রাঘবেন্দ্র স্তোত্র

 .. রাঘবেন্দ্র স্তোত্র ..

শ্রীপূর্ণবোধগুরুতীর্থপযোব্ধিপারা কামারিমাক্ষবিষমাক্ষ শিরঃ স্পৃশংতী .
পূর্বোত্তরামিত তরঙ্গ চরত্সুহংসা দেবালিসেবিত পরাংঘ্রি পযোজলগ্না .. ১..

জীবেশভেদগুণপূর্তিজগত্সুসত্ত্ব নীচোচ্চভাবমুখনগ্রগণৈঃ সমেতা  .
দুর্বাদ্যজাপতিগিলৈর্গুরুরাঘবেংদ্রবাগ্দেবতাসরিদমুং বিমলীকরোতু .. ২..

শ্রীরাঘবেংদ্রঃ সকলপ্রদাতা স্বপাদকংজদ্বযভক্তিমদ্ভ্যঃ  .
অঘাদ্রিসংভেদনদৃষ্টিবজ্রঃ ক্ষমাসুরেংদ্রোঽবতুমাং সদাঽযম্  .. ৩..

শ্রীরাঘবেংদ্রোহরিপাদকংজনিষেবণাল্লব্ধসমস্তসংপত্  .
দেবস্বভাবো দিবিজদ্রুমোঽযং ইষ্টপ্রদো মে সততং স ভূযাত্  .. ৪..

ভব্যস্বরূপো ভবদুঃখতূল সঙ্ঘাগ্নিচর্যঃ সুখধৈর্যশালী  .
সমস্তদুষ্টগ্রহনিগ্রহেশো দুরত্যযোপপ্লবসিংধুসেতুঃ  .. ৫..

নিরস্তদোষো নিরবদ্যবেষঃ প্রত্যর্থিমূকত্ত্বনিদানভাষঃ  .
বিদ্বত্পরিজ্ঞেয মহাবিশেষো বাগ্বৈখরীনির্জিতভব্যশেষঃ  .. ৬..

সংতানসংপত্পরিশুদ্ধভক্তি বিজ্ঞানবাগ্দেহসুপাটবাদীন্  .
দত্বা শরীরোত্থ সমস্তদোষান্ হত্বা স নোঽব্যাদ্গুরুরাঘবেংদ্রঃ  .. ৭..

যত্পাদোদকসংচযঃ সুরনদীমুখ্যাপগাসাদিতা
সংখ্যানুত্তমপুণ্যসঙ্ঘবিলসত্প্রখ্যাতপুণ্যাবহঃ  .
দুস্তাপত্রযনাশনো ভুবি মহা বংধ্যাসুপুত্রপ্রদো
ব্যঙ্গস্বঙ্গসমৃদ্ধিদো গ্রহমহাপাপাপহস্তং শ্রযে .. ৮..

যত্পাদকংজরজসা পরিভূষিতাঙ্গা যত্পাদপদ্ম মধুপাযিত মানসা যে .
যত্পাদপদ্ম পরিকীর্তনজীর্ণবাচস্তদ্দর্শনং দুরিতকানন দাবভূতম্  .. ৯..

সর্বতংত্রস্বতংত্রোঽসৌ শ্রীমধ্বমতবর্ধনঃ  .
বিজযীংদ্রকরাব্জোত্থা সুধীংদ্র বরপুত্রকঃ  .
শ্রীরাঘবেংদ্রো যতিরাড্ গুরুর্মে স্যাদ্ভযাবহঃ  .. ১০..

জ্ঞানভক্তিসুপুত্রাযুঃ যশঃ শ্রীপুণ্যবর্ধনঃ  .
প্রতিবাদিজযস্বাংতভেদচিহ্নাদরো গুরুঃ  .
সর্ববিদ্যাপ্রবীণোঽন্যো রাঘবেংদ্রান্নবিদ্যতে .. ১১..

অপরোক্ষীকৃতঃ শ্রীশঃ সমুপেক্ষিতভাবজঃ  .
অপেক্ষিতপ্রদাতাঽন্যো রাঘবেংদ্রান্নবিদ্যতে  .. ১২..

দযাদাক্ষিণ্যবৈরাগ্য বাক্পাটবমুখাংকিতঃ  .
শাপানুগ্রহ শক্তোঽন্যো রাঘবেংদ্রান্নবিদ্যতে  .. ১৩..

অজ্ঞানবিস্মৃতিভ্রাংতি সংশযাপস্মৃতিক্ষযাঃ  .
তংদ্রাকংপবচঃ কৌণ্ঠ্যমুখা যে চেংদ্রিযোদ্ভবাঃ  .
দোষাস্তে নাশমাযাংতি রাঘবেংদ্রপ্রসাদতঃ  .. ১৪..

৐ শ্রী রাঘবেংদ্রায নমঃ ইত্যষ্টাক্ষর মংত্রতঃ  .
জপিতাদ্ভাবিতান্নিত্যং ইষ্টার্থাঃ স্যুর্নসংশযঃ  .. ১৫..

হংতু নঃ কাযজান্ দোষান্ আত্মাত্মীযসমুদ্ভবান্  .
সর্বানপি পুমর্থাংশ্চ দদাতু গুরুরাত্মবিত্  .. ১৬..

ইতি কালত্রযে নিত্যং প্রার্থনাং যঃ করোতি সঃ  .
ইহামুত্রাপ্ত সর্বেষ্টো মোদতে নাত্র সংশযঃ  .. ১৭..

অগম্য মহিমা লোকে রাঘবেংদ্রো মহাযশাঃ  .
শ্রীমধ্বমতদুগ্ধাব্ধি চংদ্রোঽবতু সদাঽনঘঃ  .. ১৮..

সর্বযাত্রা ফলাবাপ্ত্যৈর্যথাশক্তিপ্রদক্ষিণম্  .
করোমি তব সিদ্ধ্যস্য বৃংদাবন গতং জলম্  .
শিরসা ধারযাম্যদ্য সর্বতীর্থফলাপ্তযে  .. ১৯..

সর্বাভীষ্টার্থসিদ্ধ্যর্থং নমস্কারং করোম্যহম্  .
তব সঙ্কীর্তনং বেদশাস্ত্রার্থজ্ঞানসিদ্ধযে  .. ২০..

সংসারেঽক্ষযসাগরে প্রকৃতিতোঽগাধে সদা দুস্তরে .
সর্বাবদ্যজলগ্রহৈরনুপমৈঃ কামাদিভঙ্গাকুলে  .
নানাবিভ্রমদুর্ভ্রমেঽমিতভযস্তোমাদিফেনোত্কটে  .
দুঃখোত্কৃষ্টবিষে সমুদ্ধর গুরো মাং মগ্নরূপং সদা  .. ২১..

রাঘবেংদ্রগুরুস্তোত্রং যঃ পঠেদ্ভক্তিপূর্বকম্  .
তস্য কুষ্ঠাদিরোগাণাং নিবৃত্তিস্ত্বরযা ভবেত্ .. ২২..

অন্ধোঽপি দিব্যদৃষ্টিঃ স্যাদেডমূকোঽপি বাক্পতিঃ  .
পূর্ণাযুঃ পূর্ণসংপত্তিঃ স্তোত্রস্যাস্য জপাদ্ভবেত্  .. ২৩..

যঃ পিবেজ্জলমেতেন স্তোত্রেণৈবাভিমংত্রিতম্  .
তস্য কুক্ষিগতা দোষাঃ সর্বে নষ্যংতি তত্ক্ষণাত্  .. ২৪..

যদ্বৃংদাবনমাসাদ্য পঙ্গুঃ খংজোঽপি বা জনঃ  .
স্তোত্রেণানেন যঃ কুর্যাত্ প্রদক্ষিণ নমস্কৃতী  .
স জঙ্ঘালো ভবেদেব গুরুরাজপ্রসাদতঃ  .. ২৫..

সোমসূর্যো পরাগে চ পুষ্যার্কাদিসমাগমে  .
যোঽনুত্তমমিদং স্তোত্রমষ্টোত্তরশতং জপেত্  .
ভূতপ্রেতপিশাচাদিপীডা তস্য ন জাযতে  .. ২৬..

এতত্ স্তোত্রং সমুচ্চার্য গুরোর্বৃন্দাবনাংতিকে  .
দীপসংযোজনাজ্ঞানং পুত্রলাভো ভবেদ্ধ্রুবম্  .. ২৭..

পরবাদিজযোদিব্য জ্ঞানভক্ত্যাদিবর্ধনম্  .
সর্বাভীষ্টপ্রবৃদ্ধিঃ স্যান্নাত্র কার্যা বিচারণা  .. ২৮..

রাজচোরমহাব্যাঘ্রসর্পনক্রাদিপীডনম্  .
ন জাযতেঽস্য স্তোত্রস্য প্রভাবান্নাত্র সংশযঃ  .. ২৯..

যো ভক্ত্যা গুরুরাঘবেংদ্র চরণদ্বংদ্বং স্মরন্ যঃ পঠেত্  .
স্তোত্রং দিব্যমিদং সদা নহি ভবেত্ তস্যাসুখং কিংচন  .
কিং ত্বিষ্টার্থ সমৃদ্ধিরেব কমলানাথপ্রসাদো দযাত্  .
কীর্তির্দিগ্বিদিতা বিভূতিরতুলা সাক্ষী হযাস্যোঽত্র হি  .. ৩০..

ইতি শ্রী রাঘবেংদ্রার্য গুরুরাজপ্রসাদতঃ  .
কৃতং স্তোত্রমিদং পুণ্যং শ্রীমদ্ভির্হ্যপ্পণাভিদৈঃ  .. ৩১..

          ইতি শ্রী অপ্পণ্ণাচার্যবিরচিতং
          শ্রীরাঘবেংদ্রস্তোত্রং সংপূর্ণম্

          .. ভারতীরমণমুখ্যপ্রাণাংতর্গত শ্রীকৃষ্ণার্পণমস্তু ..