তজাতৌ তত ইহ গদিতা নাম্না সুবদনা || ১২৬||
যথা -নেত্রে লীলালসান্তে কমলদলনিভে ভ্রূচাপবিনতে
রক্তোষ্ঠং পীনমধ্যং সমসহিতঘনাঃ স্নিগ্ধাশ্চ দশনাঃ |
কর্ণাবংসপ্রলম্বৌ চিবুকমপি নতং ঘোণা সুরুচিরা
ব্যক্তং ৎবং মর্ত্যলোকে বরতনু বিহিতাস্যেকা সুবদনা || ১২৭||
চৎবার্যাদৌ তথা ষষ্ঠং সপ্তমং চ চতুর্দশম্ |
অষ্টাদশং সপ্তদশং তথা পঞ্চদশং পুনঃ || ১২৮||
অন্ত্যোপান্ত্যে গুরূণ্যত্র লঘূন্যন্যানি সর্বদা |
একবিংশতিকে পাদে স্রগ্ধরা নাম সা যথা || ১২৯||
ম্রৌ ম্নৌ যৌ যশ্চ সম্যগ্যদি হি বিরচিতাঃ স্যুস্ত্রিকাঃ পাদয়োগে
বর্ণৈঃ পূর্বোপদিষ্টৈর্যতিরপি চ পুনঃ সপ্তভিঃ সপ্তভিঃ স্যাৎ |
বৃত্তং সম্যগ্যদি স্যাৎপ্রকৃতিমনুগতং তৎববিদ্ভিঃ প্রদিষ্টং
বিজ্ঞেয়ং বৃত্তজাতৌ কবিজনদয়িতা স্রগ্ধরা নামতস্তু || ১৩০||
যথা -চূতাশোকারবিন্দৈঃ কুরবকতিলকৈঃ কর্ণিকারৈঃ শিরীষৈঃ
পুন্নাগৈঃ পারিজাতৈর্বকুলকুবলয়ৈঃ কিংশুকৈঃ সাতিমুক্তৈঃ |
এতৈর্নানাপ্রকারৈঃ বহুলসুরভিভির্বিপ্রকীর্ণৈশ্চ তৈস্তৈঃ
বাসন্তৈঃ পুষ্পবৃন্দৈর্নরবর বসুধা স্রগ্ধরেবাদ্য ভাতি || ১৩১||
চতুর্থমাদ্যং ষষ্ঠং চ দশমং দ্বাদশং তথা |
ষোডশাষ্টাদশে চৈব নৈধনং চ গুরূণ্যথ || ১৩২||
দ্বাবিংশত্যক্ষরে পাদে শেষাণি চ লঘূন্যথ |
ভবন্তি যত্র তজ্জ্ঞেয়ং ভদ্রকং নামতো যথা || ১৩৩||
ভ্রৌ চরণে যদা বিনিয়তৌ ত্রিকৌ ক্রমবশাদথাতিকৃতিবিধৌ
ন্রৌ চ ততঃ পরং চ রুচিরাবনন্তরকৃতৌ নগাবপি পুনঃ |
তচ্চ দশাষ্টবর্ণরচিতা চতুর্ষ্বপি তথা যতিশ্চ সততং
ভদ্রকবৃত্তমেব খলু নাট্যয়োগকুশলৈর্বুধৈর্নিগদিতম্ || ১৩৪||
উৎপ্লুতমেকহস্তচরণং দ্বিতীয়কররেচিতং
বংশমৃদঙ্গবাদ্যমধুরং বিচিত্রকরণানুগং বহুবিধম্ |
ভদ্রকমেতদদ্য সুভগে বিদগ্ধগতিচেষ্টিতৈঃ সুললিতৈঃ
নৃত্যসি বিভ্রমাকুলপদং বিবিক্তরসভাবিতং শশিমুখি || ১৩৫||
অন্ত্যমেকোনবিংশং চ সপ্তমং সত্রয়োদশম্ |
একাদশং সপ্তদশং পঞ্চমং চ গুরূণ্যথ || ১৩৬||
শেষাণি চ লঘূনি স্যুর্বিকৃত্যাশ্চরণে বুধৈঃ |
বৃত্তং তদশ্বললিতং বিজ্ঞেয়ং নামতো যথা || ১৩৭||
যদি চ নকার আদিরচিতঃ পদে বিরচিতোঽন্ত এব লগৌ
যদি চ নভৌ ত্রিধা চ নিহিতৌ ক্রমেণ খলু মধ্যাবপি তথা |
যদি চ সমাশ্রিতং হি বিকৃতিং যতিশ্চ দশভিস্তথৈকসহিতৈঃ
তত ইহ কীর্তিতং মুনিগণৈর্বিশুদ্ধচরিতৈস্তদশ্বললিতম্ || ১৩৮||
বিবিধতুরঙ্গনাগরথয়োধসঙ্কুলমলং বলং সমুদিতং
শরশতশক্তিকুন্তপরিধাসিয়ষ্টিবিততং বহুপ্রহরণম্ |
রিপুশতমুক্তশস্ত্ররবভীতশঙ্কিতভটং ভয়াকুলদিশং
কৃতমভিবীক্ষ্য সংযুগমুখে সমর্পিতগুণং ৎবয়াশ্বললিতম্ || ১৩৯||
ষডাদাবষ্টমং চৈব হ্যেকাদশচতুর্দশে |
বিংশং সপ্তদশং চৈব ত্রয়োবিংশং তথৈব চ || ১৪০||
এতানি চ লঘূনি স্যুঃ শেষাণ্যথ গুরূণি চ |
চতুর্বিংশতিকে পাদে মেঘমালেতি সা যথা || ১৪১||
যদি খলু চরণস্থিতৌ নৌ ত্রিকৌ
কৃতিকারব্যাস্তথা রাঃ স্যুঃ ক্রমাৎ |
ভবতি যদি যতিস্তথা সপ্তভিঃ সপ্তভি
স্ত্রিষ্বতোঽন্যা যতিঃ পঞ্চ বিদ্যাত্তথা || ১৪২||
পবনবলসমাহৃতা তীব্রগম্ভীরনাদা বলাকাবলীমেখলা
ক্ষিতিধরসদৃশোচ্চরূপা মহানীলধূমাঞ্জনাভাম্বুগর্ভোদ্ভবা |
সুরপতিধনুরুজ্জ্বলাবদ্ধকক্ষ্যা তডিদ্দ্যোতসন্নাহপট্টীজ্বলা
গগনতলবিসারিণী প্রাবৃষণ্যা দৃঢং মেঘমালাধিকং শোভতে || ১৪৩||
আদ্যং চৈব চতুর্থং চ পঞ্চমং ষষ্ঠমেব চ |
নবমং দশমং চৈব নৈধনং চ ভবেদ্গুরু || ১৪৪||
লঘূন্যন্যানি শেষাণি পাদে স্যুঃ পঞ্চবিংশকে |
বৃত্তজ্জ্ঞৈঃ সা তু বিজ্ঞেয়া ক্রৌঞ্চপাদীতি নামতঃ || ১৪৫||
ভ্মৌ যদি পাদে স্ভাবপি চেষ্টাবভিকৃতিরপি চ হি যদি খলু বিহিতা
নাশ্চ সমুদ্রাঃ স্যুর্বিনিবিষ্টা যদি চ খলু গুরু ভবতি নিধনগতম্ |
পঞ্চভিরাদৌ ছেদমুপেতা পুনরপি যতিরিহ যদি খলু দশভিঃ
ক্রৌঞ্চপদেয়ং বৃত্তবিধানে সুরগণপিতৃগণমুনিগণবিহিতা || ১৪৬||
যঃ কিল দাক্ষং বিদ্রুতসোমং ক্রতুবরমচমসমপগতকলশং
পাতিতয়ূপং ক্ষিপ্তচষালং বিচয়নমসমিধমপশুকচরুকম্ |
কার্মুকমুক্তেনাশু চকার ব্যপগতসুরগণপিতৃগণমিষুণা
নিত্যমসৌ তে দৈত্যগণারিঃ প্রদহতু মখমিব রিপুগণমখিলম্ || ১৪৭||
যা কপিলাক্ষী পিঙ্গলকেশী কলিরুচিরনুদিনমনুনয়কঠিনা
দীর্ঘতরাভিঃ স্থূলসিরাভিঃ পরিবৃতবপুরতিশয়কুটিলগতিঃ |
আয়তজঙ্ঘা নিম্নকপোলা লঘুতরকুচয়ুগপরিগতহৃদয়া
সা পরিহার্যা ক্রৌঞ্চপদা স্ত্রী ধ্রুবমিহ নিরবধিসুখমভিলষতা || ১৪৮||
অষ্টাবাদৌ গুরূণি স্যুস্তথা চৈকোনবিংশকম্ |
একবিংশং চ বিজ্ঞেয়ং চতুর্বিংশং সনৈধনম্ || ১৪৯||
এতানি গুরু সঙ্খ্যানি শেষাণি চ লঘূন্যথ |
ষড্বিংশত্যক্ষরে পাদে তদ্ভুজঙ্গবিজৃম্ভিতম্ || ১৫০||
যস্যাং মৌ তো নাঃ স্ত্রৌ নিত্যং প্রতিচরণমথ
গদিতকাস্ত্রিকা হ্যনুপূর্বশঃ
ষড্বিংশত্যামেকোনায়াং চ যদি হি
খলু যতিরভিধা চতুর্ভিরথাষ্টাভিঃ |
পশ্চাদন্ত্যৌ ল্গৌ সংযোজ্যৌ যদি ভবতি
মনুজদয়িতাং সমাশ্রিতমুৎকৃতিং
নাম্না বৃত্তং লোকে খ্যাতং কবিবদন
বিকসনপরং ভুজঙ্গবিজৃম্ভিতম্ || ১৫১||
যথা -রূপোপেতাং দেবৈঃ সৃষ্টাং সমদগজ
বিলসিতগতিং নিরীক্ষ্য তিলোত্তমাং
প্রাদক্ষিণ্যাৎপ্রাপ্তাং দ্রষ্টুং বহুবদন
মচলনয়নং শিরঃ কৃতবান্ হরিঃ |
দীর্ঘং নিশ্বস্যান্তর্গূঢং স্তনবদন
জঘনরুচিরাং নিরীক্ষ্য তথা পুনঃ
পৃষ্ঠে ন্যস্তং দেবেন্দ্রেণ প্রবরমণি
কনকবলয়ং ভুজঙ্গবিজৃম্ভিতম্ || ১৫২||
দণ্ডকং নাম বিজ্ঞেয়মুৎকৃতেরধিকতরম্ |
মেঘমালাদিকং তৎস্যান্নৌ চাদৌ কাগুহা ত্রিকাঃ || ১৫৩||
যথা -মুদিতজনপদাকুলা স্ফীতসস্যাকরা ভূতধাত্রী ভবন্তং সমভ্যর্চতি
দ্বিরদকরবিলুপ্তহিন্তালতালীবনাস্ত্বাং নমস্যন্তি বিন্ধ্যাদয়ঃ পর্বতাঃ |
স্ফুটিতকলশাশুক্তিনিগীর্ণমুক্তা ফলৈরূর্মিহস্তৈর্নমস্যন্তি বঃ সাগরাঃ
মুদিতজলচরাকুলাঃ সম্প্রকীর্ণমলাঃ কীর্তয়ন্তীব কীর্তিং মহানিম্নগাঃ || ১৫৪||
এতানি সমবৃত্তানি ময়োক্তানি দ্বিজোত্তমাঃ |
বিষমার্ধসমানাং তু পুনর্বক্ষ্যামি লক্ষণম্ || ১৫৫||
যত্র পাদাস্তু বিষমা নানাবৃত্তসমুদ্ভবাঃ |
গ্রথিতাঃ পাদয়োগেন তদ্ বৃত্তং বিষমং স্মৃতম্ || ১৫৬||
দ্বৌ সমং দ্বৌ চ বিষমৌ বৃত্তেঽর্ধবিষমে তথা |
সর্বপাদৈশ্চ বিষমৈর্বৃত্তং বিষমমুচ্যতে || ১৫৭||
হ্রস্বাদ্যমথ দীর্ঘাদ্যং দীর্ঘং হ্রস্বমথাপি বা |
যুগ্মোজবিষমৈঃ পাদৈঃ বৃত্তমর্ধসমং ভবেৎ || ১৫৮||
পাদে সিদ্ধে সমং সিদ্ধং বিষমং সার্বপাদিকম্ |
দ্বয়োরর্ধসমং বিদ্যাদেষ ছেদস্তু পাদতঃ || ১৫৯||
ছেদাস্তু যে ময়া প্রোক্তা সমবৃত্তবিকল্পিতঃ |
ত্রিকৈর্বিষমবৃত্তানাং সম্প্রবক্ষ্যামি লক্ষণম্ || ১৬০||
নৈধনেঽন্যতরস্যাং বৈ প্রথমে পাদ ইষ্যতে |
দ্বিতীয়ে চরণে চ স্যাদিত্যনুষ্টুপ্ সমাসতঃ || ১৬১||
সৌ গৌ তু প্রথমে পাদে স্রৌ ল্গৌ চাপি দ্বিতীয়কে |
যুগ্মেঽর্ধবিষমে পাদে জ্ঞেয়া পথ্যা তু সা ত্রিকৈঃ || ১৬২||
প্রিয়দৈবতমিত্রাসি প্রিয়সম্বন্ধিবান্ধবা |
প্রিয়দানরতা পথ্যা দয়িতে ৎবং প্রিয়াসি মে || ১৬৩||
ম্রৌ গৌ তু প্রথমে পাদে য্সৌ ল্গৌ চ দ্বিতীয়কে |
পাদে ভৌ ল্গৌ তৃতীয়ে চ চতুর্থে তু তসৌ লগৌ || ১৬৪||
নৈবাচারো ন তে মিত্রং ন সম্বন্ধিগুণপ্রিয়া |
সর্বথা সর্ববিষমা পথ্যা ন ভবসি প্রিয়ে || ১৬৫||
অয়ুজোর্লক্ষণং হ্যেতদ্বিপরীতং তু যত্র চ |
পথ্যা হি বিপরীতা সা বিজ্ঞেয়া নামতো যথা || ১৬৬||
কৃতেন রমণস্য কিং সখি রোষেণ তেঽপ্যর্থম্ |
বিপরীতা ন পথ্যাসি ৎবং জডে কেন মোহিতা || ১৬৭||
চতুর্থাদক্ষরাদ্যত্র ত্রিলঘু স্যাদয়ুক্ততঃ |
অনুষ্টুপ্চপলা সা তু বিজ্ঞেয়া নামতো যথা || ১৬৮||
ন খল্বস্যাঃ প্রিয়তমঃ শ্রোতব্যং ব্যাহৃতং সখ্যা |
নারদস্য প্রতিকৃতিঃ কথ্যতে চপলা হীয়ম্ || ১৬৯||
বিপুলা তু যুজি জ্ঞেয়া লঘুৎবাৎসপ্তমস্য তু |
সর্বত্র সপ্তমস্যৈব কেষাঞ্চিদ্বিপুলা যথা || ১৭০||
সঙ্ক্ষিপ্তা বজ্রমধ্যে হি হেমকুম্ভনিভস্তনী |
বিপুলাসি প্রিয়ে শ্রোণ্যাং পূর্ণচন্দ্রনিভাননে || ১৭১||
গঙ্গেব মেঘোপগমে আপ্লাবিতবসুন্ধরা |
কূলবৃক্ষানারুজন্তী স্রবন্তী বিপুলা বলাৎ || ১৭২||
আগতা মেঘসময়ে ভীরু ভীরুকুলোদ্গতে |
একরাত্রৌ পরগৃহং চোরী বন্ধনমর্হসি || ১৭৩||
এবং বিবিধয়োগাস্তু পথ্যাপাদা ভবন্তি হি |
যুগ্মোজবিষমৈঃ পাদৈঃ শেষৈরন্যৈস্ত্রিকৈর্যথা || ১৭৪||
গুর্বন্তকঃ সর্বলঘুস্ত্রিকো নিত্যং হি নেষ্যতে |
প্রথমাদক্ষরাদ্যত্র চতুর্থাৎপ্রাগ্লঘুঃ স্মৃতঃ || ১৭৫||
পথ্যাপাদং সমাস্থাপ্য ত্রীণ্যন্তে তু গুরূণ্যথ |
ভবন্তি পাদে সততং বুধৈস্তদ্বক্রমিষ্যতে || ১৭৬||
দন্তক্ষতাধরং সুভ্রু জাগরগ্লাননেত্রং চ |
রতিসম্ভোগখিন্নং তে দর্শনীয়তরং বক্ত্রম্ || ১৭৭||
ইত্যেষা সর্ববিষমা নামতোঽনুষ্টুবুচ্যতে |
তদ্বিদাং মতবৈষম্যং ত্রিকাদক্ষরতস্তথা || ১৭৮||
পাদে ষোডশমাত্রাস্তু গাথাংশকবিকল্পিতাঃ |
চতুর্ভিরংশকৈর্জ্ঞেয়া বৃত্তজ্ঞৈর্বানবাসিকা || ১৭৯||
অসংস্থিতপদা সুবিহ্বলাঙ্গী মদস্খলিতচেষ্টিতৈর্মনোজ্ঞা |
ক্ব যাস্যসি বরোরু সুরতকালে বিষমা কিং বানবাসিকা ৎবম্ || ১৮০||
স্জৌ স্গৌ চ প্রথমে পাদে তথা চৈব তৃতীয়কে |
কেতুমত্যাং গণাঃ প্রোক্তাঃ ভ্রৌ ন্গৌ গশ্চ সদা বুধৈঃ || ১৮১||
স্ফুরিতাধরং চকিতনেত্রং রক্তকপোলমম্বুজদলাক্ষম্ |
কিমিদং রুষাপহৃতশোভং কেতুমতীসমং বদ মুখং তে || ১৮২||
বক্ত্রস্যাপরপূর্বস্য চাদৌ নৌ রো লগৌ ত্রিকাঃ |
নজৌ রজৌ দ্বিতীয়ে চ শেষাগ্রং পুনরেব তু || ১৮৩||
প্রথমে চ তৃতীয়ে নৌ রলৌ গশ্চ প্রকীর্তিতঃ |
গণাশ্চাপরবক্ত্রে তু নজৌ জ্রৌ দ্বিচতুর্থয়োঃ || ১৮৪||
সুতনু জলপরীতলোচনং জলদনিরুদ্ধমিবেন্দুমণ্ডলম্ |
কিমিদমপরবক্ত্রমেব তে শশিবদনেঽদ্য মুখং পরাঙ্মুখম্ || ১৮৫||
নৌ যৌ তু প্রথমে পাদে ন্জৌ জ্রৌ গশ্চ তথাপরে |
যত্র তৎপুষ্পিতাগ্রা স্যাদ্যদি শেষং তু পূর্ববৎ || ১৮৬||
পবনবলবিধূতচারুশাখং
প্রমুদিতকোকিলকণ্ঠনাদরম্যম্ |
মধুকরপরিগীয়মানশব্দং
বরতনু পশ্য বনং সুপুষ্পিতাগ্রম্ || ১৮৭||
স্জৌ স্লৌ চাদৌ যথা ন্সৌ জ্গৌ ভ্নৌ জ্লৌ গশ্চ তথা পুনঃ |
স্জৌ স্জৌ গশ্চ ত্রিকা হ্যেতে উদ্গতায়াঃ প্রকীর্তিতাঃ || ১৮৮||
তব রোমরাজিরতিভাতি সুতনু মদনস্য মঞ্জরী |
নাভিকমলবিবরোৎপতিতা ভ্রমরাবলীব কুসুমাৎসমুদ্গতা || ১৮৯||
স্জৌ স্লৌ চ ততো ন্সৌ জ্গৌ নৌ সৌ চেতি তৃতীয়কে |
স্জৌ স্জৌ গশ্চ চতুর্থে তু ললিতায়া গণাঃ স্মৃতাঃ || ১৯০||
ললিতাকুলভ্রমিতচারু বসনকরচারুপল্লবা |
প্রবিকসিতকমলকান্তিমুখী প্রবিভাসি দেবী সুরতশ্রমাতুরা || ১৯১||
এবমেতানি বৃত্তানি সমানি বিষমাণি চ |
নাটকাদ্যেষু কাব্যেষু প্রয়োক্তব্যানি সূরিভিঃ || ১৯২||
সন্ত্যন্যান্যপি বৃত্তানি যান্যুক্তানীহ পিণ্ডশঃ |
ন চ তানি প্রয়োজ্যানি ন শোভাং জনয়ন্তি হি || ১৯৩||
যান্যতঃ প্রতিষিদ্ধানি গীতকে তানি যোজয়েৎ |
ধ্রুবায়োগে তু বক্ষ্যামি তেষাং চৈব বিকল্পনম্ || ১৯৪||
বৃত্তলক্ষণমেবং তু সমাসেন ময়োদিতম্ |
অত ঊর্ধ্বং প্রবক্ষ্যামি হ্যার্যাণামপি লক্ষণম্ || ১৯৫||
পথ্যা চ বিপুলা চৈব চষলা মুখতোঽপরা |
জঘনে চপলা চৈব আর্যাঃ পঞ্চ প্রকীর্তিতাঃ || ১৯৬||
আসাং তু সম্প্রবক্ষ্যামি যতিমাত্রাবিকল্পনম্ |
লক্ষণং নিয়মং চৈব বিকল্পগুণসংশ্রয়ম্ || ১৯৭||
যতিশ্ছেদস্তু বিজ্ঞেয়শ্চতুর্মাত্রো গণঃ স্মৃতঃ |
দ্বিতীয়ান্ত্যৌ যুজৌ পাদাবয়ুজৌ ৎবপরৌ স্মৃতৌ || ১৯৮||
গুরুমধ্যবিহীনস্তু চতুর্গণসমন্বিতঃ |
অয়ুগ্গণো বিধাতব্যো যুগ্গণস্তু যথেপ্সিতঃ || ১৯৯||
ষষ্ঠো বৈ দ্বিবিকল্পস্তু নৈধনো হ্যেকসংস্থিতঃ |
পশ্চাদর্ধে তু ষষ্ঠঃ স্যাদেকমাত্রস্তু কেবলঃ || ২০০||
দ্বিবিকল্পস্তু ষষ্ঠো যো গুরুমধ্যো ভবেত্তু সঃ |
তথা সর্বলঘুশ্চৈব যতিসঞ্জ্ঞাসমাশ্রিতা || ২০১||
দ্বিতীয়াদিলঘুর্জ্ঞেয়ঃ সপ্তমে পঞ্চমে যতিঃ |
প্রথমাদিরথান্ত্যে চ পঞ্চমে বা বিধীয়তে || ২০২||
গণেষু ত্রিষু পাদস্য যস্যাঃ পথ্যা তু সা ভবেৎ |
অতশ্চ বিপুলান্যা তু বিজ্ঞেয়া যতিলক্ষণা || ২০৩||
অয়ুজঃ সর্বগুরবো গুরুমধ্যা গণা যুজঃ |
যস্যাঃ স্যুঃ পাদয়োগে তু বিজ্ঞেয়া চপলা হি সা || ২০৪||
ত্রিংশদাদ্যে তু বিজ্ঞেয়াঃ সপ্তবিংশতিশ্চাপরে |
উভয়োরর্ধয়োর্জ্ঞেয়ো মাত্রাপিণ্ডো বিভাগশঃ || ২০৫||
ত্রিংশত্তস্যাশ্চ যদি স্যুরেতানি দ্বিগুণানি তু |
ত্রীণ্যক্ষরাণি চান্যানি ন্যস্য সঙ্খ্যাবিভাগশঃ || ২০৬||
এতানি লঘুসঞ্জ্ঞানি নির্দিষ্টানি সমাসতঃ |
সর্বেষাং চৈবমার্যাণামক্ষরাণাং যথাক্রমম্ || ২০৭||
অর্ধাষ্টমগণার্ধা চ সববার্যা প্রকীর্তিতা |
ষষ্ঠশ্চ দ্বিবিকল্পস্তু নৈধনে হ্যেকসংস্থিতঃ || ২০৮||
পশ্চাদ্বা যো গণঃ ষষ্ঠ একমাত্রঃ স উচ্যতে |
দ্বিবিকল্পস্তু যঃ ষষ্ঠো গুরুমধ্যো ভবেত্তু সঃ || ২০৯||
যথা সর্বলঘুশ্চৈব যতিঃ সঙ্খ্যাসমাশ্রিতা |
সা দ্বিতীয়া দ্বিলঘুকা সপ্তমে প্রথমে যতিঃ || ২১০||
গুরুমধ্যবিহীনস্তু চতুর্গণসমন্বিতঃ |
অয়ুগ্গণো বিধাতব্যঃ যুগ্গণস্তু স এব চ || ২১১||
প্রথমতৃতীয়ৌ পাদৌ দ্বাদশমাত্রৌ ভবেত্তু সা পথ্যা |
বিপুলান্যা খলু গদিতা পূর্বোদিতলক্ষণোপেতা || ২১২||
পথ্যা যথা –
রক্তমৃদুপদ্মনেত্রা সিতদীর্ঘবহুলমৃদুকেশী |
কস্য তু পৃথুমৃদুজঘনা তনুবাহ্বং সোদরী পথ্যা || ২১৩||
বিপুলা যথা –
বিপুলজঘনবদনস্তননয়নৈস্তাম্রাধরোষ্ঠকরচরণৈঃ |
আয়তনাসাগণ্ডৈর্ললাটকর্ণৈঃ শুভা কন্যা || ২১৪||
দ্বিতীয়শ্চ চতুর্থশ্চ গুরুমধ্যগতো ভবেৎ |
উভয়োরর্ধয়োর্যত্র বিজ্ঞেয়া চপলা যথা || ২১৫||
উদ্ভটগামিনী পরুষভাষিণী কামচিহ্নকৃতবেষা |
জানাতি মাংসয়ুক্তা সুরাপ্রিয়া সর্বতশ্চপলা || ২১৬||
পূর্বার্ধে লক্ষণং হ্যেতদস্যাঃ স চ মুখেন তু |
পশ্চিমার্ধে তু চপলা যস্যাঃ সা জঘনেন তু || ২১৭||
মুখচপলা যথা –
আর্যামুখে তু চপলা তথাপি চার্যা ন মে যতঃ সা কিম্ |
দক্ষা গৃহকৃত্যেষু তথা দুঃখে ভবতি দুঃখার্তা || ২১৮||
জঘনচপলা যথা –
বরমৃগনয়নে চপলাসি বরোরু শশাঙ্কদর্পণনিভাস্যে |
কামস্য সারভূতে ন পূর্বমদচারুজঘনেন || ২১৯||
উভয়োরর্ধয়োরেতল্লক্ষণং দৃশ্যতে যদি |
বৃত্তজ্ঞৈঃ সা তু বিজ্ঞেয়া সর্বতশ্চপলা সখি || ২২০||
কার্যৌ দ্বাদশমাত্রৌ চ পাদাবাদ্যৌ তৃতীয়কৌ |
অষ্টাদশ দ্বিতীয়ং চ তথা পঞ্চদশোত্তমা || ২২১||
চতুঃপঞ্চপ্রকারাণাং চতুষ্কাণাং বিশেষতঃ |
প্রস্তারয়োগমাসাদ্য বাহুল্যং সম্প্রদর্শয়েৎ || ২২২||
পঞ্চপঞ্চাশদাদ্যা তু ত্রিংশদাদ্যা তথৈব চ |
আর্যা ৎবক্ষরপিণ্ডেন বিজ্ঞেয়াত্র প্রয়োক্তৃভিঃ || ২২৩||
ত্রিংশতস্ত্বথ বর্ণেভ্যো লঘুবর্ণত্রয়ং ভবেৎ |
শেষাণি গুরুসঙ্খ্যানি হ্যেবং সর্বত্র নির্দিশেৎ || ২২৪||
সর্বেষামেব চার্যাণামক্ষরাণাং যথাক্রমম্ |
সর্বেষাং জাতিবৃত্তানাং পূর্বমুত্তরসঙ্খ্যয়া || ২২৫||
বিকল্পগণনাং কৃৎবা সঙ্খ্যাপিণ্ডেন নির্দিশেৎ |
আর্যাগীতিরথার্যৈব কেবলং ৎবষ্টভির্গণৈঃ || ২২৬||
ইতরার্থে জঃ ষষ্ঠস্তু নলঘুগণ ইষ্যতে |
বৃত্তৈরেবং তু বিবিধৈর্নানাছন্দস্সমুদ্ভবৈঃ |
কাব্যবন্ধাস্তু কর্তব্যাঃ ষট্ত্রিংশল্লক্ষণান্বিতাঃ || ২২৭||
ইতি ভরতীয়ে নাট্যশাস্ত্রে ছন্দোবিচিতির্নাম পঞ্চদশোঽধ্যায়ঃ |